أكاديمية الحوت - تجارب قدرات (علمي)

اولاً الحمدلله على كل حال والحمدلله دائما وابدا 💙
من اجازه اول ثانوي لثاني وانا اذاكر
اول محاولتين٧٣،،٧٤ لكن خيره الحمدلله
غيرت طريقه المذاكره وجبت هالدرجتين الحمدلله

طريقه المذاكره:

تاسيس المعاصر تدريب المنصف وايهاب لفظي الكمي حليت الاساله حقت القوانين بالتاسيس والتدريب فهم وماراجعت التدريب قبل مابدا باللفظي راجعت القوانين اللي بالمعاصر واللفظي طريقتي اتابع الحصه وأحل الرابط بعده واصور الاغلاط وكل يوم اراجع كل الروابط اللي قبل وابدا بالجديد يوم خلصت اللفظي راجعت المعاصر القوانين وراجعت اللفظي كامل خمس مرات قبل الاختبار وبيوم الاختبار راجعت قوانين الكمي

—
كان معكم MM 💙✨

الحمدلله على ما حققت كله بفضل الله

ماشاء الله 🤍🤍
التأسيس:
كتاب المعاصر عماد الجزيري
شرح الكتاب في ثنين قناة قدراتي غير باليوتيوب( مجانا) تشرح المعاصر 8 وباركود بالكتاب شرح للمسائل وفي تاسيس المنصف لكن رؤوس اقلام مو شامل كل شيء اعتمدت على ذولي الثلاث مصادر
طريقة الدراسه:
اول شيء تشوف شرح القاعده وتبدا تحاول تحل المسائل بنفسك وتتدرب كثير وكل سؤال مافهمته وماعرفت له كنت اشوف شرحه وأشر عليه بقلم وارجع له اكثر من مره لين اتاكد اني فهمت القاعده كويس بخصوص الكتاب عدته اكثر من مره لين تاكدت مستواي بالتاسيس كويس والاسئله اللي ما افهمها من شرحهم كنت ارسلها لقروبات تيليجرام وكنت اسجل القوانين بدفتر واراجع عليهم بين فتره وفتره

اللفظي مصدر واحد هو شامل
ايهاب عبدالعظيم فقط ذاكرت البنوك وحفظتها وتدربت عليها ختمته اكثر من مره لين تاكدت اني حافظتها زين وبالاختبار جاني قسم واحد جديد لكن مو مشكله اهم شيء مع الحفظ يكون في فهم وتدريب زين
التدريب كمي
اعتمدت على مصدر واحد عماد الجزيري للبنوك الجديده
الكمي مهم جدا لانه بالعاده يكون في اسئله جديده بس الافكار سهله وتعتمد على التدريب اخترت عماد من ناحية عدد الاسئله كان اكبر واقدر اتدرب اكثر
طريقة الدراسه:
كنت احل بنفسي وبعد الحل اشوف شرح الاستاذ ممكن طريقته اسرع واذا كنت مو فاهمه على شرحه اسال قروبات تيليجرام واي سؤال كنت اغلط فيه سواء كمي او لفظي كنت اجمعها بملف واراجع عليها كثيرر وبعض الاسئله لو غلطت فيها اكثر من مره احتياط احفظ الارقام بس ماعتمدت على الحفظ ابدا لانه ممكن يغيرون الارقام لكن من باب الاحتياط تتذكر صيغته وصيغة الحل بعد

نصائح مهمه جدا
◦ مدة الاختبار لاتكون بعيده لانه بتبدا تنسى اقصى شيء 4 الى 5 شهور
◦ لازم تكون المذاكره متواصله عشان يتطور المستوى
◦ سورة البقره والدعاء والوتر
◦ مهم تراجع الاخطاء اللي كنت تخطىء فيها قبل الاختبار باسبوع وتبدا مراجعة ختاميه لكل شيء لانه غالبا بتجيك كثير من الاسئله اللي كنت تغلط فيها او نفس الصيغه والاسئله اللي تتركها عشان كذا حاول تذاكر زين
◦ بعد التاسيس طبيعي ما يكون المستوى مره ممتاز لا يصير ممتاز مع التدريب وعشان ما انسى التأسيس كنت اختبر كويزات بتيليجرام

السلام عليكم ورحمة الله وبركاته..
معاكم أختكم طالبة في جامعة الملك سعود
خريجة 2024
طبعاً ماننسى الدفعات القادمة من الدعوات الحنونة ❤️
أكتب لكم تجربتي واتمنى من الله عز وجل ان تكون خفيفة لطيفة على قلوبكم

المصادر :
تأسيس الكمي :
كتاب المعاصر .
لا تذهب الى مقاطع عشر دقائق او التأسيس بيومين وما الى ذلك لأنك ستدور حول دائرة تكاد لاتخرج منها
وتعود الا الصفر حتماً عند كتاب المعاصر✨!

اكيد سمعتوا فيه بس الغريب ماسمعتوا كيف نذاكر له؟

1 لاتمشي على خطه في وقت معين لأن الكتاب يحتاج جهد ف بتتحطم اذا ماخلصت درسين بيوم! علماً انه مُجهد ويحتاج منك جهد (كبدايه) لكن الممارسة تعلم الشطار -
2 كل شي حبة حبة افتح الدرس تابع مقاطع العمدة عادي واذا قعدت بالصفحة يومين؟ وين المشكلة انت مخير ( تذاكر الدرس بيوم وتخلص بشهر ولا تفقه من الكمي شيئا او تقعد عالدرس يومين وتخلص بشهرين وتكون برفيسور الكمي؟ )
3 ورقة وقلم وحرك اليدين شغل النظر ماينفع
4 هل اكتب القوانين؟ ماشوف له داعي اهم شي النوتات فوق كل درس فيه معلومات ذهبيه تحتاج تكتبها ف النوت افضل من دفتر وتتقروشون.
5 اشوف الدفتر فقط للحل ، خف يدك وتزيد درجتك✨
6 بعد كل درس حطوا مكافئة لكم ( كندر ، كوب شاي ، كوب قهوه ، طلعة ، اي شي حنون ويلامس قلبكم🥳
7 صح طولت بكتاب المعاصر بس جبت مئة بتغيير النماذج🥳
8 —————
9 التدريب :
10 انت محتار بين المنصف والمعاصر أعلم بما يدور حول ذهنك حالياً ولكني أرى الأرجح انت تحدد بناء عاللي بقوله ( انت تأسيسك قوي ، تفهم التمارين ، ماتحتاج شرح، عندك تكنيكات ، خيارك الأفضل المعاصر)
11 ( انت تأسيسك مُش ولا بُد ، تحتاج احيانا شرح ، الاختصارات ضعيف فيها نوعاً ما خيارك الأفضل المنصف )

——————
المنصف VS المعاصر

المعاصر : تأسيسه قوي جداً ، تدريباته مو كلها في عالم القدرات ويعطيك طرق جديدة تنصدم فيها بالتدريب البعض يتقبل الموضوع والبعض ينصدم انا عن نفسي كنت اتلخبط ف كان خياري هو المنصف .


المنصف : تأسيسه اكاديمي اكثر من كونه قدرات يعني يأسسك بعيدا عن تكنيكات القدرات ، يعجبني شرحه في بعض التمارين فيه طرق يسهلها وفيه طرق يصعبها اخترته لاني ابي تمارينه اغلبها تجي وماكنت احتاج شرحه لكن احيانا اشوفها .

——————
اللفظي ⛔️

ايهاب ايهاب ايهاب ايهاب
اول كنا ننصح فيه بس الكل يتوزع بين المصادر
لكن مع تغيير النماذج
مالكم الا ايهاب اصلاً 😢!
اكثر شخص يعطي من قلبوا في اللفظي
لكن عندي تنويه بسيط

⛔️النماذج تتغير لا يعني ان حل ايهاب صائب دوما -
بقولكم وش اقصد بكلامي؟
انا دخلت فرصه من فرصي واعتمدت كلياً على حله ونقصت نوعا ما باللفظي دخلت المرا الثانيه وجتني قطعه كانت عنده وقريتها وفاهمتها وكل حاجة
انصدمت بأن البارت الاخير من القطعه متغير بلاختبار!!!
وجابوا لي سؤال نفس ايهاب ونفس ترتيب الخيارات لكني غيرت اختيار ايهاب بسبب ان القطعه تغيرت قدامي
ف ركزو ركزو ركزو وايهاب دايممم ينبهكم .

مدري وش صار حالياً باللفظي هل ثبتت القطع او لا لكن وجب التنويه والتركيز .


وفي نهاية المطاف أعتنوا بصحتكم أبتعدوا عن السلبيين وبذات حقين ( ولاشي جاني من الملفات)
أدعوا الله عز وجل وأوتروا
وتذكروا دوماً !

الشخص اللي يأخذ من وقته للغير ربي يرزقه من حيث لايحتسب
انتم هنا تساعدون بكل نيه صافيه وقلب طيب
صدقوني المساعدات والردود الحنونة والدعم اللي يجي منكم كله يتسجل في ميزان حسناتكم
ماتدرون يمكن ربي يرزقك درجة ماكانت بالحسبان اصلاً يبهركم ربي فيها على نيتك الطيبة
وانا واثقة بمشيئة الله فيكم وفي اي شخص يساعد الغير ربي بيبهره بالرزق والتوفيق والتييسير
وش قال الرسول عليه افضل الصلاة والتسليم ؟
احب الناس الى الله أنفعهم للناس
ودايم تذكروا
حديث النبي
من نفس عن مؤمن كربة من كرب الدنيا نفس الله عنه كربة من كرب يوم القيامة


أحسنوا النية في العمل والعلم وتذكروا دوما
( إن الله يحب إذا عمل أحدكم عملاً أن يتقنه)

بتوفيق 447🩵🩵🩵🩵🩵.

السلام عليكم انا تركي طالب ثالث

الحمدلله رب العالمين ( ما شاء الله )

افضل تجربه تعلمتها بالقدرات هي الصبر والكفاح والتقرب من رب العالمين

كنت ذاك الشخص الي في بدايه القدرات يأمل انه يجيب فوق ٩٠ وكنت اشوف الي يسوون ذا الشي مجانين او نوابغة كيف يسوون ذا الشي ؟ ، القدرات رحلتها زي رحله اختبارات نهائيه وجب فيها التاسيس من كتاب والتدريب من المنصف الله يسعدكم جميعًا على من قام بتجميع الاسئله كانت اغلبها نسخ لصق واذا تغيرت الارقام تكون نفس الفكره بالضبط

الموضوع من الجانب النفسي : كنت فعلا متحطم وكنت اشوف نفسي هذاك الشخص الفاشل الي والله ما كنت اعرف كيف اضرب الف في ميه لهالدرجه متخيلين كيف كنت سيء؟ ما اعرف كيف احط الاصفار بالناتج والتبسيط واشوفه شي صعب مره ورقمين في بعض مستحيل اضربهم ، لكن امي ما خلتني لحالي وأصرت علي اني كويس بالرياضيات واني اقدر اجيب درجه وفعلا حمدلله جبت درجه ترضيني وترضيها الله يطول باعمار امهاتكم واللي متوفيه ربي يرحمها ويغفر لها ، الي حبيت اوصله لا تتحطم ابدا ابدا ابدا ابدا ، يمديك والله يمديك مافي شي بهالدنيا مستحيل ، ربي ما حطك بهذا الاختبار الا وانت لك القدره انك تتجاوزه بافضل شكل ممكن لكن مشكلتنا ما نبغى نتعب انفسنا ونزعل اذا جبنا درجه سيئه

خلاصه التجربه : ايهاب لفظي معروف ما يحتاج كرر الاختبارات الالكترونيه لين ما تطفش منها وتكرهها + تاسيس من اي شي يعجبك وانصح بالمنصف بالتدريب لانه رهيب جدا جدا مثل ما ذكرت فوق والمنصف عيده قد ما تقدر لانه هذا الشي ضرورته زي ضروره المذاكره
والتقرب من رب العالمين لان والله انا دون الله ما استاهل ذي الدرجه صلو الوتر والضحى وتصدقو قد ما تقدرون (قد ما تقدر)

دعوااتكم لي بالتحصيلي ☝🏻🩵.

سلام عليكم معاكم وليد الحاصل على درجة ٩٦ في القدرات ولله الحمد

بقولكم تجربتي بكل اختصار

١- التأسيس كان من المعاصر والصدق اني اشوفه افضل مصدر للتأسيس لكن لازم يا اخوان يكون تأسيسكم من حديد خصوصا اننا في فترة تغيير

٢- عماد ال ٧٠ اصدار جدا جميلة ضروري بعد ما تتأسسون من حديد تذاكرون الاصدار وتعتمدون على الفهم قبل الحفظ لان الحفظ في الكمي مارح يفيدكم ضروري تذاكرون الاسئلة اكثر من مرة وما تتركون شي الا وانتم فاهمينه

٣- اللفظي من ايهاب وهو الافضل بدون نقاش سبع بنوك اسئلة وحرفيا كل الاختبار كان منهم ، ضروري بعد ما تتأسسون في اللفظي تفهمون وتحفظون هذي البنوك فعلا الاختبار كله منها

٤- بخصوص طريقة المذاكرة كل واحد له طريقة في المذاكرة فيه ناس تحب تذاكر وتراجع في نفس الوقت وفي ناس تذاكر في مدة زمنية بسيطة ويقضون بعدها وقت طويل في المراجعة والي الطريقة الي انا اتبعتها

اخيرا ، ضروري يا جماعة تصلحون علاقتكم مع الله سبحانه وتعالى صدقوني مارح تلقون السعادة والتوفيق الا بقربكم بالله سبحانه وتعالى حافظوا على صلواتكم واذكارهم وانصحكم بقيام الليل والدعاء

بسم الله الرحمن الرحيم
أهلاً انا طالب ثاني ثانوي وطالع وحاب اشارككم تجربتي

الحمدلله هذي درجتي ليست الافضل ولكن راضي فيها بمدة مذاكرتي.

اولاً هذا بفضل الله سبحانه وتعالى وليس لي فضل فيه فقط عملت بالأسباب.

فالبداية انا كنت شخص كسول جداً م كان لي نفس اذاكر وبعدها اختبرت تجربه وبدون مذاكره وجبت 62 ولا انصح احد انه يدخل تجربه 🙏🏻 وبعدها شلت هم الحجب لو اذاكر بتنحجب وبتكلم عن الحجب اخر شي لأن الكثير متخوف منه

مدة مذاكرتي للأختبار الثاني والي يعتبر الأول كانت شهر ونص الى شهرين وأخر ثلاث اسابيع طبقت نظام 24/7 بسبب ضيق الوقت

تأسيس كتاب المعاصر 8 شرح عماد الجزيري

وتدريب المنصف أول 700 سؤال فقط بسبب ضيق الوقت وأنصح لو عندك وقت ذاكر الـ3000 الأف كاملة

واللفظي إيهاب الافضل وبفضل الله ثم هو جبت 96,5 باللفظي

بالنسبة للكمي كانت طريقتي افتح الباركود واشوف شرح القانون فقط وأحفظه وبعدها أحل المسائل الي ع القانون واذا غلطت اكمل المقطع ، التأسيس أخذ مني شهر ويمديك تخلصه في أقل من شهر ،ولا تسوووففف ابدًا

وبعدها راجعت التأسيس كامل ولخصته في دفتر صغير ( أهم شي تكتبب بيدك لا تاخذ او تشتري ملخصات جاهزة ) وواجهني ظرف ووقفت مذاكره اسبوع وهذا الي ضيعني كثير وبكذا كان باقي ع إختباري 20 يوم فقط وباقي م بديت فاللفظي ! والحين بتكلم عن اللفظي

اللفظي م يحتاج تتأسس ع طول ابدأ بالتدريب ،، كنت بعد كل محاضره اختبر الكويز وأروح للي بعدها ( وانصح لو عندك وقت كرر الكويزات كثير لأن التكرار يثبت المعلومة ) وخلصت اللفظي وكان باقي ع اختباري يوم وراجعت فيها اربع بنوك بس وكنت متخوف جداً وأبي أاجل اختباري وخوف وضغط نفسي فضيع لكن توكلت ع الله وصليت الوتر والضحى ويعلم الله ان حسيت براحه واطمئنان لا يعلم فيها ألا الله

وبتكلم عن نقطه اشوفها غلط بين الطلالب فاللفظي الي يقولك ذاكر اخر بنكين وأختبر او ركز ع البنك الفلاني الشيء هذا غلط انا راجعت اول اربع بنوك وكانوا كثير يقولون ليه م راجعت اخر كم بنك والخ ،، واختباري حرفياً كله من اول بنكين الا كم سؤال من اخر ثلاث بنوك ، عشان كذا اقولك ركز ع كل البنوك وذاكر كلشي وأضمن

وكان اختباري سهل وجاني كثير نسخ لصق من المنصف واللفظي كان سهل وكله من ايهاب والحمدلله جبت 92 وكنت منصدم كيف م جاني حجب! الحين بتكلم لكم عن الاخطاء الي واجهتني واخطاء اشوفها فالطلاب

اولاً
الحجب اشوف كثير متخوف منه ولكن لو تفكر فالجانب المشرق ان احتمال تجيب درجه اكثر من المحجوبه واعرف ناس صارت لهم كذا وزعلوا بعدين حمدوا ربهم ع الحجب ، وزي م انتوا شايفين الفرق بين درجتي الاولى والثانية 30 درجه والمدة أقل من اربع شهور وما جاني حجب! عشان كذا اقولك لا تشيل هم الحجب ولا تعطيه اكبر من حجمه وتفكر فيه زيي لان تعبني جداً وتوكل ع الله وربي م بيضيع تعبك !

ثانياً
لا تستمع للمحطمين ابداً وخل ثقتك بالله عاليه وقويه انا م كنت متوقع اني بجيب الدرجه هذي لكن الدعاء والوتر لو اتكلم من اليوم لبكره م راح أوصف لكم شعورها وفضلها ،، ونصيحههه أضغط نفسك وانت مرتاح ولا تضغط نفسك وانت مضغوط وتغلط زي غلطي

ثالثاً
وأخر شي وأهم شي
والله لو تاكل الكتاب أكل وتذاكره من الألف الى الياء لكن علاقتك من الله ضعيفه ان م بتشوف التوفيق

التوفيق جزئين الأهم علاقتك مع ربك وأفعل بالأسباب وتوكل ع الله وبتشوف عجائب قدرته سبحانه

ولا تنسوني من دعواتكم الله يعافيكم وادعولي أقفل فالمحاوله الثالثه ودعواتكم لي بالتحصيلي 🙏🏻

الكمي :
تأسيس عماد كتابه ينباع بجرير


اما التدريب فهو المنصف لا تتعدونها ابد تشترك ب٣٠٠ ريال فيها فوق الثلاث آلاف سؤال

اللفظي:

تأسيس ماتاسست و ما يحتاج على كلام كثير جابو مية فيه

التدريب إيهاب ٦ بنوك رئيسية والباقي حول ٤٠ صفحة اللي هي السابع والثامن كلام فاضي ماتاخذ وقت

وترا يخوان انا قعدت قبل ما ابدا اذاكر حول شهرين ادور في التجارب حول ٥٠ تجربه كلهم فوق ٩٥ ذاكرو نفس ذي المصادر


طبعا الصلاه وذكر الله فوق كل شي، وربي انك لو تفت المنصف كامل بدون توفيق الله ورضاه ما تجيب درجة

بسم الله بتكلم عن رحلتي مع القدرات
بدأت تأسيس من اجازة اول ثانوي ركزت مرة على تأسيس الكمي وللاسف سحبت على اللفظي كنت اذاكرو مرة وحدة وما اراجعو طبعا غلط لان بالاخير بتنسى كل شي هذي الفترة كان وقتها النماذج ثابتة بس للاسف ما ركزت على اللفظي ورحت اول محاولة الترم الثاني في ثاني ثانوي جبت ٨٧ الكمي ٩٧ واللفظي ٧٦ طبعا كان غلط مني لاني اهملت اللفظي
بعدين سحبت على المذاكرة من الترم الثاني في ثانوي لنهاية السنة تغيرت النماذج بهذي الفترة وما كنت ادري ذاكرت شهر كامل النماذج القديمة وللاسف ما استفدت منهم شي بسبب التغيير ضل معي شهر ذاكرت من المنصف كمي اللفظي ما كان في مصدر محدد اختبرت في اول ترم بثالث وطلعت الدرجة ٩٣ مرة ثانية الكمي ٩٦ واللفظي ٩٠ قررت اذاكر من ايهاب لفظي والكمي ما غيرت مصدري المنصف ورحت اختبرت اجازة الترم الثاني بثالث وجبت ٩٧ كنت اطمح للمية بس ربي ما كتبها وانا راضية
وبالتوفيق للجميع الله يرزقكم المية🤍🤍🤍

رحلتي مع القدرات
السلام عليكم معاكم زهراء صاحبة درجة ١٠٠ في القدرات ماشاء الله و بإذن الله التحصيلي

بدأت مذاكرة من ثالث متوسط دخلت دورتين للتأسيس وحده كان مستواها متدني و حصل لي ظرف وفاة و ماكملتها و الثانيه استفدت منها للأمانه بس لو تأسستوا من عماد و ايهاب يغنيكم عنها ، ثم في عطلة اولى ثانوي رجعت تأسست من الدوره و شريت كتاب المنصف 2 الصراحه كتاب تأسيسه و تدريبه قوي بس فيه عيوب منها ان التمارين الصعبه ما يشرحها في الباركود عشان احصل على شرح كامل الكتاب لازم اشترك بدورته الي قيمتها ٣٠٠ ، طلبت المعاصر ٦ تأسست منه فقط بعد ممتاز نزل ٧ ذاكرته بعد فقط تدريب ممكن عدته ٤ مرات ثم ذاكرت معاصر ٨ الصراحه ما فتحت تأسيسه بس راجعت قسم السرعه بالنسبه للفظي ايهاب افضل شيء بلا منازع انا رحت شريت اكثر من كتاب و تمنيت لو عرفته من قبل لا اشتري صراحه لا يعلا عليه

و تفائلو بالخير تجدوه ان شاء الله ♥️ + مهما حصل من تغييرات ثق بالله و اجتهد الله مايضيع تعب انا كان اختباري فترة تغييرات و الحمدلله رب العالمين صح جاتني اسئله جديده في القسمين بس مع التأسيس الصح قدرت اجاوبهم صح و قفلت اسئلة لفظي الحمدلله