ရခိုင်နေ့စဉ်

စစ်တွေမြို့တွင် မှတ်ပုံတင်(အတု)ပြုလုပ်ပေးသူတစ်ဦး ဖမ်းဆီးရမိ
===================
မေ ၂၉၊ ရခိုင်နေ့စဉ်

စစ်တွေမြို့၊ အောင်မင်္ဂလာရပ်ကွက်၊ သာဘန်းလမ်းရှိ ဖြိုးတည်းခိုခန်း၌ မှတ်ပုံတင်(အတု)ပြုလုပ်ပေးသူတစ်ဦး ရောက်ရှိနေကြောင်းသတင်းအရ မေလ ၂၇ ရက်နေ့ ည ၉ နာရီခန့်တွင် တာဝန်ရှိသူများက ဝင်ရောက်ရှာဖွေစစ်ဆေးခဲ့ရာ သိန်းထိုက်(ခ)စိုးမိုးနိုင်(ခ)ဇီရာအိုဟောက် (၄၃)နှစ်၊ (ဘ)ဦးမောင်သိန်း၊ ရမ်ပူရပ်ကွက်၊ မြစ်ကြီးနားမြို့နေသူအား မှတ်ပုံတင်(အတု) ၁၃ ခုနှင့်အတူ ဖမ်းဆီးရမိခဲ့ကြောင်း သိရသည်။

စစ်ဆေးမေးမြန်းချက်အရ ၎င်းသည် စစ်တွေမြို့ရှိ ပွဲစားများဖြစ်သော ဒါးပိုင်ကျေးရွာနေ ခင်မောင်ဇော်(၂၀)နှစ်၊ သဲချောင်းကျေးရွာနေ ဇော်ဇော်အောင် (၂၇)နှစ်၊ သက္ကေပြင်ကျေးရွာနေ ဦးမောင်လှ (၅၀)နှစ်တို့နှင့် ချိတ်ဆက်၍ မှတ်ပုံတင်(အတု)ပြုလုပ်လိုသူများ၏ အချက်အလက်များကိုရယူပြီး ရန်ကုန်တိုင်းဒေသကြီး၊ တာမွေမြို့နယ်နေ ရဲနိုင်ထွန်း ဆိုသူထံသို့ပေးပို့ကာ မှတ်ပုံတင်(အတု)ပြုလုပ်ပေးနေသူဖြစ်ကြောင်း ထွက်ဆိုခဲ့သည်။

အဆိုပါအမှုနှင့်ပတ်သက်၍ မှတ်ပုံတင်(အတု)ပြုလုပ်သူ သိန်းထိုက် အပါအဝင် ၅ ဦးအား စစ်တွေမြို့မရဲစခန်းတွင် အမှုဖွင့်အရေးယူထားပြီး ဆက်စပ်တရားခံများမှာ ထွက်ပြေးတိမ်းရှောင်လျက်ရှိသဖြင့် ဖမ်းဆီးရမိရေးဆောင်ရွက်လျက်ရှိကြောင်း သတင်းရရှိသည်။

#ရခိုင်နေ့စဉ်

စစ်တွေမြို့တွင် မှတ်ပုံတင်(အတု)ပြုလုပ်ပေးသူတစ်ဦး ဖမ်းဆီးရမိ

မောင်တောမြို့နယ်၊ ဝိမလရပ်ကွက်တွင် ၁ ဒသမ ၅ ဘီလီယံတန်ဖိုးရှိ စိတ်ကြွရူးသွပ်ဆေးပြားများနှင့်အတူ တရားခံတစ်ဦးဖမ်းဆီးရမိ
===================
မေ ၂၈ ၊ ရခိုင်နေ့စဉ်

မောင်တောမြို့နယ်၊ ဝိမလရပ်ကွက်အား ယမန်နေ့ နေ့လယ်ပိုင်းတွင် လုံခြုံရေးအဖွဲ့ဝင်များက သတင်းအရ ဝင်ရောက်စစ်ဆေးစဉ် စိတ်ကြွရူးသွပ်ဆေးပြားများနှင့်အတူ တရားခံတစ်ဦး ဖမ်းဆီးရမိခဲ့ကြောင်း သိရသည်။

ဖမ်းဆီးရမိတရားခံမှာ အဆိုပါရပ်ကွက် အိမ်အမှတ်(၂၀၈)နေ မြင့်နိုင်ထူး(၄၅)နှစ်၊ (ဘ)ဦးအောင်ကျော်ထူးဖြစ်ပြီး ၎င်း၏နေအိမ်အတွင်း အနီရောင်ပလပ်စတစ်ပုံးဖြင့် ထည့်ထားသော WY စာတန်းပါ စိတ်ကြွရူးသွပ်ဆေးပြား ၇၅၀,၀၀၀ ပြား၊ (ကာလတန်ဖိုး ၁ ဒသမ ၅ ဘီလီယံ)ခန့်အား ဖမ်းဆီးရမိခဲ့ခြင်းဖြစ်ကာ ဥပဒေနှင့်အညီ အမှုဖွင့်အရေးယူထားသည်ဟု သိရှိရသည်။

ယခင်ကလည်း မောင်တောမြို့နယ်တွင် မူးယစ်ဆေးဝါးအများအပြား ဖမ်းဆီးရမိမှုများရှိခဲ့ပြီး ပြီးခဲ့သည့် ၂၀၂၃ ခုနှစ်၊ ဒီဇင်ဘာလက မူးယစ်ဆေးဝါးကုန်ကူးသော အဖွဲ့တစ်ဖွဲ့ကို ရန်ကုန်တိုင်းဒေသကြီး၌ ဖမ်းဆီးရမိခဲ့ရာ အဆိုပါဖမ်းဆီးရမိသူများထဲတွင် AA အကြမ်းဖက်သောင်းကျန်းသူများ ကိုယ်တိုင်ပါဝင်နေကြောင်း တွေ့ရှိရသည်။

#ရခိုင်နေ့စဉ်

ဂွ-ငါးသိုင်းချောင်းကားလမ်း၊ မိုင်တိုင်အမှတ်(၃၈/၄)အနီးတွင် တရားမဝင်သစ်များ တင်ဆောင်လာသော မော်တော်ယာဉ်တစ်စီးနှင့်အတူ တရားခံ ၂ ဦးဖမ်းဆီးရမိ
===================
မေ ၂၅ ၊ ရခိုင်နေ့စဉ်

ဂွမြို့၏ အရှေ့ဘက် ဗေဒါ(၁)ဘိနယ်၊ ဂွ-ငါးသိုင်းချောင်းကားလမ်း၊ မိုင်တိုင်အမှတ်(၃၈/၄)အနီးတွင် မေလ ၂၄ ရက်နေ့ နံနက် ၁ နာရီခန့်က တရားမဝင်သစ်များ တင်ဆောင်လာသော မော်တော်ယာဉ်တစ်စီးနှင့်အတူ တရားခံ ၂ ဦး ဖမ်းဆီးရမိခဲ့ကြောင်း သိရှိရသည်။

တရားမဝင်သစ်များ ခုတ်ယူခိုးထုတ်မှုမရှိစေရေး တာဝန်ရှိသူများက သတင်းစုံစမ်း စစ်ဆေးခြင်းများဆောင်ရွက်စဉ် ယာဉ်မောင်း သန်းဇော်လင်း(၃၆)နှစ်၊ (ဘ)ဦးပါတီနှင့် ယာဉ်နောက်လိုက် ဝင်းကို(၁၇)နှစ်၊ (ဘ)ဦးဆန်းဝင်း၊ မြင်းကကွင်းကျေးရွာ၊ ပုသိမ်မြို့နယ်၊ ဧရာဝတီတိုင်းဒေသကြီးနေသူတို့ မောင်းနှင်လိုက်ပါလာသော T-E ပုံပြောင်း (၁၀)ဘီးယာဉ်အား တွေ့ရှိသဖြင့် စစ်ဆေးခဲ့ရာ ယာဉ်ပေါ်မှ ကာလတန်ဖိုး (၁၂)သိန်းကျော်ရှိ ကညင်ခွဲသားဆိုဒ်စုံ ၅၀ ချောင်းအား ဖမ်းဆီးရမိခဲ့ခြင်းဖြစ်သည်။

ဖမ်းဆီးရမိသစ်များကို ဂွမြို့နယ်ရှိ မြန်မာ့သစ်လုပ်ငန်းသို့ ပို့ဆောင်ထားပြီး ဖမ်းဆီးရမိတရားခံ ၂ ဦးကို ဥပဒေနှင့်အညီအရေးယူသွားမည်ဟု သတင်းရရှိသည်။

#ရခိုင်နေ့စဉ်

စစ်တွေမြို့၊ သက္ကယ်ပြင်ဈေးတွင် ဆိုလာဘက်ထရီအားသွင်းထားရာမှ မီးလောင်မှုဖြစ်ပွား
========================
မေ ၂၃၊ ရခိုင်နေ့စဉ်

စစ်တွေမြို့၊ သက္ကယ်ပြင်ဈေးတွင် ယနေ့ ညနေ ၃ နာရီ ၁၅ မိနစ်ခန့်က မီးလောင်မှုဖြစ်ပွားသဖြင့် နယ်မြေခံတပ်မတော်သားများ၊ မီးသတ်တပ်ဖွဲ့ဝင်များနှင့် ဒေသခံရွာသားများက ဝိုင်းဝန်းငြှိမ်းသတ်ခဲ့ရာ ညနေ ၄ နာရီ ၁၅ မိနစ်တွင် မီးငြိမ်းသွားကြောင်း သိရသည်။

မီးလောင်မှုမှာ အဆိုပါဈေးရှိ ဦးနူကော်ရိတ် ပိုင်ဆိုင်သော ဖိနပ်ဆိုင်တွင် ဆိုလာစနစ်ဖြင့် အားသွင်းထားသည့် ဘက်ထရီနှင့် အင်ဗာတာပေါက်ကွဲရာမှ စတင်လောင်ကျွမ်းခြင်းဖြစ်ပြီး မီးလောင်မှုကြောင့် လူထိခိုက်မှုမရှိသော်လည်း ဈေးဆိုင်ခန်း ၆၀ မီးလောင်ပျက်စီးကာ ကာလတန်ဖိုးကျပ်သိန်း ၉၀ ခန့်ဆုံးရှုံးခဲ့ကြောင်း သတင်းရရှိသည်။

#ရခိုင်နေ့စဉ်

အားကောင်းသောလေဖိအားနည်းရပ်ဝန်းအခြေအနေ
-------------------------------------------------
၁။ ၂၀၂၄ ခုနှစ်၊ မေလ ၂၃ ရက်နေ့ မြန်မာစံတော်ချိန် (၁၄:၀၀)နာရီအချိန် ထုတ်ပြန်သည့် အားကောင်းသောလေဖိအားနည်းရပ်ဝန်း (Well Marked Low Pressure Area) အခြေအနေ
=============================

(က) အားကောင်းသောလေဖိအားနည်းရပ်ဝန်းအခြေအနေ
ယနေ့မြန်မာစံတော်ချိန် (၁၂:၃၀)နာရီအချိန် တိုင်းထွာချက်များအရ ဘင်္ဂလားပင်လယ်အော် အနောက်အလယ်ပိုင်းနှင့် ယင်းနှင့်ဆက်စပ်လျက်ရှိသော ဘင်္ဂလားပင်လယ်အော်တောင်ပိုင်း တို့တွင် ဖြစ်ပေါ်နေသော လေဖိအားနည်းရပ်ဝန်း(Low Pressure Area)သည် ပိုမို အားကောင်းလာပြီး၊ အားကောင်းသောလေဖိအားနည်းရပ်ဝန်း (Well Marked Low Pressure Area)အဖြစ်သို့ ရောက်ရှိခဲ့ပါသည်။ အဆိုပါ အားကောင်းသောလေဖိအားနည်း ရပ်ဝန်းသည် အရှေ့မြောက်ဘက်သို့ ရွေ့လျားနိုင်ပြီး၊ ပိုမိုအားကောင်းလာနိုင်ကာ ဘင်္ဂလား ပင်လယ်အော်အလယ်ပိုင်းတွင် ၂၄-၅-၂၀၂၄ ရက်နေ့ နံနက်ပိုင်းတွင် မုန်တိုင်းငယ် (Depression)အဖြစ်သို့ ရောက်ရှိနိုင်ပါသည်။ ထို့နောက် အရှေ့မြောက်ဘက်သို့ ဆက်လက် ရွေ့လျားနိုင်ပြီး ၂၅-၅-၂၀၂၄ ရက်နေ့ နံနက်ပိုင်းတွင် ဘင်္ဂလားပင်လယ်အော်အရှေ့ အလယ်ပိုင်း၌ ဆိုင်ကလုန်းမုန်တိုင်း(Cyclonic Storm)အဖြစ်သို့ ရောက်ရှိနိုင်ကာ၊ မြောက်ဘက်သို့ ဆက်လက်ရွေ့လျားနိုင်ပြီး အားကောင်းသောဆိုင်ကလုန်းမုန်တိုင်း (Severe Cyclonic Storm) အဖြစ်သို့ အားကောင်းလာနိုင်ပါသည်။ အဆိုပါ အားကောင်းသော ဆိုင်ကလုန်းမုန်တိုင်းသည် ၂၆-၅-၂၀၂၄ ရက်နေ့ ညနေပိုင်းတွင် ဘင်္ဂလားဒေ့ရှ်နိုင်ငံနှင့် ယင်းနှင့်ဆက်စပ်လျက်ရှိသော အိန္ဒိယနိုင်ငံ၊ အနောက်ဘင်္ဂလားပြည်နယ်ကမ်းခြေတို့သို့ ရောက်ရှိနိုင်သည်ဟု ခန့်မှန်းရပါသည်။

(ခ) သတိပေးနှိုးဆော်ချက်
အဆိုပါ အားကောင်းသောလေဖိအားနည်းရပ်ဝန်း၏အရှိန်ကြောင့် ယနေ့နေ့လယ်မှ ၂၇-၅-၂၀၂၄ ရက်နေ့အတွင်း နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်း ဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီ တိုင်းဒေသကြီး၊ တနင်္သာရီတိုင်းဒေသကြီး၊ ချင်းပြည်နယ်၊ ရခိုင်ပြည်နယ်၊ ကရင်ပြည်နယ် နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ နေရာများတွင် ဒေသအလိုက်နှင့် နေရာကွက်၍ မိုးကြီးခြင်းများနှင့်အတူ လေပြင်းတိုက်ခတ် ခြင်းများ ဖြစ်ပေါ်နိုင်ပါသည်။ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများကျရောက်ပြီး လှိုင်းကြီးမည်။ မိုးသက်လေပြင်းကျစဉ် ရေပြင်/မြေပြင်လေသည် ၂၃-၅-၂၀၂၄ ရက်နေ့မှ ၂၅-၅-၂၀၂၄ ရက်နေ့အတွင်း တစ်နာရီလျှင် မိုင် ၄၀ မှ ၄၅ မိုင်အထိ တိုက်ခတ်နိုင်ပြီး၊ လှိုင်းအမြင့်မှာ ၉ ပေမှ ၁၂ ပေခန့် ရှိနိုင်ပါသည်။ မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်နှင့် ကမ်းလွန် ပင်လယ်ပြင်တို့တွင် မကြာခဏ မိုးသက်လေပြင်းများကျရောက်ပြီး လှိုင်းကြီးရာမှ လှိုင်းအလွန်ကြီးမည်။ မိုးသက်လေပြင်းကျစဉ် ရေပြင်/မြေပြင်လေသည် ၂၃-၅-၂၀၂၄ ရက်နေ့မှ ၂၄-၅-၂၀၂၄ ရက်နေ့အတွင်း တစ်နာရီလျှင် မိုင် ၄၀ မှ ၄၅ မိုင်အထိ တိုက်ခတ် နိုင်ပြီး၊ လှိုင်းအမြင့်မှာ ၉ ပေမှ ၁၃ ပေခန့်၊ ၂၅-၅-၂၀၂၄ ရက်နေ့မှ ၂၆-၅-၂၀၂၄ ရက်နေ့ အတွင်း တစ်နာရီလျှင် မိုင် ၅၀ မှ မိုင် ၆၀ အထိ တိုက်ခတ်နိုင်ပြီး၊ လှိုင်းအမြင့်မှာ ၁၃ ပေမှ ၁၆ ပေခန့် ရှိနိုင်ပါသည်။
အကြံပြုချက်

၂။ သို့ဖြစ်ပါ၍ အားကောင်းသောလေဖိအားနည်းရပ်ဝန်း၏အရှိန်ကြောင့် မိုးသည်းထန်စွာရွာသွန်း ခြင်းနှင့်အတူ လေပြင်းတိုက်ခတ်ခြင်း၊ ရုတ်တရက်ရေကြီးခြင်းနှင့် မြေပြိုခြင်းစသည့် သဘာဝဘေး အန္တရာယ်များ ဖြစ်ပေါ်နိုင်ပါသဖြင့် ကုန်းမြင့်ဒေသအနီးတွင် နေထိုင်ကြသူများအနေဖြင့် မြေပြိုမှုအန္တရာယ် နှင့် မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများကို ကြိုတင် သတိပြုနိုင်ပါရန်နှင့် ပြည်တွင်းလေကြောင်းပျံသန်းရေး၊ မြန်မာ့ကမ်းရိုးတန်းတစ်လျှောက်နှင့် ကမ်းလွန် ပင်လယ်ပြင်တို့ရှိ ကမ်းနီး၊ ကမ်းဝေးငါးဖမ်းရေယာဉ်များ၊ သင်္ဘောများအနေဖြင့်လည်း ကြိုတင်သတိပြု နိုင်ပါရန် အသိပေးနှိုးဆော်အပ်ပါသည်။

အားကောင်းသောလေဖိအားနည်းရပ်ဝန်းအခြေအနေ

ဂွမြို့နယ်၊ ရွာသစ်ကုန်းကျေးရွာအုပ်စု၊ မြို့မဘိနယ်အတွင်း တရားမဝင်သစ်များ ဖမ်းဆီးရမိ
==============
မေ ၂၂ ၊ ရခိုင်နေ့စဥ်

ရခိုင်ပြည်နယ်၊ ဂွမြို့နယ် ၊ ရွာသစ်ကုန်းကျေးရွာအုပ်စု၊ မြို့မဘိနယ်အတွင်းတွင် ယမန်နေ့ မေ ၂၁ ရက်နေ့ မနက်စောပိုင်းက တရားမဝင်သစ်များဖမ်းဆီးရမိခဲ့သည်ဟု သိရှိရသည်။

လုုံခြုံရေးလုပ်ငန်းများဆောင်ရွက်နေသောလုံခြုံရေးအဖွဲ့မှ ယာဥ်မောင်း အောင်ကိုစိုး၊ မောင်းနှင်လာသည့် T-E ပုံပြောင်း၊ အင်ဂျင် ၆ လုံးထိုးတပ်၊ ယာဉ်နံပါတ်မပါ တရားမဝင်မော်တော်ယာဉ်ပေါ်တွင် တရားမဝင်သစ် ကညင်ခွဲသားဆိုဒ်စုံ ၅၅ ချောင်း၊ ၈.၃ တန်၊ ကာလ တန်ဖိုး ၁,၂၄၇,၆၇၀ ကျပ်ခန့်အား တင်ဆောင်လာသည်ကိုတွေ့ရှိခဲ့​ခြင်းဖြစ်သည်။

တရားမဝင်သစ်များနှင့်လိုင်စင်မဲ့ယာဉ်မောင်းနှင်သူ ယာဉ်မောင်း အောင်ကိုစိုးအား သက်ဆိုင်ရာအက်ဥပဒေဖြင့် အရေးယူနိုင်ရန်အတွက် ဆောင်ရွက်လျက်ရှိကြောင်း သိရှိရသည်။
#ရခိုင်နေ့စဥ်

စစ်တွေမြို့၊ ခုတင်(၅၀၀)ဆံ့ အထွေထွေရောဂါကုဆေးရုံကြီးတွင် အငြိမ်းစားဝန်ထမ်းများအား ကျန်းမာရေးစောင့်ရှောက်မှုပေးလျက်ရှိ
==========
မေ ၁၄ ၊#ရခိုင်နေ့စဥ်

စစ်တွေမြို့တွင် အငြိမ်းစားဝန်ထမ်းများအား ကျန်းမာရေးစောင့်ရှောက်မှုလုပ်ငန်းများ ဆောင်ရွက်ပေး
======================
မေ ၁၃၊ ရခိုင်နေ့စဉ်

ရခိုင်ပြည်နယ်အစိုးရအဖွဲ့၏ ကြီးကြပ်လမ်းညွှန်မှုဖြင့် စစ်တွေမြို့နယ်အတွင်းရှိ အငြိမ်းစားဝန်ထမ်းများအား ကျန်းမာရေးစောင့်ရှောက်ပေးမှုကို ယနေ့နံနက်ပိုင်းက စစ်တွေမြို့၊ ခုတင်(၅၀၀)ဆံ့ အထွေထွေရောဂါကုဆေးရုံကြီး၌ ဆောင်ရွက်‌ပေးလျက်ရှိရာ ရခိုင်ပြည်နယ်ဝန်ကြီးချုပ် ဦးထိန်လင်းနှင့် ပြည်နယ်အစိုးရအဖွဲ့ဝင်များ၊ ဌာနဆိုင်ရာတာဝန်ရှိသူများက သွားရောက်ကြည့်ရှုအားပေးခဲ့ကြသည်။

ပြည်နယ်ဝန်ကြီးချုပ်နှင့် အဖွဲ့သည် ခုတင်(၅၀၀)ဆံ့ အထွေထွေရောဂါကုဆေးရုံကြီးမှ သမားတော်ကြီးများ၊ အထူးကုဆရာဝန်ကြီးများ၊ ကျန်းမာရေးဝန်ထမ်းများက အငြိမ်းစားဝန်ထမ်းများအား လိုအပ်သောကျန်းမာရေးစစ်ဆေးမှုများ ပြုလုပ်နေမှုကို လှည့်လည်ကြည့်ရှု၍ ရင်းရင်းနှီးနှီးတွေ့ဆုံကာ အားပေးစကားပြောကြားခဲ့သည်။

ယင်းနောက် နိုင်ငံ့ဝန်ထမ်းအငြိမ်းစားများအား ဆန်နှင့်စားသောက်ဖွယ်ရာများကို ထောက်ပံ့ပေးအပ်ကြပြီး ကျန်းမာရေးဝန်ထမ်းများအတွက် ထောက်ပံ့ငွေများကို ပေးအပ်ချီးမြှင့်ခဲ့သည်။

ထိုသို့ကျန်းမာရေးစောင့်ရှောက်မှု ဆောင်ရွက်ရာတွင် သွေးပေါင်ချိန်တိုင်းတာပေးခြင်း၊ သွေးအတွင်းအောက်ဆီဂျင်ပါဝင်မှုတိုင်းတာပေးခြင်း၊ ဆီးချို၊ သွေးချိုစစ်ဆေးပေးခြင်း၊ နှလုံးရောဂါစစ်ဆေးခြင်း၊ ရင်ခေါင်းရောဂါစစ်ဆေးခြင်းနှင့် ultrasound ရိုက် စစ်ဆေးကုသခြင်းများ ဆောင်ရွက်ပေးခဲ့ကြကာ လိုအပ်သောဆေးဝါးများကို အခမဲ့ထုတ်ပေးကြောင်း သိရသည်။

နိုင်ငံ့ဝန်ထမ်းအငြိမ်းစားများအား စစ်တွေမြို့၊ ခုတင် ၅၀၀ ဆံ့ အထွေထွေရောဂါကုဆေးရုံကြီး၌ မေလ ၁၃ ရက်နေ့မှ ၁၅ ရက်နေ့ထိ ကျန်းမာရေးစောင့်ရှောက်မှုပေးခြင်းနှင့် ဆေးကုသခြင်းကို ဆောင်ရွက်လျက်ရှိရာ ယနေ့တွင် အငြိမ်းစားဝန်ထမ်း ၁၇၄ ဦးကို ဆေးကုသပေးခဲ့ကြောင်း သိရသည်။

#ရခိုင်နေ့စဉ်

စစ်တွေမြို့တွင် အငြိမ်းစားဝန်ထမ်းများအား ကျန်းမာရေးစောင့်ရှောက်မှုလုပ်ငန်းများ ဆောင်ရွက်ပေး