NOM.World News

မြောက်ကိုရီးယားတပ်ဖွဲ့တွေကို ရုရှားဆီ စေလွှတ်နေတာဟာ အန္တရာယ်ကြီးမားတဲ့ လုပ်ရပ်ဖြစ်တယ်လို့ အမေရိကန်က သတိပေးလိုက်ပါတယ်။ ဒီကိစ္စအတွက် တောင်ကိုရီးယားကလည်း ရုရှားသံအမတ်ကို ဆင့်ခေါ်ကာ သတိပေးကန့်ကွက်ခဲ့ပြီးနောက် ဝါရှင်တန်ကပါ အခုလိုမျိုး ပြောဆိုလိုက်တာပါ။ အမေရိကန်အနေနဲ့ မဟာမိတ်တွေနဲ့ တိုင်ပင်ကာ သင့်တော်တဲ့ တုံ့ပြန်မှုတွေ လုပ်ဆောင်ဖို့ကို ဆွေးနွေးသွားမယ်လို့လည်း ပြောဆိုခဲ့ပါတယ်။

NOM

ပီရူးသမ္မတဟောင်း Alejandro Toledo ဟာ သူ တာဝန်ယူချိန်အတွင်း လာဘ်စားမှုကြောင့် ထောင်ဒဏ်အနှစ် ၂၀ ချမှတ်ခံလိုက်ရပါတယ်။ ငွေကြေးခဝါချမှုတွေကိုလည်း ကျူးလွန်ခဲ့တယ်လို့ သိရပြီး အသက် ၇၈ နှစ်အရွယ် သမ္မတဟောင်းဟာ ၂၀၀၁ ကနေ ၂၀၀၆ အထိ ၅ နှစ်ကြာ တာဝန်ထမ်းဆောင်ခဲ့တာပါ။

လွန်ခဲ့တဲ့ ၅ နှစ်က သူ့ကို ကယ်လီဖိုးနီးယားမှာ ဖမ်းဆီးခဲ့ပြီး မနှစ်ကမှ ပီရူးကို လွှဲပြောင်းပေးခဲ့တာပါ။ ဘရာဇီးလ်ကုမ္ပဏီတခုက အစိုးရနဲ့ စာချုပ်ချုပ်ဆိုနိုင်ဖို့ သူကို ဒေါ်လာသန်းတဝက်ပေးခဲ့တယ်ဆိုတာကို ဝန်ခံထားပါတယ်။

NOM

ပါကစ္စတန်အမျိုးသားတဦးဟာ သူ့ရဲ့မိခင်နဲ့ ညီမ အပါအဝင် မိသားစုထဲက အမျိုးသမီးလေးဦးကို လစ်ဘရယ်နေထိုင်မှုပုံစံနဲ့ ဆိုရှယ်မီဒီယာအသုံးပြုတကြောင့် သတ်ဖြတ်လိုက်တယ်လို့ ရဲတပ်ဖွဲ့က မနေ့က ပြောဆိုခဲ့ပါတယ်။ Bilal Ahmed ကို စနေနေ့မှာ ဖမ်းဆီးမိခဲ့ပြီး တရားရုံးက စွဲချက်တင်ထားကာ ဖမ်းဆီးထိန်းသိမ်းထားတယ်လို့လည်း သိရပါတယ်။

ကြားနာမှုအတွင်းမှာ လူသတ်တရားခံက အမျိုးသမီးတွေရဲ့ နေထိုင်မှုပုံစကြောင့် အိမ်ထောင်ရေးပျက်စီးစေပြီး အမြဲလိုလို အော်ဟစ်ပြောဆိုနေတာကြောင့် မိခင်၊ ညီမ၊ ခယ်မနဲ့ တူမတို့ကို လည်လှီးသတ်ဖြတ်ခဲ့တယ်လို့ ဝန်ခံခဲ့ပါတယ်။

သေဆုံးရုပ်အလောင်းတွေကို နေထိုင်ရာတိုက်ခန်းထဲမှာပဲ တွေ့ရှိခဲ့ပါတယ်။ ဆိုရှယ်မီဒီယာပေါ်မှာ ဓာတ်ပုံတွေ၊ ဗီဒီယိုတွေ တင်တဲ့အပေါ်မှာလည်း တရားခံက အံ့အားသင့်ခဲ့ရတယ်လို့ ဆိုခဲ့ပြီး ညီမဖြစ်သူကို သင်ခန်းစာပေးဖို့ရည်ရွယ်ကာ ရိုက်နှက်ခဲ့ပြီးနောက် မျက်မြင်သက်သေတွေ ရှိနေတာမို့ သတ်ဖြတ်ဖို့ ဆုံးဖြတ်ခဲ့တာလို့လည်း ဆိုပါတယ်။

NOM

ဟစ်ဇ်ဘိုလာတွေဟာ ဒေါ်လာ သန်း ၅၀၀ အထိ တန်ဖိုးရှိတဲ့ ရွှေတွေနဲ့ ငွေကြေးတွေကို ဘေရွတ်က ဆေးရုံအောက်မှာ လျှို့ဝှက်ဘန်ကာလုပ်ခဲ့ပြီး ဝှက်ထားခဲ့တယ်လို့ အစ္စရေးကာကွယ်ရေးတပ်ဖွဲ့က ပြောဆိုလိုက်ပါတယ်။

အစ္စရေးကာကွယ်ရေးတပ်ရဲ့ ပြောဆိုခွင့်ရှိသူက အတည်ပြုပြောဆိုခဲ့တာပါ။ "ဘန်ကာကို ဆေးရုံအောက်မှာ ဆောက်လုပ်ခဲ့တာဖြစ်ပြီး ဒေါ်လာဘီလျံဝက်လောက်ရှိတဲ့ ငွေနဲ့ ရွှေတွေကို ဝှက်ထားခဲ့တာပါ၊ ဒါတွေကို လက်ဘနွန်ပြန်လည်ထူထောင်ရေးအတွက်လို့ ပြောထားပေမယ့် တကယ်တမ်းက ဟစ်ဇ်ဘိုလာပြန်လည်ထူထောင်ဖို့ပါပဲ" လို့ ဆိုပါတယ်။

"လက်ဘနွန်အစိုးရ၊ လက်ဘနွန်အာဏာပိုင်တွေနဲ့ နိုင်ငံတကာအဖွဲ့အစည်းတွေအနေနဲ့ ဒီပိုက်ဆံတွေကို ဟစ်ဇ်ဘိုလာက အသုံးပြုပြီး အစ္စရေးကို အကြမ်းဖက်တိုက်ခိုက်မှာကို ခွင့်မပြုကြဖို့လည်း ပြောချင်ပါတယ်" လို့ သူက ထပ်လောင်းပြောဆိုခဲ့ပါတယ်။

NOM

အီရန်အတွက် သူလျှိုလုပ်ပေးတယ်ဆိုတဲ့ စွပ်စွဲချက်နဲ့ အစ္စရေးနိုင်ငံသား ၇ ဦး ဖမ်းဆီးခံခဲ့ရတယ်လို့ သိရပါတယ်။ သံသယဝင်ခံရသူတွေထဲမှာ စစ်သားတဦး ပါဝင်ပြီး အစ္စရေးကာကွယ်ရေးတပ်ဖွဲ့ရဲ့ အဆောက်အဦတွေနဲ့ ကာကွယ်ရေးဆိုင်ရာ အချက်အလက်တွေကို ပေးပို့ခဲ့တယ်လို့ စွပ်စွဲခံထားရပါတယ်။

NOM

တက္ကဆက်ပြည်နယ်မှာ ရဟတ်ယာဉ်ပျက်ကျမှုတခုဖြစ်ပွားခဲ့ပြီး ၄ ဦးသေဆုံးခဲ့ကာ ကလေးငယ်တဦး ပါဝင်တယ်လို့ သိရပါတယ်။ တနင်္ဂနွေနေ့ညနေပိုင်းက ဖြစ်ပွားခဲ့တာဖြစ်ပြီး R44 ရဟတ်ယာဉ်ဟာ မြို့အတွင်းက ရေဒီယိုမျှော်စင်ကို ဝင်တိုက်မိခဲ့တာလို့ ဆိုပါတယ်။

NOM

ရုရှားပိုင်ဆိုင်မှုတွေကို ထိန်းချုပ်ထားမှုကနေ ပေါင် ၂.၂၆ ဘီလျံကို ယူကရိန်းတို့ လက်နက်ခဲယမ်းတွေ ဝယ်ယူရာမှာ အသုံးပြုဖို့ ဗြိတိန်က ပေးသွားမယ်လို့ ဆိုပါတယ်။ ဒီငွေကြေးတွေဟာ ယူကရိန်းစစ်တပ်အသုံးပြုဖို့ တခုတည်းအတွက်သာလို့လည်း ကာကွယ်ရေးဝန်ကြီး John Healey က ပြောဆိုခဲ့တယ်လို့လည်း သိရပါတယ်။

NOM

တာဝေးပစ်လက်နက်တွေကို အသုံးပြုခွင့်မပေးဘူးလို့ ပင်တဂွန်က ယူကရိန်းကို ပြောဆိုခဲ့ကြောင်း WSJ က ဖော်ပြခဲ့ပါတယ်။ ကာကွယ်ရေးဝန်ကြီး လွိုက်အော်စတင်နဲ့ သမ္မတ ဇီလင်စကီး၊ ယူကရိန်းကာကွယ်ရေးဝန်ကြီး Rustem Umerov တို့ မနေ့က ကိယက်ဗ်မှာ တွေ့ဆုံမှုအတွင်း ပြောဆိုခဲ့တာလို့ ဆိုပါတယ်။

ဒီခရီးစဉ်ကို လွိုက်အော်စတင်က မကြေညာဘဲ သွားရောက်ခဲ့တာဖြစ်ပြီး စစ်ဘက်ဆိုင်ရာအကူအညီပေးရေး အစီအစဉ်သစ်ကိုလည်း ကြေညာမှာမဟုတ်ဘူးလို့လည်း သိရပါတယ်။

NOM

ဩစတြေးလျအထက်လွှတ်တော်အမတ် Lidia Thorpe ဟာ Canberra က ပါလီမန်လွှတ်တော်ဆီကို ချားလ်ဘုရင် လာရောက်လည်ပတ်စဉ်အတွင်း "ငါတို့ရဲ့ မြေကို ပြန်ပေးပါ" လို့ တောင်းဆိုခဲ့ပြီး "မင်းက ငါ့ရဲ့ ဘုရင် မဟုတ်ဘူး" လို့လည်း အော်ဟစ်ပြောဆိုခဲ့ပါတယ်။

"ငါတို့ဆီနေ ခိုးသွားခဲ့တာတွေကို ပေးလိုက်ပါ၊ ငါတို့ရဲ့ အရိုးတွေ၊ ဦးခေါင်းခွံတွေ၊ ငါတို့ကလေးတွေ၊ ငါတို့လူမျိုးတွေကို ပြန်ပေးပါ" လို့ ဗြိတိန်ဘုရင်ကို သူမက အော်ဟစ်တောင်းဆိုခဲ့တာပါ။

ဒီ ဗီဒီယိုရဲ့ အဆုံးသတ်မှာတော့ ဩစတြေးလျဘုရင်မကြီး Camilla က အဆိုပါအဖြစ်အပျက်ကို ကြည့်နေရင်း ရယ်မောနေတာပါဝင်ခဲ့ပါတယ်။ Camilla ဟာ သူမနန်းတက်ချိန်မှာ အဲလစ်ဇဘက်ဘုရင်မကြီးကို သစ္စာခံဖို့အတွက် ငြင်းဆန်ခဲ့တဲ့သူလည်း ဖြစ်ပါတယ်။

NOM

ရုရှားမှာ မြောက်ကိုရီးယားတပ်တွေကို ဖြန့်ကျက်မှုနဲ့ပတ်သက်ပြီး တောင်ကိုရီးယားဟာ ရုရှားသံအမတ်ကို ဆင့်ခေါ်မှုတွေ လုပ်ခဲ့တယ်လို့ တောင်ကိုရီးယားနိုင်ငံခြားရေးဌာနက သတင်းထုတ်ပြန်လိုက်ပါတယ်။ ရုရှားသံအမတ်ဟာ ဒီနေ့မှာ တောင်ကိုရီးယားနိုင်ငံခြားရေး ဒုဝန်ကြီးနဲ့‌ တွေ့ဆုံခဲ့ပြီး ဘာတွေပြောဆိုခဲ့လဲဆိုတာကိုတော့ ပြောဆိုခြင်းမရှိသေးပါဘူး။

မြောက်ကိုရီးယားအထူးတပ်ဖွဲ့ဝင် ၁၅၀၀ အထိ ရုရှားကို ရောက်ရှိနေတာဖြစ်ပြီး ဗီဒီယို၊ ဓါတ်ပုံအထောက်အထားတွေလည်း ထွက်ပေါ်လာခဲ့တာပါ။ ဒီလိုမျိုး စေလွှတ်မှုဟာ တောင်ကိုရီးယားကို တိုက်ခိုက်ဖို့အတွက် မြောက်ကိုရီးယားဘက်က လေ့ကျင့်စေတာလားဆိုတဲ့ သံသယတွေလည်း ရှိနေပါတယ်။

NOM

တနင်္ဂနွေနေ့က အမေရိကန်နဲ့ ကနေဒါ စစ်သင်္ဘောတစင်းစီဟာ ထိုင်ဝမ်ရေလက်ကြားကို ဖြတ်သန်းခဲ့ပါတယ်။ ဒါဟာ အဆိုပါအနီးတဝိုက် စစ်ရေးလှုပ်ရှားမှုတွေ ပြုလုပ်နေတဲ့ တရုတ်ရဲ့ မစ်ရှင်ကို အနှောင့်အယှက် ဖြစ်စေခဲ့တယ်လို့ ပေကျင်းက ရှုတ်ချခဲ့ပြီး တင်းမာမှုတွေက တစထက်တစ မြင့်တက်လာပါတယ်။

NOM

တရုတ်စစ်တပ်ရဲ့ ရေတပ်သင်္ဘော ၁၂ စင်းနဲ့ လေယာဉ် ၁၄ စင်းကို ထိုင်ဝမ်ကျွန်းအနီးမှာ တွေ့ရှိခဲ့တယ်လို့ ထိုင်ဝမ်ကာကွယ်ရေးဝန်ကြီးဌာနက သတင်းထုတ်ပြန်ခဲ့ပါတယ်။ ထိုင်ဝမ်ရဲ့ လေကြောင်းရန်ကာကွယ်ရေးဇုန်အတွင်းကို လေယာဉ် ၇ စင်းအထိ ဝင်ရောက်လာခဲ့ပြီး ထိုင်ဝမ်ဘက်ကလည်း လေယာဉ်တွေ၊ သင်္ဘောတွေနဲ့ ပဲ့ထိန်းဒုံးကျည်စနစ်တွေကို အသင့်ပြင်ဆင်မှု လုပ်ခဲ့ရတယ်လို့ ဆိုပါတယ်။

NOM

အီလွန်မက်စ်က သူဟာ ဒီနေ့က စတင်ပြီး ကန်ရွေးကောက်ပွဲပြုလုပ်မယ့်နေ့အထိ တရက်ကို ကန်ဒေါ်လာ ၁.၄ သန်း အထိ အသုံးပြုသွားမယ်လို့ ဆိုပါတယ်။ အမေရိကန်ဖွဲ့စည်းပုံအခြေခံဥပဒေမှာ ပါရှိတဲ့ ကန်နိုင်ငံသားတွေရဲ့ လွတ်လပ်စွာပြောဆိုခွင့်နဲ့ တရားဝင်လက်နက်ကိုင်ဆောင်ခွင့်အချက်တွေကို ပြင်ဆင်ဖို့ အွန်လိုင်းကတဆင့် လက်မှတ်ရေးထိုးတောင်းဆိုသူတွေကို ပေးသွားမှာဖြစ်ပါတယ်။

လက်ရှိမှာတော့ ဒါက အငြင်းပွားစရာဖြစ်နေပြီး ငွေပေးချေမှုနဲ့ ပတ်သက်ပြီး တရားဝင်၊ မဝင်ဆိုတာကို မေးခွန်းထုတ်နေကြပါတယ်။ ချက်လက်မှတ်နဲ့ ပေးသွားမှာဖြစ်တယ်လို့ သိရပြီး အီလွန်မက်စ်ရဲ့ ဒီလုပ်ဆောင်မှုဟာ ဒေါ်နယ်ထရမ့်ကို ‌ရွေးကောက်ပွဲမှာ အသာစီးရစေဖို့အတွက် လုပ်ဆောင်တဲ့ နည်းလမ်းတမျိုးဖြစ်တယ်လို့လည်း သုံးသပ်နေကြပါတယ်။

NOM

ဘရာဇီးလ်သမ္မတလူလာဒါဆေးလ်ဗားဟာ နေအိမ်မှာ ချော်လဲခဲ့လို့ ဦးခေါင်းမှာ ဒဏ်ရာရရှိခဲ့ကာ ၅ ချက်ခန့် ချုပ်ခဲ့ရပါတယ်။ ဒါကြောင့် သူ ရုရှားကို သွားမယ့် ခရီးစဉ်ကို ဖျက်သိမ်းလိုက်ရပြီး BRIC အစည်းအဝေးကို တက်ရောက်နိုင်မှာမဟုတ်တော့ပါဘူး။ စနေနေ့က ဖြစ်ပွားခဲ့တာလို့ သိရပြီး သမ္မတဟာ ဦးနှောက်မှာ သွေးအနည်းငယ်ယိုခဲ့တယ်လို့ သူ့ဆရာဝန်က GloboNews TV ကို ပြောဆိုခဲ့ပါတယ်။

NOM

အင်ဒိုနီးရှားသမ္မတသစ်အစြဖ် ဗိုလ်ချုပ်ကြီးဟောင်း ပရာဘို၀ိုဆူဘီယန်တိုဟာ မနေ့က ကျမ်းသစ္စာကျိန်ဆိုမှုကို ပြုလုပ်ခဲ့ပြီးဖြစ်ပါတယ်။ လွှတ်တော်ရှေ့မှောက်မှာ ကျမ်းကျိန်ဆိုပြီး အင်ဒိုနီးရှားရဲ့ ၈ ဦးမြောက် သမ္မတဖြစ်လာတာပါ။

ဆူဘီယန်တိုဟာ ရာထူးကနေ ထွက်ခွာတော့မယ့် သမ္မတဝီဒိုဒိုရဲ့ သားကို ဒုတိယသမ္မတနေရာ ရွေးချယ်ခဲပြီး ကျောင်းသားတွေကို အခမဲ့စားစရာတွေပေးမယ့် မူဝါဒကို ကျင့်သုံးမယ်လို့ ကြေညာထားပါတယ်။ သူဟာ ရွေးကောက်ပွဲမှာ ထောက်ခံမဲ ၆၀% နီးပါး ရရှိခဲ့သူပါ။

NOM

ရှို့မီးလို့ သံသယရှိတဲ့ မီးလောင်မှုကြောင့် ဗြိတိန်က DHL ဂိုဒေါင်တခု ဆုံးရှုံးခဲ့ပါတယ်။ ဒါဟာ ရုရှားက ဗြိတိန်မှာ အပျက်စီးတွေ ဖန်တီးဖို့ ကြိုးပမ်းနေတဲ့ လက္ခဏာဖြစ်နိုင်တယ်လို့ ကျွမ်းကျင်သူတဦးက သတိပေးခဲ့ကြောင်း Daily Mail က ဖော်ပြခဲ့ပါတယ်။

ဇူလိုင်လ ၂၂ ရက်နေ့က ဘာမင်ဂမ်မြို့ DHL စင်တာမှာ ဖြစ်ပွားခဲ့တဲ့ ကြောက်စရာဖြစ်ရပ်မှာ မော်စကိုပါဝင်ပတ်သက်နေမှုကို ဗြိတိန်အကြမ်းဖက်မှု တန်ပြန်နှိမ်နှင်းရေး ရဲတပ်ဖွဲ့က စုံစမ်းနေတယ်လို့လည်း သိရပါတယ်။

ရုရှားသူလျှိုတွေဟာ ဗြိတိန်ကို သွားတဲ့ လေယာဉ်ပေါ်ကို မီးလောင်ဗုံးတလုံး သိုဝှက်သယ်ဆောင်ခဲ့တယ်လို့လည်း သူတို့က ယူဆထားပါတယ်။

NOM

ရုရှားအရှေ့ပိုင်းမှာ မြောက်ကိုရီးယားတပ်ဖွဲ့ဝင်တွေ ရောက်ရှိပြီး လေ့ကျင့်မှုတွေ လုပ်ဖို့ ပြင်ဆင်နေတဲ့ ဓာတ်ပုံတွေ ထွက်ပေါ်လာခဲ့ပါတယ်။ ဒါကြောင့် ယူကရိန်းမှာ တိုက်ပွဲဝင်ဖို့ရာ မြောက်ကိုရီးယားတပ်ဖွဲ့တွေကို စေလွှတ်ခဲ့တယ်ဆိုတဲ့ သတင်းက အမှန်တကယ်ဖြစ်ခဲ့တယ်လို့ ပြောလို့ရပါပြီ။

လက်ရှိမှာ ၁၅၀၀ အထိ ရောက်ရှိနေပြီး အများစုကတော့ တိုက်ပွဲဝင်ဖူးသူတွေမဟုတ်ဘူးလို့လည်း ဆိုပါတယ်။ ဒါကြောင့်မို့ လေ့ကျင့်မှုတွေကို ထပ်မံပြုလုပ်နေရပါတယ်။ ထွက်ပေါ်လာခဲ့တဲ့ ဗီဒီယိုဖိုင်မှာလည်း မြောက်ကိုရီးယားတပ်ဖွဲ့ဝင်တွေဟာ ယူနီဖောင်းနဲ့ အသုံးအဆောင်ပစ္စည်းတွေကို ကိုယ်စီရယူနေတာကို မြင်တွေ့ခဲ့ရပါတယ်။

NOM

ဟားမတ်စ်ခေါင်းဆောင်သစ် စင်ဟာ,ဟာ သူ့ရဲ့ နေအိမ်မှာ သေဆုံးခဲ့တာဖြစ်တယ်လို့ ဂါဇာပြည်သူတဦးက BBC ကို ဖွင့်ဟလိုက်ပါတယ်။ Ashraf Abo Taha ဆိုသူက အစ္စရေးဒရုန်းကြောင့် ပျက်စီးခဲ့တဲ့ အဆောက်အဦဟာ သူ့နေအိမ်ဖြစ်ပြီး ယာဆင် သေဆုံးခဲ့မှုအတွက် သူ အံ့ဩထိတ်လန့်ခဲ့ရတယ်လို့ ဆိုပါတယ်။

အစ္စရေးတပ်ဖွဲ့က ထုတ်ပြန်ခဲ့တဲ့ ဗီဒီယိုကလစ်က ပျက်စီးနေတဲ့ အဆောက်အဦကို သူ့နေအိမ်ဖြစ်တယ်လို့ အတည်ပြုခဲ့တာပါ။ BBC ကလည်း မပျက်စီးခင်က နေအိမ်အနေအထားနဲ့ ပျက်စီးနေတဲ့ နေအိမ်တို့ဟာ တူညီတယ်ဆိုတာကို ဓါတ်ပုံအထောက်အထားတွေနဲ့ အတည်ပြုနိုင်တယ်လို့ ဖော်ပြခဲ့ပါတယ်။ ဒါပေမယ့် Abo Taha ပိုင်ဆိုင်တယ်ဆိုတာကိုတော့ အတည်မပြုနိုင်ဘူးလို့ ဆိုပါတယ်။

NOM