Mamlakatimizda aholining farovonligini ta'minlash va inson qadrini ulug'lash yo'lida Prezidentimiz tomonidan keng ko'lamli islohotlar amalga oshirilmoqda. Xususan, O‘zbekiston Respublikasi Prezidentining 2024-yil 23-sentabrdagi PQ-330-sonli “Kambag'allikdan farovonlik sari” dasturini amalga oshirish bo‘yicha birinchi navbatdagi chora-tadbirlar to'g'risidagi qarori muhim huquqiy hujjat hisoblanadi.
Mazkur qarorda belgilangan vazifalar ijrosini ta'minlash maqsadida “Asakabank” AJ tomonidan tadbirkorlikni qo‘llab-quvvatlash orqali aholi bandligini ta'minlash va daromadni oshirish bo'yicha joylarda uchrashuvlar o'tkazilmoqda.
Bugun Navoiy viloyatining Nurota tuman hokimligi binosida “O‘zmilliybank” AJ va “Asakabank” AJ mas'ul vakillari, tuman hokimligi, mahalla “yettiligi”, tadbirkorlar va aholi ishtirokida uchrashuv bo'lib o'tdi. Ochiq muloqot shaklida o'tkazilgan uchrashuvda tumandagi tadbirkorlar faoliyatini rivojlantirish, ko'proq ish o'rinlari yaratish, yangi loyihalar uchun kreditlar ajratilishi va imtiyozli kreditlardan samarali foydalanish masalalari muhokama qilindi.
Uchrashuvda tumandagi “Eshonsudur”, “Avazsoy” va “Mustaqillik” mahallalarida yashovchi fuqarolar tomonidan Prezidentimizning 2024-yil 7-sentyabrdagi PQ-312-sonli “Kichik biznesni uzluksiz qo‘llab-quvvatlash” kompleks dasturini takomillashtirish chora-tadbirlari to'g'risidagi qarori asosida kredit olish istagi bildirildi. Murojaat qilgan ikki fuqaroning murojaatlari joyida hal etilgan bo'lsa, olti tadbirkorning murojaatlari ijrosi nazoratga olindi.
Yuqoridagi kabi uchrashuvlar viloyatning Karmana, Tomdi, Konimex va Navbahor tumanlarida ham o'tkazildi. Bunday uchrashuvlar belgilangan tartibda joylarda davom etmoqda.