Zulfiqori aziz Зулфикори азиз

Афсӯс, ки умрро вафо нест,
В-ин гардиши меҳрро бақо нест.
Гуфтам, ки чу пириам кунад паст,
Фарзанди азиз гирадам даст.
Шарти писарӣ ба ҷой орад,
Номуси маро ба пой дорад.
Шуд умр табоҳу ҳол абтар,
В-ин ком маро нашуд муяссар!»
(Аз китоби “Чор Дарвеш”)

https://t.me/gazaltj

Андар ин даврон маҷў роҳат, ки кас осуда нест,
Табъи шодиҷўй аз ғам як нафас осуда нест.

Дар замони нокасон осуда ҳам нокас бувад,
Нокасе натвон шудан гарчанд кас осуда нест.

Ҳар чӣ дар дунё вуҷуде дорад, ар худ зарра аст,
Аз хилофи зидди худ ў низ бас осуда нест.

Гарчӣ хокаш дар паноҳи хештан гирад чу об,
Зоташ ар эмин бувад, аз бод хас осуда нест.

Андар ин давлат, ки халқе поймоли меҳнатанд,
Гар касе дорад ба неъмат дастрас осуда нест.

Одамии талхайш аз золимони туршрўй,
Ҳамчу ширинӣ зи иброми магас осуда нест.

Гарчи дар зер аст, дорад чун касе болои ўст,
Чун харони боркаш зин бар фарас осуда нест.

Аз барои он, ки мардум андар ў шар мекунанд,
Шаб зи бими рўз чун дузд аз асас осуда нест.

Мурғ куро ҷой андар боғ бошад чун дарахт,
Гар бигирию бидорӣ дар қафас осуда нест.

Аз пайи таҳсили осоиш мабар бисёр ранҷ,
Ҳар кӣ ў дорад ба осоиш ҳавас осуда нест.
(Сайфи Фарғонӣ)

https://t.me/gazaltj

Эй зи ғами фироқи ту ҷони маро шикояте,
Бар дари ту нишастаам мунтазири инояте.

Гарчӣ бимирам аз ғамат ҳам, накунӣ ба ман назар,
В‐ар ҳама хун кунӣ дилам ҳам накунӣ шикояте.

В‐арна нисори ту кунам, ҷон набарам зи дасти ту.
Нест аз он ки то абад ишқи туро ниҳояте.

Дил фироқ гашт хун, ҷон ба лаб омад аз ғамат,
Раҳматам ояд, ар кунам аз ғами ту ҳикояте.

Бар дари ман ҳавои ту ҷони азиз, эй дареғ,
Кушт маро ҷафои ту бесабаби ҷинояте.

Хаста Ироқӣ они туст, дур макун зи даргаҳаш,
То наравад фиғонкунон аз ба ҳар вилояте.
(Фахриддини Ироқӣ)

https://t.me/gazaltj

Чаро ин мардуми донову зираксору фарзона
Зиёншон мўрро бошад, ду даршон ҳаст як хона.

Агар абрўш чин орад, сазад гар рўи ман бинад,
Ки рухсорам пур аз чин аст чун рухсори паҳнона.

Чу паймона тани мардум ҳамеша умр паймояд,
Бибояд зер нанмудан ҳамон як рўз паймона.

Кунун ҷӯи ҳаме ҳилат, ки гаштӣ сусту бетоқат,
Туро дидам ба барноӣ, фасор оҳиставу лона.

Аҷал чун дом карда гиру пўшида ба хок андар,
Саёд аз дур нак дона бараҳна карда лавсона.

Табоеъ гар сутуни ман, сутунро ҳам бипўсад бун,
Нагардад ҳаргиз ин фонӣ, к-аш аз тоат занӣ фона.

Набошад майли фарзона ба фарзанду ба зан ҳаргиз,
Бибуррад насли ин ҳарду, набуррад насли фарзона.

Чаро ин мардуми донову …

(Кисоии Марвазӣ)
https://t.me/gazaltj

Диле дар оташ

Чи ғам дорад зи хомӯшӣ даруни шуълапарвардам,
Ки сад хуршед оташ бурда аз хокистари сардам.
Ба бодам додиву шодӣ, биё эй шаб тамошо кун,
Ки дашти осмон дарёи оташ гашта аз гардам.
Шарорангезу тӯфонӣҳавое дар ман афтодаст,
Ки ҳамчун ҳалқаи оташ дар ин гирдоб мегардам.
Ба шавқи лаъли ҷонбахше, ки дармони ҷаҳон бо ӯст,
Чи тӯфон мекунад ин мавҷи хун дар ҷони пурдардам.
Вафодорӣ тариқи ишқи мардон асту ҷонбозон,
Чи номардам агар з-ин роҳи хунолуд баргардам.
Дар он шабҳои тӯфонӣ, ки олам зеру рӯ мешуд,
Ниҳонї шабчароғи ишқро дар сина парвардам.
Бар-ор эй базри пинҳонӣ сар аз хоби зимистонӣ,
Ки аз ҳар зарраи дил офтобе бар ту густардам.
Зи хубӣ оби покӣ рехтам бар дасти бадхоҳон,
Диле дар оташ афкандам, Сиёвуше баровардам.
Чароғи дида равшан кун, ки ман чун Соя шаб то рӯз,
Зи хокистарнишини сина оташ вом мекардам.
(Ҳушанг Ибтиҳоҷ Соя)

https://t.me/gazaltj

Ӯ мераваду ошиқи мискин нигаронаш,
Чун мурда, ки дар сина бувад ҳасрати ҷонаш.

Бемеҳр саворе, ки инон боз напечад
В-овехта чандин дили халқе ба инонаш.

Ё хун-ш ҳамеораду ё толиби хун аст,
Эй халқ, магӯед ба ҷӯянда нишонаш.

Ёдаш диҳӣ, эй бод, магар ёди гадое
Аз давлати дашном барояд зи забонаш.

Ё даст, ки дар хоби шабаш дидаам, аммо
Аз бехабарӣ ҳеҷ надонам, ки чӣ сонаш?

Бисёр бикӯшам, ки бипӯшам ғами худ, лек
Оташ чу бигирад, натавон дошт ниҳонаш.

Аз нолаам ар халқ нахуспад аҷабе нест,
Аз бахти худам дар аҷабу хоби гаронаш.

Хусрав, нигаронӣ-ш ҳама бар дили худ гир,
Кӯрии дилеро, ки набошад нигаронаш.
(Амир Хусрави Деҳлавӣ)

https://t.me/gazaltj

Дар пои ту афтодан шоиста даме бошад,
Тарки сари худ гуфтан зебо қадаме бошад.

Бисёр забуниҳо бар хеш раво дорад,
Дарвеш, ки бозораш бо муҳташаме бошад.

З-ин сон, ки вуҷуди туст, эй сурати рӯҳонӣ,
Шояд ки вуҷуди мо пешат адаме бошад.

Гар ҷумла санамҳоро сурат ба ту монистӣ,
Шояд ки мусулмонро қибла санаме бошад.

Бо он ки асиронро куштию хато кардӣ,
Бар кушта гузар кардан навъи караме бошад.

Рақс аз сари мо берун имрӯз нахоҳад шуд,
К-ин мутриби мо яктан хомӯш намебошад.

Ҳар к-ӯ ба ҳама умраш савдои гуле будаст,
Донад, ки чаро булбул девона ҳамебошад.

Кас бар алами решат воқиф нашавад,
Саъдӣ, Илло ба касе гӯӣ, к-ӯро аламе бошад.
(Саъдии Шерозӣ)

https://t.me/gazaltj

Булбуле барги гуле хушранг дар минқор дошт,
В-андар он баргу наво хуш нолаҳои зор дошт.

Гуфтамаш: «Дар айни васл ин нолаву фарёд чист?»
Гуфт: «Моро ҷилваи маъшуқ дар ин кор дошт».

Ёр агар наншаст бо мо, нест ҷои эътироз,
Подшоҳи комрон буд, аз гадое ор дошт.

Дарнамегирад ниёзу нози мо бо ҳусни дӯст,
Хуррам он, к-аз нозанинон бахти бархурдор дошт.

Хез, то бар килки он наққош ҷонафшон кунем,
К-ин ҳама нақши аҷаб дар гардиши паргор дошт.

Гар муриди роҳи ишқӣ, фикри бадномӣ макун,
Шайхи Санъон хирқа раҳни хонаи хаммор дошт.

Вақти он ширин қаландар хуш, ки дар атвори сайр
Зикри-тасбеҳи малак дар ҳалқаи зуннор дошт.

Чашми Ҳофиз зери боми қасри он ҳурисиришт,
Шеваи ҷанноти таҷрӣ таҳтаҳуланҳор дошт.
(Хоҷа Ҳофизи Шерозӣ)

https://t.me/gazaltj

Дардову дареғо, ки дар ин бозии хунин,
Бозичаи айём дили одамиён аст.

Эй кӯҳ, ту фарёди ман имрӯз шунидӣ?
Дардест дар ин сина, ки ҳамзоди ҷаҳон аст.

Аз доду вадод он ҳама гуфтанду накарданд,
Ё Раб, чӣ қадар фосилаи дасту забон аст.

Хун мечакад аз дида дар ин кунҷи сабурӣ,
Ин сабр, ки ман мекунам афшурдани ҷон аст.
(Ҳушанг Ибтиҳоҷ)

https://t.me/gazaltj

Эй бародар, ба кас зарар марасон!
Неш бар кас мазан чу хармагасон.

Ҳамчу сӯҳон масоз дандон тез,
Ки сипехр оханест дандонрез.

Шаб чу парвин мабош дандонвор,
Субҳваш лаб зи меҳр хандонвор.

Ки саҳар бар даҳан хӯри чандон,
Ки ба ҳалқат фуру равад дандон.

Нагирифтаст ҳеҷ кас бад пеш,
Ки нарафтаст дар сари бади хеш.

Аз бари чуб хаст дандонаш,
Ҳам дар он ҷо шикаст дандонаш.

По чу ба фарқи куҳ лола занад,
Сари ӯ аз бадан ғазола канад.

Шаб агар кӯҳ теғ зад бар меғ,
Бар сараш меҳр субҳдам зад теғ.

Меҳр агар субҳ теғ зад бар кӯҳ,
Шаб фуру шуд ба оташи андӯҳ.

Шафақ афганд оташ андар меҳр,
Рехт хокистараш ба сар зи сипеҳр.

Кас нагардад ба ҳеҷ кас бадсоз,
Ки бади у бад-у нагардад боз.

Бад макун, бад макун, ки бад ёби,
Бади худро ба гирди х(в)ад ёби.

Дар ҳақи ҳар ки қасди бад дори, Накунй бад, ки қасди х(в)ад дори.

Неку бад чун ба нафси х(в)ад бошад,
Накунад нек, ҳар ки бад бошад.

Ҳар касеро, ки шуд бади фани ӯ,
Бадии ӯ бас аст душмани ӯ...

Гар занад захм каждум аз сари неш,
Дар сари неши худ кунад сари хеш.

Марди офатрасон дар офот аст,
Ки бадиро, бади мукофот аст.

Роҳро бад марав, ки бад афти,
Чоҳ дар раҳ макан, ки х(в)ад афти.
Ҳар ситамгар, ки чаҳ канад дар роҳ,
То набини, ки худ фитад дар чоҳ.

Чаҳ, ки аз баҳри ман канад чаҳкан?
Худ фитад дар даруни чаҳ, на ман.

Э бародар ба кас зарар марасон…

ДАР ФАЗИЛАТИ НАКӮКОРӢ …

Мавлоно Камолиддин Биноӣ

https://t.me/gazaltj

Ҳеҷ неъмат беҳтар аз фарзанд нест,
Ҷуз ба ҷон фарзандро пайванд нест.
Ҳосил аз фарзанд гардад коми мард,
Зинда аз фарзанд гардад номи мард.
(Абдураҳмони Ҷомӣ)

https://t.me/gazaltj

Бар ошиқон фариза бувад ҷустуҷӯйи дӯст,
Бар рӯву сар чу сел давон то ба ҷӯйи дӯст.

Худ ӯст ҷумла толибу мо ҳамчу сояҳо,
Ай гуфтугӯи мо ҳамагӣ гуфтугӯйи дӯст.

Гоҳе ба ҷӯйи дӯст чу оби равон хушем,
Гоҳе чу об ҳабс шудам дар сабӯи дӯст.

Гаҳ чун ҳавиҷи дег биҷӯшему ӯ ба фикр
Кафгир мезанад, ки чунин аст хӯйи дӯст.

Бар гӯши мо ниҳода даҳон ӯ ба дамдама,
То ҷони мо бигирад якбора бӯйи дӯст.

Чун ҷони ҷон вай омад, аз вай гурез нест,
Ман дар ҷаҳон надидам як ҷон адӯйи дӯст.

Бигдозадат зи нозу чу мӯят кунад заъиф,
Надҳӣ ба ҳар ду олам як тои мӯйи дӯст.

Бо дӯст мо нишаста, ки ай дӯст, дӯст ку?
Ку-ку ҳамезанем зи мастӣ ба кӯйи дӯст.

Тасвирҳои нохушу андешаи ракик
Аз табъи суст бошаду ин нест сӯи дӯст.

Хомӯш бош, то сифати хеш худ кунад,
Ку ҳойҳуйи сарди ту, ку ҳойҳӯйи дӯст?

Бар ошиқон фариза бувад ҷустуҷӯйи дӯст ….
Ҷалолуддин Балхӣ - Румӣ

https://t.me/gazaltj

Бишнав аз най чун ҳикоят мекунад,
Аз ҷудойиҳо шикоят мекунад,
К-аз найистон то маро бубридаанд,
Дар нафирам марду зан нолидаанд.
Сина хоҳам шарҳа–шарҳа аз фироқ,
То бигӯям шарҳи дарди иштиёқ.
Ҳар касе, к-ӯ дур монд аз асли хеш,
Боз ҷӯяд рӯзгори васли хеш.
Ман ба ҳар ҷамъийяте нолон шудам,
Ҷуфти бадҳолону хушҳолон шудам.
Ҳар касе аз занни худ шуд ёри ман,
Аз даруни ман наҷуст асрори ман.
Сирри ман аз нолаи ман дур нест,
Лек чашму гӯшро он нур нест.
Тан зи ҷону ҷон зи тан мастур нест,
Лек касро диди ҷон дастур нест.
Оташ аст ин бонги нойу нест бод,
Ҳар кӣ ин оташ надорад, нест бод!
Оташи ишқ аст, к-андар най фитод,
Ҷӯшиши ишқ аст, к-андар май фитод.
Най ҳарифи ҳар кӣ аз ёре бурид,
Пардаҳояш пардаҳои мо дарид.
Ҳамчу най заҳреву тарёқе кӣ дид?
Ҳамчу най дамсозу муштоқе кӣ дид?
Най ҳадиси роҳи пурхун мекунад,
Қиссаҳои ишқи Маҷнун мекунад.
Маҳрами ин ҳуш ҷуз беҳуш нест,
Мар забонро муштарӣ ҷуз гӯш нест.
Дар ғами мо рӯзҳо бегоҳ шуд,
Рӯзҳо бо сӯзҳо ҳамроҳ шуд.
Рӯзҳо гар рафт, гӯ: «Рав бок нест,
Ту бимон, эй он ки чун ту пок нест».
Ҳар кӣ ҷуз моҳӣ зи обаш сер шуд,
Ҳар кӣ берӯзист, рӯзаш дер шуд.
Дарнаёбад ҳоли пухта ҳеч хом,
Пас сухан кӯтоҳ бояд, вассалом!
Банд бугсил, бош озод, эй писар!
Чанд бошӣ банди симу банди зар?
Гар бирезӣ баҳрро дар кӯзае,
Чанд гунҷад, қисмати якрӯзае?
Кӯзаи чашми ҳарисон пур нашуд,
То садаф қонеъ нашуд, пурдур нашуд.
Ҳар киро ҷома зи ишқе чок шуд,
ӯ зи ҳирсу айб куллӣ пок шуд.
Шод бош, эй ишқи хушсавдои мо!
Эй табиби ҷумла иллатҳои мо!
Эй давои нахвату номуси мо!
Эй ту Афлотуну Ҷолинуси мо!
Ҷисми хок аз ишқ бар афлок шуд,
Кӯҳ дар рақс омаду чолок шуд.
Ишқ ҷони Тур омад, ошиқо!
Тур масту «харра Мӯсо соиқо».
Бо лаби дамсози худ гар ҷуфтаме,
Ҳамчу най ман гуфтаниҳо гуфтаме.
Ҳар кӣ ӯ аз ҳамзабоне шуд ҷудо,
Безабон шуд, гарчи дорад сад наво.
Чунки гул рафту гулистон даргузашт,
Нашнавӣ з-он пас зи булбул саргузашт.
Ҷумла маъшуқ асту ошиқ пардае,
Зинда маъшуқ асту ошиқ мурдае.
Чун набошад ишқро парвои ӯ,
ӯ чу мурғе монд бепар, вои ӯ.
Ман чӣ гуна ҳуш дорам пешу пас,
Чун набошад нури ёрам пешу пас? ;
Ишқ хоҳад, к-ин сухан берун бувад,
Ойина ғаммоз набвад, чун бувад?
Ойина-т донӣ чаро ғаммоз нест?
З-он ки зангор аз рухаш мумтоз нест.;

Бишнав аз най чун ҳикоят мекунад…

Мавлоно Ҷалолуддин Балхӣ - Румӣ

https://t.me/gazaltj

Моро, гуле аз рӯи ту чидан нагузоранд,
Чидан чӣ хаёл аст? Ки дидан нагузоранд!

Сад шарбати нӯшин зи лабат, хастадилонро,
Наздики лаб оранду чашидан нагузоранд.

Гуфтам, шунавад, муждаи дашноми ту гӯшам,
Он низ шунидам, ки шунидан нагузоранд.

Зулфи ту чӣ имкони кашидан? ки рақибон,
Сар дар қадамат низ кашидан нагузоранд.

Бахшой бар он мурғ, ки хунаш гаҳи бисмил,
Бар хок бирезанду тапидан нагузоранд.

Дил шуд зи ту садпораву фарёд ки ин қавм,
Наъра, задану ҷома даридан нагузоранд.

Магрез, камол' аз сари зулфаш, ки дар ин дом,
Мурғе ки дарафтод, паридан нагузоранд !

#Камоли_Хуҷандӣ

https://t.me/gazaltj

Ҳайфи он субҳе, ки танҳо бо ғами нон бигзарад,

Ҳайфи он шоме, ки дар талвосаи ҷон бигзарад.

Сайри кайҳон карда кайҳо дигарон, бозомаданд,

Он мабодо, ҳасрати мо ҳам зи кайҳон бигзарад.

Ғунча ҳар субҳе бигӯяд сурхрӯву сарбаланд:

Файзи бедорӣ, аё эй сахтхобон, бигзарад.

Пеши беморони даврон гӯ, ки он соат мабод,

То табиб аз ҷо бихезад, вақти дармон бигзарад.

Ғаррагонро гӯ ба худ бошанд, к-ин даври замон

Бар касон бигзашт, ҳам акнун бар эшон бигзарад.

Бо либоси хештан чандин мабол, эй ҷони ман,

Одамӣ ояд ба даҳр урёну урён бигзарад.

Ҳаҷр ҷонкандан бувад, гар ёр матлуби дил аст,

Марг мушкилтар шавад, гар умр осон бигзарад.

Ҳайфи он меҳмон, ки бо паймона паймонҳо кунад,

Чун хумораш даррасад, аз иззати хон бигзарад.

Ташнаро як коса об аз ҳавзи Кавсар бартар аст,

Қимати зар дар дукон аз арзиши кон бигзарад.

Ҷумла мавҷуде, ки инсон ояд аз модар нахуст,

Баъди гирудори умр, эй кош, инсон бигзарад.

Низом Қосим

https://t.me/gazaltj

Даме бо ғам ба сар бурдан ҷаҳон яксар намеарзад,
Ба май бифрӯш далқи мо, к-аз ин беҳтар намеарзад.

Ба кӯи майфурӯшонаш ба ҷоме барнамегиранд,
Зиҳӣ саҷҷодаи тақво, ки як соғар намеарзад.

Рақибам сарзанишҳо кард, к-аз ин боб рух бартоб,
Чӣ афтод ин сари моро, ки хоки дар намеарзад?

Шукӯҳи тоҷи султонӣ, ки бими ҷон дар ӯ дарҷ аст,
Кулоҳе дилкаш аст, аммо ба тарки сар намеарзад.

Чӣ осон менамуд аввал ғами дарё ба бӯи суд,
Ғалат кардам, ки ин тӯфон ба сад гавҳар намеарзад.

Туро он беҳ, ки рӯи худ зи муштоқон бипӯшонӣ,
Ки шодии ҷаҳонгирӣ ғами лашкар намеарзад.

Чу Ҳофиз дар қаноат кӯшу аз дунёи дун бигзар,
Ки як ҷав миннати дунон дусад ман зар намеарзад.

https://t.me/gazaltj

ВАТАНАМ

Тоҷикистон, сари ҳар санги ту бар маи Ватан аст,
Бари ҳар буттаи хори ту бароям чаман аст.
Заррае некам агар дарси ту аз бар кардам,
Заррае хубам агар ҳусни ту мероси ман аст.
Кӯҳсорони ту аз нуқраву тиллост баланд,
Ту баландӣ зи баландии вафои писарон.
Сари ҳар сахра яке кулбаи сангист баҷой,
Ҳамраҳи меҳри ту олам ҳама ғунҷад дар он,
Ватанам, эй Ватани майдаи мардони калон!
Гулрухсор

https://t.me/gazaltj

Мухаммас бар ғазали машҳури “Эй чеҳраи зебои ту”-и Амир Хусрави Деҳлавӣ

Ҷону дилам ай гулпарӣ, ақлу ҳушамро мебари
Лаб бар лабат бинҳам агар, мастам куни бе соғарӣ.
Парвонаосо мекунам аз ҳусни руят чокарӣ
"Эй чеҳраи зебои ту, рашки бутони озарӣ
Ҳарчанд васфат мекунанд дар ҳусн аз он зеботари"

Акси накуят доимо, дар пеши чашмам ҷилвагар
Дар шоми торам, махрухон, боши ба монанди қамар
Ҷӯям наёбам ҳамчу ту ёри азизу муътабар
"Ҳаргз наояд дар назар шамъе зи руят хубтар
Шамси надонам ё қамар, ҳури надонам ё парӣ"

Доим манам раҳпои ту, шояд ба наздам ойи ту
Ҳеҷам ману дунёи ту, соҳил манам, дарё туи
…
"Олам ҳама яғмои ту, халқе ҳама шайдои ту
Он наргиси шаҳлои ту оварда расми кофарӣ"

Дар кирду кори зиндагӣ, ҷоно туро санҷидаам
Гоҳо зи ту ранҷидаам, гоҳ ҳамраҳат хандидам
Гулҳо зи рӯят чидаам, аз накҳаташ болидаам
"Офоқро гардидаам, меҳри бутон варзидаам
Бисёр хубон дидаам, аммо ту чизи дигари"

Мухаммас бар ғазали машҳури “Эй чеҳраи зебои ту”-и Амир Хусрави Деҳлавӣ

https://t.me/gazaltj

Ёр дил бирбуду аз манн рўй пинҳон карду рафт,
Он гули хандон маро чун абр гирён карду рафт.
То ба занҷири касе сар дарнаёрад баъд аз ин,
Ҳалқае аз зулфи худ дар гардани ҷон карду рафт.
Юсуфи хандон, ки рўяш мулки Мисри ҳусн дошт,
Хона бар Яъқуби гирён байтул эҳзон карду рафт.
Манн бад‐он сон кӣ будам, диданд мардум ҳоли ман,
Омад он сангиндилу ҳолам бад‐ин сон карду рафт.
Аз фароғат бандаро сад ҳамчу Хусрав мулк буд,
Ў ба Ширинем чун Фарҳод ҳайрон карду рафт.
(Сайфи Фарғонӣ)

https://t.me/gazaltj

Эй дўст
Ҳанўзам, ки умеди зиндагонист,
Барои ту ғазал мегўям, эй дўст.

Ҳанўзам, ки баҳор асту ҷавонӣ,
Гули ёди туро мебўям, эй дўст.

Саҳар чун шона мепечад ба мўям,
Кушода уқдаҳо, мемўям, эй дўст.

Ғубори хотири неки туро ман,
Ба ашки шодиҳо мешўям, эй дўст.

Агар афтам чу дона зери поят,
Ба марзи ёдҳо мерўям, эй дўст.

Ҳанўзам, ки ҳанўз асту ҳанўз аст,
Биё бар хилвати гесўям, эй дўст.
(Меҳринисо)

https://t.me/gazaltj

https://t.me/gazaltj

Ай шуда ғарра дар ҷаҳон дур машав дур машав,
Ёру нигор дар барат дур машав дур машав.
Халқ манам хона манам дом манам дона манам,
Оқилу девона манам дур машав дур машав.
Каъбаи асрор манам ҷабъаву дастор манам,
Роҳибу зуннор манам дур машав дур машав.
Мир манам пир манам баста ба занҷир манам,
Соҳиби тадбир манам дур машав дур машав.
Шод манам дод манам бандаву озод манам,
Андуҳи дилшод манам дур машав дур машав.
Шом манам руз манам ишқи ҷигарсуз манам,
Шамъ дилафруз манам дур машав дур машав.
Равза манам ҳур манам ноз манам нур манам,
Ҷаннати маъҳуд манам дур машав дур машав.
Қол манам ҳол манам дол манам зол манам,
Мухбири аҳвол манам дур машав дур машав.
Роҳ манам руҳ манам муфлиқу мафтуҳ манам,
Матлаи сабуҳ манам дур машав дур машав.
Қир манам шир манам равнақи қаншир манам,
Мадҳи табошир манам дур машав дур машав.
Нафх манам сур манам қурб манам дур манам,
Восилу маҳҷур манам дур машав дур машав.
Ёр манам ғор манам дилбару дилдор манам,
Ғунча манам хор манам дур машав дур машав.
Фасл манам васл манам фаръ манам асл манам,
Ақл манам нақл манам дур машав дур машав.
Ном манам бом манам субҳ манам шом манам,
Ҳосили айём манам дур машав дур машав.
Руз манам руза манам об манам куза манам,
Соҳиби дарюза манам дур машав дур машав.
Ганҷ манам ранҷ манам чор манам панҷ манам,
Рузу шаб оҳанг манам дур машав дур машав.
Шамс манам моҳ манам ҳоҷибу даргоҳ манам,
Бехуду бехоб манам дур машав дур машав.
Шамси шакаррез манам мафхари Табрез манам,
Ханҷари хунрез манам дур машав дур машав.
#Мавлоно

#مولانا
ی شده غره در جهان دور مشو دور مشو

یار و نگار در برت دور مشو دور مشو

خلق منم خانه منم دام منم دانه منم

عاقل و دیوانه منم دور مشو دور مشو

كعبه اسرار منم جبه و دستار منم

راهب و زنار منم دور مشو دور مشو

میر منم پیر منم بسته به زنجیر منم

صاحب تدبیر منم دور مشو دور مشو

شاد منم داد منم بنده و آزاد منم

اندوه دل شاد منم دور مشو دور مشو

شام منم روز منم عشق جگر سوز منم

شمع دل افروز منم دور مشو دور مشو

روضه منم حور منم ناز منم نور منم

جنت معهود منم دور مشو دور مشو

قال منم حال منم دال منم ذال منم

مخبر احوال منم دور مشو دور مشو

راح منم روح منم مفلق و مفتوح منم

مطلع صبوح منم دور مشو دور مشو

قیر منم شیر منم رونق قنشیر منم

مهد تباشیر منم دور مشو دور مشو

نفخ منم صور منم قرب منم دور منم

واصل و مهجور منم دور مشو دور مشو

یار منم غار منم دلبر و دلدار منم

غنچه منم خار منم دور مشو دور مشو

فصل منم وصل منم فرع منم اصل منم

عقل منم نقل منم دور مشو دور مشو

نام منم بام منم صبح منم شام منم

حاصل ایام منم دور مشو دور مشو

روز منم روزه منم آب منم كوزه منم

صاحب دریوزه منم دور مشو دور مشو

گنج منم رنج منم چار منم پنج منم

روز و شب آهنگ منم دور مشو دور مشو

شمس منم ماه منم حاجب و درگاه منم

غافل و آگاه منم دور مشو دور مشو

شیخ منم شاب منم ابر منم آب منم

بیخود و بیخواب منم دور مشو دور مشو

شمس شكرریز منم مفخر تبریز منم

خنجر خونریز منم دور مشو دور مشو
Ай шуда ғарра дар ҷаҳон
дур машав, дур машав …

(Мавлоно Ҷалолуддини Балхии Румӣ)
https://t.me/gazaltj

Дило назди касе биншин, ки ў аз дил хабар дорад,
Ба зери он дарахте рав, ки ў гулҳои тар дорад.

Дар ин бозори атторон, марав ҳар сў чу бекорон,
Ба дукони касе биншин, ки дар дукон шакар дорад.

Ба ҳар деге, ки меҷўшад маёвар косаву маншин,
Ки ҳар деге, ки меҷўшад, дарун чизи дигар дорад.

Бинол, эй булбули дастон, ба зери нолаи мастон,
Миёни сахраву хоро асар дорад, асар дорад.

Чароғ аст ин дили бедор, ба зери доманаш медор,
Аз ин боду ҳаво бигзар, ҳавояш шўру шар дорад.

Чу ту аз бод бигзаштӣ, муқими чашмае гаштӣ,
Ҳарифи ҳамдаме гаштӣ, ки обе бар ҷигар дорад.

Чу обат бар ҷигар бошад, дарахти сабзро монӣ,
Ки мева нав диҳад доим, даруни дил сафар дорад.
(Мавлоно Ҷалолуддини Балхии Румӣ)

https://t.me/gazaltj

Дунё ба мурод монда гири, охир чӣ?
В-ин номаи умр хонда гири, охир чӣ?
Гирам ки ба коми дил бимонди, сад сол,
Сад соли дигар ба монда гирӣ, охир чӣ?
（Бобо Афзали Кошонӣ）

https://t.me/gazaltj

Ёрӣ андар кас намебинем, ёронро чӣ шуд?
Дӯстӣ кай охир омад, дӯстдоронро чӣ шуд?

Оби ҳайвон тирагун шуд, Хизри фаррухпай куҷост?
Хун чакад аз шохи гул, абри баҳоронро чӣ шуд?

Кас намегӯяд, ки ёре дошт ҳаққи дӯстӣ,
Ҳақшиносонро чӣ ҳол афтод, ёронро чӣ шуд?

Лаъле аз кони мурувват барнаёмад, солҳост,
Тобиши хуршеду саъйи боду боронро чӣ шуд?

Шаҳри ёрон буду хоки меҳрубонон ин диёр,
Меҳрубонӣ кай саромад, шаҳриёнро чӣ шуд?

Гӯи тавфиқу каромат дар миён афгандаанд,
Кас ба майдон дарнамеояд, саворонро чӣ шуд?

Сад ҳазорон гул шукуфту бонги мурғе барнахост,
Андалебонро чӣ пеш омад, ҳазоронро чӣ шуд?

Зӯҳра созе хуш намесозад, магар удаш бисӯхт,
Кас надорад завқи мастӣ, майгусоронро чӣ шуд?

Ҳофиз, асрори илоҳӣ кас намедонад, хамӯш!
Аз кӣ мепурсӣ, ки даври рӯзгоронро чӣ шуд?
(Хоҷа Ҳофизи Шерозӣ)

https://t.me/gazaltj

ОБИ ҶОНБАХШ

Гул ба оби ҷўй вақте ки хуморӣ мешавад,
Барги ҳар як ғунча чашми интизорӣ мешавад.

0б ояд тўй хоҳам кард гўяд боғи нав,
ҳар қарори ошиқон аз беқарорӣ мешавад.

ҳар кӣ кард обод як саҳрои ноободро
ҳар ниҳол аз ҳиммати ў ёдгорӣ мешавад.

Дона то дар хок н-афтад кай ба боло қад кашад,
қадри одам ҳам баланд аз хоксорӣ мешавад.

Ташнагонро об додан баски мебошад савоб,
Лутфу эҳСони ҳақиқӣ ихтиёрӣ мешавад.

Гул кун, эй саҳрои беҳадду канори рўзгор,
Оби ҷонбахш аз канал имрўз ҷорӣ мешавад.

Гул ба оби ҷўй вақте ки хуморӣ мешавад ….
(#Аминҷон Шукуҳӣ)

https://t.me/gazaltj

ХОКИ ПАДАРОН

Хоки падарон аст замине, ки дар ӯ
Мо тухми умеду орзу коштаем.
Хуни падарон аст, ки ҳамранги шафақ
Мо парчами фирӯзӣ барафроштаем.

Гӯри падарон, ки хоки мурдаст, дареғ,
Тобад ба назар чун варами рӯи замин.
Гӯӣ ба ҳамин гӯр фаро омадааст Кулли ғаму дарду алами рӯи замин.

Зинҳор магӯӣ, ки ба беҳуда гузашт
Даврони шаҳомату замони падарон.
Ҳар ғунча, ки бишкуфад ба сад ранг имрӯз

Аз хок бируста чун нишони падарон...
14.12.1973
(Лоиқ Шералӣ)

https://t.me/gazaltj

Мирзо Турсунзода

ХОНАИ МО ОНҚАДАРҲАМ ДУР НЕСТ
I
Гуфта будӣ ин,
ки меҳмон мешавӣ,
Дар тани ҷонпарварон ҷон мешавӣ.
Рўзу шабҳо интизорам ман ҳанўз,
Бо дили уммедворам ман ҳанўз.
Канда шуд дар роҳи ту чашмони ман,
Кай ту меоӣ
Биё, ҷонони ман!
Хонаи мо он қадар ҳам дур нест,
Гарчи дар чашми шумо манзур нест.
II
Ҳар ду дар як шаҳри нав сабзидаем,
Ҳар ду онро ҷону дил бахшидаем.
Шаҳри мо монанди боғу гулшан аст,
Манзили сайру тамошо кардан аст.
Сўи мо гар бо суроғе меравӣ,
Аз миёни кўчабоғе меравӣ.
Хонаи мо он қадар ҳам дур нест,
Гарчи дар чашми шумо манзур нест.
III
Менамоям ёду меҷўям туро,
Бевафо, бераҳм мегўям туро.
Хуб мешуд, ки ту ҳам ёде кунӣ,
Ёд аз мо бо дили шоде кунӣ.
Гарчи то имрўз будӣ камнамо,
Баъд аз ин инсоф кун, ҷонам, биё!
Хонаи мо он қадар ҳам дур нест,
Гарчи дар чашми шумо манзур нест.
(Соли - 1948)

Перевод

Обещал ты мне что будешь навещать,
и что душу мою будешь охранять.
День и ночь томлюсь я в ожидании,
сердце мое все еще трепется в надежде.
[2x]
В твою сторону истомились смотреть глаза мои,
Когда же ты придешь?
Приди, душа моя, душа моя.
Живем мы не так далеко друг от друга
Но не вижу в ваших глазах намерения навести.
[2x]
Оба мы выросли в одном новом городе,
Оба мы посвятили ему душу и сердце
Город наш оброс садами и цветниками
Стал он местом гуляний и смотрин
[2x]
Если как нибудь пойдешь к нам
Будешь идти по садовым улицам
Живем мы не так далеко друг от друга
Но не вижу в ваших глазах намерения навести.

ХОНАИ МО ОНҚАДАРҲАМ ДУР НЕСТ ….
(Мирзо Турсунзода)

https://t.me/gazaltj

Гуфтам, магар ба хоб бибинам хаёли дӯст,
Инак, алассабоҳ2 назар бар ҷамоли дӯст.

Мардум ҳилоли ид бидиданду пеши мо
Ид асту онак3, абруи ҳамчун ҳилоли дӯст.

Моро дигар ба сарви баланд илтифот нест
Аз дӯстии қомати боэътидоли дӯст.

З-он бехудам, ки ошиқи содиқ набошадаш
Парвои нафси хештан аз иштиғоли дӯст.

Эй хоб, гирди дидаи Саъдӣ дигар магард,
Ё дида ҷои хоб бувад, ё хаёли дӯст.

2-Алласабоҳ - Бомдодон
3 - Онак - Акнун он ҷост

(Шайх Саъдии Шерозӣ)

https://t.me/gazaltj

Дар ғами дунё ба дунёбехабар бовар макун,
Эй сафарнодида ту бар навсафар бовар макун.

Дӯст бар сайри ҷаҳон хонад агар, бо ҷон бирав,
Душманат гӯяд баро то пушти дар, бовар макун.

То нарезад заҳр аз дандони мори куштаат,
Боз ҳам ҳушёр бош, аз ин зафар бовар макун.

Чун гувоҳи марги Сӯҳроб аст шамшери падар,
Дар набарди зиндагонӣ бар падар бовар макун.

Гар ба чашми дил набинӣ покии виҷдони кас,
Ҳеҷ гаҳ бар заррабини чашми сар бовар макун.

Тифлакон хобанд дар гаҳвораҳои чӯби бед,
Бедро гӯянд нахли бесамар, бовар макун.

Саидҷон Ҳакимзода

Дар ғами дунё ба ДУНЁБЕХАБАР...

https://t.me/gazaltj

Ишқат на сарсарист, ки аз сар бадар шавад,
Меҳрат на оразист, ки ҷои дигар шавад.
Ишқи ту дар вуҷудаму меҳри ту дар дилам
Бо шир дар дарун шуду бо ҷон бадар шавад.
Дардест дарди ишқ, ки андар илоҷи ӯ,
Ҳарчанд саъй беш намоӣ, батар шавад.
Аввал яке манам, ки дар ин шаҳр ҳар шабе
Фарёди ман зи ишқ бар афлоқ бар шавад.
Гар з-он, ки ман сиришқ фишонам ба Зиндарӯд.
Кишти Ироқ ҷумла ба якбор тар шавад.
Дӣ дар миёни зулф бидидам рухи нигор
Бар ҳайате, ки абр муҳити қамар шавад.
Гуфтам, ки: «Ибтидо кунам аз бӯса», Гуфт: «не!
Бигзор то, ки моҳ зи ақраб бадар шавад!»
Эй дил, ба ёди лаъли вай ар бода мехӯрӣ,
Магзор, ҳон, ки муддаиёнро хабар шавад.
Ҳофиз сар аз лаҳад ба дар орад ба пойбӯс,
Гар хоки ӯ ба пои шумо пайсипар шавад.
(Ҳофизи Шерозӣ)

https://t.me/gazaltj

Юсуфи гумгашта боз ояд ба Канъон, ғам махӯр.
Кулбаи эҳзон шавад рӯзе гулистон, ғам махӯр.
Ай дили ғамдида, ҳолат беҳ шавад, дил бад макун
В-ин сари шӯрида боз ояд ба сомон, ғам махӯр.
Гар баҳори умр бошад, боз бар тахти чаман
Чатри гул бар сар кашӣ, ай мурғи хушхон, ғам махӯр.
Даври гардун гар ду рӯзе бар муроди мо нарафт,
Доимо яксон набошад ҳоли даврон, ғам махӯр.
Ҳон машав навмед, чун воқиф наӣ аз сирри ғайб
Бошад андар парда бозиҳои пинҳон, ғам махӯр.
Ай дил, ар сейли фано бунёди ҳастӣ барканад,
Чун туро Нӯҳ аст киштибон зи тӯфон, ғам махӯр.
Дар биёбон гар ба шавқи Қаъба ҳоҷӣ зад қадам,
Сарзанишҳо гар кунад хори мағелон, ғам махӯр.
Гарчи манзил бас хатарнок асту мақсад бас баъид,
Ҳеҷ роҳе нест, к-онро нест поён, ғам махӯр.
Ҳоли мо дар фурқати ҷонону иброми рақиб,
Ҷумла медонад Худои ҳолгардон, ғам махӯр.
Ҳофизо, дар кунҷи фақру хилвати шабҳои тор,
То бувад вирдат дуъову дарс Қуръон, ғам махӯр.

یوسف گمگشته بازآید به کنعان غم مخو

کلبه احزان شود روزی گلستان غم مخور

ای دل غمدیده حالت به شود دل بد مکن

وین سر شوریده بازآید به سامان غم مخور

گر بهار عمر باشد باز بر تخت چمن

چتر گل در سر کشی ای مرغ خوشخوان غم مخور

دور گردون گر دو روزی بر مراد ما نرفت

دایما یک سان نباشد حال دوران غم مخور

هان مشو نومید چون واقف نهای از سر غیب

باشد اندر پرده بازیهای پنهان غم مخور

ای دل ار سیل فنا بنیاد هستی برکند

چون تو را نوح است کشتیبان ز طوفان غم مخور

در بیابان گر به شوق کعبه خواهی زد قدم

سرزنشها گر کند خار مغیلان غم مخور

گر چه منزل بس خطرناک است و مقصد بس بعید

هیچ راهی نیست کان را نیست پایان غم مخور

حال ما در فرقت جانان و ابرام رقیب

جمله میداند خدای حال گردان غم مخور

حافظا در کنج فقر و خلوت شبهای تار

تا بود وردت دعا و درس قرآن غم مخور

Юсуфи гумгашта боз ояд …
(Хоҷа Ҳофизи Шерозӣ)
https://t.me/gazaltj

Модар, модар ёди парешон МОДАР,
Модар, модар чароги сӯзон МОДАР.
Афсурдаву хушкида дар чашми тарам.
Пайваста чу шохаи шукуфон МОДАР.

Пармоли Қизилқалъа ҳама зарду кабуд,
Зардаш ҳама зардобу кабудаш ҳама дуд.
Рӯзе, ки анори боғҳо пӯхта расид,
Зардоби дили модари ман ру зада буд.

Мегуфт балои сари ту дар ҷонам,
Носудаву саргашта балогардонам.
Дардам ба дилаш гирифту доғам ба ҷигар,
Зардобу заҳир гашта модарҷонам.

Найзори раҳи хонаи модар ҳама дам,
Фарёди найи хушки найистон ба алам.
Рафтам раҳи найзору бидидам модар,
Қадраш шуда афзуну мадораш ками кам.

Носуда замистону баҳорон МОДАР,
Нодида ҷаҳони нобасомон МОДАР.
Бишкуфта гули умеду гулдонаи ӯ,
Хушкида ба мисли шохи райхон МОДАР.
(Назри Яздони)

https://t.me/gazaltj

Иблис шабе рафт ба болини ҷавоне,
Ороста бо шакли муҳиббе сару барро.
Гуфто, ки манам марг, агар хоҳи зинҳор,
Бояд бигузинӣ ту яке з-ин се хатарро.
Ё он падари пири худатро бикушӣ зор,
Ё бишканӣ аз хоҳари худ синаву сарро.
Ё худ зи майи ноб бинӯши ду-се соғар,
То ин ки бипӯшам зи ҳалоки ту назарро.
Ларзид аз ин бим ҷавон, бар худу ҷо дошт,
К-аз марг фитад ларза ба тан зайғами нарро.
Гуфто: накунам бо падару хоҳарам ин кор,
Лекин ҳаме аз хеш кунам дафъ зарарро.
Ҷоме ду-се май хӯрд, чу шуд хира зи мардум,
Ҳам хоҳари худро заду ҳам кушт падарро.
Эй кош, шавад хушк буни току Худованд
З-ин мояи шар(р) ҳифз кунад навъи башарро.
(Эраҷ Мирзо)

https://t.me/gazaltj

Илми тақво сар ба сар даъват, маъно дигар хаст,
Марди маъни дигару, майдони даъво дигар ҳаст.
Ҳусни моҳруён чи мемонад ба руйи ёри мо?
Партави моҳ дигару,нури таҷҷалло дигар ҳаст.
Ошик ар-омад ба куйи дунёву-уқбо нахост,
Ҷониби тур омадани максуди Мусо дигар хаст.
Гарчи пархез аз Биҳишту-ҳур хаст аз ақл дур,
Дар ривоят дидам ин фатвоест, тақво дигар ҳаст.
Аз дараш то равза фарқ ҳаст аз замин то осмон,
Хоки ин роҳ дигару, фирдавси аъло дигар ҳаст.
Чашм бар фардо манеҳ чун дигарон дидорро,
Баркушо имруз чашме,кори фардо дигар ҳаст.
Гар дилат бишкастдилбар, масти афзун кун Камол,
К-аз шикасти ҷоми Маҷнун, қасди Лайло дигар ҳаст.
Камоли Хуҷандӣ

https://t.me/gazaltj

Ман надонистам аз аввал, ки ту бемеҳру вафоӣ,
Аҳд нобастан аз он беҳ, ки бубандиву напойӣ.

Дӯстон айб кунандам, ки чаро дил ба ту додам,
Бояд аввал ба ту гуфтан, ки «чунин хуб чароӣ?»

Ай ки гуфтӣ «марав андар пайи хубони замона»,
Мо куҷоем дар ин баҳри тафаккур, ту куҷоӣ?!

Он на хол асту занахдону сари зулфи парешон,
Ки дили аҳли назар бурд, ки сиррест худоӣ.

Парда бардор, ки бегона худ ин рӯй набинад,
Ту бузургиву дар оинаи кӯчак нанамойӣ!


Ҳалқа бар дар натавонам задан аз дасти рақибон,
Ин тавонам, ки биёям ба маҳаллат ба гадоӣ.

Ишқу дарвешиву ангуштнамойиву маломат,
Ҳама саҳл аст, таҳаммул накунам бори ҷудоӣ.

Рӯзи саҳрову самоъ асту лаби ҷӯю тамошо,
Дар ҳама шаҳр диле нест, ки дигар бирабойӣ.

Гуфта будам, чу биёӣ, ғами дил бо ту бигӯям,
Чӣ бигӯям, ки ғам аз дил биравад, чун ту биёӣ!

Шамъро бояд аз ин хона бадар бурдану куштан,
То ба ҳамсоя нагӯяд, ки ту дар хонаи моӣ.

Саъдӣ он нест, ки, ҳаргиз, зи камандат бигурезад,
Ки бидонист, ки дар банди ту хуштар, ки раҳоӣ.

Халқ гӯянд: «Бирав, дил ба ҳавои дигаре деҳ!»
Накунам, хосса дар айёми Атобак дуҳавоӣ.
(Шайх Саъдии Шерозӣ)
…Ман надонистам аз аввал, ки ту бе меҳру вафои…

https://t.me/gazaltj

Зи рашки кулбаи ман каъбаву бутхона месӯзад,
Ту дар як хона оташ мезанӣ, сад хона месӯзад.
Ту май бо ғайр менӯшиву мегардам кабобат ман,
Ту шамъи анҷуман мегардиву парвона месӯзад.
Ба ҷисму ҷони ман, эй барқи бепарво, мурувват кун
Ту бар коҳи ман оташ мезаниву дона месӯзад.
Нигоҳи гарм дар майхонаи ман аз кӣ афтодаст?
Май аз хум то барояд, шишаву майхона месӯзад.
Туро имрӯз ҳамчун мӯйи оташдида мебинам,
Кадом ошуфта бар тасхири зулфу шона месӯзад.
Намерезад касе бар оташи бетобиям обе,
Ба ҳолам ошно мегиряду бегона месӯзад.
Ба ёди он гули рӯ, Сайидо, шамъе ки афрӯзам
Ба гулшан булбулу дар анҷуман парвона месӯзад.

https://t.me/gazaltj

Айюҳаннос, ҷаҳон ҷои таносонӣ нест,
Марди доно ба ҷаҳон доштан арзонӣ нест.

Хуфтагонро чӣ хабар замзамаи мурғи саҳар,
Ҳаявонро хабар аз олами инсонӣ нест.

Доруи тарбият аз пири тариқат биситон,
К-одамиро батар аз иллати нодонӣ нест.

Руй агарчанд паричеҳраву зебо бошад,
Натавон дид дар оина, ки нуронӣ нест.

Шаби мардони Худо рузи ҷаҳонафруз аст,
Равшанонро ба ҳақиқат шаби зулмонӣ нест.

Панҷаи дев ба бозуи риёзат бишикан,
К-ин ба сарпанҷагии зоҳири ҷисмонӣ нест.

Тоъат он нест, ки бар хок ниҳӣ пешонӣ,
Сидқ пеш ор, ки ихлос ба пешонӣ нест.

Ҳазар аз пайравии нафс, ки дар роҳи Худой,
Мардумафгантар аз ин ғули биёбонӣ нест.

Олиму обиду суфӣ ҳама тифлони раҳанд,
Мард агар ҳаст ба ҷуз орифи раббонӣ нест.

Бо ту тарсам накунад шоҳиди рӯҳонӣ рӯй,
К-илтимоси ту ба ҷуз роҳати нафсонӣ нест.

Хона пургандуму як ҷав нафиристода ба гӯр,
Барги маргат чу ғами барги зимистонӣ нест.

Бибарӣ моли мусулмону чу молат бибаранд,
Бонгу фарёд барорӣ, ки мусулмонӣ нест.

Охире нест таманнои сару сомонро,
Сару сомон беҳ аз бесару сомонӣ нест.

Он кас аз дузд битарсад, ки матоъе дорад,
Орифон ҷамъ бикарданду парешонӣ нест.

В-он киро хайма ба саҳрои фароғат задаанд,
Гар ҷаҳон зилзила гирад, ғами вайронӣ нест.

Як насиҳат зи сари сидқ ҷаҳоне арзад,
Машнав ар дар суханам фоида дуҷҳонӣ нест.

Ҳосили умр талаф кардаву айём ба лағв,
Гузаронида, ба ҷуз ҳайфу пушаймонӣ нест.

Саъдиё, гарчи сухандону масолеҳ гуӣ,
Ба амал кор барояд, ба сухандонӣ нест.

То ба хирман бирасад кишти умеде, ки турост,
Чораи кор ба ҷуз дидаи боронӣ нест.

Гар гадоӣ кунӣ, аз даргаҳи ӯ кун боре,
Ки гадоёни дарашро сари султонӣ нест.

Ё Раб, аз нест ба ҳаст омадаи сунъи туем,
В-он чӣ ҳаст, аз назари илми ту пинҳонӣ нест.

Гар бирониву гарам бандаи мухлис хонӣ,
Руи навмедиям аз Ҳазрати султонӣ нест.

Ноумед аз дари лутфи ту куҷо шояд рафт?
Ту бибахшой, ки даргоҳи туро сонӣ нест.

Дасти ҳасрат газӣ гар як дирамат фавт шавад,
Ҳеҷат аз умри талафкарда пушаймонӣ нест .

Саъдии Шерозӣ

https://t.me/gazaltj

Биё, ки зулфи каҷу чашми сурмасо инҷост,
Нигоҳи гарму адоҳои дилрабо ин ҷост.

Карашма теғу нигаҳ ханҷару мижа алмос,
Шаҳодат ар-талабӣ, Дашти Карболо ин ҷост.

Агар биҳишт диҳандат, фиреби кас нахурӣ,
Қадам зи майкада берун манеҳ, ки ҷо ин ҷост.

Китобхонаи олам варақ-варақ ҷустам,
Хати ту дидаму гуфтам, ки муддао ин ҷост!

Закоти ҳусн металабӣ, агар барои Худо,
Биё, ки Зебуннисо ҳамчу ман гадо ин ҷост.
(Зебуннисо - Махфӣ)

https://t.me/gazaltj

Бе гуфтугўй ризқ муҳайё намешавад,
Ин қуфл бе забони талаб во намешавад.

Кай меравад зи паҳлўи мунъим гурусначашм?
Гирдоб дур аз лаби дарё намешавад.

Рангинии қабо накунад пирро ҷавон,
Барги хазон баҳори тамошо намешавад.

Беморро ғизои мувофиқ кунад даво,
Бе тарбият заиф тавоно намешавад.

Хулқи хуши наҷобати зотист мўҳтарам,
Ҳанзал ба рангу бў гули раъно намешавад.

Афтодааст номи сахо аз забони халқ,
Ин хайма, умрҳост, ки барпо намешавад

Гирдоб, чун садаф нашавад соҳиби гуҳар,
Ҳорис ба саъй молики дунё намешавад.

Нодон ба гуфтугў нашвад соҳиби сухан,
Чуғз аз ҳазор оина гўё намешавад.

Занҷиру қуфл нест ба девона садди роҳ,
Мавҷи ҳубоб монеи дарё намешавад.

Эҳроми Каъбаро ба тасаввур макун тамом,
Ин роҳ қатъ бе мадади по намешавад.

Аз бадниҳод чашми накўӣ тамаъ мадор,
Кури зи модар омада бино намешавад.

Маъшуқро муҳаббати ошиқ диҳад ривоҷ,
Юсуф чаро ба коми Зулайхо намешавад?

То ғунчаи даҳон‐ш пур аз зар намекунам,
Аз ҳеҷ боб роҳи сухан во намешавад.

Ту барқи бемуруввату ман кишти бесамар,
Охир, миёни мову ту савдо намешавад.

Рухсори худ дареғ мадор аз нигоҳи мо,
Аз боғ мева кам ба тамошо намешавад.

Дилгир нест синаам аз оҳ, Сайидо, Маҷнун ғубори хотири саҳро намешавад.
(Сайидои Насафӣ)
https://t.me/gazaltj

ОҒОЗИ КИТОБИ “ШОҲНОМА”

Ба номи худованди ҷону хирад,
К-аз ин бартар андеша барнагзарад:

Худованди ному худованди ҷой,
Худованди рӯзидиҳу раҳнамой.

Худованди Кайҳону гардонсипеҳр,
Фурӯзандаи Моҳу Ноҳиду Меҳр.

Зи ному нишону гумон бартар аст,
Нигорандаи баршуда гавҳар аст.

Ба бинандагон офаринандаро
Набинӣ, маранҷон ду бинандаро!

Наёбад бад-ӯ низ андеша роҳ,
Ки ӯ бартар аз ному аз ҷойгоҳ.

Сухан ҳар чи з-ин гавҳарон бигзарад,
Наёбад бад-ӯ роҳ ҷону хирад.

Хирад гар сухан баргузинад ҳаме,
Ҳамонро гузинад, ки бинад ҳаме.

Ситудан надонад кас ӯро чу ҳаст,
Миён бандагиро бибояд-т баст.

Хирадрову ҷонро ҳамесанҷад ӯ,
Дар андешаи сахта кай гунҷад ӯ?

Бад-ин олату рою ҷону равон
Ситуд офаринандаро кай тавон?

Ба ҳастиш бояд, ки хисту шавӣ,
Зи гуфтори бекор яксӯ шавӣ.

Парастанда бошиву ҷӯяндароҳ,
Ба фармонҳо жарф кардан нигоҳ.

Тавоно бувад, ҳар кӣ доно бувад,
Ба дониш дили пир барно бувад.

Аз ин парда бартар сухан гоҳ нест,
Ба ҳастиш андешаро роҳ нест.

(Абулқосим Фирдавсӣ)

https://t.me/gazaltj

Ҷуз ишқ ба олам ҳама авҳоми хаёл аст,
Бо мурғи ҳавас сояи анқо пару бол аст.

Таълими ҷунун гир зи устоди муҳаббат,
Ҳар ҳарф, ки хонӣ зи ғамаш, дарси камол аст.

Андар пайи иқболи ту идбор муҳайёст,
Шоми ғами ҳиҷрони ту аз субҳи висол аст.

Сарчашмаи дилро макун аз гарди ҳавас гил,
Акси рухи худ бинӣ, агар об зулол аст.

Тарсам, ки дарад ҷомаи нозаш ба нигоҳе,
К-андар бари ӯ пераҳан аз тори хаёл аст.

Дӣ муҳлати имрӯз фикандӣ ту ба фардо,
Ойинаи мустақбалу мозии ту ҳол аст.

Ташвиши дигар нест ба ғайр аз сари мӯе,
Гар чинии моро ҳаваси ранги сафол аст.

Уммеди вафо кардаам аз рамзи нигоҳаш,
Дар муҳраи ғам баски дилам қуръаи фол аст.

Туғрал, шуда то тӯтии табъи ту шакаррез,
Дар мадҳи забони ту забони ҳама лол аст.

1 Авҳом – гумонҳо, пиндорҳо, аз решаи «ваҳм».
(Нақибхон Туғрали Аҳрорӣ)

https://t.me/gazaltj