Посты канала الشاعر ياسر العارضي

قصيدة اساسية
وفاة ام البنين (عليها السلام)

تأخر موتي ليش اخلاف الحسين
                             ماتحله الحياة ابدونه بالعين
لجله ضحيت اربعه
ما أريدن مصرعه 
                              ماتحله الحياة ابدونه بالعين
..............................
عشت بعد الطف ايام اصبحت مره
دليلي ابحزنه عاش  ودمعتي حمره
يروح حسين من عمري على عمره
وآنه اوياه عشت أجمل واعز عشره
مثل امه وأشوفه ابني من الاكَيه
           يطير من الفرح كَلبي من احاجيه
حسين وطاهر مرضعه
ما أريدن مصرعه 
                              ماتحله الحياة ابدونه بالعين
..............................
عشت باحساس أم وأعرف احواله
من يضحك اشوف الضحكه تحلاله
واذا يبجي وتصير ادموعه هماله
اكيد ابذكرياته الزهره تدناله
يتذكر مصاب الضلع والباب
وضل جرحه على المحسن فلا طاب
دمعي ايصب وي مدمعه
ما أريدن مصرعه 
                              ماتحله الحياة ابدونه بالعين
..............................
كُبر والطف خذاه وضلوعه مهشومه
وانه اتمنيت يومي ايصح كَبل يومه
ولا  أبقه المصابه وروحي مهضومه
اعله صوت حسين هاي اسماعي مفطومه
من حسين خالي اترد الظعون
وبسياط الاعادي زركَه المتون
والقلم والقارعه
ما أريدن مصرعه 
                              ماتحله الحياة ابدونه بالعين
..............................
ثلث اسنين مَرن أنعه لمصابه
وعيني الشوفته ابدمعتهه سجابه
ادعي الخالق ابموتي وادك بابه
حته احظه بلقاء حسين واصحابه
لفاني الموت متأخر على الروح 
موتي اويه الحسين من اول اجروح
وي السيف الكَطعه
ما أريدن مصرعه 
                              ماتحله الحياة ابدونه بالعين
..............................
قبل زينب ردت موتي اعله بو الأكبر
وعلى كَبري تجي بت حيدره تحظر
آنه ام البنين وأحظر المعبر
شفيعه وي علي الكرار بالمحشر
والينخاني لا مارده خايب
انخوني ابظهور المهدي غايب
الثار الكَلبي صدعه
ما أريدن مصرعه 
                              ماتحله الحياة ابدونه بالعين

الشاعر
ياسر العارضي 

ام البنين مخاطبة الحسين ع

امامي ياحسين امامي ياحسين
...............
روحي ملهوفه واتريد تشم اترابك
يا امامي وتطوف الدموع ابابك
ليتني ياولينه انه من اصحابك
امشي وياك ولاريد احمله اغيابك
وي اربع البنين امامي ياحسين
...............
امك اني بعد ما تغيب الزهره
بعدك اكَليبي يمه يضل ابحسره
اعمه بعدك ينورك بقيت انتظره
خذني وياك تضل خاف وحيده الحره
والزينب الحنين امامي ياحسين
...............
مالي بعدك فرح لا ولا كل بسمه
ومن بعد نور جبينك حياتي ضلمه
لو رحت من يكَلي ابرحيلك يُمه
هيه جلمه واحسهه حياتي الجلمه
والجلمتك أنين امامي ياحسين
...............
هاي الديار بعد ما اشوفك بيهه
مستحيله احسهه رجعتك ليهه
جن سجل بعدك الروح يمن تطويهه
باول اثار لهجرك تره تفنيهه
ياسيدي الامين امامي ياحسين
...............
خذني وياك احس راح عِده ايذبحونك
ومن بعد ذبحك الكَوم تجي ايسلبونك
كون اغطيك واحط ضِل يحامي امتونك
وانه احاميك اذا خيل تجي ايرضونك
وامسحلك الجبين امامي ياحسين


الشاعر ياسر العارضي

قصيدة نزله في حق ام البنين عليها السلام

خيمة ايتام تمثلت أم البنين
خيمة أيتام تمثلت أم البنين
.........
بعد ما بضعة نبينه استشهدت
والمآسي اعله اليتامه خيمت
ماكو للحسنين غير ام البخت
هيه هاي ام البنين اللي اجت
أم تصير الطاهره
هاي أعظم مفخره
والدهر ضام لليتامه الطيببن
خيمة أيتام تمثلت أم البنين
.......................
فاطمه اتغير اسمهه لهالامر
خاف منهم بأسم أمه ينقهر
تعرف اتعلم الصبور اعله الصبر
وتخدم الايتام كل هذا العمر
وطائعه الحيدر علي
والهه كل هم ينجلي
وكل الايام ثابته ولا ماتلين
خيمة أيتام تمثلت أم البنين
.....................
من مشاعرهه الحنونه الواضحه
جن وضوح ال قل هوَ وي الضحى
لو قره الانسان الهه الفاتحه
تنكضي حاجاته والرب سامحهه
حته لو ذنبه جبير
ينمحي من يستجير
الهه الاسلام حفظتهه بهذا الحنين
خيمة أيتام تمثلت أم البنين
........................
منزلتهه عد علي بأرفع مقام
ابحيدره التاريخ عَدهه من العظام
لو بحار ابحقهه ما يكفي الكلام
حد علمنه القاصر اعليهه السلام
وهيه اكبر من حرف
بالسطر ينزل وصف
وكل الاحلام نبقه الهه ذاكرين
خيمة أيتام تمثلت أم البنين
......................

فاركت عمر المصايب والهضم
ماتت وعبره ابصدرهه من الظلم
للمثلهه ازغير في حقهه النظم
والقلم لكبر فضائلهه ابعقم
لكل تعزيه وكل نعي
منهه نحتاج الوعي
وتنعه الاقلام ام بدور الثائرين
خيمة أيتام تمثلت أم البنين

الشاعر
ياسر العارضي

ابوذيات نعي في حق ام البنين عليها السلام

ليالي حسين بعد الأم        ويمه
سوده والحزن جاره         ويمه
تكَله ام البنين ابني         ويُمه
يكَللهه وبواجيهم سويه
...........
صدك عن الحسن وحسين       يمهُم
رحتي وهام صار الآه             يمهم
لنهه ام البنين اتكَول             يمهم
تجيهم بعد ماتلفي المنيه
.............
امعرف من نسب طاهر        ولدهه
هاي ام البنين اللي              ولدهه
سوو بالطف الأعظم          ولدهه
لحد مافاظ دمهم عالوطيه
........
ماتت وبكَلب ولهان                 موجِر
يعتهه الحزن عت لحسين         موجَر
عليهه الوكت ياهالناس          مو جار
يظل الكَبر ليش ابلا بِنيه


  الشاعر ياسر العارضي

نعي

تفيدكم بالمدارس وبالدوام

وره الباب اختفت فاطم لاذت من أعاديهه
مستوره ابحجاب اطويل اراذل هجمو اعليهه
دفعو عالزجيه الباب
وصاحت فضه صدري انصاب
سمعهه وشب عليهه النار والزهره انجوت بيهه
واويلي يازهراء
..................................
وره استشهاد ابوهه ابيوم بوكتهه الساعه عصريه
تعناهه الأبد مايوم عاف اطماعه يوميه
ابكل حيله عليهه الباب يدفع وبكراهيه
الى أن طك ضلعهه وصار تون مالومه ليليه
تون الهه ولبوهه الغاب
وصاحت فضه صدري انصاب
سمعهه وشب عليهه النار والزهره انجوت بيهه
واويلي يازهراء
..................................
عصرهه ومارحمهه وجان يدري الزهره موجوده
كالوله الزجيه اهنا ( وأِن) هاي اللي مريوده
جوابه والعصر مقصود كل افعاله مقصوده
العدو ابهجماته عالزهراء كتب صفحة ظلم سوده
فلا شخص الزجيه انهاب
وصاحت فضه صدري انصاب
سمعهه وشب عليهه النار والزهره انجوت بيهه
واويلي يازهراء
..................................
هجم بيده الحطب والنار وي ربعه تعنوهه
الحسن وحسين موجودين بالدار ويحركَوهه
لاجار الفزع لا مار لاديره اليطفوهه
ذيج المنهه تنطي امراد واحتركَت يشوفوهه
جمر نار الحقد لهاب
وصاحت فضه صدري انصاب
سمعهه وشب عليهه النار والزهره انجوت بيهه
واويلي يازهراء
..................................
وكَع محسنهه دون اسباب سبط ثالث وجد حتفه
لوما هالمصيبه اعليه الدين الله سند وصفه
جنين وعالمه مابي ظلم لا بس وفه وعِفه
ابعصر باب الزجيه ايطيح هالمصيبه الصدك كلفه
وجرح امه الابد ماطاب
وصاحت فضه صدري انصاب
سمعهه وشب عليهه النار والزهره انجوت بيهه
واويلي يازهراء

..................................
بده من اهل السقيفه الجور والوان الظلم عدهم
وعلي اوصيته اعله دين الله لو ما هيه يذبحهم
هجمو جن سموم الصيف كره كل واحد المنهم
ولارحمه ابكَلبهم جان لا رجعة الترجعهم
ضلموهه بلا اسباب
وصاحت فضه صدري انصاب
سمعهه وشب عليهه النار والزهره انجوت بيهه
واويلي يازهراء


الشاعر ياسر العارضي

هاي الزهره عاشت عصره
وخلف الباب المحسن طاح
مظلومه يا زهراء مظلومه يا زهراء
.........................................................
عاشت عصره ودفعة ظالم
وماكو الفزاع من الوادم
والنار ابجف كلمن قادم
يحركَهه الدار وهالعازم
عصر البضعه وتهل دمعه
وخلف الباب المحسن طاح
مظلومه يا زهراء مظلومه يا زهراء
.........................................................
محتاره ابحشمه اتناديهم
آنه البضعه وتحاجيهم
عوفوني اشكَد صاحت بيهم
بس يضحك سمعت حاديهم
وصاح ابربعه ضربو البضعه
وخلف الباب المحسن طاح
مظلومه يا زهراء مظلومه يا زهراء
.........................................................
عصروهه وصاحت يافضه
جن سيف البسمار وأمضه
نكرو ربنه ودينه وفرضه
تَّباعين السلطه المرضه
طفو عيني كَومي احميني
وخلف الباب المحسن طاح
مظلومه يا زهراء مظلومه يا زهراء
.........................................................
ماراعوهه اوصيت الهادي
عدهم نكران الحق عادي
صاحت بيهم ذكرو أجدادي
منهي اني ومن همه اولادي
من سمعوهه هم ضربوهه
وخلف الباب المحسن طاح
مظلومه يا زهراء مظلومه يا زهراء
.........................................................
مارحموهه ولا واسوهه
وبأعلى الصوت ايشتموهه
غصبو حقهه ومن شافوهه
تبجي من الدمعه حرموهه
وطاح ابعبره دمع الزهره
وخلف الباب المحسن طاح
مظلومه يا زهراء مظلومه يا زهراء


ياسر العارضي

هيَ قَلبٌ لِحنانِ أبيها والسِرُ المُستَودَعِ فيها
في العصرِ وكيدُِ الاصحابْ
غابت شمسٌ خلف البابْ
والسِرُ المُستَودَعِ فيها
..............
اعيون اعاديهه الزغيره وهيه أكبر من جبير
الهذا ما رحموهه ذوله المالهم ذمه وضمير
جانت ابيت الرساله المبني طين وبي حصير
هجمو اعليهه الاعادي وشيبو حته الزغير
وهوى مَن ألقوهُ جَنينا
والكوثر تُحمَّرَ جبينا
مَن يَزْهو فيها المحرابْ
غابت شمسٌ خلفَ البابْ
والسِرُ المُستَودَعِ فيها
..............
هُبَل هجمو على البضعه مو بشر هجمو صنم
ومن كسر ضلع الزجيه الدين يا وسفه انثلم
اصله طين البشر نعرف همه والله من العدم
طين بيت الزهره لكن بابه قلعو وانهدم
عَصرو مَن كانت لأباها
تَعلوا البَهجةَ في لقاياها
والبابُ قد صارَ سَحابْ
غابت شمسٌ خلف البابْ
والسِرُ المُستَودَعِ فيها
..............
عينهه وكسرة ضلعهه ولطمة الخد والعصر
والله لو ما ذني صارن اصبح المحسن فجر
لكن ابجور الاعادي صار للزهره العصر
عرفو ابلا ضغطه تُحشر عوضو ضغط القبر
ويلٌ لِرُعاعٍ ظَلَموها
مِن شَمِ هواها حرموها
فَغدى يجري الدمع عتابْ
غابت شمسٌ خلفَ البابْ
والسِرُ المُستَودَعِ فيها
..............
بيتهه بيت الله يعني هوه والكعبه سوه
هذي قبله لليصلي وهذا للعالم ضوه
بيت حسْنين وابوهم للجرح همه دوه
بيت جبرائيل منه ومن تلاواته ارتوه
يزدادُ زهواً وجمالا
فيهِ ذكرُ الله تعالى
فيهِ الزهراءُ وتُثابْ
غابت شمسٌ خلفَ البابْ
والسِرُ المُستَودَعِ فيها
..............
هيه دم وابكل عروقه بكل شرايينه مشت
وكل جزيئه ابدمهه بعده لهالمصاب اتيتمت
بدل ماواسوهه دفعو بابهه وخلفه اختفت
وانعصر صدر الزجيه وعين من عدهه انطفت
غدروا بِنتَ نبيٍ فيهم
كالكَهفِ كانَ يأويهِم
مِن نورٍ كانت وحِجابْ
غابت شمسٌ خلف البابْ
والسِرُ المُستَودَعِ فيها


ياسر العارضي

#التنمر
كلمات الشاعر ياسر العارضي
رسالة لك
رِسَالَة إلَى قَلبِكَ الجَميل
رسالة
رسالة حب
#رسالة_انسانية
@إشارة
رابط القصيدة
https://youtu.be/WP5jFWSR0Mw?si=PYpgUeShRfjsK2qz