Publications du canal الشاعر ياسر العارضي

Channel photo updated

يم ظلام السجن تضوي شمس احروفك
من على اهلك تون دمعتك متشوفك
ليلك ابعز النهار
وتشهك انفاس احتظار
يا إمامي يا إمامي
.....................................................
عاشت اطيوفك غريبه وبأمانيهه الجفن
ماتحس بانفاس بحرك عكس مجراهه للسفن
والهوه اليحتاج دمك خلص عمره من الحزن
لا نوافذ منهه يدخل كله حيطان السجن
مختنك تحت الأرض **** ابلا هواك اتعاني
من الفرض حد الفرض **** ساجد انت امتاني
للفرج تبني انتظار
وتشهك انفاس احتظار
يا إمامي يا إمامي
.....................................................
مركبة عمرك كَصيره والسجن جان الفلك
رغم هذا انت ابوجودك جن تعيش ابمنزلك
دنيه تارسهه ابعبيرك وانت مبعد عن هلك
صوتك احساس المؤذن باب الكَلوب امتلك
وي نسيم الهوه **** باقي صوت اجروفك
عايش ابلا ضوه **** والشمس موصوفك
رغم هذا ابكل وقار
وتشهك انفاس احتظار
يا إمامي يا إمامي
.....................................................
رهبتك بعيون خصمك جن علي وعمر بن ود
تنجلي الاحزاب كلهه ابنظره لو عينك تصد
همه لو ماسَم غدرهم ياهو منهم يستعد
يوكَف اكبالك ويبرز يعرف امكَطع يرد
إي وحك هل أتى **** لا فتى وسط السجن
جاءَ بامراً مُلفِتا **** إلا انت بكل زمن
بلونك وذايب سمار
وتشهك انفاس احتظار
يا إمامي يا إمامي
.....................................................
جم أمر من غيظ كاظم كل حياتك هالأمور
هوه لو دفتر يخلّص عمرك بأول سطور
صابر اكثر من ربيعك يالخريفك ضل يدور
جن ضلع للزهره غصنك مايطيب من الكسور
مره تنشاف الحسن **** مسموم بين الغربه
وجن حسين من المحن **** عطشان واشتد حربه
جبدك ابنار وشرار
وتشهك انفاس احتظار
يا إمامي يا إمامي
.....................................................
كل جسر بغداد نعشك واجه التشييعك نهر
واللي فزعو نهر ثاني من جَمِع شيعه الحظر
حسين وحده وطعنه طعنه اسيوف وارماح ونظر
هذا يضحك ذاك يفرح ذره ماعدهم قهر
وعينه صوب الخيم **** الزينب المشدوهه
مايهم باي سهم **** ابجيشهم حاطوهه
شافهه اتلم الزغار
وتشهك انفاس احتظار
يا إمامي يا إمامي

ياسر العارضي

يمسموم جينه الحظرتك
يمسموم نبجي المهجتك
مشايه اعتنينه
بالدمعه الحنينه
هاك اسمع بجينه
يمسموم يمسموم
................................................
ويه ما تبدي الاخيره العشره من شهرك رجب
جن مؤذن بينه يهتف صوته عالي ومنحجب
كَومو ياشيعة محمد عوفو كلشي لأي سبب
واعتنو المرقد الكاظم سيدي ونفزع شعب
بالهموم والحسره والآه
بالهموم شخصك اجيناه
وانحس ما وفينه
ياحامي المدينه
هاك اسمع بجينه
يمسموم يمسموم
................................................
اربعينيه ابعزمنه وكَاصدينك يالأبي
بينه جن زينب وصرخت فوك تل الزينبي
مايرد ممشانه طاغي ولا حقود ولا غبي
وجن سكينه هالقضيه مارضينه تنسبي
ولا يوم ننسه الشعائر
ولا يوم نفني الضمائر
يالكاظم واجينه
نرفعلك ادينه
هاك اسمع بجينه
يمسموم يمسموم
................................................
راحه لا مو تعب دربك لجلك ايهون الصعب
اشما مشينه خطوه خطوه نشعر الجنه الدرب
شكَد مواكب للخدامه لجل يومك تنُصُب
هله بالزوار تهتف والمجالسهم نطب
يمظلوم هذا العزائك
يمظلوم ننصر دمائك
ونشعر بالسكينه
يالروحك أمينه
هاك اسمع بجينه
يمسموم يمسموم
................................................
بالسجن خلصو عمرك يالوفاتك بالسجن
سمموك اهل الخيانه باخر انفاسك تون
امصيبتك جداً عظيمه والهه نلطم عالوجن
ونبحر بأحزان يومك والبحر حزنك سفن
يمهضوم يومك فجعنه
يمهضوم أسبل دمعنه
من واحدنه عينه
تبجيلك سنينه
هاك اسمع بجينه
يمسموم يمسموم
................................................
من نصل يم كَبرك احنه انسلم انسمعك ترد
وتكتب اسم اللي يزورك انت واكف مستعد
اشما دمعنه ايطيح يمك سيدي انشم الورد
جا شباب انت ابضريحك نشتم اتراب الحشد
يمن دوم باقي بمهجنه
يمن دوم جيشك حشدنه
لجلك ياولينه
ارواحنه حزينه
هاك اسمع بجينه
يمسموم يمسموم


ياسر العارضي

سيد الأمجاد يا أسد بغداد
بيا سجن مسموم يبن الطاهرين
بيا سجن مسموم يبن الطاهرين
......................................
هاي مو اول مصيبه والسبب نفس السبب
بغضاً ابنهج الرساله حاربوكم لا عجب
ألحسن سممو جبده وجسم الحسين انسلب
ومن علي السجاد بيكم حاربو هذا النسب
كل جبد معصوم هالصبح مسموم
والاماكن تختلف عالسائلين
بيا سجن مسموم يبن الطاهرين
......................................
بالسجن مولاي وجهك سيدي ابنوره اختلف
اظلم ومن نور خدك هذا سجنك وانعرف
تفرش الكَاع ابعباتك بالصلاه والدمعه طف
وحاكم الدوله ابقصوره عايش انواع الترف
وانت يالكاظم فرصه للظالم
ينتقم من نهجك الحق المبين
بيا سجن مسموم يبن الطاهرين
......................................
تجرع اهموم الرزايا وكَلبك اعله اهلك يحن
سكته وناتك عليهم من يسمعك من تون
عايش احزان ومأسي ومن حزن طحت ابحزن
ماشفت راحه ابحياتك لا سعاده ولا أمن
بالسجن عمرك يخلص ابصبرك
بين جور اهل الظلم والحاقدين
بيا سجن مسموم يبن الطاهرين
......................................
بالسجود ابكل صلاتك تدعي ربك بالفرج
بالحجج ترفع جفوفك وانت من نسل الحجج
وبنهج سجن وعباده انت سنيت النهج
نازعت انفاسك انت وكل نفس بيك اختلج
وخلصت انفاسك باعذب احساسك
وانت للأسلام خير العاملين
بيا سجن مسموم يبن الطاهرين
......................................
عالجسر مطروح نعشك هذا أمام الرافظه
صاحو وشيعة محمد ترست ارضين وفضه
كاظم اهل البيت هذا عمره بالسم انكَظه
بس حسافه الفزعه جانت بعد ماصارت قضه
بالسجن سموك بعد ما حرموك
صاحت الناس اعله نعشك يالامين
بيا سجن مسموم يبن الطاهرين

ياسر العارضي

موشح نجفي لاحتظار السيدة زينب ع

هاي زينب تحتظر بانفاسهه
ورادت اخوتهه تجي عد راسهه
................
هاي زينب باخر انفاس العمر
جييَت اخوتهه الهواشم تنتظر
روحهه ماتطلع والهُم تفُر
حسين يحضر رادت وعباسهه
................
َهالمنيه المنهه ياوسفه دنت
وزينب ابهاي الحياة اتعذبت
بعد كل ذيج المأسي اتغربت
ويجي تتمنه اعز كل ناسهه
................
ماتريد اتموت مايمهه أحد
لا أخو ايتجيلهه ولاكو ولد
من يجوهه والنفس للرب صعد
عدهه سهلهه وتنتعش باحساسهه
................
هاي زينب وبأخير المرحله
من البدايه وهسه هاي التكمله
تريدهم كلهم شهامه ومرجله
كون يمهه الماكو من مقياسهه
................
هاي اخير انفاس وي ذاك الحزن
اكَبالهم رادت يشوفهه تون
اشكَد حنينه اهواي لخوتهه تحن
والمحنه من اصلهه وساسهه

الشاعر ياسر العارضي

لذكرى وفاة السيدة زينب ع
قصيدة اساسية

لا يمج كفيل وغايب حسين
زينب وحدج الليله تموتين
لا من ذيج الضعون
عبدالله ولا عون
زينب وحدج الليله تموتين
..................
باحتظاره ايريد يمه اي شخص اهله واخوته
وانتِ يازينب هضيمه كلهم اهلج والله موته
ايريد ماي اينكَطوله يَمه يبجون اعله صوته
يالعقيله وانت وحدج والزمن معلن سكوته
كفيلج عالنهر متوسد الماي
تحتظرين وانت ابعازة افياي
وين اللي يوفون
عبدالله ولا عون
زينب وحدج الليله تموتين
..................
جنتي تتمنين اخوتج كلهم ابساعة مصابج
اتغمضين اعيونج انت يمهم ابلحظة غيابج
بعد ما تمشين روحج تسمع النوح اعله بابج
هالاماني تذوب شمعه واصبح ابحلمج عتابج
شكَد لعيون ابو الاكبر الج شوك
وانت ابذكرياتج طبة السوك
وين الما يمرون
عبدالله ولا عون
زينب وحدج الليله تموتين
..................
لا ابن يلزملج ايدج يبجي واهله ايسكتونه
ويصرخ ابوكت احتظارج لا تعوفيني الحنونه
والتحت ذيج الترايب وين يالحره يجونه
حته ساعات المنيه نبجي عاللي فاركَونه
يزينب وانت اهلج كلهه غيياب
غريبه ابساعتج مايمج احباب
لا ولدج يحظرون
عبدالله ولا عون
زينب وحدج الليله تموتين
..................
ساعة الموت ودموعج تنزل ابسكتت بواجي
ردتي كون حسين كَاعد حلوه بالسانه المحاجي
ابكربله من رحتي عنه صحتي للجّمال تاجي
ردتي آخر شمه منه نسله طيب عطره زاجي
ردتي اخر نفس من عطره للموت
تنظرين اعله عينه ويختفي الصوت
راح وما يسيرون
عبدالله ولا عون
زينب وحدج الليله تموتين
..................
رحتي يازينب غريبه مثل ما بالغربه عشتي
يُمه محد صاح بعدج وكت ما يالحره متي
لا ابن ويشيل نعشج لا اخو اللي صاح اختي
عشتي بالونه حياتج وماكو وَن ابيوم رحتي
تمنيتي اشكثر لو يمج اخوان
بس وسفه البقالج بس الاحزان
راحو مايرجعون
عبدالله ولا عون
زينب وحدج الليله تموتين

الشاعر
ياسر العارضي

https://youtu.be/glYMWKogWhk?si=uLkMIHK7QZPKQW8x

#قصائد_منبريه
#استشهاد_الامام_علي_الهادي_ع
اساسية

صوت البواجي والنعي ابمرقد علي الهادي
ابليلة رحيله كل محب يتعنه وينادي
عظم الله الاجر يالمنتظر
عظم الله الاجر يالمنتظر
..................................
ليلة افراكَه الاليمه                   الألهه طك شيب الكَلب
وبوسط اسود حزنهه                ايمر خبر جدا صعب
الرحمت الباري بوجوده             تاخذه احضان الترب
ايحاربونه اهل الخيانه              والسم اسلاح الحرب
يفني العمر شاب وبعد ماتتم احلامه
عاش الحياة ابكل حزن  وانختمت ايامه
ولأجل فكَد الإمام وهالخبر
عظم الله الاجر يالمنتظر
..................................
من علي الاكبر سنينه                   عمره أكبر جم سنه
اليعتني ويكرم يتامه                    ألسم الجبده اعتنه
ال أذَّن  ابساعه رحيله                 اتحمله زين المأذنه
اتفطرت كَاع الله كلهه            وكل محب ظهره انحنه
لسابع سمه من اول سمه لفكَده اصبحت سوده
عاشِر امام اليحتضر وانفاسه معدوده
على اعياله اعيونه مشبوحه النظر
عظم الله الاجر يالمنتظر
..................................
رايح وتارك شبابه                  ولرحيله مستعد
مثل ما احنه نطينه           ابعمره شبان الحشد
هوه غير المثله يبقه               مو يروح ومايرد
وحشه بستان الرساله            ينكًطع منه الورد
التحتاجه ناسه لكل ألم والكل جرح بلسم
من اشفافه من السم نضح يا للحسافه الدم
وطاح جبده وزاد بالموقف خطر
عظم الله الاجر يالمنتظر
..................................
مُفتَرَض بالطاعه واجره            ضيعوو أهل الرجس
غيمه سوده وكلهه عتمه           وكَفو اكَبال الشمس
من درو من علي الهادي               الناس تتعلم درس
عذبو كلمن يحبه                     بالسجون وبالحبس
وبأبشع انواع الظلم ضد شيعته وناسه
وعيونه دم تجري ودمع من غابت انفاسه
الشيعته التتحمل امصاب الدهر
عظم الله الاجر يالمنتظر
..................................
حارب الباطل وجوده                وبرحيله أعلن نصر
حقق النصر المؤزر                     حته لو وسط القبر
كل طموحه الدين يبقه          ودينه باقي بكل عصر
شما شهيد ايطيح عدنه                دمه للدين الفجُر
ويشع ضوه ابوجهه الوكَع جا ناصر الدينه
للدين ناذر هالعمر والنصرت حسينه
ولأجل هذا الفداء اعله الاثر
عظم الله الاجر يالمنتظر

الشاعر
ياسر العارضي

#قصائد_منبريه
#الامام_علي_الهادي_ع

على انفاسك سلام ألله

لفكدك آه وا ويلاه

علي الهادي    ياعلي الهادي

.........

بجينه وماترد دمعات العيون

كل الراحو وماضن يرجعون

نضل طول العمر للي يموتون

نشتاك ونظن بلكت يمرون

وانت العاشر الوالي

إمام وعالكلب غالي

علي الهادي    ياعلي الهادي

........

سم جبدك رسم لوحة غيابك

مايدري احنه كل يوم اعله بابك

نجيك ونعتني نشم ابترابك

ومانشبع ابد من شم ثيابك

ييوسف كل شخص بينه

الك زادت بواجينه

علي الهادي    ياعلي الهادي

.........

تره غالي الهوه وانت اغله منه

يرمز العاطفه وكللك محنه

من اتروح يعني أحنه رحنه

متمسكين بيك من انوجدنه

لونك منخطف رايح

ابدارك ينسمع صايح

علي الهادي    ياعلي الهادي

.........

دنيانه الكضت وي ما رحت ليش

اضن حته الوقت مايقبل ايعيش

يعاقبنه الزمان ابلا ذنب ليش

البلاوي الريح واحنه بخفة الريش

يشتتنه وتجمعنه

بوجودك ربنه يرحمنه

علي الهادي    ياعلي الهادي

.........

وي العسكري نحيي عزائك

ودمعنه انخلطه يالحيد ابدمائك

جنت تحفظنه من ترفع دعائك

اخذنه حته لو نجمه ابسمائك

تصبحنه وتمسينه

وبنورك تضوينه

علي الهادي    ياعلي الهادي

الشاعر
ياسر العارضي

#قصائد_منبريه
#استشهاد_الامام_علي_الهادي_ع

شيعة حيدره اتنادي
وينك ياعلي الهادي
... ..
من سموك يبن الطاهره انسابه
صاحت شيعتك وبدمعه لهابه
بعدك ياهو نكصدله وندك بابه
نذوب شموع من نوصل على اعتابه
حزنك بينه ضل حادي
وينك ياعلي الهادي
... ..
يوم افراكك الما ينحمل مره
تبقه ابكل كلب ماتنطفي جمره
عليك الدمعه تنزل عالوجن حمره
اعله صخره لوتطيح اتفطر الصخره
دمعهم يترس الوادي
وينك ياعلي الهادي
... ..
مسموم ورحت شاب وخلص عمرك
امام ومفترض بالطاعه من زغرك
تصبر عالظلم أه شكبر صبرك
ماشفت الفرح من مهدك الكبرك
اعليك اشكد ظلم سادي
وينك ياعلي الهادي
... ..
عانيت ابحياتك ماشفت راحه
كلبك تنلجم بالمغرب اجراحه
وجهك عالحسين الغالي واصلاحه
وللطف والمخيم غابت افراحه
الحزنك صرخة اجدادي
وينك ياعلي الهادي
... ..
مسموم ورحت نعشك يحملونه
أمام انت بمدامع دم يودعونه
اليصبحون اعله وجهه واليمسونه
امير ارواحنه شخصك يسمونه
فراكك والله مو عادي
وينك ياعلي الهادي

الشاعر
ياسر العارضي