انجليزي ثالثة ثانوي💙⛄

السلام عليكم سنة ثالثة💙حابة نبارك لكل الناجحين الف الف مبروك💙🎉🎊ولمن لم يحالفه الحظ معليش عندكم فرصة تانية اوثقوا في ربي وتوكلوا عليه💙✏️ تعرفوا انها كانت سنة دراسية طويلة لكن بفضل من ربي كملتوها ف افرحوا واحمدوا ربي هلبا جايتكم الجامعة تبي جهد اكبر فعيشوا لحظة النجاح بكل تفاصيلها ودمتم في رعاية الله🌝💙

اللهم صلِّ على سيدنا محمد💙

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .

لا علاقة لنا بما يسمونه كريسماس✖
نحن مسلمون💙
وتذكروا ان من تشبه بقومٍ صار منهم🌸
ماتقولوش عادي احتفال نهاية سنة مش تقليد ليهم!!
بل تقليد واسوء من التقليد!
مني الي سبب الفكرة ليكم؟ومن مني اقتبستوها؟
ردوا بالكم على دينكم وتذكروا انكم تتشبهوا بقوم جعلوا لله شريك والعياذ بالله🥺💙
اللهم انا نستغفرك ونتوب اليك💙
اللهم لا تؤاخذنا بما فعل السفهاء منا💙

درس من دروس ثانية ثانوي لكن تحتاجوه يا سنة ثالثة💙

⭐السلام عليكم دفعة ثانية ثانوي

على بركة الله نبدوا في درس بسيط من الوحدة الخامسة لان معانا زميلة ليكم عندها امتحان الاحد وتبي شرح القواعد.

نبدوا بسم الله💙

وانت فاتح الكتاب علي الباب الخامس تجي قدامك قاعدة

اسمها (modals)

▫️ طبعا الmodal verbs هلبا لكن في الدرس هذا عاطيينكم ثلاثة:


Must/mustn't ⭐

▫️(يجب عليك)(لا يجب عليك)

Can/can't ⭐

▫️( تستطيع)(لا تستطيع)

Should/Shouldn't ⭐

▫️(ينبغي عليك)/ ( لا ينبغي عليك)

❕معنى كل وحدة اسهل من التانية لكن في ملاحظة بسيطة لازم تعرفوها وهي:

▫️كلمة must و كلمة should قريبات من بعض في المعنى لكن الفرق الاكبر ان must اقوى من should .

يعني لما نستخدم must في جملة معناها لازم لازم لازم ادير او مااديرش الشي الي قلتلك عليه
بينما should اضعف منها.

❕يعني must نستخدموها امتى عطينا لو سمحتي شرح يبينلنا الفرق اكثر؟

▫️هي تعالو نوضحلكم

🟣Should:

تدل على التوصية والنصيحة او بالأحرى شي المفروض عليك تلتزم بيه لانه شي كويس او تبتعد عليه لانه مضر ليك زي:

You shouldn't smoke
▫️لا ينبغي ان تدخن

اهني اني نصحتك لان التدخين مضر لكن مادخليش فيك تلتزم بكلامي ولالا انت وضميرك بعدين.

او

You should buy this toy

▫️ينبغي عليك شراء هذه اللعبة

ماشين بنشروا هدية لخوك ولا اختك الصغيرة وعجبتني اللعبة مشي نصحتك باش تشري اللعبة هذي لانها حلوة
وانت حر تشريها ولالا.


🔵بينما must :

تدل عل ضرورة فعل الشي او عدم فعله.

يعني مش نصيحة تاخذها ولا تفوتها وانما لازم لازم لازم ادير او مااديرش الشي الي استخدمتلك must معاه.

▫️زي مثلا مدرستكم مدايرتلكم رحلة وعاد فالحين انتم في المواعيد مافيش التزام فامشيتوا انت وصاحبك تجروا لان كان ماتلحقوش على الباص مش حتمشوا معاهم فصاحبك يقولك:

We must hurry to catch the bus

▫️يجب علينا الاسراع للحاق بالحافلة.

يعني اهني لازم تجروا والا بتفوتكم الحافلة واضيع عليكم الرحلة.

يعني مش بمزاجكم تعطلوا ويقعدوا يراجوا فيكم لالا يافالح انت وياه كان ماتجروش ضاعت عليكم.

⭐نجو لاخر حاجة وختامها مسك وهي:

🟠can و can't

▫️معناها (الاستطاعة)او( عدم الاستطاعة)

يعني تقدر ادير الشي او لا.

زي:
I can make food .

▫️استطيع ان اعد الطعام.

او:
I can't read this story .

▫️انا لا استطيع قرائة هذه القصة.

▫️حاجة تقدرها تستخدم can
▫️حاجة ماتقدرهاش تسخدم can't

وتم هذا هوا في شي صعب؟

لا فهمناه كله🔥

هكي نبيكم🔥💙

واي حاجة مش مفهومة تفضلوا في التعليقات.

دمتم في رعاية الله💙.
#بإذن_الله_خطوة_بخطوة_نحو_النجاح

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .

(ملاحظة ماكملتش باقي الجملة زي الكتاب لضيق الوقت لكن واضحة)

🟠على السريع ناخذوا تحويل الضمائر ومهم جدا تعرفوا كيف تحولوهم.

I=he or she
Me=him or her
We=they
Us=them
You=I or we

دهشت😫
(راحة ونجي هي)

جيت خلي نكملوا

نجوا لنقطة كيف نحول سؤال بنفس الطريقة فوق

باختصار قالي في نوعين
▫️ سؤال يبي اجابة طويلة
▫️ وسؤال يبي اجابة ب اي او لا

الفقرة الاولى نديرولها هكي في التحويل

Where is the studium?


She asked me where the studium was.

اول حاجة نحطوا ضمير يعود على الشخص الي سأل

بعدين نحطوا asked ضروووووري تحطوها
بعدين اداة السؤال والي كانت اهني where وردوا بالكم تحطوا بعدها الفعل لااااا حطوا اخر شي كان في جملة السؤال بعدين جيبوا الفعل حولوه للمضاي ولوحوه في اخر الجملة ونقطة نهاية السطر.🔥

الشق التاني قالي لما سؤال بتجاوبي ب اي او لا

قال تستخدمي if او whether
اهني الزوز ليهم نفس المعنى

▫️ مثال:

are you a student?

هل انتِ طالبة؟

نحولوها بسرعة

She asked me if (or whether ) I was a student

وتم ان شاء الله وضحت كان شرح طويل لكن متعب وخدي وقت نتمنى وصل بطريقة سهلة ولو في اي نقطة مش مفهومة تفضلوا ولو في اي شي غلط اعذروني نكتب بسرعة باش تلحق تقراه البنت
دمتم في رعاية الله💙

🔵شني هما ال
⭐Reported speech
⭐reported statment
⭐reported question
⭐reported compound
⭐Reporting with other verbs

الي موجودات في كتابكم بالطريقة هذي.

هلبا ولا؟

لا اكيدة كل وحدة اتفه من الي قبله غير مقسمينهم بس.

⭐خلينا نعجنوهم مع بعض في شرح واحد باش مانعطوهمش اكثر من حقهم لانهم فعلا سهلااات جدا

⭐خلوا بالعامية نقولوا مثال بسيط:
تهدرزي انت وصاحبتك علي صاحبتك التانية ولما روحت جت الي كنتوا تهدرزي عليها فتقوليلها

▫️فلانة قالتي كذا وكذا

(تشوشيد وقتي)

او هي تسأل شني هدزتوا
(قصقصة)
تقوليلها

الحق سألتني عليك

ترا نحطوها في مثال بالفصحى

هي قالت لي
She told me

▫️She فاعل
▫️Told فعل ماضي
▫️Me مفعول به

🟣الجملة التانية

هي سألتني عنك
She asked me about you

شني لاحظنا من المثالين هذوا

النقطة الاولى انه عبارة عن تعاويد لدوة صارت بينك وبين شخص تاني سواء حوار او سؤال

ثاني نقطة انه الشي الي بتحكي عليه اصبح من الماضي بمجرد ماكملتوا تهدريز انت والشخص ومشي كل واحد في حاله.

وهذي نقطة مهمة جدا

يعني شني؟
يعني انت وصاحبتك تهدزوا توا في الحاضر لكن بمجرد ماتكملوا هدرزة وتروح كل وحدة لحوشها وتعاود الدوة لشخص تاني لازم لما بتعاود الدوة تستخدم صيغة الماضي ومن هني نوصلوا لنقطة مهمة كيف نحولوا الافعال؟

🟣عندكم في الدرس يقولك

لما يكون عندك فعل مضارع present simple
لما بتعاود الدوة لازم تحوله للماضي
past simple

مثال خفيف ظريف من الكتاب
Tariq:I know all about it

طارق:انا اعرف كل مايتعلق به

دقيقة اهني ركزوا حطولك اسم طارق فقط باش تعرف انه طارق الي يتكلم وانه هوا الفاعل مش انت.

الجملة عندي عادية مافيهاش تعاويد دوة طارق يكلم فيا في المضارع.
تو بعد ماروح طارق بنمشي نحرش امه فيه شني بنقول؟

اول حاجة نركز على الفاعل هل هوا ضمير ولا اسم علم ونركز على انه بنتكلم علي حاجة في الماضي يعني فعلي لازم نحطه في الماضي.

▫️تصبح الجملة بالعربي

طارق قال:هوا يعرف كل مايتعلق به

تعالوا نحطوها في جملة انجليزية

Tariq said (that)he knew all about it

ركزوا حطينا اقواس على that باش نوضحوا انه سواء حطيتها في الجملة هذي او لا مايهمش.

نجوا لمثال ثاني قالك لو بتدوي علي حاجة صارت في
ال present continues
لازم تحولها لل past continues

▫️زي
Mariam:I’m enjoying my self

مريم:انا امتع نفسي

هي تتكلم حاليا انها تمتع في روحها باللعب مثلا كيف عرفت انه مضارع مستر؟

لقيت I'm وجي بعدها فعل فيه ing

فلما بنقول مريم قالت نقول:

Maria said she was enjoying herself

مريم قالت انها كانت تمتع نفسها

سهل ولا؟
الحمدلله💙

نجوا للنقطة الي بعدها وهي لما يعطيك مضارع تام
Present perfect

لازم تحوله للماضي التام past perfect

مثال:
Sara:my father has bought new computer .

سارة:والدي اشترى حاسوب جديد

لما بنحولوه شني نديروا؟

نحول ال has الى had وبعدها نحطوا الفعل في التصريف الثالث وقبل كل شي نحولوا الضمائر كلها من متكلم الي ضمير نتكلموا عليه

Sara said (that)her father had bought new computer .

🟠الي بعده يلا


قالي حولي presents perfect continuous
(مضارع تام مستمر)

الى ماضي تام مستمر
(past perfect continuous )

▫️مثال:

Ahmed:I have been playing tennis

احمد:انا كنت العب بكرة التنس

و لتحويلها نفس الي فوق
نحول ضمائر المتكلم الي ضمائر نتكلموا عليهم

Ahmed said (that)he had been playing tennis .

شفتوا هذي مسهلها غيرنا has ل had وخلينا الباقي نفس قاعدة الامثلة الي فوق.

▫️تعالوا لنقطة بسيطة :مش فوق كلهم عبارة عن مضارع في زمن معين نحولوه لماضي
باهي لو جاني ماضي كيف ندير؟

نحوله لمضاي اقدم منه.

شني قصدك؟
تعالوا نقوللكم

في ماضي اقدم من الماضي العادي والي هوا

(past perfect)

🔵يعني لو لقينا جملة في الماضي نحولها لماضي تام .

مثال هي :
Sara:you didn't phone me.

سارة:انتِ لم تكلميني.

نحولوها فتصبح:

Sara said that I hadn't phoned her.

سارة قالت انني لم اتصل بها.

ركزوا اهني الضمير I يعود عليا مش على سارة لانها قالت ان اني ماكلمتهاش مش هي ماكلمتنيش فهمتوا؟

🟡والنقطة ماقبل الاخيرة

Past continues الماضي المستمر
نحولوه
لماضي تام مستمر past perfect continues

مثال :
I was waiting outside
كنت انتظر خارجا

بسرعة نحولوها خت فت

Nour said (that) she had been waiting outside.

نور قالت انها كانت تنتظر خارجا.

نجو لختام النقاط

باختصار will نحولوها ل would

مثال :

We will have to get to the match early

يجب علينا الذهال للمبارة مبكرا

(ماحطيناش اسم زي الاولات لان نتكلم علينا (نحن) )

نحولوها:

They said (that) they would have to get to the match early.

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .

⭐انتِ تحبين الطعام، اليس كذلك؟

سهل جدا نكونوا ونفهموا السؤال هذا في اللغة العربية لكن جربتوا تستخدموه في الانجليزية؟

⭐وهذا هوا درس اليوم الي من الوحدة الاولى وبإذن الله يكون من اسهل الدروس.

والي اسمه (Question tags)

صديقنا السؤال قاللنا لما تبوا تستخدموني عندي ليكم قانون معين.

(اكيدة بنتشرط زي غيري)

المهم قاللنا عندي قاعدة احفظوها وافهموها سهلة جدا.

لو الجملة بدايتها مافيهاش نفي معناها لازم نهايتها تحطولها نفي.
ولو بدايتها نفي لازم نهايتها تكون مثبتة.

(شني هذا مافهمنا شي🌝)

هي تعالوا نفهموا بأمثلة⭐

You like animles, don't you?

انت تحب الحيوانات،اليس كذلك؟

الشق الاول في الجملة والي هوا
You like animles

اهني الشق الاول مثبت يعني ماجتنيش فيه اداة النفي not
فاتلقائيا لازم تحط الشق التاني منفي يعني تحط not.

(باهي علاش حطينا don't ؟)

القاعدة تقولي:

لو لقيتي فعل عادي يعني مش verb to be
⭐الي هما(is,am,are)او(was,were)
⭐او ال (modal verb )

في الشق الاول

اهني لازم تحطيلها don't في نفي الحاضر و didn't لنفي الماضي (في الشق التاني ) لانها محتاجة فعل يساعدها يبين الزمن الي تتكلم عليه.

لكن لو لقيتي( is ,am,are)
او( modal verbs )
في الشق الاول فلما بتنفي الشق التاني او تثبتيه لازم تستخدمي نفس الفعل الموجود.

(مافهمناش💔)

⭐تعالوا ناخذوا مثال هي:

1️⃣You are smart,aren't you?

انت ذكي،اليس كذلك؟

2️⃣She locked the door,didn't she?

هي اغلقت الباب، اليس كذلك؟

3️⃣He can't play football, can he?

هوا لا يستطيع لعب كرة القدم، اليس كذلك؟

⭐النقطة الاولى جاني verb to be والي هوا (are)
ففرض عليا مانستخدمش فعل مساعد يبينلي الزمن وانما لازم نستخدم are نفسها.

⭐اما النقطة الثانية جانا الفعل في الماضي والدليل كلمة
( locked)
الي دلت على الماضي فلازم نحطوا didn't فعل مساعد ونفيناه لان Locked جي فعل مثبت.

⭐اخر جملة جتني can الي هي احد اعضاء ال

(Modal verbs )

ففرض عليا مانستخدمش do او did لانها ماتحتاجش فعل مساعد.

(علاش؟)

(لانها هي فعل مساعد🌝)

يعني تقدروا تقولوا ان
⭐ال verb to be
⭐وال modal verbs

افعال قوية جدا لما تنحط في الجملة ماتحتاجش حد يساعدها باش تبين روحها لانها تلقائيا فارضة نفسها

(سلمهم)

اما الافعال العادية زي( like ,eat,study,....etc)

هذوا تقدروا تسموهم افعال ضعيفة مقارنة بغيرهم ويحتاجوا حد اقوى منهم يساعدهم باش يفرضوا وجودهم هذا علاش لازم تستخدملهم الافعال المساعدة.
(من اسمهم واضحة وضيفتهم)

⭐ركزوا علي شي تاني الجملة الاولى كان الشق الاول مثبت وال هو
You are smart
ففرض علينا ننفي الشق التاني ويصبح

aren't you?

اما الجملة الثالثة نفيت البداية امتاعها

He can't play football

ففرض عليا نثبت الشق الثاني وبالتالي يصبح

can he?
(ولا زم بعد النفي تحطوا ضمير)

(She,he,I,it,,,,etc)
(وغيرهم من الي تعرفوهم)

شفتوا محلاه الدرس ولطيف والي يحبوا يستخدموا اللغة يفيدهم حتى في التكلم💙.
خلاص خلونا نختموا درسنا بأمثل سريعة وبسيطة

⭐امثلة:


the cat is so fast , isn't it?

القطة سريعة جدا، اليس كذلك؟

You hate dogs,don't you?

انت تكره الكلاب، اليس كذلك؟

وهكي ختمنا درسنا والباب الاول كامل الحمدلله💙
ان شاء الله يكون الشرح واضح ومفهوم ولو في اي نقطة مش مفهمومة تفضلوا في التعليقات وبإذن الله نوضحها⭐💙
دُمتم في رعاية الله💙

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .

#مراجعة
درس بسيط ان شاء الله يكون الشرح مفهوم💙

جمعتكم مباركة 💙
31\12\2021💙⭐

اخر قاعدة في الباب الاول والي هي
ال present perfect (المضارع التام)
طبعا قاعدته بسيطة جدا.

قالي اني تقدروا تستخدموني لما تتكلموا علي حاجة صارت في الماضي لكن بشرط ان ماتحددوليش امتى الفترة. يعني مش زي صديقي ال past simple.
لا تحطولي yesterday ولا year ago ولا غيره من الي ذكرناه في ال past simple.

مزال مافهمناش؟

هي شوية شوية بإذن الله نفهموا💙

وقاللنا تقدروا تستخدموني علي حاجة صارت في الماضي وقعدة مستمرة للآن.

مافهمنا شي راه🌝.

هي شوية بس نكمل الشرح وناخذوا امثلة وبإذن الله تفهموا💙.

توا خلي ناخذوا ال form:

قالتلي حطيلي:

Subject +have or has+past participle

الفاعل +have او has +التصريف الثالث للفعل

⭐ملاحظة:
(I و you و we و theyو )تاخذ have

(Sheو he و it) تاخذ has

تمام هكي خلونا نتوسعوا شوية فيه.
قالتلي القاعدة لما تبي تستخدميني لحاجة صارت في الماضي شرط انك ماتحدديش الزمن امتى بالزبط وشرطي الوحيد لو تبي تقول الفترة امتى صارت استخدميلي
(since و for)

هذوا عن طريقهم تقدري تحدديلي امتى صار الحدث في الماضي وكذلك نفس الشي ليهم قاعدة باش تحدد الوقت .
(لكن مش اي حاجة تنكتب جنبهم).

كيف؟
هي نبدوا في الامثلة:

اول حاجة كيف نتكلموا على الماضي ومانحددوش باهي كيف نفرقوا بينه وبين الماضي البسيط؟

خلونا ناخذوا مثال:

وانتِ في الفصل الأبلة جت سألاتك بعد ماعطاتك اليوم الي قبله 50 ورقة واجب وقالت بعد يومين تبيه.
فجاتك اليوم الثاني سألاتك

Have you done your homework?
هل انجزتي واجبك؟

اهني الابلة استخدمتلك ال present perfect

علاش؟

لان هي ماتعرفش هل كملتيه اولا وهل كتبتيه في الصبح ولا الظهر ولا في الليل واما ساعة يعني هي ماتعرفش الا انك بديتي فيه لانها تعرف انك طالبة شاطرة.

⭐ومن اهني خلونا ناخذوا ال form
الي تستخدموه لما تبوا تسألوا:

Have or has+subject +past participle+ ?

(وتم🔥)

توا نرجعوا لقصة كيف تتكلمي على الماضي؟
مرة تفرجتي على فيلم وفي يوم من الايام صاحبتك قالتلك تعالي نتفرجوا على الفيلم وطلع نفسه الي انت حضرتيه.
فابتقوليلها:
I have seen this film befor.

لقد رأيت هذا الفيلم من قبل.

⭐ملاحظة:في عندنا already كنت نقدر نستخدمها لكن انتم في المنهج على حسب علمي عاطيينكم since و for فلهذا مش حنحطها.


المهم المثال وضحلي انه حاجة صارت في الماضي وحكيت عليها من غير مانحدد الفترة بالضبط.
( ما قلتلهاش امتى تفرجت عليه).

نجو لمثال على شي بدي في الماضي ومستمر حتى الان.

She has lived here since 2004

هي تعيش هنا منذ عام 2004.

اهني شي بدي في الماضي واستمر الى حد الان لأنها قعدة تعيش اهني.

ولو مثلا تبي تبيني كم سنة عشتي اهني بالعدد
فابتستخدمي for.

مثال:
I have lived here for ten years.

عشت هنا لمدة عشر سنين.

⭐ملاحظة
ماتقدريش تقولي:
since ten years ❌
ولا for 2004❌

كل وحدة ليها طريقة في حطان الحاجة الي بعدها فركزوا فيها⭐

وتم 🔥

شفتوا كيف محلاهم ومافيهمش اي صعوبة .
وخلاص تمينا الشرح السريع.
ان شاء الله واضح وكل شي مفهوم.

وربي يوفقكم💙
( ويوفقك في اختبار غدوا)

دُمتم في رعاية الله💙.

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .

24/11/2022💙🥺
زي اليوم هذا من السنة الي فاتت كملت اجمل سنة في مرحلة الدراسة:
(سنة ثالثة ثانوي)
كانت سنة مليئة بالتعب والسهر والقراية لكن رغم هذا كله قعدت اجمل ذكرى واجمل سنة دراسية في حياتي لأن الشي الي كنت نشبح فيه مستحيل يصير وندعي ل ربي انه يحققهولي الحمدلله والشكر ليه استجاب ليا واعطاني اجمل معجزة والي هي نسبة كانت مجرد حلم بعيد لكن الله سبحانه وتعالى جعل الطموح يتحقق وكان جبر ليا من عنده سبحانه وجبر لكل شخص يحبني💙
الي نبي نوصلهولكم ان النجاح مش بكل سهولة تاخذوه.....
كون قريب من ربي ماتقصرش في حقه
توكل عليه وادعي ثم ادعي ثم ادعي💙
تخايلوا ان رمضان السنة الي فاتت كنت ندعي ربي شبه كل يوم انه يحقق المعجزة(وهذا من فضله عليَّا)...
ورمضان السنة هذي كنت نشكر في ربي لأنه استجاب🥺
متخايلين جمال الجبر والشعور الحلو🥺💙؟
ممكن تشوفوا في النتيجة وتحسابوا الوصول ليها ساهل.....
لكن لولا فضل ربي عليا ورحمته وانه خلاني نجتهد اجتهاد كبير ماكنتش حنحصل النسبة هذي الي هي بالنسبة ليا كانت شي مستحيل عليا لكن مش مستحيل علي ربي💙
كثرت عليكم عارفة لكن خاطري نهدرز😂
المهم موفقين وعقبال كل طالب عنده هدف يتحقق بالخير🥺💙
#ذكرى

﷽ {إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} .