𝘛𝘦𝘢𝘮 𝘒𝘩𝘦𝘣𝘢𝘤𝘩𝘪𝘯 🤍

Heey guys 🫶🌝
بما انو رانا في مارس و راه رح يخلاص 🙂 حبيت نجي نحكيلكم شوي للناس les libres و مزال ما بدات تقرا مسڤم .. هي شوفو بش نتفاهمو اول حاجة ديروها تبدلو عقلية تع صايي راه فات الوقت و تحبسو ما تقراو .. ايا قولولي وش خاسرين كون تجربو يخي المهم حنا نديرو لي علينا و لي راه كاتبهالنا ربي اي رح تصرالنا .. ❤️
عن تجربة شخصية باك 2022 قريت مسڤم غير في نفس هذي المدة يعني من اواخر مارس و افريل و الحمدلله ديت معدل جيد جدا ..
فهذي المدة لازم تحاولو تقراو اكبر عدد من دروس لي تتعاود ياسر ( راكم ليبر و قاريين ديجا البروڤرام كامل و اغلبكم مديين نقاط مليحا في اغلب المواد )
-نبداو بالعلوم 🙂 : في هذي المادة اضربو طلة على دروس ( غير تراجعو les résumes رح تتفكرو و الله ) و ابداو حلو تمارين ديراكت و ننصحكم تبعو استاذ طلحي فيديواتو قصار مايدولكمش وقت ياسر و يفهمكم كفاه تستغلو الوثائق و بلي في التمرين عنكم مقدمة التمرين تلقاو فيها الهدف من التمرين و هذا الهدف ديروه مرجع ليكم كلما تفهمو وثيقة خرجو منها معلومة تعاونكم بش توصلو لهذاك الهدف + حلو تمارين تع بوالريش و ليباك من 2018 للشعبتين رياضيات و علوم تجريبية .
-و الرياضيات : نضن استاذ نورالدين وحدو يكفي لخاطر في كل محور يحط تمارين شاملة لكامل الاسئلة لي تقدر تجي و زيدو حلو ليباك ليفاتو تع الشعب العلمية ( هذو يكفو تدو فوق 18 ) .
-و الفيزياء : الدروس كيما قتلكم راجعو غير ملخصات عاودو تفكرو قوانين برك و في تمارين حلو لي راه يحطهم صفحة عقبة بن نافع و ليباك ليفاتو تع شعب العلمية يكفو بش تدو فوق 18 ثاني … اييه و ماتنساوش الاسئلة النظرية و هذيك التعريفات اضربو عليهم طلة .
الفيزياء و الرياضيات تحتاج غير تمشي يدك في الاسئلة و تحل بسرعة برك لان اغلب الاسئلة معاودين غير الارقام تتبدل 🙄
-بالنسبة لمواد الحفظ ننصحكم ماتحكموش الدرس مثلا عشر سوايع و نتا معاه نهار كل .. خصصولهم وقت صغير في ليوم على الاكثر 45 دقيقة في الاجتماعيات عندكم امين سكول و شريعة استاذ شمس الدين هذو يخلوك تفهم وش راك تحفظ مش غير كي ببغاء تحفظ 🫠 .. و اعتمدو على حاجة اسمها التكرار المتباعد يعني درس حفظتو ليوم عاودو في ليل قبل ما ترقد غير طلة خفيفة و الغدوة كيف كيف عاودو و بعد يومين و بعد سمانا و كل ماتجيك فرصة اضرب عليه طلة خفيفة هكا مش رح تخلي فرصة لدماغك ينساه نهائيا 😂
-اما اللغات فرونسي جيبو ليباك ليفاتو اقراو النصوص و ترجمو الكمات اذا كنتو ضعاف فيها و احفظوهم لخاطر كيف كيف الكلمات تتعاود 🌝 و ركزو على compte rendu و اذا كنتو ملاح فيهم ننصحكم اكتبو production libre احسن .
و الانجليزية شوفو ااستاذ ناصري رح يسهللكم القواعد للخر و بعدها حلو ليباك ليفاتو و كيف كيف ترجمو كلمات اذا كنتو ضعاف و كي تبقاو تعاودو تقراو النصوص هذوك رح توالفو بالكلمات هذوك مايجوكمش غريبة نهار الباك و في الفقرة راهم ديجا يمدولنا جمل مساعدة غير عاودولها صياغة ديروها في جملة مفيدة و ( اكتبو بجمل بسيطة ماتحاولولش تعقدوها على رواحكم ) .
و الادب تبعو غير استاذ حيقون راه منظم كلشييي مثلا في البناء الفكري يفهمك اسئلة لي تقدر تجي فيه بلي لازم تمد امثلة من النص كي تجاوب و كفاه تشرح بطريقة بسيطة و تجيبلك النقطة و في البناء اللغوي اسئلة لي تجي فيه و كفاه تجاوب عليها و هذا كل بطريقة منهجية و يحل في مواضيع خاصة بكل محور يعني كلش كلش منظم تعتمدو عليه وحدو تدو فوق 18 ❤️
- و ضكا سؤال المطروح بروڤرام لي نقرا بيه 😂 هي بش نتفاهمو كل انسان يقرا في الوقت لي يساعدو لان اغلب les libres و يقراو سبيسياليتي اخرى معندهمش وقت محدد يكونو فيه فارغين بش يقدرو يقراو آلاز .. بصح نقدر نمدلكم des astuces 😂 شوفو فاليوم اقراو علوم حلو تمرين او زوج على اكثر بصح لازم تحلو كل مرة تمرين جديد و فيه فكرة خلاف على ليفاتو و تركزو معاهم مايلحق الباك احسبو شحال حليتو من تمرين بافكار جدد .. و زيدو ياإما رياضيات او فيزياء فهذو المادتين حلو قد ما تقدرو بصح ركزو مع اسئلة لي معرفتولهاش برك يعني اسئلة لي عارفينها ماتضيعوش معاها وقت .. و زيدو معاهم مادة تع حفظ تقدرو تحفظو فوقت الطرونسبور اذا كنتو ديبلاصو 🌝 و معاها مادة تع لغات كيف كيف مايدوش وقت كبير كل يوم تقراو نص ولا قاعدة و لا تحاولو في اسئلة بناء فكري احسبو منا للباك تكونو كملتو كل الدروس و حليتو اسئلة ..
- سما الوقت راه كاين غير اعرفو تستغلو كل دقيقة في نهاركم و راه مابقاش ياسر شهرين و تولي هذي ايامات كامل غير des souvenirs

راضي؟؟😒🤓🤓

هذا رأيها بخصوص الأسترة

منيش نمد في مقترحات ومام الاستاذة مهيش تقترح راهي غير تهدر على الدروس الأخيرة اسكو تطيح ولالا
( عندها الحق في كلشي غير الأسترة فيها شوي شك)