تجارب 100 تحصيلي💯

كان الطريق طويلاً
‏و الوصول على قدر المشقه مهيبًا وعظيماً.. بكرم من الله وفضله أنقل لكم تجربتي هذه بعد أن حصلت على 100% مع كامل التحديات والتخبطات اللي واجهتها:

اولًا المصادر /

الاحياء : تابعت المنهج مع احمد سكول
الرياضيات : ذاكرته من عماد الجزيري بعدين رجعت احل كتاب ناصر لوحدي واتابع مهند باللي ماعرفه وفي اشياء مافهمتها تابعت فيها محمد القرني( الانسان هذا فنان ماشاءالله)
الكيمياء : كتاب ٢٣ مع العمري
الفيزياء : فرح ابراهيم وابو راما

بدايتي : مع بداية الترم الثاني
لكن ما شديتها الا يوم بدأ الترم الثالث

في بداية الترم الثاني علقت بالفيزياء شهرين ( مو لإنه صعب لكن لإني كنت مماطله ) و عدت تأسيسه ٣ مرات تقريبًا عشان اتأكد اني فاهمة كل شيء وبدون لا افتح تجميعاته , بالنسبة للمصدر/ تأسيس الفيزياء للمرة الاولى أعتمدت شرح أستاذة فرح ٢٣ لكتاب ناصر,المرة الثانية تابعت شرح فرح ٢١ لإني سمعت انه شامل و قلت كويس للمراجعة لكن يوم بدأت بالكهرباء معها حسيت أنها تفصلت بشدة لدرجة ضيعتني ورحت اتابع ملك الكهرباء أبو راما👑 و أرتحت لشرحه مره وكملت معه إلى نهاية المنهج
بعدها تأسست للمرة الثالثة من ملخص وماتابعت شرحه الا للنقاط الجديدة الغير مشمولة بكتاب ناصر، مافتحت التجميعات وفقًا لنصيحة استاذ غشام أن التجميعات اخر خطوة قبل الاختبار و أن التأسيس أهم 💯

بدأت تأسيس الرياضيات بأخر اسبوعين من الترم الثاني وذاكرت للفاينل من تأسيس التحصيلي ، ليلة الفاينل كنت أتابع شرح عماد للمعاصر ٥ و توقيتي كان ممتاز استغليت وضعي ٢ في ١، ثم فتحت كتاب ناصر أحله عشان أختبر فهمي و اللي أستصعبه أشوف شرح مهند له باليوتيوب، وبعدها للمراجعة فتحت ملخص الرياضيات مع الأستاذ المبهر جدًا محمد القرني و أشوف النقاط اللي مو موجوده بالمصادر الاخرى واتابع شرحه لها، تعريف الدوال كان فيه نقطة مهمة جدًا و غير مشمولة بالمصادر الاخرى و وحتى بالمدرسة ماتعمقنا فيها لكن كانت مهمة بالتحصيلي وأستاذ محمد أبدع أبدع فيها ، من بعد ماكانت نقطة ضعفي صرت فنانة فيها الله يجزاه خير


لما بدأ الترم الثالث بدأت كيمياء مع شرح استاذ محمد العمري لكتاب ناصر ٢٣ و كان ممتع و ثري جدًا و خلصته بوقت قياسي يمكن ١٠ ايام و بعدها قررت أراجعه في ٥ أيام و برضو مافتحت تجميعاته ( الكيمياء أحلى مادة بالتحصيلي وأكثر ماده ماتعبتني رغم اني اكرهها بالثانوي)


بعدها في منتصف رمضان بدأت بالاحياء من المنهج وجلست حوالي أسبوع كامل اتخبط بالمنهج وأحفظ تفاصيل مالها داعي وخلصت احياء ١ بهذي الطريقة السيئة جدًا اللي سلبت مني وقتي وطاقتي
إلى أن ألهمني ربي اتابع شرح الأستاذ أحمد سكول في احياء ٢ وكان الامر ممتع ممتع بشكل لا يوصف!
بعدها قرب العيد وحسيت لو بدأت احياء ٣ ماراح أقدر أخلصه وقررت اترك الاحياء و ابدأ بعلم البيئة وتابعت شرح الاستاذ أحمد فيه، البعض ممكن يشوف الشرح ماله داعي بحكم ان المادة سهلة لكن انا كنت جدًا مستمتعة بالشرح و أخذ مني يوم ونص، بدأت به اليوم اللي قبل ليلة العيد وخلصته ليلة العيد و بعدها رجعت اكمل باقي الاحياء
🛑 معلومة مهمة : الاحياء المادة الوحيدة اللي كنت أحل تجميعاتها اول بأول لأنها تُنسى بسرعه 🛑



بعدها بدأت بالتجميعات ، خلصت تجميع الرياضيات ١ث و ٢ث ويوم قربت أخلص التجميع تذكرت أن حضرتي ما فهمت ولا شيء من احياء ٤ ( لإن لما كنت اذاكره كنت تعبانة و ارغمت نفسي أخلصه اي كلام ) 😅 و قررت أترك التجميع و أرجع له « خطأ فادح جدًا »

وقتها كان باقي على اختباري ٨ ايام بس !! و رجعت اعيد شرح الأستاذ أحمد لأحياء ٤ و بعدها حليت تجميعه

ثم بدأت تجميعات أ/ غشام للفيزياء وخلصته بيومين تقريبًا وبعدها فتحت ملخص وراجعت منه كامل الفيزياء على السريع

جت ليلة اختباري ووقتها كنت مخلصة تجميعين بس، الاحياء و فيزياء غشام وحتى الرياضيات ما كملت تجميعات منهج ثالث ثانوي

فقررت أني أفتح تجميع أ/ غشام رياضيات لمنهج ثالث و أحل الدروس المعقدة واترك التافه، جا صبح يوم اختباري و انا ماراجعت الكيمياء ولا فتحت ولا تجميع له!💔

وقتها حسيت ضاقت بي الدنيا و جلست اسأل نفسي كيف انزنقت كذا وانا بادية اذاكر من زمان ؟ و ليه و ليه

لكن ما استسلمت ابدًا و قررت أفتح كتاب ناصر للكيمياء واراجع اللي اقدر عليه حتى أنه فيه بعض الصفحات صورتها عشان أراجعها بالسيارة وانا بطريقي للاختبار، طول الطريق للاختبار وانا فيني الصيحة

الظروف اللي ضدي كانت كبيرة؟ نعم ..لكن الله سبحانه وتعالى أكبر !!!

ماشاءالله تبارك الله دخلت الأختبار ولله الحمد وحصلت على ال١٠٠ رغم عن كل شيء، اللهم لك الحمد حتى ترضى ولك الحمد اذا رضيت ولك الحمد بعد الرضى

اشارككم تجربتي عشان تؤمنون بإن الله سبحانه لا يضيع عبد آمن به و توكل عليه واودع شتات أمره له
والله أني كتبت حوالي ٢٠ خطة عشان أمشي عليها و كلما كتبت وحدة تعثرت وماقدرت أمشي عليها لكن بكل مرة ماتضبط خطتي أقول خيرة من ربي،يمكن الله مدبر لي الاحسن!

ملاحظات تفيدكم بإذن الله /

١- إياكم إياكم تسمعون كلام اللي يقولون بدري و تو الناس ، انا ببداية مذاكرتي راح الوقت وانا ما أنجزت بسبب هالشيء ، طيب وإذا كان بدري؟ استثمروا وقتكم بما ينفعكم


٢- جميع أغلاطي كانت عبارة عن غلط واحد اللي هو أني ابدأ بشيء ولا اكمله تمامًا لذلك اياكم تبدأون بشي وتأجلون اللي مافهمتوه أو تخلون الباقي لبعدين لإن الوقت يطير وانتم ماتحسون ❌

٣- لا ترهقون صحتكم النفسية .. انا للآن ادفع ثمن هذا الشيء

٤- التأسيس ثم التأسيس ثم التأسيس ثم التجميعات ، التأسيس اكثر شيء ما ندمت اني حطيت كامل أهتمامي عليه ونفعني بالاختبار
ماشاءالله تبارك الله بس خلصت تجميعين لمادتين مختلفة وجبت ١٠٠ ( هذا أكبر دليل على أهمية التأسيس)

٥ - راجعوا المواد أول بأول وأفضل وسيله للمراجعه هي الملخصات،خصصوا يومين بالاسبوع مراجعه لملخص المادة السابقة

٦- انا ما نسيت المواد بفضل الله ثم بفضل الشرح بالقروبات ، كنت أفيد غيري و أستفيد بنفس الوقت واحيانًا أقول يمكن الله ييسر لي الدرجة هذي رغم انها كانت شبه مستحيلة عشاني كنت أساعد غيري لذلك اياكم تبخلون بالمعروف ولو كان بسيط

٧- اعلموا ان الله سبحانه أكبر من أن يضيع عبده و توكلوا عليه

٨- بالنسبة للقدرات و فرقه عن التحصيلي، التحصيلي مذاكرته أصعب من الناحية النفسية والخوف من محدودية الفرص لكن مستواه بالاختبار لا يقارن بالقدرات ..جدًا تافه وبسيط

٩- صحيح ارتكبت اخطاء كثير لكن مذاكرتي للاحياء من المنهج ليس واحدًا منها و لو رجع بي الوقت ذاكرته من المنهج مره ثانية لذلك اللي عنده وقت كافي يذاكره من المنهج مع أ/ أحمد سكول و بيصير أسطورة في الاحياء

١٠- أهم شيء الجودة وليس الكمية، لا تقفلون على مادة الا وانتم متقنينها ١٠٠٪؜

اتمنى فعلًا تكونون استفدتوا من تجربتي هذه، اسأل الله تعالى ان يرزقنا جميعًا العلم النافع و أن يوفقنا لما يحبه و يرضاه
لا تنسوني من صالح دعائكم🤍

🌟تجربة 93: 👇🏻👇🏻

بسم الله الرحمن الرحيم
الحمدلله بعد توفيق من الله حصلت على 100،99 في اختبار التحصيلي وأبي انقل لكم تجربتي وأتمنى تفيدكم❤️‍🔥. بقسم التجربة لثلاث أقسام
-قسم التأسيس( المصادر )
-قسم التدريب ( التجميعات)
- الايام الاخيرة للإختبار والعامل النفسي(الاهم واتمنى تطبقوها)

وبالنسبة للتأسيس بعطيكم الخلاصة لأن المصادر معروفه

1-التأسيس📚:
الفيزياء⚡️: أول مادة بديت فيها وكان قبل الاختبار ب 120 يوم، إذا تأسيسكم ضعيف دخلوا دورة استاذة فرح او شوفوا شرحها حق يلو .

كيمياء🛢: دورة الاستاذ محمد العمري اللي منزلها باليوتيوب حق يلو أو دورته لدفعة 2022كتاب ناصر .

الاحياء🦠: آخر مادة ذاكرتها والصراحه كانت ضياع وخلصتها قبل الاختبار بيوم ، اغبطكم على استاذ أحمد سكول، بيشرح لكم يلو ف بيكفيكم هالمصدر وبقوة.

رياضيات♾️: كنت اذاكر لإختبار CPP ارامكو و قليل من كتاب ناصر بشرح فرح.

2-التدريب🤺:
طبعا تجميعات غشام الاهم وتالي يلو، يلو رهيب بس مرات يحطون مواضيع ما عمرها جات بالاختبار😅.
وفي فترة التدريبات انصحكم تكررون حل التجميعات كثير عادي ختموهم 6 مرات وفوق، كنت أي سؤال اخطأ فيه اصوره علشان اراجعه يوميا.
✨️ دائما تعرضوا للأسئلة اللي تحسون انهم صعبين، لو رفعتوا مستواكم فوق مستوى الاختبار، حتى لو جاء سؤال جديد بتحلونه ان شاء الله لأنكم رفعتوا اللفل.

3- الايام الاخيره للإختبار والعامل النفسي:
✨️توكلوا على الله ويوم الاختبار صلوا ركعتين علشان الله يوفقكم وتحققون اعلى الدرجات
✨️نومكم لازم يكون كافي وريحوا عقلكم لا تجهدونه وبس شوفوا التسريبات بيوم الاختبار (وانصح بشدة الاختبار يكون بالصبح علشان التركيز يكون عالي بداية اليوم)
✨️قبل الاختبار بأيام حاولوا تستعدون لجو الاختبار وطريقته (يلو مسوين نماذج لنفس طريقة الاختبار انصحكم فيها)
✨️ ترى إذا أنت بالبيت تحل التجميعات والتسريبات بسهولة وبسرعه، بالإختبار بتحلهم بسهولة وبدون تعب، والعكس صحيح.

وبس هذا تجربتي ولا تنسوني من دعائكم 🤲🏻وأتمنى لكم التوفيق واستمتعوا برحلة التحصيلي وان شاء الله تحققون امنياتكم وتتذكرون كيف الانضباط والتعب صنع منكم شخصية افضل❤️‍🔥.

🌟تجربة 92: 👇🏻👇🏻

تجارب 100 تحصيلي💯 pinned «لُطفًا اللي بيشارك تجربته يرسل صورة الدّرجة معاها وفيها اسمه الأوّل للمصداقيّة 🤍 غير كدا أعتذر عن النّشر لأنو بدون صورة الدّرجة مافي شي يثبت انو اللي مرسل تجربته جاب 100 فعلًا»

السلام عليكم ورحمه الله وبركاته
انا حلا ورح انقل لكم تجربتي واتمنى انها تفيدكم
اولا الوقت ⏰
الوقت مهم جدا كل ما بديت بدري كل ما كان أفضل
انا شخصيا بدأت مذاكره من بدايه الفصل الدراسي الأول وبحكم انو احنا مسارات مهم انو تبدأ بدري عشان تتمكن انو تشتغل ع مشروع التخرج وساعات التطوع عشان ما تنضغط وتنزنق
ثانيا المصادر وكيف بدأت 📚
المصادر كانت طبعا ناصر عبدالكريم ما عدا الأحياء كانت من ملخصات يلو
واشوف انو كتاب ناصر شامل ووافي لكل الأفكار حتى في الرياضيات
بالنسبه لكيف بدأت...
اول شي لازم تعرف ايش نقاط الضعف الي عندك.. وايش أكثر ماده عندك فيها ثغرات تعليميه كثيره او انو مستواك ضعيف فيها... اذا هي اللي رح تبدا فيها
انا شخصيا بدأت بالفيزياء بحكم انها شوي صعبه وتحتاج لمجهود كبير وقوانينها كثيرة اهم اهم شي في الفيزياء انك تفهم فهم مهم جدا الفهم مو بس حفظ ومو شطاره انك تخلص ٧ او ٨ صفحات فيزياء بس لمجرد انك تخلص و بالنهايه يطلع فهمك نص نص.. لا! انا اشوف انو لو حتى انجاز قليل من حيث عدد الصفحات ولكن فاهمها ومستوعبها بشكل عميق افضل من انك تنجز عدد صفحات كثيره وبالنهاية تطلع مو فاهمها كويس وتضطر انك تعيد التأسيس من جديد ف ابدا كويس من الاول عشان ما تتوهق بعدين.. ووبعدها بديت رياضيات وكانت جميله جدا في المذاكره بحكم انو مستواي فيها ممتاز فما اخذت فيها وقت طويل عشان اتاسس فيها اهم شي القوانين تحفظها وافهمها في نفس الوقت كل المواضيع اخذتها من كتاب ناصر ما عدا القطوع المخروطية صراحه استعنت فيها من المعاصر وبعدها الكيمياء وكانت حلوه في المذاكره وكانت حلوه مع شرح استاذ محمد العمري وختاما الاحيياء أكثر المواد سهوله بحكم انها كلها حفظ ما عدا بعض المواضيع كعلم الوراثه تحتاج منك انك تفهمها وما استعنت بمعلم فيها كانت مذاكرتي لها مجهود شخصي
طيب اذا الخلاصه انك تبدأ بالمواد الاصعب ثم الاسهل
📌📌طيب من حيث المعلمين اللي استعنت فيهم
الفيزياء :فرح ابراهيم و تكنوقراطية
الرياضيات :فرح ابراهيم كل مواضيع الرياضيات و عماد الجزيري فقط (بالقطوع المخروطية)
الكيمياء: فرح ابراهيم و محمد العمري
للملاحظة 🔍 اذا انت من النوع الي تحب الربط تسهيل حفظ المفاهيم اختار فرح
لكن لو من النوع اللي تحب تعرف الجذور و الاساسات لمختلف القوانين والمفاهيم اختار محمد العمري
الاحياء : كما ذكرت سابقا بس ملخصات يلو دون الاستعانه بمعلم
طبعا هذا بالنسبه للتأسيس اما التجميعات ف هي مهمه جدا جدا
اهم المصادر كانت (الحوت- يلو- غشام- و الكنز) كل ما اطلعت على تجميعات كثيره كل ما صارت مهاراتك افضل في الحل وتعرفت على صيغ أكثر للاسئله بحيث انك ما تتفاجأ في الاختبار
بس النقطه الأهم انو ما تعتمدوا على التجميعات وتهملوا التأسيس غلط ❌❌
انا ع سبيل المثال في اختباري الأول جاني قسم كامل تسريبات
اختباري الثاني فقط اجاني سؤالين ومو نسخ لصق لا كانوا مغيرين كلمه في المعطيات او أرقام مختلفه
ف افهموا وتاسسو كويسسس

وبس تقريبا اتمنى اني اكون افدتكم...

🌟تجربة 91: 👇🏻👇🏻

بسم الله الرحمن الرحيم

السلام عليكم ورحمة الله ، معكم عبدالسلام نسيب حاصل على ١٠٠ في الفترة الثانية و٩٩ في الأولى بفضل الله ، بوضح طريقتي في الحصول على هذي الدرجة ⬇️

اولا ماراح ابدأ بالمصادر لأن اغلبها معروفة ، ولكن ودي اعطيك نصائح مهمة جدا ⚠️ :

● لا تشتت نفسك بين المصادر !
تسمع ذا يقلك ناصر والثاني يلو والثالث يعطيك مصدر جديد وانت محتار وماتدري مع مين تروح ، حدد مصدر بالنسبة لك واللي تشوفه من تجارب الطلاب وتوكل على الله ، كل الطرق تؤدي إلى المائة

● لا تبدأ متأخر ⏳️
متى افضل وقت ؟ كل مابديت بدري كان افضل ، بالنسبة لي أنا بدأت بعد الاختبارات النهائية للفصل الثاني، وكان الوقت مناسب جدا بحيث مايصير علي ضغط بعد العيد او قبل الاختبار ( ولكن قبلها في الفصل الأول كنت قد ذاكرت التحصيلي حق اول وثاني ثانوي على السريع مذاكرة مشي حالك عشان اختبار البترول، ولكن للأمانة فادتني المذاكرة هذي ، بس اقلك اني رجعت من الصفر بداية الفصل الثالث )

● قلل من الملهيات والمشتتات 📱
احذف برامج التواصل اللي تضيع وقتك ( تيكتوك وإخوانه ...) ، حاول تقلل من استعمالك للجوال قدر الامكان لانه حرفيا يدمر وقتك ويضيع يومك وتكتشف في نهاية اليوم إنك ما أنجزت شي

● لا تقارن نفسك بغيرك
اثناء مذاكرتك ، بتشوف اللي خلص تأسيس و وصل للتجميعات ، وبتشوف اللي خلص كل شي وقاعد يراجع ويعيد من جديد ... ماعليك منهم ، انشغل بنفسك وحاول تخلص اللي عليك قبل الاختبار

● هذي النصحية المفروض ما اقولها ولكن للتذكير ، نظم نفسك واكتب خطة واضحة للكمية المطلوب انجازها في فترة معينة، واهمشي "الاستمرارية" ، مو تذاكر يوم وتسحب يومين وبوقت الاختبار تنصدم من التراكمات

● اذا كنت تقرا الكلام بداية السنة ، انصحك تركز في شرح المدرسة وتفهم المنهج بشكل كامل ، خصوصا في ثالث ثانوي عندك الفيزياء والرياضيات بكثرة ، ركز في الحصص
ودي ازيد نصائح ولكن هذي اهم النقاط

الآن بالنسبة للمصادر ولتجربتي معهم ( التأسيس ) :
.. ناصر عبدالكريم ( كل المواد عدا الأحياء )
.. المعاصر 5 ( رياضيات فقط )
.. النبلاء في علم الاحياء ( من اسمه )

كتاب ناصر هو الاشهر والاشمل ومايحتاج اتكلم عنه ، إن كان فيه عيب وحيد فهو فقط في الأحياء وهذي النقطة يمديك تحلها بأكثر من طريقة ، الاولى اذا ماتبغى مصدر زيادة هي بانك ترجع لكتب المنهج في بعض النقاط وتقرا فيها ، وأنك تغطي النقص بالتجميعات ، الطريقة الثانية انك تاخذ مصدر آخر منفصل ، وافضل اثنين عندك النبلاء في علم الاحياء وملخص يلو ، اختر اللي يعجبك لان حسب كلام الاغلب كل المعلومات فيهم متقاربة ( بالنسبة لي اخذت كتاب النبلاء وكان جدا جميل ويثبت المعلومات بكثرة التدريبات )

اما المعاصر أخذته بناء على نصيحة تجارب سابقة ، شرحه جميل ومايحتاج اتكلم عن شرح عماد الجزيري ، تقدر تسحب عليه وتعتمد على كتاب ناصر الموضوع راجع لك ( او جرب ابحث عن الفروقات بينه وبين ناصر )

الآن نرجع ونفصل في المواد ( المكتوب تحت هو تجربتي ، فيه مصادر غيرها تحصلها في قروبات التليجرام )

الرياضيات : المعاصر 5 شرح عماد الجزيري

الفيزياء : ناصر عبدالكريم شرح فرح ابراهيم ( في اليوتيوب )

الكيمياء : ناصر عبدالكريم شرح محمد العمري ( في اليوتيوب شرح ناصر ٢٣ ) ، كان يعطي ملاحظات كثيرة خارج كتاب ناصر ، فلذلك اخذت دفتر وجلست الخص كل المعلومات اللي احتاجها وكأني الخص في المدرسة
أيضا قطعت ورقة الجدول الدوري ولصقتها على الجدار قدامي ، حتى اني كل ما احتجت اشوفها 😂

الاحياء : اكثر مادة كنت خايف منها ومحتار اذاكر من اي مصدر ، كل ما اشوف تجربة او اسأل شخص ذا يقول شي والثاني يقول شي ، ولكن مشيت مع النبلاء في علم الاحياء وكان ممتاز جدا ، وايضا كتب الاحياء حق المدرسة خليتها عندي وصرت ارجع لها واقراها واحدد على المعلومات الجديدة علي عشان اثبتها ،الشرح تابعت مع معلمين كل واحد له طريقته الخاصة والمفيدة .
ظافر القرني : مختصر وسريع ومفيد ويوصل الملعومات بطريقة عرض رهيبة.
احمد سكول : مفصل وتقليدي ويشرح على السبورة كثير .
صراحة بعض الدروس من كثرة المعلومات فيها كنت اقرا اولا الصفحة في النبلاء ، بعدين اشوف شرح المعلمين الاثنين ، واحيانا ارجع للكتاب واجلس اقرا النصوص الموجودة حتى اثبت المعلومة والفهم بشكل تام، واخر شي ارجع اكمل النبلاء واعلم عليه واحل تدريباته

اثناء التأسيس راجع الدروس اللي اخذتها امس او قبله ، او مثلا كل كم يوم راجع حق اللي قبل ، هذا الشي مهم جدا جدا ولا تستهين فيه

قبل ما ننتقل للتجميعات كم المدة الكافية للتأسيس ❔️ احب اقلك تختلف من شخص للثاني حسب قدرة استيعابه وانضباطه ، اشوف المدة المناسبة من شهر ونصف الى شهرين ونصف ،تزيد او تنقص حسب القدرة ، كانت المدة الفعلية لتأسيسي شهر و ٢٥ يوم ، أو ٥٥ يوم ( فيها فترات بدون مذاكرة مثل ايام العيد وبعض الايام كنت اتوقف لبعض الاسباب او اتكاسل )، برأيي لو قلّت المدة عن الشهر

او اقل بتكون ظلمت نفسك ومتأكد انك ما فهمت جميع الدروس 100% وبتثبيت قوي ، فلذلك اعط نفسك حقها وخلك متوازن .( عشان كذا قلت لا تتأخر عن بداية الترم الثالث )

الآن نجي لأهم حاجة واقوى حاجة تفيدك في الاختبار بعد التأسيس القوي، اللي هي "التجميعات" ، واقدر اقلك تأسيس بدون تجميعات تعتبر مذاكرتك ناقصة ، لانه في التجميعات راح تصادف اسئلة جديدة عليك وربما افكارها ماوردت في التأسيس او وردت بطريقة مختلفة، فلذلك هي مهمة وهي اللي ستثبت لك القوانين الكثيرة سواء في الرياضيات والفيزياء وغيرهم .

التجميعات اللي اخذتها :
● تجميعات غشام
● تجميعات الكنز

وانت في التجميعات، اي سؤال تقابله جديد عليك ولاتعرف تحله من اول مرة صوره واحفظه في ملف على جنب ، وراجع جميع اسئلتك اللي غلطان فيها من فترة لفترة خصوصا في الاسبوع قبل الاختبار .

أسبوع ماقبل الاختبار :
هذا الاسبوع او هذي الفترة المفترض انك كملت تأسيس وتجميعات واصبحت جاهز ، خله للمراجعة المكثفة ، وايضا مراجعة اسئلتك مثل ماقلنا فوق ، وفيه هذي الفترة بتحصل اغلب المصادر تنزل ملفات مثل:
" أهم ٤٠٠ سؤال لجهاد "
" أهم ٣٠٠ سؤال للكنز"
"أهم ٢٠٠ سؤال لكل مادة مع غشام "
هذي الملفات حاول تخلصها وتلم بها لانها فعلا من عنوانها مهمة ( وسهلة للمذاكر )


وقت الاختبار :
أحب اصدمك واقلك بعد ذا المشوار كله وكل ذي المصادر أن الاختبار أسهل من المذاكرة بمراحل !
كيف ؟! ، فعلا الاختبار اول مادخلته كانت اغلب الاسئلة عارفها ومرت علي في التجميعات ، واول ماتشوفها بتحلها مباشرة ، طبعا قلت "اغلب" الاسئلة لانك بتقابل كم سؤال جديد ينعدون على الاصابع ، واحب اقلك انهم في متناول اليد وممكن حتى ماتلاحظ إنهم جدد اصلا ، مثلا يجي يغيرلك صورة ، او يعطيك السؤال بصيغة ثانية سهلة وكذا، فلا تخاف ابدا

هذي بعض النصايح اثناء الحل في الاختبار :
● ادع ربك واذكره اولا ، وتأكد ان تعبك مايضيع

● اقرأ السؤال بشكل ممتااااز ، واقرا الخيارات كلها واجلس استبعد الخيارات المستحيلة، حرفيا هذي النصيحة مهمة وكنت بغلط في كم سؤال لولا فضل الله ثم اني قريته منجديد ، بتحصل كلمة مفتاحية كنت غافل عنها

● راجع ثم راجع ثم راجع الى ان ينتهي وقت القسم ، مع المراجعة حسس نفسك انك تحل منجديد وحاول تفكر من منظور ثاني لعلك تكتشف انك غلطان 🤷‍♂️

● لا تتوتر ، خذ نفس وروق وتذكر انك حليت مئااات الاسئلة الصعبة والسهلة ، والاختبار مجرد ١١٠ سؤال


اخيرا اتوقع اني طولت ، والكلام اللي فوق ان شاء الله انه يفيدك ، ان احسنت فمن الله وإن اخطأت فمن نفسي شد حيلك وتذكر ان لكل مجتهد نصيب وتعبك لن يضيع ،ابحث في التجارب واسأل واستفيد وأهم شي " اصمل وذاكر " ، قروبات التليجرام مفيدة جدا ولكن لا تضيع وقتك اكثر من اللازم عليها ، بالتوفيق

🌟تجربة 90: 👇🏻👇🏻

اهلا دفعة 2025
حابة اشارك لكم تجربتي وان شاء الله تفيدكم

اول شي حابة اشكر امي لان لولا الله ثم الأدعية يلي اخدت من وقتها عشاني ماكان جبتها، فاول شي تسوونه كونوا لها باريين عشان ربي يوفقكم.

الشي الثاني الوقت لازم تبدأوا بدري بس مو مرة لان بالاخير انتوا لسى ماخلصتوا المناهج يلي داخلة بالتحصيلي
حاولوا توازنوا بدراستكم للتحصيلي والمدرسة لا تقصروا بمذاكرة المدرسة ابدا لانها حتساعد كثيرر وتختصر عليكم وقت، ابدأو للتحصيلي على بداية الترم الثالث وان شاء الله حيكون كافي لكم.
اهم شي نظموا يومكم، لايمر يوم الا وانتوا مذاكرين، سوا جدول وامشوا عليه مرة يساعد مرررة

ثالث شي المصادر، انا تأسست من كتاب ناصر وحضرت الشرح من اليوتيوب عندكم كثير معلمين الله يجزيهم الخير غطوا كل الكتاب، بعدها بدأت افتح تجميعات طبعا اهم شي اهم شي التجميعات اول ماتخلصون تاسيس حلوا اسئلة كثيييرة لان التدريب هو سبب النجاح.
بالنسبة لي التجميعات يلي ذاكرت منها كانت غشام وكنز وسايفر ويلو، هو في كثير غيرهم اذا حابين تزيدوا مايضر اكيد

رابع شي واهم شي التوتر صدقوني التوتر هو سبب البلا
اول محاولة كنت متوترة مرة بس الحمد لله جبت ٩٩ بس اقولها لكم لا تتوترون ورح تجيبون ال ١٠٠ نفسي بإذن الله

حاولوا تحجزوا على فترتين عشان تكون الفترة الاولى تدريب لكم وتستوعبون الاختبار كيف يكون
لا تحجزون اول يوم ابدا عشان تقدرون تشوفون التسريبات حقت الايام يلي قبلكم
احجزوا ثاني او ثالث يوم مثلا

وبس والله اتمنى اني فدتكم والله يوفقكم يارب، احنا خلص درونا والحين دوركم شدوا الهمة ولاتخلوا شي يحبطكم لان مافي شي يستاهل بهالدنيا غير نفسك 🤍

🌟تجربة 89: 👇🏻👇🏻

"ما شاء الله"
أهلًا دفعة 2025 معكم جوري حاصلة على 💯 في التحصيلي الحمد لله كنت في الماضي داخلة هذي القناة وفنفس مكانكم أقرا التجارب وأتخيل يجي اليوم الي أنزل فيه تجربتي
مبدئيًا أنا اختبرت فترة أولى فقط ويعتبر تهور بس عندي أسبابي.

١- الجانب الديني
تأكدوا إنه وما توفيقكم إلا برب العالمين ادعوا وذكروا أهلكم يدعون لكم دايم وألحوا دومًا فما ذلك على الله بعزيز والله الله بالوتر.

٢-مدة المذاكرة
أنا بديت من بدري مرة عشان تحصيلي البترول بس كانت متقطعة جدًا لو بجمع الأيام الي فيها مذاكرة بجدية بتكون 3 شهور صدق كافية، ولو أساسك مو واثق فيه خذ احتياط 6 شهور+البعض ياخذ وقت عشان يفهم كيف المفروض يذاكر فطول المدة مو ضدكم.

٣- المصادر
من وجهة نظري مصدرين كانوا كافين
-تأسيس يلو مع تجميعاته، بفلوس وما ندمت عليه جدًا فادني
-غشام
ولو تبغى تزيد فلك الحرية
لكن ذولا فعلًا الي فرقوا معي

٣- طريقة المذاكرة
~ تأسيس
أول شيء ماله داعي أبدًا تشوفون محاضرة في شيء أنتوا فاهمينه لكن لو حاسين بضعف في نقطة معينة ارجعولهم ويلو من وجهة نظري اختاروا نخبة المعلمين
فيزياء -> فرح ابراهيم
كيمياء -> محمد العمري
رياضيات -> نادية بدوي/ وائل السيد
أحياء -> أحمد سكول (للأسف ما يشرح يلو)

~تجميعات
بعد ما تخلصون التأسيس وتنتقلون لمرحلة التجميعات، أنصح وبشدة تحلونها من قناة "كويزات يلو" يوفرون نفس أسئلة الدرس لكن ككويزات وبعدها تشوفون أغلاطكم كنت مسوية قناة خاصة بأغلاطي
ذا الشيء مرة فرق بمستواي لأنه الكويزات تحطكم تحت ضغط وتعرفون بالضبط وش محتاج تطوير فيكم، للأسف ما اكتشفت قناة كويزات يلو إلا عالأخير فما لحقت أسوي هذي الحركة إلا مع الأحياء فقط وصار لعبة في اليد الحمد لله بعد ما كان أزمة
وقبل اختباري شيكت على تجميعات غشام مهمة ولو كنتوا مخلصين يلو بتخلصونها بسرعة


٤-المراجعة
راجعوا أغلاطكم الي حفظتوها من الكويزات
وعيدوا في التجميعات دايم هي الي بتفرق أكثر من التأسيس
تأسيس الأحياء هو الشيء الوحيد الي الرجوع للتأسيس حقه مهم

٥-قبل الاختبار
توكلوا على الله ولا تصيرون زيي الصدق لآخر لحظة كنت أراجع أخطائي في الأحياء بس الأفضل يكون الشخص في اليوم ذاك مخلص بنسبة 100% وما وراه شيء

٥-التصحيح المعياري
لا تسمعون أبدًا لسوالف المعياري ترا التصحيح عادل وكل الي حولي نقصوا بحد متناسب مع أغلاطهم وفيه منهم الي غلط وجاب مية، أنتوا مذاكرين مذاكرين في النهاية الفكرة ذي لا تحبطكم
وبس أي سؤال تواصلوا معي @jjxo7

🌟تجربة 88: 👇🏻👇🏻