صيدلة SY-Tour

هلق اليوم ما رح بعطيك معلومة بتستخدمها انت .... رح بعطيك معلومة ممكن تتعرضلها او تسمع فيها

التهاب المثانة الو اسباب كتير وعلاجات مختلفة وبمقدمتها النتروفورانتوئين

يلي رح بخبرك عنو
انو الكلورهيكزيدين بنعرف انو استخدامه خارجي .. بس انت لا تستغرب اذا انطلب لمريض معو التهاب مثانة !؟

عفوا .. عيد عيد 😅

اي يستخدم لغسل المثانة عند مرضى التهاب المثانة، خاصة المرضى الملازمين للفراش عبر القثطرة البولية "يلي غالبا المريض مركبها بشكل دائم لان هوي قلنا بالفرشة"

يعني اذا اجتك وصفة او سمعت هيك حالة .. لا تستغرب .. التداخل الطبي صحيح مية بالمية

يلا حاج لهون .. سلام يا أعزاء

شوف .. عندك فترتين دايما بتكتر فيهن شكوى الاسهال

يسعد هالمسا ❤️

بالصيف وبايام الجمعة بتكتر المشاوير ف بتكتر شكاوي الاسهال
شو الرابط ؟

بالاول عنا عدة أنواع من الإسهال بس رح بركز اليوم ع الاسهال الطفيلي .. بس شو الرابط بالمشاوير !؟

انتبه معي .. الاسهال الطفيلي احد اهم اسبابه الخضراوات الورقية غير النظيفة .. يعني !؟
طلعت مشوار والاكل مو نضيف .. احتمال كبير اسهال طفيلي

نفس الحالة اذا جبت الخضرة عالبيت وما كانت نضيفة وما غسلتها منيح

طيب بهالحالة شو !؟

العلاج فلاجيل "ميترونيدازول" .. بس ركز معي بفكرة كتير منيح
العلاج 500 ملغ تلت مرات باليوم لمدة 7 ايام
كم يوم؟
يلا برافو عيدها ..
حبة عيار 500 ملغ 3 مرات باليوم لمدة 7 ايام
لمدة 7 ايام

ليش ؟
اذا كان عندك اصابة طفيلية بالمتحول الزحاري وعالجت ل 3 ايام .. شو صار !؟

احتمال العدوى تصير مزمنة والعلاج اصعب

طيب انتبه معي عفكرة تانية
اذا ما عرفت الاسهال جرثومي او طفيلي .. هون كمان استخدم فلاجيل
ليش ؟

لان الفلاجيل فعال ع الاصابات الجرثومية والطفيلية .. يعني مختصر مفيد ..الفلاجيل فعال بالحالتين

جهز حالك بكرا تصرف فلاجيل

هلق يلا سلام

كتير احيان رح بينقطع صنف معين .. هون حديثي عن اسم تجاري معين وفي بديل لشركة تانية

طيب انت بهالحالة شو تتصرف

لما بتكون علميا قوي .. وفي ثقة بينك وبين المريض "او احيانا بيقولو سيطو سابقو" .. هون انت قادر تقنع المريض بالبديل بسهولة

احيان بيجيك ابو احمد وبقلك والله ام احمد ما بترضى غير بنفس الاسم .. "ويمكن ام احمد بريئة من الادعاء .. بس ابو احمد ما رضيان يغير الدوا"

هون انت يا اما بتاخدو بحلمك وبتشرحلو ع مهل .. يا اما بتخليه يحاكي الدكتور

بس حط ببالك ان مو دايما الدكتور رح بيرضى معك

ف الحل !؟
ابني حالك علميا صح .. وخليك من يلي سيطن سابقهن .. هيك بتضمن تعامل مريح مع المريض بالصيدلية

يسعد مساكن

#ملازمة #نسائية
يعتبر من الادوية الجديدة نسبيا بالسوق
والاسم قريب كتير من الاستخدام
وشغال بنسبة جيدة اذا بدنا نعمل مقارنة بوصفه من قبل الدكاترة

اعتبر حالك بالصيدلية وهاد دوا جديد

واجيتك وصفة وانت متدرب بصيدلية ومابتعرف الدوا او صاحب الصيدلية طلب هاد الدوا او لا

هون ممكن تسال عن سبب الوصفة او تشوف اختصاص الدكتور عالوصفة

عرفت انه نسائية
والصيدلية عندك مرتبة حسب التاثير
ببساطة بتروح عقسم النسائية
موجود بتعطيه منو
مو موجود بتكتبه منشان طلبية جديدة

خبرني بطريقة بتساعدك بالبحث عن الادوية الجديدة بالصيدلية

مبارك وكتير بتعرفو ليش

مبروك دكتورة رنا 😁

#ملازمة #حامل

ما بيمر يوم الا وبتشوف بوست عن الحمل بغروب هون وهنيك .. وما بمر يوم الا واحتمال تتعرض لهالموقف كتير كبير

هالدوا امن ؟ .. عطيته بالغلط .. شو رح بصير !؟

تعال انتبه معي شوي
اذا قسمت الحمل ل 3 اقسام .. على اعتبار كل قسم 3 اشهر
بالتلت الاول بيتشكل الجنين والاعضاء وبالتالي التشوهات بهالتلت غير عكوسة بالغالب .. وهيي الاخطر
التلت التاني بقلك انا أروق
التلت التالت .. بقلك أنا ممكن أحمل مضاعفات خطيرة بس أقل من الأول
وطبعا بيبقى الأمر حسب الدوا

بالأسئلة عالغروبات عن هالدوا وهداك والخ ..
متل ما بعلم طلابي .. دايما خلي المقياس فائدة خطر .. ويلي بترجحلو الكفة .. هاد هوي
بس يا ترى فائدة/خطر .. أنت بتقيسها

هون خدلك فكرة صغيرة
الأدوية المشوهة والخطيرة تصنيفها X .. ما بتنعطى وخالصين
و الباقي .. بقلك إذا تصنيفها A, B, C, D بقلك بالمختصر كلها إذا ممكن بلاها أحسن .. والتصنيف أنت أكيد بتعرف درجات أمانه

هلق إذا غلطت وعطيت دوا X لحامل ... الله يسامحك ع غلطة لا تغتفر
و إذا من باقي التصنيفات .. روق روق واهدى .. وراجع الدوا تصنيفو واثارو .. لقيت غلط لحق المريضة

بالاخير بختملك بفكرة ... الحامل انت مانك مخوَل ولا مطلوب منك تحمل مسؤوليتها .. لو كان باستشاره شفهية من طبيبها او اتصال .. خاصة اذا شكيت باختيارك او ما كنت متاكد.. هيك انت بأمان و هيي بأمان

ولتتجاوز السيرة .. بسيطة .. اعطيها رايك وقلها بفضل نتاكد من دكتورك ... هيك كمان رح بتحط دكتورها بفكرة انها اخدة دوا معينة.. في حال لا سمح الله صار عندها عرض معين

سلام

احيانا بيخطرلنا انو ناخد قسم من الامبولة او بتكون الحالة المرضية بتستدعي انو ناخد قسم من المادة الدوائية فقط

طيب بهالحالة انا كيف بعرف العيار
معلومة ع بساطتها هيي مهمة كتير .. فينا نقول شغل ساعتها 😅

غالب الامبولات يلي هيي وحيدة الجرعة بيتم تحديد التركيز فيها "العيار" بناء عالامبولة كاملة .. يعني هالتركيز هاد بالامبولة كلها


بشوف مثلا امبولة الديكلون فيها 3 مل وتركيزها 75 ملغ.. هاد بيعني انو الامبولة كلها فيها 75 ملغ

نفس الحكاية لما بنطبقها ع امبولة الفومي كايند "اوندانسيترون"
بلاقي امبولة عيار 8 mg حجمها 4 مل للكبار
وامبولة عيار 4 mg حجمها 2 مل للاطفال

هاد كيف ممكن يفيدني كمان !؟

بهالحالة هي انت لما بتحتاج امبولة للاطفال وخالصة من عندك صرت بتعرف تتصرف

ورجوني التفاعل .. و هلق سلام

#ملازمة #تنفسية
رشح ولا زكام ولا انفلونزا ولا التهاب بلعوم ولا ... ااا

شتت الدني .. جنب الشوربة يلي بتطبخها امك ك تقاليد شتوية .. عندك كمان الزكام او التهاب الحلق

تعال معي لنميز شوي صغيرة بين عدة مصطلحات ما بيمر يوم بالصيدلية الا بتمر عليك عدة حالات منها

التهاب الحلق او الزكام .. والتاني انفلونزا و التالت التهاب مجاري تنفسية علوية "وطبعا مشان ما حدد ممكن يكون لوزات وممكن يكون بلعوم و .. تطول القائمة"

لتفرق بينهن انت بحاجة شي يميز كل واحد

حالات كتيرة هيي بتقلك انا زكام او نزلة برد .. ما مهم الاسم المهم هون ما عندي حرارة غالبا وفي حال عندي هوي دفء مو حرارة واضحة .. وبهالحالة هي .. بدي صاد حيوي !؟ .. برافو عليك ما بدي
طيب معقول يطلع وما اعملو شي !؟ ... لا اكيد في دوا بخفف الاعراض .. يعني ما رح خلي المريض يطلع من عندي  الا استفاد ورح يدعيلي فوقها كمان

عندي 4 منتجات دوائية بتفيدو
هوي اصلا معو تخريش حلق والم اثناء البلع
رجاع ركز .. قلتلك بالفيديو صعوبة البلع شي والم البلع شي تاني
شو معو هاد ؟
الم بالبلع وليس صعوبة بلع
طيب الحل !؟
بعطيه مخدر موضعي ..
هون عندي تركيبات متعددة وطبعا انا عم بحكي عالادوية .. ما عم بحكي عالمنتجات التانية
المهم شوف الصورة .. وبتعرف تركيبها واستخداماتها عرفتها من البوست

بحالات الانتانات الفيروسية او بالاحرى الانفلونزا هون عنا حرارة اكيد .. و ممكن كتير يكون مترافق مع التهاب ملتحمة فيروسي "احمرار عيون" وهاد مميز الو .. اضافة للسعال وبغالب الاحيان كمان جاف ... شوووو؟ . جاف لا تنساها
هون بقلك انت بتعالج الاعراض .. مابدك صادات بالحالة العادية .. احيان بتحتاجها للوقاية

حطلي ببالك شغلة .. المريض المدخن ممكن ما ينطبق عليه السعال الجاف

ضل عندي واحد هوي الجرثومي .. هون اول شي بدي صاد حيوي .. و البداية ابطئ من الفيروسي .. وعندي حرارة .. وعندي اعراض .. وعندي سعال منتج بالغالب .. شووو . منتج


لهون انت صرت بتعرف تفرق بينهن .. يعني المريض يلي بيجيك بدو دوا .. صرت بتعرف تسألو وتاخد قصة مرضية وبعدها توصف الدوا الصح

طيب انتبه معي ع كم فكرة زيادة
اول شي تذكر معي لما قلتلك بفيديو الامراض التنفسية بالملازمة .. ان علاج الاعراض المرافقة للامراض التنفسية .. علاج عرضي

رجاع قراها مرة تانية ... بالامراض التنفسية بعالج اعراض .. شووو .. اعراض
يعني مثلا
احتقان بعطي مضاد احتقان
سيلان انف بعطي مضاد هيستامين
سعال بعطي مقشع او مضاد سعال حسب الحالة
والخ .. يعني شو التركيبة الافضل لدوا الرشح ؟ .. بقلك ما بعرف
ليش ما بعرف .. لان حسب اعراض المريض التركيبة بتناسبو ما بتناسب غيرو

الامتحان الوطني الموحد معنا

اذا مانك مستعد اله
مارح تكون جزء من الكورس

هاد كلام كبير رح يتوضح بعدين

المهم حاليا خود استراحة شوي
وبس يكون الوقت مناسب منخبرك بكلشي

#ملازمة #هضمية
تركلي يلي بايدك .. وتعال فضيلي حالك شوي
اليوم رح نعلي العيار نتفة

مبارح بعد البوست سألني حدا ليش الغليسيرين عياراته هيك .. رح بخبرك الحكاية هون

رح بلش معك اول شي بالعالمي .. وهون عندك حسب المراجع بتستخدم غليسيرين بهالجرعة

تحاميل 1g للعمر فوق الشهر تحت السنة

تحاميل 2g للعمر من سنة ول 12 سنة

تحاميل 4g من 12 سنة وأنت طالع

طيب .. تذكرلي كم شغلة .. الغليسيرين شره للماء .. يعني استخدام التحميلة مباشرة بيعمل تخريش
والحل !؟
بنغط التحميلة بالماء قبل الاستخدام مباشرة

تاني شي ما بستخدم تحماميل الغليسيرين اكتر من اسبوع

تالت شي الخروج بصير بعد 15 دقيقة

هلق هون رجاع انتبه معي زيادة

بدي تعرف ان التحاميل هي وزن التحميلة مو المادة الفعالة
فالمادة الفعالة شو تركيزها ؟
1g = 700 mg
2g = 1400 mg
4g = 2800 mg

طيب رح بتقلي ليش بدي اعرفهن وضيع فيهن؟
ببساطة لان ممكن تشوف غير العيارات يلي فوق

بالاخير رح بخبرك ان الغليسيرين بالسوق السورية بيجي بعيارات
1 g
1.3 g
1.6 g
2 g
2.1 g
3 g
4 g

وهلق سلام

لما بيجيك مريض معو امساك
رح نعطيه دوا للامساك

هون طلب المريض لاكسين "بيزاكوديل" او غيره من مشابهاته .. هيدا الدوا فعليا هوي فعال وبيعطي نتيجة فورية ..
لكن لازم تنبه المريض ان ما بصير ياخدو دايما لانه نفسه الدوا يلي عم بيروحلك الامساك .. رح بيعملك امساك .. ليش !؟

لان الامعاء رح بصير فيها كسل وتتعود ما تخرج الا اذا اخد الدوا .. وهاد الشي غلط

فانت هون لما حليتلو مشكلتو .. ضروري تقلو يا زبط اكلك وحركتك ..
لان الامساك جاي من ورا قلة الحركة والاكل يلي مانو صحيح ..وهاد الشي غالبا رح بكون عند كبار السن

عندي خيار تاني اوصفله لاكسيفيت لانه بيخفف من صلابة البراز .. بس ضروري نبهه ان ما بيشتغل فورا

لا تنسى ان عندك كمان خيار تحاميل الغليسيرين
حكيتلك هلق بالمختصر .. وبعدين رح بكملك .. وهاد الشي اذا انت موجود معي بكورس الملازمة .. فأنا شرحتلك ياه بالتفصيل


انت شايف الحكي الفوق مو الهدف منه المعلومة بس بدي تركز منيح بكلشي بينزل
لانه هون واجبنا نتعلم سوا كيف نحكي بطريقة صحيحة بالصيدلية

كوني شفت كذا بوست بغروبات الصيادلة عن السعلة ..... وكونو الموضوع كان بحثي بالماستر .. ف رح بعطيك منو الزبدة  .. كمل معي

عندك بين الأدوية النباتية تلت تركيبات  هوستاجل وبروسبان وازماهيرب

بلش معي بأول واحد

الزعتر "هوستاجيل وتايمكس"
الزعتر فعاليتو للسعال المنتج اكبر بكتير لان اله دور مقشع .. يعني استخدامه خليه ببالك للسعال المنتج

تعال خود معلومة زيادة .. بقلك الهوستاجل انا الي فعالية ودية ... يعني اذا شفت المريض معو احتقان او بحاجة موسع قصبي .. خلي الهوستاجل ببالك

دخلك لا تنسالي العلاقة مرضى الضغط والفعالية الودية !؟ .. ما منيح كتير الهن

عطيه من عمر السنة وما رح بتلاقي منو غير شراب

التاني هوي اللبلاب "بروسبان او سيسبان"  .. اللبلاب فيه سابوني..... ما بدي كفيلك .. كمان اله فعالية مقشعة .. يعني الاحسن تعطيه كمان للسعال المنتج

بس حط ببالك شغلة .  يمكن تشوفو بوصفة السعال الجاف ومو غلط هاد الشي

بتشوف البروسبان شراب وتحاميل .. و بتعطيه لكل المرضى
يعني كبير . صغير . حامل . مرضع . طفل . مريض ضغط . مريض سكري . .. لا تسال اعطيه وانت مغمض كمان

الاخير هوي اسمو التجاري ازماهيرب .. وهاد يا عزيزي بيحتوي ع اول نبتة يلي هيي ... الخ
فيه تلت نباتات .. اسمها ما بهمك هلق بهمك تعرف ان هاد الدوا .. للسعال الجاف
عيدها .. للسعال الجاف

عطيه من عمر السنة ... بس هون بدي تنتبه ع شغلة .. مانو امن للجميع
حامل ومريض الصرع والقرحة لا تعطيه ازماهيرب

بتشوفه شراب وكبسولات

وهلق سلام

بكتير وصفات احيانا بتستغرب منها واحيانا المريض بيعملك المشكلة باستغرابك

لهلق بذكر شحص حكالنا قصة عن ان الوصفة تامسولوسين "يستخدم لضخامة البروستات الحميدة" و الوصفة بالاساس لأنثى

هلق أنت لأنك شاطر فورا رح بتقلي أن الامثى ما عندها بروستات يا ترى كيف الحكي بيزبط

بيجي حدا اشطر منك بيقلك هوي مو بس للبروستات ..

طيب كمل معي .. التامسولوسين حاصر الفا .. يعني شو بيعمل بالعضلات الملساء .. بريحيها بالجهاز البولي
برافو عليك .. خليها ببالك .. بيرخي المسالك البولية

طيب الفكرة وين .. انا بقلك .. عد معي

بحالات الرمل ممكن يصير تشنج بالمسالك البولية وحرقة تبول .. التامسولوسين بساعد بعلاجها وتخفيفها

بحالات البحصة . كمان بصير عنا تشنج ... شو بيعمل التامسولوسين .. كمان بخفف الالم وبقلل التشنج

بحالات التهاب المجاري البولية كمان بصير عندي تشنج .. والتامسولوسين بحلها وبخفف التشنج والالم والحرقة

شايف كم مرة عدتلك ياها .. .. ما لازم بقى تنساها

سلام