|شعر اوجاغی| @sheirocagi Channel on Telegram

|شعر اوجاغی|

@sheirocagi

⚠کپی یالنیز قایناغیلا⚠

‍ شعر اوجاغی‌نین قوراللاری:
▫️آزربایجان ادبیاتی
▪️تورکیه ادبیاتی
▫️دونیا ادبیاتیندان چئویرمه‌لر
▪️ادبی بیلدیریش‌لر
▫️ادبی تانیتیم‌لار
▪️اوشاق ادبیاتی
▫️دانیشان شکیل‌لر
▪️دیالوق
▫️موسیقی.

ایلگی:
@memmed_pasha
اینستاگرام:
sheirocagi

|شعر اوجاغی| (Persian)

شعر اوجاغی یک کانال تلگرامی است که به ادبیات و شعر متنوع اختصاص داده شده است. این کانال شامل متون شعری و ادبیاتی از مختلف کشورها و فرهنگ‌ها می‌باشد. اگر علاقه‌مند به کشف زیبایی‌های شعر و ادبیات جهان هستید، این کانال مناسب شماست. از جمله انواع شعر و ادبیاتی که در این کانال قرار می‌گیرد می‌توان به ادبیات آذربایجان، ترکیه، ادبیات جهانی، ادبی بیلدیریش‌لر، ادبی تانیتیم‌لار، اوشاق ادبیاتی، دانیشان شکیل‌لر، دیالوق، و موسیقی اشاره کرد. بنابراین، اگر دوست دارید با تنوع فرهنگی و ادبی جهان آشنا شوید، حتما این کانال را دنبال کنید. برای اطلاعات بیشتر و عضویت در این کانال می‌توانید با آیدی @memmed_pasha در تلگرام و صفحه اینستاگرام sheirocagi در ارتباط باشید.

|شعر اوجاغی|

18 Jan, 15:03

▫️اؤلمه‌رم.

اؤلوم، منی نه بئله‌جه هرلَرسن؟!
من بیر عؤمرو سورمه‌یینجه اؤلمه‌رم.
اؤز آناما، اؤز تانریما بورجوم وار،
آلدیغیمی وئرمه‌یینجه، اؤلمه‌رم.

نه ایسترسن جان آغاجیم قورویا،
عارض اولوب نه گیرمیسن آرایا؟
سن اؤله‌سن، ایل کرپیجلی سارایا،
یوز نئچه‌نی هؤرمه‌یینجه، اؤلمه‌رم.

قاری دوشمن، بو نه قورخو کینوسو؟!
نئچه‌یه‌دی بو مؤهلتین کیلوسو؟
دهره‌له‌ییب درد بیتیرن کول-کوسو،
سرگی‌لیگه سرمه‌یینجه اؤلمه‌رم.

نه دیلرسن سۏلوخوبان سۏزالیم،
آخی نییه چارپاز داغ‌لا یازیلیم؟
اکدیگیمی بیچمه‌یینجه، آ ظالیم!
سپدیگیمی درمه‌یینجه اؤلمه‌رم.

قوجا قولدور، منی آزجا قارالا!
اینانمیرام اینام ساپی قیریلا.
توفان قوپا، ایکی دونیا بیر اولا،
گؤزلَنجیمی گؤرمه‌یینجه اؤلمه‌رم.

کؤنول‌لردی منیم ائویم-ائشیگیم،
کؤنول اولسون آخیرینجی بئشیگیم.
قورخورام کی قبیرده‌ ده اوشویوم،
اورک‌لره گیرمه‌یینجه، اؤلمه‌رم.

#آغا_لاچینلی
#شعر_اوجاغی
@SheirOcagi
135
|شعر اوجاغی|

18 Jan, 10:40

▫️بیر قیش صاباحینین ایشیغیندا،
«مونسوری» پارکیندا
«پاریس»ده
«یئر اوزو»نده
منی اؤپدون،
سنی اؤپدوم.

سونسوزلوغون او لحظه‌سیندن دانیشماغا
مین ایل، مینلرجه ایل
یئتمز.

#ژاک_پره‌ور
#شعر_اوجاغی
@SheirOcagi
166
|شعر اوجاغی|

17 Jan, 20:01

▫️هر شئی سنی گؤزله‌ییر.
هر شئی سنین گلمه‌یینی،
ایچری گیرمه‌یینی،
سنین الینین دَیمه‌سینی،
گؤزونون توخونماسینی.
و هر شئی تکرارلاییر
سنی نه چوخ سئودیگیمی.

#جمال_ثریا
#شعر_اوجاغی
@SheirOcagi
262
|شعر اوجاغی|

17 Jan, 18:47

▫️بو گئجه

داریخمیشام سئوگی دولو سؤزونه،
آل کؤنلونون اوتاغینا بو گئجه!
یالواریرام آی بولودا بورونه،
بیر سیغینام بوخاغینا بو گئجه.

گل آلداداق، دان اولدوزو چیخماسین،
یاد باخیشلار سئوگیمیزه باخماسین!
تاپشیر گؤزون دالغالانیب آخماسین،
قوناق اولوم یاناغینا بو گئجه!

قوی گؤز اولوم گؤزلرینه تیکیلیم،
یا ساچ اولوم گردنینه بوکولوم،
یا دا اهمال یاناغیندان اکیلیم،
گولوش اولوم دوداغینا بو گئجه!

«کؤنول» اولوم، اوره‌یینه بله‌نیم،
ایذن وئرسن، من قاپیندا دیله‌نیم.
تورپاق اولوم، آستانانا اله‌نیم،
بلکه دیَم آیاغینا بو گئجه.

#فاطمه_عبدی_کؤنول
@SheirOcagi
308
|شعر اوجاغی|

17 Jan, 17:43

▫️سئویرم سنی، فخر ایله،
باشیمی دمشقین گونبذلری کیمی،
میصرین میناره‌لری کیمی،
اوجا توتاراق.

#نزار_قبانی
#شعر_اوجاغی
@SheirOcagi
264
|شعر اوجاغی|

17 Jan, 15:02

▫️بعضی‌لر شعره،
بعضی‌لر ماهنییا،
بعضی‌لر فیلمه،
بعضی‌لر ده کیتابا سیغینیر؛
آما چوخداندیر، اینسانلار بیر-بیرینه سیغینمیر‌ داها.

#اوغوز_آتای
#شعر_اوجاغی
@SheirOcagi
432
|شعر اوجاغی|

17 Jan, 12:28

▫️یئری‌دی.

سووانیب دؤرد یانی آسما ساعاتین،
اوره‌ییم دیواردا ساعات یئری‌دی.
سنسیز گیزلی-گیزلی آغلایان گئجه،
اویوموش دیله‌یین یویات یئری*دی.

بو تالان کؤنلومو طاماح شاشیردیب،
دئیه ده بیلمیرم عیناد یئری‌دی.
سوچوم مله‌ییمی مندن قاچیردیب،
چیینیمین چالاسی قاناد یئری‌دی.

#آغا_لاچینلی
* اؤلو یویولان یئر
#شعر_اوجاغی
@SheirOcagi
304
|شعر اوجاغی|

17 Jan, 08:02

▫️کئشکه سن من اولسان،
سنی سئومه‌نین نه قدر چتین اولدوغونو آنلاسان!

کئشکه من سن اولسام،
بو قدر سئویلمه‌نین دادینی چیخارسام!

#اؤزدمیر_آصاف
#شعر_اوجاغی
@SheirOcagi
325
|شعر اوجاغی|

17 Jan, 07:28

كأنه بالحسن صورة يوسف
وكأنني بالحزن مثل أبيه

▫️او،
گؤزل‌لیکده سانکی یوسیف ایدی،
من،
اوزونتوده یوسیفین آتاسی.

#ابن‌فارض
#شعر_اوجاغی
@SheirOcagi
386
|شعر اوجاغی|

16 Jan, 18:50

▫️من بیر تهر یاشاماق ایسته‌ییردیم،
سن باشقا بیر تهر.
اورتاق بیر کئکیمیز اولماغی باجارمادیق،
اؤزوموزو یئدیک.

#راجر_مگاف
#شعر_اوجاغی
@SheirOcagi
341
|شعر اوجاغی|

16 Jan, 17:54

▫️منم

بیر گونش وار، بیرجه‌نه آی،
ایکیسینین بیری منم.
تانریسینی تانییانین،
سیرداشی من، پیری منم.

اوره‌ییمده ایستک اینلر،
نه دۇیاجاق دلی جینلر؟!
آد قۏرودوم- دئمه‌سینلر،
آریلیغین کیری منم.

اوغراسام دا چوخ سئللره،
جان یاندیردیم بو ائللره.
گوج اکمیشم کؤنوللره،
ائل قۏلونون گیری منم.

یاغؽسی‌یام یامان دئوین،
وارلیغیما سن ده سئوین!
دوغما یورددا دۇران ائوین،
دیره‌یی من، تیری منم.

الیم تانری یازارؽدی،
سؤزوم دردین آزاری‌دی.
ایندی یالتاق بازاری‌دی،
ایره‌لیده ایری منم.

قاپان اؤلوم، اؤپن اؤلوم،
کؤپک کیمی کؤپن اؤلوم،
منی یئره تپن اؤلوم!
اؤلو سنسن، دیری منم.

#آغا_لاچینلی
#شعر_اوجاغی
@SheirOcagi
374
|شعر اوجاغی|

16 Jan, 14:38

▫️آی ایشیغی هاردایدی؟!
سنسن یئنه ایشیق ساچان.

#کنستانتین_کاوافی
#شعر_اوجاغی
@SheirOcagi
334
|شعر اوجاغی|

16 Jan, 10:08

▫️من الدن-آیاقدان دوشن بیر قیشام،
سن گولو بورنوندا، مورگولو یازسان.
اریییب-اریییب سنه هوپموشام،
منی، ایسته‌سن ده اونودامازسان.

نه واخت آرزولادین، حسرتی قوودوم،
آچمادیم یولونو بیرجه یاسین دا.
بئش-آلتی دیَرلی خاطیره قویدوم،
کؤنلونون امانت کیتابچاسینا.

تاپشیریب گئدیبلذ بیر سورو درده،
منی دوغولاندان قارالاییبلار.
سن تزه دئییلسن، سنه قدر ده،
قلبیمی چوخلاری یارالاییبلار.

هانی او سئوگینین اومید قاطاری؟
پولاد رئلسلرینی دیشیم‌له دیدیم.
یادیندا قالیبسا، دئ بیلیم، باری،
من سنی سئونده آییق‌می ایدیم؟!

سن بو آیریلیغین رسمینی چکدین،
چالیش کی هئچ زامان دوشمه‌ییم یادا!
اونسوز دا یاشایا بیلمه‌یه‌جکدین،
من آدلی بیر اوجوز یاتاق‌خانادا.

اولور دا... حیاتدی... بوش وئرک، نه‌سه
نه من ایت دئییلم، نه ده سن پیشیک.
آزمی دایانیب دا نفس-نفسه،
مئساژ قوتوسوندا گئجه‌له‌میشیک؟

کؤنلومدن-کؤنلونه بیر ایپ چکرسن،
سریب قورودارسان و او یاش عشقی!
مندن یاخشیسینی تاپسان اگر سن،
وئرَرسن گئیینر بو نیمداش عشقی!

#آیاز_آراباچی
#شعر_اوجاغی
@SheirOcagi
391
|شعر اوجاغی|

16 Jan, 09:54

▫️نه قیسادیر عشق،
نه اوزون‌دور اونوتماق!

#پابلو_نئرودا
#شعر_اوجاغی
@SheirOcagi
351
|شعر اوجاغی|

16 Jan, 06:43

▫️اورک باغلادیغین اینسانین وورغونو اولاجاقسان.
بس اورک باغلاماغا دیَن بیر سئوگیلی سئچ!

#ابن‌فارض
#شعر_اوجاغی
@SheirOcago
375
|شعر اوجاغی|

15 Jan, 20:20

▫️الویداع روحومون یاز سئور قیزی
گئدیرم اؤزوم‌دن اوزاغا ساری!
قیشا دوشوب یولوم گونش ده یوخدور
کؤلگه‌مین چیینینه سؤیکنم باری

الویداع ایچیمده اؤلن قیزجیغاز
باغیشلا ازدیره بیلمه‌دیم سنی
اوقدر ازدیلر دویغولاریمی
اؤزوم ده اونوتدوم منده‌کی منی

گئدیرم شه‌هریم خوشجا قال سن ده
منه بیر قبیرلیک یئرین اولمادی
گئدیرم کیمسه‌سیز، گئدیرم سس‌سیز
هئچ گول منیم کیمی، واختسیز سولمادی

گولورسه دوداغیم، کؤنلوم یاسلی‌دیر
آغلادیب گؤزومو سیلمه‌ین‌لر وار
بیر یوللوق آتیرام دونیانین داشین
گئدیرم! گؤروشه گلمه‌ین‌لر وار...

الویداع گنج‌لی‌ییم، تامارزی قلبیم
آرزوما چاتارام آنجاق مزاردا
سیز قالین، من گئدیم، ایش بئله گلدی
منه کی ازل‌دن ترسه‌دی دونیا...

#سیما_نعمتی
@SheirOcagi
415
|شعر اوجاغی|

15 Jan, 20:13

▫️واختینی، آچیقلاما وئرمک‌له کورلاما! آداملار ساده‌جه ائشیتمک ایسته‌دیکلرینی ائشیدیرلر.

#پائولو_کوئیلو
#شعر_اوجاغی
@SheirOcagi
375
|شعر اوجاغی|

15 Jan, 20:03

▫️اولور دا گؤروشه بیلمه‌سک،
اولور دا سؤیله‌یه بیلمه‌سک،
من سنی چوخ سئودیم...
منی اونوت، بونو اونوتما!
اوتوز عؤمور کئچسه ده عؤمرومون اوستوندن،
یئنه صاباحیم کیمی سئوه‌رم سنی.

#جان_یوجل
#شعر_اوجاغی
@SheirOcagi
373
|شعر اوجاغی|

15 Jan, 17:38

▫️آیریلیم.

گلدیم وداع‌لاشام، سون گؤروشومدور،
ایذن وئر دویونجا باخیم، آیریلیم!
تیکیلسین گؤزلریم سون باخیشینا،
یاش کیمی گؤزوندن آخیم، آیریلیم.

قوی بو سون گؤروشده تیکیلیم قالیم!
بلکه رحمه گله کوسگون ایقبالیم.
ساچیندان بیر تئل ده امانت آلیم،
کؤنلومو یاندیریم-یاخیم، آیریلیم.

اوره‌ییم سئوگینه گیزلی بیر بوجاق،
اؤلونجه «کؤنول»ه قوناق قالاجاق.
اهمالجا یولا سال، دۇیماسین قولاق!
سون کره اۆزۆنه باخیم، آیریلیم.

#فاطمه_عبدی_کؤنول
@SheirOcagi
431
|شعر اوجاغی|

15 Jan, 17:06

▫️بوتون بدبختلیک‌لریمیزین توخومو، تکجه اؤزلری اوچون دوغرو اولانی یوخ، باشقالارین دا صلاحینی بیلدیکلرینه اینانان آداملارلا اوغراشدیغیمیز ایللرده اکیلیر.

#ویلیام_گلاسر
#شعر_اوجاغی
@SheirOcagi
397
|شعر اوجاغی|

03 Jan, 13:33

▫️بیر لاله‌رُخام، عشقیمه سلطان اولا بیلسن،
مندن قاچ اوزاق، وصلیمه مهمان اولا بیلسن!

ان اودلو بیر عشقین گولو آل اولموش، اونوتما!
قیسمت سئونه هجر ووصال اولموش، اونوتما!
عاشیق قانی معشوقه حلال اولموش، اونوتما!
وارسان‌سا، بویور، عشقیمه قوربان اولا بیلسن!

سن طفلِ دبستانسان، اوزاقلاش، تپَرین یوخ!
عشق عالمی بیر باشقا بلادیر، خبرین یوخ!
آغوشِ نجیبانه‌ده، آلدانما، یئرین یوخ!
گل، قیس ایله همدردِ بیابان اولا بیلسن!

دۆن سئو ده، بوگون باشلا همین هجره شکایت!
معنا آرا، بۇل، عشقده بوش وصله نه حاجت؟!
هر عاشیقه اومّید گونو وار اولسا قیامت،
گول اوندا دا سن، وصلیمه شایان اولا بیلسن!

هپ هجرده‌دیر، عشقین اگر وارسا صفاسی،
گون گلسه یاخین، بیر اود اولار نازلی ضیاسی،
عشقیم وئرر آنجاق سنه بیر ذوقِ اساسی،
عؤمرون بویو هجر ایله پریشان اولا بیلسن.

سن باده‌لر اُفتاده‌سی، قانون‌کشِ خلقت،
من بیر یئنی مفکوره‌لی نوزادِ طبیعت.
بیر چوخلاری‌تک وصل ده مومکون سنه البت،
آنجاق کی بدنسیز قۇرۇ بیر جان اولا بیلسن.


من شعرم اؤزوم، بیر داها اشعاره نه حاجت؟
من جانلی چیچک‌کن، اؤلو گولزاره نه رغبت؟
منسیز گوله، هپ شاعیرین اشعارینا لعنت!
لعنت سنه ده، بختوَر اینسان اولا بیلسن!

#جعفر_جاببارلی
#شعر_اوجاغی
@SheirOcagi
59
|شعر اوجاغی|

03 Jan, 09:52

▫️هانا دوز قاباغا باخیردی، باخیشلاری اوراداکی هر شئیی دلیب کئچیردی. غورورلو، یارالی، گیزَملی، یورغون، هئچ کیمسه‌نی و هئچ بیر شئیی گؤرمک ایسته‌مه‌ین بیر باخیش‌.

📚 قرائتچی
#برنهارد_شلینک
#شعر_اوجاغی
@SheirOcagi
101
|شعر اوجاغی|

03 Jan, 09:18

دیالوق

▫️- هئچ کسه حدّیندن آرتیق یاخینلاشما!
🎬 Fury
2014 آمریکا
#دیوید_آیر
#شعر_اوجاغی
@SheirOcagi
126
|شعر اوجاغی|

03 Jan, 08:53

▫️سن، گله‌جک بیرینین یوللارینی گؤزله‌ییرسن. من‌سه دؤنوشو اولمایان بیر یولجویا قوووشماغی.

📚 یانیق بوغدالار
#احمد_گون‌بای_ییلدیز
#شعر_اوجاغی
@SheirOcagi
119
|شعر اوجاغی|

02 Jan, 18:40

▫️«وان گوگ»ون گونشی

سحردن آخشاماجان،
گزدی آلتیندا گونون؛
گونشی گؤروب، دۇیۇب
فیرچاسینین گوجویله
دونیادا باشقا، یئنی،
بیر گونش آلماق اوچون.
یاندیردی وارلیغینی،
گونشین هر شوعاسی؛
قارالدی بت-بنیزی.
تؤکولدو دالغا-دالغا
سینه‌سینه، باشینا،
گونشین آل دنیزی.

قلبین اودو بیر یاندان،
گؤیون اودو بیر یاندان.
قورخمادی، چکینمه‌دی،
وان گوگ بو یان‌هایاندان.
باخماییب قیزمار گونون
آلووونا، کؤزونه،
ییغدی بیر اوجو گؤیده،
بیر اوجو یئرده اولان
قیزیلی شوعاعلاری
قابارمیش سینه‌سینه،
اوره‌یینه، گؤزونه.
یاپیشدی شوعاع‌لاردان
گونشی چکیب-چکیب
یئره سالماق ایسته‌دی.
گونشین قوجاغیندا
یانیب-یانیب یاخیلماق،
گونشین قوجاغیندا
بیر ابدی، وفالی،
ساکین اولماق ایسته‌دی.

آلیشدی، یاندی وان گوگ؛
بیر اوجو گؤزلرینده،
بیر اوجو گؤیده اولان،
کائیناتی دولدوران،
یانغینی عرشه دایاق
شوعالار آراسیندا،
رنگلرین افسانه‌وی،
قاریشیق دونیاسیندا.

گؤرنلر دوشوندولر:
«یازیق بئزیب حیاتدان،
اؤز جانینا ظولم ائدیر».

بیردن چؤکدو وان گوگون
ایشیغا، رنگه حریص
آلیجی گؤزلرینه
سانکی قوطبون ظولمتی.
وورموشدو محبّتین-
آلووویلا اونو گون،
قوووشموشدو وان گوگا
بیر داها آیریلماماق،
اوزاق اولماماق اوچون.

وان گوگ سندیرله‌یه‌رک*
اللرینی اوزاتدی،
گونشین گئجه‌سینه،
ظولمتین گؤیلرینه.
گونو توتوب اوخشاماق،
ساخلاماق آرزوسویلا.
ییخیلدی سونرا گونون
ظولمت اوجالیغیندان.
اۆزۆنه سو سپدیلر،
سؤنَرمی آرزو سویلا؟!
گونش سؤنرمی سویلا؟!

یامان یانیردی وان گوگ،
اوره‌یی های-هارایدا.
بیر گونش آلیشیردی
کؤکسونده کؤکسو‌ بویدا،
اۆزۆنده اۆزۆ بویدا.
قارسیمیش دوداغیندان،
هردن کؤز کیمی دوشن
سؤزونده سؤزو بویدا.

گئجه یاری‌یدی آرتیق...
قورتارمیشدی گؤروشلر،
خوش صؤحبت‌لر، گولوش‌لر.
تؤکولوردو وان گوگون
دوداغیندان آرابیر
خیردا-خیردا گونشلر:
- نییه باتدین، ائی گونش؟!
اۏدۇن وار، ایشیغین یوخ.
گل، گؤزومه دوش منیم،
ائی آغریسی-دردی خوش!
ائی یانغیسی وفالی!
ائی وارلیغیم، ائی جانیم!
ائی سئویملی دوشمنیم!

#علی_کریم
آیاق اوسته دورا بیلمه‌ییب ییرغالانماق
#شعر_اوجاغی
@SheirOcagi
212
|شعر اوجاغی|

02 Jan, 17:43

#موغان_منطقه‌سی‌نین_دؤردونجو_شعر_جشنواره‌سینین_چاغیریشی
«محیط زیست محوریّتی ایله»

♻️یاشیل موغانیمیزین دَیرلی و حؤرمتلی شاعیرلری؛
جشنواره‌نین شرایطین دقیق اوخویاندان سونرا، اثرلرینیزی بیزیم اوچون گؤندرین.
(محمد پاشاپور ۰۹۱۴۷۰۰۰۰۳۷)

پارساباد موغان شهرستانی‌نین اوستاد شهریار شعر و ادب انجمنی‌نین روابط عمومی‌سی
#موغان_شعری
@sher_mughan
186
|شعر اوجاغی|

02 Jan, 11:25

▫️ﺑﻮ ﮔﻮﻥ ﺗﻮﺭﭘﺎﻏﯿﻨﯽ، ﺩﺍﺷﯿﻨﯽ ﺳﺎﺗﺎﺟﺎﻕ ﺳﺎﺗﻘﯿﻦ
ﺻﺎﺑﺎﺡ ﺍﺅﺯ ﺩﻭﻏﻤﺎ ﻗﺎﺭﺩﺍﺷﯿﻨﯽ ﺳﺎﺗﺎﺟﺎﻕ ﺳﺎﺗﻘﯿﻦ
ﻧﺌﯿﻠﻪ‌ﺳﯿﻦ ﺳﺎﺗﻘﯿﻨﻠﯿﻖ ﻋﺼﺮﯼ ﺩﯾﺮ؛ ﺑﺎﻫﺎ ﺩﯾﺮ ﭼﺆﺭﮎ
ﺑﯿﺮ ﮔﻮﻥ، حیات ﯾﻮﻟﺪﺍﺷﯿﻨﯽ ﺳﺎﺗﺎﺟﺎﻕ ﺳﺎﺗﻘﯿﻦ!

#سعید_موغانلی
@SheirOcagi
331
|شعر اوجاغی|

02 Jan, 10:43

▫️قایغی‌لاریمیزین، اضطرابلاریمیزین یاریسی باشقالارین بیزه اولان باخیشلارینا باغلی‌دیر. بیز بو تیکانی اؤز ووجودوموزدان چیخارمالی‌ییق. باشقالارین باخیشی، هر آن دَییشه بیلن بیر بوش دوشونجه و یا بیر خولیادیر. باشقالارین باخیشی بیر ساپا بنددیر و بیزی اونلارا کؤله ائدیر، باخیش‌لارینین کؤله‌سی.

📚 شوپنهاورین درمانی
#اروین_یالوم
#شعر_اوجاغی
@SheirOcagi
296
|شعر اوجاغی|

02 Jan, 10:02

دیالوق

▫️- همیشه اوره‌ییم سنه داریخیر. هئچ واخت، بیر ثانیه بئله، سنی سئومکدن، سنی ایسته‌مکدن ال چکمه‌دیم...
📺 Scenes from a Marriage
2021 آمریکا
#هاگای_لیوای
#شعر_اوجاغی
@SheirOcagi
242
|شعر اوجاغی|

02 Jan, 09:48

▫️چووغون

چووغون قاری چالغولاییر¹،
سووروق² باسیر یولو، ایزی.
چووغون منی چولغالاییر³،
اوغولداییر قار دنیزی.

نه قورخونجدو بو یان-یؤره!
گئجه یاخین، شئنلیک⁴ اوزاق.
آز قالیر کی گؤزه گیره
آغزی‌قارا آج یالقوزاق.

قورد قودوروب آخشام-آخشام،
گیره‌له‌ییب اؤز اووونو.
او ایسته‌ییر قورخوب قاچام،
وئرم حیات گیرووونو.

آت کیشنه‌ییر، کیریلداییر،
گوزونده سون دورالغاسی⁵.
قاردا قارغا قاریلداییر،
قاریلداییر قورد قارغاسی.

آت وورنوخور اینسان کیمی،
های وئریرم حاقّی-سای‌لا.
من بختیمی بزه‌رم‌می،
دوست غمی‌یله، دوست قانی‌یلا؟

بیر ده آخی بو نه ماریق⁶!
بیز تک‌لنسک تئز اؤله‌ریک.
ایکیمیز ده آلداناراق،
ایکیمیز ده دیدیله‌ریک.

چووغون قاری چالغولاییر،
قار آلتیندا بوز قازماغی.
قنشریمده⁷ قورد اولاییر،
هئچ اۇنامیر⁸ اودوزماغی.

چووغون اۆتن، چؤل اۆتۆلۆ،
چیله آیی آغناغیندا⁹.
گومانیمین تۆلۆ-گۆلۆ
قالیب چووغون چیغناغیندا¹⁰

هاوا حیرصلی، قورد قودورغان،
دئییرم ائی... من ده وارام!
فیرلاتسا دا یۆز بۇرۇلغان،
یانیلمارام، یایخینمارام¹¹.

یاشایارام اینام ایله،
حؤکمو وئرن آیدی، گوندو.
اؤجلریمدن اؤتن گوللـه
برک آیاقدا اؤزوموندو.

چووغون قاری چالغولاییر،
ایمضا ایزیم قار کاغیذدا.
چووغون منی چولغالاییر،
چیرپینیرام آج آغیزدا.

آت یئریییر یاواش-یاواش،
کؤهلَنیمه دئییرم من:
یاخشی یولداش، یاخشی قارداش،
قورتار منی بو اؤلومدن!

#آغا_لاچینلی
¹- سوپورمک
²- شیدّتلی کولک- قار بورولغانی
³- بورومک- قاپلاماق
⁴- مسکون یئر- قصبه
⁵- دوراق
⁶- پوسقو
⁷- قاباق- اؤن طرف
⁸- سایماماق، یادا سالماماق
⁹- حئیوانین آغنادیغی یئر
¹⁰- بوجاق- گوشه
¹¹- کنارا چکیلمک
#شعر_اوجاغی
@SheirOcagi
249
|شعر اوجاغی|

01 Jan, 20:28

▫️دئییرسن: او مئهریبان سئوگیلییه یئتیشمک اولارمی؟
اؤز منلیگیندن کئچرسن‌سه، آللاها آند اولسون یئتیشمک اولار!

📚 گلستان ارَم
#عباسقلی_آغا_باکی‌خانوو
#شعر_اوجاغی
@SheirOcagi
277
|شعر اوجاغی|

01 Jan, 09:26

▫️درس اوخویوب دوکتور، اؤیرتمن، و یا مهندس اولون! دونیانین بئله شئیلره احتیاجی وار، فوتبالچییا یوخ.
فوتبالچی‌لاردان بۏت دوزَلتمه‌یین! بعضیلری ساندیغینیزدان داها بیج‌دیرلر.

#ژوزه_مورینیو
#شعر_اوجاغی
@SheirOcagi
348
|شعر اوجاغی|

01 Jan, 08:53

▫️یازیقلارین وطنی

یازیق وطن یئم اولوب
یاد یئره گئتمه‌لی‌دی.
ائله اؤز قوینوندا دا
یادی یئدیرتمه‌لی‌دی.
گیلئی‌لی نغمه‌سینی
آلچاقدان اؤتمه‌لی‌دی.
بعضاً ده بالاسینی
بوغوب اۆیۆتمه‌لی‌دی.
یانماقدا، تالانماقدا،
آغریسینی دانماقدا،
هامینی اؤتمه‌لی‌دی.
هده-قورخو گوللـه‌سی
اونو کیریتمه‌لی‌دی.
بویوندوروق کونده‌سی
بوینوندا بیتمه‌لی‌دی.
سۆرۆنۆب سۆرگۆنلۆیه،
اوردا دا بیتمه‌لی‌دی.
توپوروب دوغمالاری-
باریشدیران بیرلیگه،
قنیمینین یولوندا
اؤزونو اۆتمه‌لی‌دی.

یازیق وطن، جان وطن،
قلبی آغرییان وطن!
«گونوم آغ، کئفیم ده چاغ،
ایشیم دوز...» دئییب-دئییب،
اؤزونو حریف‌له‌ییب
اؤزگه‌نی تعریف‌له‌ییب
داغ بویدا دردلرینی
اویدورما سئوینج ایله
سوواییب اؤرتمه‌لی‌دی.
یازیق وطن! -دئین یوخ-
حیرصی دبَرتمه‌لی‌دی،
قیلینجینی سیییریب
ایتی گبرتمه‌لی‌دی.
یادلار اونو ساغمادا،
هئچ دئین یوخ «داردان چیخ!»
قالیب سیخما-بوغمادا،
یازیق وطن، آه، یازیق!

#آغا_لاچینلی
#شعر_اوجاغی
@SheirOcagi
327
|شعر اوجاغی|

01 Jan, 08:34

▫️فرقلی کیشی‌لر، فرقلی قادین‌لارا عاشیق‌ اولان‌لاردیر.
دوغو توپلوملاریندا ایسه، فرقلی قادین گوجلو، یئنیلمز و اؤزونه اینانان قادینلاردیر.

#یامی_احمد
#شعر_اوجاغی
@SheirOcagi
333
|شعر اوجاغی|

31 Dec, 19:45

▫️گؤردوم اووجومون ایچی‌تک
گؤردوم بۆتۆنلۆک‌‌له سنی.
ایچیم قایغی‌یلا دولویدو،
سئچدیم بو تۆنلۆکده سنی.

بیر-بیر تانیش جیزگی‌لری،
اوخشادیم، اوودوم دورمادان.
منه یاد اولان حیسلرین،
بیرین ده اوزه وورمادیم.

پرده‌سین قالدیریب جیسمین،
روحونون گؤزونه باخدیم.
کیرپیگینده داملا ایدیم،
یاناقدان آشاغی آخدیم.

#ابوالفتح_مدداوغلو
#شعر_اوجاغی
@SheirOcagi
352
|شعر اوجاغی|

31 Dec, 19:41

▫️نه اشکالی وار،
بحثی اودوزوب
اونون گولوشونو قازانسام؟

#محمود_درویش
#شعر_اوجاغی
@SheirOcagi
324
|شعر اوجاغی|

31 Dec, 18:29

▫️ایلیشکینین ان یاخشی شکلی، باغلیلیق دویغوسویلا بیرلیکده، آزادلیغیمیزی دا قۏرۇماقدادیر.
ساده‌جه، یالنیزلیق‌لا اوزبه‌اوز اولماغی اؤیره‌نن بیر اینسان، بئله درین و دایانیقلی بیر ایلیشکی قورا بیلر.

📚 اگزیستانسیال پسیخوتراپیسی
#اروین_یالوم
#شعر_اوجاغی
@SheirOcagi
316
|شعر اوجاغی|

31 Dec, 10:30

🔹تحکییه ادبی درنه‌یی(487-جی جلسه)
🔹اوخوناجاق اثر:
🔹میراث‌دان پای – ویرجینییا وولف
🔹اینگیلیس ادبییاتی
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 11 دی ماه 1403
🔹ساعت:17-19:30
@tahkie
Butajournal.com
#ادبییات #آذربایجان_تورکجه_سی #داستان #مودئرن_نثر #تحکییه #اورمو #ویرجینییا_وولف #اینگیلیس_نثری #حئکایه
337
|شعر اوجاغی|

31 Dec, 08:34

▫️منه اوچماق اؤیره‌دیب
گؤیو اؤزویله آپاردی.

#حسام_حاتم
#شعر_اوجاغی
@SheirOcagi
319
|شعر اوجاغی|

30 Dec, 09:59

▫️ایچیندن ائله بیر آه چکدی کی،
ائشیدنلر،
جییَرینین پارچالارینی تؤکور ساندیلار.

#نجیب_محفوظ
#شعر_اوجاغی
@SherOcagi
95
|شعر اوجاغی|

30 Dec, 08:37

▫️کیلید سوزگَجی

سو قویودا چیپپیلداییر چیپپیر-چیپپیر،
قوش بوداقدا جیپپیلداییر، دامجی تاپمیر.

قیش آیینا گرک اولان بیتیر یازدا،
او دا بئله گئنده قالان ال‌چاتمازدا.

قازانجی دا قنیم اۇدۇر، غمی کیریت!
آجیقلینی زنجیر توتور، آج'ی کیلید.

یوز ده دانیش اؤز گوجوندن، جیلوو گمیر،
عؤمور کیلید سوزگجیندن کئچیب گلیر.

قاپیلاردا بئله کیپ-کیپ اؤیونمه سن!
کینیمیزدن کیلید بیتیب، نه دئیه‌سن.

آلت کیلیدی، اوست کیلیدی، یول کیلیدی،
یاد کیلیدی، دوست کیلیدی، دیل کیلیدی.
دینمز دایان اؤز یئرینده،
قال کیلیدی، اؤل کیلیدی!

#آغا_لاچینلی
#شعر_اوجاغی
@SheirOcagi
124
|شعر اوجاغی|

30 Dec, 07:58

▫️باهار سنسیز

سنی قلبیمده گزدیریب هر آن،
عشقیمیز گؤرمه‌سین -دئدیم- هیجران.

آلا گؤزلوم، منیمکیسن، بیلدین؟!
سنین عشقینله آغلادیم، گولدوم.

گوله بیلمز، گولوم، باهار سنسیز،
اوره‌ییم اود توتوب یانار سنسیز.

دؤنمه‌رم هئچ سؤزومدن، ائی جانان!
گئتمه بیر آن گؤزومدن، ائی جانان!

سندن الهام آلیر منیم کؤنلوم،
منی سندن اینان آییرماز اؤلوم.

#سلیمان_رستم
#شعر_اوجاغی
@SheirOcagi
142
|شعر اوجاغی|

30 Dec, 07:48

▫️سنی سئویرم.
سندن،
عشقین دیریلیگینی گارانتی‌له‌مه‌نی ایسته‌میرم.
سندن،
بودائی‌لر کیمی اود ایچینده اؤلمه‌ییم اوچون،
منه یاردیم ائتمه‌نی ایسته‌ییرم.

#نزار_قبانی
#شعر_اوجاغی
@SheirOcagi
143
|شعر اوجاغی|

29 Dec, 16:53

▫️باشیمدا،
تک اؤلوسو من اولان،
چوخلو ساواشلار وار.

#عبدالوهاب_الرفاعی
#شعر_اوجاغی
@SheirOcagi
226
|شعر اوجاغی|

29 Dec, 11:06

دیالوق

▫️- بعضاً بیرینی سئومک اوچون، اونا یاد قالمالیسان!

🎬 Blade Runner 2049
2017 آمریکا
#دنی_ویلنوو
#شعر_اوجاغی
@SheirOcagi
258
|شعر اوجاغی|

29 Dec, 09:23

▫️او یئنه ده یالنیزدیر، اونون اوچون یئنیدن سوکوت باشلانیر. بیر مودّتلیک اونو ترک ائتمیش غوصّه یئنیدن باش قالدیریب اونون اوره‌یینی داها آرتیق گمیرمه‌یه باشلاییر.
گؤره‌سن، بو مینلرله آدامین ایچینده اونون دردینی دینله‌یه بیله‌جک هئچ اولماسا بیر نفر تاپیلارمی؟ لاکین نه او، نه ده اونون دردی بو قاچیشان آداملارین وئجینه دئییل.
اونون نیسگیلی بؤیوک و سونسوزدور. اونون سینه‌سی یاریلیب دردی چؤله تؤکولسه، یقین کی بوتون دونیانی دولدورار.
آنجاق بونونلا بئله او گؤرونمور. او، ائله بیر اؤنمسیز قابیغا بورونه بیلمیشدیر کی، گوندوز چیراقلا دا اونو گؤرمک اولماز.

📚 سئچیلمیش اثرلری
#آنتون_چئخوو
#شعر_اوجاغی
@SheirOcagi
262
|شعر اوجاغی|

29 Dec, 08:37

▫️هر گئجه گل!

دده، بئله هر گئجه گل،
گل تاپیشاق، گل گؤروشک!
بو حسرتین باغرینی دل،
آیریلیقدان آیری دوشَک!

آیریلیغا نئجه کۆرسن!¹
وار اولورسان یوخ چاغیندا.
یئنه بیزی دوشونورسن،
باش بارماغین دوداغیندا.

دده، یاران نه غؤور ائلر²،
دردین چوخو دهره‌لنیب.
او گؤردویون چوبوق شیولر،
آغاجلانیب، پؤهره‌لنیب.

ائل دئمیشکن، بارلی باغیق،
آرخایین اول بیز ساریدان!
اؤزون کیمی گؤز-قولاغیق،
قدیر بیلن او قاریدان.

گؤز قویوروق هر آددیما،
اؤیودون‌له قۇرولوروق.
تور آتمادان بیر آداما،
تورچولاردان قۏرونوروق.

او گومانلار هئچ اؤلمه‌دی،
قوی ساغالسین سینه داغین!
توستوسو ده کسیلمه‌دی،
روح ایسیدن بیر اوجاغین.

دده، اودو یاشادیریق،
نییه قلبی اۆیودورسن³؟
بیزلری ده بیزدن آرتیق،
یاد ائدیرسن، شاد ائدیرسن.

بئله اوزمه قارا غمده،
جانیم قوربان، آی جفاکئش!
گؤروشونه سئوینسم ده،
گلیشینه قییمیرام هئچ.

سن آی تانریم، آغ‌ساققالیم!
هئچ قییمیرام یول گله‌سن.
بیر یئر ائله- کؤچوم قالیم!
بلکه بیر آز دینجله‌سن.

حؤوصله‌دن لاپ چیخمیشام،
التماس بیل بو نغمه‌نی!
دده، یامان داریخمیشام،
دردین آلیم، آپار منی!

#آغا_لاچینلی
¹- عینادکار
²- درینلشمک
³- دارتماق- اونا چئویرمک
#شعر_اوجاغی
@SheirOcagi
258
|شعر اوجاغی|

29 Dec, 07:55

▫️اینسانلار ساده دئییل، مورکّب جاواب آختاریرلار. اونلار او قدر اؤز قورخاق یالانلاریندا دولاشیبلار کی، حقیقتین ساده‌لیگینی قبول ائتمه‌یه جسارت‌لری چاتمیر.

📚 اوچونجو آدام
#قاراقان
#شعر_اوجاغی
@SheirOcagi
230
|شعر اوجاغی|

28 Dec, 20:02

▫️یوز ایللردیر بیز گله‌جه‌یین میلّتی‌ییک.‌ غملی حیاتیمیزدا «بوگون»وموز یوخدور. هر شئییمیز اولوب: «انشاللاه دوزه‌له‌جک!».

#نادر_ابراهیمی
#شعر_اوجاغی
@SheirOcagi
305
|شعر اوجاغی|

28 Dec, 19:45

▫️Anne beni anlayan yok...

#Derya_bedavacı
@SheirOcagi
302
|شعر اوجاغی|

28 Dec, 17:24

▫️جان یئتدی لبه، لب لبِ جانانه یئتینجه،
طوطی‌هوس اولدوم شکرستانه یئتینجه.

خضر ایسته‌دیگی آبِ حیاتی تاپا بیلدیم،
شهدِ لبِ جانان، منِ نالانه یئتینجه.

خم قیلدی الف قدّیمی عشقینده او ماهین،
مور اولدوم عجب بزمِ سُلیمانه یئتینجه.

کؤنلوم قوشو زلفونده دوشوب دامِ بلایه،
دؤنمز اونا آغ اوزده‌کی اول دانه یئتینجه.

فهم ائت کیمه من عاشقم، ای زاهدِ بی‌ذوق!
گؤر بیر نه چکیب دل شهِ مردانه یئتینجه!

حال اهلی بیلر حالینی حال اهلینین، ای دل!
گیزلت غمِ پنهانینی نادانه یئتینجه!

ایستردی دونن «حاجی» ائده وصف جمالین،
اود توتدو قلم، یاندی قلمدانه یئتینجه.

#حاجی‌بابا_حسین‌اوو
#شعر_اوجاغی
@SheirOcagi
358
|شعر اوجاغی|

28 Dec, 11:25

دیالوق

▫️- نه حیسّین وار؟!
+ گووَن. سنینله اولدوغوم زامان اؤزومو گووَنده حیسّ ائدیرم، ائوده اولدوغوم زامانلار کیمی.

🎬 Garden State
2004
#زک_برف
#شعر_اوجاغی
@SheirOcagi
334
|شعر اوجاغی|

28 Dec, 10:12

▫️اؤلمک یاشاماغی باجارمایانلار اوچون حیاتین ان گؤزل کشفی‌دیر. یاشاماغی باجارانلار ایسه اؤلندن سونرا دا یاشایاجاقلار.

📚 رئیل‌لر اوزرینده اوزانمیش آدام
#رؤوشن_عبدالله‌اوغلو
#شعر_اوجاغی
@SheirOcagi
365
|شعر اوجاغی|

28 Dec, 09:29

▫️گلمه!

گئت، یارالاریم کؤنلومه ناز ائیله‌دی، گلمه!
هجرین گونومو سوز و گداز ائیله‌دی، گلمه؟

یاندیم، یارالاندیم، یارالار جانیمی آلدی،
جانسیز جانیما آه نماز ائیله‌دی، گلمه!

کیم بیلدی فنا گونلریمین آه و جفاسین؟
آز عؤمرومو حسرت داها آز ائیله‌دی، گلمه!

بو فصلِ فراقین قیشا بنزَردی، بیلیردین؟
آمّا اجلیم بو قیشی یاز ائیله‌دی، گلمه!

مژگان اوخونو قوی اولا سینه‌مده قوناغیم،
کؤنلوم قوناغی محرمِ راز ائیله‌دی، گلمه!

گئت، گئنده دایان، گلمه‌یه گئج قالدی آیاغین،
دردینله «کؤنول» کؤنلونو ساز ائیله‌دی، گلمه!

#فاطمه_عبدی_کؤنول
@SheirOcagi
319
|شعر اوجاغی|

28 Dec, 09:18

▫️هامیمیز بیرگونلوک وارلیقلاریق: خاطیرلایان و خاطیرلانان، هر ایکیسی بیر-بیرینه بنزه‌ییر. هر شئی اؤتری‌دیر، هم خاطیره‌لر، هم ده اونلارین قونوسو.
بیر واخت گله‌جک، سن هر شئیی اونوداجاقسان، بیر واخت گله‌جک هر شئی سنی اونوداجاق.
اونوتما کی، تئزلیکله «هئچ‌کیم» و «هئچ یئرده» اولاجاقسان!

📚 بیرگونلوک وارلیق‌لار
#اروین_یالوم
#شعر_اوجاغی
@SheirOcagi
338
|شعر اوجاغی|

27 Dec, 18:48

▫️ ائی کؤنول، سنده محبّتده فراست نه گزر؟!
غلط ائتسن ده، خجالتدن علامت نه گزر؟!

کیم اگر علم‌له‌دیر، بئینی اولور منبعِ نور،
کؤزرَن بئیینده معنایا دلالت نه گزر؟!

دئدیم ائی بنده‌ی سبحان، دوزلیش وئر عمله!
نئچه مین کس دئدی کی: دؤورِ قیامت نه گزر؟!

بنی‌آدم نه جورأت‌له اونا لعنت اوخویور؟
نفٛسده‌دیر گوناه، ابلیسده قباحت نه گزر؟!

همیشه نغمه‌ی بلبل دیله‌دین دونیادا سن،
باشا دوش! قارغا مجلیسینده ملاحت نه گزر؟!

بو قدر صنعتی گؤرجک جامالین درک ائله‌ییب-
بوزا دؤنمورسه بدن، روحدا حرارت نه گزر؟!

«ووقار»ا جوشدو قلم، ساخلا الینده قلمی،
قلمی ساخلاماغا الده جسارت نه گزر؟!

#ووقار_حسنی
#شعر_اوجاغی
@SheirOcagi
338
|شعر اوجاغی|

27 Dec, 18:25

▫️آللاه عشقینه، بیر شوشه شراب!
بو زاواللی بشریّته، بو گولونج اینسانجیق‌لارا، بو اینسان گؤرکَملی، عقرب‌ اورَکلی حشرَتا آییق باخا بیلمیرم.

📚 اوقتای ائل‌اوغلو
#جعفر_جاببارلی
#شعر_اوجاغی
@SheirOcagi
321
|شعر اوجاغی|

27 Dec, 18:18

▫️اؤز روحونون هارادا یاشادیغینی بیلمه‌مک، اینسان اوچون نه بؤیوک موصیبت‌دیر!

📚 سفیل‌لر
#ویکتور_هوگو
#شعر_اوجاغی
@SheirOcagi
325
|شعر اوجاغی|

27 Dec, 15:38

▫️آخشام اووقاتی

صاباحا دا بهانه وار،
قار یاغیب یولو باغلاییب.
گئدنلر گئری قاییتمیر،
نئیلیرسن آخی آغلاییب؟!

نه دئسن، دونور هاوادا،
سؤزونو کولک آپاریر.
سن چتیری قۏرۇیۇرسان،
اؤزونو کولک آپاریر.

خان چینارلار ییرغالانیر،
ال-اله توتوبدو شاملار.
حیرصینی دیشینه سیخیب
دردینی قووور آداملار.

پنجره‌لر گیلئی‌لنیر،
آستاجا دئیینیر قاپی.
باخیب قیشا بۏز اوزونو،
خلوَتجه گئیینیر قاپی.

بیر قارا داشدان بویلانیر،
بیر شکلی غریب یوللارا.
قار دئییل، بیاض ساچینی،
بیر آنا سریب یوللارا.

بیر اوره‌یین آغریسینا،
ملک‌لر گؤیلردن ائنیر.
بیر کؤرپه‌نین گولوشوندن،
اوشوین بیر ائو ایسینیر.

#ثاقیف_قاراتورپاق
#شعر_اوجاغی
@SheirOcagi
368
|شعر اوجاغی|

25 Dec, 09:23

▫️قیش گونونده

شاختا،
سازاق...
ماشین ترپنمیر یئریندن.
شوفر اللرینی حیرصلی-حیرصلی یانلارینا چیرپیر.
- «بنزینی آز گؤتورموشدوم -دئییر- من».
ییغیریق چیر-چیرپی، بیر اوجاق چاتماق اوچون،
اوجاق آلیشمیر.
شوفر ال‌یازمالاریما باخیر گؤزاوجو.
چیخاریرام بیر-بیر:
«بو باللادا،¹
بو شعیر،
بو ائپیقرام.²»
کیبریتین تیتره‌ین آلووون آلتینا آتیرام.
بیرجه شعریم قالیر کی،
هئچ اونو یاندیراجاغیمیز کیمی،
چاپ ائتدیرمه‌یی ده فیکیرلشمه‌میشم.
گؤزومده قارالیر عالم،
اوجاق ایسته‌ییر آلیشسین، ایسته‌ییر آلیشماسین.
ایسته‌ییر مفتیل کیمی دامارلاریمدا برکیسین قانیم،
ایسته‌ییر شاختادا یانیم،
وئرمه‌رم او شعریمی.
وئرمه‌رم، کؤنلومون موقدّس گوشه‌سیندن
بعضی شعیرلری وئرمه‌یه‌جه‌ییم کیمی.
غم‌لنیرم بو آرا.
شاختا رئداکتورون³ یاندیردیغی سویوق سؤزوندن سونرا،
بیلدیم کی اینسان نه قدر یانیلارمیش!
او قدر یازی ایچینده، بیرجه شعریم وارمیش.

#علی_کریم
¹- افسانه- ناغیل
²- کیچیک ساتیریک شعر- هجو
³- متنی قایدایا، سلیقه‌یه سالان کیمسه
#شعر_اوجاغی
@SheirOcagi
80
|شعر اوجاغی|

25 Dec, 07:02

▫️یاخشی دینله‌ییجی اولانلار اؤنملی‌دیرلر و چوخ آز تاپیلارلار.

📚 عشقین سئیری
#آلن_دو_باتن
#شعر_اوجاغی
@SheirOcagi
112
|شعر اوجاغی|

24 Dec, 19:23

▫️وورهاوور

«ایندی رئوولوئردی¹، دؤنوم باشینا!
ناگاه اولور گوللـه‌فشان، پارتاپارت.»
میرزه‌علی‌اکبر صابر

▫️یئنه دونیا گورولداییر گورهاگور،
قیرهاقیرلا باشا چاتیر وورهاوور.

بعضاً بئله آچیق-آشکار قووهاقوو،
یاغلی اووو خارت‌ها‌خارت‌لا اووهااوو!

بعضاً قوزو قوردو گؤرور خاپ‌ها‌خاپ،
آسان اولور قاپ‌هاقاپ‌لا چاپ‌هاچاپ.

بعضاً اؤنجه دوست دونوندا قۏن‌هاقۏن،
سونرا بیردن زورهازورلا یۏن‌هایۏن!

هاردا وارسا شارت‌هاشارت‌لا پارت‌هاپارت،
اوردا دوشور های-هارای‌لا دارت‌ها‌دارت.

هاردا یئرلی یاتیب قالیر خورهاخور،
اوردا گلمه² یاتیر ییغیر سورهاسور.

هاردا خالقی سوی‌هاسوی‌لا قاچ‌هاقاچ،
اوردا یالتاق یادی اؤپور مارچ‌هامارچ.

هر اؤلکه‌ده بیر گۏرواگۏر، زؽروازؽر،
کۆیه باسیر، قان تؤکدورور شیرهاشیر.

نئجه‌دیرسه شیطان شرلی سال‌هاسال،
سونا یئتمیر چکیشمه‌لی چال‌هاچال.

#آغا_لاچینلی
¹- تاپانچا
²- اؤزگه- یئرلی اولمایان
#شعر_اوجاغی
@SheirOcagi
229
|شعر اوجاغی|

24 Dec, 18:15

▫️ان غملی آنلار،
اونلارا داریخدیغین
آما تاپمادیغین آنلاردیر.

#نزار_قبانی
#شعر_اوجاغی
@SheirOcagi
223
|شعر اوجاغی|

24 Dec, 17:50

▫️«گئتمه» دئدییین زامان،
«گل» دئدییین زاماندان،
داها چوخ سئویرم سنی.

هئچ واخت بیلمه‌یه‌جه‌یم:
نه‌دن،
«گئتمه!»،
«گل»دن،
داها حوزونلودور ...؟!

#حسن_آذری
#شعر_اوجاغی
@SheirOcagi
228
|شعر اوجاغی|

24 Dec, 14:44

▫️سندن کوسوب گئده‌جه‌یم،
پارام گئده، پارام قالا.
آجیغیمدان اؤله‌جه‌یم،
اورگینده یارام قالا!

سنی حسرت قویاجاغام،
اورگینی اویاجاغام،
اؤز جانیما قییاجاغام،
قوی اَینینده قارام قالا!

یئرسیز منه اومید وئردین،
غنچه ایکن، گولوم دَردین.
گیزله‌یه‌جک «کؤنول» دردین،
بولونمایا چارام، قالا!

#فاطمه_عبدی_کؤنول
@SheirOcagi
254
|شعر اوجاغی|

24 Dec, 08:43

دیالوق

▫️- سۏرۇنو چؤزمه‌یین ایلک مرحله‌سی، سۏرونون وارلیغینی قبول ائتمک‌دیر.

📺 The Newsroom
2012-2014 آمریکا
#آرون_سورکین
#شعر_اوجاغی
@SheirOcagi
314
|شعر اوجاغی|

24 Dec, 07:06

▫️بیری گئتمک و اوزاقلاشماق اوچون ماهنا آختاریر،
باشقاسی قالماق اوچون خیال قورور.

#جبران_خلیل_جبران
#شعر_اوجاغی
@SheirOcagi
273
|شعر اوجاغی|

24 Dec, 07:00

▫️ندَنینی بیلمه‌دن سئویرم سنی. ندنی اولان سئوگی یا سایغی‌دیر، یا دا ایکی‌اوزلولوک.

#آلفونس_دو_لامارتین
#شعر_اوجاغی
@SheirOcagi
272
|شعر اوجاغی|

23 Dec, 18:49

▫️عۆذۆر ایسته‌ییر.

ائوده قان-قان دئییر قودوز خان کیمی،
ایشده اَیری یول‌لا یۆزۆنۆ اَییر.
کوچه‌ده بیرینه توخونان کیمی،
اۆزۆنۆ چئویریب عۆذۆر ایسته‌ییر.

آداملار گؤزونده تویوق دنی‌دی،
یولوب یولچونون دا پایینی یئییر.
اینجه‌دی-مینجه‌دی، چوخ مدنی‌دی،
باشلاری اۆزه‌رک عۆذۆر ایسته‌ییر.

الیندن سو ایچیر هر داعوا-دالاش،
نئچه دۏن دَییشیر، نئچه دۏن گئییر.
گئدیب اوردا-بوردا مؽرت ووران عیّاش،
گلیب آروادیندان عۆذۆر ایسته‌ییر.

آدی «آدام‌یئین»، نفَسی چووغون،
غمی داشانین دا قلبینه دَییر.
قاناجاق قانلیسی، او بوینویوغون،
اوتانجاق سایاغی عۆذۆر ایسته‌ییر.

عارسیزلیق یویوبدو عار حناسینی،
سنی بندَمله‌سین¹- بؤیور کی، بؤیور!
آلدادا-آلدادا ائل-اوباسینی،
یالاندان-پالاندان عۆذۆر ایسته‌ییر.

چیخیب یادداشیندان صینیفی-سیلکی²،
بیله‌رک پیس اولور- «بیلمه‌دیم» دئییر.
یوکسک یئر توتسا دا، آدام دئییل کی،
آلچالا-آلچالا عۆذۆر ایسته‌ییر.

#آغا_لاچینلی
¹- باغلاماق
²- اجتماعی قروپ
#شعر_اوجاغی
@SheirOcagi
347
|شعر اوجاغی|

23 Dec, 14:21

▫️منه لاییق‌ اولان،
قهوه فینجانین دئییل،
دوداقلارین‌دیر.

#محمود_درویش
#شعر_اوجاغی
@SheirOcagi
300
|شعر اوجاغی|

23 Dec, 10:51

▫️بؤیوک چیلله

اونون عؤمرو قیرخ گوندور،
پاییزین داوامی‌دیر،
اوزون قیش ایّامی‌دیر.
قار سپیر آستا-آستا،
گولور تانیشا، دوستا.
داریخدیرمیر هئچ کسی،
قۇیۇدان گلیر سسی.
یورغون سالیر شوم اوسته،
قارغالار دسته-دسته،
اوچوب یئره قونورلار،
سانکی قوهوملوغو وار.
قارا قارغا گتیریب-
دیمدیگینده ایلک قاری.
یولوب یئره تؤکوبدور
آغاجدان یارپاقلاری.
اؤلموش قورد-قوش اولوبدور،
قارغالارین یئمه‌یی.
قیش اؤیره‌دیب اونلارا:
«قار-قار»، «قار-قار» دئمه‌یی.
«قارغا هارا، قار هارا؟!
چوخ ماحال‌دیر» دئییرم.
«آغ قار اوسته قارغالار،
قارا خال‌دی» دئییرم.
آغ لیباسدا دویمه تک،
پاریلداییر قارغالار.
قار کسنده «قار» دئیه،
قاریلداییر قارغالار.
سونو چاتیر چیلله‌نین،
چایلار بوز آلتدا آخیر.
قار گئتدی‌می، گؤرمزسن،
قارغالار یوخا چیخار.

#احمد_جاواد
#شعر_اوجاغی
@SheirOcagi
317
|شعر اوجاغی|

23 Dec, 07:59

▫️یئتیم قوزودان قوچ اولماز!

#آتا_آنالار_سؤزو
@SheirOcagi

"سیز ده بیر اونودولموش آتا-آنا سؤزونو آرتیرین👇"
294
|شعر اوجاغی|

23 Dec, 07:30

▫️من سئوینج (Happiness) کلمه‌سینین کؤکونو آراشدیردیم.‌ آنلادیم کی بو کلمه، اولماق، باش وئرمک (Happening) فعلیندن توتولوب. باشقا عبارتله، سئوینج، «اولان هر شئیی گؤرمک»ده تاپیلیر.
بو صاباح سنه حاضیرلانان یئمکدن سئوینمیرسن‌سه، احتمالا سئوینجی باشقا بیر یئرده ده تاپمایاجاقسان.

📚 بیلگینین تکامولو
#رابرت_جانسون
#شعر_اوجاغی
@SheirOcagi
287
|شعر اوجاغی|

23 Dec, 06:52

▫️آیریجا قالاریق.

آیریجا قالاریق مین ایل، میلیون ایل،
تورپاغین توروندا گؤروشمک چتین.
باغلاناق بیرلیگه باری بئش-اون ایل،
آلاق حاییفینی اوزون حسرتین!

عزیزیم، عؤمور ده بیر حاقّی-سای‌دی،
اینسان بو دونیادا گرک سئوینه!
سنی گؤرمه‌ییمه گومان اولسایدی،
یالواریب گئدردیم قبیر ائوینه.

دونیا بنده ووروب بیزه ده گولر،
اورک سایغاجیندا* حئسابینی چک!
آنین یاریسی‌دی یاشانان گونلر-
یاتیلان ایللری اؤلچو گؤتورسک.

آیریجا قالاریق بیر قاریش‌لیقدا،
قارالار گؤزونون قارا چیراغی.
واللاه، اوشومزدیم من او قیشلیقدا،
ائشیده بیلسه‌یدیم بو سس-سوراغی.

اوردا قارغیشین دا کؤنول اوخشاردی،
دورغونلوق گؤلونده دویغو گؤیرمز.
داریخساق، بلکه ده روح قوووشاردی،
آمّا روح گؤروشو بو دادی وئرمز.

آیریجا قالاریق قارانلیق قاتدا،
اوردا اؤدَنیجی اؤده‌مک چتین.
گل یاخشی دولاناق یامان حیاتدا،
آلاق حاییفینی اوزون حسرتین!

#آغا_لاچینلی
* حئسابلاما جیهازی
#شعر_اوجاغی
@SheirOcagi
306
|شعر اوجاغی|

23 Dec, 06:19

▫️بعضاً صاباحلار، بیر کوچه‌نین دؤنه‌جه‌یینده، خوشا گلن بیر شئه اوره‌یه دوشوب بوخار اولور، آما طراوتی اورکده قالیر.
و بو، ائله هر زامان اینسانین اوره‌یینه گرَکن شئی‌دیر.

📚 یای
#آلبر_کامو
#شعر_اوجاغی
@SheirOcagi
286
|شعر اوجاغی|

22 Dec, 19:28

▫️ساغ-سولو اؤیرنمیشم

من داها بؤیوموشم،
ساغ-سولو اؤیرنمیشم.
بو سول الیم، آیاغیم،
بو سول گؤزوم، قولاغیم.

من داها بؤیوموشم،
ساغ-سولو اؤیرنمیشم.
بیرجه سؤالیم واردیر:
بورنوم سول‌دور، یا ساغ‌دیر؟

#اوکتای_ذولفقاروو
#اوشاق_شعری
#شعر_اوجاغی
@SheirOcagi
325
|شعر اوجاغی|

22 Dec, 19:04

▫️حیاتدا، الیمیزده آز ساییدا «هه» وار؛ قۇللانماقدان اؤنجه، سایسیز «یوخ»‌لا قۏرۇمالی‌ییق اونلاری.

#کریستین_بوبن
#شعر_اوجاغی
@SheirOcagi
316
|شعر اوجاغی|

22 Dec, 17:40

▫️سن‌له منی قوشا گؤرن یاغیشلار،
ایندی مندن سنی سورور، نه دئییم؟
عشقیمیزه نغمه قوشان او قوشلار،
ایندی مندن سنی سورور، نه دئییم؟

سئوگیمیزه شاهید اولان بولاقلار،
باشیمیزا کؤلگه سالان بوداقلار،
سندن اؤترو بو تیتره‌ین دوداقلار،
ایندی مندن سنی سورور، نه دئییم؟

بیزیم ائودن سیزه گئدن او یوللار،
آرخامیزجا پیچیلدایان او کوللار،
سنسیز آرتیق قوینومداکی بو قوللار،
ایندی مندن سنی سورور، نه دئییم؟

پاییز بیزی دیسکیندیرن او یئللر،
یازدا بیزه قاش گؤز آتان او گوللر،
تئللرینی اوخشادیغیم بو اللر،
ایندی مندن سنی سورور، نه دئییم؟

باخیشیندان دردی قانان اورگیم،
سندن اؤترو منی دانان اورگیم،
«کؤنول» کیمی اودا یانان اورگیم
ایندی مندن سنی سورور، نه دئییم؟

#فاطمه_عبدی_کؤنول
@SheirOcagi
320
|شعر اوجاغی|

22 Dec, 16:29

اؤیکوجوک

▫️اؤلو

قبیره قویموشدولار، اوستونو اؤرتمک ایسته‌ییردیلر، بیر ایکی بئل تورپاق دا آتمیشدیلار، بیردن بیر کیشی اوجادان چیغیردی:
- اؤلو ترپه‌نیر.
کیشی‌لرین توکلری اورپشدی، قبرستانلیغین بؤیرونده اویناشان اوشاقلار دا قورخوشدو. 
هامی باشینی قبیره ساری اوزالتدی: 
- هه، دئیه‌سن ترپه‌نیر.
- نییه دایانیبسیز؟ تئز چیخاردین!
تلم‌تله‌سیک قبیردن چیخارتدیلار، تئز کفنین ییرتیب اوز گؤزون آچدیلار.

گؤزلری قاماشیردی، بیر آز گؤزلرینین قاپاقلارینی دؤیَندن سونرا دوروب اوتوردو،  هؤل هؤل اورا-بورا باخیردی،  ائله‌بیل کیمی‌سه آختاریردی، بیردن بیر درین نفس آلاراق دیله گلدی:
- یاخشی اولدو اؤلدوم، جانیم دینجلدی!
- اؤلمه‌ییبسن آرخایین اول!
- گتیرین بونون اوزونه بیر آز سو چیله‌یین، اؤزونه گلسین.

کیشی هورکک گؤزلرینی یان-یؤره‌یه دولاندیردی؛ «سیز کیمسیز؟ بورا جنت‌دی؟ ... یا ...» دئییب هؤنکورتویله آغلادی، «جهنّمه دوشه‌جه‌ییمی بیلیردیم، اوره‌ییمه قویولموشدو.»

جاماعات سس‌سیز-سس‌سیز دونوخوب قالدی.
بیردن بیر کیشی قاققیلدایاراق گولدو، سونرا بیر کیشی هیچقیراراق آغلادی،
  سونرا بیر باشقا کیشی ...  سونرا بیریسی ...  گولدولر ... آغلادیلار...

گئندن باخان اوشاقلار کیریخیب قالمیشدیلار؛
جاماعات  آغلاشیر... یوخسا  گولوشور؟

#احمد_رستم‌اوغلو
@a_z_soz
@SheirOcagi
305
|شعر اوجاغی|

30 Nov, 11:17

▫️اویسال* سئوگیلیم!
من ایندی بؤیوک بیر شهرده سنی دوشونمکده‌یم،
الیمده یونگول، ماوی بیر قلم،
جیبیمده ایکی پاکت سیقارا،
حیاتیمیز کئچیر گؤزلریمین اؤنوندن:
چیخیب گئتمه‌لریمیز،
سو ایچمه‌لریمیز،
اؤپوشدوکلریمیز.
آغلارام عاغلیما گلدیکجه گولوشدوکلریمیز.
هر شئی سنی گؤزله‌ییر،
هر شئی گلمه‌یینی، ایچری گیرمه‌یینی،
سنین الینین دَیمه‌سینی،
گؤزونون توخونماسینی...
و هر شئی تکرارلاییر سنی نئجه سئودیگیمی.

#جمال_ثریا
* اۆزۆ یولا
#شعر_اوجاغی
@SheirOcagi
45
|شعر اوجاغی|

29 Nov, 19:06

▫️ساکینسن.
توختاق اللرین شعر کیتابی‌دیر،
بونو بیلیردین‌می؟

آیاق‌یالینسان.
آیاق‌‌یالین قادین
تاریخین ریتمینی دَییشه بیلر،
دونیا خریطه‌سینی آلت-اوست ائده بیلر،
عؤمرو اوزادا بیلر؛
بیلیردین‌می؟

#نزار_قبانی
#شعر_اوجاغی
@SheirOcagi
213
|شعر اوجاغی|

29 Nov, 16:56

▫️اؤزومدن باشقا

قایغی چکه-چکه باشیم اوجالیب،
فیل یوکو داشیییر باخ بو قاریشقا.
دردیمین علاجی اؤزومه قالیب،
من کیمه کۆسۆنۆم اؤزومدن باشقا؟!

قلباً سئودیگیم ده سئوینجه یاغی،
اؤزومدن اؤزومه دوست توتمالییام.
بو دؤنوک دونیادا کیمیم وار آخی؟!
آرابیر اؤزومه یاس توتمالییام.

آرابیر توخ دوروب یالان یوزمالی،
آرابیر گۆل اولوب بوزدا بیتمه‌لی،
آغرینی دؤزوم‌له داشا باسمالی،
آغینی گولوش‌له تئز کیریتمه‌لی.

دوشمه‌رم آنیمین آغ قانادیندان،
گوجومو آرتیرار قایغیمین تؽغی¹.
پیس تای-توش آدیندان، یولداش آدیندان،
وئره‌رم اؤزومه گؤز آیدینلیغی.

گوللریم آچیلار اود گئیه-گئیه،
نه‌ییمه گرک‌دی قاخینجلی یاردیم؟
آسیلی اولماقدان قورخموشام دئیه،
اؤلوم قازمامی² دا اؤزوم قازاردیم.

من منی هامیدان یاخشی تانییان،
هامیدان چوخ سئون، چوخ دا سؽنایان.
اریییب تؤکولسم پولاداؤزولم³
هؤرولسم قالایام، گریلسم غالیب.
دؤنمز دوستلاریمدان قالان اؤزومم،
دردیمین علاجی اؤزومه قالؽب.

#آغا_لاچینلی
¹- بؤیوک ییغین- قالاق
²- یئرآلتی داخما
³- مایاسی پولاد کیمی اولان کیمسه
#شعر_اوجاغی
@SheirOcagi
248
|شعر اوجاغی|

29 Nov, 09:31

▫️بیر پاییز تنهالیغی

لال سوکوت ایچینده سس‌سیز کئچیرم،
ایلک دفعه پاییزدان سنسیز کئچیرم.
من ده ارییه‌رم، من ده ایته‌رم،
بیر خزان یئلینده اوتدان بئترم.
سؤیکه‌نیم هانسی بیر گوجه؟ بیلمیرم.
«کئچیرم» دئییرم، کئچه بیلمیرم.
منی بو پاییزین ایچیندن کئچیرت!

خزل آیاغیمی آیاقلار منیم،
داش‌قالاق ائله‌ییر یارپاقلار منی.
اوّل پاییزلاریم بئله دئییلدی،
بو نه تنهالیق‌دیر، بو نه غم-کدر؟!
سن آللاه روحونو دالیمجا گؤندر،
منی بو پاییزین ایچیندن کئچیرت!

بیر گول یارپاغینا، قانادی ایسلاق-
سیغینیب دورموشام کپنک سایاق.
چیچه‌ییم یاریم‌جان، اۏتۇم یاریم‌جان.
سن آللاه بیر قاناد گؤندر دالیمجا،
منی بو پاییزین ایچیندن کئچیرت!

یاری آلاتوران، یاری ایشیغام،
ایندی گون‌باتانا یول گئدیر ایدیم.
بو خزان ایچینده ساری ایشیغام،
قیرمیزی ایشیغیم یاندی... گئجیکدیم.
منی بو پاییزین ایچیندن کئچیرت!

ابرۆشۆم* بئلینه «بئلیم» دئمیشدیم،
چینار یارپاغینا «الیم» دئمیشدیم،
او دا بوداغیندان اوزولدو دوشدو.
قویما اوشومه‌یه چیلپاق الیمی!
توت گؤتور تورپاقدان یارپاق الیمی!
منی بو پاییزین ایچیندن کئچیرت!

سنی سسله‌ییرم، گلرسن هاچان؟
بلکه سون کؤرپومدو، سونونجو کئچید.
آغ آتلی بیر ناغیل گؤندر دالیمجا،
منی بو پاییزین ایچیندن کئچیرت...!

#موسی_یعقوب
* قوواق آغاجینین بیر نؤوعو (Əbrüşüm/Əbrişim)
#شعر_اوجاغی
@SheirOcagi
248
|شعر اوجاغی|

29 Nov, 08:00

▫️روحونو، جیسمینی ائله سئویردیم، سانکی ووجودو وارلیغیمین گرَکلیگی‌یدی.

#شاهرخ_مسکوب
#شعر_اوجاغی
@SheirOcagi
212
|شعر اوجاغی|

29 Nov, 07:40

▫️سنی ایلک گؤردویومده
باشقاسینا قانایان یاران وار ایدی،
من سنی یارالارینا رغماً سئودیم.

#جمال_ثریا
#شعر_اوجاغی
@SheirOcagi
207
|شعر اوجاغی|

28 Nov, 18:56

▫️سوروشورسان:
«وطن» نه‌دیر؟

دئیه‌جکلر:
وطن ائودیر، توت آغاجی‌دیر،
قوشلارین یوواسی، آری پته‌یی،
چؤرک عطری و ایلک سمادیر.

سوروشورسان:
اوچ حرفلی بیر کلمه،
بو قدر مضمونلاری اؤزونده یئرلشدیره‌جک قدر گئنیش‌دیر ده،
بیر تک بیزه دار گلیب‌می؟...

#محمود_درویش
#شعر_اوجاغی
@SheirOcagi
330
|شعر اوجاغی|

28 Nov, 17:54

▫️بیزیم دونیامیز، ماسکالاری ساخلاماقدان یورولمایان اللرله دولودور.

#فرانتس_کافکا
#شعر_اوجاغی
@SheirOcagi
328
|شعر اوجاغی|

28 Nov, 12:35

▫️چوخ کیتاب اوخویان آدامدان قورخمامالیسان!
تک بیر کیتابی اولان، اونو قوتسال بیلن، هئچ واخت دا اوخومایان آدامدان قورخمالیسان!

#فردریش_نیچه
#شعر_اوجاغی
@SheirOcagi
327
|شعر اوجاغی|

28 Nov, 11:14

▫️عشقین اؤلمزلیگی

آغاجلار یارپاق-یارپاق،
یئره باسیر الینی.
بولودلار دامجی-دامجی،
تورپاغا ال آپاریر.
آند ایچیرلر ائله‌ بیل،
عاصی اولدوقلارینا.

آغاجلار یارپاق-یارپاق،
یئره باسیر الینی.
بولودلار دامجی-پامجی،
تورپاغا ال آپاریر.
آند ایچیرلر ائله بیل،
عشقین اؤلمزلیگینه.

دؤنور آنا بطنینه،
آغاجلار یارپاق-یارپاق،
بولودلار دامجی-دامجی...

اؤزونه دؤنور هر شئی،
قاییدیر یئنه، یئنه.
شوکور اولسون، ایلاهی،
سنین بؤیوکلوگونه،
عشقین اؤلمزلیگینه!

#سرواز_حسین‌اوغلو
#شعر_اوجاغی
@SheirOcagi
306
|شعر اوجاغی|

28 Nov, 10:43

▫️قییما منی یولا سالا یاد ائللر!
اؤزون یئتیش، گؤز یاشینا سار منی!
چوخ زاماندیر گؤزلریمیز گؤروشمور،
ائله بیل کی اونودوبسان، یار، منی!

باخیشلاریم یوللارینی قوجاقلار،
دیلیم تیترَر، هر گلندن سوراقلار.
حیاتیمی دوندوراجاق سازاقلار،
ایتیره‌جک کولک منی، قار منی!

«کونول» گئدیر، سنین اولسون بو حیات!
سئوگیمیزی اورگیندن قوپار آت!
دردیم اولوب  ماهنیلارا  ناغارات،
مندن سونرا اوخشایاجاق تار منی.

#فاطمه_عبدی_کؤنول
@SheirOcagi
277
|شعر اوجاغی|

28 Nov, 07:07

▫️آزادلیغین گلدیگی گون،
او گون اؤلمک یاساق!

#جمال_ثریا
#شعر_اوجاغی
@SheirOcagi
281
|شعر اوجاغی|

27 Nov, 20:02

▫️اینسانین اللری نه دؤنوک اولور!
یقین هئچ سنین ده یوخدو خبرین،
بو گون گلیب کئچدیم حیَطینیزدن،
همین او جیغیردان، همین او ایزدن.

آللاه، نئجه دؤنور چارخی محورین!
آمان، بوردا سنی نئجه آراردیم!
پنجره‌دن دوشن غفیل کؤلگه‌ده،
اومید آختاراردیم، سس آختاراردیم.

ایندی پنجره‌نی تانیمادیم هئچ،
بیگانه آیاغیم، دورما، گلیب کئچ!
مین یول باخدیغینی هئچه دؤندَرن،
اینسانین گؤزلری نه دؤنوک اولور!
ایندی او سؤزلری پیچیلدامیرام،
اینسانین سؤزلری نه دؤنوک اولور!
باخیر، گؤرمه‌یی یوخ، آلیشماغی یوخ،
بیگانه باخیشلار نه سؤنوک اولور!

بو ال سنین دئییل، او اللر منیم،
بو تئل سنین دئییل، او تئللر منیم.
بیری بیری اوچون یانیب قوورولان،
ایندی گؤینَرتیسی گؤیه سوورولان،
اینسانین اللری نه دؤنوک اولور!
نوازیشسیز قالیب یاتان، قیوریلان،
اینسانین تئللری نه دؤنوک اولور!
نه یاخشی او اللر آغلایا بیلمیر،
نه یاخشی او تئللر آغلایا بیلمیر!

اوره‌ییم اود آلیب یانیردی بوردا،
ائه، سنی گؤرمه‌دن کئچمک نه ایدی!
آیاغیم میخلانیب قالاردی بوردا،
ایندی هئچ بیلمیرم هاردان کئچیرم،
ائله بیل سوپ‌سویوق قاردان کئچیرم.
هئچ بوردا اولماییب آیاق دؤیمه‌ییم،
اینسانین آددیمی نه دؤنوک اولور!
دونیا باشدان-باشا اونوتماق ایمیش،
دونیانین آدامی نه دؤنوک اولور!

نه من او‌ پیلله‌نی قالخیرام ائله،
نه سن او ائیواندان باخیرسان چؤله.
گرک بو دهلیزه بیر محل قویام،
او سویوق مرمر ده نئجه وار قالیب!
او منه تای دئییل، من اونا تایام،
اوندا سویوقلوغا اعتبار قالیب.

واللاه، آغاج دؤنمز، داش بئله دؤنمز.
اینسانین اولفتی نه دؤنوک اولور!
بیر اۆزۆ آلیشان، بیر اۆزۆ سؤنن،
اۆزۆن داش صیفتی نه دؤنوک اولور!

بیر وار چیچک کیمی سولاسان- بو هئچ!
او سولا، سن تنها قالاسان- بو هئچ!
عؤمور قالا-قالا، گون قالا-قالا،
الویداع دئیه‌سن دوغما بیر یولا!
سمتینی اونودوب هر یؤنه گئدن،
اینسانین یوللاری نه دؤنوک اولور!
بیر قوجاق سئوگینی داشلارا چالیب،
بیگانه-بیگانه یانیندا بیتن،
اینسانین قوللاری نه دؤنوک اولور!
نه یاخشی او یوللار آغلایا بیلمیر!
نه یاخشی بو قوللار دانیشا بیلمیر!

#موسی_یعقوب
#شعر_اوجاغی
@SheirOcagi
324
|شعر اوجاغی|

27 Nov, 18:37

دیالوق

▫️- سنه گووَنن بیرینه هئچ واخت یالان دئمه، سنه یالان دئین بیرینه هئچ واخت گوونمه!

📺 Dexter
2006- 2013 آمریکا
#شعر_اوجاغی
@SheirOcagi
344
|شعر اوجاغی|

27 Nov, 18:07

▫️«اؤلومدن سونرا حیات وارمی؟» دوغرو سؤال بو دئییل.
دوغرو سؤال بودور:
«اؤلومدن اؤنجه یاشاییبسان‌می؟»

#اوشو
#شعر_اوجاغی
@SheirOcagi
360
|شعر اوجاغی|

27 Nov, 12:04

▫️مذهب اینساندان، داها صبیرلی، داها اؤزگور، داها مرحمت‌لی، داها ایگید بیر اینسان یارادا بیلمه‌لی‌دیر.
بیر مذهب بو ایشی گؤره بیلمیرسه، شر، پیسلیک و حوقّابازلیقدان باشقا بیر شئی دئییل.

#آلبرت_انیشتین
#شعر_اوجاغی
@SheirOcagi
378
|شعر اوجاغی|

27 Nov, 09:54

▫️ائولر، هئیکلی‌دیر آیریلیق‌لارین،
داها کند دئییل کی... بیر موزئی‌دی بو.
آچیلیر آنامین خاطیره‌سی‌یله،
باغلانیر آتامین آددیم سسی‌یله.

ائولر، هئیکلی‌دیر آیریلیق‌لارین.
هر اوشاق بیر نسله آبیده‌دیر، باخ!
عصرین او اوزودور کئچدیگیم جیغیر،
عؤمرون او یانی‌دیر آتلاندیغیم آرخ.

داها کند دئییل کی... بیر موزئی‌دی بو.
ایللری نار کیمی یادداشا سیخیر.
گیریشی یئنه ده ایشیق‌گلَنه،
چیخیشی ایت‌هورن طرفه چیخیر.

قارداش عوضی‌دیر بوردا هر چینار،
سؤیودلر دوغماجا باجی کیمی‌دیر.
آنالار... آنالار آنام عوضی،
آتالار باشیمین تاجی کیمی‌دیر.

هر جیغیر یادداشا آچیلان قاپی،
هر آددیم دوغولان یئنی حیات‌دی.
داها کند دئییل کی... بیر موزئی‌دی بو،
گؤردویوم نه وارسا ائکسپونات‌دی.

#سرواز_حسین‌اوغلو
* سرگیده، موزئیده نوماییش ائتدیریلن محصول‌لار
#شعر_اوجاغی
@SheirOcagi
358
|شعر اوجاغی|

27 Nov, 08:32

▫️قیزی ائله تربیت ائتمک لازیمدیر کی، اونو هئچ‌ بیر گوج سوروکله‌ییب چوروک، معناسیز توپلوم‌لارا آتا بیلمه‌سین.

📚 قاسیرغا
#تئودور_درایزر
#شعر_اوجاغی
@SheirOcagi
357
|شعر اوجاغی|

27 Nov, 08:24

▫️اؤزله‌دیم...
سؤیله‌یه‌جکلریم بو قدر،
قیسا و درین.

#جمال_ثریا
#شعر_اوجاغی
@SheirOcagi
365
|شعر اوجاغی|

26 Nov, 17:54

▫️اوره‌یی تمیز حیسلرله دؤیونن یئته‌نک‌لی اینسانین، حیاتدا اؤزونه یئر تاپا بیلمه‌مه‌سی، پیس آلیشقانلیق‌لارین الینده عاجیز قالیب اونلارین اسیرینه چئوریلمه‌سی و سونوندا بدبخت اولماسیندان داها کدرلی بیر منظره، یقین کی یوخدور.

📚 ایکی شهرین حئکایه‌سی
#چارلز_دیکنز
#شعر_اوجاغی
@SheirOcagi
409
|شعر اوجاغی|

26 Nov, 13:53

▫️ایندی یالنیز بیرجه آرزوسو وار ایدی: کاش باشینین اوستونده بیر دام اولایدی، اونا تامامی‌یله یاد اولان بو آچیق گؤیون آلتیندا بیرجه دقیقه ده قالمایایدی.

📚 دهشتلی سیرّ
#استفان_زوییگ
#شعر_اوجاغی
@SheirOcagi
299
|شعر اوجاغی|

26 Nov, 10:47

▫️چرچیوه

کیمیم وار، شک‌لنَم، کیمیم ده گئده،
گؤرن گئدن‌لرین کیمینده گئده؟
فوتوسو بیر تانیش جیبینده گئدن،
شکیل چرچیوه‌سی کیمی‌یم ایندی.

شکیل چرچیوه‌سی کیمی‌یم ایندی،
سؤال‌لار قلبیمده قارا داش قالیب.
منیم بیر صیفتیم وار ایدی اوردا،
ایلاهی، نئجه ده یئری بوش قالیب!

هاردا، هانسی قورخو قوووب، تئی‌له‌ییب*؟
گلمیر بیر خاطیره‌ن اله، چرچیوه!
سنده‌کی شکیلی ایللر نئیله‌ییب؟
نه‌دن بوش قالیبسان بئله، چرچیوه؟!

دنیز آساجاقدیم، داغ آساجاقدیم،
بیر بارلی-بهَرلی باغ آساجاقدیم،
نه آسسام دیپ‌دیری، ساغ آساجاقدیم،
نه‌دن بوش قالیبسان بئله، چرچیوه؟!

یئنیدن قاییدا عؤمور، یئنیدن،
بیر جان باهاسینا آلام چرچیوه.
گتیریب او شکلی یئریندن آسام،
بیر ده اؤپوب قویام گؤزومون اوسته.
بیر ده او شکیله اولام چرچیوه.

#سرواز_حسین‌اوغلو
* ایتی بیر شئی‌له یارالاماق
#شعر_اوجاغی
@SheirOcagi
315
|شعر اوجاغی|

26 Nov, 07:49

دیالوق

▫️- بیلمیرم بو دونیانین هاراسیندان گلدین. آما ایندی منیم دونیامسان.

🎬 Kites
2010 آمریکا
#آنوراگ_باسو
#شعر_اوجاغی
@SheirOcagi
298
|شعر اوجاغی|

26 Nov, 07:17

▫️چوخ گوناه ایشله‌دیم، قورخورام.
آیاقلار آلتینا آل منی آنا! جنّته گئتمک ایسته‌ییرم.

#جمال_ثریا
#شعر_اوجاغی
@SheirOcagi
325
|شعر اوجاغی|

25 Nov, 18:56

▫️گئتمک اوچون بیر آدام یوخسا، بیر یئر یوخسا، اوندا نه جور اولسون؟ آخی هر بیر آدام گرک هئچ اولماسا بیر یئره گئده بیلسین.
بلی، ائله واخت اولور کی آدام موطلق گرک بیر یئره گئتسین- هارا اولور اولسون.

📚 جنایت و جزا
#فئودور_داستایئوسکی
#شعر_اوجاغی
@SheirOcagi
329
|شعر اوجاغی|

25 Nov, 16:52

▫️اوتوپورتره

من بیر عشق یاشادیم، بیر عشق یاشادیم،
فرهاددا، شیرین'ده، اصلی-کرم'ده.
مجنون صحرالاری روحومدا گزدی،
لئیلی بیر شام کیمی اریدی منده.

من اولدوم غم دولو قلبین همدمی،
مغلوب سئودالارین یاسینی توتدوم.
گلیب مندن کئچدی یوسیف'ین غمی،
زولئیخا دردینی منده اونوتدو.

گلیب مندن کئچدی بوتون سئوگی‌لر،
بوتون سئودالارا کؤنول باغلادیم.
پونهان دردلریمه بیر پرده کیمی،
هر قلبین غمینی توتوب آغلادیم‌.

منم یئر اوزونده ان بختلی آدام،
وارام سئودالارین اولدوغو یئرده.
بوتون گئدن‌لرله گئدیب دونیادان،
بوتون گلن‌لرله گله‌جم بیر ده.

#سرواز_حسین‌اوغلو
#شعر_اوجاغی
@SheirOcagi
329
|شعر اوجاغی|

25 Nov, 08:14

دیالوق

▫️- دیلَنچی‌لیگین هر جۆره‌سی پیسدی، عشقی دیلنمک ایسه هامیسیندان پیسدی.

🎬 شبهای روشن ۱۳۸۱
#فرزاد_مؤتمن
#شعر_اوجاغی
@SheirOcagi
400
|شعر اوجاغی|

25 Nov, 07:51

▫️سونونجو قاپی

بو دا سونونجو قاپی،
چیخیب گئدیرسن سن ده.
گؤررسن کی نه ائو وار،
نه قاپی وار دؤننده.

کئچمیشه قاییتماغا،
نه ایز، نه ده جیغیر وار.
گئدیب صحرایا چیخیر،
قاییتدیغین جیغیرلار.

ایستی کولک‌لر دؤیور،
قوروموش بیر آغاجی.
ایلیشیب بیر بوداغا،
اسیر لئیلی'نین ساچی.

بیر لئیلک یووا قورور،
اؤتن گونون آهیندان.
تانری دا چوخدان کئچیب
آدامین گوناهیندان.

موسی‌ٰنین خبری یوخ،
بالیغی سو آپاریب.
دردیمی دیمدیگینده،
گؤتوروب قو آپاریب.

داشیییرام حلب'ه،
مین کاروانلیق یوکومو.
یولوما ایشیق سالیر،
حوّا'نین تبسّومو.

#ثاقیف_قاراتورپاق
#شعر_اوجاغی
@SheirOcagi
392
|شعر اوجاغی|

25 Nov, 07:02

▫️قارشیدان قارشییا کئچر کیمی سئو منی:
اؤنجه منه، سونرا منه، سونرا یئنه منه باخ!

#جمال_ثریا
#شعر_اوجاغی
@SheirOcagi
333
|شعر اوجاغی|

24 Nov, 20:08

▫️اوره‌ییمین درینلیگینده بو آداملارا یازیغیم گلیردی. اونلار گولنده من آغلاماق ایسته‌ییردیم.

📚 اؤلوم محبوسونون سون گونو
#ویکتور_هوگو
#شعر_اوجاغی
@SheirOcagi
372
|شعر اوجاغی|

24 Nov, 19:18

▫️واختیندان داها دا فایدالی شکیلده استفاده ائدیب یاتدی.

#گونار_گونارسون
#شعر_اوجاغی
@SheirOcagi
386
|شعر اوجاغی|

24 Nov, 13:49

دیالوق

▫️- ۳۴ یاشیمدا سرخوش و پولسوز بیر حالدا اؤلوب ده، خالقین دیلینده اولماغی، ۹۰ یاشیما قدر پوللو و هوشو باشیندا یاشاییب دا کیمسه‌نین منی خاطیرلاماماسیندان اوستون توتورام.

🎬 Whiplash
2014 آمریکا
#دیمین_شزل
#شعر_اوجاغی
@SheirOcagi
417
|شعر اوجاغی|

21 Nov, 10:31

▫️بیزیم سورونوموز اوردان باشلادی کی، بیر-بیریمیزی بیر اینسان کیمی یوخ، بیر فورصت کیمی گؤردوک.

#حسین_پناهی
#شعر_اوجاغی
@SheirOcagi
76
|شعر اوجاغی|

21 Nov, 10:00

▫️درد چیچک‌لری

سن هله بیلمیرسن نئجه قیریلیر،
نئجه چیلیک‌لنیر ایچیندن آدام.
بوغولور، هاواسی چاتیشمیر ائوده،
گؤزلری قاپیدا قالیر هر آخشام.

هر گون اؤز کولوندن بیر ده دوغولور،
دردی چیچک‌له‌ییر اوزونده دن-دن.
قارا گونلرینی آغ ساپ ائله‌ییب،
هر گئجه کئچیریر اؤز کیپریگیندن.

سن هله بیلمیرسن، نئجه عذابدی،
میصراع-میصراع اؤلوب سؤز-سؤز دوغولماق!
داغیدیب قانینی نئچه تیکانا،
تورپاغا قاریشیب گولده یوخ اولماق.

گؤزلرین قارالار بویلانسان بیر آز،
اوره‌یین چکیلر اوزاندیقجا یول‌.
گئری دؤن، هله کی تزه‌دی یارا'ن!
گون گلر، منه ده دئیرسن: «ساغ اول!»

حئییف، اودا دوشدوم من اؤز دیلیمدن!
ایندی توستوله‌ین باجاسیز ائوم.
عؤمرومو-گونومو یئدی آداملار،
اورک‌می قویدولار- تزه‌دن سئوم؟

#ثاقیف_قاراتورپاق
#شعر_اوجاغی
@SheirOcagi
94
|شعر اوجاغی|

21 Nov, 09:19

دیالوق

▫️- حیات حارام اولمامالی بیر هدیّه‌دیر. سیز حیاتین سونراکی ورَغینین نه‌ اولاجاغینی بیلمیرسینیز. هر بیر گونونون اوستونده حئساب گئتمه‌یی اؤیرنمه‌لیسن!

🎬 Titanic
1997
#جیمز_کامرون
#شعر_اوجاغی
@SheirOcagi
117
|شعر اوجاغی|

21 Nov, 07:37

▫️بیز سیندیق، داها دا سیناریق؛
کیمسه توخونا بیلمز بیزیم گوناهسیزلیغیمیزا!

#جمال_ثریا
#شعر_اوجاغی
@SheirOcagi
124
|شعر اوجاغی|

20 Nov, 19:53

▫️هئچ بیر زامان، هئچ بیر یئرده حیاتین هارایی جاوابسیز قالماییب؛
سنین گؤزل اوره‌یین، منیم هارای‌لاریمین جاوابی‌دیر.

#احمد_شاملو
#شعر_اوجاغی
@SheirOcagi
191
|شعر اوجاغی|

20 Nov, 19:47

▫️ضحّاک ایلان‌لاری‌یلا سارینمیشدیر آیاغیم،
اونونچوندور گؤزومدن میرواری یاغدیرماغیم.

آیاغیما ساریلمیش ایکی افعی ایلاندان،
تاواداکی بالیق‌تک قوورولور قلب، یانیر جان.

آه چکرکن تندیرتک آلوولانیر بدنیم،
اودلو ایلان‌تک چیخار آلوو آغزیمدان منیم.

ساتاشدیقجا گؤزومه کئشیکچیسی محبسین،
قلبیمین یارالاری قؤور ائدیر حزین-حزین.

بیر قودوز ایت زینداندا کئشیکچی‌م اولموش منیم،
آغلار گؤزوندن شیرین یوخوم قووولموش منیم.

سودان قورخار -دئیرلر- قودوز ایت قاپمیش اینسان،
بونونچوندور کی من ده قورخورام گؤز یاشیمدان.

اوره‌ییمین اودوندان گؤز یاشیم اولموش بوخار،
چکدیگیم سویوق آهدان قیشا دؤنور هر باهار.

نار دانه‌سینه بنزر تؤکدویوم گؤز یاشیندان،
اوزوم اولور هر گئجه شفق کیمی آل-الوان.

قیچیمی زنجیر کسیب، توپوغومدان قان آخیر،
ائله بیل یاغیش سئلی ايٖری نووداندان آخیر.

بلکه آهیمدان دمیر قیزاراراق اریییر،
اونونچون ده سس‌لنیب دمیر «الامان!» دئییر.

بو دمیر خالخالیمی آچماق ایسته‌ین زامان،
زینقیروو‌ کیمی مندن اوجالدی ناله، فغان.

ضعیف‌لمیش ووجودوم بنزر ایپک بیر تئله،
بو نازیک ایپک تئل ده غوصّه‌دن گلمیش دیله.

دیوارلار سئیر ائله‌دی منیم سولغون رنگیمی،
اونلارین دا اوزلری اولدو زعفران کیمی.

گؤیه فوّاره ووردو اوره‌ییمدن آخان قان،
اؤز یولوندا پالچیغا باتیب قالدی کهکشان.

تیکانلیغین ایچینده چیرپینان بولبولم من،
اومیدیمی کسمیشم گولوستانین گولوندن.

انصاف، مروّت گولو قالمامیشکن دونیادا،
ائتدیگیم بو هارایدان، بو ناله‌دن نه فایدا؟!

جییَریمین قانیندان جییَریم دۏیموش دئیه،
معده‌مین مئیلی یوخدور نه سویا، نه چؤره‌یه.

جان بوردا محو اولورکن، نه‌یه گرک‌دیر بدن؟
اؤلورکن ائو صاحیبی، تاپیلارمی ائو گودن؟

تورپاقدان ائو تیکنلر آخیردا تورپاق اولدو،
تیکدیکلری سارایلار، کاشانه‌لر اوچولدو.

سئل جوشدو، دالغالاندی، یامان توفان قوپاردی،
او، تک پالتاری دئییل، درزینی ده آپاردی.

بیر قصّاب دوکانی‌دیر بو فلک ایلک چاغیندان،
قان آخیر دامجی-دامجی قصّابین بیچاغیندان.

بیر یان قوزو جمده‌یی، بیر یاندا وار تره‌زی،
نه کؤکلوک، نه آریقلیق دوشوندورور بیر کسی.

یاغلی، اوجوز بیر تیکه منیمسه‌میش هر آلچاق،
منیم تیکه‌م هم آریق، هم ده باهادیر آنجاق.

دوکاندا دؤش، قابیرغا، اورک‌دیر دیَن گؤزه،
ایسته‌دیگی تیکه‌نی قصّاب وئرمیر هئچ کسه.

آبیر-حیا گئدینجه قورخو قالخیر اورتادان،
نه‌یین دردینی چکر سوروسو باتمیش چوبان؟

چیخیب گئتدی، شهردن اوزاقلاشدی کاروان،
گؤزَتچی ده باج آلیب چکیلدی، گئتدی یولدان.

دوه پالچیقدا یانمیش ایلدیریم ضربه‌سیندن،
تورکمن آزاد ائدیلمیش دوه‌نین وئرگیسیندن.

آرزولاردیم حیاتدا صداقت، دوزگون ایلقار،
اومیدلریم پوچ اولدو، وفاسیز چیخدی دلدار.

داد چکدیم فراسَتسیز، آنلاماز بؤیوک‌لردن،
بؤیوک غملر بو کیچیک‌ کؤنلومو ائتدی مسکن.

ظنّ ائدیردیم دونیادا وار وفالی آداملار،
یاریم وفاسیز چیخدی، سهویمی ائتدیم اقرار.

یوسیفین ده باشینا بلالار آچدی دؤوران،
قارداشلار آراسیندا باش وئرن بیر نفاقدان.

بیر ایلین محصولودور منیم گونده‌لیک غمیم،
اوزون ایللر بویونجا غم اولاجاق همدمیم.

بودور، یئنه تؤرَتمیش یاشیل یئلکَنلی فلک،
فیرتینالار قوپاران، گمی‌قیران بیر کولک.

یوخ، بو توفان یارانمیش قضا بویروغو ایله،
قوی دونیادا مؤمن‌لر یاشاسین بوندان بئله!

خلاص اولوم دئیه من، بیر قودرتلی حؤکمدار،
چالیشیر وار گوجویله؛ آرتیق نه مؤحنتیم وار؟!

«خاقانی»نی اؤلدورسه شاه، اونون ساراییندان،
قصاصینی آلار بیر شاه‌نیشانلی حؤکمران.

#خاقانی_شیروانی
#شعر_اوجاغی
@SheirOcagi
188
|شعر اوجاغی|

20 Nov, 11:21

▫️اینانج‌لارینی اؤزونه ساخلا، اینسانلیغینی بوتون دونیایا گؤستر!

#ویلیام_شکسپیر
#شعر_اوجاغی
@SheirOcagi
241
|شعر اوجاغی|

20 Nov, 11:13

‍ ▫️گؤرسن کی سویوقدور اوز توتدوغون یئر،
بوردا گؤزله‌ییرم، دؤنرسن گئری.
او آدام خطرینه دَیسه، خبر وئر!
قوشون‌تک چکه‌رم خاطیره‌لری.

سن منیم قلبیمدن چیخدین دونیایا،
یئری، گؤزلریمین اوستونده یئری!
نیشان اوزویونو آلمادیم، آمّا،
نیشاندی اوزونده گؤزومون یئری.

فیکیرلی اللرین گلیر یادیما،
ساچلارین سینه‌مه داغیلان گئجه.
سنی آیاقلارین آپاردی هارا؟
بیر واخت گتیرمیشدی سنی بئله‌جه‌.

گؤزومو یاش اووار، اوزومو کولک،
سن بیر آز دونیانی قان-یاش گؤرَرسن.
سن منی نه واختسا اونوتسان، اورک،
قاییدیب یئریمده بیر داش گؤررسن.

ایشیق سپه‌له‌رم سنین یولونا،
گؤزومون ایشیغی سؤنَنه‌ کیمی.
من قوجا کیشی‌یم، گئتدین، دایانما!
اؤلمه‌رم، گئرییه دؤنَنه کیمی.

#قشم_نجف‌زاده
🎙 سالار موغانلی
#شعر_اوجاغی
@SheirOcagi
247
|شعر اوجاغی|

20 Nov, 10:11

▫️سن ده گئده‌جکسن.

سن ده گئده‌جکسن بیر گون، بیلیرم،
بیرینجی گؤروشدن دویموشدوم بونو.
یا اؤلوم‌له بیتیر، یا آیریلیق‌لا-
بوتون گؤروش‌لرین حئییف کی سونو.

بو دا بیر سیناقدی، فیکیر ائله‌مه!
کئچَنه «گوذشت» دئ، اولان اولاجاق!
نه اوزول منیمچون، نه عوذور ایسته،
یوخ...یوخ... لازیم دئییل منه آجیماق!

چتیندی بیر عؤمرون یوکونو چکمک،
اؤزونه گؤره‌یمیش هر داغین قاری.
نه قدر وعدینه خلاف چیخان وار!
گل، منه تانیتما سن آداملاری!

من یاخشی بیلیرم نه‌دیر آیریلیق،
ایسته‌سن سوراقلا، ایسته‌سن آرا!
سنین خبرین یوخ، نئجه سیزلاییر،
کؤکسومون آلتیندا بیر کؤهنه یارا.

یاخشی تانیییرام من کی بو غمی،
بیلیرم دادینی اونودولماغین.
آستاجا نه ایسه پیچیلداییرسان،
تیتره‌ییر اللرین، اسیر دوداغین.

نه‌یین وار گؤتوردون... حاضیرسان آرتیق.
ییر-ییغیش ائله‌دین، باخ، بو دا بوخچان!
قصداً لنگیییرسن، بیرجه سؤز دئییم:
من ده چوخ ظالیمام، دئمیرم «دایان!»

#ثاقیف_قاراتورپاق
#شعر_اوجاغی
@SheirOcagi
244
|شعر اوجاغی|

19 Nov, 20:22

▫️زورلا جاذیبه‌لی اولماغا چالیشانلار، هر زاماندان داها چوخ اییرنج گؤرونورلر. جاذیبه اینسانین ذاتینده‌دیر.

#جبران_خلیل_جبران
#شعر_اوجاغی
@SheirOcagi
265
|شعر اوجاغی|

19 Nov, 16:45

▫️روحوم بو جان مولکونو ترک ائدیب گئدن کیمی،
راحاتلیغین پریسی آتیب گئتدی قلبیمی.

بیزی باریشدیراجاق نفَس ایدی آرادا،
باش آلیب اورتالیقدان بیر آندا چیخدی او دا.

قالمیشدی تکجه کؤلگه‌م، او دا گئتدی آرادان،
آرتیق آدیم، نیشانیم سیلینمیشدیر دونیادان.

ائویمین دؤرد دیواری باجا کیمی سؤکولدو،
آستاناسی داغیلدی، سقفی یئره تؤکولدو.

کؤنلوم نرد اویونوندا دوشموشدو شش‌خانایا،
قانلی گؤز یاشیم گرک اون یئددینی سانایا.

دۇزلۇ سو گؤزلریمدن آخدیقجا هئی تورپاغا،
آیاغیمین آلتینی دؤندرمیشدیر دۇزلاغا.

فلک منیم قلبیمی نیشانا آلدی، آتدی،
آتدیغی اوخ ایشله‌ییب سومویه، جانا چاتدی.

دونن گئجه آهیما هدف ائتدیم گؤیلری،
قانلی بولود بیر آندا چولغالادی هر یئری.

اوره‌ییمین باشیندا بیر کدر توتدو مسکن،
دئیه‌سن گئتمه‌یه‌جک او هئچ زامان بو یئردن.

گلیب چاتدی دوستومدان مکتوب گتیرن او قوش،
او قوش کی سحر-سحر اؤز یوواسیندان اوچموش.

لاکین، او گؤردو اصلا آیاغا قالخمادیم من،
غضبله ائندی یئره، کدرله قالخدی یئردن.

بیر اژدها یاتیردی آیاغیمین آلتیندا،
بونا گؤره آیاغا دورا بیلمه‌دیم اوندا.

آیاغیمین اوستونه قویولموشدو دمیر داغ،
آیاغی داغ آلتیندا اولان قالخار نه سایاق؟

«خاقانی»نین آیاغی آچیق اولسایدی، البت،
قالخاردی اؤز یئریندن، گؤسترَردی او حؤرمت...

#خاقانی_شیروانی
#شعر_اوجاغی
@SheirOcagi
330
|شعر اوجاغی|

19 Nov, 10:37

▫️یادیمدادیر، عاشیق اولدوغوم زامان، یول یئریمکدن بئله چکینیردیم.
سانکی کؤکسومده باهالی آخار مادّه ایله دولو بیر قاب وار ایدی و من بو مادّه قابدان آخیب گئده‌جک دئیه قورخوردوم.

📚 رودین
#ایوان_تورگنیف
#شعر_اوجاغی
@SheirOcagi
290
|شعر اوجاغی|

19 Nov, 08:04

▫️بو دا قیسمت‌دی بلکه ده،
من سنی گئج تاپدیم بئله.
حئییف کی سنی تاپاندا،
عؤمرومو وئرمیشدیم یئله.

ایندی کولک‌لر دنله‌ییر،
ساچیمداکی آغ دنلری.
خاطیرلاماق دا ظولوم‌دو،
بیلیرسن‌می اؤتن‌لری.

ائه...گؤزوم یومولسون، اوندا-
بس سنی گؤرمه‌دیم نییه؟!
او گوندن بوکدوم باختیمی،
اؤز الیم‌له گؤی اسکی‌یه.

من چوخدان کئچیب گئتمیشم،
ایندی سن گلن یوللاری.
گؤزلریمه باخیب دا گؤر،
قلبیمه دوشن خاللاری!

من نئجه یاشاییم ایندی
بیله-بیله سندن اوزاق؟
سن کؤکسونو اؤتور ائله،
نه اولسا منه اولاجاق.

#ثاقیف_قاراتورپاق
#شعر_اوجاغی
@SheirOcagi
307
|شعر اوجاغی|

19 Nov, 07:37

▫️سسینده نه وار، بیلیرسن‌می؟
سؤیله‌یه بیلمه‌دیگین سؤزجوک‌لر وار.
کئشکه بیرینی تام ایتیرمه‌دن، اونا اولان بوتون سئوگیمیزی هایقیرا بیلسک!

#جمال_ثریا
#شعر_اوجاغی
@SheirOcagi
276
|شعر اوجاغی|

18 Nov, 19:51

دیالوق

▫️- آدامین اویوشدوروجو مادّه‌لرین ایچینده بوغولماسی، حیاتلا باجارا بیلمه‌سیندن داها راحاتدی. ایسته‌دیگین شئیی چالماق، اونو زحمتله اله‌ گتیرمکدن، اوشاغی جزالاندیرماق، اونو تربیت ائتمکدن داها قولای‌دیر.
عشقین هزینه‌سی وار، چالیشماق و امک ایستر.

🎬 Se7en
1995 آمریکا
#دیوید_فینچر
#شعر_اوجاغی
@SheirOcagi
365
|شعر اوجاغی|

18 Nov, 18:43

▫️اؤلومدن اویانا

اؤلومدن او یانا یول وارسا اگر،
اونو من گئتمه‌لی، من آشمالی‌یام.
اؤلدوروب اؤلومو، نئجه دئیرلر-
اولدوزدان اولدوزا یول آچمالی‌یام.

اؤلومدن او یانا یول وارسا اگر،
یولومون یولوندا اؤلمه‌یه دیَر.
اوندا من نه حاقلا سورونمه‌لی‌یم؟
گؤیده سوزمه‌لی‌یم اوچان لئی¹ کیمی.
اوندا من دونیانی بورونمه‌لی‌یم،
اؤلمز «هومر» کیمی، «گالیله» کیمی.

اؤلومدن او یانا یول یوخسا اگر،
بس نییه اؤلمه‌ییر بؤیوک اثرلر؟
بس نییه یورولمور، اؤلوملوک اولمور
دونیا یولجولاری «نظامی»، «بالزاک»؟
نییه اونودولمور، هئچ اونودولمور
شرقلی «قاچاق نبی»، غربلی «اسپارتاک»؟

اؤلومدن او یانا یول وار اصلینده،
اگر بیز یوللاری یاریدا² بیلسک.
اگر بو یاشایان ساعاتدا، گونده،
اؤلومسوز صاباحی یارادا بیلسک.

اؤلومدن او یانا یول وار اصلینده.

#آغا_لاچینلی
¹- بیر ییرتیجی قوش
²- یئرینه یئتیرمک- باشا وورماق (Yarıtmaq)
#شعر_اوجاغی
@SheirOcagi
322
|شعر اوجاغی|

18 Nov, 17:48

▫️İtirazım var...

#Bülent_ersoy
@SheirOcagi
290
|شعر اوجاغی|

18 Nov, 16:52

▫️بیر کیشی، سحر تئزدن
ایشه گئتمک اوچون یوخودان اویانیر.

بیر قادین، سحر تئزدن
گونش چیخسین دئیه اویانیر.

او قیز،
قارشیداکی بالکوندا ساچلارینی شریده سریب
سحَرینی پنجره‌مدن آسسین دئیه اویانیر.

#زاهی_وهبی
#شعر_اوجاغی
@SheirOcagi
321
|شعر اوجاغی|

18 Nov, 10:47

▫️ان آز منیمکی قدر آنامین دا آهی توتار سنی،
بورنومدان گتیردیگین سود، اونوندور سونوجدا.

#جمال_ثریا
#شعر_اوجاغی
@SheirOcagi
343
|شعر اوجاغی|

18 Nov, 08:44

▫️دورنا

بیر یاز گئجه‌سی یوخوما،
بیر دورنا قوناق گلمیشدی:
«سن نییه آیریلدین قاطاردان بئله،
هاردان اوچوب گلدین یوخوما منیم؟
سن نییه سینه‌مه چیرپدین اؤزونو،
باخمادین آزیما-چوخوما منیم؟

آخی من کیمم کی؟ سؤز شکلی چکن،
مین ایلدی اسیرم قلمین اوستده.
کؤنلومده قوپوبدو نوحون توفانی،
چیخیرام ساحیله آغ گمی اوستده.

سن نئجه بیلدین کی یانیب قانادیم؟
ائله او زاماندان گؤیه حسرتم.
عؤمرومون-گونومون سهمانی ایتیب،
نه واختدی سئوگیدن قالمیشام یئتیم.

نئجه یاشایاریق ایکیمیز بئله؟
بیزیمکی توتارمی؟ سن قوش، من آدام.
بیر گون گؤیلر اوچون داریخاجاقسان،
آچیلاندا سحر، دوشنده آخشام.

سن هاردان بیلدین کی اوچا بیلمیرم؟
گلمیسن دردیمه علاج ائتمه‌یه.
نئیله‌ییم؟ منیم کی قانادیم یوخدو،
بیر گون هاوالانیب سنله گئتمه‌یه.

قوشلار اوچوب گئدیر، سن ده دایانما!
اوردا سندن اؤترو داریخیر یووان.
گون گلر منیم ده قانادیم چیخار،
اوچارام، اوچارام لاپ یانیناجان.»

#ثاقیف_قاراتورپاق
#شعر_اوجاغی
@SheirOcagi
365
|شعر اوجاغی|

07 Nov, 20:35

▫️و گؤزلرین،
اوزاقلیغینا رغماً،
هله ده،
سئوینجه یئتیشن
ان قیسا یولدور.

#سالم_عطیر
#شعر_اوجاغی
@SheirOcagi
113
|شعر اوجاغی|

07 Nov, 19:49

▫️هامینی سئویندیرمک ایسته‌ییرسن‌سه، یؤنه‌دیجی و یا باشچی اولما، دۏندورماساتان اول!

#استیو_جابز
#شعر_اوجاغی
@SheirOcagi
159
|شعر اوجاغی|

07 Nov, 19:14

▫️بیز، باشقالارین یانلیش‌لارینا ضابیطه‌لی داورانان قاضی‌لریک؛ اؤز یانلیش‌لاریمیزا ایسه گؤزیومان سووونماچی وکیل‌لر.

#وین_دایر
#شعر_اوجاغی
@SheirOcagi
153
|شعر اوجاغی|

07 Nov, 18:43

دیالوق

▫️- اؤنجه‌دن یوخو گؤرمکدن قورخاردیم، آما ایندی قورخمورام. نه قدر ده پیس یوخا گؤرسم، اویاندیغیمدا دوروم اوندان داها پیس‌دیر.

🎬 Alien, Resurrection
1997 آمریکا
#ژان‌_پیر‌_ژونه
#شعر_اوجاغی
@SheirOcagi
152
|شعر اوجاغی|

07 Nov, 09:57

▫️چارپایی¹

یات، آی منیم جان-جییاریم، بالاجام!
بو آی سنه بیر چارپایی آلاجام.
اوخویورسان... آخی یئددی یاشین وار،
هر باخاندا کؤنلوم سندن یاشینار².
بئشیگه ده باش قویمادین باری هئچ،
اوتانیرام... گوناهیمدان اؤزون کئچ!
یئمه‌یینی دوزمه‌سم ده جیره‌یه،
گئییمینی قوربان وئردیم چؤره‌یه.
هئچ بیلمه‌دیم بو یاخشیدی، یاماندی،
گومان بالا، وار-یوخوموز گومان‌دی.
اوتانیرام... بو سوچومدا عوذور گز،
اَیین دؤزر، قارین یاماق گؤتورمز.

یوخ، بلکه ده آلینسایدی چارپایی،
گؤزل باجین هئچ اولمازدی یئر پایی.
ایراق سندن، قولاغیما قورغوشون!
الدن اوچدو اوغول آدلی بیر قوشوم.
من اونون دا مزارینا بورجلویام،
شادلیق هانی، غم آریدام، درد یویام؟

یات، آی قوزوم، کئشیگینده من دوروم،
قوی عؤمرومو قایغیلارا یۏندوروم!
یوخ، اونسوز دا اوتانیرام، اوتانی،
باشا دوشسن باغیشلارسان آتانی.
اوتانیرام... تا نه گلیر الیمدن؟
«گؤزون آیدین» دئمه‌میشم هله من.
هله سنه وئرمه‌میشم او پایی،
اؤنه دوشوب چؤرک پایی، سو پایی.
واللاه، هله کؤنلومده‌دیر او ایستک،
بیر چارپایی آلیم گرک... ایسینک.
یات، آی قوزو! باشا وورجاق بو آیی،
دوروب بیزه گله‌جکدی چارپایی.

#آغا_لاچینلی
¹- یاتاق، تخت
²- اۆزونو اؤرتوب گیزلتمک
#شعر_اوجاغی
@SheirOcagi
402
|شعر اوجاغی|

07 Nov, 06:56

▫️تک یانلی عشق اینسانین بئینینی نئجه کوت‌لشدیریر، نئجه!
اونوتموشام سنین بیر باشقاسینی سئودیگینی.

#جمال_ثریا
#شعر_اوجاغی
@SheirOcagi
207
|شعر اوجاغی|

06 Nov, 19:51

▫️گوناه

گوناهیم یئرلره، گؤیلره سیغماز،
نه آللاه، نه بنده باغیشلار منی.
او قدر آغلادیم گوناهلاریما،
یویوب آپاراجاق یاغیشلار منی.

#زلیمخان_یعقوب
#شعر_اوجاغی
@SheirOcagi
271
|شعر اوجاغی|

06 Nov, 19:08

▫️سئویلدیگیندن امین اولان اینسان نئجه ده جسور اولور!

📚 خوشبختلیک احتیمالیمیز
#زیگموند_فروید
#شعر_اوجاغی
@SheirOcagi
250
|شعر اوجاغی|

06 Nov, 18:03

▫️عشق یاغیشی

ایلاهی، سونونجو سیناقدی‌می بو،
عؤمرون غوروبوندا نه‌یدی بو سئودا؟!
کؤنلومون مین ایلدی خارابا قالان،
سینیق قاپیسینی دؤیدو بو سئودا.

اوره‌ییم قوروموش بیر چای یاتاغی،
نئجه تاب گتیرسین بو سئله ایندی؟
گؤزومدن سوزولن ایکی داملا یاش،
دؤنه‌جک سینه‌مده بیر گؤله ایندی.

نه کولک، نه سازاق وئجیمه دئییل،
دورموشام بیر عشقین یاغیشی آلتدا.
کؤهنه یارالاریم تزه گول آچار،
ایسلانیب بیر ایلیق یاغیشین آلتدا.

هله بیتمه‌ییبمیش دئمک ناغیللار،
غفیل بیر آرزونون قانادی چیخار.
ائله اوخشایارام سینه‌مده آهی،
دیلیمدن مین غملی بایاتی چیخار.

ایلاهی! اومیدلر تومورجوقلاییب،
اوزانیب یوللاری قوجاقلایاجاق.
یارپاغی سارالان پاییز عؤمرومو،
باهارین قوللاری قوجاقلایاجاق.

گؤر هانسی فصیلده دوروب گلمیسن؟!
اوشویَن بوداقلار گون آختاراندا.
قوشلارین هامیسی کؤچوب گئدنده،
سرچه‌لر سویوقدا دن آختاراندا.

اوره‌ییم سونونجو یارپاق‌تک اسیر،
نه حسرت ایسته‌ییر، نه سئوگی گزیر.
ایللرله یولوندا دوردوم منتظر،
بس نییه گلمه‌دین من آختاراندا؟

#ثاقیف_قاراتورپاق
#شعر_اوجاغی
@SheirOcagi
270
|شعر اوجاغی|

06 Nov, 11:23

▫️ساغلیقلی بیر اینسان باشقا بیر اینسانی اصلا اینجیتمز، اینجیدن اینسان اؤزو اینجیییب دئیه اینجیدیر.
یارالی اینسانلار باشقالارا یارا وورماغی چوخ سئورلر.‌ اؤزونه سایغیسی اولمایانلار باشقالارینی آشاغیلاماغا، اونلارین اؤز‌گووَنینی و منلیگینی اللریندن آلماغا چوخ ماراقلی‌دیرلار.
و سن اونلارین یانیندا هئچ واخت بؤیومزسن، آشاغیلانارسان.

#یونگ
#شعر_اوجاغی
@SheirOcagi
285
|شعر اوجاغی|

06 Nov, 09:52

▫️تبریزین ناز بالالاریندان گؤزل بیر ایفا...
#تیق_تیق_خانیم

#اوشاق_تاماشاسی
#شعر_اوجاغی
@SheirOcagi
397
|شعر اوجاغی|

06 Nov, 08:33

▫️ایندی گل!

دؤزمز ایدین بیر آن دولا گؤزلریم،
گؤز یاشلاریم عومّان اولوب، ایندی گل!
قویماز ایدین یارپاغیما یئل دَيه،
كؤنلوم داغی دومان اولوب، ايندی گل!

یوخو اولوب گؤزلریمه دولاردین،
سئوگی اولوب اوره‌ییمه دالاردین،
گاه کۆسدوروب گاه کؤنلومو آلاردین،
یاخشی گونوم یامان اولوب، ایندی گل!

وارلیغیمی بوردان سیلیب گئدیرم،
«کؤنول» کیمی آجی گولوب گئدیرم،
هایانداسان؟ اجل گلیب، گئدیرم،
عؤمروم باغی خزان اولوب، ایندی گل!

#فاطمه_عبدی_کؤنول
#شعر_اوجاغی
@SheirOcagi
356
|شعر اوجاغی|

06 Nov, 08:20

▫️سن، اوزونه سورگون اولدوغوم قادین،
قارداشیم اولان گؤزلرینی اونودا بیلمه‌دیم.
اوشاغیم اولان آلنینی،
سئوگیلیم اولان آغزینی،
دوستوم اولان اللرینی اونودا بیلمه‌دیم.

#جمال_ثریا
#شعر_اوجاغی
@SheirOcagi
270
|شعر اوجاغی|

05 Nov, 18:20

▫️هر گؤردویونه اینانما، سوفی! اینسانلار همیشه دئییرلر: «گؤزومله گؤرمه‌سم، اینانمارام». آما سن هئچ گؤردوکلرینه ده اینانما!

📚 سوفی‌نین دونیاسی
#یوستین_گوردر
#شعر_اوجاغی
@SheirOcagi
301
|شعر اوجاغی|

05 Nov, 17:27

▫️هامی عئینی گونده کدرلنیب عئینی گونده سئوینسه‌یدی، اینسانلار بیر-بیرینی داها یاخشی آنلایاردی.

📚 قاتیل اوچون نئکرولوق
#موشفیق_خان
#شعر_اوجاغی
@SheirOcagi
333
|شعر اوجاغی|

05 Nov, 17:13

▫️اؤپوم...

گئتمه! یالواریرام آیاقلارینا،
دایان، آیاغینین توزوندان اؤپوم!
گؤزوندن اؤپمه‌رم، آیریلیق دوشر،
دانیش، کلمه-کلمه سؤزوندن اؤپوم!

گئتمه! یالواریرام آیاقلارینا.
یاز منی کؤنلونون واراق‌لارینا؛
قییمارام اوتانان یاناق‌لارینا،
گؤتور آیاغینی، ایزیندن اؤپوم.

گئتمه! بو «کؤنول»و سالما گؤزوندن!
آخی دویمامیشام شیرین سؤزوندن.
بیلیرسن اوتانار اوزوم، اوزوندن،
باغلا گؤزلرینی، اوزوندن اؤپوم!

#فاطمه_عبدی_کؤنول
@SheirOcagi
301
|شعر اوجاغی|

05 Nov, 16:33

▫️سؽلدیریم‌¹لا یولچو قالخدی.

سرت سیلدیریم
شؽریم-شؽریم²،
تارؽم-تارؽم³،
گؤرکمینده اؤزگه قؽریم⁴.

سیلدیریم‌لا یولچو⁵ قالخدی،
داشلار اونو آز پئی‌له‌سین⁶!
گئتدیگی یول گئری آخدی،
او نئیله‌سین، بس نئیله‌سین؟

یول یولچونو یئره سردی،
ییخیب اونو‌ داش دبَردی.
کؤتوک‌لر ده قوپوب دوشدو،
او دیرماشدی، یول سوروشدو.
یول یولچویلا دۆشونوشدو⁷.

چوخ دوشوندو جاوان اوغلان:
یول یولچونو ایَرمی هئچ؟
او قلبیده آختاریلان،
بو ایتکی‌یه دیَرمی هئچ؟

یوخاریدا قورخونج بره،
آشاغیدا درین دره.
یورغون یولچو یۏرتوب⁸ قالخدی،
او دونیانی گؤره-گؤره.
یولچو قالخدی، دؤنوب باخدی.
گئده-گئده داشلیق گؤردو.
ذیروه‌ده ده بوشلوق گؤردو.

#آغا_لاچینلی
¹- دیک قایا- یارغان
²- چاتلاق-چاتلاق
³- برک دارتیلیب چکیلمیش
⁴- گؤرکم- گؤرونوش
⁵- یولا، سفره چیخمیش
⁶- وورماق- یارالاماق
⁷- دوشمن اولماق- کین ساخلاماق
⁸- سورعتله
#شعر_اوجاغی
@SheirOcagi
287
|شعر اوجاغی|

05 Nov, 10:23

▫️«سنی سئویرم»دن داها اؤزل بیر جومله ده وار: «سنه گووَنیرم».
چونکی هر کس هر کسی سئوه بیلیر،
آما هر کسه گووَنمیر.

#جمال_ثریا
#شعر_اوجاغی
@SheirOcagi
296
|شعر اوجاغی|

04 Nov, 18:59

▫️اؤلوم، سئوینمه چوخ!
(صمد وورغونا)

اؤلوم، شؤهرتین‌می آزالاردی؟! دئ!
تانیشدی اونسوز دا جهانا آدین.
سنه نه اولاردی، نه اولاردی، دئ،
بئله بیر اینسانا ال وورماسایدین؟!

گئدیر، شاعیر گئدیر، صنعتکار گئدیر،
بو گئدن، هر گئدیب گلَندن دئییل.
اؤلوم، سئوینمه چوخ، بو سئوینج نه‌دیر؟!
بو اؤلن، سنه هر اؤلندن دئییل.

او یازدی، یاراتدی حیات نامینه،
اونون هر بیر شعری اؤلوم‌دور سنه.

#علی_کریم
#شعر_اوجاغی
@SheirOcagi
363
|شعر اوجاغی|

04 Nov, 18:15

▫️روحومو بئله بیر آغیر دوشونجه سارمیشدی:
گؤره‌سن او بیر باشقاسینی‌ سئویر، یوخسا بیر باشقاسی اونون سئوگیسیندن دلی-دیوانه‌دیر؟

📚 سئوگی مکتوبلاری
#زیگموند_فروید
#شعر_اوجاغی
@SheirOcagi
348
|شعر اوجاغی|

04 Nov, 17:38

▫️نه اوزوجو بیر منظره‌دیر، «تانری هر شئیی دوزلده‌جک» دئیه گؤزله‌ین اینسانلاری گؤرمک!

#گاندی
#شعر_اوجاغی
@SheirOcagi
229
|شعر اوجاغی|

04 Nov, 12:05

▫️ائللر کؤچوب.

ائللر کؤچوب، داغلار قالیب باشینا،
یورد یئرینین یوکسک داشی ییخیلیب.
یایلاق‌لاری قانا سالان آل خینا،
یارغان‌لارین دوداغینا یاخیلیب.

یاستی¹ بۏم‌بۏز- سینه ساری، قیرمیزی،
گور اوجاقدا کؤز سووولوب، گول سولوب.
تؤکولدوکجه کۏلون-کۏسون پؽرپؽزی،
گؤزللیک ده پئریک دوشوب²، سوورولوب.

قیروو سپیب گؤیون گئجه اله‌یی،
گۆزدک³ چیچک قورخا-قورخا چیرتلاییب.
نر‌ گؤیروشون⁴ قیزیل‌یارپاق اوره‌یی،
خال بیتیریب، شیریملانیب⁵، پارتلاییب.

تک قاراغاج غملی-غملی دورمادا،
باتان گونش هیم ائله‌دی، گؤز قیرپدی.
اوزاق یئره اوچوب گئدن دورنا دا،
سویوقدان یوخ، غریب‌لیکلدن قاچیبدی.

اؤروشده‌جه دولو قالیب داش یالاق⁶،
کیم باجارار او کؤر-کؤچو اَیله‌سین؟⁷
گۆیوملو⁸نو گؤزَتله‌ین باش بولاق،
چاغلاماسین، چاغیرماسین، نئیله‌سین؟

نئیله‌سین بو آغلامسینان آخشاملار؟
نه سس-کوی وار، نه ایشیق وار، نه هارای.
گؤی اوزونده ال چاتمایان آغ شاملار،
یئر اوزونده بند توتمایان آخار چای.

یاسا باتدی یاستانادا⁹، یاماج دا،
دلی کولک چؤر-چؤپ ایله گولَشدی.
قویون-قوزو امیشدیگی آرخاجدا¹⁰
سئل سیم‌لری قوزو کیمی ملشدی.

هانی شئنلیک¹¹، هانی همن آلاچیق؟
درد اورکده شاخه‌لنیب زۏغ¹² کیمی.
تالا دؤشه پرچیم‌لنن طؤوله‌میخ،
اۏیور یئرین کوره‌یینی اوخ کیمی.

قویو سوکوت حؤکم ائله‌ییر داغ اۇدا،
یالچین قایا قاناد اومور قوش اولسون.
یالقیزلیقدان قورخوب-هورکن یولچو دا،
آز قالیر کی، قوردا-قوشا قوشولسون.

#آغا_لاچینلی
¹- سطحی دوز یئر- یاتیق
²- دیکسینمک
³- پاییزدا گؤیرن
⁴- ون آغاجی
⁵- چاتلاماق
⁶- ایته یال تؤکمک اوچون چوخور یئر و یا قاب
⁷- دایاندیرماق- دوردورماق
⁸- میس سهنگ
⁹- داغدا، تپه‌ده، قایالیقدا یاستی دوز یئر
¹⁰- مال، قویون یاتاغی
¹¹- مسکون یئر- آوادانلیق
¹²- پؤهره- یئنیجه گؤیَرن اینجه بوداق
#شعر_اوجاغی
@SheirOcagi
282
|شعر اوجاغی|

04 Nov, 10:21

▫️ساعاتلار، گونلر، ایللر سورعتله اوستوندن کئچسه ده، دَییشن دئییل عشق.
عشق، سونسوزادک دیری و اؤلومسوز قالیر. بو گئرچک اولماسایدی، نه هئچ واخت بیر شئی یازاردیم، نه هئچ کس هئچ زامان عاشیق اولاردی.

#ویلیام_شکسپیر
#شعر_اوجاغی
@SheirOcagi
258
|شعر اوجاغی|

04 Nov, 08:59

▫️خبر وئریبلر:
بیر یاغیشلی پاییز گونونده، ساری و نارؽنجی یارپاقلارین تؤکولوشو آراسیندا، اونوداجاقسان منی؛ باریش اورتادوغونو اونودان کیمی.
اوزولمورم، چونکی بیلیرم، ماجرانین پاییزلیق اولان تک مسَله‌سی، اونلارین ساری خبرلری‌دیر.
و امینم سن منی قوجاغیندا ساخلایاجاقسان، بؤلگه‌ هر زامان ساواشین قوجاغیندا اولدوغو کیمی.

#محمد_شهریاری_مقدم
#شعر_اوجاغی
ترجومه
@SheirOcagi
274
|شعر اوجاغی|

03 Nov, 20:00

▫️حتماً فیکیر وئریبسن، گیلئی‌لنمکدن اصلا خوشوم گلمز، آما کیتابلار و اوخوماق حاقّیندا دردلشمک اوچون کیم سندن یاخشی؟!
بوتون سؤزوم بودور: سنین اوچون داریخیرام، گئرچکدن داریخیرام.

#سوزان_سانتاگ
«بورخس»ه یازدیغی مکتوبدان
#شعر_اوجاغی
@SheirOcagi
320
|شعر اوجاغی|

03 Nov, 18:17

▫️دوروب اؤز-اؤزونه دانیشیر آدام.

بیر واخت بیلمه‌میشم، لاغ ائله‌میشم،
دوروب اؤز-اؤزونه دانیشان‌لارا.
بیر واخت بیلمه‌میشم، لاغ ائله‌میشم،
ووروب اؤز دیزینه دانیشان‌لارا.

بئله‌سی چوخ ایمیش، کیشی، سن دئمه!
بئله کوسکون‌لردن کوسوب اینجیمه!
بعضاً آلیشقانسیز آلیشیر آدام،
جین‌لنیب جانینا داراشیر آدام.
دردی دالاغینی برک دالایاندا،
چرچیوه ایچینده چاپالایاندا،
سیرداش تاپمایاندا دیل ترپتمه‌یه،
سارغی اولمایاندا یارا اؤرتمه‌یه،
دئیه بیلمه‌ینده اورک سؤزونو،
کیمسه‌سیز بیر یئره توتوب اوزونو،
دوشونور: «هامییا اؤزگه‌یم، یادام»،
دوروب اؤز-اؤزونه دانیشیر آدام.

سینه‌لر داغلانیر گؤز گؤره-گؤره،
دیل قینا چکیلیر، سوموک قیشقیریر.
گومانی اۆتَنده کؤزَرن کۆره،
کولو سوورولانین کینی فیشقیریر.

نئیی کیریمه‌ین نئیله‌سین آخی،
دینسین‌می آخیردا تک قالاجاق‌‌سا؟
سیرّینی او کیمه سؤیله‌سین آخی،
آرادا اؤز بورنو اووولاجاق‌سا؟

بئله‌جه-بئله‌جه اوشونوب-قورخور،
سونرا اولاسینی اؤنجه دۇیوخور¹
باشی قاپازلانیب ایشی دوناندا،
آغری بره‌سینده دردی داناندا،
کؤکونه، ایلکینه تورپ اکیلنده،
اؤز کؤنول اۏدونا برک بوکولنده،
کوکره‌ییب فلک‌له آتیشیر آدام،
دوروب اؤز-اؤزونه دانیشیر آدام.

منلیگی اولاندا -یا قیز، یا اوغلان-
هاوایی اوفله‌میر هارایی، اۆنۆ.
اؤزگه قویوسوندا گیزلی بوغولان،
اؤزونده قۏرویور حیا گولونو.

بئله‌سی اؤیره‌شیب نیسگیل یوکونه،
یاخشینی-یامانی گؤتور-قوی ائدیر.
عؤمرونو سپسه ده قایغی لکینه،
وایین قوجاغیندا نئچه توی ائدیر.

تکلیک تور قوراندا، جانی یوراندا،
آنیم بال آخیدیب قلب دۏیوراندا،
بئله‌سی شادلانیب شاققاناق چکیر،
گؤیَرن گؤینه‌مه قیزیل داغ چکیر.
تک‌لنیب، تئی‌لنیب² دئییر «آزادام»،
دوروب اؤز-اؤزونه دانیشیر آدام.

اینسان، یازیق اینسان، چپ گئدن اینسان،
یول تورو توخویور اؤز دونیاسینا.
حئییف آلا-آلا هر یاغیسیندان،
سونسوزلوق گتیریر ائلین یاسینا.

قالین بۇزلاغینی بومبا ایسیدیر،
یاراغی ساللانیر آیدان، اولدوزدان.
بعضاً ده یایینیب اوزاغا گئدیر،
راکئتدن-ماکئتدن، قارا قودوزدان.

بعضاً ده قؽناق‌³لا یۇیولان چاغی،
توپلارین آغزینا قۏیولان چاغی،
دوشونور: دؤنویَم، ظالیم عینادام.
دوروب اؤز-اؤزونه دانیشیر آدام.

کیمینین اوزو شن، اوره‌یی شان-شان،
کیمینین چاغلیغی آغری چیغناغی⁴.
هایانا باخیرسان یالقیز دانیشان،
هایانا باخیرسان درد داغینیغی.

کیمی قینایاسان یاغی توروندا؟
بعضاً داش دیبینده قۇروشور آدام.
طالئعی هؤنکوروب اوزه دوراندا،
سؤزونون بئلینی قانماز قیراندا،
گئدیب گؤرونمزه قۏنوشور آدام،
گئدیب یال-یاماجا یاناشیر آدام،
دوروب اؤز-اؤزونه دانیشیر آدام.

#آغا_لاچینلی
¹- باشا دوشمک
²- یارالانماق
³- دانلاق- قیناما
⁴- بوجاق
#شعر_اوجاغی
@SheirOcagi
314
|شعر اوجاغی|

03 Nov, 17:20

#دیوار_یازیسی

▫️یاناقلارین آنامین بیشیردیکلریندن ده دادلی‌دیر.

#شعر_اوجاغی
@SheirOcagi
270
|شعر اوجاغی|

03 Nov, 10:09

دیالوق

▫️- نه قدر ذکالی اولسان، او قدر آز دانیشارسان.

🎬 The Hateful Eight
2015 آمریکا
#کوئنتین_تارانتینو
#شعر_اوجاغی
@SheirOcagi
309
|شعر اوجاغی|

03 Nov, 09:25

▫️دوغرو یئرده یانلیش‌ اینسان اولمادیق، آما یئنه ده سئویلمه‌دیک.
آنلادیم کی، یانلیش یئرده دوغرو اینسان اولدوغوموز اوچون ترک ائدیلدیک.

#جمال_ثریا
#شعر_اوجاغی
@SheirOcagi
379
|شعر اوجاغی|

03 Nov, 08:41

▫️بیر سؤز ایله دوستونو سیخینتیدان قورتارا بیلرکن، بو کلمه‌نی اسیرگه‌ین، نئجه بیر دوست‌دور؟!

#شمس_تبریزی
#شعر_اوجاغی
@SheirOcagi
345
|شعر اوجاغی|

02 Nov, 17:22

دیالوق

▫️- بیر توپلوم یاراتماق ایسته‌دیک، ایچینده قونشونو قیسقانماق اوچون بیر شئی اولماسین. آما همیشه قیسقانماق اوچون بیر شئی وار.

🎬 Enemy at the Gates
2001
#ژان_ژاک_آنو
#شعر_اوجاغی
@SheirOcagi
352
|شعر اوجاغی|

02 Nov, 08:43

▫️هئچ بیر عشقین آردیندان «کئچمیش اولسون!» دئییلمز.
چونکی گئرچکدن عشق‌سه، ذاتاً کئچمز.

#جمال_ثریا
#شعر_اوجاغی
@SheirOcagi
364
|شعر اوجاغی|

02 Nov, 08:41

▫️مسکن ای بلبل، سنه گه شاخِ گول‌دور، گه قفس،
نئجه عاشقسن که آهیندان توتوشماز خار و سس؟

یار کویوندا، مسلمانلار! گر اولسایدی یئریم،
کافرم گر روضه‌ی رضوانا ائیلردیم هوس.

کوه فریادِ صداسین وئردی فرهادین، دئمن،
نقشِ شیرین‌دیر وئریر آواز، اولوب فریادرس.

ناقه، لیلی محملین چکمیش بیابان سئیرینه،
ائیله مجنونو بو حالتدن خبردار، ای جرس!

بیر رمق قالمیش حیاتیمدان، حبیبیم! صبح‌تک،
نولا گر بیر مِهر گؤسترسن منه آخر نفس؟!

خالی ائتدیم دل هوای اختلاطِ خلقدن،
بزمِ غمده نئی کیمی همدم منه فریاد بس.

ای «فضولی!» گر سنه جمعیّتِ دل‌دیر مراد،
باغلا بیر دلدارا کؤنلون، غیردن پیوندی کس!

#حکیم‌_ملامحمد‌_فضولی
#شعر_اوجاغی
@SheirOcagi
384
|شعر اوجاغی|

01 Nov, 20:13

▫️اینانین، بعضاً دوستلوغا عشقدن چوخ اوستونلوک وئریرم! عشقی بعضاً سؤال آلتینا آپارماق اولار. عشق چوخ زامان دوشونمه‌دن اولور. عشق دوستلوقدان داها چوخ قیریلقان‌دیر، کیمیا بیلیمی‌یله باغلیلیغی وار‌، ووصالدان سونرا رنگی آزالیب سولا بیلیر، آما بیزیم دوستلوغوموز سونسوز بیر چؤللوکده بیر تیکه یاشیل یئره بنزه‌ییر، زامان‌سا اونو داها دا چوخ رنگ‌لندیریر.

📚 انتخاب
#سیمین_دانشور
#شعر_اوجاغی
@SheirOcagi
394
|شعر اوجاغی|

28 Oct, 19:49

▫️آداملار سیزی بوراخیب گئتمک ایسته‌ینده، قاباق‌لارینی آلمایین! سیزی بوراخیب گئتمک ایسته‌ین‌ آداملارلا هئچ بیر گله‌جه‌یینیز اولمایاجاق.

#رومن_گری
#شعر_اوجاغی
@SheirOcagi
98
|شعر اوجاغی|

28 Oct, 13:41

▫️اؤزلرینی سئومه‌دیکلرینی سؤیله‌ییب آما بیزه «سنی سئویرم» دئین آداملارا گووَنمیرم.
آفریقادا بیر مثل وار، «لوت بیر آدام سنه پالتار تکلیف ائدیرسه، اؤزونو چوخ گؤزله!» دئییر.

#مایا_آنجلو
#شعر_اوجاغی
@SheirOcagi
172
|شعر اوجاغی|

28 Oct, 06:49

▫️ائله اوزون سئویرم کی سنی،
یا یارادیلیشدا دوغولموشام،
یا اؤلومسوزون بیری‌یم من.

#فاضیل_حوسنو_داغلارجا
#شعر_اوجاغی
@SheirOcagi
234
|شعر اوجاغی|

27 Oct, 16:28

▫️نه ایسه، بودور گؤردویونوز دوروم، آچیقلاماغا دا گرک یوخ. بیز ده بیر تهر کئچینیریک.
قیسمتیمیز بو ایمیش یا دئییلمیش، اؤنملی دئییل داها. ایت سیچسین قیسمته‌ده، هر شئیه ده!

#صادق_هدایت
#شعر_اوجاغی
@SheirOcagi
352
|شعر اوجاغی|

27 Oct, 10:42

دیالوق

▫️- گئرچک ایگیدلیک، بیرینین حیاتینی الیندن آلماق دئییل، گئرچک ایگیدلیک بیرینین حیاتینی باغیشلاماق‌دی. بو همیشه یادیندا قالسین!

🎬 The Hobbit
2012-2014
#پیتر_جکسون
#شعر_اوجاغی
@SheirOcagi
331
|شعر اوجاغی|

27 Oct, 09:00

▫️اوشاق دئییر کی...

اوشاق دئییر کی «منه،
بیر اوووج دنیز وئرین!
بیر استکان «کۆر» وئرین،
«آراز» وئرین، تئز وئرین!
بیرجه قورتوم سو وئرین،
بیر چیخیم‌لیق داغ وئرین!»

اوشاق اوچون دونیا ائو،
گؤی ده ماوی بیر تاوان.
اوشاق اوچون حیسّی‌تک،
بوتؤودور، صاف‌دیر جهان.

منجه بو ساده‌دیل‌لیک،
دوهایلا عئینی شئی‌دی.
بو حیس داهی ائله‌دی،
بلکه ده «انیشتین»ی.

#علی_کریم
#شعر_اوجاغی
@SheirOcagi
275
|شعر اوجاغی|

27 Oct, 08:54

▫️هارا گئتسم ده، اورایا مندن قاباق باشقا بیر شاعیرین گئتدیگینی گؤرورم.

📚 خوشبختلیک  احتمالیمیز
#زیگموند_فروید
#شعر_اوجاغی
@SheirOcagi
252
|شعر اوجاغی|

27 Oct, 08:22

▫️«گئت!» دئییرسن ده،
اولمور ایشده «گئت» دئمک‌له؛
هر شئیه رغماً گئده بیلمیر اینسان.
من ده سنه «سئو!» دئییرم مثلا،
سئوه بیلرسن‌می؟

#جمال_ثریا
#شعر_اوجاغی
@SheirOcagi
259
|شعر اوجاغی|

26 Oct, 19:32

▫️اونون اوچون بیر سئچه‌نکدن آرتیق بیر شئی اولمادیغین آدامی، اصلا اؤنجه‌لیک ائتمه اؤزونه!

#مایا_آنجلو
#شعر_اوجاغی
@SheirOcagi
291
|شعر اوجاغی|

26 Oct, 16:13

▫️چتین اولماسایدی، هامی گؤرَردی بو ایشی.
چتین اولماسی‌دیر بؤیوک ایش اولماغینین سببی.

#تام_هنکس
#شعر_اوجاغی
@SheirOcagi
330
|شعر اوجاغی|

26 Oct, 15:29

▫️«دوغمالیق» اوزاقلارداکی باریت قوخولو کند تورپاغینین قوجاغی‌دیر.

«سوکوت» معنالارین سؤزلری گئیینیب-سویونما اوتاغی‌دیر.

«اومید» رئال وضعیّتی شیشیردیلمیش حالدا دوشونمک‌دیر.

«خیال» مقصده گئدن ترامپلین‌لردن کئچمه‌یه ارینمک‌دیر.

«دینله‌مک» باشدان اورگه گئدن یولا سالینان کؤرپودور

«دانیشماق» نیّتین ایفاده اوصولونا نیسبتده آلینان اؤلچودور.

«حیات» ...

«داریخماق» ائله داریخماق‌دیر.

«اؤلوم» عؤمرون ان گؤزل چاغیندا حاشیه‌یه چیخماق‌دیر.

#ائلشن_مئهدی
#شعر_اوجاغی
@SheirOcagi
315
|شعر اوجاغی|

26 Oct, 08:30

▫️آنام گؤز یاشلاری اوچون،
«چؤرک قیرینتیسی کیمی دیَرلی‌دیر» دئدی.
اوستونه باسیب کئچن‌لرین چارپیلیشینی گؤرمک اوچون، گؤزله‌ییرم سنی.

#جمال_ثریا
#شعر_اوجاغی
@SheirOcagi
349
|شعر اوجاغی|

26 Oct, 08:13

‍ ▫️سحر سنسیز آچیلیر.

سحر سنسیز آچیلیر،
گئجه اولور، بیلیرسن؟
سنسیزلیگه دؤزمه‌مک،
نئجه اولور، بیلیرسن؟

بیلیرسن نئجه اولور،
اؤزونو ایناندیرماق؟
بیر سیقارئت سؤنمه‌میش،
باشقاسینی یاندیرماق؟

بیلیرسن‌می تقویمده،
صاباحکی گون سارالیر؟
سنسیز هاوالار بئله،
باشقا جوره قارالیر؟

باشقا جور اسیر کولک،
باشقا جور یاغیر یاغیش.
آمّا عئینی زیبیل‌دی،
بو عاراق- باشی‌باتمیش...

گؤرن‌ نئیلیرسن ایندی،
پاپاق‌می توخویورسان؟
یئمک‌می بیشیریرسن؟
کیتاب‌می اوخویورسان؟

گؤزلرینی قاپاییب-
آرزولارمی توتورسان؟
بیلمیرم، دوشونورسن،
یوخسا کی اونودورسان.

#قسمت_رستم‌اوو
🎙 خزر سلیمان‌لی
#شعر_اوجاغی
@SheirOcagi
318
|شعر اوجاغی|

25 Oct, 18:55

▫️نغمه‌لرین یوواسی

گئجه دوشور،
سوسور بوتون نغمه‌لر،
سوسور شهَر.
اوغلوم پاشا،
اوغلوم آذر،
دئییرلر:
«نغمه‌لر هاردا یاتیر،
یووالاری هاردادیر؟»
دئییرم کی: «آی پاشا،
دئییرم کی: آی آذر!
سیزین اورگینیزده
گئجه‌له‌ییر نغمه‌لر.»
بیر آزدان اوغلوم پاشا،
بیر آزدان اوغلوم آذر،
سئویندیره‌رک منی،
یاتیر، اورک‌لرینین-
باشینا قویوب تمیز،
بالاجا اللرینی.

#علی_کریم
#شعر_اوجاغی
@SheirOcagi
306
|شعر اوجاغی|

25 Oct, 18:39

▫️شوعورسوز آداملارین، هر مسَله‌دن تک بیر اوزونو (اونلارین نفعینی قارشیلایان اوزونو) گؤرمکده، عجیبه باجاریقلاری وار!

#خاویر_کرمنت
#شعر_اوجاغی
@SheirOcagi
293
|شعر اوجاغی|

25 Oct, 17:57

دیالوق

▫️- من کئچن کوچه‌لره سو‌ سپرسن کی توز اولماسین؟
+ باکیدا بو‌ مومکون دئییل. کوچه‌نین بو باشینا سو سپه‌نه‌جن خزْری او بیری باشینی تزه‌دن توزلا دولدورار.
ـ ائه، روحون یوخدور سنین!

🎬 Təhminə və Zaur
1993 آزربایجان
#راسیم_اوجاق‌اوو
#شعر_اوجاغی
@SheirOcagi
292
|شعر اوجاغی|

25 Oct, 16:40

▫️اوزون میصراعلار

اوزون میصراعلارین دا سونو توکَندی.
«یار» دئییلن آدام گئتمه‌یی سئچدی،
گؤزله‌مک سئوَنه هپ آغیر گلدی،
اوزون میصراعلارین دا سونو توکندی.

هانی، موتلولوق وار ایدی بوتون خیاللاردا،
سئوگی بولودلاری دولاشاجاقدی هپ اوستوموزده،
گولمه‌یی سئچمیشدیک، سئوگیلی! بیز سنینله.
اوزون خیاللارین دا سونو توکندی.

رسیملرده قالدی بوتون خاطیره‌لر،
کئچمیشه گؤمولدو گؤزل آنیلار.
عشقینه اوخونان بوتون دوعالار،
اوزون دوعالارین دا سونو توکندی.

گئده‌جه‌ییک البت بو فانی دونیادان،
«مهمت» یارا حسرت کؤچر دیاردان،
یاسمن چیچک‌لری قوپار باغریندان،
اوزون گئجه‌لرین ده سونو توکندی.

ناغیل کیمی کئچدی عؤمرو حیاتلار،
ظالیم اورک صاحیب‌لری نه زامان آنلار:
توکنسه ده زامان داهی بوتون اولقولار،
توکنمز عاشیق‌لر، بیتمز سئودالار.

#مهمت_دوه‌چی
#شعر_اوجاغی
@SheirOcagi
298
|شعر اوجاغی|

25 Oct, 11:11

▫️بعضاً دئییرم کی: نه اولاجاق؟ سؤیله گئتسین!
سونرا دئییرم: سؤیله‌یینجه نه اولاجاق؟ سوس بیتسین!

#جمال_ثریا
#شعر_اوجاغی
@SheirOcagi
356
|شعر اوجاغی|

25 Oct, 08:31

▫️ صنعت قهرمان‌لارینا

دئمیشلردی منه: «سن ده بیر شئی یاز،
بو فنّ اوردوسونون نفرلرینه!
اؤز یاشیندان بؤیوک ایش گؤرن‌لرین،
بیر آفرین سؤیله هونرلرینه!»

منجه هر یازیدان داها پارلاق‌دیر،
کیچیک دمیرچینین آلنینداکی تر.
ائی کیچیک دمیرچی، دۇیدوغون حاق‌دیر،
چالیش یوردون اوچون اؤزونو گؤستر!

زامانی گلمیشدیر، سؽرا'ن یئتیشمیش،
چالیش، غوللوق ائله بشریّته!
گؤستردیگین هونر، یاراتدیغین ایش،
حاقدان قووّت آلیر، حاقدان البتّه.

#احمد_جاواد
#شعر_اوجاغی
@SheirOcagi
354
|شعر اوجاغی|

23 Oct, 07:54

▫️من او ایتیریلمیش ایللره، او دئییلمه‌میش سؤزلره، او سسسیز سوکوتا گؤره ائله پئشمان ایدیم کی!

📚 باشقا بیر خوشبختلیک
#مارک_لئوی
#شعر_اوجاغی
@SheirOcagi
24
|شعر اوجاغی|

22 Oct, 20:31

▫️چکیب اوستومه غم قمه، یولداشیم!
سن منیم غمیمی یئمه، یولداشیم!
«اركک‌لر آغلاماز» دئمه، یولداشیم!
ارکک قادیندان دا بئتر آغلایار.

#سئور_شهابى
@sever_shahabi
@SheirOcagi
140
|شعر اوجاغی|

22 Oct, 19:59

دیالوق

▫️- من خوشبخت دئییلم، عالیجناب!
+ نییه گرک خوشبخت اولاسان؟ سنین گؤرَوین خوشبخت اولماق دئییل. اصلاً کیم سنه دئییب، بیز خوشبخت اولماق اوچون بو دونیایا گلمیشیک؟!

🎬 8 ½
1963 ایتالیا
#فدریکو_فلینی
#شعر_اوجاغی
@SheirOcagi
164
|شعر اوجاغی|

22 Oct, 19:09

▫️گؤزلریندن یوخو آخان بیر تاکسینین ایچینده‌یم،
کئچیب گئدیرم بوتون حیاتیمی دا، سنی ده.

#جمال_ثریا
#شعر_اوجاغی
@SheirOcagi
202
|شعر اوجاغی|

22 Oct, 10:33

▫️اوزانمازمی

اوزانمازمی کی باخیشلار،
تاپیلمازمی کی یارلار.
اؤزله‌دیگین زامان،
بیرینده آغلار، بیرینده داغلار.
اورک دَییشیک تئللردن سیزلار،
بیرینده واردیر سسسیزلیک،
بیرینده واردیر عوصیان.
سئوگیلی‌یه گئدن
مین بیر طورلو گیلئی‌لر،
بیری آنلار... آغلار
بیری بوشا یاندیرار.

سئوگی ایشده بودور.
قارشیلیق گؤزله‌مز اصیل یارلار.
یاراسی ایچینده گیزلی،
دیشاری‌یا سورَکلی تبسّوم آتار.
یانان آتشی آنجاق قلب گیزله‌یر،
بونو اونوتما!
ائی سئوگیلی یار،
اونوتما!

#مهمت_دوه‌چی
#شعر_اوجاغی
@SheirOcagi
275
|شعر اوجاغی|

22 Oct, 09:24

▫️من سنی سئومه‌یی سندن آیریلاندان سونرا اؤیرندیم. من بونو کؤنلومون ایچینده سنین او اومیدسیز خیالینی سئومک‌له اؤیرندیم.

📚 چالی‌قوشو
#رشاد_نوری_گون‌تکین
#شعر_اوجاغی
@SheirOcagi
232
|شعر اوجاغی|

22 Oct, 09:14

▫️کئشکه ایکی قلبیم اولایدی،
بیری‌یله یاشایایدیم،
بیرینی بوراخایدیم سنین عشقینده یانسین!
آما تک بیر قلبیم وار، سئومک اوچون.

حالیم، بیر دجل اوشاغین الینده اسیر اولان
بیر سرچه‌نین حالینا بنزه‌ییر،
سرچه اؤلومو دادماقدا، آما اوشاق اؤز اویونونا دوام ائدیر.
نه اوشاقدا سرچه‌یه اورک یاندیراجاق عاغیل وار،
نه ده سرچه‌ده اوچوب گئتمک اوچون قاناد.

#قیس_بن_ملوح
#شعر_اوجاغی
@SheirOcagi
260
|شعر اوجاغی|

21 Oct, 19:02

دیالوق

▫️- باجاریق اؤزویله دوشمن گتیرر. سن اوغور قازانیب دوشمن صاحیبی اولا بیلرسن، یا دا یئنیلیب دوست صاحیبی.

🎬 American Gangster
2007 آمریکا
#ریدلی_اسکات
#شعر_اوجاغی
@SheirOcagi
254
|شعر اوجاغی|

21 Oct, 18:34

▫️گئجه گزَرگیسی

بو گئجه گزیرم پایِ پیادا،
الیمده کۏل‌لارین یومشاق قیز الی.
یاتیر قیزیل مارال قیزیل قایادا،
یاتیر سیلدیریمدا یورغون داغ‌کلی.

بو دا گؤی چمنین گؤزل کیلیمی،
بیچینچی نئیله‌دی اوتو بیچنده؟!
بیر آنا بیلدیرچین جان وئرن کیمی،
جوجه جیویلدَشدی جیلین¹ ایچینده.

یاخشی کی شنلیگه سیغینیب سۆرو،
یالمانا-یالمانا² قاچدی یالقوزاق.
بئله قۏرویالار یئسیر-یۆسۆرۆ،
بئله‌جه داغیلا قورولان دۇزاق³.

بعضاً چکیشمه‌لر آدامی چکر،
آدام اودوزار دا اؤز اۇغورۇندا.
قوی نفس-نفسه یاتان چیچک‌لر،
توفانا دوشمه‌سین مجلیس قۇراندا.

قورخاق کوچوک‌لر ده کؤلگه‌مه هورور،
گئجه آی عطیرلی، یولجو سللیمه⁴.
آییلمیش آییلار ائله دوشونور،
گزن یا دلی‌دی، یا دا چؤللَمه.⁵

داغلارسا های وئریر هَیانلی اولوم،
دولور قولاغیما ایلاهی بیر سس:
ایلهام قایناغینا قوووشان اوغلوم!
بولاق دۇرۇخارسا قایانی دلمز.

گئدیرم جیغیرلا قاراباقارا،
گئجه دیرسَک‌لنیب یاشیل یۏسۇنا.
گاه چنه دوشورم، گاه قالین قارا،
گاه اۆرجاح گلیرم⁶ گول قۇیۇسۇنا.

بویلانیر قلبیدن کؤزَرن گؤزلر،
آنا یئر آغ‌بیرچک، آتا گؤی اۇلۇ.
قوینو خزینه‌لی گدیک‌لر، گزلر⁷
دولو کوپه‌لی‌دی، درین قویولو.

آیین گور ساچیندا خورمایی خینا،
کیم ایشیق ایسته‌مز یولو اوستونده؟
قالخیرام اوفوقون آغ یوواسینا،
گئدیرم شفقین قۏلۇ اوستونده.

#آغا_لاچینلی
¹- تورپاغین اوستونو باسان بیر نؤوع اوت
²-باش اَیمک- یالتاقلیق ائتمک
³- تله
⁴- اؤزباشینا- آوارا
⁵-یولو قیسالتماق اوچون کسه یول‌لا گئتمک
⁶- راست گلمک- راست‌لاشماق
⁷- اۏیوق- چاتلاق یئر
#شعر_اوجاغی
@SheirOcagi
246
|شعر اوجاغی|

21 Oct, 18:25

▫️نه اولموش، هر فورصتده اؤزومله دانیشیرام‌سا؟
باخما سن، یانلیش دئمیش قدیمکی‌لر،
اؤز-اؤزونه دانیشانا «دلی» دئییل، «یالنیز» دئیرلر.

#جمال_ثریا
#شعر_اوجاغی
@SheirOcagi
223
|شعر اوجاغی|

21 Oct, 11:50

▫️گلمیشم پامبیقلار دیاریندان.

گلیشیم یاخیندادیر،
پامبیقلار دیاریندان.
آغ دونلو تارلالاردان،
سلاملار گتیرمیشم.
اؤلکه‌میزده سو باسان،
بیر قاریش یئر قالمامیش.
بو ایل داها هوس‌له،
اکمیشم، بیتیرمیشم.

من بو گونون «روستم»ی،
یوخسوللوق بیر اژداها.
ییخاراق اژداهانی،
چیخدیم پولاد نرلرله.
قوی گؤرسون بوتون دونیا،
قوی گؤرسونلر بیر داها!
قوی منه دوست دئیَنلر،
سئوینسین هونریم‌له!

من تارلادا ار کیمی،
چالیشیب ووروشارکن،
دوستلاریم چوخالیرسا،
دوشمنیم ده وار هله.
پامبیغیمین هر شاخی،
دوشمن گؤزونه تیکان.

سرحدّین خاریجینده،
بو داغلاردان او یانا،
گؤز تیکن‌لر ده واردیر،
تارلامین ایپَگینه.
اونلارین حدّی وارسا،
بیر باخسینلار بو یانا.
الیمده‌کی دیرمیغی،
تاخارام ببه‌یینه!

آرخام سنه دایانمیش،
یاخشی، یامان گونومده.
آلیرلار معدنینده،
چالیشان ایشچی یولداش!
کیمدن قورخوم وار منیم-
سن وار ایکن اؤلکه‌مده؟!

آی منه پول گؤسترن،
بیلیکلی فهله قارداش!
من بیر خبر دئییرم،
یاندی بیر آز اورگیم.
دوست آغزیندان ائشیتدیم
دئییرلر «کسیرین وار».

#احمد_جاواد
#شعر_اوجاغی
@SheirOcagi
279
|شعر اوجاغی|

21 Oct, 09:44

▫️مولانا کیمی بیر اینسان وارکن، نییه اینسانین گوجونه، شانینا اینانمامالی‌ییق؟!
سیز «شمس دیوانی»نا باخین! بو اینسانین بئینیده کئچنلر، بیر حیصّه‌سی ده «شمس دیوانی»ندا گلن، حیرت‌‌لندیریجی‌دیر.
بو سؤزو دئمه‌یه حاقّیم یوخدور منیم، چونکی بونو دئمک اوچون دونیانین بوتون شاعیر و داهی‌لرینی تانیماغیم گرَکیر. آما من مولانانین بئینی قدر بؤیوک بیر بئیین گؤرمه‌دیم. اولسایدی، خبری ان آزی بیزه چاتاردی. بو آدام بیر یئرلره باخیب کی اصلا اینانمالی دئییل.

#هوشنگ_ابتهاج
📚 پیر پرنیان‌اندیش
#شعر_اوجاغی
@SheirOcagi
291
|شعر اوجاغی|

20 Oct, 19:48

▫️خطالی‌یام.

خطالی‌یام اصلینده،
دونیایا ایلک گلدیگیم گوندن بو طرفه.
سورغوسوز، سؤالسیز گلدیم بو دونیایا،
آماجیم نه، بیلمیرم،
چوخ اوزاق بیر دیاردان بیر دیارا یولجولوق ائتمک اولا بیلر بلکه.
نئجه بیر دوزن‌دیر، اونو دا بیلمیرم.

سونرا یئنه خطالی‌یام.
ایندی کی گلدیم گلمه‌سینه،
باری آدام کیمی یاشاسانا به آدام!
هاردا یانلیش، اوردا من.
هپ خطالاریمدان درس آلدیغیمی سؤیلردیم.
گؤروندویو کیمی، یانلیش سؤیله‌میشم.

آردیندان یئنه خطالی‌یام.
قودرتی بیلمه‌ییمه رغماً، بویون اَیمه‌دیگیم اوچون.
یالانی سئومه‌دیگیم حالدا، یالانچی اولدوغوم اوچون.
بلکه ده بو اوزدن یالان دونیایا مئیلیم چوخ،
تام اولاراق من ده اونون کیمی یالانچی اولدوغوم اوچون.

سون اولاراق یئنه خطالی‌یام.
چورویوب گئده‌جک نعشیم،
بوندان یوز ایل سونرا بلکه بوراخدیغیم بیر نئچه اثر قالاجاق ساده‌جه.
او دا اوخویان گنجلر «وای به، بیجه باخ، نئجه یاراتمیش!» دئیه، لاغا قویاجاقلار منی.
بوتون بونلاری بیلمه‌ییمه رغماً ائدیرم یا.
ایشده اونون اوچون هپ «خطالی‌یام» دئییرم.

#مهمت_دوه‌چی
#شعر_اوجاغی
@SheirOcagi
347
|شعر اوجاغی|

20 Oct, 17:42

▫️ائله بو آسان‌لیق‌لا اینسان اسیر اولور. هئچ ایش ده گؤرمک اولمور داها...
هئچ واخت عاشیق اینسان‌لارا گولمه‌مه‌لی‌ییک!
بئله‌سینه ایکی باخیش بیر-بیرینه دویون‌لنیر. آدام اؤز بدنینده یاشایا بیلمیر، قانادلانماق ایسته‌ییر.

📚 سال بلوا
#عباس_معروفی
#شعر_اوجاغی
@SheirOcagi
313
|شعر اوجاغی|

20 Oct, 10:31

▫️اؤزله‌دیم.
#شعر_اوجاغی
@SheirOcagi
331
|شعر اوجاغی|

20 Oct, 10:15

‍ ▫️آخیری یوخدو دونیانین.

دئییرلر آخرت گلیب چاتاجاق،
دئمه‌لی آخیری یوخدو دونیانین.
آغلاماقدان گؤزده یاش دا قالماییب،
کدری، درد-غمی چوخدو دونیانین،
دئمه‌لی آخیری یوخدو دونیانین.

بس اوندا بو دونیا نه‌یه گووَنیر؟!
ایچینده میلّت‌لر گزیر، دولانیر.
دوخسان دؤرد فاییزی ییغیر، دیله‌نیر،
بئش-آلتی فاییزی توخدو دونیانین،
دئمه‌لی آخیری یوخدو دونیانین.

ائله ازل گوندن بؤیوک جهانا،
نئچه اوغول وئریب او قدر آنا.
دونیانین سولطانی او سلیمانا،
قالماییب نه تاجی-تختی دونیانین،
دئمه‌لی آخیری یوخدو دونیانین.

قانونو-قایداسی چوخدان پوزولوب،
مردینه هر یئرده قویو قازیلیب.
ازلدن سن دئمه قارا یازیلیب-
آی قارداش! طالعی-بختی دونیانین،
دئمه‌لی آخیری یوخدو دونیانین.

نئچه سینمایان‌لار سیندی، اَییلدی،
مظلوملار، فاغیرلار گونده دؤیولدو.
اون دوققوز ایل قاباق بئله دئییلدی،
آی قارداش، زیبیلی چیخدی دونیانین،
دئمه‌لی آخیری یوخدو دونیانین.

گؤز ده وئرمه‌دیلر باخماغا، قارداش!
اؤزومو یاندیریب-یاخماغا، قارداش!
فلک باجارمادی ییخماغا قارداش! -
نامردی، نادانی ییخدی دونیانین،
دئمه‌لی آخیری یوخدو دونیانین.

«ائیواز!» سن گؤرمه‌یه نئچه یاز قالیب،
نئچه کامان سوسوب، نئچه ساز قالیب.
دئییرلر آخرته لاپ بیر آز قالیب.
دئیه‌سن چاتیبدی واختی دونیانین،
دئمه‌لی آخیری یوخدو دونیانین...

#یتیم_ائیواز
#شعر_اوجاغی
@SheirOcagi
344
|شعر اوجاغی|

20 Oct, 09:24

▫️اوغراشماغی بوراخ آرتیق دونَن‌له و دونَنینده‌کی‌لرله.
بیر ده هپ یانیندا اولانلارلا صاباحا باخماغی امتحان ائت!

#جمال_ثریا
#شعر_اوجاغی
@SheirOcagi
304
|شعر اوجاغی|

20 Oct, 09:14

▫️چای آخیشینین ترسه‌سینده اوزمک، گوج و اورک ایستر. یوخسا هر اؤلو بالیق دا سو آخیشی‌یلا اوزه بیلر.

#ساموئل_اسمایلز
#شعر_اوجاغی
@SheirOcagi
332
|شعر اوجاغی|

19 Oct, 19:55

▫️هجو

اؤزلری محروم‌کن فیضِ ادبدن،
گوناهی بیزلرده گؤرن‌لره باخ!
پارلاییب بیر زامان، دوشدولر دبدن،
بازارا یئنی مال وئرن‌لره باخ!

هله بیری واردیر «کیشی‌دیر، کیشی»،
برَلدیب گؤزونو، آغاردیب دیشی.
یاخشیجا تاپیلیب پئشه‌سی، ایشی،
بیزیم آرخامیزجا هورن‌لره باخ!

دئییر: «یازدیغینیز بو نه حیات‌دیر؟!»
چؤمچه‌یه ال توتان قول‌دور، قاناددیر.
دئدیگی کیفلَنمیش، فیکری بویات‌دیر،
اؤزونو ایرَلی سۆرن‌لره باخ!

دۆن بیری هایقیردی: «چالدیغیم سازدیر،
خزانیم تاپیلماز، گونلریم یازدیر.»
باخدیم، رنگی سولغون، روحو دا آزدیر،
دوست-یاد آراسینا گیرن‌لره باخ!

دئییر: «اوچورورسان بیزیم دؤولتی،
بو بؤیوک بینانی، بو سلطنتی.»
دولاییب الینه بوتون میلّتی،
خالقینا یون جوراب هؤرن‌لره باخ!

دئییر: «تالاییبسیز بیزیم ائللری،
بوم‌بوش قویموسونوز بؤیوک چؤللری.»
مئتردن اوزون‌دور اوزون دیللری،
باغ-بوستان بئجَریب درن‌لره باخ!

آرپاسین بؤلَنمز ایکی اولاغین،
قاپی دالیندادیر اوزون قولاغی.
دالدادا گیزلنیب، دانوس* یازماغی،
اوزده سینه‌سینه ووران‌لارا باخ!

ساغدان دا، سولدان دا یوکسلیر سسلر،
دوغما قارداشینا نیفرین‌لر بسلر.
«جاوید»ی، «جاواد»ی سئومه‌ین کس‌لر،
اونلارین یئرینده دوران‌لارا باخ!

یازیب پوزدوغونوز، نه‌دیر سؤزونوز؟
بو بیزیم اۆزۆمۆز، سیزین اۆزۆنۇز.
گلیب نه ائتدینیز -دئیین- اؤزونوز؟!
صنعت کئشیگینده دوران‌لارا باخ!

بیز آیدان آری‌ییق، سودان دورویوق،
گونشین ذرّه‌سی، حاقّین نورویوق.
اونا-بونا باخیب بولاییب قویروق،
بیزدن حاقّ و حئساب سوران‌لارا باخ!
صنعت کئشیگینده دوران‌لارا باخ!

#احمد_جاواد
* خبرچی‌لیک
#شعر_اوجاغی
@SheirOcagi
419
|شعر اوجاغی|

19 Oct, 19:20

▫️ائولنین! حیات یولداشینیز یاخشی اولسا خوشبخت اولاجاقسینیز، پیس اولسا فیلوسوف.

#سقراط
#شعر_اوجاغی
@SheirOcagi
314

2025 All Right Reserved

Disclaimer: The content displayed on this website is solely provided by the respective Telegram channels. We hold no ownership or responsibility for the content shared by these channels.