سيره الرسول 💜🕊

#الحلقة_المائة_واثنان_وعشرون_١٢٢
🌹سيرة الرسول🌹
يلا صلوا على النبى :)
غزوة الأحزاب أو الخندق (ج5)

يهود بنى قريظة فى جنوب المدينة نقضوا العهد مع رسول الله و غدروا ، بنى قريظة بدأوا إنهم يخططوا للهجوم على حصن نساء و اطفال المسلمين .. و المعروف إن اليهودى جبان حتى لو ظهرت من بره عليه الشجاعة , ربنا قال عليهم : { لَا يُقَاتِلُونَكُمْ جَمِيعًا إِلَّا فِي قُرًى مُّحَصَّنَةٍ أَوْ مِن وَرَاءِ جُدُرٍ ۚ بَأْسُهُم بَيْنَهُمْ شَدِيدٌ ۚ تَحْسَبُهُمْ جَمِيعًا وَقُلُوبُهُمْ شَتَّىٰ ۚ ذَٰلِكَ بِأَنَّهُمْ قَوْمٌ لَّا يَعْقِلُونَ } ..

فأرسل كعب بن أسد , جندى من عنده يتفقد حصن النساء , يشوفوا عليه حراسة و للا أيه عشان يهجموا .. اللى حصل بالظبط , إن الجندى راح معسكر النساء يتفقد المكان , ومكنش على الحصن أى راجل يحميه , شافت صفية عمة النبى إن الجندى اليهودى بيلف حوالين الحصن فضربته بالقوس , وراحت قطعت راسه و رمتها ناحيه اليهود عشان يكون ردع ليهم , طيب ممكن حد فيكو يشوف الموقف شديد .. بس لازم تعرفوا إن لولا الحركه دى كان زمان يهود بنى قريظة هجمت على النساء واستباحوا أعراضهم وقتلوا الأطفال , فصفية أنقذت نساء المسلمين كلهم .. و فعلا بنى قريظة مش حيهاجموا حصن النساء تانى .. والصحابة مش حيوصل لهم الأحداث اللى حصلت من بنى قريظة طول مواجهتهم لجيش الأحزاب عند الخندق ..

حصل موقف بعد كده , إن سعد بن معاذ كان واقف عند الخندق ففوجىء بسهم فى كتفه جى من الضفة التانية , فنزف سعد دم كتيير , وقال دعاء حلو أوى , طلب من ربنا إن يارب لو دى كانت آخر حرب بين رسول الله وقريش فأقبضنى إليك شهيد , لكن لو فيه حروب تانية فأنا أحب أن أحارب و أدافع عن رسول الله , و يارب لا تمتنى حتى تشفى قلبي من بنى قريظة ... و بعد ما خلص سعد الدعاء و كل ده و هوه عمال ينزف تخيلوا يحصل إيه ؟ إلتئمت الجراح , والنزيف وقف تماما , سبحان الله ..

دلوقتى المسلمين عند الخندق و حصار الأحزاب للمسلمين قعد مدة طويلة , وبدأت تحصل محاولات تعدى على المسلمين ، فنزل مقاتل من الكفار اسمه عمرو بن عبد ود وهو من أقوى و أعرق جنود قريش فكان لا يُهزم أبدا ً, فوقف عند الخندق ورفع سيفه و جى ولابس الدرع بتاعه و بدأ يكلم المسلمين و يقول : أريد مبارزة , هل من مبارز ؟ هل من مبارز ؟ مين من المسلمين حيتجنن و يبارز عمرو ؟ على بن أبى طالب رضى الله عنه و النبى جنبه بيقول له لا تذهب يا على .. أصل النبى عارف ان عمرو قوى و خايف على علي ..

فعمرو بن ود فضل ينادى .. هل من مبارز ؟ و راح قايل بيت شعر قوى عشان يستفز المسلمين .. قال :
ولقد بححت من النداء ... لجمعهم هل من مبـارز
ووقفت إذ جبن المشجع ... موقف القرن المنـاجز
ولذاك إني لـــم أزل ... متسرعا قبل الهـزاهز
إن الشجاعـة في الفتى ... والجود من خير الغرائز ..

فعلي بن أبى طالب حيتجنن فبدأ يستأذن النبى .. أرجوك يا رسول الله أرجوك , فسمح له النبى وقال له : انزل يا علىَّ .. فنزل على بن أبى طالب , و فضل النبى عليه الصلاه و السلام يدعي له و يقول : " اللهم احفظ على َّ, اللهم احفظ علىَّ "..

المهم علي و هوه رايح عشان يحارب عمرو بن عبد ود فألف بيت شعر جميل اوى يرد بيه على شعر عمرو .. و قال :
لا تعجلن فقد أتـاك ... مجيب صوتك غير عاجز
في نية وبصيــرة ... والصدق منجي كل فائز
إني لأرجو أن أقيم ... عليك نائحة الجنــائز
من ضربة نجـلاء ... يبقى ذكرها عند الهزاهز ..

فيقف عمرو بن عبد ود , و هوه مبهور و مستغرب مين الشاب ده , فسأله من أنت يا بنى ؟ فرد : علىَّ بن أبى طالب , فعمرو أتفاجىء وقال : ابن أبي طالب .. !! يا بنى كان أباك صاحبى أرجع فإنى لا أحب أن اقتلك ..

فرد عليه على بن أبى طالب و قال : عجيب , مع إنى أحب أن أقتلك .. وبدأ على بن أبى طالب يضرب حصان عمرو عشان يستفزه و أبتدت المبارزة و أرتفع التراب و الغبار و محدش بقى شايف أى حاجة , والرسول بقى قلقان وواقف يدعى , وفجأة هبط التراب وبدء السكون , وسمع النبى صوت بيظهر و بيعلى و بيقول الله أكبر , ففرح النبى وقال الله أكبر وشاف علىَّ واقف وحاطط رجله على بطن عمرو بن عبد ود ..

وجرت العادة إن المنتصر يأخذ درع المهزوم , فوطى علي بن أبى طالب عشان يأخذ الدرع .. و لسه بيشده , فإنكشفت عورة عمرو بن عبد ود , فأضايق سيدنا على َّ, وخبى عينه وساب الدرع عشان يغطى عورة عمرو بن عبد ود .. ( شايفين أخلاق المسلم .. أخلاق صحابة رسول الله .. دى قمة الإنسانية من سيدنا على َّ, اه عدوه كافر لكنه إنسان ) .. طيب وصل لقبيلة عمرو بن عبد ود خبر موته فبعتوا للنبى طلب , أنه أرجوك يا محمد لا تمثل بجثة عمرو بن ود , وحنشترى جثته ب 10.000 درهم .. طبعاً دى فرصة للمسلمين , لكن رفض النبى وقال : هو لكم بغير ثمن ( شايفين النبى عزيز أوى والمسلمين كمان أزاى ♡ ) ..

الحصار مدته طولت والمسلمين تعبوا أوى , بس ربنا حيبعت لهم هدية .. إيه الهدية دى ؟ إسلام واحد من جيش الاحزاب اسمه " نُعيم بن مسعود " من قبيلة أشجع , فيعدى نُعيم الضفة التانية و يروح لرسول الله و يقول له : يا رسول الله جئتك مسلما ً, أشهد أن لا اله الا الله , أشهد أنك رسول الله , ولكن يا رسول الله قومى لا يعرفون إنى أسلمت , فأطلب منى ماشئت فيفرح النبى جدآ جدآ و يقول له : ...

هنعرف بكرة إن شاء الله ❤
لا تنسوني من دعائكم🌱
https://t.me/seraelrasol

#الحلقة_المائة_والواحد_والعشرون_١٢١
🌹سيرة الرسول🌹
يلا صلوا على للنبى :)
غزوة الأحزاب أو الخندق (ج4)

بعد ما نجحت خطة حيي بن اخطب " قائد اليهود فى خيبر" فى إنه يقنع يهود بنى قريظة بإنهم ينقضوا العهد اللى بينهم و بين النبى صلى الله عليه و سلم .. عشان يقدر جيش الكفار " جيش الاحزاب " فى إنه يهجم على المسلمين من الجنوب .. فلما وصلت الأخبار دى للنبى فقرر إنه يتأكد من خبر نقض العهد ده .. فكلف سعد بن عبادة و سعد بن معاذ إنهم يوصلوا لبنى قريظة و يسألوهم هل الخبر ده حقيقى وللا لأ ؟ ..

وطلب منهم لو أتأكدو إن الكلام ده صح يكتموا السر ومش يقولوه قدام جيش المسلمين , و يفكروا فى طريقة يقولوا الخبر بيها للنبى من غير ما حد غيره يفهم .. أما لو الخبر ده طلع إشاعة ومش حقيقى فخلاص يقولوه قدام جيش المسلمين كله عادى جدا بإن بنى قريظة على العهد ..

فالمهم وصل سعد بن عبادة وسعد بن معاذ لبيت كعب بن أسد , و سألوه : يا كعب , هل حقاً غدرتم برسول الله ؟ فيرد كعب : من رسول الله ؟ فيقول سعد بن معاذ وهو مخضوض : أحقاً غدرتم ؟ نقضتهم المعاهدة التى بينكم وبين رسول الله ؟ فرد كعب بكل تجاهل : أى معاهدة . ( طبعاً نفهم من ده إن كعب خلاص نسى النبى و نسى العهد ) ..

فسعد بن عبادة شخصيته شديدة جداً فمقدرش يمسك أعصابه وبدء يشتم كعب بن أسد .. و رجع سعد بن عبادة و سعد بن معاذ للنبى وهما فى إحباط جامد , و كان النبى واقف على جبل سلع مستنى رجوعهم , فوصلوا لرسول الله و بيحاولوا يفكروا فى طريقة يقولوا بيها الخبر من غير ما حد يفهم غير النبى فقالوا له : يا رسول الله عضل وقارة , .. يعنى ايه ؟ ..

يعنى عايزين يقولوله ايوه اليهود نقضوا العهد و غدروا , زى ما غدرت قبيلتى عضل وقارة و قتلت المسلمين زمان .. فالنبى فهم بس قال : الله اكبر نُصرنا بإذن الله , و نزل النبى من على الجبل و دخل خيمته و قعد و غطى رأسه لا يكلم أحد .. وانتشر الخبر بين المسلمين ونفسيتهم ضعفت جداً , والمنافقين بدأوا يروحوا لرسول الله ويقولوا إنهم مضطرين ينسحبوا و طبعا بحجة إنهم يحموا نسائهم وأطفالهم من غدر اليهود ..

و سورة الأحزاب بتجسد أحداث الغزوة بالظبط زى ما جسدت سورة الأنفال غزوة أحد .. ربنا بيقول عن المنافقين : { وَإِذْ يَقُولُ الْمُنَافِقُونَ وَالَّذِينَ فِي قُلُوبِهِم مَّرَضٌ مَّا وَعَدَنَا اللَّهُ وَرَسُولُهُ إِلَّا غُرُورًا ، وَإِذْ قالَتْ طائِفَةٌ مِنْهُمْ يا أَهْلَ يَثْرِبَ لا مُقامَ لَكُم فَارجِعُوا وَيَستَأذِنُ فَريقٌ مِنْهُمُ النَّبِيَّ يَقُولُونَ إِنَّ بُيُوتَنا عَوْرَةٌ وَمَا هِيَ بِعَوْرَة إِنْ يُرِيدُونَ إِلاّ فراراً } ... طيب ده حال المنافقين , طيب إيه أخبار المؤمنين ؟ ..

خايفين جدا طبعاً لإنهم بشر , قدامهم 10.000 مقاتل مشرك يعنى جيش ضخم , وفى ضهرهم قبيلة بنى قريظة من السهل جداً انها تضربهم .. ربنا صور المشهد ده وقال : { إِذْ جَاؤُوكُم مِّن فَوْقِكُمْ وَمِنْ أَسْفَلَ مِنكُمْ وَإِذْ زَاغَتْ الْأَبْصَارُ وَبَلَغَتِ الْقُلُوبُ الْحَنَاجِرَ وَتَظُنُّونَ بِاللَّهِ الظُّنُونَا (10) هُنَالِكَ ابْتُلِيَ الْمُؤْمِنُونَ وَزُلْزِلُوا زِلْزَالاً شَدِيداً } ...

فبدأ النبى يفكر فى حل .. ففكر النبى يروح للضفة التانية عند الأحزاب , ويدخل لقائد قبيلة غطفان , طيب اشمعنى اختار القبيلة دى ؟ لأن النبى كان عارف ان قبيلة غطفان مش متمسكة بعقيدتها على قد ما هى مادية جدآ , كمان القبيلة دى لوحدها عددهم 6000 , وفعلاً وصل للقبيلة وقالهم إنه جاى يعمل معاهم اتفاقية , و هيه إنهم ينسحبوا و فى المقابل حيكون ليهم ثلث ثمار المدينة لمدة سنة , فرفضوا و طلبوا نصف ثمار المدينة ..

فالنبى تاجر فمش سهل حد يضحك عليه , فرفض و صمم على ثلث الثمار بس ... فوافقوا , فطلب النبى عليه الصلاه و السلام منهم إنه يرجع للمسلمين عشان يستأذنهم فى العرض ده , فقالوا : عجباً ألست بقائدهم ؟ فقال النبى بلى .. و لكن الأرض أرضهم , والثمار ثمارهم .. و عدى النبى للضفة التانية و يرجع للمسلمين و يستأذن سعد بن معاذ قائد المدينة قبل رسول الله , فسعد قال : يا رسول الله .. أهذا وحى من الله أم من عندك و خوفاً علينا ؟ ..

فقال النبى : بل خوفاً عليكم , فقال سعد : يا رسول الله , بما إنه ليس بوحى , فلا يا رسول الله , لن نعطيهم الثمار .. فلم يأخذوا منا ثمرة واحدة فى أيام الجاهلية فلن نعطيهم أبدآ بعد أن أعزنا الله الإسلام رغمآ عنا ( غصب عننا ) .. و إن أرادوا أن يأخذوا الثمار فبالبيع و الشراء و إلا ليس لهم عندنا إلا السيف .. فقال الرسول : لك ما أردت يا سعد .. و رفع سعد بن معاذ صوته وقال : " يا معشر غطفان عودوا , ليس لكم عندنا إلا السيف " ..

طيب إيه أخبار بنى قريظة اللى غدرت و نقضت العهد مع النبى ؟؟

نكمل بكرة إن شاء الله ❤
لا تنسوني من دعائكم🌱
https://t.me/seraelrasol

لأن كعب عارف كويس هدف حيي بن اخطب و كعب مش عايز يضعف و ينقض العهد مع النبى و تحصل مشاكل .. المهم فضل حيي يخبط على باب كعب بن أسد .. و كعب مش راضى يفتح .. فقاله : جئتك يا كعب بعز الدهر , فقال كعب : بل جئتنى بذل الدهر .. فقال حيي : أفتح , وفضل وراه لحد ما فتح كعب .. وقال له ماذا تريد ؟ فشرح له حيى بن اخطب الخطة , وعشان يقنعه قاله إنهم جايين يقتلوا محمد وساعتها حتكون المدينة كلها ملك ليك يا كعب , فقال كعب : " بس أنا عمرى ما شفت من محمد إلا الوفاء ً" لكن حيي فضل ورا كعب لحد ما أقتنع للأسف :( و قرر ينقض العهد مع النبى و طبعاً دى كارثة ..

ورجع حيي ابن اخطب لجيشه .. فالمخابرات اللى تبع جيش المسلمين عرفت الخطة اللى حينفذها حيي مع اليهود و راحوا يبلغوا النبى بيها بسرعة ، طيب النبى لما يعرف حيعمل إيه ؟ ..

نكمل بكرة إن شاء الله ❤
لا تنسوني من دعائكم 🌱
https://t.me/seraelrasol