سعود الشطيطي

يالله بجودٍ منك ياراعي الجود
خزاينك عن مد غيرك ملايا

يامدبر افلاكك ويامسير النود
ياواحدٍ مانت ب تمن العطايا

باللي قديحتها مثل قدح بارود
ولرعودها لجه من اربع زوايا

غراً مقادمها وطرافها سود
تسوقها رحمتك سوق المطايا

تستر ذوايبها علو شامخ الطود
و تروح منها الارض مثل المرايا

لا أنهل مافيها من الثقل والزود
يظهر من بيوت الخشاش الحيايا

جعله على دار يبس فوقها العود
ومن الظما حتى شجرها عرايا

عشرين ليلٍ ماعن الخير منشود
مداقشه فيها مداقش سرايا

وسم تباشيره لها وقع وشهود
ومن رحمة الله رحمةٍ للبرايا

اول خضاره في مطامين وحيود
ومسايل الماء مع مجر الشغايا

واليا اشتبك مع كل عنقود عنقود
وجاء للربيع اللي يبشر تهايا

تقول وجه الارض بالزل ممدود
على زماليقه تطيش الرعايا

مخلي حوار البدو تقل مفرود
ومن الطغى كن الحقايق لقايا

تفرح به البدوان قناية الذود
اللي يحبون الولع والمعايا

في شفها تبذل لها كل مجهود
وعلى وناستها ماتبغى وصايا

بدو بدواتها على عد وجدود
من يوم كانت فوق جرد السبايا

واللي ورثها ورث من جده العود
ماهو ب مثل اللي جمعها هدايا

يانجد عذري لك على الوجه مشروح
ان ماقبلتي به فلا تنكرينه

عندك خبر لاجيت الاطلال ماروح
الا بصدري جرح ولا غبينه

وانا ادري ان مالك ورا الوضع مصلوح
وسليمة الثنتين ظلم وضغينه

اعاملك معاملة مبعد الشوح
يشوفك بقلبه قبل شوف عينه

وتعامليني مثل طيرٍ لطاروح
وعلاقته بينه وبينه متينه

ان طار معواده على ماكر اللوح
وان عاد قفى برقعه في يدينه

يملا عيونك كل طيب وطحطوح
واللي ماهو رجال تستحقرينه

مادري وش أعيّن من الوجد والبوح
وانتي غلا الشعار تستاهلينه

جعل امنيات العمر وأيقونة الروح
غيداً تمرك من جنوب المدينه

لا مرتك جاء لي على بالها ضوح
وتذكرت لو ذكرياتي حزينه

حبيتها وانا عن الحب منصوح
وبريتها بر الولد والدينه

لكن جاء فالحب والوصل ساموح
والحب زين وعزة النفس زينه

ماودي اجرحها ولو كنت مجروح
قلت الغلا سوي به اللي تبينه

وراحت وخلت باب الامال مفتوح
حتى كلا قلبي عليها حنينه

وراع الهوى لو يستر الحب مفضوح
ادنات شي يمر يظهر خزينه

معلمك مامر الاطلال واروح
الا بجرح وضيق صدر وغبينه

غاب نور الشمس والليل الطويل من الليالي
اعرفه لا هو ب لاهادي ولا انسامه لطيفه

عاد انا اللي مامعي حيله ولاصدري شمالي
واقدر اصغّر مساحاته وسطوته العنيفه

ودي ان شخصيتي شخصية الشخص المثالي
ماتغير فالامور الكايده ولا الخفيفه

صايرٍ من صكة الدنيا يروعني ظلالي
دمعي اسبق من وميض البرق وعروقي صخيفه

واقعي فالواقع اللي صرت اعيشه في خيالي
الوهم فالواقع الملموس واشياه السخيفه

حدة الاحداث حدتني على العيشه لحالي
لين حدت من طموحاتي وانا احلامي شريفه

ياوجودي ياول ايامي وياشيً طرالي
وذكرياتن ضربها في داخلي مضرب قذيفه

ياعفيفه لاتحسبينه جفا ولا تعالي
وانتي ادرا وش معي من كثر حبك ي عفيفه

اسمحي من بعض ماعندي ومن قل اتصالي
لا ترجّين السنين المجدبه وانتي مريفه

لو أبضمن ضحكة شفاهك تمرك من خلالي
سقت عمري في رضا وجهك وسيرتك النظيفه

مير انا جرحي ماهو خافي وميلي واعتدالي
تعرفيني زين لاهافي ولا نفسي ضعيفه

ويش اقول وعقب مات ابوي واعزي لحالي
طايحٍ من جملة احلامي عقب مات النصيفه

ياضيفنا حقك من البن والهيل
واللي نحطه ماندور مديحه

على السلوم الاوله جيل من جيل
الطييه والواضحه والصريحه

ولا لنا ورا الكرامه محاصيل
الا نبا الستر ونخاف الفضيحه

من خوف لا يلقى علينا مداخيل
الناس ماهي من بعض مستريحه

لاتحسب انك للسمر والتعاليل
اغلا نديمٍ يستثير القريحه

لاخذت ماجوبك ف اسر ف اول الليل
واسرج حصانك فوق الارض الفسيحه

حنا مجالسنا مجالس رياجيل
ماهيب للمترديه والنطيحه

لاتقعد تحط السواليف وتشيل
وتصب في بطن الجميله قبيحه

أللي يحب النم والقال والقيل
يقطع لسانه مثل راس الذبيحه

الله على اللي نوعه يحذف الانواع
خلفه بعين اللي يحب الممارا

لو اني لي سلطه ماخليه ينباع
على اللذي لاجاء اللزوم يتوارا

الطيب اللي يصلح لطيب الناع
شيخ مواقيفه ماهي تنتجارا

من كثر ميزاته ومن كبر الابداع
تفرك على بابه يديها الطفارا

اليا سرا في ليلتن نورها ضاع
وسوادها كنه عبي العذارا

ذيب عياله خمسة ايام جياع
وعينه على بدوً تحب المثارا

واليا درج في روضتن ريحها شاع
فيها تخباطه تخبط سكارا

زينه ومازين جرته من على القاع
طلاسم الساحر لاقامت تبارا

ان كان ماجاني من الشيخ فزاع
ولا ابلجٍ خوال ابوه السدارى

ماجايبه حظً ليا احتجت له فاع
على الطريق اللي عليه الفقارا

ابيه لا جا لاهبٍ بين الاضلاع
عرضته اللي لاعبن فالحيارا

مايقطع حبال الرجا غير قطاع
لو جامل المحتاج نفسه ودارا

لابد مالقا لي من الضيق مطلاع
مطلاع صبحٍ في عيون السهارا

ماجيت ادور لثار الجرح ياحرّه
انا بدويٍ على خبرك مواثيقه

لي عام واذوق طعم الحاليه مره
مرت لياليه مازانت توافيقه

حطت طواريك وسط البال مغتره
مافيه طاري ماتلعبي طواريقه

لاقامت الذكريات تعاود الكره
تتلني تل حرٍ من مسابيقه

لك فالغلا منزل ولك فالحشا جره
ذي جرتك بين تغريبه وتشريقه

لاشفت وش يحمل النحّال فالجره
حنيت للبسم اللي ذقت من ريقه

اعوذ بالله من بعدك ومن شره
احاول الصبر مير الصبر ماطيقه

لاتحسبين ان قلبي من حصا الحره
لا والله ادنات ماقطع معاليقه

محتاج منك الكلام الحلو لو مره
خليني اكسر رقبة الحزن والضيقه

مافيه مفرق ولا ديوار
ماله مكانه ولا ذكرى

ياكثر ماسري الجكسار
لاحدك الشوق للمسرى

ومن عقب دار الزمان وجار
وحطيت بي جرح مايبرى

تقرا قصيدي مع الشعار
ولا بعد رحت ماتقرى؟

ياشيخ فالايام لك عبر ودروس
تضحك لك الدنيا وتضحك علينا

لو تشتري بعض الرياجيل بفلوس
حنا ماحنا مثلهم تشترينا

عزاز من فضل الولي روس ونفوس
وماتملك يدينك ماهو ف يدينا

ولا انت لاطاله ولامنك ناموس
يالله لاتسخطنا ولا تبتلينا

اطيب معاريفك على شفرة لموس
حنا تهبا مالك معاريف فينا

البارحه والخاطر المكبوت
احذف عليه من التعب همي

سريت يوم ان العباد خفوت
على ماقال الشاعر الأمي

وخليت حبل السالفه مفلوت
اللي لها عامين في فمي

ماخفت حلقٍ كبر بطن الحوت
واللي يسمي شي ماسمي

كم طاح من بعض الكروت كروت
من اخوياي ومن بني عمي

جاملت واجد لين فات الفوت
وضيعت عمري واحترق دمي

اللي معه ناصفت حتى القوت
عود يحط بلقمتي سمي

غرتني اللمعه على الياقوت
ولا دريت وجيت متحمي

وبعد انكشف لي سرها المكموت
اللي نفضته طاح من كمي

قصرت عن بعض الامور الصوت
وقفلت باب العذل من يمّي

لو يضحك الشامت على المشموت
ماخفت من مدحي ولا ذمي

في كل يوم يمر أخاف اموت
من قبل لا اقبّل يدين أمي