قصص واقعية ، 🌸 ' Telegram 帖子

خذيت الكتاب ووشاح وطلعت للحديقه الجو حيل بارد

رزان: احمم ممكن اكعد

ما اعرف شنو يلي جان يفكر بي بس دموعه جانت على خده مسحهن وتجاهلني

معقوله مو بس اني الحزينه بهذا اليوم اكو وياي ناس عدها ذكريات بهذه اليوم وتتمنى يرجع بيها الزمن لهذيج الذكريات

قربت الكرسي وكعدت جان مسوي جمريه زغيره وصارت بنصنه

رزان: أكيد عندك ذكريات بهذه اليوم وتتمنى يرجع بيك الوقت لهذيج الذكريات وترجع تعيشها

مهاب: ما اتمنى يرجع

رزان: شنو صار بهذه اليوم

مهاب: مصار شي

رزان: بكل مره جنت اني احجي هالمره احجيلي وخلي اسمعك بلكي تخفف عني

مهاب: مراح اخفف عنج راح ازيدها عليج

رزان: يلي يسمع المصيبه الناس تخف مصيبته عليَ

مهاب: بهذه الشهر يوم 1/5 ساعه بلـ 5:39م

خسرت اهلي بحادث سياره

الماضي....

اني الوحيد الاهلي عندي بس اخت وحده ومزوجه







جنت طالب جامعه مرحله ثالثه بقسم الهندسه

اكثر طالب ذكي وشاطر بكل المراحل جنت نار بدراسه وبكل مره اطلع الأمتياز بيوم سمعنه بأختي مريضه بلأنبار ورحنه حتى نشوفها وبطريق اهلي حيل خايفين وابوي جان مستعجل

ماحسيت غير السياره نكلبت بينه وتريله داست علينه سوتنه رماد جواها

سحبت امي يمي ردت بس انقذها تخيلي لازم كف ايدها ومن سحبتها جسمها جان بصفحه وبقه كف ايدهه بأيدي مقطوعه تتخيلن الموقف يلي جنت بي ولرعب رجلي تكسرت بعد ماحسيت بيها راسي صار الثقل عليَ بعدها غمضت ماحسيت بيلي صار.....

صحيت وعرفت فقدت اهلي وفقدت عافيتي حالتي تدمرت بهذيج السنوات عشت ابشع ايامي وابشع مراحل عمري مره بهاي السنوات

جانت عندي احلام واهداف اهواي جنت راسم اهدافي كدامي بس شصار بالحظه وحده كلشي صار رماد جنت شخص مرح احب الحياه واحب اعيشها بكل ايجابيه وبكل تفاصيلها وتعبها جنت احب اتعب حتى احس بلذه الشي يلي اخذه من بعد التعب

بس صرت شخص مكتأب صرت شخص عصبي ماحب اطلع اندفنت حياتي بين اربع حيطان

بكل مره اريد اكوم واشوف كف امي بيدي ادمر اتمنى لو ميت وياهم ولا هاي العيشه العايشها

حياتي يلي بنيتها كلها صارت هلاك

اسمعله ودموعي تنزل بهدوء كمل كلامه

5 سنوات اني شخص ثاني حسيت بروحي رجعت بيوم الشفت بي بنيه نقذتني من لموت جانت اعيونها تلمع بالحزن والتعب شفتها ثواني وبعدها اختفت

اعيونها مراحت من بالي وبيوم رجعت شفتها مره ثانيه تتخيلين الفرحه لفرحتها حسيتها هيه لشخص الوحيد يلي تسدلي الفراغ يلي بحياتي

باوعتله مستغربه

رزان: منو هاي البنيه!؟

مهاب: ما اعرف

رزان: زين تعرفك هيه حاجيه وياك

مهاب: تحجي بس مواثقه بيه

رزان: زين اني اعرفها

باوعلي وبتسم

مهاب: تشبهج نفس لمعه الحزن ولتعب يلي بعيونج نفس البرائة يلي بوجهج نفس التصرفات يلي تريح الگلب هيه نسخه منج تخيلي حتى شعرها كيرلي مثل شعرج

رزان: كول والله!؟؟

مهاب: والله العظيم

رزان: زين وينها هسه

مهاب: ضايعه بالماضي ومناويه تعيش الحاضر

رزان: شلون يعني؟

مهاب: مثل حالتج حيل صعبه عايشه يقوقعه الماضي وتبجي كل يوم على ايامها قبل بس متعرف الله شنو ضام الها وشنو عايفلها من عوض اني عشت ايام سوده حيل سوده بس اني بيدي رجعت النور لحياتي لشخص كلشي بأيده بيده يدفن حياته وبيده يرجع يحب الحياه







عيشي اليوم بيومه بعدين تندمين الماضي راح ومراح يرجع اخذ ضحكتنه وذكرياتنه وراح خلي نشوف المستقبل وخلي نشوف ربنه شضام النه وشراح يحطنه من اختبارات بعد

رزان: شلون اعيش حياتي واني. مدمره حياه ناس وياي

مهاب: ليش تحسسيني مسويه شي عظيم ومينغفر

رزان: ذنبي كلش جبير

مهاب: الله غفور رحيم مو أنبياء احنه والبشر معرض للخطاء بس يكدر يصلحها

رزان: شلون اصلح حياتي

مهاب: من الكتاب يلي بيدج

رفعت الكتاب هسه تذكرته

رزان: ياا هاي عود اجيت حتى تقرا الي

مهاب: انتِ اقري

ماعرف شنو اسمه لأن بلأنگليزي

رزان: بس ماعرف اقره إنگليزي

مهاب: تمام جيبي اقراه الج

بده يقرالي شويه ويوكف ويشرحه الي اهواي بي نصائح حيل حبيت لكتاب وحبيت كلامه الكتاب جان يحجي عن الاخطاء شلون اصحح خطائي وماستمر بي واعيش حياتي وافكر بالمستقبل وبنفسي وغير هذولي محد يستاهل التفكير ولتعب

كلام اهواي ونصائح اهواي بس مافهمتهن بس بعدين كلهن انطبقن بحياتي

فكرت هاي اصعب ايام حياتي وطلعت غلطانه لأن شفت ايام بعد ابشع..

بليلتها بقينه الوقت كلش طويل نسولف محجيتله قصتي بس ساعدني بهواي كلام قررت اعدل حياتي واصحح نفسي واول شي ابطل الجذبه يلي اني عايشه بيها وخلي الكل يعرف بيلي صار وياي وحيل جنت خايفه من هاي الخطوه بس لازم يعرفون

ومستعده اتحمل كل العواقب يلي راح تصير...

جنت منتضره الوقت المناسب لأن هاي الفتره بدينه بفقره جديده لعلاج مهاب وجانت هاي المرحله القبل الأخيره وبنسه100/80

مهاب يرجع يمشي بدون عمليه بس يرادله علاج وسمو "العلاج الفيزيائي"

صباح: وانتِ من اهل الخير

عفته ودخلت للغرفه صح حباب وياي بس ما ارتاح ألة شكله أبد مو راحه شسوي اذا عرف بجذبتي ماكو شي اكدر اسوي كمت وحسبت الفلوس العندي مبلغ زين لأن الراتب يلي جاي اخذه ما اصرف منه شي بس جبتلي كم قطعه ملابس وحتى مو اني رحت إيمان هيه جابتهن الي ومن الأكل او كلشي متوفر بالبيت

بس ماكدر أجر بيت بيهم ولا ادفع مصاريف يحتاجلي بعد اجمع حتى ماحتاج الشي واتفرغ الأخواني ادور عليهم

خليت راسي على المخده وألف فكره براسي

الأسبر وينه هسه معقولة جاي يدور عليَ لو نساني هسه وتاليا وين وابنها شلونه بقت يا تره بالبيت لو طلعو من البيت وين مكانهم ووين هسه همه ياربي ساعدني الاكيهم ساعدني يا الله مالي غيرك....

اهواي افكار براسي بقيت ادعي الربي لحد ماتعبت ونمت.....

الاوضاع بلـ2006 بعد السقوط بدت الأنفجارات تصير بكل مناطق العراق بدت الناس تخاف تطلع من بيوتها وكل يوم انفجار وفاجعه جديده للعراقين

هاي السنة اهواي نطتني دروس اهواي تعلمت منها صرت بنيه ناضجه بجسم زغير صار عقلي وأفكاره بشخص عمره 30 سنه مو بنيه عمرها 16 سنه

سنتين من عمري كبروني فوك عمري بمرتين شفت بيها الحرمان شفت الظيم عشت الفقدان عشت القتل وعشت بتأنيب الضمير احجي واضحك بس ضميري موتني كل يوم استغفر وادعي ربي يسامحني لأن اني شخص مجرم وما اعرف شلون ضاله لحد هسه عايشه ومحد ساجني او قتلني ما اعرف شلون كدرت اطلع من قوقعة الاسبر صرت حذره بكل تصرفاتي صرت قبل لا اخطي الخطوه افكر ألف مره صار كلامي موزون مو كلام جهال







البنيه يلي جان همها الوحيد تطلع وتلعب دعبل بشارع هسه صارت تفكر شلون ترجع الأهلها واخوانهة

البنيه يلي جانت المنطقه كلها تشكي منها ومن عركاتها هسه صارت بنيه واعية وناضجه صارت بنيه عاقلة وهادئه

جان احتفال عيد راس السنه وجنه نتأمل بهاي السنه تكون سنه خير علينه وعلى الشعب العراقي لأن مر بهواي ضروف صعبه واهواي عاش صدمات

حمزه راح يحتفل ويا عائلته واني وإيمام سوينه كيك بس مالنه نفس للأحتفال مهاب تحسن كلش ومستمرين بالعلاج

إيمان: تسوين عصير

رزان: تردين اسويلج

إيمان: لا اني ماريد

رزان: ولا اني اريد

إيمان: جا لو ادري ممسويه كيكه

رزان: بعد بكيفج اني رايحه انام

عفتها ودخلت للغرفه حضنت نفسي وخليت راسي بين رجلي

وهاي صار سنه اني بعيده عن اخواني تذكرت ايامنه قبل واحتفالنه صح جان بسيط بس الفرحه متنوصف تذكرت بأخر مره احتفلنه بيها

الماضي....

تاليا: بابه اني لازم اول وحده اخذ الهديه لأن اني الجبيره

رزان: لا بابه اني لأن اني الزغيره

بابه شال الهدايه ونطانه ياهن بنفس الوقت

ابو رزان: ثنينكم عزيزات عندي وماكو فرق بين لزغيره والجبيره

رحنه وحضناه

رزان: بابه احبك

تاليا: ربي لا يحرمنه منك

واحنه نضحك وفرحانين بجه رائف

رائف: تحبون بس بناتكم اني محد يحبني

امي راحت وحضنته

ام رزان: انتَ وحيدنه وسندنه شلون منحبك

رائف: محد انطاني هديه محد يحبني

رحنه كلنه وحضناه وصرنه ندغدغ بي وهوه يضحك انطيناه الهديه وطرنه من الفرحه

رزان: بابه خلي اني اطفي الشمعه لأن عيد ميلادي اليوم

رائف: لا اني اطفيها

ابو رزان: يله كلنه نطفيها

صرنه نعد حتى تخلص هاي السنه

وندخل بتاريخ 1/1 يلي هوه يوم ميلادي

واحد ثنين ثلاثه هههههههه

طفينه لشمعه سويه وقطعناها سويه صح احتفال بسيط بس جانت المتنه حلوه ودافيه

الحاضر...

دموعي نزلت على خدي واني اذكر ايامنه الحلوه

يا ترى راح تاليا تحتفل بهاي السنه گلبي نار عليهم واريد اشوفهم بس وين هاي صارلي سنه بعيده عنهم بس ولا دقيقه نسيتم احسهم عايشن بروحي







سمعت الباب ينفتح كلت يمكن أيمان بقيت على وضعيتي

هبيبات زيتويو هبيبات زيتويو سنه حلوه يا جميل سنة حلوه يا رزان

رفعت راسي وشفت مهاب لازم الكيكه بأيده وإيمان واكفه على صفحه مبتسمة

مسحت دموعي وبتمست

مهاب: كل عام وانتِ بألف خير

رزان: هههه شكراً

إيمان: كل عام وانتِ بألف خير ويارب تكون سنه خير عليج

رزان: إن شاءلله تكون سنه خير على الجميع بس شعرفكم اليوم ميلادي

مهاب: انتِ كتيلي هذاك اليوم تعاي اخذي الكيكه ايدي راحت

ضحكت وكمت خذيت الكيكه من ايده عدينه كلنه لحد رقم ثلاثه وطفينه الشموع صح فرحت بس دموعي تنزل لأن اريد اهلي وياي بهذا اليوم حاولو يغيرولي جو وسولفو بأكثر من موضوع حتى انسه وندمج وياهم بالجو

صار احتفال بسيط بس حلو وفرحوني بي بس مهاب مو على بعضه عافنه وطلع وشكله ضايج ماعرف من شنو

إيمان انطتني كتاب

رزان: شنو هذا الكتاب

إيمان: حمزه وصاني وكال تاخذينه وتخلين مهاب يقرالج هذا الكتاب

رزان: بس هوه راح ينام

إيمان: مراح ينام وراح يبقه طول اليل كاعد بالحديقة

رزان: زين ليش!؟

إيمان: سوي مثل مكتلج

رزان: تمام

اجوي ثنين دكاتره بس مو عراقين وياهم مترجم بفتره العلاج ميخلون احد وياهم بالغرفه غير الدكاتره ومهاب صباح صار يبات هنانه ويا الدكاتره حيل جنه فرحانين وخايفين بنفس الوقت على مهاب

بيوم رتبنه الغده وجانو منتضرين ضيف بس منو هذه الضيف ما اعرف

رزان: منو راح يجي

إيمان: أبن الأستاذ صباح الجبير

رزان: اهاا يعني ابن عم مهاب

إيمان: ااي

رزان: زين ليش هسه اجه وين جان قبل!

إيمان: محد يعرف بمهاب داخل العراق الكل يعرف هوه خارج العراق بس هذا لوتي ومينضم عليَ شي وعارف مكان مهاب لذلك منطيهم خبر أنُ راح يجي

رزان: شلون عرف؟

إيمان: شيطان كلشي يعرف ومينضم شي عليَ

رزان: شمدريج بي

إيمان؛ يا جا غير اني وابني صار النه سنين وياهم ونعرف كلشي عنهم

سكتنه من دخل حمزه يخابر

ـ يخوي والله مجبور تعرف عمك...يطردني والله حلف اذا عرفت يندمني... يلا منتضريك

خلصنه كلشي طلعت انضف الحديقه وجنت ادندن بغنيه ورش مي على الورد سمعت صوت وراي التفتت ونصدمت من شفته!!

يتبــــــــــــــــــــع.....

في قوقعة الاسبر - بارت الخامس -
ــــــــــــــــــــــــــــــــــــــــــــــ
سَوآد الليَل يبقىٰ وتطفَى الألوآن
واعِيد بذكرَياتَك وَالمَشاهِد !
اذا كُل طَير عنده اثنين جنحآن
انا مَكسور وعشت بجنآح واحد
ــــــــــــــــــــــــــــــــــــــــــــــ
طلعت انضف الحديقه وجنت ادندن بغنيه ورش مي على الورد سمعت صوت وراي التفتت ونصدمت من شفته!!

فتحت اعيوني على وسعهن اطرافي جمدت جان يمشي ويحجي ويا الحارس اريد اتحرك ماكدر شافني وشكله انصدم شفافي رجفت واعيوني دمعت تذكرت كلشي صار وياي بهذيج الفتره

حسيت على حمزه وهوه يندهني

حمزه: انتبهي رزان بللتي ملابسج

رزان: ها اي

ذبيت الصونده من ايدي

حمزه: دخلي جوه بارده لا تتمرضين

همهمت براسي ومشيت بسرعه وكفت كبال الباب ولتفتت لكيته يحجي ويا حمزه باوعلي وخزرني دخلت ركض جوه رحت للغرفه

معقولة هوه الأسبر يربي دخيلك خلص ايامي صارت معدودة

صرت اتنفس بسرعه وگلبي حسيته يريد يطلع من الخوف نزيت بسرعه من دخلت إيمان

إيمان: اسم الله الرحمن شبيج ترجفين

رزان: ها لا هوه بب بارده

إيمان: دغيري ملابسج وتعاي وراي اجوي

هزيت راسي وطلعت غيرت ملابسي وطلعت بس اطك سن بسن من الخوف

ليش ليشش كل هذا يصير وياي ليش كل ماريد اصلح غلطي ارجع اوگع بغلط اكبر من يلي قبله

خلصنه كلشي واني عقلي بغير مكان

لحد اليل سمعت بيهم راحو

إيمان: مو احجي وياج

رزان: ها ماسمعتج

إيمان: شبيج شو ماعاجبتني اليوم بس تصفنين

رزان: لا ماكو شي بس هذه الأجه اليوم شنو اسمه

إيمان: اسمه الاسبر

بلعت ريگي وخليت ايدي على راسي ولدمعه بطرف عيني شراح يصير بيه هسه شلون بيه وبهاي المصيبه محد هنانه يعرف بسالفتي ولا احد راح يساعدني

إيمان: ولج مو احجي وياج

رزان: ها شنو مانتبهت

إيمان: انطيتي العلاج لمهاب لو نسيتي

رزان: لا مو جان عندة خطار

إيمان: راحو من مساع يلا روحي شوفي ماسمعتي حمزه كلج ديري بالج تعوفي وحده







هزيت راسي ورحت الغرفته دكيت الباب ودخلت جان داير ضهره حجه بدون ميباوع

مهاب: يا هلا بلگاطعة

رزان: شلون عرفتني اني بدون متشوفني

مهاب؛ من دكت الباب

ؤزان: ههه لا صدك

مهاب: اي والله هيج دكين الباب مال واحد منعس

رزان: لعد شتريد افلشة على راسك

مهاب: لا يبوي انتِ بكلشي رقيقة

رزان: اخذت علاجك

مهاب: ااي اخذته وحاب اواريج شي

رزان؛ شنو هوه

نزل رجلة من على الكرسي وحركهن

مهاب: شوفي صرت اكدر احرك رجلي

فتحت اعيوني على وسعهن

رزان: ههه اي والله يعني تكدر تمشي هسه

مهاب: لا بس تكدرين دكولين هاي اول خطوه حتى ابدي امشي

رزان: الحمدلله ألف الحمدلله

مهاب: باقي بس فتره كلش قصيره ويخلص كل هذا التعب

واحنه نحجي دخل حمزه

حمزه: ذهب الكثير وبقه القليل

مهاب: اي مضل شي ولفضل يرجع الكم

حمزه: كل الفضل يرجع الدكتوره رزان هيه يلي غيرت نفسيتك بنسبه 70٪ تذكر قبل شكد جنت عصبي ومطايق روحك وهسه صرت شخص مرح ورجعت الطبعك لهادء بسبب فترات العلاج يلي جانت ويا رزان

رزان: اني مسويت شي كل هذه جان بفضلك انتَ يلي علمتني

مهاب: ثنينكم مراح انسه فضلكم عليَ انتو اقرب شخصين ساعدوني بهاي الفتره الصعبه يلي قدمتو الي مو سهل وجان كلش صعب ويعجز لساني عن التعبير

رزان: راح ابجي شنو هلرسمية

حمزه: هههههه كلش مهاب دخل بدور لاتنسه علاقتنه بيك مو علاقه اطباء ومريض احنه يربطنه زاد وملح ومواقف

طبطب على كتفه

عفتهم وطلعت رحت للغرفه خليت أيدي على گلبي غصه بصدري امثل القوه واني منهاره شراح يصير شراح يسوي بيه اللهي شسوي احجي المهاب

لا لا مستحيل كوه صار زين اذا حجيت راح يخرب كلشي وأكيد راح يطردني منا ويرجع النقطه الصفر ماريده يتأذه بسببي

اريد انام ما اكدر الف فكره بارسي

شراح يصير هسه أكيد راح يرجع يخطفني وينتقم أكيد راح يفضحني شلون بيه نوبه صباح ابو ومهاب أبن عمه يعني مستحيل يعوفوني بحالي مستحيل يجذبون الاسبر ويصدكون بيه

اضافري تغلغلت بشعري جو بارد بس نار تطلع من جسمي النفس ضاگ بصدري واحس حيطان الغرفه خنكتني اكثر







طلعت رحت اغسل بلكي الله واخلص من هذا التفكير

وكفت على المغسله غسلت وجهي وذبيت مي على ركبتي المي حيل بارد بس جسمي عباره عن نار

رفعت راسي على المرايه وشهكت من شفت الاسبر وراي ردت اصرخ سحبني من ايدي لزكني بالحايط وحط ايده على حلكي اباوعله بترجي وعيوني دمعت تقرب بدون ماينطق بحرف

انفاسنه اختلطت احس دكات گلبي مَسموعه غمضت اعيوني ماريد اشوف شكله

تقرب اكثر وهمس
طرتي وطرتي وتالي رجعتي العشج

حسيت على شيء بركبتي فتحت اعيوني شفتها سجينه حطاها على كربتي

الاسبر: ههههههه حلو هسه هنا اذبحج وخلي دمج بكل مكان لووو نزل ايده على ركبتي رجعت اليوره اكثر لزكت بالحايط

مهاب: من اعيوني

كمت ولزمته من اجبينه هوه رفع حاجبه مستغرب من حركتي

مهاب: شجاي تسوين؟

رزان: كاعد اشوف اذا حرارتك عالية لأن اليوم ما شاء الله تسولف وتضحك

مهاب: احم يعني ارجع الشخصيتي القديمه

رزان: لا لا عليك الله هاي حلوه

مهاب: هاي هيه لعد رجعي المكانج خلي نكمل كلامنه

رجعت المكاني ونطلقنه بالسوالف اول مره هيج ننطلق بالحجي وسولفنه عن اكثر من موضوع ماحسينه بالوقت لحد ما اجه حمزه

حمزه: نسيتو ارواحكم صار وقت الغده

مهاب: لا بعد كملي

حجاها وباوعلي

رزان: لا بعدين نكمل خلي ناكل هسه لأن صدك جعت

مهاب: ليش متريكتي

رزان: لا

حمزه: يله تعالو

رحنه للبيت وباوعت عليهم

رزان: ليش مناكل سويه!؟

حمزه:فكره حلوه بس مهاب ميرضه

مهاب: جيبولي الاكل الغرفتي

حجاها وراح الغرفته

حمزه: روحي قنعي حتى يجي

رزان: خاف ميرضه

رزان: حاولي ويا يله بالشطوره

رزان: تمام

رحت للغرفه

رزان: ممكن ادخل

مهاب:ادخلي

رزان: انتَ مو صرت صديقي

مهاب: من شوكت!؟

رزان: مو هسه تعرفنه على بعض وسولفتلك على ايامي قبل

مهاب: وهذا لشي يعني صداقه

رزان: اي لأن شاركتك بجزء من حياتي المُهم جايتك بطلب

مهاب: ما اجي

ررزان: ليش؟؟

مهاب: لأن ما اعرف اساعد روحي واكل وحدي

رزان: بس هذا لشي مو بيدك ولا بئرادتك ولا عيب

سكت مارد

رزان: شفتني اني لبارحه شلون تصرفت كله غلط بغلط بس مابقيت بالغرفه حابسه روحي ومكبره لموضوع لأن الوضع جان خارج أرادتي وانتَ شخص عادي يعني حالك من حالنه

مهاب: لا اني مو مثلكم

رزان: شلون بله عندك عيوني ثلاثيه لو خشمين؟

سكت مارد

رزان: بس هالمره الخاطري

ماكو رد







رزان: يله حبااب تره راح اموت من الجووع

باوعلي صفح

رزان: يله وووافق حبااب

مهاب؛ بس هاي المره

رزان: يااااي حجيتها وركضت للكرسي وطرت بي ضحك ورزلني بنفس الوقت بس غلست صبينه الغده وكعدنه سويه نتغده اني ومهاب وإيمان وحمزه

واحنه ناكل دخل صباح وحسيته حيل استغرب من وضعنه

صباح: اليوم منجمعين

حمزه: انجمعنه والفضل الرزان

الأنضار كلها تحولت عليَ

سكتو محد جاوب بس الفرحه واضحة عليَ

مهاب حمزه وكله وبعدها اخذه الغرفته خذيت مي ورحت نطيته العلاج وطلعت

حمزه: وين رايحه

رزان: يم إيمان ضوجه

حمزه: روحي لعند مهاب وغيريله جو

رزان: تعبان راد يرتاح

حمزه: تؤ مرتاح مشفتي قبل شويه شلون جان يضحك وياج

رزان: صحيح

حمزه: يله سوي لكتلج بي

سويت مثل مكلي رجعت يم مهاب وهيج مره هاي الفتره علاقتي كلش قوت بمهاب انجبر اضحك وكل موقف احجي ويا احس سجاجين بگلبي من اذكرله ايامي ويا اهلي تخنكني العبره بس ما ابجي كدامه لأن اعرف مراقبه من حمزه وأيمان ولازم اريح نفسيته مو احطمها

صارت علاقه حلووه وصداقه بده يحجيلي عن كل تفاصيل حياته واني ويا اشاركه بالحديث علمني حمزه شلون افتح ويا المواضيع وخلي يحجيلي كلشي ومن اسئله جان الرد"جزء من العلاج النفسي"

كملت ويا بهذا المجال وحالته تحسنت نوعاً ما رجعت ايده تحركت ورجع يحرك اطراف رجلية وكلنه فرحانين بهذا التغير يلي صار صح العلاج بطيء بس مو مستحيل بهاي الفتره صرنه اصدقاء كلش مقربين صرت ما احس بالوقت ويا وبكل وقت هوه يناديني اسولف ويا....

بيوم جنت تعبانه واريد انام من وكت وصاحني طلعت جنت ببجامه النوم

مهاب: ها شنو تردين تنامين

رزان: ااي والله حيل تعبانه ونعسانه

مهاب: خوش لعد اني هم اروح انام

رزان: ليش صحتني

مهاب: ردت نسولف

رزان: على باجر

مهاب: هاي هيه براحتج

رزان: تصبح على خير

مهاب: انتِ كل الخير

بتسمت الة ورحت للغرفه ردت مي ما لكيت خليت ورجعت طلعت جبت من المطبخ طلعت ولكيت صباح بوجهي بتسملي وسلم عليَ رديت عليَ...







صباح: ما اعرف شلون اشكرج على يلي سويتي

رزان: ليش اني شنو سويت؟

صباح: يلي سويتي مستحل انساه الج رجعتي مهاب القديم رجعتي ضحكته ورجعتي نفسيته المرحه

رزان: ماسويت شي كله بفضل حمزه هوه يلي علمني على كلشي اذا تريد تشكره على هلشي

صباح: مراح انسه طيبتج ووكفتج ويا مهاب وشنو تردين كليلي وبشنو تردين اساعدج اني حاضر

رزان: تسلم متقصر استاذ

صباح: بلاهاا الأستاذ ناديني عمو

رزان: هههه تمام

صباح: بالمناسبة مناسي موضوعج بس حيل دوخني أمرج لأن محد من اقارب منى واهلها يعرفوج

بلعت ريگ وتلبكت

رزان: ءءء يعني شنو؟

صباح: ما عدهم احد مفقود لا من بنيه ولا من ولد وجاي احاول الاكي عمامج او خوالج بس كلهم ناكرينج محد يريد يعترف بيج

رزان: ما اعرف بعد بس يلي اعرفه ماعندي اقارب لا من طرف بابه ولا من طرف مامه

صباح: خير أن شاء الله كتلج انه ماناسيج وسويت العليَ بس ماكو نتيجه واحنه هنانه اهل

رزان: هاي هيه إن شاءلله خير

صباح: إن شاء الله

رزان؛ تصبح على خير

إيمان: استغلي هلشي وبعدج زغيره وحليوه وماعندج لا اهل ولا سند صيري ملعبه وكسبي لصالحج الدنية مابيها أمان أمني على مستقبلج من هسه

عافتني وطلعت وخلتني بحيرتي

طلعت الصاله سمعت صوت عالي ماعرف شنو بس يخوف باوعت لشباك تمطر وترعد

اطرافي جمدت تذكرت ذاك اليوم من دخلو علينه وقتلو بابه سديت أيدي غمضت بقوه وشفت بابه وهوه كدامي وحاطين السلاح براسه وصوته بأذني وهوه ينطق بشهاده سديت أذاني فتحت عيوني وشفت نفس الشكل نفس الاجسام نفس البس

رزان: للااااااا باااابه لا تقتلووووو مامسوي شيء لا تيتمونه لاااا عووووفوووو

صرت اصرخ بهستريه ملخت شعري واضرب بيهم اريدهم يطلعون ماعرف منو لازمني وماعرف ليش دخلو لهنانه

حسيت على مي بارد نزل على وجهي فتحت اعيوني كوه روحي نسحنت

لكيت حمزه لازمني من وجهي ويحاجيني

حمزه: بابه تسمعيني رزان محد موجود

رزان: خليهم يطلعون بب بابه راح يقتلون بابه

حمزه: محد يقتل ابوج محد اهدي

حجاها وسحبني لحضنه لزمته من قميصه وصرخت حسيت هسه وعيت على روحي بجيت وهوه يمسد على شعري







حمزه: كافي دموع راحو شوفي محد هنانه

باوعت للمكان جانت إيمان واكفه يمي ومهاب يباوعلي من بعيد دخل الحارس

ـ ها شلون صارت صحت

حمزه: اي صحت راحو

باوعلي بقهر وهز راسه بمعنى "اي"

ـ اجوي هنا عرفو مكاني راح يكتلوني ويا بابه

حجه الحارس

ـ تفتيش فتشو وطلعو ماكو شي طلعها منا راح تنجلط

حمزه ـ عمو تردين اطلعج منانه

رزان: ها لا بس انام اريد انام

لزمتني إيمان من أيدي ورحت وياها خلتني على فراشي ومسدت على شعري

إيمان: شنو تحسين اكو شي يوجعج

اشرت الها على صدري

رزان: هنانه نار گلبي مشتعل نار يريد اهله يريد احبابه تعبت من الفراگ

سحبتي لحضنها وخلت راسي على رجلها سمعتها وهيه تبجي نزلت دموعي بهدوء اريد اهلي اريدهم يمي ماريد غيرهم اهواي بقيت ابجي لحد مانمت...

فزيت على صوت خاله إيمان

إيمان: كومي حبيبه كافي نوم

كعدت ومثل الكابوس جان لزمت راسي حيل يوجعني

رحت غسلت ورحت للمطبخ لكيتها تسوي غده

رزان: غده ليش بيش لساعه هسه؟

إيمان: ساعه بل1 لضهر

رزان: عاا اهواي ليش ما كعدتيني

إيمان: ما نطاني گلبي اكعدج تعاي اكليلج شي حتى تاخذين علاج اعيونج منفوخه من لبجي

سحبت لكرسي وكعدت على الميز خذيت تفاحه اكل بيها

رزان: ااحم شنو صار لبارحه

إيمان: ليش متعرفين

رزان: لا بس عبالك جنت بكابوس

اجتي الشرطه البارحه تفتيش للبيت وانتِ حالتج تهسترت

بلعت ريگي ورجعت لتفاحه المكانها نسدت نفسي

إيمان: ما اعرف شنو يلي مريتي بي بس متأكده جان صعب عليج

رزان: صعب وحيل صعب

إيمان: الله كريم ميضل حمل مطروح

هزيت راسي وبقيت ساكته

رزان: زين خوما خربطت بالحجي

إيمان: اهواي حجيتي وتصرخين عوفو اهلي وبعدها ضليتي تبجين تردين امج وراها صرتي تنادين بأسم تاليا وقداح تهمسين بأسمأهم منو هذولي؟

رزان: اهلي

إيمان: الله يرحمهم برحمته الواسعه

إيمان: بس همه ممتوفين







إيمان: شلون موو كلتي كلهم ماتو من صار قصف بمنطقتكم

تذكرت جذبه منى يلي بقيت مستمره عليها وخاف اكلهم جذب ويطردوني هذا صباح يريدها حجة خلي اسكت واستر على روحي احسن

دخل للمطبخ حمزه

حمزه: صباح الخير شلونها اليوم البطه

رزان: الحمدلله

حمزه: خوما شي يوجعج

رزان: لا زينه

حمزه: عسى دومج يارب

بتسمت الة

حمزه: روحي يم مهاب يريد يحجي وياج

رزان: تمام

طلعت لكيت مهاب بالحديقة

رزان: صباح الخير

مهاب: صباح النور

كعدت على الكرسي مقابيلة

مهاب: شلون صرتي اليوم

رزان: الحمدلله

بقه ساكت بس يباوع لعيوني نزلت اعيوني وحجيت

رزان: احم اروح اساعد إيمان

معاب: شنو قصتج؟؟

رزان: يا قصه؟

مهاب: ليش حالتج تهسترت من موقف البارحه

رزان: ما اعرف بس جنت خايفه

مهاب: سمعتج وانتِ تبجين وتردين اهلج جنت يمج بس بعيد

رزان: يعني سمعت كلامي البارحه!

مهاب: مو مهم المُهم اذا تحسين تردين تفضفضين تعاي يمي واسمعلج

رزان: لا هوه بس جنت مشتاقه الأهلي

مهاب: الله يرحمهم حاس بيج اني هم فقدت هلي وفقدت صحتي وياهم

رزان: ويرحم موتاك المُهم تعبت من هذا الموضوع ولو ابجي لبعد سنه مراح يتغير شي ولا راح يرجعون مو صحيح

مهاب: ههههه لا تكابرين بابه تره مشاعر الأشتياق تقتل صاحبهة

رزان: ياا باع غمازتك

مهاب: هههههههههه عفتي كلامي ركزتي على الغمازه

فعلاً اني تركت كلامه واجتي عيني على غمازاته واول مره اشوفه هيج يضحك

رزان: اي والله ههههههه طلعت عندك سنون وغمازه بعد

مهاب: شكد فطيره تضحك على جرحها

رزان: كافي دراما والله راح ابجي

حجيتها ودمعت اعيوني صدك اجيت ابجي

مهاب: هههههههههه ولج بابه اكبري

رزان: شبيه زغيره قابل وبعدين شسمه يعني ماريد احد يعرف بيلي سمعته

صح مو دكتوره اني بس من شفتك ذيج المره تحاول وعندك اصرار إنُ تمشي الله مراح يتركك وراح يساعدك

مارد وبقه ساكت اني همينه سكتت نوبه صار هدوء تلبكت صرت ما اعرف وين اباوع وهوه بس يباوعلي خليت وكمت

مهاب: راح اطلعين

رزان: بكل مره احجي وياك بس انتَ متحب تحجي وياي فـ اطلع احسن الي والَك

مهاب: لا تره احب اسوالفج

رزان: زين ليش متسولف وياي

مهاب: يعني بشنو اسولف

رزان:يعني بكلشي مثل ما اني احجي

مهاب: يعني هسه لازم احجي مثلج
وحنه نحجي دخل حمزه ويا الدكاتره

اني ردت اطلع وصاحني مهاب

مهاب: لا اطلعين خليج

بتسمت وهزيت راسي

رزان: تمام

باوعت الحمزه لكيته يباوع النه صباح رفع مهاب من الكرسي وبدو بالعلاج واني بس ضاله اباوع من بعيد خلصو كلشي وطلعو بره الغرفه اني جنت كاعده على القنفة بس طلعو باوعلي مهاب

مهاب: شفتي التعب يلي كاعد اتعبه

رزان: الله يكون بعونك صدكني الله مراح يضيع هذا تعبك وراح يعوضك

مهاب: رزان كل يوم كاعد اتعب اكثر من يلي قبله

حجاها واعيونه صارت بيهن لمعه

لزمت أيده وطبطبت عليها

رزان: كل هذا التعب راح تنساه من دكوم وتوكف على رجليك

مهاب: يمته يجي هذا اليوم

واحنه نحجي دخل حمزه شافنه ورفع حاجبه مستغرب اني عفت ايده وطلعت من الغرفه رحت للمطبخ خليت ايدي على وجهي وبجيت على شنو ما اعرف بس حسيت نفسي تحطمت وحيل مشتاقه الأهلي وفوك كل هذه امثل اني قوية كدامهم ومحد يدري بعلتي مسحت دموعي وشفت حمزه كدامي

حمزه: شلونج بابه

رزان: الحمدلله عمو انتَ شلونك

حمزه: الحمدلله ليش تبجين

رزان: ماكو شي

حمزه: اعرف صاير ضغط عليج بهاي الفتره ومهاب كلامه يجرح بس تعرفين مريض ولازم نتحمله







رزان: بس مهاب ما عليَ بدموعي

حمزه: لعد شنو سببهن

رزان: مشتاقه الأهلي

حجيتها وبجيت

حمزه:الله يرحمهم بابه لا تبجين دعيلهم

هزيت راسي وبقيت ساكته

حمزه: ردت اجيب ممرضه بس مهاب ما قبل

رزان: ليش؟

صباح: يكول ماريد بعد ممرضه موجودة رزان شفتي صرتي ممرضه بدون شهاده هههههه

إبتسمت مجاملة

رزان: زين هوه شوكت يطيب ويمشي يكول تعب خطيه

حمزه: هوه كلج تعبت

رزان: اي خطيه الله يعينة

حمزه: أمين اريدج تخلين أيدج بأيدي ونساعد مهاب يرجع لصحته مثل قبل وصدكيني لا اني ولا مهاب وصباح راح ننسه فضلج ونساعدج بيلي نكدر عليَ

باوعت عليَ وباوعت الأيده

حمزه؛ خلي أيدج بأيدي وخلي نعالج مهاب سويه

حجاها وفتحلي كف ايده رفعت أيدي وخليتها بأيده

رزان: أكيد وبدون شك

حمزه: من الناحيه الجسديه كاعد نشوف اكو اختلاف ويمكن يرجع يحرك أيده بس حالته النفسيه حيل مدمره وأكيد انتِ شفتي هذا لشي اريدج تخلي يفضفضلج وتحجين ويا اهواي يعني متنطي مجال يسكت ويفرغ كلشي بداخله الج

رزان: هوه اني احجي ويا اهواي بس هوه ميحجي اهوايه واغلب لوقت ساكت وبس اني احجي

حمزه: اعرف طبعه كلش زين بس ارتاحلج وحب تعاملج كاعد اشوف الإبتسامة على وجهة من تكونون سويه وليوم بده يحجيلج عن تعبه الحامله سنين وحده

بقيت افكر بكلامه وليش اني يعني ليش ميجيبله دكتوره نفسيه

حمزه: اعرف بيلي جاي تفكرين بي بس كتلج مهاب ارتاحلج وحب تعاملج

رزان: يعني مفتهمت اني شنو اسوي

حمزه: متعوفين أيد مهاب أبد

رزان: أن شاء الله

حمزه: يعني اعتبر هذا لشي وعد منج

رزان: وعد مراح اترك ايد مهاب واكون ويا بكل خطوه

مد ايده ومسد على شعري

حمزه: بارك الله بيج

عافني وطلع اجتي إيمان شافتني وطلعت كعك واني سويت جاي وكعدت تسولف بس اني كلش مالي خلك واريد بس اروح بس ستحيت من عدها

إيمان: شو ضايجه مو على بعضج

رزان: لا ماكو شي

إيمان: دتعاي افرحج







رزان: بشنو؟

إيمان: دكعدي خنشرب جاي ونسولف

خلصنه وحجيت

إيمان: تعرفين صباح اجه يطردج لأن انتِ من اقارب منى وتعرفين بعد شنو سوت لذلك بعد ماعدهم ثقه بيها بس مهاب كلهم عوفو رزان ومحد يطردها وصباح مراضي بس مهاب اصر تبقين هنانه

رزان: تره صباح خلاني هنانه حتى اعالج مهاب مو علمودي

إيمان: صح ومهاب خاطر بحياتة حتى تبقين هنانه

رزان: شلون خاطر بحياتة!؟

إيمان: يعني تخيلي لو انتِ طلعتي منافقه ويا منى ورجعتي غدرتي بيهم منو يلي راح يكون بخطر غير مهاب

يعني مهاب جان مستعد يضحي بروحه بس لحتى تبقين هنانه

صفنت على كلامها وبعدين رديت

رزان: زين ليش هيج يجوز ناصبين كمين يعني ويردون يعرفون منو وراه منى

إيمان: لا صدك لا كمين ولا هم يحزنون مهاب معجب بيج

رزان: معجب شجاي تحجين خاله ههههه دخيل بختج

إيمان: وداعتج هذا يلي جاي اشوفه صارلي اهواي هنانه وجابوله اكثر من ممرضه واكثر من دكتوره بس يبقن يومين ولثالث يبطلن لأن مهاب جان يخبلهن حتى ضرب يضربهن بس انتِ حتى صوته مارفعه بوجهج

رزان: زين ليش هذه لتعامل وياي بذات!؟

همهمت براسي وبقيت ساكته كملت شغلي وسمعت صوت مهاب يصيح نوبه محد موجوده وأيمان بره تشر بالملابس رحت اشوفه شنو يريد

رزان: ها تريد شي

مهاب: صار الي ساعه ااصيح محد يسمع

رزان: محد موجود بس اني وهسه سمعتك

مهاب: ليش وين راحو ومنى وين مو دزيتها علمود الأكل

بقيت صافنه شنو ارد عليَ

رزان: ءء هوه راحت ويا الأستاذ صباح

مهاب: ويا عمي ليش؟

سحبت نفس وحجيت

رزان: اسمع من يوم يلي كلت بي انتَ وكفت على رجليك المنى تغيرت وصارت متعرف شنو تحجي ومن ثاني يوم بدت تعتني بيك وصار كلشي يخصك هيه تقوم بي وحالتك سائت وصرت طريح الفراش وشفتها اكثر من مره تحطلك شي بلأكل وكلت الخاله إيمان كالت من ضمن العلاج ولبارحه بليل شفتها تحطلك بالحليب وشافني صباح ورزلني والله شنو لأن اراقبها واني جنت بس واكفه بالباب

سحبت نفس ورجعت شعري وراه اذاني وكملت

اي وهسه شايفها تحط بلأكل ومن سائلها كايله من ضمن العلاج ومن طالبه منها نكرت فراحو للدكتور يفحص هذا الدوه ويتأكد شنو تريد منى منك

صفكت أيدي وبتسمت

وهاي هيه هسه تريد مني شي

احجي وهوه ضال صافن

مهاب: شوكت راحو

رزان: قبل شوي

مهاب: تمام

عفته وطلعت وتذكرت هوه راد اكل رجعت فتحت لباب لكيته مغمض اعيونه ومبتسم

رزان: ااااحم شسمه ردت اكل

كهاب: ها لا ماريد بعدين

رزان: بس وراك علاج ولازم تاخذه بوقتة

مهاب: لا خل يجي عمي ونفهم لأن كلشي مفهمت منج

رزان: شقصدك كلامي مواضح؟؟.

مهاب: كايل هسه اني هيج

عفته وطلعت بس سالفه منى ببالي معقولة يطلع كلامها صح واطلع اني الغلط

ضليت منتضره وبعد تقريباً ساعتين اجوي صباح وحمزه ووياهم بعد كم دكتور دخلو الغرفه مهاب وبقو وقت يله طلعو وصارت هوسه كلش واني وإيمان بالمطبخ يا جاي يا مي لحد مراحو نوبه الفضول موتني شصاير يا ترى

لحد ليل طلعو الدكاتره بقو بس صباح بغرفه مهاب وحمزه طلع للمطبخ اني رحت وراه لأن اعرف راح يحجي كلشي لإيمان وصدك هيج صار ضليت اتسمع الكلامهم

حمزه: وداعتج هذا يلي صار

إيمان: عزه العزاهة زين ليش هيج سوت وهيه صار الها سنوات ويانه شنو غايتها







حمزه: مادري والله بس صباح حلف يسحلها هيه وعشيرتها بالمحاكم ويسوي حياتها سواد

إيمان: ااي طبها مرض جا ليش هوه نص بشر شلون تخليله سم بلأكل

حمزه: يا سم مو سم هذا بس موت بطيء يقتل كل الخلاية يلي بجسمه وياكل بي شوي شوي مثل السرطان لحد مايموت

هيه دكت على صدرها وشهگت

إيمان: صخام بوجهة حسبي الله ونعم الوكيل يمة يمه خوفك من الفقير شهل حقد هذه

حمزه: اي والله خوفج بهل وكت كلشي توقعي الدنية متّأمن بعد حجاها وطلع من المطبخ

اني ضليت بصدمتي بس طلع رحت الإيمان

رزان: ها شكال حمزه

إيمان: خليها سكته انتِ كتيلي تخليله شي بلأكل وانه الغشيمة عبالي علاج طلع هذه سم تخليله ولج تريد تكتله يمه يمه شلون تنام ليلها هاي ياربي دخيلك استرنه بستر فاطمه

تحجي وجرت أذانها ودكت الخشب اني بقيت كاعده وحاطه ايدي على خدي

الحمدلله عدت على خير واني طلعت على حق كلش رتاحيت لأن حسيته مثل الهم وجنت حاملته وهسه انزاح من صدري بس خطيه مهاب شنو ذنبة هوه مريض نوبه تجي هاي تچمالة عليَ

فزيت من صفنتي على دخول صباح للمطبخ كمت وعدلت وكفتي

صباح: من اليوم انتِ لشخص لوحيد المسؤل عن حياه مهاب

باوعت منا منا محد بس اني اشرت على نفسي

رزان: تقصد اني

صباح: ليش احد غيرج هنانه المُهم من اليوم كلشي يخص مهاب يخصج من علاج وغذاء وكلشي

رزان: بس اني مو دكتوره وما اعرف شي بالعلاج

صباح: حمزه موجود وهوه يعلمج وشنو تحسي شي غريب تجين وتنطيني خبر واني من باجر ادور ممرضه واجيبها

رزان:تمام

طلع وحجه ويا حمزه وإيمان

صباح: من اليوم رزان هيه المسؤله عن مهاب وما مسؤله عن شي غير مهاب حمزه اريدك تعلمها على العلاج شوكت وبيا وقت وشنو الزين وشنو المضر وتدربها زين

حمزه: تأمر

عافنه وطلع

إيمان: جا ليش ميجيب دكتوره ثانيه مو احسن من رزان زغيره وين تعرفله

حمزه: لا اني كلشي اعلمها وشنو متعرفه تجين دكليلي بي واني اعلمج عليَ تمام بابه

حجاها وهوه مبتسم رديت بإبتسامة

رزان: أن شاء الله

صار مهاب من مسؤليتي اكله اني المسؤلة عليَ وكل انواع العلاج علمني عليَ حمزه ومهاب جان ياكل وياخذ العلاج وينام لأن السم يلي جان يشربه حيل مأذي ومتعبه كل يوم يجون دكاتره يبقون اكثر من اربعه ساعات وبعدها يروحون







وهوه نفس الطبع الاعصاب والنفرزه والصياح من كلشي بس رجع يكعد على كرسي جان قبل ميكدر وبصراحه حيل فرحت لأن رجع للكرسي احسن من نومه الفراش

رزان: مثل ما اليوم تعافيت ورجعت للكرسي باجر همينه تتعافة وترجع تمشي

مهاب: وليش كل هاي الثقة!؟

رزان: مو ثقة بس متأكده راح ترجع تمشي

حجيتها وكعدت بلگاع رفعت راسي وكملت كلامي ويا

في قوقعة الاسبر - بارت الرابع -
"في قوقعه الاسبر"

ــــــــــــــــــــــــــــــــــــــــــــــ
"الوجَع هَدني"
الجسم من كل مكان يصِيح
خلصت طاقتي وتَعبان ما أنكر
يومية بحَياتي أنصدِم بالأحداث
أنهدَم حيلي وبَعد ما بيّه حيل أحزر !
مَچنت أدري الظروف تغَيّر الإنسان
مَصدوم شكُثر يا آني مِتغيّر
ـــــــــــــــــــــــــــــــــــــــــــــــــــ

معقوله منى هيه يلي هيج سوت وخلت حاله مهاب تتراجع لأن بهذيج الفتره هيه جانت بعيده عَنه وكف على رجلة بس من رجعت منى تهتم بي حالته تراجعت وصار حتى أيده ميحركها

خلصت غسل الماعين واني بعدني افكر بسالفه منى لحد ليل شفت إيمان ضليت اسولف وياها وبعدها رحنه نمنه....

هيج مشت هاي الفتره هدوء ومابيها شي بس بقيت اراقب منى وصارت بكل وجبه اكل تحط نفس لماده بلأكل وبدون علم شخص من تدخل متحط شي وتتصرف طبيعي ومن اطلع تطلعه بسرعه وتحطه بلأكل قررت احاجي إيمان وهيه أكبر مني واعرف

رزان: امم اكول خاله يعني هوه اكو علاج ينحط ويا الأكل

إيمان: والله يا خاله مادري بس هوه انواع اكو بلعصير بس بلأكل مادري

رزان: زين يعني اني شفت منى اكثر من مره تحط شي ويا الأكل مال مهاب ماعرف شنو ومن ادخل تخفي عني

إيمان: أكيد من ضمن العلاج ومتحب احد يعرف

رزان: يعني اذا عرفت قابل شراح اسوي

إيمان: هاي بعد تفكيرها

همهمت براسي بس مجاي تدخل هاي السالفه براسي بليل وديت الجاي للحارس ولجو جان حلو بقيت شويه افتر بالحديقة وكلت اروح للمطبخ من وراه البيت لأن بي بابين واحد من داخل البيت واحد من بره الحديقه صاير

رحت ردت افتح الباب وجان نصه جام شفت منى وهيه تسوي حليب خلت هاي الماده الما اعرف شنو هيه ورجعته بجيبها وخذته وطلعت ماحسيت غير بشخص لزمني من أيدي واني جنت صافنه صرخت وخليت ايدي على حلكي

صباح: شنو تسوين هنانه

رزان: ءء شفت منى وهيه تسوي الحليب

صباح: وليش تراقبين بيها!؟

حسيتها هاي فرصتي حتى احجي ويا بهذا الموضوع

رزان: استاذ هاي اكثر من مره اشوف منى وهيه تحط ماده ما اعرف شنو هيه ويا أكل مهاب بدون علم احد

يسمعلي وعاگد حواجبه وشكله ممصدكني

صباح: شلون يعني

رزان: ماعرف شي مثل الملح شكله تخلي على اكل مهاب ومن اشوفها بسرعه تضمه ومتخلي واني موجوده لذلك شفتني اراقبها لأن خايفه على مهاب







صباح: ليش خايفه تره منى صار الها سنوات تشتغل عندي

رزان: اعرف بس من يوم يلي تحرك مهاب وهيه عرفت كلش تغيرت وقبلها مهاب جان يتحرك وحتى شفته وهوه واكف على رجلة ومن عرفت منى تغير كلشي وهسه صار طريح لفراش

صباح: مهاب واكف على رجلة!!!

رزان: ايي تذكر هذاك اليوم بليل من وگع جان واكف وثاني يوم اني كلت المنى وبعدها حالته تراجعت

صباح: شنو ليثبت كلامج صح؟

رزان: ما اكدر اثبتلك هسه بس تكدر تراقبها بدون علمها وراح تشوف بعينك

صباح: ماكو شي من هذا لحجي وعوفي هاي لتخيلات واحترمي نفسج وعليج بشغلج وبس ماريد اسمع هيج كلام مره ثانيه فهمانه

حجاها وخزرني

رزان: ماعندي شي اني وما اكرهه احد بس هيج حجيت من خوفي على مهاب وبعد لشي راجعلك وهاي هيه عليَ بشغلي وبس

عفته ودخلت للبيت رحت نمت بس طول ليل افكر بيلي صار

رزان: يووو كافي تفكير لمهم سويت لعليَ وهسه صار عنده علم أنُ ابن اخو بخطر وهاي هيه شعلية بيهم طبهم طوب نارهم تاكل حطبهم

ساعه هيج احجي وساعه اكول خاف يلي اشوفه مو مهم وماكو شي من يلي افكر بي وهيج ضليت لحد ما تعبت من التفكير ونمت...

ثاني يوم مر عادي مابي شي لحد العصر شفت منى وهيه داخله للمطبخ عفتها وطلعت شفت صباح بوجهي غلست وكملت طريقي صاحني لتفتت ألة

رزان: نعم؟

صباح: وين منى ماكو بغرفه مهاب

رزان: بالمطبخ كاعد تسوي اكل المهاب

عفته وطلعت بدون ما اسمع الرد شويه وسمعت صوتهم طالع رحت اشوف شكو وشفت صباح واكف لازم ايد منى

ومنى وجهة صاير اصفر كركم إي هوه من ضمن العلاج

صباح: ضمن يا علاج ليش اني ماعرف بي وليش مثل الحراميه تراقبين يله تخلي

منى: مو مو شسمه صدكني هوه علاج وقابل جديده شنو من زمان اني اشتغل هنانه

صباح: كوووولي شنو يلي كاااعد تنطي المهاب

منى: يعني شنطي معقولة كاعد تشكك بيه استاذ واني صارلي سنوات اشتغل عدكم وتاركه كلشي بس لحتى يتحسن وضع مهاب وهسه جاي تتهمني باطل

صباح:مراح اضلمج بس راح اخذج واخذ هذا يلي عندج وتأكد منه اذا جان زين لو مُظر

اباوع المنى ضلت تبلعم وجهةة يعرك بَرغم الجو زين مو كلش حار اخذاها وراحو هيه وصباح وحمزه

رحت الأيمان حتى اتأكد

رزان: شصاير؟

إيمان: جانت تصب غده المهاب وشايفها الأستاذ تحط شي بلأكل ومن سائلها بالبدايه ناكره وبعدين كالت من ضمن العلاج وماقرر شي حتى يضلمها راح يروح لدكتور يعرف ويكول شنو يلي جانت تحطه بلأكل

حمزه: ما اعرف جان قبل يحرك ايده هسه ميكدر يرفعها وتخبل حالته مجاي تتحسن

حركت راسها بأسف وبقت ساكته
رحت اغسل الماعين وافكر بحاله مهاب ليش هيج يصير ويا خطيه بعدين بديت اربط الأحداث براسي

معقوله منى هيه يلي هيج سوت وخلت حاله مهاب تتراجع لأن بهذيج الفتره هيه جانت بعيده عنه وكف على رجله بس من رجعت منى تهتم بي حالته تراجعت وصار حتى أيده ميحركها

يتبــــــــــــــــــــــــــع....