قصص واقعية ، 🌸 ' Telegram Posts

- مرَّة واحدة في العمر تلتقي بالشخص الذي لا يُشبه أحداً ولا يشبهه أحد فلا. .اقرأ المزيد
للأشتراك: @tawsol_almalika_bot

•ليســتة الملكة 💛♪.!✨•

_ للــقــنــوات 1k لـ 20k نقبل اقـل حسب التفاعل  

_يــومــياً مـن 12 مساءاً لــ 12 ظهراً

للأشتراك : @tawsol_almalika_bot

رزان: اليوم اكتشفت انتَ اقرب شخص الي والشخص الوحيد يلي اضحك ويا من كل گلبي ولوحيد يلي حبني وحب سوالفي انتَ صديقي الحقيقي ولباقي كلهم جذب

انرسمت على شفافه شبه ابتسامه بس ماحاب يبينها

مهاب: منو تقصدين بلاصدقاء الجذابين

رزان: إيمان وحتى حمزه بس انتَ صديقي الصدوق

هز راسه وبقه ساكت

رزان: اضحك تره مبينه ميحتاج تضمها

مهاب: بشنو زعلوج حتى تحجين عليهم

رزان: مو مهم لمُهم لدكاتره شكالو ليوم

سحب نفس وزفره

مهاب: ماكو شي نفس كل يوم

رزان: امم زين وبعد

مهاب: بعدني زعلان

مديت اصبعي الزغير

رزان: صحيبة

ابتسم واصبعه الزغير تشابك ويا اصبعي

مهاب: هههههه صحيبة

رزان: بعد ماكو زعل

مهاب: احمم ميخالف

حجاها ووخر اصبعه

رزان: تمام لعد اروح انام

مهاب:بشنو حمزه حجه وياج

رزان: ماحجه شي بس نصحني وبصراحه نصيحته صحتني على اهواي أمور جنت غافلة عنها

مهاب: حلو زين شنو لأمور يلي جنتي غافله عنها

رزان: كتلك اهواي ومن ضمنها عرفت انتَ اقرب صديق الي

بقينه شويه نسولف وأكيد سوالفنه ماتخله من لضحك دخل الاسبر للغرفة وسكتنه

الاسبر: ليش سكتو كملو لضاهر سالفتكم مهمة







مهاب: وشلون عرفتها شغله مهمة

الاسبر: كاعده تسولف وتشرح بذمه وضمير وانتَ سارح بالخيال

ماعرف شنو جان يقصد باوعت لمهاب صار يبلعم ميعرف شنو يحجي

مهاب: لا موهيج ليش نيتك زفرة

الاسبر: تعلمني بيك

استأذنت من مهاب وطلعت من الغرفة

رحت للغرفة بقيت وقت كلش طويل لحد مانمت....

مر يومي عادي ومهاب ماشفته همينه لدكاتره موجودين خلصت كلشي وبعدها انجمعنه مثل كل مره اني وحمزه وإيمان ومهاب انسولف ونضحك بس مهاب مو ويانه حمزه اشرلي وكتله ماعرف شي وحتى تصالحنه

حمزه: لعد ليش ضايج

رزان: ماعرف لبارحه بليل نسولف ونضحك واجه الاسبر عفتهم وطلعت

حمزه: ماسمعتي شنو حجو

رزان: لا ماضن شي مهم لأن اول مادخل الاسبر عادي شكله

حمزه: يعني متعرفين شي

رزان: لو اعرف جان كتلك

ضل يفتر ماعرف بمنو اتصل طلع شويه ورجع اجاني

حمزه: مهاب يريدج

رزان: تمام

رحت للغرفة كعدت مقابيله

رزان: ناديتني

مهاب: رزان منو أبوج؟

استغربت سؤاله اول مره يسئلني عن اهلي

رزان: بابه اسمه محمد... كلت اسمه الثلاثي

مهاب: شلون توفه

بلعت ريگي وجاوبت

رزان: كتلك من القصف...

بعدني ممخلصه قاطعني

مهاب: والأمريكان يلي دخلو ببيتكم بنص ليل شنو سوو

رزان: وانتَ منين عرفت؟

جانت طبله بالغرفه من گزاز عليها مزهريات شال وحده منهن وشمرها بلگاع نزيت من مكاني وكمت

مهاب: ليش تجذذذبين عليَ ولبارحه دكولين انتَ اقرب صديق الي شنو الجبرج تجذبين وتضمين هذا الموضوووع

حجاها بصوت عالي اني جمدت بمكاني ماعرف شنو احجي او اشرح موقفي بهاي لحظه بس موقف حيل بشع

مهاب: بنت الارهاااابي طلعي برررره

شال الطبلة كلها كسرها حمزه اجه يركض عفتهم وطلعت لكيت إيمان بوجهي

إيمان: شصاير

عفتها ورحت للحديقه ركضت اريد ابتعد عن كلشي ختلت وراه الشجره وكعدت نطيت بجي صدمه وراه صدمه وكل صدمه اكبر من يلي قبلها شتتحمل بعد يگلبي







ضلت ترن بأذاني بنت لأرهابي بابه مو ارهابي بابه حاله حال اي مواطن عراقي جانت عنده اسواق زغيره ومسترزق من عدها بابه بعمره موكلنه حرام ولا علمنه على الحرام واليوم يكولون عنَ ارهابي

هاي الكلمه بالذات خلت روحي رماد غابت الشمس وطر اليل واني بنفس المكان انهاريت بكل معنى الكلمه سمعت ابشع كلام من اقرب شخص لي شكد صعبه يربي اختباراتك كلهن صعبات هون على روحي ياربي هون عليَ اني عبدك وعبدك متدمر اللهي عبدك مكسور

حطيت راسي على لشجره وبعد وقت طويل وتفكير مهلك سمعت صوت خطوات

ـ رزاانن

جان صوته عالي ولمكان يلي كاعده بي بعيد عن البيت بمسافه قصيره مو كلش بعيده

بس سمعت صوته مسحت ادموعي وكمت دخت لزمت بالشجره وهوه اجه

الاسبر: انتِ هنااا واني ماخليت مكان مادورته

راد يلزمني من أيدي صرخت بوجهة

رزلن: شترررريد مني بعد لك شنوووو تريد كلشي خذذذيت مني شنو بعد ماخذيته

الاسبر: صوتج لا يعلى لا اكسر راسج وامشي وياي

سحبني من ايدي دفعت ايده

رزان: اذا لزمتني اندمك وحگ الله

الاسبر: وهاي لزمتج شراح تسوين

حجاها ورجع لزمني من زندي

رفعت أيدي ردت اضربه لزمها وتفدى الضربه رفعت أيدي الثانيه وخرمشتة من ركبتة

لاسبر: خرب ابوج

حجاها ولزم ركبته اهواي دم نزل منها باوعلي وخزرني عفته وركضت ركض وراي ضليت اركض بسرعه وين مادري بس اريد ابتعد عنه وعن كلشي يخصهم تعبت منهن ومن لجذبه يلي عايشتها

سحبني من ملابسي ووكعت بلگاع وگع وراي ردت اكوم وسحبني من رجلي

الاسبر: خرب شرفج ذاا مانعلت والد* على هلـ تبربك

رزان: عووفني عووفني اروح الله يخليك ماريدكم ماريد احد بيكم عوفوني بحالي

كام وسحبني من أيدي ويجرجر بيه

جانت الشقه فارغه مابيها شي ولأن كاشي حيل بارده ومامفروشه باوعت للساعه بل9 بليل رحت للغرفه قفلت الباب خاف كلشي يصير وهذا مخبل رحت للجربايه ردت انام بس يا نوم يزورني بقيت للصبح كاعدة واعيوني على السقف ودموعي تنزل بهدوء خذيت نفس وزفرته لشوكت راح ابقه ابجي

كمت فتحت الباب رحت للمطبخ حيل جوعانه مماكله شي من البارحه مالكيت شي ولثلاجه فارغه فتحت لبوري وشربت مي طلعت هدوء كلش بس صوت خطواتي بالبيت رحت للغرفه دورت بيها بلكي الكه شي بس مالكيت شي حتى ملابس مابيها حتى النزله مال الجربايه شلتها وكلشي مالكيت كمت بسرعه رجعت كلشي لمكانه من سمعت صوت لباب طلعت مالكيت احد لعد صوت منو باوعت بصاله محد اجذب اذا اكول ماخفت

رجعت دخلت للغرفه وحسيت بدوخه قويه حسيت جرس كاعد يدك براسي سديت أذني ووكعت من طولي اريد بس لصوت يروح ميروح يدك براسي ملخت شعري وصرخت مافاد ووجع مو طبيعي شكد ماشرح واوصف الوجع مراح اكدر افسره

تهسترت صرت ماعرف شنو اتصرف دكيت راسي بلحايط بس اريد يهدء ولصوت يختفي حسيت حراره تنزل من راسي باوعت الأيدي كلها دم صرخت وضليت اضرب بأيدي على لگاع اريد لدم يروح من ايدي بس شفت لدم راح كمت بسرعه طلعت من الغرفه ولازمه راسي دايخه لازمه بالحايط وامشي واتعثر بخطواتي كلشي غواش ماشوف واضح شفت روحي بالمطبخ دورت وطلعت سجينه

بعد ماكدرت ابقه واكفه وكعت بلگاع

يله رزان اقتلي روحج واخلصي روحي يم امج ورتاحي من تعب الدنيه

لا رزان انتِ قويه لاتسوين هيج الله راح يكون وياج وراح ينقذج مثل مانقذج هذيج المره

محد راح ينقذج وين ماترحين الاسبر وراج مراح يتكرج بحالج

الله بكبره غفور رحيم أكيد راح ينسه ويسامحج

لو صدك جان سامحج من داويتي أبن عمه بس هذه مجرم وراح يقتلج مثل ماقتل اخوانج

اخوانج عايشين لا تستسلمين اطلعي دوري عليهم لا تضعفين اخوانج بحاجتج

انتِ بحاجه امج روحي لعند امج واخلصي

هيج احس اكو شخصيتين تحجي براسي شخصيه ضعيفه وشخصيه قوية بس جانت شخصيتي لضعيفه هيه يلي مسيطره

اريد مامه وحضنها اريد ارجع طفله يمهاا ومن اسوي غلط تنبهني عليَ اريد اترك كلشي ونام بحضنها اريدها تلعب بشعري وانام بحضنها بدون ما افكر بتعب وهَم

باوعت الأيدي ورجعت باوعت للسجينه سمعت صوت قفل الباب بحركه سريعه وبدون تردد وخوف جرحت أيدي من مكان الوريد ضل يجري دم قوي مثل النافوره رجعت راسي على لحايط وغمضت اعيوني

حسيت على صوت يمي فتحت اعيوني شفته الاسبر يشد بأيدي بفالينته وباقي بلفالينه لداخلية شالني وبعد ماحسيت على شي.....

يتبــــــــــــــــــــع.....

رزان: عوفني وين ماخذني عوفوني اروح

الاسبر: ووين تتروووحين لج عبااالج نااسيها الج لو عبالج ذكيه وبكل مره تشردين مني

عضيته من أيده وركضت رجع ركض وراي وجان اسرع مني لزمني وطلع منديل من جيبة وحطه على وجهي

صرخت وصرت اضرب بأيدي اريده يعوفني هوه لازمني بكل قوته دقايق وصار كلشي ظلام.....

فتحت اعيوني كلشي غواش وصوت قوي يرن بأذني اريد اعرف صوت منو بس صوت عالي مثل صوت جرس لزمت راسي احس بي طبول يريد ينفجر اظافري تغلغلت بشعري اريدهم يسكتون الصوت يسطر







كمت ادور على مصدر الصوت بحركه جنونية احس كلشي بالغرفه يتحرك اني اروح يمين كل اغراض الغرفه تروح يسار والگاع مثابتة تفتر بيه واني واكفه بمكاني لزمت راسي وصرت اصرخ

اسكتووو اااخ راااسيي يمةةةة

وكعت وصرت ابجي كلشي راح مني حتى عافيتي خسرتها خليت راسي على الگاع اريد بس وجع راسي يروح شويه بده يتحسن والصوت بده يختفي مسحت دموعي الحركت خدي باوعت على ارجاء المكان ماكو احد بس اني وشكل المكان مثل الشقه بس زغيره كمت فتحت الباب مينفتح قوي بقيت ادور على باب ثاني جانت صاله زغيره وكدامها المطبخ مشيت وقبل لا نوصل للمطبخ اكو باب فتحته غرفه نوم دخلت بيها غرفه عاديه مابيها شي رحت لشباك مينفتح مقفول رحت للمطبخ لكيت شباك دعيت كون ينفتح ونفتح زفرت نفس براحه

مديت راسي جان مكاان حيل عالي يعني بس شفت الارتفاع دخت سديت الشباك ودخلت

صرت افتر بصاله منو جابني لهنا أكيد الاسبر زين شنو يريد مني بعد

زين هاي عماره أكيد بيها ناس خلي اطلب منهم المساعده بلكي يساعدوني ويطلعوني منا

رحت دكيت لباب وصرت اصرخ اريدهم يساعدوني

ساااعدووني احد يسمعني الله يخليكم رااح امووت

كررت هاي الجمله اكثر من مره وانفتح الباب جمدت بمكاني من شفته الاسبر مد بس راسه شافني ورجع طلع ماعرف ويامن يحجي

الاسبر: مشكور خويه ماقصرت بس تعرف حالتها...رحم الله والديك... ماقصرت.. الله وياك

دخل وسد لباب رفع ايده راد يضربني خليت ايدي على وجهي

الاسبر: اانتِ مخبله شبيج تصيحين

رزان: من الراحه والله بطرانه وجاي اصيح شجاابني هنا وليش جبتني هنانه

الاسبر:ليش تردين اعوفج هناكه ادمرين حياتج بيدج

رزان: ليش هسه حياتي مستقره وياك من يوم العرفتك عقلي طااار من رااسي

واني احجي ودمي فاير من كلت عقلي طار من راسي ملخت شعري وانفتح صار كفشه

كتم ضحكته ونزل راسه

غمضت اعيوني ورجعت شعري وراه اذاني

رزان: ماريد. ابقه هنا

الاسبر: اخذج الغرفتنه هذيج

رزان: ماريد ابقه وياك

الاسبر: ماعندج غيري

رزان: لا تسفزني ماريد ابقه وياك

تجاهلني وراح كعد على القنفه

جانت اكو مرايه بضهره من راح شفت روحي اعيوني مورمه وخشمي وجهي صاير أحمر من لبجي وشعري واكف عبالك وحده منتولة لميتة كبايه شلون مجان ورحت وكفت مقابيله







رزان؛ ليش جبتني لهنا

الاسبر: كتلج لأن مالج غيري

رزان: ومنو كال

الاسبر: ابوي طردج من الشغل

رزان: الكة شغل ثاني ماكو مشكله

حجيتها ولغصه واضحه بصوتي

الاسبر: وين راح تلكين؟

رزان: عوفني واني الكه بس عوفني وبتعد عني

ماجاوبني تاليا ورائف وقداح عندك

حجيتها ودمعتي نزلت

الاسبر: يسلمون عليج

رزان: صددك الله يخليك وينهم وتاليا شلونها ابنها خسرته او لا ووقداح مسحت دموعي وكملت
قداح هسه كبرت صار عمرها سنتين تعرفني او لا ورائف الله يخليك كول وينهم وديني الهم الله يوفقك

الاسبر: حسيتي شكد شعور صعب من تخسر احد اخوتك تخيلي انتِ يمكن عندج أمل بنسبه١٠٪ ترجعين تشوفيهم وتلتقين بيهم بينما اني ماعندي نسبه ١٪ ارجع اشوف اخوي تدرين هلشعور ابشع شعور يمكن الأنسان يمر بي

رزان: ليش مفكر نفسك انتَ لمظلوم صير بمكاني شنو تسوي من تشوف رجال غريب يضرب اختك كدامك وانتَ مطالع بيدك شي صير بمكاني ولو لمره وحده اعرف غلط يلي سويته وهذه مو تبرير اعرف غلط صدكني نيتي ما اقتله بس اهددة ماعرف شلون ضغطت على لزناد ونهيت حيات اخوك ونهيت حياتي من ذاك اليوم اني حياتي انتهت كل يوم عايشه على ذكره اهلي واصبر روحي براح ارجع اشوفهم مره ثانيه بس تعبت يلي شفته اهواي يلي عشته محد يتحمله

احجي وحيل ندمانه ودموعي تهل ماسكتت ولا ثانيه بكل بساطة ابتسم وكام نزل قميصه وتعداني

الاسبر: صدكيني اذا سمعت صوتج عالي كدامج اذبح اخوتج وخليج بحسرتهم

عافني وطلع سمعت صوت قفل الباب كمت غسلت وجهي لان حسيت اخدودي صارن جَمر بقيت افكر واخطط شنو اسوي وشنو اتصرف كل ما افكر بحل يطلع غلط ماكدرت اوصل لشي ولا اكدر اسوي شي خلص استسلمت لواقعي ابقه هيج عايشه واسلم امري الربي هوه ليحلها...

ياربي سلمتك أمري يا الله ماعندي غيرك يساعدني بقيت ادعي لحد ماراسي ضل يوجعني وغفيت نزيت على اثر كابوس فركت وجهي وبقيت استغفر

ماعرف شنو بالحلم بس اسمع صوت صريخ واني بالحلم سلاسل خانكتني من ركبتي وماكدر اتحرك ولا اتنفس اضل بس اشهك اريد بس الهوه وبعدها انز من المنام اكثر من مره هيج اتحلم ومن اكعد گلبي يدك سريع وجسمي يرجف







نعلت لشيطان وطلعت لكيت إيمان تغسل الماعين

رزان؛ عوفي اني اكمله

إيمان: تمام

راحت واني نضفت كلشي خلصت وسويت جاي وكعدت هدوء البيت بس داخلي حرب وسباق ونار مشتعله

لمحت خيال يمشي طلعت بهدوء من المطبخ شفت الاسبر وهوه داخل على غرفه إيمان يلي هيه غرفتي همينه!

زين شعنده بالغرفه!!

بقيت بمكاني خاتله يعني اني اشوفه بس هوه ميشوفني

طلع من الغرفة ضل يلتفت مشة للمطبخ ورجع بهدوء فتح باب غرفه مهاب دخل عليها شويه وطلع مشه بتجاهي بس اني ممبينه خليت ايدي على حلكي حتى لنفس گطعته عبرني وغير طريقه رجعت راسي على لحايط

شعنده يفتر بالبيت وبنص ليل مثل الحراميه بقيت دقايق بمكاني تأكدت انُ طلع يله طلعت من مكاني رحت على اتجاه الغرفة ونسحبت من أيدي بقوه لزكني بالحايط حط أيده على حلكي

الاسبر: شنو مفكرة نفسج وانتِ تلعبين وياي هممم

يحجي ولازمني من فكي بقوه

رزان: شنو تريد مني

الاسبر: انتِ شنو يلي تردي مو عفتج ترووحين شرجعج لهنا ليش رجعتي الي ليشش

رزان: مارجعتلك ولو بيدي مارجع حتى اسمع باسمك مو عاد اشوف شكلك

ضغط اكثر على فكي

الاسبر: شنو هلصلافه العندج

رزان: اذا يلي قتل نانيس بالسجن شنو عداوتك وياي بعد شنو غايتك وشنو خطتك

الاسبر: صح هوه بالسجن بس المجرم لحقيقي بعده عايش

رزان: اقتلني وخلصني

الاسبر:ليش هيه هينه عبالج لقتل هييين

رزان: مووو هين اعرف موو هين صعب بس تعبت والله تعبت ضميري موتني اقتلني واخلص الله يوفقك ريحني من هاي الدنيا وانتَ ارتاح وريح اخوك يلي بالقبر

سكتت من صار كلش قريب عليَ حسيت بلحيته وهيه تچكچك بخدي

الاسبر: ليش اضعف يمج

حجاها بهمس شبه مسموع بلعت ريگي من خفف قبضه أيده

الاسبر: شنو يلي دفعتي حتى خلوج هنانه شنو يلي خلاج محبوبه وانتِ قاتله شنو سويتي شنوو

سكتت مجاوبت دكات گلبي فاضحتني وهيه تدك بصور جنونيه وتعلن عن خوفها

الاسبر: اعرف صباح مايخلي شي هنا بدون مقابل شنو دفعتي لمقابل كعدتج هنانه

رزان: تت تاليا وين

الاسبر: شنو دفعتي

رزون: رائف وقداح شلونهم؟







ركعني بالحايط بقوه

الاسبر: لا تستغبيني

حجاها بصوت عالي سكتنه من شفنه إيمان وهيه طالعه من الغرفه باوعتله وباوعت على إيمان عافني وطلع اجتي إيمان ماعرف شنو حجت عفتها ورحت للغرفه

تغطيت وحتى راسي غطيته نزلت دموعي ومسحتها

مستحيل بعد ابجي لازم اصير قويه اي اني قويه اخواني عنده اي عنده بس شلون راح اوصلهم شلون

بقيت اهواي افكر وكذلك ماكدرت انام لحد ماطلع الصبح يله غفيت وسمعت صوت قداح وهيه تبجي صرت التفت اريد اندل مكانها بس ماموجوده بس صوتها وهيه تبجي وتصرخ

نزيت من منامي گلبي احسه يريد يوكف لزمت راسي دايخه ووجع حيل قوي

شنو هاي ياربي لا بواقعي مرتاحه ولا حتى بحلامي

كمت شلت افراشي ونميت شعري غسلت وجهي وطلعت لكيتهم كلهم موجودين سلمت عليهم وردو عليَ بس شكل إيمان ضايجه مني مدري ليش شويه واجوي الدكاتره راحو حمزه ومهاب بقيت بس اني وإيمان

إيمان: منو البارحه جان يمج

رزان: احمم محد بس سمعت صوت ومن طلعت مشفت احد

إيمان: لا تستغبيني شفت كلشي

رزان: اي زين

إيمان؛ لا تلعبين بلنار تره الاسبر مينلعب ويا وديري بالج

رزان: إن شاء الله

عافتني وكامت خليت أيدي على راسي

شراح اسوي ياربي شراح اسوي وشنو هوه الصح شنووو

مشة يومي عتيادي وكأيب لحد ليل يله شفت مهاب

مهاب: بس لو اعرف شبيج جان ارتاحيت

رزان: مابيه شي

مهاب: تعاي وياي

رزان: وين؟

مهاب: تعاي ومعليج

طلعت ورا خذاني للحديقه وراح على مكان زرع الورد

مهاب: ليش مساقية الورده

باوعت للورده وتذكرت هذاك اليوم...

الماضي،....

رزان: اني اعشق الورد

مهاب: واني بعد احب الورد

رزان: اتمنى اعرف ازرع وهيج تكون عندي حديقه الي خاصه بس ماعرف شلون ازرع

مهاب: سهله اني اعلمج

بده يكلي شنو اسوي وشنو احتاج رحت جبت كلشي نحتاجه
مهاب: هسه احفري

سويت لكلي عليَ

مهاب: حطي البذور

حطيتهن ورجعت التراب عليهن

مهاب: وهسه ترشيها ماي وباجر لصبح همينه ترشيها







رزان: يعني شكم مره باليوم

مهاب: بس لصبح

رزان: زين شوكت تكبر

مهاب: اسبوع وراح تبدي تطلع

حيل جنت فرحانه لأن زرعت وهاي اول مره ازرع

مهاب:تنفعين تصيرين فلاحه ههههه

رزان:تره احب لورد والله

مهاب:اي كلش حلو مثلج

باوعتله وبتسمت الة

شال ورده هيه اهواي اكو ورد موجود وانواع بس جنت حابه ازرع لذلك زرعنه

اشرلي اروحله رحت ورفع ايده خله الورده وراه شعري

خذيتها من ايده ورتبتها ولأبتسامة شاكه حلكي

مهاب:لا ولج مو هيج ههههههه

رزان:لعد شلون

مهاب:تعاي تقربي

تقربت اكثر رتبلي شعري وحطاها عدل باوعلي ورفع ايده سوه حركه بأيدي بمعنى"جيد"

وحجه بلانكليزي مافهمت عليَ

رزان:شنو يعني؟

مهاب:طالعه حلوه

ضحكت ورحت دخلت اركض اواريها الخاله إيمان ولحمزه

الحاضر....

باوعت للورده شلون ذبلانه واتذكر من طلعت شلون جنت فرحانه ورحت أگمز المهاب واصيح الورده كبرت وهوه يضحك عليَ

مهاب:شوفي شلون ذبلانه وشكلها خربان

رزان؛صح

مهاب:شنو لصح شصاير وياج رزان تذكرين شلون جنتي تداريهن ليش هيج متغيره

كعدت على جذع الشجره وحطيت ايدي على خدي

رزان:ما اعرف تعبانه حيل تعبانه

مهاب:من شنو احجيلي شنو لمتعبج

رزان:اهواي منين ابدي

مهاب:تذكرين من كتيلي اشكيلي همك ومنين متبدي اني يمك ووياك

رزان:اي اتذكر

مهاب:وهسه انتِ منين ميعجبج احجي واني وياج واسمعج

نزلت دموعي ومسحتهن

مهاب:رزان عوفي لبجي واحجي

رزان:ماعرف من شنو ابدي ما اعرف افضفص

مهاب:احجي كلشي

صفنت عليَ شنو احجي ومنين ابدي احجي من وفات بابه لو مامه يلي راحت بدون ما شابعة منها شوف لو اشتياقي الأخواني لو عن لجريمة يلي ارتكبتها منين ابدي منين!!

(احجي بگلبي)

مهاب: اني وياج واسمعج ووعد يلي راح تحجي مراح ينذكر مره ثانيه وراح ننساه







رزان: مهاب

مهاب: روحه وعمره

رزان: اريد انام تصبح على خير

مهاب: رزان اذا ترحين بعد ينتهي كلشي

رفعتله راسي وعيوني مليانه دموع

رزان: براحتك

عفته ودخلت للبيت لكيت إيمان تسوي عشه ساعدتها اجه حمزه اخذ الاكل المهاب وراح اني خذيت كم شغله طلعت للحديقه بعد ماتحملت حسيت روحي اريد انفجر كعدت على نفس لمكان ونطيت من لبجي

حتى مهاب يلي جان صديقي ليوم خسرته وكله بسبب الاسبر بقيت وقت كلش طويل كاعده حاطه راسي على رجلي وصافنه على الورده

واتذكر كل مواقفي ويا مهاب الوحيد يلي رسم على وجهي الضحكه بكل هذا لحزن ولوحيد يلي تحمل مزاجيتي وخبالي مع الرغم مريض ولازم الزم لساني بس من احجي ويا لساني يفلت واضل احجي كلشي بداخلي وهوه يضحك

كمت من مكاني دخلت للغرفة خليت راسي حتى انام بس هيهات يا نوم يزورني بقيت لحد ماشفت اشعة لشمس دخلت للغرفة يله نمت.....

ثاني يوم ماكو شي مهم بس مهاب طول لوقت بالغرفه ولدكاتره موجودين إيمان حيل تغيرت وياي تركتها مالي خلكها

جنت واكفه اغسل بلماعين وهيه اجتي

إيمان: لصاله وصخه روحي نضفيها

رزان: جاي اغسل اماعين

إيمان: اي من تخلصين ولا تنسين تنضفين الحديقه

رزان: تمام

راحت واني كملت كلشي سويت يلي كلتلي بي رحت للحديقه رحت حتى اسقي الورده لكيت عليها مي بتسمت

أكيد هذه مهاب عفتها ورحت للبيت الدكاتره طولو لحد لعصر يله راحو الغريب مهاب مصاحني ولا رادني بكل مره يصيحني ولو حتى ماسوي شي بس يخليني كاعده وياا بالغرفه اجه حمزه

حمزه: شصاير؟

رزان: ها مصاير شي

حمزه: شوفي اعرف يلي جاي تمرين بي صعب بس انتِ هنانه جاي تشتغلين وشغلج هوه مهاب اهواي كاعد تأثرين عليَ بسبب حزنج والدكتور النفسي ملازم هيج يسوي كتلج اذا تعبانه وتشكين من شي كولي بس شو كاعده ومرتاحه والاكل يجي على لحاضر وفوك كل هذه منطيج اكبر من حجمج كمساعده هنانه افتهمي كلامي كلش زين ووضيفتج لوحيده هيه ترسمين الضحكه على وجه مهاب وانتِ لوحيده يلي تعرفين شلو هيج تسوين وتعرفين شلون تتصرفين ويا

رزان: صح اعرف اني هذا شغلي وممقصره بشي

حمزه: لا مقصره وهواي همينه ماريد اجرحج وزيدها عليج بس ماريد يصير اي ضغط على مهاب على اي شكل من الاشكال ماريد مهاب يعصب ويضوج من شي ماريد نرجع للصفر بعد ما وصلنه لهنانه وأصلاً انتِ جنتي شاهده على يلي مرينه بي من صعوبات وضغوطات فرجاءً يلي بالماضي فات ومات وطوينا فتحي صفحه جديده وحركي ماضيج لأن كاعد اشوف مسببلج بس المتاعب ولمصاعب بعدج زغيره ولحياه كدامج بعدج كلشي مشايفه من الحياه واتمنى تاخذين هاي نصيحتي وعتبريها من صديق او من دكتور تمام بابه







رزان: تمام

عافني وطلع صح لحياه بعدها كدامي وبعدني مشايفه شي منها وبعدني ماعرف شنو ضامتلي من مفاجئات

كمت غسلت وجهي خلص هاي هيه بجي صارلي اكثر من سنتين اني ابجي شنو ستفاديت؟

مستفاديت شي بس تعبت نفسي بدون مقابل

رحت الغرفه مهاب دكيت الباب ودخلت

لكيته على نفس لوضعيه منطي ضهره للباب ويباوع للشباك

رزان: ممكن ادخل

مجاوب

دخلت وسديت الباب رحت وكفت مقابيله بس اعيونه على الحديقه

رزان: مهاب ممكن تسمعني

مهاب: شنو تردين

رزان: عادي احجيلك سر زغيرون

باوعلي ورفع حاجبه

مهاب: شنو لسر

رزان؛: زين شلونها علاقتك ويا الاسبر

مهاب: عضيدي واخوي كلها تخذلني الة هوه

رزان؛ الله يديم هاي الصداقه يارب

مهاب؛ احنه اخوان يربطنه دم ومواقف قبل لصداقه متأكد لو عندي اخ مراح يوكف وياي ويساعدني مثل مساعده الاسبر الي

واحنه نحجي اجانه صوته

الاسبر: شبي الاسبر

حجاها وكعد مقابيلي على لكرسي

مهاب: كاعد اشرحلها عَن مدى عمق خوتنة

الاسبر: علاقتنه كلش غميچة ومراح توصلين لغمچهة

كمت وكفت ورديت

رزان: الله يديمها اخذو راحتكم

مهاب: لحظه رزان اخذي لكتاب وياج







خذيت لكتاب ورحت بدون ما التفت وراي حطيت الكتاب بمكانه غرفه مهاب تطل على لحديقه فتحت لشباك وباوعت عليهم وهمه يضحكون وما هامهم شي

شنو قصته ومنو يلي تحمل عقاب جريمتي!

اخواني أكيد عنده زين اذا عنده ليش ساكت ليش مهددني بيهم حتى ارجع ويا ليش وليش ألف فكره براسي يا اللهي ساعدني ماعندي غيرك

رجعت للغرفه وافكر اخذ كل هاي لفلوس لعندي واشرد بس وين اشرد!

منو راح يحتويني هذيج لمره ساعدتني منى هسه منو راح يساعدني!

ابقه هنانه تحت رحمه الاسبر يلي راح يخبلني او يقتلني او ماعرف شنو يسوي!

اجتي إيمان ونامت واني بعدني افكر وبين الغافيه ولنايمه حسيت على شي قريب عليَ بس فتحت اعيوني اختفى

غمضت اعيوني بنزعاج وكمت اشوف شنو بالغرفة بس مجان احد موجود رجعت انام ونفتح باب لغرفة التفتت ماشفت احد لعد منو فتحه!!؟

كمت سديته بس خايفه سمعت صوت من بره طلعت ماشفت احد لعد منين هاي الأصوات

سمعت صوت عالي من فوك محد يصعد فوك ومسوينها مثل لمستودع بيها الاغراض مثل لحصه وغيرها..

صعدت بهدوء لكيت لشباك مفتوح زفرت نفس براحه

هووف الحمد الله أكيد من الهوه العالي طلعت هاي الأصوات ردت اسده وجتي نسمه هوه بارده غمضت اعيوني واستنشق بريحه الورد يلي اجتي ويا لنسمه

فتحت اعيوني وشوف حركه الأشجار والصوت الهادء ياريت لو جانت حياتي بكل هذا الهدوء عجبني لمنظر وماودي اعوفه بقيت وقت طويل افكر

اذا الاسبر سامحني على غلطي ومحد عرف وين راح اروح من عذاب ربي!!
همينه راح اتعاقب على يلي سويته؟؟

بس يلي سويته مو قصدي اذا سامحوني اهله الله هَم راح يسامحني!

برغم اني مجرمة بس بكل مصيبه احس الله واكف وياي وينجيني من كلشي

منو جان متخيل راح اكدر اشرد من ايد الاسبر وشلون صدفه جمعتني بمنى صح جانت الها مصلحه وياي بس مستحيل انسه جميلها وياي بالنهاية اني لكيت مكان يحميني وشغل بسببها هيه

الله ساعدني بكلشي وسهل عليَ كل حياتي زين اني استاهل كل هذه الحُب من ربي مع ذلك اني مجرمة!؟

رفعت راسي شكل السماء هادء وحركه الغيم كلش بطيئه

ألف الحمدالله على نعمتك ياربي بعد وقت طويل من لتفكير سديت الشباك ولتفت شفت ضل شخص اتحرك جمدت بمكاني وحسيت گلبي دكاته مسموعه

نزلت بسرعه دخلت للغرفة وسديت لباب رحت لفراشي ونمت....

ثاني يوم مر عادي مابي شي مهم ينذكر كذلك قضيت وقتي ويا مهاب وكدرت اعرف كم معلومه عن الاسبر







جعت ورحت اسوي اكل ماعرف شنو اسوي مو كلش بالطبخ بس تعلمت كم طبخه من إيمان

سويت بيض وطماطه وسويت جاي سمعت صوت مهاب وراي

مهاب: شكاعد يطبخ الشيف رزان

رزان: عفواً كول حضره الشيف رزان خانم

مهاب: هههههه هالله على الثقه

ررزان: ااي عيني جاي اطبخ بيض وطماطه قابل بس انتَ تطبخ

مهاب: واني شتميت الريحه واجيت لأن جوعان

رزان: اي أكيد تشتم الريحه لطيبه جا غير اني طبخت

ضحكنه وحضرتله وياي گلاص جاي وكعدنه ناكل

رزان؛ صح اول مره اطبخ بس طعمه طيب مو صح

مهاب: اي زينه بس لشكل شوي يرادلج بعد تتعلمين

رزان: غير يستقر وهيه اول وتالي مكانها بالمعده

مهاب: صح بس لعين هم تاكل

رزان: شتاكل؟

مهاب: يعني لشكل مهم هسه انتِ دكولين اول وتالي راح تروح للمعده تخيلي فد يوم تروحين خطار على بيت شخص ويجبلج اكل شكله مرعبل وممرتب راح تاكلين؟

رزان: أكيد لا

مهاب: بينما لأكل لمرتب وشكله حلو لو حتى جنتي شبعانه راح تشتهين تاكلين

رزان؛ صحيح بس بلا مواعض وخلي ناكل

مهاب: هههههه اكلي لازم حلكج

رزات: لاا بس فشلتني

مهاب: يخسى ليفشلج بس جاي اعلمج

رزان؛ اخجل والله

مهاب: خاب ام اعطوب

رزان: ياا ياا شمالك

مهاب؛ هههههههه

وحنه نضحك سمعنه صوت شي انكسر لتفتنه ثنيناتنه شفنه الاسبر واكف وكاسر الكلاص باوعلي وزمخ بيه

الاسبر: تعاي نمي لا يجي احد ينجرح

مهاب؛ من شوكت انتَ هنا؟

الاسبر؛ من تضحكون وصوت ضحكم يجيب التايه

عفت لمكان وطلعت جبت لمكناسه كنست الگزاز لكيتهم كاعدين ثنينهم وياكلون الاسبر جان ماخذ اكلاصي ويشرب جاي شكد لعبت روحي منه طلعت من المطبخ رحت للغرفه وسديت لباب مابيه حيل مشاكل

خليت راسي على لمخده ودموعي نزلت

خلص كلشي وطلعو الدكاتره حمزه راح وصلهم على الباب واني كمت رتبت الاعراض لأن صارت هوسه بالغرفه

مهاب: سمعتي الدكتور شنو كال

رزان: الحمدلله كلامه كلش زين

مهاب: مابقه شي ويخلص كل هذا التعب

رزان: اامم زين اذا مشيت لازم تنفذلي طلبي

مهاب: تأمرين أمر بس شنو طلبج.

رزان: ماعرف شنو اسم هاي المنطقه بس منطقه حلوه واريدك تفرني بكل هاي المنطقه وتعرفني عليها شبر شبر

مهاب: ههههه من اعيوني

واحنه نحجي دخل حمزه

حمزه: وترجع تطبخ النه وناكل من ايدك

رزان:حلو وتعرف تطبخ همينه

حمزه: طباخ يعجبج بلأكل

مهاب: اختاري يا اطبخ الكم يا افرج بالمنطقة

رزان: راح تفرني بالمنطقة وراح تتعب ونجوع وترجع تطبخ يعني من الجهتين ربحانه

اعرفهم ماخذيني على كد عقلي وضحكو
هيج علاقتي وياهم كلها ضحك
حمزه: وترجع السوسة لمنحوسة ههههههه

مهاب: شو دننجب بله

رزان: منو سوسة

حمزه: حبيبه مهاب ههههههه

رزان: صدك ليش محاجيلي عنها

مهاب: حمززه انجب ماكو شي من هذا الحجي

رزان: ها هاا ديغار ميريد احد يحجي عليها موووو

حمزه: كووليش ديوغاار

حجاها بمياعه ويسوي حركات بيده ضحكنه على شكله

سكتنه من سمعنه صوته

الاسبر: ضحكونه وياكم

التفتت لكيته واكف ومنتچي على الباب ومكتف ايده







حمزه: تعال ادخل كاعد تحجي...

بعده ممخلص ومهاب رد

مهاب: ادخل خويه معليك بكلامه

دخل وكعد على الكرسي اني كمت ردت اطلع

مهاب: ها وين

رزان: اكمل شغلي

حمزه: ارتاحي وعوفي لشغل وذكريني انطيج العلاج وراه الأكل لأن واضح على شكلج التعب

هزيتله راسي وفتحت لباب

الاسبر: جيبي جاي

غمضت اعيوني سحبت نفس فتحت الباب

مهاب: خلي إيمان تجيب الجاي وروحي ارتاحي

الاسبر: ليش شنو شغلها هيه؟

حمزه: تساعد مهاب وبس

الاسبر: بشنو تساعده شو انتَ موجود وكادر طبي كامل تحت أمرة

حمزه: من بين كل هذا لكادر اخوك اختار رزان تكون مساعدته الخاصه

الاسبر راد يحجي ورد مهاب

مهاب: استهدو بالرحمان وكول شنو سويت بشغله لكتلك بيها

عفتهم وطلعت شكد حيوان ولو احجي لبعد باجر عليَ مراح يشفه غليلي

حطيت القوري على النار وكعدت حطيت ايدي على خدي

اذا حجيت هسه راح اسبب خطر على حياه مهاب وراح اخرب كلشي بنينا بهاي الفتره لأن لدكتور بكل كورس يكول لازم يبتعد عن لتوتر والاعصاب وعن كلشي يسببله انزعاج شلون اذا عرف هسه صديقته هيه قاتله ابن عمه زين اذا ماحجيت هسه شوكت احجي!

هيه بس هاي لفتره خلي اتحملها بس يطيب مهاب احجيلهم كلشي

فزيت من صفنتني على صوت إيمان

إيمان: وين بالج لجاي فحم على لنار

رزان: ها شنو

عافتني ورجعت سوت جاي جديد بس لواضح معصبه خاب هم عوزه إيمان تزيدها عليَ عفتها ورحت للغرفه خليت راسي اريد انام ماكو لحد ليل طلعت للحديقه لأن حيل اختنكت من لتفكير واحس جبل على صدري خانگني

واعرف هاي لفتره متفيدني الكعده ولازم ادور على حل

لكيت مهاب كاعد يقره كتاب
اهواي عنده كتب واغلب وقته بس يقره ويعرف اكثر من الغة

كعدت على لكرسي وبيناتنه مسافه سد لكتاب ورفعلي راسه

مهاب؛ بعد وكت جان بقيتي بالغرفه للصبح

رزان: اسفه

مهاب: شبيج احجي

رزان: ضايجه

مهاب: من شنو

رزان: اني مو صديقتك

مهاب: اي







رزان: ولا مره حاجيلي عن بيت عمك يعني ماعرف شي عنهم

مهاب: وليش اتعبين عقلج بهاي السوالف تره الاسبر هيج طبعه خاف زعلتي من كلامه هوه هيج شخصيته ويا لكل

رزان: لا هوه مو هيج ماضجت وبنهايه فعلاً اني مساعدتك بس ليش هيج شخصيته هوه وابو اقصد الأستاذ صباح

مهاب: الاسبر نسخه من ابوه بكل اطباعه تشوفيهم اشخاص ضالمه بس همه ماكو مثل حنيه گلوبهم لدليل اني تحملوني كل هاي السنوات وتحملو مرضي وعلاجي همه ناس زينه بس متحب تبين زينيتها للغير وهمينه عمي صباح جان شخص مرح والطيف بس من بعد موت ابنه حيل تغير

بلعت ريگي وحجيت

رزان: منو ابنه

مهاب: نانيس بآخر فتره صارت مشاكل بيناتهم هذا نانيس واحد سرسري ولو هوه مات الله يرحمه بس مجان يكعد همينه جان متعب عمي من جنت اني هناك كل يوم مصيبه وكل يوم سالفه سببها نانيس وبكل مره لاسبر هوه يدافعله ويغطي على أخطائة لحد ما وحده من مصايبه هيه يلي سببت بموته

رزان: شلون مات!؟

مهاب: شخص صوبه واجتي براسه فجرته ومات

رزان: زين عرفتو هذا لشخص

مهاب: ااي ليش همه يعصة عليهم شيء اخذو وذبو بالسجن

نصدمت شلون ساجنين قتيل نانيس وهيه اني يلي قاتلته اريد استوعب لفكره وليش هيج سوه وياي شنو غايته من كل هذه!!

مهاب: شو صفنتي

رزان: ها هوه سالفتكم ادوخ

مهاب: كلش ادوخ هذا شي قليل من مصايبهم عاد ماتحملت وهمينه منى جانت تنطيني هذا حبوب تخلي الواحد عصبي ومجنون وميتحكم بأعصابه

اتنرفز من كلشي عاد ماتحملت وعمي صباح جابني لهنا ولكل يعرف اني بره العراق اتعالج بس الاسبر عرف هنانه مكاني

رفعني من الگاع بأيد وحده لزمت ايده خنكني وكمل

لو نسيتي يلي قتلتي وعايشه حياتج وتاااكلين من زاد ابو

تذكرت الصوت والدم وشكل نانيس بهذاك اليوم صرخت وخليت ايدي الترجف على وجهي هوه عافني واني اريد اسحب النفس صعب عليَ

مثل الوشه بأذاني صارت والدنيا تفتر بيه لزمت راسي دايخه الكاع تتحرك بيه اجيت اوگع رفعت راسي للسما افرك بصدري اريد هوه ماكو رربي دخيلك

رزان: باااااابه وينك بااببه ضليت ارجف واصرخ اريد بابه رفعت راسي وشفت إيمان يمي ماعرف شنو حجت بس ذبيت روحي بحضنها وضليت اصرخ من كل گلبي وابجي هيه مافتهمت شي عليَ

إيمان: بس اهدي خلي افهم عليج

رزان: مرااح تفهمين محد راح يفهمني اني روحي مفاهمتها خااله اني متت روحي مااتت من ذاك اليوم البشع من هذيج الحظه النحسه حياتي تدمرت ااااخ بابه اريدك يمي بابه اخذني يمك بااابه

هيه ضلت تمسد على شعري وتقره قرأن هديت بحضنها وكومتني بس شفافي وجسمي كلي ارجف خلتني على فراشي واني مثل السعفه

إيمان: دخيلك يا علي انتضريني خلي اصيح حمزه

لزمت ايدها بقوه ما اكدر احجي بس دموعي تنزل وحلكي يرجف

إيمان: ولج يمه شوفي حالتج خاف نوبه تنشلين بس اصيحه واجي

هزيتلها راسي بقت كاعده يمي خليت راسي بحضنها وتذكرت امي شكد مشتاقتلها وروحي تلوب عليها اخ الماعنده اهل تبقه نار تلسع بروحه وماتنطفي

بقت خاله إيمان تقره على راسي واني دموعي تنزل بهدوء لحد مسمعت صوت أذان الفجر باوعتلها نايمه كمت بهدوء ردت اصلي رحت توضيت وفرشت السجاده مال خاله إيمان وكفت على السجاده وماعرف شلون اصلي ولا اعرف الخطوات

حتى صلاة ما اعرفها لعد شعرف بحياتي شنو يلي عرفته غير القتل خليت ايدي على وجهي وبجيت

ياربي انتَ اعلم بحالتي محد حاس بنار روحي غيرك ياربي ماعرف شنو ظاملي للمستقبل بس تعبت من هاي الجذبه حيل تعبت ياربي اريدك ترشدني الطريق الصح اريد اعيش حياه طبيعيه مثل الناس ماريد ابقه مستمره بهاي الجذبه ياربي طلعني من هذا الهلاك







بقيت وقت كلش طويل كاعده على السجاده وشكيت كلشي لربي تعبت من لبجي خليت راسي ونمت على السجاده بس يا نوم يزورني واني بهذا الرعب بقيت وقت كلش طويل اني على نفس الكعده لا عرفت اصلي ولا كدرت انام شفت اشعه الشمس وهيه داخله للغرفه وضوتها

يا ترى راح يجي يوم يدخل الضوء لحياتي وينور الضلام يلي اني بي!!

كعدت إيمان صبحت عليَ

إيمان: كومي حبيبة كومي لگاع تكسرج

كومتني من أيدي خلتني على الجربايه هيه الجربايه الها واني انام على الگاع وخرت شعري من وجهي

إيمان: أكيد منايمة طول اليل

رزان: خاله تعبانه

إيمان: سوده عليَ شبيدي عليج واني مفاهمه علتج بس دموعج تهل

رزان: علتي صعبه خاله دعيلي

إيمان: الله يخفف عنج ويزيح تعبج وهمج بجاه داحي باب خيبر اجيبلج شي تاكلي

هزيتلها راسي بمعنى'لا'

عافتني وطلعت راسي موتني من الوجع غمضت اعيوني ونمت.....

فزيت على صوت يمي فتحت اعيوني بنزعاج شفت مهاب كدامي عمضت وفتحت اكثر من مره

مهاب: ااسف كعدتج

كعدت ومسحت وجهي
رجعت شعري وراه أذاني

رزان: لا عادي بس اكو شي؟

مهاب: لا بس ضل بالي يمج طول ليوم مختفيه وإيمان

حجاها وسكت

رزان: أكيد كلتلك

مهاب: سمعتج بس ماكدرت اكوم لبارحه سمعتج وانتِ تبجين وتنادين الإبوج

بقيت ساكته بس منزله اعيوني بلگاع ما اعرف شنو احجي

مهاب: احم مو حلوه احد يشوفني هنانه بغرفتج وانتِ نايمه طالع وتعاي وراي

رزان: تمام

مهاب: تعاي مو دغلسين

هزيتله راسي وطلع خليت لمخده على وجهي وصرخت

عااااااااا اووووف منج إيمااان متعرف تضم سااااالفه

رحت طلعت ملابسي مابيه اسبح لبستهن شلون مجان غسلت وجهي باوعت للمرايه حيل تغير شكلي عن قبل

عمري زغير بس ليشوف اعيوني وحزنها يكول حامله هَم كل هاي الدنيا خلص من اليوم راح احجي كلشي وانهي كلشي بعد ماكو جذبه لازم اعيش حياتي صحح مو مهم خلي يقتلوني واخلص من كلشي المهم اخلص من عذاب الضمير وابري ذمتي كدام الكل ومستعده الكل عقاب مسحت دموعي النزلت

انتهى وقت التفكير والتعب وبده العب
ضفرت شعري وطلعت من الغرفه

رحت بوجهي للمطبخ لكيت إيمان تسوي اكل مسيت عليها وسئلت عن احوالي طمنتها عليَ







إيمان: مهاب يكول خلي تجي للغرفه

رزان: تمام بس صوت منو هذه

إيمان: اجوي الدكاتره

رزان: ااها زين

رحت دكيت الباب ودخلت لكيتهم مبلشين بالعلاج

مهاب باوعلي وبتسم رديلته الإبتسامة وحمزه طلب مني اساعده رحت سويت يلي كلي بي ردت اطلع وستوقفني

حمزه: اكعدي وين رايحه

رزان: ها من تخلصون اجي

حمزه: ابقي كتلج مهاب رايدج

هزيت راسي وكعدت بس شنو كاعده على اعصابي الدكتور هذا يلي اجه ميحجي عربي ويا مترجم ويلي فهمته همه فرحانين لأن كاعد يصير تغير وتحسن كلش واضح بحركه مهاب انطو اكثر من تمرين وسوه كل التمارين صح بصعوبه بس اكو أمل كلش جبير ترجع حركته طبيعيه