كتاباتي إقتباسات وحكم من كتب

- من تشتري اكلة نفسك بيها ميهمك شكد راح تدفع فلوس المفاجئة من تنصدم ويطلع طعمها عادي او اقل من العادي بس تكمل اكلها استخسارا بالشي الدفعته والمده البقيت منتضر علمودها واستهانه بالضرر الممكن يصير بيك من وراهة اكو علاقات حب هيج شكد متدفع بيها مشاعر ووكت وصبر واحلام وتوقعات بالنهاية تكتشف هية متناسبك ومراح تناسبك شمتسوي وضررها اكثر من نفعها وفوكها تكمل بيها استخسارا للايام العشتها حته لو جانت غلط
بس خلي ابالكم الاكل الفاسد والمترغبو بي غسل معده بس الحب المعيوب مابي غسل كلوب 🤍.

- لحد قبل فتره مو كلش بعيدة
جان عندي غواش هواي ع نظرتي للاشياء و قيمتها... لحد ما بلشت استوعب انو ممكن يكون احد شكله حلو بس تلكاه هو انسان سيء الخُلق و مو نظيف من جوه، و ممكن تلكاه غني بس ما عنده رُقي بالتعامل لو مو شبعان و عينه ع رزق غيره، و ممكن يكون عنده علاقات وصارلها عشرة عُمر و ب ليله يوم كلشي ينتهي و تتلاشى، و ممكن يكون مثقف و عنده شهادات بس مو محترم .
الانسان الاصيل ما اله دخل بالمظاهر، الاصيل اصيل من دون ما اربطه بأي شي اخر..

المظاهر خداعة، المظاهر مقلب، المظاهر ممكن تظلم ناس هواي قيمتهم ثمينة، و ترفع ناس ما الهم اي قيمة

لتخلون المظاهر تضحك عليكم 🤍.

أني من اشد الناس اقتناعاً ان رب العالمين يعوض الانسان لدرجة ان ممكن ينسى هو خسر شنو بالاول او ينسى الضيق والتعب الي مر بيه , يعوضنه لدرجة انك ممكن تفكر وتكول ياريتني مضجت ولالحظه وحده قبل , وهو يعرف انت بشنو كاعد تمر يعرفك وشايفك انك مراح تعرف تكمل ! بس صدكني وعن تجربه كلما جان احساسك بالضيق اكبر كلما جان العوض اكبر واحلى بس احنه نصبر . رب العالمين يخلي الأسباب مثل منكول, كل شغله ب الدنيا هاي الها سبب رب العالمين بس الي يعرفه وانت تركز بي بعدين بس من يجي الوكت وتخلي بالك يمه عينك راح تدمع من جمال وحكمة رب العالمين بكل الاشياء 🖤.

"مو كل زياده حلوه ''
الذوق زياده يودينا لضياع الحقوق
المجامله الزايده تخلي الناس تعتبر انو هم مسوين الي عليهم.. والصبر الزايد يخلي إلي كدامك يظن احنه قابلين ع غلط،، والادب الزايد يخلي الي ماكل حقوقنا يظن انو احنه منريدها واحنه ضعاف جدا،، و المساحه الزايده تخلي الناس تفتي وتخطب بينا وتخرب الأشياء الحلوه، والثقه الزايده تخلي الناس تندفع من غير منطق، مو كل زياده حلوه
النتائج السلبيه تخلي رد الفعل هم زياده
وبكل شغله اكو كومه أبواب حلوه نسدها لمن
" نلاكي هواها يضرب بينا مو يجيب النسيم النه ♥️

ماكو شي اسمه الـ انكسر يتصلح ولا القلوب تتغير من الحب الى لاشيء بدون اسباب ولا المشاعر تنكلب من الاهتمام للـ اللامبالاة فجأه و المكانات متنهدم اله بيد صاحبها ومحد يتخلى ع شي اله بعد ما تكون ايده مليانه جروح من شده التمسك محد يعوف شخص يحبه إله بعد ما يكون كلبه تحطم من أفعاله ولا كلمات الأعذار تشفي القلوب ولا تعويضات الدنيا تخليني انسى الخذلان ولا اسف يمحي الآلم احنه ولو فرضنا العكس لما كثرت الخيانه والطلاق...الخ🤍

العيب بينا، وليس في 2024
واملنا في اللّه، وليس في 2025
عيدوا حسابتكم وي اللّه والناس فحن ضيوف مؤقتين في أرض الله لا تريد التغيير وحده يجيك غير من نفسك والباقي شي يجي وره شي
(إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ )
وكل عام وانتمِ بخير

مرات أرجع لفد رسائل أشوف نفسي شلون چنت ، مُندفع بمشاعري لدرجــة جنت معرف شنو معنىٰ الكبرياء والغرور ، أستهلگت طاقتي بأماكن خطأ وأشخاص خطأ ، شلون چنت أسامح وأغفـر لمواقف مچان لازم أغفر وأسامح وألــي يغلط مرة مرتين الثالثة برا حياتي ، چان المفروض أخلي نُقطه مو فارزة ، حتى ليش ؟
نعلم الناس مشاعرنا عمرها مجانت لعبه
نعلمهم أنهُ من خلال الغفران والمُسامحة بسبب حُبنا ومنريد نخسر أشخاصنا لفگرة انهُ غلطوا ويانا كم مرة مچنت أعرف أنهُ كل هالتنازلات هواء بشبك ومابيه فائده چنت أكول هذا رصيد ألـي حتى باچر عُكبه من أغلط أو يصير شي حيتذكرون الطيبه ألي عاملتهم بيه ، مچنت ادري بنفسي أنه كل هذا جان مجرد تنطي بدون متاخذ بشيّ لكن تعلمت فعلاً تعلمت أنه أي شخص يكدر يأذيك مهما كان قربه ، وكل ما كان قريب أكثر لازم تاخذ حذرك منه أكثر وكل ماكان قريب كل ما كان جرحه أقوة وأعمق ، شكراً ع الدرس ألي عُمره مرح ينسي 🖤.

-

اليوم شرود غالبية الشباب عاطفي لذهاب الحبيبة او عودتها أو أنها في مرحلة زعل ، لم اجد شرود ذهن الشباب لأمر إقتصادي أم فكري أو عقائدي ، العاطفة شيء شخصي لذات الإنسان تعميمها و شيوعها للعامة انتج لنا نتائج سلبية وصلت بنا لعدم فهم منصة التخرج و هل هي لتقديم خاتم الخطوبة لها ام تقديم طرح و فكرة و أثر إذا ما أخذنا بنظر الإعتبار البيوت و هي الأساس في تقديم الخواتم فنحن ضيوف مؤقتين في أرض الله

لمّا تكون العلاقة مبنية بين شخصين واحد زين ومو زين رب العالمين راح ينطي الشخص الموزين هواي شغلات حلوة حتىٰ يلتهي بيها عن الشخص الزين وينساه والشخص الزين راح تجيه يتمنىٰ لو يرجعله الموزين ، لأنهُ هو حيل محتاجه حتىٰ يوكف وياه ويساعده ويطبطب عليه ، لما يكون بهيج وضع يكون حيل وحيد وضعيف راح يدعي الله يرجعه بس رب العالمين مراح يستيجب دُعائه يريده يصير أقوى ، يريد تتفتح عيونه ويشوف شلون بساعة الجد ما لكه الشخص حتىٰ يفهم أنهُ ما يستاهله ومايستحقه ، الشخص الزين راح يتعذب ويبجي لوحده بالليل ويُكعد يترسلنه الستوري مالته حزن وبجي وأشعار فراق
شوي شوي راح يكره هالشخص السيء ، ويحتقره ويفهم انهُ ما يستحقه ويبدي تدريجياً ينساه ... وكتها الله راح ينعم عليه وراح يعوضه ويرجعله القوة والفرح بحياته ،
بينما الشخص الموزين راح تبلش تجيه الضربات والمشاكل والمصاعب راح يوعىٰ علىٰ نفسه وحياته ويلكي انهُ هو بحاجة أحد يوكف وياه وتعرفون شنو ؟؟ ماراح يلكي احد وياه راح يندم هواي وراح يبدي يستوعب حجم الجرح الي زرعه بشخص جان يحبه ويريده ويعامله بشكل حلو ..
والشخص الزين راح يلكي شخص زين مثله لأنهُ الله يكول بالقرآن الطيبون للطيبات .. تره رب العالمين عادل ومايظلم أحد ودائماً يسير الأمور لمصلحة الأنسان ألي نيته طيبة وكلبه أبيض وألي حاط عينه بعين الله وواثق برب العالمين وبقدرته وبعدالته

لذلك ديربالك تندم ع نية صافية لو مشاعر جميلة قدمتها لشخص مايستحق ولاتتغير ولاتجزع ولابد شي يوم الله يفرجها عليك مهما أشتدت بيك المصاعب والمشاكل

واتذكر ربك رب رحيم وعطوف وكريم ♥️.

ألي جرب يتمرض وما أحد يعرف عنه شيء ويكعد بالليل يتوجع من دون ما يكعد أحد
وياه ، هذا يعرف الصبر لوحده ..

ألي جرب ينام وهوه ضايج ومخنوك وكعد الصبح وما أحد يعرف شنو صار وياه البارحه ، مراح تتوقف حياته علىٰ أحد أبداً ..

ألي جرب لما تصير ويا مشكله جبيرة ومايحجي ويّ أحد ويروح يصلي ويبجي ويحجي كُل شيء اليّ بداخله لربه ، هذا أكثر واحد يعرف ألمن يلتجأ ،

هاي النوعية من الناس ألي يحزنون ويتوجعون وينقهرون ويتعبون لوحدهم حيل صعب احد يكدر يكسرهم بأي شكل من الأشكال ، هاي الناس يعرفون شلون يكملون الطريق لوحدهم ، ويعرفون شلون يكتفون بنفسهم وبلي خلقهم وبس♥️.

ديربالك تنافس الناس بمظهرك لأنو لو سويت هيج راح تلكي ألي أحلى منك وألي يلبس أغلى منك وألي يمشي على موديل ويلبس ألشي اول ماينزل واكو الي يشتري ملابس من الخارج ، وشكد ماحاولت تتنافس الناس بهالشي رح تلكى هواي متقدمين عليك وراح تشوف إنك قليل كل ما تركض ورا هل أشياء ..

وأذا حاولت تنافس الناس بعلمك ، راح تلكي الي عنده شهادات أكثر منك وألي قاري كُتب أكثر منك والي عنده إبحاث وألي عنده جائزة نوبل وألي مخترع وشكد ماحاولت راح تلكي ناس متقدمين عليك ..
واذا حاولت تنافس الناس برضاك وايمانك راح يتحول لرياء وراح يكون عملك والتزامك علمود الناس مو علمود ربك!

الحل الوحيد علمود تعيش مرتاح أنك ماتنافس أحد انت مو صناعه صينية تتنافس وي غير صناعات ، أنت صُنع رب العالمين ، أكو أكو منك نسخه وحدة بس وهذا شيّ ما محتاج لاتعديل ولا منافسه.

#أستمتع_بكونك_أنت ♥️.

الدنيا تمشي ومتوكف ع احد حَ تتفاجئ انو الي جنت مفكر مَراح تكدر تعيش بدونه راح تعيش احسن من بعده ورح تعرف مرات أنـو لا اكو ناس غاليه ولا اي شي انت بس الي تبالغ بتقديرك الهم
حَ تعرف انو بعض الناس خسارتهم مكسب الك مو خساره ابداً
اعرف قيمة نفسك وحب روحك وارسم طريقك وهدفك وخلي كدامك ولا تضغط ع نفسك ولتنتضر خير من احد ولتتأمل احنه منغلط تصرفات المقابل بالعكس احنه نشكركم لان الناس الي مثلكم تنطينه دروس وعبر بالحياة كأنوا ربنا دا ينور بصيرتنه بيكم وهيج هيج وجودكم مثل عدمه.
((عسى أن تكرهوا شيئا وهو خَيْرٌ لكم وعسى أن تُحِبُّوا شيئا وهو شَرٌّ لكم اي))

راح تخلص سنه 2024 بعد شهر..
راوتني وجوه ثانيه لاقرب اشخاص الي علمتني هواي شغلات واولها ماكو شي يدوم وكل هلناس الي حولي بيوم راح يرحون ويعوفني ،راوتني شكد الدنيه صغيره وضيقه،راوتني شكد مااكون صداقات بس ولا واحد راح يكون وياي بكلشي مثل ما انه وياهم بكلشي،راوتني شكد الانسان شجع ويحب يضر الأنسان الاخر ويحب يخرب حياته،علمتني الوحده والخوف..

وبلنهايه لازم أكون مصدر خير لان الإنسان ميبقه منه غير الذكريات

ﻛﻞ ﺍﻟﻠﻲ انفصلوا ووگفوا بالمحاكم علمود يتطلگون
چاﻧﻮﺍ بيوم من الأيام ما سايعتهم الدنيا انو صارو لبعض و مسوين ﻋﺮﺳهم ﻭيرگصون سوة

ﻛﻞ اثنين واحد يعاير الثاني
چانوا بيوم ﻣﻦ ﺍﻻﻳﺎﻡ ﺍﻟﻤﻌﺎﻳﺮه بينهم ﻓﻀﻔﻀﻪ ﻭﺍﺳﺮﺍﺭ يسولفوها ﻟﺒﻌﺾ و بخلاف بسيط تحولت اوراق واحد لازمها ضد الثاني

ﺍﻟﻠﻲ يتشمت بأي ابتلاء صار وياك
چان زمان يواسيك ع اصغر زعل يوجع گلبك لما چنتو حبايب

اﻟﻠﻲ يحچي عليك گدام ﺍﻟﻨﺎﺱ
ياما من زمان گلك ما يحچي عليك الا الي يغار منك

صديقك اللي چنت حضن اله بيوم من الايام وتعاركت ويه الدنيا علمودة اليوم صار اغرب من الغريب

لا توثق و تنبهر هواية باﻟﺒﺪﺍﻳﺎﺕ
لأنو النهايات هي الأهم..

البدايات جميلة بس النهايات اصدق

من تريد تشتري دجاج تشوف صاحب المحل يدخل ايده بلقفص علمود يلزم لدجاجه ويذبح.ه وهاذ مو لمهم لمهم من يدخل ايده بلقفص يشرد الدجاج جوه وبحاله فزع ومنو مكتوبله ليوم ينذب.ح يروح ونوب يرجع الدجاج لوضعه الطبيعي يأكل ويشرب وتكرر هل عمليه بين حين واخر أما يأكل ويشرب أو ينذبح بس أخر شي لكل ياكل نصيبه بلذبح ولا يبقى اي شي
العبره. هاي حالنه وي ملك الموت نشوف الاموات ونعتض لحضات مراسيم الدفن ويرجع كلشي طبيعي كانوا مصاير شي بس بالاخير كله تموت. تخيل لحضه تسوي معصيه تنقبض روحك شلون الدجاج من جاي يأكل وينذبح وقال
تعالى
(( كل من عليها فإن ويبقى وجهك ربك ذو الجلال والاكرام

ماذا لو عاد معتذراً؟
- مُعتذراً عن ماذا ؟ أرتطم بي في كتفِي بالخطأ ، أم تأخّر على موعد أتفقنا عليه ، لرُبما معتذراً لأنهُ لم يلقِ عليّ تحية الصَباح مثلاً ؟ أو لأنهُ نسي إهدائي باقةً من الزهور متغزّلاً في عيناي ، أتُشفى جروح القلب وعلّاتهُ بالِاعتذار ؟ ، وإن شُفيت فماذا عن النّدوب؟ أيتوقّف نزيفُ الروح بكلمةِ - أعتذر - أتسامحنُا الوسائد على الدموع التي ذرفناها فوقها ، أتُسامحنا الأعيُن على ليالٍ ذبُلت فيها بالسهر والبكاء وحرمان النوم ، أينسَى العقل أيام من التفكير المُفرط أرهقتهُ ليلاً نهاراً لسماعهِ كلمِة " أعتذر "؟

لا أريدهُ معتذراً ، بل لا أريدهُ على أيِّ حال

العرب قديما كان الرجل لا يبيع الحصان الذي تركب عليه زوجته بل يذبحه لكي لا يركب عليه رجل اخر من شدن غيرته.عند دفن المرأة تجد اهلها يتزاحمون على حافه القبر ويطوقون المكان لكي لا يقرب احد من دون اهلهاا الى القبر؟
وتتعالى الأصوات:غطوا الجنازه ستروها وذالك كلها غيره عليها وهي في كفنها ميته
أليس نسائكم الأحياء اولى بالغيره عليهن ملابس المراه تحكي تربيه ابيها وعفه امها وغيره اخيها ورجوله زوجها
لذلك قال تعالى في ذكر سيدتنا مريم( ياخت هارون ما كان ابوكِ أمرا سوءٍ وما كانت امكِ بغيّا) ذكروها بابيها وامها ،الثقافه والحريه والديمقراطيه لا تعني التخلي عن القيم والحشمه والاخلاق اتقوا الله في نسائكم

وان كان التعري يدل عل الحضاره فلحيوانات تملك كل الحضاره

حافظ على نفسك ،على ممارساتك الي تحبها ، كل شبر بذاتك ،تشبث بالحجي الي يخليك قوي ،لتسمع للأغاني صير انت الأغاني وتناغم بين الألحان ،لتتنازل عن كوب الكهوة او الجاي الي تشربه الصبح حتى اذا جنت مستعجل ،لتخلي جنطتك فارغة خلي بيها كتاب او رواية على الأقل ،تمرد جِن تهور على هالحياة وعلى نفسك
اني ادري الحياة مزرعت بيك ورد تحوم عليه الفراشات ولا حتى هي بساطة هالحجي بس اكو هواي شغلات تستاهل انو تعيش على مودها ..

كان الحسين متعطشا لمن يلبي نداءه اكثر من عطشه الناس للأسف ارونا جراحات جسده بدلا من افكاره وجعلوا احتياجه للماء أكبر همومه والامه

كل واحد بينا اكو بحياتة ناس مخليهم بمكانة مختلفة عن البقية ويكون واثق بيهم وممتوقع منهم الضرر ، منطقياً منعرف شنو نسمي هالشي ، هل هو غباء او مشاعر طبيعية تصير عند اي انسان طبيعي ... وبعدين هذولي الناس وكالعادة يطلعون مو كفو ويدگون الناقصة ، احنا رح ننكسر ونتحطم وصعب نرجع نلملم نفسنا ونگوم من جديد مو لأن احنا محتاجيهم وخسرانهم لا ( احنا الخساير مو الخسرانين ) ، رح ننكسر لأنو خاب الظن وراحت الثقة وبهالحالة نكون خسرنا نفسنا الي اساساً تعبنا حتى وصلناها لهالمرحلة وبسبب غباء بشري لازم نرجع نبني كلشي من جديد ونصير ناس ثانيين ...
شعور الخيبة يوجع كلش ماعتقد انو اگدر اوصفة الكم بس كلش يوجع ..
نصيحة ابدية لتنتظرون أي شي من أي احد ولتتوقعون الهواي من بشر ، لأنو على گد مـتنتظرون وتتأملون وتحبون ، رح تخيبون !
حبوا نفسكم واكتفوا بنفسكم وعلى الدنيا السلام 🤍

كل القوانين الحياة كاذبة لقد صدقنا اوهام اجدادنا،الحياه ليست عادية والعائله ليست مكان امن والأصدقاء مخادعون،والحب مجرد وهم،حتى الأشخاص الجيدين لديهم الطرائق الخاصه للخداع

أنت مو مجبور تحتفظ بشخص يعرفك بس بوقت حاجته إلك ولما تحتاجه يتحجج!
أو بالأصح "قريب لغيرك ، غريب وبعيد عنك".
أنت مو مجبور تعطي وقت فراغك لشخص ميقدر الوقت اللي تعطي إله.
أنت مو مجبور تبقى مع شخص مستكثر عليك رسالة صباحية تفتح النفس!
أنت مو مجبور تداري شخص ماگدر إنه يخصصلك كم دقيقة حتى يسأل عنك وعن أحوالك
أنت مو مجبور تتعب نفسك وبالك وإحساسك على شخص ماگدر يخصصلك شعور واحد يفرح بي گلبك و خاطرك.
أنت مو مجبور تعطي فرصة ثانية لشخص حتى يثبتلك إنك مهم بحياته و هو گادر على فراگك أيام وليالي.
أنت مو مجبور ترضي شخص ما كلف نفسه يراضيك في ليلة نمت بيها والغصة بگلبك و السبب زعلك يشوفه لاشيء بالنسبه إله.
أنت مو مجبور تعطي شخص ما يستاهل من مشاعرك الصادقة.
من صدك أنت مو مجبور!

أكو بنات يتزوجن شلون ما كان
بس حتى تملي هلفراغ و حتى تحس بقيمتها كَ بشر حتى تخلص من أجواء أسرتها السلبيه ، فـ التفكك الاسري وكثره الانجاب وعدم تفرغ الام والاب للابناء وعدم التفاهم والخلاف الدائم بين الابوين والابناء، راح يقود الابناء الى أتخاذ قرارات مصيريه تعيسه ، هاي الي تتزوج حتى تخلص من أسرتها وذيچ الي تنتحر ، ف رجاءاا لحد يستعجل ويتزوج بدون وعي وينجبلنه اجيال تفكر بالجرائم وبالانتحار بسبب عدم قدره أسرته على احتضانه وتنشأته.

وبعد اختتام المراسم وبعد البكاء على الحسين سنعود لنتتحم مرة اخرى مع يزيد يله حبايب رجعوا مثل قبل أخذوا غيبه وسمعوا أغاني وبنات رجعن لتبرج ترحن للزياره لبس مستور عيب من لامام بس من ترجعن لبس غير شي يغضب الله تخافن من امام ومن الله لا حجي هواي

التفكك الأسري وعدم الأمان
وانتَ داخل أسرتك ، تنشأ وتكبر و أنت ممحصل أهتمام أو طمآنينه او حنيه من قبل أسرتك هو سبب لقيام البعض بالالتجاء للعلاقات العاطفيه و آحيانا يلتجئ لِـ اكثر من علاقه عاطفيه ب آن واحد ، بدون وعي يريد يشعُر أنو أكو أنسان يهتم بيه ، أكو أنسان يحن عليه ، تصير هلشياء بدون متشعُر تلتجئ للعلاقات حتى و آن كانت علاقه صداقه دائما نشوف أكثر الناس عندهم زخم صداقه وكثير من العلاقات همه أكثر الناس مفتقدين الراحه والطمآنينه من أسرتهم ، من تكون أسرتك بعيده عن قلبك ، لما شعور الارتياح والطمآنينه عند أصدقاءك أكثر من أهلك ، لما تعلى ضحكاتك عند الغرباء وعند أهلك تلزم الصمت
هذا بحد ذاته يشكل نقص في دائره شخصيتك من ناحيه الجانب العاطفي يخليك تلتجئ الى انسان غريب يمليلك هلفراغ.

بمناسبه الزياره الاربعينيه ما راح اكلك شي بس اكلك اتخيل تمشي وي السبايا ويمك الأمام زين العابدين وسيده زينب(ع) يمشون وياك وعل ضوء هذوله سوي تصرفات لزيارة

تكفُر ؟
منو كال انتَ مو مؤمن ؟ منو كال انت متحب ربك ؟ منو كال انت مو طاهر ؟ عوفك منهلكلام انت تملك قلب من صُنع الله ،وعقل قادر على التغيير للافضل ،اتذكر حجم الندم الي تحسه ورا م تكفر ،اتذكر سرعه نبضات القلب ورا م تكفر ،اتذكر نوع التأنيب الي يجيك .. اتذكر انقلاب مزاجك سلباً ورا م تكفر ، زين ليش تنسى هذا كُله وترجع ثاني يوم تكفر ؟ صدگني الكفران مراح يرفع من شأنك كدام الناس، ولا راح يكولون هذا الشاب شخصيته قويه لان يكفر ! هذا كلام غير واقعي انت صنعته بمخيلتك ، مو حلو من جماعه يحچون بيك يگولون طيب و حباب بـسس يكفر! ، هاي البسس كُلش راح تنقص من شخصيتك وثقتك مستقبلا ، هاي البسس انت قادر على التخلي عنها 💪🏻 ، انتَ تگدر ترتاح من هلكفران الثكيل! عصبيتك وانفعالك ربك ماله علاقه بيهم ، بهاي اللحضه الي معصب بيها ومهموم ومنفعل يمكن ربك متآثر عليك وانت اجيت وسبيته ! شكد يزعل عليك شكد راح يبعدك عن رحمته ، رغم كُل شي ينتظر توبتك احر من الجمر لان يحبك كُلش ، ياريت تراجع نفسك وتحبها وتتمنالها الخير والخير ميجي غير من ربك لهذا طهرها لان ربك يحبك ويسامحك اذا تبت واليثبت كلامي قول القراءن :

(إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ؛ )
﴿ إِلَّا الَّذِينَ تَابُوا وَأَصْلَحُوا وَبَيَّنُوا فَأُولَئِكَ أَتُوبُ عَلَيْهِمْ وَأَنَا التَّوَّابُ الرَّحِيمُ ﴾ 🙏🏻♥️

انهم يزورون الحسين بمئات الالف كل عام ثم يرجعون من الزياره كما ذهبوا لم يفعلوا شيئأ غير البكاء والنواح فقد نسوا المبدى الذي ثار في سبيل الحسين،واهتموا فقط بلطم فقد خدرهم السلاطين وحولهم الى ثوار خامتين
علي الوردي

عظم الله اجرنا واجركم بستشهاد أبا عبد الله الحسين عليه السلام جعلنا الله واياكم من الموالين وطالبين الثأر لسيدنا في الدنيا والاخره