قصائد مصطفى صادق اللامي

#خروج_ضعن_الحسين
خطاب مولاتي فاطمة العليلة


يا حسين
بالسلامة امودعين
بالسلامة امودعين
راح ارش دمعي بضهركم
بدمع طفلة امعوذين
وراح ارد امن الموادع
وردتي ما ادري وين
بيتي وين..؟
بيتي فوك النوك شال
والسؤال
ماي ششرب..؟
وشكو ماي بجود عمي
وجوده قرر ارتحال
والسؤال
زادي وينه
وملح زادي عمتي زينب
حملت فوك الجمال
مسافرين
اكبال عيني ال هاشم شايلين
وانا اكابر لا اكسر شيخ الهواشم
ولا اعطل الرايحين
بصوت هافت كمت انادي
بالسلامه امودعين.. بالسلامه امودعين
رجفت ايدي ورجفت ايده
لخصت كل الحنين
خيل هجرك بوية ركضت
وطشرت كل السنين
وناگه ناگه أدموعي طاحت
وشيعت دمعي اعلخدي
وادفنتهن وسط حضن ام البنين
بالسلامة امودعين.. بالسلامة امودعين
وردة بوية اسگوني ملگه
شجرة طاحت ورگه ورگه
شما اكابر ابقه طفلة
تريد من والدها شبگة
اليغرك بدمعات عينه
اوجوه اهله اتصير شهكه
يا ابو فاضل
برايتك ماخذ هوه الله
رف عليه الدنيا خنگة
رف عليه يابوفاضل
حصة الي بحضنك يكافل
رف علية
حصه الي عمي بحنانك
مثل ما حصة لرقية
حصه الي بعينك يعمي
قبل لا سهم المنية
يوصل وعينك ضحية
ادري ما يرجع ضعنكم
وگلبي اقنعه براجعين
وادري معدومه السلامه
ووادعتكم يا حسين
بالسلامة امودعين.. بالسلامة امودعين
بالسلامة يا هواي
بالسلامة يا ضواي
بالسلامة بريج ضامي
لان الكم ماكو ماي
وادعتكم واهلا اصرخ
باجر تشح حته هاي
لاكو اهلا لاكو ماي
ريضو يا بختي ورجاي
بهيده امشو يا دواي
بهيده خل مشيي الضعين
عالذبح مستعجلين
بالسلامة امودعين

9 رجب اي قبل 20 يوم من خروج الضعن

والمتعارف عليه هوه ولادة مولانا الرضيع

فهل كان لقاء للطفل مع اخته العليلة ام وداع....؟


https://youtu.be/UOiGTIi_58k?si=t-bxrCzt9jwI3zs7

#موشح
#شهادة_مولانا_الهادي عليه السلام

الليلة يا عاشر زلمها وعوَدها
تبجي فاطمتك وذابل عودها
_
اسد سامره وصرت انته الها باب
امن المدينة اتهجرت عشت اغتراب
يالشفت من أمتك الوان العذاب

شلون امه السممت ليقودها
تبجي فاطمتك وذابل عودها
__
الليلة يا رابع علي امن ال الرسول
تنفجع بيك امك الزهره البتول
تنعه فگدك فاطمة بونه وتگول

ااخ يولادي وسموم اجبودها
تبجي فاطمتك وذابل عودها
____
الليلة يالهادي جرحها يصير بيك
بضلع محني ودمعه سچابه تجيك
تغمض عيونك  يهاديها واديك

بيدها اتسبلهن لمضهودها
تبجي فاطمتك وذابل عودها
____
تبجي فاطمتك على اسموم الجبد
امك المحزونه بيمن تنسعد
ووصل سم الحسن حد ولد الولد

بثار جبدك تشتكي لمعبودها
تبجي فاطمتك وذابل عودها
____
تبجي فاطمتك تصد للعسكري
مزگ اثيابه ودمع عينه جري
اتحفه ابنك واتجه صوبك الغري

ياعلي سمّو جبد صايودها
تبجي فاطمتك وذابل عودها
_
تبجي فاطمتك يهاديها الغريب
وغربتك ودتها لحسين السليب
وانته ميت صحت وياها بنحيب

يا خيامه العالهزيل اورودها
تبجي فاطمتك وذابل عودها
__
من اجت يمك لگت ابنك ينوح
حسين من حضرتله ماكو بولده روح
فوگ صدره حط رضيعه وهالجروح

ما تطيب اله يجي موعودها
تبجي فاطمتك وذابل عودها


اللهم عجّل لوليك الفرج

#موشح
#لمولاتنا_أم_كلثوم عليها السلام

بكثر ما شافت مصاب اعيونهه
تغمّض ام كلثوم گوه جفونهه
__
گوه تغمض عينها الشافت عذاب
شتنسه ذبح خوانها اوليد الرباب
سنة ما عاشت عگب طف المصاب

شلون تنسه الصار وي ضعونهه
تغمض ام كلثوم گوه جفونهه
__
مال وي كلثوم حيدر هالوكت
الليلة صوت ادموعها بسكته ايخفت
الليلة نعي حسين ينكص نوح اخت

الليلة ماكو اخوان ويودعونهه
تغمّض ام كلثوم گوه جفونهه
___
هاي ليلتها الاخيره ويا ختام
اتجبلت وتودي لحسين السلام
خوتك كتلتني ما كاتلني شام

وحِگ حليب امي وملح ماعونها
تغمض ام كلثوم گوه جفونهه
____
اه صاحت بس ذبح محسوبه الاه
بين ازقة الشام واسطوحه وهواه
هنا ضعنها انذبح سكته بمستحاه

اه صاحت وانخطف كل لونهه
تغمض ام كلثوم گوه جفونهه
___
وندري عالخوان كل عين الخوات
وين الاجفوف الندية الراويات
ما مغمضه اختك يكافل بالممات

امفتشه ماتت بلكي يحضر عونهه
تغمض ام كلثوم گوه جفونهه
___
اجنازه الغربه غريبة ابلايه لون
بلكي لأم كلثوم هالليلة تجون
بلكي تطوون الطريج وتعتنون

وبلجن اتنزلونها بمدفونها
تغمض ام كلثوم گوه جفونهه

#مولود


هي بنت من...؟
هي زوج من...؟
هي أم من...؟
هي فاطمة...هي فاطمة
__
يالمن الفرح محروم
افِرح وابتهل هاليوم
ما مولود اي معصوم
لو ما صايره الزهره

افِرح من گلب والسان
نزلت كوثر القرأن
لاهي من انس لا جان
بيهه الدنيا متحيره

ولادتها ولادتها..ولادة طاهرة وعضمى
ولادتها ولادتها..اجت رحمه على الأمه
اجت رحمه
على الامه..ولادة فاطمة الزهرة

هي بنت من...؟
هي زوج من...؟
هي أم من...؟
هي فاطمة...هي فاطمة
_
علگ زينة المولود
واتعطر وشيل اورود
وأدعي بجية الموعود
واليندعي مقبوله

بهجة ونور واستبشار
فرح اطفالك البّدار
علمهم الليلة شصار
خل مولود يقروله

هلا بيها هلا بيها..هلا بفاطمة القدسية
هلا بيها هلا بيها..اجت للدنيا حنية
هوه ورية
يحنية..ولادة فاطمة الزهرة

هي بنت من...؟
هي زوج من...؟
هي أم من...؟
هي فاطمة...هي فاطمة
____
اجت وابتهجت الاكوان
لؤلؤ ناصع ومرجان
هيه الروح و الريحان
كلمن ما فرح قصّر

هي الزيتون هيّه التين
هي سر سورة الياسين
هي تنزيل هذا الدين
نزلت والزرع خضّر

أمانينه أمانينه..هي تحققهن بجفها
أمانينه أمانينه..عطفها من عطف ربها
عطف ربها
شيوصفها..ولادة فاطمة الزهرة

هي بنت من...؟
هي زوج من...؟
هي أم من...؟
هي فاطمة...هي فاطمة

يا مولاتي يا ام البنين

دخيل ام البنين.. دخيل ام البنين
____

الزلم تدخل عد زلم معروفة هاي
عاده عد العرب من ذيج السنين
وانا لو ردت ادخل ادخيل والوذ
مالي غير ادخيل يا ام البنين


الما دخل يمها وتعنه البابها
دنيته تذلة وتصوبه اصوابها
والرجولة انشمرت بطين العبيد
من التراب اليسفي فوك اعاتبها

دخيل ام البنين.. دخيل ام البنين
____
شيوخ منگولة وبخيت بسد بخيت
والحچي لاهل الثگل مو للخفيف
ولو وصلنه بالحچي لأم البنين
اخياط تتخيط احلوگ البالمضيف

ايسكت احلوك الزلم طاريها
شارة العباس حضرت بيها
مثل متلف العصابه اعللجبين
الطلابه ام الگمر تگضيها

دخيل ام البنين.. دخيل ام البنين
____
ارگاب ياما خلصت ام البنين
وياما هدر الدم وگف والها الفضل
امربع افصول العرب لمن تريد
وفاتحتها امربع اتطيح الفصل

كل مسيل الدم توگفه بهاية
بسادة للعباس شالوا راية
البعيد اعللديانه والقريب
يخاف لو جابو بأسمها حجاية


دخيل ام البنين.. دخيل ام البنين
____
دور برس الخدم تلگه اكيد
بزاد سفرتها تغذت الامهات
سر حياة الكون من جربة كفيل
وسر دوام الخدمه هيه بالحياة

كلمن بيومه يموت ويومها
لهسه ما جاي وبعدها اعلموها
شما لكينه مجلس وخدمه وثواب
هنانه موجوده وهذن تعلومها

دخيل ام البنين.. دخيل ام البنين
_____
تربي حگ كبرتها ندري الأمهات
وهيه ياهو تجيبه ناذرته نذر
امبخره طول حسين بخوان وكفيل
وبرگبهم عوذت ضعن الستر

امن الحرورة البيج يا مولاتي
كون من دموعج لدمعاتي
ديري من نوحج على اگلوب العبيد
ديري جمرج خل نحب ساداتي

دخيل ام البنين.. دخيل ام البنين

#شهيدة_الانتظار
مولاتنا أم البنين

مذبوحه من وداعك.. يوم الرحت
و شهيدة انتظارك..هسه صرت

فكيت حزني بالجفن وحته الجفن بجيته
بمغيسلي و بيه نعي يحسين ما ناعيته
يالنايم برمضه ورمل فضلك ولا وفيته

بالمغتسل واتعذرك..بمصابك انه امقصره
مو يمك بالليل اهدعش..ما كابليت الزهره
متت بس جرحي نارك
شهيدة انتضارك
......................................................
من كد بواجي عيني..عيني انعمت
وبس صورتك حبيبي..بروحي بقت

معمية بس عندي امل ترجع تضوي عيوني
خمسين واكبر بالعمر واطفالك يكودوني
ام البنين بموتتك من النعي يعرفوني

لميت كل نوح البدو..ونحتّه بأثر هجرانك
وبدلته شوفي بالعمه..وما بدلتها احزانك
دمعتي وكلبي دارك
شهيدة انتظارك
............................................................
گبور بأديه ابني..لولدي والك
وكل مغربيه ازورن..واتوسلك

بانيته كبرك وحده ميزتك اعله اولادي
وامرادي اموتلك بجي ومنك اريد مرادي
سكّت شكو بكلبي حجي وخلي حُسين ينادي

لحد ما يرد ثارك الي..خليني هم منتظره
وحته بمماتي استحي..ماريد كبه وحضره
الامر امرك قرارك
شهيدة انتظارك
..............................................................
كالولي عن رقية..من شافتك
ماتت حبيبي فوكك..وي شبگتك

موتها يحسين العشك وهم ردته الك يكتلني
يالحاط جرحك بالگلب اكثر بعد عذبني
يرحولك فدوة الولد وعمري وسهم عيني ابني

من نشغة وحده طفلتك..قهروها بيك وماتت
ولجروحي نار ارقيتك..قدوة بواجي صارت
لدم شيبك ووقارك
شهيدة انتظارك
...............................................................
يم گبري نزلوني..واتذّكرت
محد دفن حبيبي..وانه نحت

لا تحضر بوكت الدفن يالمابقو خوانك
تشييعك اتراب وشمس وكالخشبه باقي السانك
فوكك بناتك بالعبي فيي سون لجثمانك

ام الكمر واسود بقه..كلشي بحياتي اخلافك
المغيسل ومايه جرح..المي ما وصل لشفافك

احتضاري لاحتضارك
شهيدة انتظارك

يا فاطمة الصديقة صلوات الله عليك
يا فاطمة ام البنين صلوات الله عليك
يا شبيهه الزهراء يا رقية صلوات الله عليك


خير العمل
نوحي معه الزهره
عايش اون واقره
اسعِد فاطمة

ومن انسئل
عن اهلي وانسابي
من دمعتي اجوابي
اسعد فاطمة

أنه اهلي كربلاء..ديني هوه الونين
گلبي وقف مصاب..ونبضاته يا حسين

ارزقني من نية جون..يا ابا عبد الله
خلي گلبي مفتون..يا ابا عبد الله
ووي عين الزهراء..من تصب دمعتها
كون اصب دمع عيون..يا ابا عبد الله
__
يا سيدي
ياهو علي يستر
ويطيّح ويعذر
غيرك يا حسين

لو ما أون
واتحسس الحسره
شبّجه امك الزهره
غيرك يا حسين

انه امي فاطمة..يمها احجي امن انهضم
تسمع ضيم العلي..العن امي بي اضم

العلگ من انشده..يا أبا عبد الله
تگضي كل الشدة..يا أبا عبد الله
خير اعلي فايض..يا كريم الزهراء
وهالكره شيعدّه..يا ابا عبد الله
_
الصارو خدم
فاطمة السوتهم
وبجفها جابتهم
جان اول عزاء

من فاطمة
اول دمع عالخد
واول هدم اسود
جان اول عزاء

بنص زحمه الطريق..جبتيني من ادي
وكمت ابجي يا حسين..ودمعج ستر علي

بعز ضياع الوادم..يا ابا عبد الله
كالو اعلي خادم..يا ابا عبد الله
للفضل للزهراء..من ادي جابتني
وگلبي اصبح هايم..يا ابا عبد الله
____
مجوي اليحب
والمجوي ما ينسة
جي فاطمة تحرسه
بأسم ام البنين

من فاطمة
لحد فاطمة  هالحب
فوكانه خدمة تصب
بأسم ام البنين

الداخل عد ام گمر..داخل عد السمه
بيا فاطمة اليحب..وتحرسه فاطمة

هذا حب مو عادي..يا ابا عبد الله
أم گمرنا تنادي..يا ابا عبد الله
من تحت هالخضراء..فدوة لاسمك يرحون
وفدوة طول اولادي..يا ابا عبد الله
___
دمع اليحب
من يا رقية انسن
ومالومة الاتجنن
في حب كربلاء

طفلة وطشت
وهم ورث الزهره
ماتت بجي وحسره
في حب كربلاء

عبد لرقية اصير..واتعلم الصدك
بخيمه بخرابه كون..لمحبوبي احترك

بنص خرابة ونادت..يا ابا عبد الله
دمعه دمعه ماتت..يا ابا عبد الله
ثبتت هذا الحب..بالبكاء والاهات
وقدوة للحب صارت..يا ابا عبد الله

ام البنين صلوات الله عليها


وين يمه بيا محطه
ضعنك المحروس هسه
حسين من كثرت سؤالي
جدم ما عندي احسه
(السلام على من تورمت قدماها لكثرة السؤال على الحسين)
مو مهم بيه شتغير
المهم عبد الله نفسه...؟

امشي فوگ اثار ضعنك..واندل اثارك حنينه
وحافضه اصوات القوافل..واعرف اجراس الضعينه
يا حسين بكد حنانك ..باجية اباب المدينة

شتسوي المشتاگه..واتدور ماكو حسين
شتسوي المتعلمه..شوف تشوفك بالعين
يالكاصد بضعونك..ضعنك مكصوده لوين
__
هذا ليلي السهراني
نمته لو مثلي سهرته
گلبي مربوط بضعونك
تمشي خطوه اتدگ نبضته
ام اخوتك ماهي طيبه
حسين يمه طيب انته..؟

بدارك واشعر غريبة..شلون بيك وانته نازح
يالكصدت اگلوب خشنه..ابيتك اشجم گلب ذابح
حته الاهلاً من لسنهم..تنحسب هم حجي جارح

يا خيمتنه وفيينه..ناصب گالولي اخيام
ومحترگات اخيامك..تطلعلي بالاحلام
واتعوذ من حلمي..واتعوذ من الشام
____
فوگ گلبي امخليه بنتك
يفرق الليلة جرحهه
بليلة ما بين گمرهه
گلبي خايف من صبحهه
خايفه الدنيا تخلي
براس سيدها رمحها

عصبّت راسي ونعيتك..وعيني ما غمض جفنهه
وطر صبح ما شفت مثله..بعيني سوده الشمس جنهه
وتربتك يم راس بتك..فاض دم يحسين منهه

بمجّان البي تكعد..شعلتلك روحي اشموع
غير اسمك يا يمه..بكعدتنه ما مسموع(حسين)
وين الله ترد سالم..اتشاهدنه ومتنه دموع
____
بنعي ما مر عالمدينة
حسين يمه اسمك نعيته
خبر موتك جان عندي
بدارنه بعينك قريته
وطول هالسفره الطويلة
خبر موتك جذبيته

كون بين ضلوعي اضمك..يمه عن لا يغدرونك
شلون ينطيها گلبها..يمه هاي امتك تخونك
ما مصدكه ابدون اخوتك..حاير اتدير بعيونك

اتدير اعيونك حاير..ومالك ناصر يا ماي
كالوا تحجي وصوتك..ما يطلع يا مولاي
ما راح انعه اولادي..انعه اعلحوالك هاي
__

مولاتنا أم البنين صلوات الله عليها

اتغمض المدينة وتبقه عيني الحمره
متحفية واتعنه الحسن يم گبره
موهمي ولدي همي يبن الزهره
تردلي سالم للمدينة
__
سور الهواشم خله..شالوا هله لكربله
وگبر الحسن راحو زواره عالنوگ
امن ترابه يا ما شلت..ودرت اعلگلبي درت
وما يطفه يا گلبي الخليته محروگ

مو بس انه محروگه امن الافراگ..يمه يحسين
لزواره الحسن هم مثلي مشتاگ..يمه يحسين
الله يجفي شر سفرة هالعراگ..يمه يحسين

عنك انوب شما ازور اعتابه
گبر الحسن هم مثلي ماكو احبابه
اشتم عطر خوتك اضل بترابه
ام البنين الحزينة
يردلي سالم للمدينه
_____
واطلبت من الحسن..يوفون حگ اللبن
ولدي ويخلوني كون ارفع الراس
كون الجفوف المشن..عالخيمه يتكطعن
ومن عينه مايه يصب لخيامه عباس

من اصبي عينه تشرب كون الاطفال..يمه يحسين
ووصيت الولد من الضعن شال..يمه يحسين
دمهم يطلع ولا يطلع اخيال..يمه يحسين

يتذبحون اعللخدر واخياله
اتباها اريد اعللزمن وارجاله
لاخت الحسن يمه جبت خياله
دمهم انطوه للضعينه
اتردلي سالم للمدينة
__
ومن گبره ارد للنزل..وبالدار اشب واشتعل
والكه العليلة تشم بثوبك يجيدوم
مشيت جمر بالكطن..ماكلنه هيج الحزن
نفك الجفن عالدمع ونتصابح هموم

بملوحه دمع سمينة عالزاد..يمه يحسين
الدار الهاشمي خالي امن الولاد..يمه يحسين
نغفالك حرگ ونفزلك ارماد..يمه يحسين

طفينه يال أمك بديها الكوثر
امعوذتك بأربع رگب من الشر
لو ترجعلنه لو تودي الاكبر
وترجع اللمه الحنينة
تردلي سالم للمدينة
___
يامن علينه تعز..شما ابابك اندك نفز
بلكت على اضعونك جابولنه اخبار
بخير بسلامه بخطر...؟..ما عدنه عنك خبر
بمكه استقر لو مشه ما نعرف شصار

كابلنه تربتك ننضر بهم..يمه يحسين
ومن التربه فاض اعلينه يا دم..يمه يحسين
نعرف هالاشاره وكلنه تسلم..يمه يحسين

ارحم دمع فايض نهر فوك الخد
ارحم عليلة اتذكرك وتتشهد
ارحم طفل گلبه التهب ماورد
اتحنن وجاوب علينه
تردلي سالم للمدينة
___
بمصباح مابي نده..ابين القوافل صده
كالوا خبر عالضعن بهذا الصبح جاي
بيدي الفضل وانتظر..ولن ناعي ينعه بشعر
ولدج گضوا عالنهر ومحد شرب ماي

كتلي احجيلي بحسيني شنو الصار..يمه يحسين
وحدك كلي باقي والذبح حار..يمه يحسين
وطاح الفضل من ايدي اعللخبار..يمه يحسين

بلكت بشّر عنك تخيب اخباره
بلكت يرد طولك سكف لدياره
بلكت مضيفك تعله ترجع ناره
بلكي حلمانه وتجينه
تردلي سالم للمدينة

لشهادة الزهراء صلوات الله عليها

اويلاة يا فاطمة اويلاة يا فاطمة
______
امصاب الوديعة مو سهل
اويلاة يا فاطمة
غاره و نذل جايب نذل
اويلاة يا فاطمة
دفعوا مرة وجهضوا طفل
اويلاة يا فاطمة
ومحد رحمها الراحمه
اويلاة يا فاطمة
____
يا صبر ينفع يا صبر
اويلاة يا فاطمة
زهرة علي ابين الجمر
اويلاه يا فاطمة
وعالعتبه محسنها الطهر
اويلاه يا فاطمة
مذهول ضل حامي الحمه
اويلاه يا فاطمة
_____
مريود دمعي والحزن
اويلاه يا فاطمة
بسمارهم كلش خشن
اويلاة يا فاطمة
وجنب ام حسن بي منطعن
اويلاة يا فاطمة
ضلوع الرساله امهشمه
اويلاة يا فاطمة
_______
عالعين ادك عندي اثر
اويلاة يا فاطمة
الثاني على عبده أمر
اويلاه يا فاطمة
خد بت نبي شلون انسطر
اويلاة يا فاطمة
يعني انسطر وجه السمه
اويلاه يا فاطمة
_______
مدت اديها اعللضلع
اويلاة يا فاطمة
وشبگت حسين وتنوجع
اويلاة يا فاطمة
باجر تصير بهالوضع
اويلاة يا فاطمة
بين الخيول الحاطمة
اويلاة يا فاطمة
____
ضلع امك حسين انكسر
اويلاة يا فاطمة
وباجر يكسرولك ضهر
اويلاة يا فاطمة
نهرك يذبحو عالنهر
اويلاة يا فاطمة
زمزمك يغزو بالضمه
اويلاة يا فاطمة
_______
يحسين يوليدي السمح
اويلاة يا فاطمة
محسني ايهيئك للجرح
اويلاة يا فاطمة
عبد الله بيدك ينذبح
اويلاة يا فاطمة
وأصعب ليالي القادمة
اويلاة يا فاطمة

يا مولاي يا قاسم العطاء دخيلك


من يا باب اسولف بيك
غريب وقصتك تهضم
عجيبه شلون متغرب
بوطن للمثلي ضل يكرم

يا ربيب اهل السمه أمرك عجيب
المثل قدرك وسفه يتسمه الغريب
وحدك تقيم العزاء وتصب دموع
ودمعه دمعه تكتلك لجسم السليب

گلبي بعتبتك نادة
ولگلبي انطي أمراده
امرادي دمعة عيني
وغربه لغريب السادة

بجيني كربلاء
يا قاسم العطاء
____
الگضه من عمري اعرفنه
ولكن اجهَل القادم
لذالك راح اشد گلبي
واشمره بعتبة القاسم

بزودك وزود اهلك اسنيني مشن
الحلوه والمره على حبكم گضن
الفاتن اعرفهن ولكن بيه خوف
يا بلية امحضر المثلي الزمن

بالماضي راحم بيه
يا سيد الحنية
ارحملي باقي سنيني
وتمم خدمتي اعليه

يا رحمه السماء
يا قاسم العطاء
__
يا قاسم جنت ساكت
وفعلك صرح بأسمك
سكتّ الساني لا يحجي
من يخدم خيم عمك

الحچي لاهل الحچي ما بي صدك
والبچي لاهل البچي هذا العشك
لا افرط حبي بالگال وگلت
كون اعيش بنارك وسكته أحترگ

جفوف الگمر من طاحن
بسكتتهن شكد صاحن
گضن عمرهن خدمة
وسر العشگ ما باحن

الگال وگلت بلاء
يا قاسم العطاء
____
من طبع السگاية البيك
صب بيه أدب من جون
اسگي الروح يا قاسم
ودليني على اليبجون

يالخذت من عمك الكافل طبع
اسگي روحي بأسم ابوفاضل دمع
أذني سدها اعللبشر بس ياحسين
بأذني يا قاسم اريدن تنسمع

غيرني من تسگيني
حب وادب خل ديني
هوسة وضياع العالم
بأهل الصدك دليني

دليني عالبكاء
يا قاسم العطاء

https://youtu.be/ObZSdXiZtSk?si=A8y5vbAoienPQvwa

https://youtu.be/1nqj0eWtqFs?si=1efmqe4vESDSEs2y

صلى الله عليك يا زينب الكبرى
يا عقيلة الطالبيين
يا ناموس الهاشميين
يا شرف الله الدائم
يا صوت الحسين الذي لم ينقطع
يا من ورثتي حكمة الرسول و ثبات الزهراء وشجاعة علي
يا بنت علي يا بنت علي يا بنت علي


وهاي كبلج ياهو المسويها
برفعة ايدج زلم خورستيها
_____
جمع ما مجموع مثله اي جمع
وصوت من احلوگ ما بيها نفع
وهيه اومت والنفس ضل ينسمع

وساحة الكوفة الصمت عم بيها..؟
برفعة ايدج زلم خورستيها
---------------------
زلم رجفت من رفعتي هناك جف
وصوت حي الله العقيلة امن النجف
علي يحيي ابت علي وصوته هتف

لهيج شده زينب امربيها
برفعة ايدج زلم خورستيها
---------------------
مثل امها الزهره خطبتها بعزم
وعار صارت هالشوارب عالزلم
امن الرمح والروس صاحت والنعم

والنعم منج يبت داحيها
برفعة ايدج زلم خورستيها
_____
بين تهليل وتسابيح وحمد
بيج سطرة حمزه اجتهم من بعد
عار لبستيهم لولد الولد

كالنعام الروس خليتهيها
برفعة ايدج زلم خورستيها
---------------------
وسره المسره والدرب كلش خطر
مايلة النوك وكلت حك تنعذر
غير فوك اضهورها اجبال الصبر

حته ضهر الكاع ما يحويها
برفعة ايدج زلم خورستيها
---------------------
اتكفلت والنعم من هالكافله
يا مدينة اتطبها عادت كربلة
عابدة وسبحتها صارت سنسله

تعبد وكل ضنهم امكيديها
برفعة ايدج زلم خورستيها
_____
يغني عن كل الكتب واهل الشعر
ويكفي من طبت عقيلة اعللقصر
ابيرغ العباس وكفت تفتخر

ورجفت الرايه بذكر حاميها
برفعة ايدج زلم خورستيها

https://youtu.be/MIHaXeXPxmg

لمولاتي فاطمة صلوات الله عليها


حبا بفاطمة..كل صالح اعمل بي صرت
حبا بفاطمة.. والهه موده تغيرت
حبا بفاطمة.. راية الحزنها علگت

عشت وياهه حال.. بس رحمه ودلال
اسم الزهره امان.. لولاد الحلال

اعذب اسم أادب وجداني
اطهر لفض هزني ورباني
امن اصرخ دخيل باسم الزهره
الگه دمعتي والگه ايماني

هذا الاسم وقاري
يا فاطمة اختياري
__________
حبا بفاطمة.. مي كصتي اذبه بخدمتي
حبا بفاطمة..صارت رخيصة دمعتي
حبا بفاطمة.. صومي وصلاتي ونيتي

بهالاسم الكريم.. دگ گلبي الرميم
يا فاطم اصيح..ويرحمني الرحيم

رحمتها شملت ادم واكثر
بطاري الزجيه حاله اتغير
وحته الملائك سجدت يمه
ما احله اسمها الما يتفسر

يا رحمتي وقراري
يا فاطمة اختياري
__________
حبا بفاطمة..اتشكر امي اعللبن
حبا بفاطمة..غذتني حب ام الحسن
حبا بفاطمة..بالياعلي اسنيني گضن

ضلوع التنكسر..جف لاحه الجمر
حبها الياعلي..حد خد ينسطر

هاي الولاية الماكو بگدها
بخلو ابن عمي امن اتجسدها
عافت ضلعها وابنها المرمي
ورادت ترجع حيدر عدها

عامر باسمها داري
يا فاطمة اختياري
--------------------------------
حبا بفاطمة.. اتبره من اهل ال وأن
حبا بفاطمة..واتقرب الها باللعن
حبا بفاطمة.. والهه البست ثوب الحزن

لو شائت يشاء.. الباري والسماء
يعني اهل السمه.. هم علنوا براء

ديني البراءة ودين اجدادي
واعظم ورث يبقه لاولادي
هذا التبري امن العادوها
وهذا الولاء لبنت الهادي

يمها عشت نهاري
يا فاطمة اختياري

https://t.me/+_vppP_AG5kZlY2Y6

#ياعلي
لمولاتي فاطمة المعصومة صلوات الله عليها

دخيل الغيرت حالي..الدلتني على الحسره
وصحره گلبي كطعتها..بجمال اوردها الحمره

ام ومن صدك ام
لحد الرضا تكرم
زلم بس مثل الاطفال
يبجينه الهوه بقم

گلبي الذبل من دنياه
مولاتي تمسح فوگاه
وتتجدد بصدري الاه..معصومه

لحسين سوت عشاگ
ماي اللطف يمها انضاگ
رحمه تصب عالمشتاگ..معصومه

بالحس ندرك الرحمه..وبالحس ندرك الطاف
بس رحمتها معصومه..شوف العين تنشاف
_
الجداوه اكبال گبتها..يفتح من كرمها ابيوت
اليجدي اباب ياقوته..اكيد تكرمه بالياقوت

شكبرها الصار خادم
لياقوتت هواشم
طيور امجرحه نريد
نحط بعش فواطم

تغيّر بديها المقدور
الطبلها بجناحه اكسور
من عدها يطلع مجبور..معصومه

لأعذب مشاعر ينبوع
وكل التطلبه مسموع
عش فاطمي كله دموع..معصومه

دريت ابابها الدافي..حته الرحمه اصناف
وبس رحمتها معصومه..شوف العين تنشاف
____
عله گلبك اذا تمسح ..گلبك يصفه بس الهم
بقم من طبت وكعدت..حولها العطف قمهم

قم ما قدسوها
لوما بت ابوها
ماتت فاتحة العين
مشتاگه لاخوها

بحنيته اخ وأب جان
مثل الفراش ابستان
جانت تطوف السلطان..معصومة

شوگ الاخت سن قانون
وخلت الناس اليبجون
لصحن الرضا يشتاگون..معصومة

عطر هالرحمة نشتمه..بعطر ممدوح الاسراف
وبس رحمتها معصومه..شوف العين تنشاف
___
الوكت وي كل اسم فاطم..يذب ضيمه ويحد سنه
لا معصومه مرتاحه..ولا جدتها تتهنه

بنات الزهره يا يوم
ينسن طاري الاهموم
الامها فاطمة تصير
المصاب اعليها مقسوم

اصل المصايب والصار
من باب مشعول بنار
لاجمهه ذاك البسمار..معصومه

اتحسست مولاتي احزان
بالزهره حاطت نيران
يخنكهه ذاك   الدخان..معصومه

رغم كل هالجرح تكرم..گلب بجروحه شفاف
وبس رحمتها معصومه..شوف العين تنشاف

اللهم عجّل لوليك الفرج

لمولاتي الصديقة الشهيدة فاطمة صلوات الله عليها


بتجارات البشر كلها..تطلع يا گلب خسران
وتجارة دمعة عيونك..لو ربحان لو ربحان

ياهوه تنطي دمعه ويكرمك عمر
ياهوه بس تنعاله ينطيك الستر
هذا الدلال امن ام حسن ما ينخسر

جابتنه لخيمة عزاهه
وانطتنه حب ووجاهه
مكسورة ورايح ضناهه
فاطمة

فاطمي..من منشائي لمماتي
فاطمي تخلص ردت حياتي
___
جرب تنجرح مره..جرب مرة تبجي الروح
شوف شلون مولاتك..منك تشتري الاجروح

شراية اجروح الخدم بس فاطمة
وهنياله كل خادم يهاجر عالمه
يروح بدمعته لعالم اجروح وضمه

السلم بيد الزهره گلبه
بدرب الدمعه يبدله دربه
الترضاله يرضاله ربه
فاطمة

فاطمي..توحيدي نص صلاتي
فاطمي تخلص ردت حياتي
_
اذا دمعك نشف مره..اطلب دمعه لتكابر
اطلب من گلب فاكد..عاش حرورة العاشر

اطلب جروحك من گلب عاش الرعب
مفجوعه بس صبت على اهل الخدمه حب
بيد ام حسن سلم قرارات الگلب

مولاتك ما يهده ونهه
محزونه شثگله حزنهه
اسِعدها بجرحك لأبنهه
فاطمة

فاطمي..بمجلسهه الكه ذاتي
فاطمي..تخلص ردت حياتي
___
استوطن يا گلب جرحك..واحضر كل عزه تحضره
واذا جرحك برد مره..بالك جرحك تعذرة

ضل فاطمي ولحد يغير هالقرار
ما دامه مكسور الضلع ضل بأنكسار
ما دامه خدهه احمر يجرحي ابقه حار

دمعتها بخدها جرّية
كل مغرب عدها عزية
ابجي لأهات الزجية
فاطمة

فاطمي..تقبلني امنياتي
فاطمي..تخلص ردت حياتي

#لمولاتي_الزهراء صلوات الله عليها

فاطمة..يعني طفل بالدم فطيم
فاطمة..يعني ضلع صابه الزنيم
فاطمة..يعني الحُسين يضل يتيم
__
فاطمة..يعني قتل عمد وشروع
فاطمة..يعني عقيلة تهل دموع
فاطمة..يعني صدر دامي الضلوع
___
فاطمه يعني اشتعل منزلها نار
فاطمة يعني وجن ضل بي حمَار
فاطمة.. يعني انهجم للنبي دار
_____
فاطمة يعني الحنان الينحرم
فاطمة يعني الحسن راحتله أم
فاطمة يعني ولا يشفه العضم
_____
فاطمه..يعني ضلع دامي وكسير
فاطمة..يعني جرح غيرة أمير
فاطمة..يعني علي يحجي اويه بير
___
فاطمة..يعني أمان ايضيّع أمان
فاطمة..يعني طفل يشهگ دُخان
فاطمة..يعني ذبح رحمه الزمان
___
فاطمة يعني حياة ابلا حياة
فاطمة يعني الجفوف امحرگات
فاطمة يعني علي بمغتسل مات
___
فاطمة..يعني الرمح جازه يعيل
فاطمة..يعني الجذع كلش ثجيل
فاطمة..يعني گبر ماله دليل
___
فاطمة يعني ابن طلاّب ثار
فاطمة يعني دمع مال انتظار
فاطمة يعني يمهدينه البدار

#الليالي_الفاطمية

خفت اعلدمعي لا اخسره
هذا الزمان احواله مرّه
خايف تمرني الفاطمية
وما لابس اسود على الزهره

ليخف حملهن والثگيلات
كلهن بلايا الدنيا هينات
واصعب بلاء لو ذكرو الباب
لاگلبي ينهز لاكو دمعات

كل البلايا هينه..ما دام اكو دموع
ما دامه گلبي ينهم..يم كسرة الضلوع
اقنع بكلشي اقنع..وبحزني مو قنوع

ودمعاتي لضلعج ميزان
الما باجي لفاطم خسران
_____
اسئل شنو البجاها اسئل
عين الزجية ليش تذبل
من تعرف شبجة الوديعه
عيش العمر للزهره مقتل

كل فاطمي وكل فاطمية
لازم يعيش الحب اذيه
ما ضاگت الراحه بعمرها
جي تشبة الزهره رقية

ليلة الجمعه سافر..وي رحلة الجروح
في كربلاء وحيده..ام الحسن تنوح
ابجي لبجيها ابجي..وخل موتك الطموح

المقتول بدمعج ربحان
الما باجي لفاطم خسران
_____
حاول تحب بصدك حاول
واطلب  دمع من جود كافل
جي عين للزهره للحزينة
بعيونه سهمه ابوفاضل

ابلا جفه بس تارس ادينه
كافل على الزهره بجينة
وفاطمة من تحضر عزيه
بجفه تجي وتمسح علينه

تحرس خدمهه فاطم..بحامي خيم صريع
جوه العباية جابت..جف هاشمي قطيع
بجف كافل المخيم..تمسح على الجميع

وجفينه جفوف الرحمّن
الما باجي لفاطم خسران
_____
يا گلبي من عدهم اتشكر
كلما مسحت بخشب منبر
بعز العمه وعز ضيعة الناس
الزهره مختارني احضر

بيا فاطمة شكد ناس راحت
بيا فاطمة شكد ناس طاحت
وما شطبت اسمي من سجلها
مولاتي بسمي اعليه صاحت

بنفس العزه التحضره..صرت احضر العزاء
الزهره باسمي نادت..وأاذنتلي بالبكاء
مره ابجي يم ضلعها..ومره ابجي كربلاء

من بابج للطف نيران
الما باجي لفاطم خسران
__

https://youtu.be/RtWg6YixoEY?si=MB6qADZR2vZ1nb0c

من شرف الخدمة
الرادود محمد حسين مطرود
الفصيح سيد وائل الهندي
الشعبي مصطفى صادق

بصوت الحبيب

مولاي يا ابا عبد الله دخيلك🤲

شيحييها..روحي لوما حزنه ينبث بيها
حجر گلبي ودمعه مر اعليها
وخضّرت بيه..حُسين

امن الصحره..البيه خلص گلبي ابن الزهره
امن التجّلد للكمد والحسره
وصارت النيه..حُسين

حسين رحمه وحسين خدمة
شفيع المذنبين
اليجذبه برحمته يلينه
بنعاوي ام البنين
ويأمنه بعين ابوفاضل
حصن حبه الحصين

عطش حاوط گلبي بكل امجان
وسقاني الرحمه الضامي العطشان
رضيع وضگته بدر امي حسين
ورضيعة الفزز گلبي الذبلان
_____
عشناهه..أنه وامي اقرايته نهواهه
ولوّن اهجر يعني ضاع ارباهه
يا رضاة امي..حُسين

ساگينه..ومن ثواب اقرايته امغذينه
فاضل الطينه يحن للطينه
وانكتب همي..حُسين

حسين اه وحسين ونوح
وحسين دُر الحلال
صنع لاهل البچي عالم
مواطن للدلال
وضهر عاشر صنع بيده
وسادة امن الرمال

اريد بدمعي اتعايش وياه
تمدد عالرمضه وصحره اشفاه
يدير بطرف اعيونه المجروح
يريد يصد اعياله بيا اه
___
مرسومة..كل غريب نشوفه نذكر يومة
همنا كله يهون يم اهمومه
والحزن ذكره..حُسين

هنياله..العينه لمصابه بقت همالة
العنده همه والجزع اعماله
ونيته الزهره..حُسين

حسين هم وحسين حسره
وحسين أم وذبيح
تدور ناعي يسعدها
غريب ابني تصيح
المربيته بحضاني
على الرمله طريح

بعد كل هم  ما عندي بهالروح
اريدن اسعد ام المذبوح
انوح وياهه امن اتنوح حسين
عسى أن اسعدها بهذا النوح
_____
مكسورة..الاگلوب الشفته المفطورة
دم گلبنه من جمر عاشورة
احرورة اهل الحب..حُسين

مأمونه..راحم الدنيا ابيابي عيونه
وماكو أمان لطفلته المصيونه
حبك ايغرب..حُسين

حسين دمعه وحسين جمره
وحسين حب وسلام
وسلامة اتسلب وحرگوا
على اطفاله الخيام
البرائة بكربله ركضت
على جمر الحُطام

اعيشن كون اويه امصابه الحال
اعيشن الباقي امن سنيني اهوال
ضعن شايل من احضان حسين
لخرابة وهيمة وهزّل واحبال

في مثل هذه الايام مولاتي العليلة
تنتضر رجوع ضعن حبيبها الحُسين الى المدينة


من كالوا ضعنكم بالدرب جاي
كعدت اعللدرب احسب بالضعون
باب البيت عفته بضهري مفتوح
وحضرت المكان البي تكعدون

اسولف ويه كلبي وانه اتنطر
بيا لهفه يصدلي من يجي الاكبر
وكبران الطفل يرجعلي اتصور

رحت امسح خشبة كاروكه..وعطرته وحطيت اوساده
هنه اشجم يوم شجم ساعه..وعامر يرجع بيت الساده
_
وشكو حاجة تحبها اختي رقية
اباب الدار بيدي حضرتها
طفله بعمري تتعب من سفرها
وراحتها بنزلها يم اختها

خذتني ام البنين ولزمت ايدية
وكالتلي الضعن هسه على جيه
ومن الفرحه ما عانني رجليه

واتذكر خيّاله اخواني..حاطو عماتي وهودجهن
ويا هسه ترد الخيّاله..الجانت تمشي النوك بسدهن
_
بله خيّاله رد ضعن الغياره
والاوجوه المشن مو هنه هنه
وحته النوك مو نوك الهواشم
ما جانن هزايل نوك اهلنه

وين حسين ابوي الطوله خيمتنه
وين الراية ذيج الفوك عمتنه
بيا هزله التجي الكه رقيتنه....؟؟

لا رايتنه ولا حاملها..ولا طفلتنه الجوه الرايه
وين حسين ووين الاكبر..مو كال ارجع وانطه حجايه
__
حلم ريته حلم مو ضعن الاحباب
ابد هاي العبي لا مو عبينه
راحن بس سواد ايخجل الليل
حمر يا وسفه ردّن للمدينة

اسئل بلكت تكلولي متحلمه
ساعات ويرد حسينج وزلمه
بدورة وجهه تخنك طفلته النسمه

مو يدري امحضرلته اثيابه..وبيدي امعطرتله امصلايه
يا فرحة الما تمت بوية..واول فرحة تصير قرايه

https://t.me/a0fhf

#نعي
رجوع الضعن
يا حسين 😭😭


بحبالي رديت
لفيتك من سبي وبحبالي رديت
لگبرك تعنيت
على ريحة علي لگبرك تعنيت
امشينه للبيت
يبن امي الجبتنه امشينه للبيت
________
ماشاني سلاب
اجيت اعتذر جي ماشاني سلاب
مو جية اعتاب
جية مستحه مو جية اعتاب
ما ضلت احباب
شيردني الدارنه وما ضلت احباب
_________
لو ونه لو ويل
گضيّت الدرب لو ونه لو ويل
ما نايمة الليل
تشهد روسكم ما نايمه الليل
من ركضة الخيل
بعدني بخوفتي من ركضة الخيل
________
امولحه العين
من كد البواچي امولحه العين
والحال موزين
اريد توچه جيت الحال موزين
اتوچه يحسين
يبن امي عليك اتوچه يحسين
_______
تچوني يطياب
جيت بهزل تچوني يطياب
بالغيره شرناب
اخوة زينب وبالغيره شرناب
تثنون الارجاب
اذبن روحي لو تنثون الارجاب

مولاتي السيدة زينب صلوات الله


بكلشي اولام اريد وياك..حته امصابي كون اولام
مثل ما سيف ذباحك..ذبح صمت العقيلة الشام
يالخدك بقه برمله..على تراب الخراب انام

نشّف كلشي بينه العطش سلبّنه
وما نشف الخوه ولا حليب امنه
ويهضمنه الفكد يحسين يهضمنه

خوتنه اكبر من ذبح..واكبر امن اخيام ونار
لمصابك بگلبي جمر..بگلب الفواجد ما مار
____
اريد ابجي اريد ابجي..بعد بيه لمصابك نار
لا انه المتت يحسين..ولا انه النسيت الصار
ما ريدن اقصر وياك..سبيي وحبلي مو اعذار


بعز هوسة الشام اتذكرك وانعه
واصيح احااه اخوي الما سلم ضلعه
مو انته اليموت ومحد يشيعه

الميت الما فوكه بجي..معناها وحده امن اثنين
لوماله اهل لو منفرد..واثنينهن مو بحسين
___
اواسي امصابك بكلهن..واريدن موتتي تواسيك
ودفنتي لخاطرك وحشه..مثل ما وحشه دفنو بيك
وماريدن بجي فوكاي..فوگك ما لحكت ابجيك

وكت ما خلة زينب تنهضم فوگاك
اخذ حرگة اخت ما لحكت تنعاك
من تالي بأشاير حجيي انه وياك

يالبربعينك عاودت..والراس رديته وياي
لو لاربعيني تعتني..شتردلي والراح هواي
____
أنه الما رايده التشييع..واسباب الهضيمه هواي
ما لحكت اشيعك ليش..وما لحكت اشربك ماي
محد عوناني اعليك..محد كال اخيتك هاي

ليش اعتب وادور دمعة اخواني
حسين وماكو اخوته انذبح وحداني
موت الوحدك يا گلبي لتاني

ما دامك بغربة متت..صار الغريبة اسم ام اعون
وبلسانك اسمي وبس بعد..غيرك لسن خيسكتون
____

#رجوع_الضعن

اويلاه اويلاه رد الضعن
اويلاه اويلاه رد الضعن
_______
ردن مداليل ام حسن..يتلفتن يتلفتن..محرومات
ردن غريبات بضعن..جلمة هلا شو ما لگن..مهضومات

راجعه امن الضيم زينب راجعه
طالعه بنص شمس جانت طالعه
اربعين اصباح مر عليها
وجلمه الخوية ابد ما سامعه

اويلاه اويلاه رد الضعن
اويلاه اويلاه رد الضعن
__________
نوخ الحادي بكربلا..جا وين شيخ العايله..والدهن
گلب المداليل انضهد..واحد يسد امجانه ابد..ما عدهن

مشت منك زينبك بس مايله
وهسه مالت كل علاوي العايلة
الجانت بنص الخيم كعدتها
للخرابه شلون صارت شايله

اويلاه اويلاه رد الضعن
اويلاه اويلاه رد الضعن
__________
ندري المتن يسند متن..بس شامهن گلهن وأن..شيسّندن
ردن جرح ساند جرح..وبجفوفهن روس الذبح..من ردّن

الروس ردت بالنعاوي الحاره
امكابره اتصبر دموع امكابره
شيّعن راس الحسين لگبره
اجنازه بس راس ورمح ما صايره

اويلاه اويلاه رد الضعن
اويلاه اويلاه رد الضعن
__________
الردنله مو مثل المشن..لازارن اولا وادعن..موتاهن
غطاهن اتراب اللحد..العمهن گبل مثل الورد..يرعاهن

هاي هدوة موت لمن يهدن
نامن ووجه الصبح ما كعدّن
بلا اموادع ماتن ابنياته
الضعن رد لحسين بس ما ردن

اويلاه اويلاه رد الضعن
اويلاه اويلاه رد الضعن

اللهم عجّل لوليك الفرج

#يازهراء
رجوع الضعن الشريف
بعد 40 يوم من الفراق

زلم الضعن حاچونه..تنامون تتلگونه...؟؟
انه ادري ليرد لاهله..يلگاهم يتانونه

جايبه الروس بلهفتي
وگمت ادور ملگه منكم
صيحة المستحية اصيح
لا تفززكم اختكم
ادرو متوا وانذبحتوا
بس أمل عندي بلبنكم

الينولي ويحشم اخوته
من يصيّح يذبحه صوته
گوه احشمكم يخوتي
_
بآخر امل ضلينه..تفكون حبل ايدينه
ولكربله تحدونه..ونرجع مثل ما جينه

نرجع بريشات كافل
ورايته تكسر علينه
مثل ما جينه امن اهلنه
نرجع ابلا حبل ادينه
صعبه ينكلي غريبة
ابيت اخوي البالمدينه

حته لو ذب حبل اديه
فكدك يضل جرحه بيه
فگدك اخشن من حبلهم
____
مشتاكه بس خجلانه..رديتلك حيرانه
يحسبنه خاف الكافل..وماكو بنات اخوانه

ابلايه خولة ولا رقية
ولا صفيه ولا شريفه
سكته ناحن سكته ماتن
النشغه تكتلها العفيفه
شجره ضعني ووكتي مايل
والسبي اعلن خريفه

زينب وردت كسيره
جان موتي ديره ديره
وجيتي الكم هاي موته
_
جية العتب مو لوني..الجاباني شوك عيوني
مشتاكه واطلب منكم..عن طلعتي تعذروني

العذر منكم يا غياره
عن طلعتي ابلا حماكم
عن شكو نسمه غريبة
طبت لريتي بجفاكم
والوراكم عمر تمشي
نامت بخربه وراكم

ابرولي ذمتي يا هواشم
عرفوا اسماء الفواطم
وغربة كامت تحجي اسمهن
___
الروس ندفن بيهن..ودمعاتي تجري اعليهن
يم يا جرح من نحرك..شيباتك نخليهن

انعه وافرح جبت راسك
يعني دفنك كمل هسه
وساعت الانضر جراحك
فرحي مثل الموت احسه
مغسله راسك يا حبيبي
بدمع عيني الما احبسه

تراب كبرك راح اهيله
وادفن العشره الطويلة
اموادع اجروح وسبيه

اللهم عجّل لوليك الفرج

#موشح
#لمولاتنا_أم_كلثوم عليها السلام

بكثر ما شافت مصاب اعيونهه
تغمّض ام كلثوم گوه جفونهه
__
گوه تغمض عينها الشافت عذاب
شتنسه ذبح خوانها اوليد الرباب
سنة ما عاشت عگب طف المصاب

شلون تنسه الصار وي ضعونهه
تغمض ام كلثوم گوه جفونهه
__
مال وي كلثوم حيدر هالوكت
الليلة صوت ادموعها بسكته ايخفت
الليلة نعي حسين ينكص نوح اخت

الليلة ماكو اخوان ويودعونهه
تغمّض ام كلثوم گوه جفونهه
___
هاي ليلتها الاخيره ويا ختام
اتجبلت وتودي لحسين السلام
خوتك كتلتني ما كاتلني شام

وحِگ حليب امي وملح ماعونها
تغمض ام كلثوم گوه جفونهه
____
اه صاحت بس ذبح محسوبه الاه
بين ازقة الشام واسطوحه وهواه
هنا ضعنها انذبح سكته بمستحاه

اه صاحت وانخطف كل لونهه
تغمض ام كلثوم گوه جفونهه
___
وندري عالخوان كل عين الخوات
وين الاجفوف الندية الراويات
ما مغمضه اختك يكافل بالممات

امفتشه ماتت بلكي يحضر عونهه
تغمض ام كلثوم گوه جفونهه
___
اجنازه الغربه غريبة ابلايه لون
بلكي لأم كلثوم هالليلة تجون
بلكي تطوون الطريج وتعتنون

وبلجن اتنزلونها بمدفونها
تغمض ام كلثوم گوه جفونهه

https://youtu.be/E_DBpaNI_-c?si=1SwojxDktTSXDWOD

الى رقة الخيام
مولاتنا رقية روحي فداها

بوية..عدلة وعشت بجروحي المنية
بوية..احجاية غريبة صعبه عليه
بوية..ومن عدها اصعب جلمة سبيه
بوية..جلمة حبيبة تلوك لرقية

صوتك كبل يجيني..تكلي رقية وافرح
وجي باسمي غربة تحجي..ضل اسمي بيه يجرح

بسمانه..صاحونه..ومو صوتكم جا صوتكم وين
ذبلانه..عطشانه..صيحلي بسمي واروة يحسين
ارد ابجي..ومحرومه..جي عصبولي بالسبي العين
((يا بوية يا بوية..عطشانه واتنطرلي عطشان))
_
بوية..شام النوايب عذبنه دربه
بوية..الماي امن اديكم جنه نشربة
بوية..عمنا الحنين بأيده يصبه
بوية..هسه السكه شو لازمته غربة

من جف حرِك خيمنه..ما ترهم السقاية
جود الكفاله وينه..خيصب علينه مايه

ما اشرب..ما اشرب..اله يحطني بحضنه عباس
وما غمض..يا بوية..رغم التعب وجروح الاحساس
ما نامن..ما اغفه..لو جوه ايدك لو على الراس
_
بوية..احجي ودمعتي بعيني الذبوله
بوية..جرحي جبير بنوحي اكوله
بوية..بيه البرائة وبيك الرجولة
بوية..بطاري الخرابه تموت الطفوله

ذبح الطفوله يفرق..والمذبح الخرابة
كل البرائة ماتت..من نمنه عالترابه

والطفله..التعرفها..كبرانه من الشوگ والويل
من تمشي..يروعوها..ومرعوبه تبقه من يجي الليل
حاطوها..بخياله..ومو لال هاشم جانت الخيل
__
بوية..موعد عطاشى عدنا يسلوه
بوية..موعد حنان وتاليته قسوه
بوية..اعظم طفوله واعظم ابوّه
بوية..موته اعلراسك يحسيني تسوه

اخر خرابه النه..واتوسد بحنانك
ميت ملك عليهم..بطشت الذهب مكانك

ما همّن..بالغربة..ولا مدفنّي يم قصر الاجناب
يا اهلا..يا اهلا..بالموته هاي الوي الاحباب
واليسئل..عن موتي..يكلوله راس حسين الاسباب
___

https://youtu.be/Jb9CzfzSWks?si=yimJQ4D1L7B4oa8v

https://youtu.be/qjLfYBOEpdQ?si=TxN8B61KR0pbiOr9

https://youtu.be/EIHtCR59C5U?si=q5Uah0ZddvwNlaYr