محمد التاج - Mohamed Eltag @mohamedeltag Channel on Telegram

محمد التاج - Mohamed Eltag

@mohamedeltag

رجل أعمال مهندس ومؤسس شركة ماسف تكنولوجي وسبيد تكنولوجي ومركز لانتيرن للتدريب.

متخصص في ريادة الأعمال والتسويق وإدارة الشركات.

محمد التاج - Mohamed Eltag (Arabic)

محمد التاج هو قناة تيليجرام تابعة للمدون والمؤثر الرقمي محمد التاج، حيث يقدم المحتوى عن السفر والمغامرات، الثقافات المختلفة، ونصائح السفر. يمكن للمتابعين الاستمتاع بمشاهدة مقاطع الفيديو والصور الخاصة برحلاته وتجاربه الفريدة حول العالم. يعد محمد التاج من أبرز المؤثرين الرقميين في مجال السفر والثقافة، مما يجعل تجربته ومشاركاته مثيرة وشيقة للمتابعين. إذا كنت تبحث عن قناة تليجرام تقدم محتوى ممتع ومفيد حول السفر والمغامرات، فقناة محمد التاج - Mohamed Eltag هي الخيار الأمثل لك.

محمد التاج - Mohamed Eltag

26 Jan, 18:18

*بزنس برودكاست "607"*
عشان تقنع العميل يشتري منك وانت بزنس صغير لازم تقدم تضحية أكتر من باقي السوق ..

ي ام تدي سعر أقل .. أو خدمة وشغل أكتر .. أو تكون الأسرع

المهم تكون مغري للعميل إنه يجرب يتعامل معاك لحد تكسب ثقته ويعرف إنك رهيب.

وبمرور الزمن لمن تتعرف وتبدأ الطلبات تكتر عندك ساعتها ممكن تبدأ ترفع سعرك وتاخد راحتك في هامش الربح لحد توصل درجة تسيطر على نسبة محترمة من السوق بتاعك.
تحياتي 😁💰
*م.محمد التاج* 
https://wa.me/249117022225
173
محمد التاج - Mohamed Eltag

24 Jan, 10:54

*بزنس برودكاست "606"*
أرجع بتفكيرك 10 سنوات من الليلة لسنة 2015 ..
حتلقا وقتها كان عندك مشاكل إنت كنت معتبرها في وقتها نهاية العالم .. مستاء وحاسي إنك ماحتقدر تعديها.

وتمر الأيام وتعديها فعلا وتبقا من خبرات الماضي وكأنها موقف عابر وإنتهى.

بنفس الطريقة دي أرجع عاين لكل شيء صعب بيواجهك حالياً .. حتلقا إنه بطريقة أو بأخرى مقدرو عليه وممكن تجاوزه وحيجي عليه زمن يعدي زي غيره.

فماتخلي قلقك من مشكلة بتواجهك حالياً يمنعك تفكر وتشتغل وتنتج وتطور نفسك.
تحياتي 😁💰
*م.محمد التاج* 
https://wa.me/249117022225
270
محمد التاج - Mohamed Eltag

20 Jan, 12:26

*بزنس برودكاست "605"*
الناس دايما في إنتظار لحظة سحرية ..

لحظة إنه تجي حاجة خارقة تغير حياتك للأفضل فجأة ..
لحظة يجي زول يقول ليك انت رهيب ومميز 😍 هاك المليار دولار دي ..
لحظة تفوز بجائزة أو تجيك وظيفة في شركة عالمية بمرتب وعربية وشقة ..
لحظة يجيك ممول أو مستثمر يديك ملايين لمشروعك الرهيب ..

بس كل دا في الغالب ما بيحصل ❌ .. وبيفضل أحلام .. والناس بيقضو عمرهم في إنتظار لا ينتهي.
وبالمقابل في فئة قليلة ديل بيشتغلو شغل على قدرهم .. ويبدو حبة حبة يتحركو لحد النجاحات الصغيرة تتراكم عندهم ويوصلو لمستوى رهيب .. خليك دايما مع الفئة دي
تحياتي 😁💰
*م.محمد التاج* 
https://wa.me/249117022225
519
محمد التاج - Mohamed Eltag

18 Jan, 09:46

*بزنس برودكاست "604"*
(ما الفقر إلا مرض العجز) ..
المقولة دي معناه أن الفقر غالباً سببه عجز الانسان وكسله ..

كسله عن المعافرة .. عجزه عن الصبر على ضغط الشغل .. كسله عن مقاومة الراحة .. عجزه عن سيطرته على رغباته

وحاجات كتيرة بتبقا سبب للإنسان في فقره

وضروري تفرز بين الفقر والفلس .. الفقر هو العقلية السامة المتكاسلة البتخلي صاحبها عايش في وضع أسوأ .. والفلس هو الحالة المادية البيعيشها الشخص المفروضة عليه من الظروف الحوله.

فكم من مفلس غير فقر ..
تحياتي 😁💰
*م.محمد التاج* 
https://wa.me/249117022225
485
محمد التاج - Mohamed Eltag

15 Jan, 10:01

*بزنس برودكاست "603"*
تخيل لو كان المنافس بتاعك ماعنده مبادئ تماما .. لدرجة إنه حول للمنافسة بأساليب غير أخلاقية.

حيكون قدامك خيارين:
- لو بديت ترد الهجوم بنفس أسلوبه حتضر البراند بتاعك.
- لو بديت تتجاهل حتخليه يطلع شائعات عن مشروعك.

بس في خيار تالت .. في البوست دا حتلقا الطريقة الصحيحة للتعامل مع نوعية المنافس دا:
https://www.facebook.com/share/p/19yM7dv8Yi/
539
محمد التاج - Mohamed Eltag

15 Jan, 10:01

*بزنس برودكاست "602"*
مرة سمعت واحد قال (لو كان عندي النضج الحالياً عندي دا ماكان وقعت في المشكلة الحصلت لي زمان)

الحقيقة إنه هو عنده الخبرة والنضج الحالي لانو وقع في المشكلة الحصلت في الماضي ..

وبالتالي إنت في وضعك الحالي دا تعتبر أكتر خبرة ونضج من قبل كدا .. بشرط طبعا انك تكون إتعلمت الدرس من الأخطاء العملتها في حياتك وفي شغلك وأثرت عليك سلباً.
تحياتي 😁💰
*م.محمد التاج* 
481
محمد التاج - Mohamed Eltag

10 Jan, 09:40

*بزنس برودكاست "601"*
العقد بمحامي افضل من العقد الورقي ..
والعقد الورقي افضل من النص المكتوب على ورقة ..
والنص المكتوب أفضل من الكلام ساي ..

بقدر الإمكان لمن تدخل في إتفاق (ايا كان هو شنو) حاول أمشي بالحاجة المضمونة الرسمية لأنك مابتعرف تغير الظروف والنفوس.

وأضعف الإيمان في الاتفاق هو إنك تكتبه على ورقة أو في الشات بينك وبين الطرف التاني.
لأنه (الما إتكتب .. كأنه ما إتقال).
تحياتي 😁💰
*م.محمد التاج* 
https://wa.me/249117022225
590
محمد التاج - Mohamed Eltag

07 Jan, 09:47

*بزنس برودكاست "600"*
لمن تمسك قروش في يدك حتعرف إنه بالجد الفكرة أهم من رأس المال ..
لأنه بدون فكرة ماحتعرف تودي رأسمالك وين.

وحتعرف أن تنفيذ المشروع في ألف طريقة ممكن يتم بيها بدون الحاجة لراسمال.

رأس المال موجود بكترة .. لو ماعندك فهو عند الناس حولك .. بس مافي شخص بيستثمر في فكرة خيالية.

إنت نفذ مشروعك وأنجح في إنك تدخل أرباح وبعدها الناس براهم حيجيبو ليك قروشهم عشان يستثمرو معاك .. وغالباً ساعتها إنت حترفض.
تحياتي 😁💰
*م.محمد التاج* 
https://wa.me/249117022225
663
محمد التاج - Mohamed Eltag

04 Jan, 12:42

*بزنس برودكاست "599"*
من أكبر المشاكل البتمنع نجاح المشروع هو (الإستسلام المبكر) ..

إنه صاحب المشروع يستعجل النتائج ولو ماجات بنفس توقعاته يوقف المشروع.

كأن المشروع دا مكنة صراف آلي حيدخل فيها بطاقة وتمرق القروش بالكوم.

كل مشروع عنده فترة نمو وتطور بياخدها من الملاليم لحد الملايين .. مافي مشروع سحري بيجيب أرباحه فجأة.
تحياتي 😁💰
*م.محمد التاج* 
https://wa.me/249117022225
667
محمد التاج - Mohamed Eltag

03 Jan, 11:09

*بزنس برودكاست "598"*
*المشهور بيبيع أكتر من الشاطر*
مهما كنت شاطر فماحتقدر تربح مالم تبقا معروف للزباين .. لانه لازم شخص يثق فيك عشان يدفع قروش وياخد منك حاجة.

وبالتالي بقا واجب عليك إنك تجذب الناس لحد تتعرف وإسمك يبقا ليه براند إيجابي .. بعدها حتقدر تاخد راحتك في تشكيل المنتج والتسعير.

أما في فترة إنك غير مشهور فمحتاج تعمل محتوى باستمرار وتقدم ميزة ماعند المنافسين (سعر أقل أو خدمة أسرع) لحد تشتهر.
تحياتي 😁💰
*م.محمد التاج* 
https://wa.me/249117022225
613
محمد التاج - Mohamed Eltag

01 Jan, 15:07

*بزنس برودكاست "597"*
*قبل تستقيل من شغلك بالنهار .. إشتغل بالليل*

مرات بيكون عندك وظيفة أو شغل متعب جدا وغالباً مابيجيب ليك قروش كافية ..

وكل فترة بيجي في بالك إنك تطلع وتستقيل أو تخلي الشغل وتعمل حاجة تساعدك تبني ثروة محترمة.

القصة هنا إنه لازم قبل تطلع من وظيفتك أو شغلك المتعب لازم تقوم مشروعك وتخليه يبدأ يدور ويدخل أرباح حتى بعدها تخلي شغلك القديم وتركز معاه.
لأن كل مشروع بياخد زمن لحد ينمو ويبدا يديك ثمار.
تحياتي 😁💰
*م.محمد التاج* 
https://wa.me/249117022225
647
محمد التاج - Mohamed Eltag

28 Dec, 09:10

*بزنس برودكاست "596"*
مادايما دارسة الجدوى بتكون بالورقة والقلم ..
أصلا الهدف من دراسة الجدوى معرفة إحتمالية نجاح المشروع أو فشله قبل تبدأ فيه ..

فمرات بدل دراسة الجدوى بالحسابات ممكن تعمل نموذج تجريبي من المشروع (Pilot) بتكلفة هامشية .. وتجرب المنتج وتديه ناس مقربين منك يجربوه وتحاول تبيعه.

وبعد التجربة العملية تطلع بقرار اذا حتواصل في المشروع ولا تلغي الفكرة.
تحياتي 😁💰
*م.محمد التاج* 
https://wa.me/249117022225
695
محمد التاج - Mohamed Eltag

27 Dec, 13:46

*بزنس برودكاست "595"*
صاحب البزنس دايما عنده نظرة خاصة بيشوف بيها الحاجات من حوله.

ممكن من قصة يفكر في طريقة تسويق جديدة.
ممكن مشاكل الناس تلهمه لفكرة مشروع.
ممكن موقف يحصل قدامه يخليه يغير طريقة تفكيره وشغله.
ممكن جملة يسمعها تصلح مساره وتخليه يصنع حاجة قمة في الإبداع.

*صاحب الفكرة له في كل موقف عبرة*
عشان كدا كصاحب بزنس دايما حيكون عندك نظرة مختلفة عن باقي الناس.
تحياتي 😁💰
*م.محمد التاج* 
https://wa.me/249117022225
803
محمد التاج - Mohamed Eltag

19 Dec, 17:21

الحابي يعلن للمشروع بتاعه أو يعرض خدماته للعملاء يدخل في البوست دا

https://www.facebook.com/share/p/19bsWbWwFZ/
1,130
محمد التاج - Mohamed Eltag

18 Dec, 13:59

*بزنس برودكاست "594"*
في حاجة إسمها (التكاليف الخفية) .. دي التكاليف البتدفعها بدون تنتبه ..
مثلا ممكن تكون إشتريت بضاعة ب50 وبعتها 55 .. كدا ممكن كدا حتعتبر نفسك ربحان 5.

لكن وانت بتجيب البضاعة دفعت في المواصلات .. وأشتريت أكل ليك .. ودفعت تكلفة تغليف.

كدا (أسمياً إنت رابح) .. بس (فعلياً إنت خسران) .. لان التكاليف المخفية ماحسبتها وكلفتك.

عشان كدا وإنت بتخت الأسعار لازم تخت في بالك "كلللل" التكاليف عشان ما تتفاجأ بالخسارة.
تحياتي 😁💰
*م.محمد التاج* 
https://wa.me/249117022225
1,123
محمد التاج - Mohamed Eltag

16 Dec, 16:38

*بزنس برودكاست "593"*
في البزنس في تضحيات بتقوم بيها وأثرها مابيكون واضح للجمهور ..

زي قرار إنك تخصم من احتياجاتك الشخصية عشان تعيد تدوير ارباحك في المشروع.

زي إنك تصرف على ناس بيتكم بدل تجيب حاجات مبهرة تبين بيها نجاح البزنس حقك.

زي إنك تقرر تقدم من أرباحك صدقات بدل تعمل بيها مسابقة قدام الجماهير.

وغيرها قرارات كتيرة قد مايعلم بيها الناس لكن يكفي إن ربك يعلم بيها وبترجع تلقا أثرها في مشروعك وحياتك .. حتى لو المجتمع شايف غير كدا.
تحياتي 😁💰
*م.محمد التاج* 
https://wa.me/249117022225
822
محمد التاج - Mohamed Eltag

08 Dec, 03:52

*بزنس برودكاست "592"*
في قصة تذكر عن إنه اتنين موظفين مبيعات شغالين في مصنع احذية مشو زيارة لمنطقة في قرية .. فلقو أنهم ما بيلبسو أحذية ولا بيهتمو بشراءها ..
فواحد رجع للمدير قال ليه (نحنا ماعندنا فرصة بيع مع الناس ديل لانهم مامهتمين بالمنتج❌)

والتاني رجع للمدير قال ليه (عندنا فرصة حلو لو أقنعنا الناس ديل يشترو الجزم مننا حنكسب دهب✅)

الإتنين كلامهم عن نفس القرية .. بس كل واحد بيشوف من زاوية مختلفة .. وبالتالي النتيجة بعدين حتكون مختلفة من ناحية المكسب.

البيميز البزنس مان في اي حتة هو طريقته البيفكر بيها .. العقبات البتوقف الناس (العاديين) بالنسبه ليه بتبقا فرصة مكسب.
عشان كدا بيكون دايما سابق الناس بخطوة.
تحياتي 😁💰
*م.محمد التاج* 
https://wa.me/249117022225
979
محمد التاج - Mohamed Eltag

07 Dec, 04:14

*بزنس برودكاست "591"*
في ناس بيكونو مخنوقين من وظيفة غير مرضية .. او مشروع ما مربح كتير .. أو دراسة ضاغطة .. وغيره.

لمن تكون في وضع زي دا أسأل نفسك (هل عندك خيار أفضل؟) وظيفة أو مشروع تاني أو شي تعمله يديك نتيجة أفضل؟
لو قلت أيوا .. بشجعك إنك تجربه
لو قالت لأ .. يبقا ساعتها مفترض تصبر على الوضع الحالي لحد تتسهل ليك فرصة أفضل أو شغلك زاتو يتحسن أكتر.

الكلام دا عشان ترتب افكارك وماتحرق نفسك بكترة التفكير والتسخط من الوضع الإنت فيه بدون يكون في يدك خطوة فعلية.
تحياتي 😁💰
*م.محمد التاج* 
https://wa.me/249117022225
823
محمد التاج - Mohamed Eltag

03 Dec, 13:50

*بزنس برودكاست "590"*
الإحتفال المبكر بالنجاح بيؤدي لإنه ينقلب لفشل ..

بلاقي ناس كتار بعد مشروعه يبدأ يحقق مبيعات صغيرة .. أو هو بدأ يشتهر بين الناس .. ساعتها يبدأ يحتفل ويصرف أو شخصيته تتغير ويقلل من المجهود والإتقان في الشغل.
ويفضل يحكي انه تعب كتير وخلاص وصل لحلمه وهاك يا بوستات وفيديوهات ..

النتيجة إنه ماحيحقق نجاح كبير يذكر .. وغالباً حيخسر بمرور الزمن.

النجاح عايز إلتزام بنفس الإصرار البديت بيه شغلك ومهما أنجزت تفضل متحمس لانجازات أكتر وإحتفالات أقل.
تحياتي 😁💰
*م.محمد التاج* 
https://wa.me/249117022225
1,063
محمد التاج - Mohamed Eltag

02 Dec, 17:24

في البوست دا وضحت ليك خوارزميات الواتساب الاتغيرت اليومين ديل ..
https://www.facebook.com/share/p/1Aszgkfjrj/
773
محمد التاج - Mohamed Eltag

01 Dec, 03:31

*بزنس برودكاست "589"*
شركات السيارات الفاخرة دايما أسعارها بتكون خرافية جدا .. فلو إتعرضت في معارض السيارات العادية دايما حيكون أسعارها خرافية تخلع الزباين.

فعملو حركة حلوة .. بقو يعرضو السيارات الفاخرة في معارض الطيارات الخاصة ..فلمن يجي واحد رأسمالي عايز يشتري طيارة خاصة حيكون سعر السيارة الفاخرة مجرد فكة ساي فيشتريها عادي بدون نقاش.

ومن هنا حتتعلم أن مكان عرضك للمنتج بيأثر في تقبل الناس لسعر منتجك البتقدمه.
تحياتي 😁💰
*م.محمد التاج* 
https://wa.me/249117022225
945
محمد التاج - Mohamed Eltag

28 Nov, 08:13

*بزنس برودكاست "586"*
في نوع من الناس تفكيرهم (يا أبيض يا أسود .. واحد أو صفر)

فلمن تقول ليه (التعليم مهم) بيقول ليك (لكن التعليم ماكل شي ولازم الواحد يعمل قروش) .. وكأن الوحد في حياته يا يتعلم أو يلم قروش ..

لو قلت ليه (التسويق مهم) حيقول ليك (لكن التمويل مهم برضو) .. وهكذا

ولو قلت ليه مثال بيركز عليه بصورة "حرفية" بحته ويتغاضى عن الحكمة من التشبيه.

عشان تتجنب النوع دا من التفكير لازم تذكر نفسك بالوسطية ..
وإتعلم أجمع بين الأبيض والأسود .. وأمشي بمبدأ: (وابتغ فيما آتاك الله الدار الآخرة ولا تنس نصيبك من الدنيا).
تحياتي 😁💰
*م.محمد التاج* 
https://wa.me/249117022225
940
محمد التاج - Mohamed Eltag

27 Nov, 04:19

*بزنس برودكاست "585"*
إذا عزمت فتوكل ..
لو في صفة واحدة حأوصي بيها شخص في شغل حتكون (الإنضباط)..

يعني يكون عنده من القوة إنه لو خطط لحاجة يصر على تنفيذها مهما حس بالكسل أو التسويف أو فقدان الحماس.

وينجز برغم الظروف البتعترض الطريق .. الصفة دي لمن تبقا في الواحد بيلقا نفسه عبر شارع طويل بثبات .. بعكس المتراخي الماقادر يضبط نفسه ويجبرها على الشغل.

لو كل حاجة تتعبك بتخليها ماحتنجح في دينك ولا دنياك.
تحياتي 😁💰
*م.محمد التاج* 
https://wa.me/249117022225
751
محمد التاج - Mohamed Eltag

26 Nov, 02:49

*بزنس برودكاست "584"*
أعطيني السمكة عديل ..
كلنا بنعرف المثل *(لا تعطني السمكة ولكن علمني كيف أصطاد)* .. بيوريك أهمية تعلم المهاراة بدلا عن إنك تنسخ الحاجة زي ماهي جاهزة بدون تفكير.

لكن للأسف في ناس باحثين عن سمك فقط .. دايما أسئلته بتكون نوعية (أكتب لي بوست رهيب .. أدوني فكرة تجيب ملايين .. أدوني إستثمار مافيه مخاطرة .. أدوني طريقة تسويق تلم الزباين ..الخ)

الطريقة دي غلط لأن صاحبها بيفتش عن شيء جاهز سريع من طرف.
والصح دايما إنك تبحت طريقة عمل الحاجة العايزها عشان تعرف كيف تظبطها على ظروفك الخاصة.
فماتبحث عن السمكة لأنك حتفضل متسول دايما ..
تحياتي 😁💰
*م.محمد التاج* 
836
محمد التاج - Mohamed Eltag

20 Nov, 06:23

*بزنس برودكاست "583"*
*(لا تكسب عداوات) ..*
دايما بنقول في البزنس (مابتقدر تبيع لكل الناس) .. دايما في فئة مستهدفة محددة هي الحتقبل خدمتك أو منتجك.

لكن .. دا لا يعني بصورة راديكالية إنه تصادم الفئات غير المهتمة ببزنسك .. ولا يعني إنك تخلق عداوات مع جهات أخرى.

وبرغم الصدامات الحتمية البتجي من المنافسة أو من الفئآت المابتحب منتجك أو خدمتك فلازم بقدر الإمكان تتعامل بدبلوماسية.

لأن كسب الود أفضل من الصدام .. والتحييد أفضل من العداء.
تحياتي 😁💰
*م.محمد التاج* 
https://wa.me/249117022225
1,165
محمد التاج - Mohamed Eltag

15 Nov, 03:02

*بزنس برودكاست "582"*
في بداية مشروعك حتكون مامعروف .. عشان كدا لازم تكون في حاله بحث مستمر عن العملاء وتوصل ليهم اعلانك في محلهم.

لحد توصل لحظة (تحول) يكون مشروعك إشتهر وبقا زي المغناطيس والناس هم يبحثو عنك لانهم سمعو عنك عند زول أو لقو إعلان ليك قبل فترة.

يجي السؤال نقطة (التحول) دي بتجي متين؟ .. مامحدد حسب نوع ومكان مشروعك .. وحجم المنافسة .. وحسب ميزتك التنافسية.

بس نصيحة .. إذا عايز نقطة (التحول) تجيك سريع كتر من قوة التسويق حقك في الفترة الأول عشان تحصد النتائج لاحقاً.
تحياتي 😁💰
*م.محمد التاج* 
https://wa.me/249117022225
1,273
محمد التاج - Mohamed Eltag

11 Nov, 11:18

*بزنس برودكاست "581"*
لو بتنظر لمصاريف التسويق على إنها "تكاليف" وخسارة فحتتعامل مع التسويق بشيء من البخل.

ولمن تتعامل مع التسويق بشيء من البخل دايما حتكون عندك نقطة ضعف في مشروعك من ناحية المبيعات.

التسويق هو إستثمار .. زمن ومجهود وقروش بتختها عشان ترجع ليك بأضعاف في كمبيعات وإنتشار.

فماتسترخص في الصرف .. ولا تكسل في التعليم .. ولا تفتش الطريق المختصر بدون فهم.
تحياتي 😁💰
*م.محمد التاج* 
https://wa.me/249117022225
1,142
محمد التاج - Mohamed Eltag

08 Nov, 08:57

*بزنس برودكاست "580"*
دا ماوقت "تتشهى" فيه .. نحنا عايزين لنفسنا الأفضل دائما .. بس العالم مابيهتم إنت عايز شنو .. العالم بيهتم بقيمتك في المجتمع *(كلما كانت قيمتك عالية كلما أخدت حاجات أكتر بسهولة).*

حالياً في الظروف دي إنت بتقدم بتضحي بزمنك ومجهودك وراحتك عشان تستقر ..
فماعندك رفاهية الدلع وإختيار البيعجبك .. بالذات لو لقيت نفسك عليك مسؤوليات.

بكرة لما يبقا عندك رأسمال كبير .. أو شهرة واسعة .. أو علاقات واصلة .. ساعتها تقدر تخت شروطك البتعجبك في الشغل.
انما في يوم الليلة انت مطلوب منك تجتهد فقط وتعصر نفسك على الصبر في مجالك الشغال فيه.
تحياتي 😁💰
*م.محمد التاج* 
https://wa.me/249117022225
1,256
محمد التاج - Mohamed Eltag

06 Nov, 06:26

*بزنس برودكاست "579"*
(نحنُ تجار أولاً تم مسيحيون ثانياً)
الجملة دي كان بيقولوها التجار في أوروبا في العصور الوسطى عشان يبررو لنفسهم الربا وإستغلال الأزمات والغش وغيرها من الممارسات المحرمة في البزنس.

وحاليا عندنا أصحاب بزنس شغالين بنفس المبدأ .. وبيحللو لنفسهم كل أنواع الربح المهم إنه كتير .. وياحبذا لو بقا بدون شقى وتعب زي التداول والأسهم كدا.

الرسالة دي هدفها الليلة تذكرك بالحلال وتثبتك على الحق في زمن كتر فيه الباطل.
تحياتي 😁💰
*م.محمد التاج*
https://wa.me/249117022225
1,190
محمد التاج - Mohamed Eltag

05 Nov, 03:40

*بزنس برودكاست "578"*
في حاجة إسمها (التأقلم السام) .. وهي إنك تكون بتكيف نفسك على الوضع الإنت فيه برغم سوء الحال .. وتميل لإنك ماتحاول تعمل تغيير.

فالواحد بيكون بيأقلم نفسه على مرتب صغير بدلا عن يزيد مصدر دخله.
ويأقلم نفسه على بيئة فيها شخصيات سامة عشان شايف ديل أصحابه وأهله وماعايز يبعد منهم.
ويأقلم نفسه على طريقة شغل تقليدية وقديمة بدلا عن يبتكر طريقة شغل حديثة.

فعود نفسك دائما ماتستسلم للوضع الأسود ولا تتأقلم مع الحاجات السيئة ودايما إتغير للأفضل.
تحياتي 😁💰
*م.محمد التاج*
https://wa.me/249117022225
1,081
محمد التاج - Mohamed Eltag

01 Nov, 08:14

*بزنس برودكاست "577"*
في تواصلك مع العملاء خليك متزن ..
❌ ماتكون بعيد وخاتي حواجز بينك وبينهم .. لان دا حيخليك ماقادر تعرف إحتياجاتهم وشكاويهم عن الخدمة حقتك .. وبيخليهم ينسوك تماماً ومابتكون في بالهم.

❌ نفس الوقت ماتكون قريب شديد عشان مايكون التواصل شخصي جداً ويكون مستنزف لزمنك وطاقتك .. وفي منهم الحيزعل لو إتعاملت معاه تعامل تجاري بعد عمل معاك رابط شخصي.

الكلام دا في الرسائل .. في التعليقات .. في منشوراتك البتختها .. في المكالمات .. وحتى في أرض الواقع لو حيجوك في المحل.

تحياتي 😁💰
*م.محمد التاج*
https://wa.me/249117022225
1,254
محمد التاج - Mohamed Eltag

31 Oct, 19:19

ترجمت ليك اهم 100 مصطلح في البزنس

https://www.facebook.com/share/15cUT3zs4z/
1,132
محمد التاج - Mohamed Eltag

28 Oct, 02:52

*بزنس برودكاست "576"*
لمن تكون عايز تتواصل مع شخص لاي تعامل رسمي (سؤال .. شغل ..تستشارة .. بيع .. الخ)
ما ترسل السلام وتسكت .. او ترسل جملة مبهمة مقطوعة.

إتعود تخلي تواصلك كامل من الأول (تسلم .. تعرف بنفسك لو الشخص مابيعرفك .. توضح سبب رسالتك ليه لو طلب او شغل آو غيره).

كدا بضمن أن في الغالب بيتم الرد عليك أسرع وبيتم إحترام رسالتك أكتر .. وبتختصر على نفسك زمن.

فخلي دي طريقتك في التعامل مع الرسائل والمكالمات دائما.
تحياتي 😁💰
*م.محمد التاج*
https://wa.me/249117022225
1,688
محمد التاج - Mohamed Eltag

27 Oct, 06:59

*بزنس برودكاست "575"*
في كل مرة تفكر تاخد خطوة جديدة حتلقا دماغك بيقاومك ويمنعك تاخد خطوة جديدة ..

ودا بسبب أن دماغك في أعماقه بيخاف من المجهول لانه في احتمالية خسارة.

ودا واحد من أسباب التسويف الكتير .. فبالتالي لازم تفهم إنك بتواجه ممانعة داخلية من عندك ولازم تضغط نفسك تاخد الخطوة الجاية .. لأن المشاريع المابتطور بتموت بمرور الزمن.

تحياتي 😁💰
*م.محمد التاج*
https://wa.me/249117022225
1,482
محمد التاج - Mohamed Eltag

26 Oct, 11:44

*بزنس برودكاست "574"*
"المال سيد مؤذٍ وخادم مطيع"
الجملة دي معناها لو بقا همك القروش فحتبقا مهووس وحتكون دايما في حالة هم مستمر وضيق من حالك.

لكن لمن يبقا المال بالنسبة ليك وسيلة عشان تخدم بيها نفسك والناس البترعاهم ساعتها حتكون راضي نفسياً وقادر تستمتع بالرزق البيجيك.

ودا السبب الجا بيه الحديث (تعس عبد الدينار .. تعس عبد الدرهم)
تحياتي 😁💰
*م.محمد التاج*
https://wa.me/249117022225
1,435
محمد التاج - Mohamed Eltag

23 Oct, 12:58

*بزنس برودكاست "573"*
من غرائب التفكير عند بعض الناس هو إنه "يكسل" من إنه يعمل دراسة جدوى يقيس بيها مدى نجاح مشروعه.

أو "يستكثر" إنه يدفع لشخص خبير عشان ياخد إستشارة قبل يبدأ.

وتلقا إنه يدخل مشروع بمبلغ كبير بصورة عمياء.
التصرف دا واحد من الأسباب المتكررة لخسارة المشاريع وتقفيلها خلال أول سنة من بدايتها.
تحياتي 😁💰
*م.محمد التاج*
https://wa.me/249117022225
1,311
محمد التاج - Mohamed Eltag

20 Oct, 08:48

*بزنس برودكاست "572"*
*(لست عليهم بمسيطر)* .. الاية دي في القرآن بتذكرك دايما إنك ماعندك تحكم في الناس ..

وبالتالي ماحتقدر تجبر شخص ياخد قرار حتى لو إنت شايفه دا القرار السليم 100% ..

ودا يعلمك تقبل الرفض وتقبل الإختلافات مع العملاء.
ويعلمك ماتفرض على العملاء طريقة كلام معينة أو شراء منتج معين وتتوقع كلهم يسمعو كلامك.

إنت مطلوب منك تقدم شغلك في قالب جاذب وجميل .. اللي بيقتنع بيه بيتفاعل معاك ويشتري منك ويتابعك في الميديا .. واللي مابيقتنع بيك حيرفض يتعامل معاك مهما إجتهدت في إقناعه.
تحياتي 😁💰
*م.محمد التاج*
https://wa.me/249117022225
1,340
محمد التاج - Mohamed Eltag

19 Oct, 18:32

في الفيديو دا حابي احكي ليك كيف بديت حياتي في البزنس
https://youtu.be/U6YxY7iJfA8
1,122
محمد التاج - Mohamed Eltag

15 Oct, 07:29

*بزنس برودكاست "571"*
لو قلت لي (وريني كيف أقدر أبركن عربية؟)
ساعتها حأسألك (هل بتعرف تسوق؟)
لو لقيت إنك ما اتعلمت السواقة ساعتها حانصحك تمشي تتعلم سواقة.

بنفس الفكرة لو قلت لي (كيف أجيب متابعين؟ .. أو كيف أزيد مبيعاتي؟) حأسألك إتعلمت تسويق/محتوى؟
لو لقيت إنك ما إتعلمت حأطلب منك تتعلم. لأن وراء سؤالك البسيط دا عالم كبير من المعلومات وقصة طويلة لازم تتحكي ليك من الأول.

عشان كدا لا مفر من إنك تقعد وتتعلم أي طريق مختصر غير كدا يعتبر تضييع زمن وقروش.
تحياتي 😁💰
*م.محمد التاج*
1,368
محمد التاج - Mohamed Eltag

14 Oct, 05:43

*بزنس برودكاست "570"*
لو مابتقدر تفصل مشاعرك من الشغل فمشروعك حيكون مركب معرضة للغرق في نص أمواج مشاعرك المتقلبة.

لانه في سوق العمل طبيعي تقابل المتعجرف والعنده عقدة النقص والساذج والمتذاكي والحساس والمكار وأصناف من البشرية مختلفة.

بس للأسف دي هم العملاء .. ديل هم البشر عامة.
فإنت مجبر تتعامل بصورة إحترافية وتبيع منتجك أو خدمتك للناس ديل بإختلاف طبائعهم.

فخلي رأيك الشخصي وخلي ردود أفعالك ع جنب .. وألبس شخصية دبلوماسية رسمية ودودة في التعامل مع الكل.
تحياتي 😁💰
*م.محمد التاج*
https://wa.me/249117022225
1,114
محمد التاج - Mohamed Eltag

12 Oct, 02:20

حاليا وصلنا للرسالة رقم 570 في سلسلة بزنس برودكاست

فلو حابي تقرأ وتستفيد من الرسائل الفاتت أدخل عبر قناة الواتساب:
https://whatsapp.com/channel/0029VaDHEH64Y9llUWAn4t2W

أو عبر قناة التلغرام:
https://t.me/mohamedeltag
1,108
محمد التاج - Mohamed Eltag

09 Oct, 04:02

*بزنس برودكاست "569"*
*(هل أدخل معاي شريك معاي ولا لأ؟)* .. السؤال دا بيجيني كتير جدا في الإستشارات.

والحقيقة إنه مافي إجابة صح أو خطأ ..
فالشريك بيقلل من ضغط الشغل عليك .. وبيقلل من حجم المخاطرة بعدين .. وبيساعد في المجمهود أو راس المال .. وبيفكر معاك أفكار جديدة.

بس بالمقابل الشريك الخطأ بيخرب المشروع .. ويضيع الموارد .. ويسبب ليك ضغط نفسي وبلاوي زرقاء ..

ف بإختصار الشراكة زي الزواج .. *ماممكن تسألني أتزوج حالياً ولا لا؟*
إنت بتحدد محتاج شريك لمشروعك ولا ممكن يتم بدونك؟ .. ولو حتحتاج شريك شنو مواصفات الشريك المثالي ليك.
تحياتي 😁💰
*م.محمد التاج*
https://wa.me/249117022225
1,360
محمد التاج - Mohamed Eltag

08 Oct, 10:12

*بزنس برودكاست "568"*
في تصنيع جبنة الشيدر بيكون في طبقة صفراء بتغلفها للحماية بس طعمها ماحلو في الأكل.

فجا واحد أزال الطبقة دي وبقا يبيع الجبنة بإعلان كتب فيه *(جبنة نقية خالية من الشوائب)* وباع زي الفل.

بعد مده كل الناس بقو يقلدو الفكرة ..

فرجع يبيعها بنفس الطبقة الخارجية وكتب في الإعلان *(جبنة أصلية بالطبقة الخارجية تقشرها بنفسك).*

أفهم من القصة دي إنك دايما محتاج تكون مفكر بطريقة مختلفة وإنت بتعلن للبزنس حقك .. مامجرد نسخ ولصق.
تحياتي 😁💰
*م.محمد التاج*
https://wa.me/249117022225
1,110
محمد التاج - Mohamed Eltag

07 Oct, 08:05

*بزنس برودكاست "567"*
في قاعدة شرعية بتقول *(من إستعجل الشيء قبل أوانه عوقب بحرمانه).*

نفس القاعدة دي في المشاريع .. لو إستعجلت النتائج غالباً حتحرم منها.

لو إستعجلت الإرباح غالباً حتاخد قرارات غلط توديك للخسارة.
لو إستعجلت التوسع غالباً حتاخد خطوة تقفل المشروع كله.
لو فتشت للأرباح السريعة بدون تعب غالباً حتقع في خسائر وتعب برضو.

عشان كدا التحضير لكل خطوة في المشروع مهم والتنفيذ المتريث أهم.
تحياتي 😁💰
*م.محمد التاج*
https://wa.me/249117022225
918
محمد التاج - Mohamed Eltag

06 Oct, 02:40

*بزنس برودكاست "566"*
غالباً لمن يجيني زول ماقادر يبدأ بزنس لإستشارة بيكون السبب واحد من تلاتة:
- *حاجز نفسي*
هواجس زي الخوف من الفشل ومن نظرة المجتمع والأفكار السلبية عن الغنى وأنه هو القروش مستحيل يتلمو..

- *حاجز معرفي*
في زول عارف إنه مفترض يعمل دراسة جدوى أو تسويق أو كتابة محتوى .. بس ماعارف بيعملوها ويطبقوها كيف أصلا.

- *حاجز مادي*
مرات بيكون في ضعف في راسمال الشخص أو في طريقة توفيره للمنتج.

فلو إنت عندك حاجز نفسي فبوصيك تغير البيئة حولك وتتعرف ع ناس عندهم عقلية إنجاز .. وتحضر وتقرا لناس ناجحين.
ولو إنت حاحزك معرفي فالحل دايما إنك تتعلم .. يا ام تاخد استشارة من خبير أو تدرس كورس مع محترف.
ولو إنت حاجزك مادي فالحل إنك تبدأ تستغل كل مورد موجود حولك مهما كان ضعيف (زي تلفونك ولابتوبك وغرفتك) .. وتكبر من بزنسك ومستقبلا تستعين براسمال شركاء معاك.

تحياتي 😁💰
*م.محمد التاج*
https://wa.me/249117022225
972
محمد التاج - Mohamed Eltag

05 Oct, 04:03

*بزنس برودكاست "565"*
واحدة من أسباب تدهو شغلنا وحياتنا عامة هو كترة التفكير غير المجدي (Overthinking)

غالباً نحنا بنفكر بنوع من الحنين في الماضي .. ونوع من الأمل في المستقبل .. ودا بينتج عنه شلل وعدم رضا في الحاضر.

كتار بيحكو لي قصص عن مشاريعهم الكانت رهيبة قبل الأزمة .. وبيحكو عن أحلامهم العظيمة في المستقبل .. بس بيهملو إن مفترض يبدو شغل من اللحظة الحالية دي.

المشاريع بتتغير بتغير الظروف .. والبكاء على الأطلال أو التطلع للأحلام ماحيفيد بشيء .. *لازم تتحرك.*
تحياتي 😁💰
*م.محمد التاج*
https://wa.me/249117022225
667
محمد التاج - Mohamed Eltag

05 Oct, 04:03

*بزنس برودكاست "564"*
في فرق بين الواحد يكون ناحج وبين إنه (يبدو) ناجح.

حالياً نحنا في زمن فيه كتير من الناس بيظهرو بصورة لامعة وبيتكلمو عن النجاح السريع بدون تعب كتير.

النجاح هو لعبة بعيدة المدى .. الغرض منها إن شغلك وحياتك تكون مستقرة وفي تطور مستمر طول حياتك.

مافي نجاح بيكون شكل فرقعة فجأة وبدون تعب .. فلمن تلقا واحد بيروج لنفسه بالفكرة دي أعرف أن دا نجاح مزيف.
وماتخلي فرقعات النجاح المزيف البنشوفه حولنا في الميديا يحسسك بالقلق أو الخوف إنك ما أنجزت زيه .. خليك مواصل في حياتك وشغلك أيا كان شكله .. العبرة بالنفس الطويل.
تحياتي 😁💰
*م.محمد التاج*
643
محمد التاج - Mohamed Eltag

03 Oct, 08:26

⚠️ تنبيه ⚠️
في بعض الإعلانات بينزلها تلغرام في القنوات وقد تظهر ليك ومكتوب بفوقها (اعلان)

الاعلانات دي ماعندي علاقة بيها ولا بوصي شخص ❌ يدخل فيها أبدا
782
محمد التاج - Mohamed Eltag

03 Oct, 03:07

*بزنس برودكاست "563"*
أفضل طريقة عشان تلقا تمويل لمشروعك هي إنك ماتحتاج تمويل لمشروعك.

في مقولة *(رأس المال جبان)*.. يعني صاحب رأس المال بيخاف جدا من الخسارة والمخاطرة ..

وبالتالي حتلقا دايما صعوبة إنك تقنع شخص أو جهة إنه يمول مشروعك طالما هو لسا (فكرة في دماغك).

فالطريقة الصح لجذب المستثمرين إنك تبدأ المشروع بطريقتك الخاصة وتخليه ينجح في المرحلة الأولية .. بعدها طلبات الشراكة والتمويل حتنزل عليك من كل مكان.
تحياتي 😁💰
*م.محمد التاج*
https://wa.me/249117022225
901
محمد التاج - Mohamed Eltag

02 Oct, 11:19

*بزنس برودكاست "562"*
غالباً أكتر الناس حولك (أهل وجيران وأصدقاء) هم أقل الناس تفاعلاً وتجاوباً مع المحتوى حقك ومع المشروع بتاعك.

وحتى لو بدو معاك بحماس في الأول فبمرور الزمن حيقللو إهتمامهم وتشجيعهم.

ودا مابالضرورة هدم أو إحباط ليك .. إنما لأنهم متعودين عليك في كل حالاتك.

عشان كدا ماتحس بالضيق لمن تلقا أغلب الناس القريبين منك مامهتمين بمتابعة نشاطك أو تشجيعك .. لأن دي سنة الحياة في البشر وركز على توسيع شغلك برة محيطك.

*"زامر الحي لا يطرب"*
يعني الشخص المتعود عليه غالبا مابتستمتع بالحاجة البيقدمها.
تحياتي 😁💰
*م.محمد التاج*
https://wa.me/249117022225
904
محمد التاج - Mohamed Eltag

24 Sep, 10:56

*بزنس برودكاست "561"*
فكر كم مرة لقيت نفسك في موقف صعب في الشغل بس في الآخر جازفت ومشيت أمورك؟

دا لأنه لمن الحاجة تكون مسألة مهمة مافيها تنازل عقلك بيقدر يضغط نفسه عشان يشتغل وينجز.

في مقولة *(اذا كان الشئ مهم لك ستجد له طريقة*
*واذا كان الشيء غير مهم لك ستجد له عذر)*
تحياتي 😁💰
*م.محمد التاج*
https://wa.me/249117022225
1,111
محمد التاج - Mohamed Eltag

20 Sep, 11:23

*بزنس برودكاست "560"*
*(التخفيض هو حيلة العاجز)*
غالباً الشخص قليل الخبرة في البزنس بيميل لانه ينافس بتقليل السعر .. ودا لأنه ماعنده طريقة يجذب بيها الناس غير التخفيضات.

المشكلة مادايماً التخفيضات بتكون جاذبة ومقعنة للناس .. لان العميل بيشتري المنتج أو الخدمة عشان يلبي رغبة أو إحتياج عنده مامجرد ياخد اي شي رخيص يلقاه قدامه.

الحريف في البزنس بيقاتل بالميزة التنافسية البتخليه مختلف من باقي التجار الزيه.
تحياتي 😁💰
*م.محمد التاج*
https://wa.me/249117022225
1,164
محمد التاج - Mohamed Eltag

18 Sep, 12:27

*بزنس برودكاست "559"*
في الزمن الحالي البداية من الصفر بدون رأسمال بقت حاجة أسهل من أي وقت سابق.

حاليا عندك القدرة تبني بزنس أونلاين وتجمع بين عميل عايز خدمة (زي التصميم والمونتاج والكتابة) وبين عامل حر يقوم بالشغل وتتقاسم معاه المكسب.

عندك قدرة تعمل بزنس برة البلد الإنت فيها بإنك تكون تاجر وسيط بين مصنع أو تاجر جملة وبين العميل النهائي.

عندك قدرة تعمل موقع الناس تشتري منه والطلب يترسل مباشرة لمصنع أو تاجر وهو يشحن المنتج مباشرة بإسمك والتغليف بتاعك.

الخيارات كتيرة .. وممكن من محلك في أعماق السودان تدير شغل ف آخر الكوكب.

وتنطبق عليك مقولة "From Zero to Hero"
تحياتي 😁💰
*م.محمد التاج*
https://wa.me/249117022225
1,000
محمد التاج - Mohamed Eltag

14 Sep, 03:09

*بزنس برودكاست "558"*
التجارة الإلكترونية هي إنك تبيع "منتج" أون لاين .. والبيع دا بيتم بواحد من 3 طرق:
- *موقع/تطبيق* يكون ملك ليك.
- أو *متجر إلكتروني* يكون بيقدم متاجر فرعية جواه.
- أو *متجر خاص في الميديا* (متجر فيسبوك أو إنستغرام أو يوتيوب ..الخ)

وفي التجارة الإلكترونية في نوعين من المنتجات:
- *منتج ملموس*
- *منتج رقمي*

بإختصار التجارة الإلكترونية هي بزنس العصر النحن بنعيشه .. لانها تعتبر أفضل بزنس بدون تكاليف كتيرة تخسر المشروع بتاعك.

والذكاء في إنك تختار المنتج الصح وتبيعه في المتجر الصح.
تحياتي 😁💰
*م.محمد التاج*
https://wa.me/249117022225
1,181
محمد التاج - Mohamed Eltag

09 Sep, 19:58

التسجيل دا فيه حبة أفكار جات في بالي حبيت اضيفها بعد محاضرة البزنس الهندسي
اتمنى تستفيدو منه.
1,302

2025 All Right Reserved

Disclaimer: The content displayed on this website is solely provided by the respective Telegram channels. We hold no ownership or responsibility for the content shared by these channels.