VeC – Łengua Veneta

Telegram 11.4 par Android, iOS, macOS e 5.8 par Desktop.

Mini apl 2.0
• Modałidà a schermo pien: łe mini apl łe połe doparar el schermo intiero, in vertegałe o orizontałe, par poder doparar intefase pì grandi e pì comandi.
• Trasamento de'l movimento de'l dispozidivo: łe mini apl łe połe resevar info so'l movimento de'l dispozidivo, par zontar comandi ùneghi.
• Scurtarole so'l dispozidivo: par acédar in presa a i propi zoghi e servisi prefarìi.
• Aceso a ła jeołogałizasion: i dezviłupadori i połe crear zoghi bazài so ła pozision o mape interadive par eventi.
• Regałi da łe apl: co łe só stełe, łe apl łe połe mandarghe regałi a i utenti cofà reconpensa par i obietivi che i gà brincà. A i utenti ghe ze anca stà zontada na inpostasion de reservadesa par controłar chi che połe mandarghe regałi che conparirà so'l só profiło.
• Emoji de stado da łe apl: i utenti Premium i połe inpostar ła propia emoji de stado da rento łe mini apl par farghe saver a tuti cosa che i ze drio far. Łe mini apl łe połe mudarghe l'emoji de stado in automàtego drio ndove che ze i utenti o cosa che i ze drio far.
• Sparpagno de media: łe mini apl łe połe crear contegnùi o media parsonałizài da sparpagnar so łe storie o so calsìase chat.
• Creasion de documenti: par poder descargar file e documenti jenerài da łe mini apl cofà media profiło creài da IA o file àudio.
• Piani de abonamento: i dezviłupadori i połe dimandar stełe par poder doparar ła só mini apl o i só prodoti dijitałi.
• Schermada de cargo: i dezviłupadori i inpostar icone e cołori parsonałizài so ła schermada de cargo de łe apl.
• Informasion so l'hardware de'l dispozidivo: cusì łe mini apl łe połe regołar in automàtego łe inpostasion e otemizar ła gràfega par aumentar łe prestasion e mejorarghe l'espariensa de dòparo a i utenti.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 11.3 par Android, iOS, macOS e 5.7 par Desktop.

Funsion video mejoràe
• Par cargar pì in presa i video che se varda e sparagnar dati, so i canałi pì grandi vien sełesionada in automàtego ła resołusion de reprodusion, drio ła cuałidà de ła propia conesion.
• Se połe sernir ła cuałidà de reprodusion de i video anca a man strucando so ⚙️.
• Deso so iOS se połe pasar a ła modałidà imàjine-so-imàjine zlisando el video par alto.
• Se połe mudar ła vełosidà de reprodusion de i video co sesti novi: tegnendo strucà el video zlisando par dreta o sanca.
• So Android strucando do volte so un łato de'l video se połe farlo saltar vanti o indrìo de 10 segondi.

Funsion de mudansa mejorada
• Mudando un mesajo dezà mandà deso se połe zontarghe un media in presa.
• I mesaji mudài deso i gà un marcador de tenpo co scrito a che ora che ghe ze stà fazesta l'ùltema modìfega.

Hashtag spesìfeghi par chat
• Ze stà zontà un formà novo de hashtag, par sercar rezultài soło so chat spesìfeghe.
• Co se scrive un hashtag so'l canpo de scritura de na chat pùblega, salta fora un menù spesiałe par zontarghe in presa el nome utente de ła chat.

Mudanse so bot e mini apl
• Deso anca i bot e łe mini apl łe podarà 'ver reclan, in magnera che i só dezviłupadori i posa finansiar el só łavoro.
• I bot i połe mandar agratis 30 mesaji par segondo a i só utenti, da uncó i só dezviłupadori i połe farghe mandar via fin a 1000 mesaji a'l segondo doparando łe stełe de Telegram.

Contador de reasion
• Par saver el nùmaro presizo de un tipo de reasion zontàe so un mesajo basta tegner strucada na reasion a volta.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 11.2 par Android, iOS, macOS e 5.6 par Desktop.

Regałi
• Deso i utenti i połe mandarse regałi doparando mesaji parsonałizài e òpare d'arte anemàe.
• Co se reseve un regało se połe farlo védar so ła nova scheda Regałi de'l profiło o convertirlo in stełe da poder spéndar so altre robe.
• Se se manda un regało se połe sernir de scóndar el nome, inte'l cazo che'l vegne publegà so'l profiło.

Piataforma de verìfega
• Calsìase dita, apl o sito el połe mandar còdazi de verìfega de'l nùmaro de tełèfono de i só utenti co Telegram.
• I còdazi de verìfega de Telegram i ze pì ràpidi, pì econòmeghi, pì seguri e convegnenti de i SMS.
• I utenti i resevarà i còdazi so na chat spesiałe de Telegram.

Interfasa de segnałasion mejorada
• I moderadori i cava via miłioni de contegnùi che i và contro łe condision de servisio de Telegram.
• Par mejorar el servisio so'l menù de segnałasion ze stà zontàe tante opsion in pì.

Tanto altro
• So iOS ze stà mejoràe łe ciamàe video par aumentar łe prestasion e ła durada de ła batarìa.
• So Android ze stà zontà el suporto par łe trazmision in direta co apl esterne.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 11.1 par Android, iOS, macOS e 5.5 par Desktop.

Concorsi co łe stełe
• Cofà premi par i concorsi se połe métar in zugo abonamenti Premium, ojeti reałi e deso anca łe stełe.
• Se se vinse łe stełe se połe spéndarle par media da pagar, abonamenti par i canałi, so zughi o mini apl.
• I concorsi i ze prepagài, trasparenti e co inpostasion parsonałizàbiłi.

Vizion imediada so'l browser Telegram
• Ła vizion imediada ła otemiza in automàtego i artìgołi de łe pàjine web par i dispozidivi.
• El browser integrà de Telegram el połe convertir calsìase artìgoło inte na strutura pì łejera da cargar e da łèzar.
• Par vardar na pàjina in vizion imediada basta ndar so'l menù de'l browser e sełesionar Mostra co vizion imediada.

Tanto altro
• Ze stà postài racuanti bai e mejorà łe prestasion de l'apl.
• Ze stà mejoràe łe mini apl in magnera che łe sipie pì reative e co pì opsion par i dezviłupadori.
• Ze stà cavada via ła funsion Parsone visine, na funsion vecia che ła vegnéa doparada da'l 0.1% de i utenti Telegram.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 11 par Android, iOS, macOS e 5.4 par Desktop.

Reasion steła
• Par suportar canałi o creadori de contegnùi se połe doparar ła reasion steła.
• Tute łe publegasion co łe reasion steła łe mostra na clasìfega co i utenti che gà donà de pì.
• I paroni de i canałi i połe convertir tute łe stełe in conpensi o sconti par łe reclan.

Abonamenti co łe stełe
• I creadori de contegnùi i połe crear link de invito spesiałi che ghe parmete a i utenti de zontarse so un canałe co un abonamento mensiłe da pagar co łe stełe de Telegram.
• Co pochi pasaji se połe crear un canałe escluzivo co contegnùi extra, aceso antisipà a media o direte VIP.

Tanto altro
• So i bot ze disponìbiłe ła funsion de i media da pagar, anca so chełi par aministrar canałi o jestir atividà.
• So i canałi ze posìbiłe parmétarghe a i aministradori de publegar co'l só profiło parsonałe o co'l profiło de n'antro só canałe.
• So iOS deso ze posìbiłe vèrzar documenti .pdf, .xls o .docx direti rento el browser integrà de Telegram.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.15 par Android, iOS, macOS e 5.3 par Desktop.

Browser integrà
• Łe pàjine web che łe vien verte co'l browser integrà deso łe połe èsar reduzeste e verte danovo da ła zbara so'l toco baso de'l schermo.
• Se riva na notìfega fin che se ze drio vardar na pàjina web o na apl, se połe vardar suito i mesaji in łibartà o salvar ła pàjina infrà i prefarìi par tornarghe pì tardi.
• El browser de Telegram el suporta i siti desentrałizài ospitài so TON in magnera da rèndar disponìbiłe a tuti el Web3.

Botega de łe mini apl
• So ła Reserca ze stà zontada ła scheda nova "Apl", che ła mostra ła łista de apl pì popołari o che dezà se dòpara.
• I dezviłupadori i połe zontar un video demo o fotoschermàe de łe mini apl par farghe védar a i utenti cosa spetarse.

Stełe cofà regało a i amighi
• Łe stełe de Telegram łe parmete de cronpar prodoti dijitałi so łe mini apl o contegnùi so i canałi.
• Deso se połe cronpar stełe cofà regało par i contati, magari par chi che fà i ani e che conpare insima ła łista chat.

Tanto altro
• Serte mini apl łe połe jenerar contegnùi parsonałizài par łe storie, che se połe sparpagnar direti da rento łe apl.
• Fin che se rejistra i mesaji video co ła fotocàmara davanti se połe doparar el flash par sciarir el schermo e sevitar a rejistrar anca co'l scuro.
• I utenti i połe sparpagnar łe só storie co un conponente gràfego che mostra el tenpo e i gradi de tenperadura de ndove che i ze.
• Co se pùblega na storia video deso se połe inpostar un fotograma cofà imàjine prinsipałe par ła storia.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.14 par Android, iOS, macOS e 5.2 par Desktop.

Stełe de Telegram
• Nase łe stełe de Telegram par suportar łe cronpe de prodoti dijitałi so Telegram tipo ojeti, ebook, corsi online e zughi.
• I paroni de i canałi i połe blocar i media che i pùblega e dimandarghe stełe a i iscrivesti par acédar a i só contegnùi.
• I dezvilupadori de bot che ofre prodoti e servisi e i creadori de contegnùi i połe retirar el vadagno de łe stełe in Toncoin so Fragment o dopararle par łe reclan.

Schede mini apl
• Tuti i mezi milioni de utenti i dòpara bot e mini apl par cronpar roba, servisi o zugar.
• Deso se połe redùzar łe mini apl so na zbara so'l toco baso de'l schermo par poder far altro sensa 'ver da ndar fora da łe apl.
• Se se reduze pì apl vegnarà creada na scheda par cauna apl.

Reserca de storie
• Strucando un hashtag so el testo de na storia se połe catar fora tute łe storie pùbleghe che dòpara el mèdemo marcador.
• So łe storie se połe zontar un marcador de pozision, che cofà i hashtag, el połe èsar strucà par sercar tute łe storie pùbleghe fate da chel posto.

Link gràfeghi so łe storie
• I utenti Premium i połe evidensiar un link gràfego so łe só storie.
• I link gràfeghi i połe èsar parsonałizài e 'ver na preociada de'l link che i fà védar.
• Pitosto de'l testo URL se połe sernir un nome parsonałizà par el link.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.13 par Android, iOS, macOS e 5.1 par Desktop.

Efeti so i mesaji
• Inte łe chat privàe deso se połe mandar mesaji co efeti anemài che se verze co'l resevidor el verde ła chat.
• Ghe ze a dispozision 6 efeti łìbari, par dezblocarli tuti serve l'abonamento Premium.
• Par zontarlo basta tegner strucà el tasto Manda e sernir l'emoji łigada a l'efeto.

Pozision de'l testo de i mesaji
• Deso se połe spostar el testo de i media sora o soto drio el propio gusto.
• Basta sełesionar i media da'l menù de i łighi o mudar un media dezà mandà, tegner strucà el boton Manda e sełesionar Movi testo par sora o par soto.

Asion ràpide par i nùmari de tełèfono
• Strucando un nùmaro de tełèfono se verze un menù novo ndove sernir cosa far in magnera vełose.

Reserca par hashtag
• I hashtag i deventa globali.
• Strucàndoghine uno vegnarà mostrài i rezultài de reserca da łe propie chat ma anca da tuti i grupi e canałi pùbleghi.

Redusion de łe sitasion
• Par crear mesaji pì conpati deso se połe redùzar i testi, scondéndoghine serti tochi.
• Basta formatar el testo cofà sitasion e strucar so'l boton Reduzi par conprìmar el testo.
• Chi che łeze i mesaji el połe far scórar el testo o zlargar ła sitasion par védarlo tuto.

Ciamàe cołoràe so macOS
• I sfondi e łe anemasion dinàmeghe de Android e iOS deso i ze disponìbiłi anca so łe ciamàe e ciamàe video de macOS.
• Łe ciamàe so'l pc deso łe ze asà pì bełe, ma łe consuma manco resorse de prima.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.12 par Android, iOS, macOS e 4.19 par Desktop.

Mudador de figurete
• Deso se połe crear figurete direti rento Telegram da'l paneło figurete strucando el boton➕.
• Se połe crear figurete da na foto calsìase e zontarghe testi, desegni, emoji, figurete anemàe o GIF.
• Co un toco se połe tajar fora el sojeto de na foto e zontarghe un bordo par farlo deventar na figureta.
• Se połe zontar łe figurete creàe so serie nove e sparpagnarle co'l só link.
• Ze posìbiłe anca crear serie nove parsonałizàe zontando figurete dezà ezistenti.

El me profiło
• Par capir come che se se mostra a cheł'altri, ze stà zontada ła sesion "El me profiło" so łe inpostasion.
• Ze posìbiłe picar insima fin a 3 storie parché łe reste in evidensa.
• Deso se połe zontar ła propia data de nàsita in magnera che tuti i sapie co ze ora de festejar.
• Se se gà un canałe pùblego se połe mostrarlo so'l propio profiło.
• I paroni de nomi utente o de nùmari anònemi da cołesion i połe mostrarli so'l propio profiło.

Tante altre funsion
• So ła reserca ze stà zontada ła scheda canałi che ła mostra i canałi ndove che se ze dezà rento e altri canałi consejài drio i propri argomenti prefarìi.
• Ze stà zontada l'opsion par sparpagnar ła pozision in tenpo reałe fin che no se ła dezativa a man.
• Mejorà el sistema de notìfega grasie a notìfeghe spesìfeghe par łe reasion so i mesaji e so łe storie.
• I mesaji voltài deso i mostrarà o manco ła foto profiło de i utenti che gà mandà i mesaji drio łe só inpostasion de reservadesa.
• I aministradori de i grupi i połe sełesionar e moderar pì mesaji o utenti insenbre co nove asion de moderasion de masa.
• Ze stà mejorada ła sesion Asion resenti, che deso ła ingruma łe asion de i mèdemi aministradori, łe gà tamizi novi e łe mostra anca resposte e argomenti.
• I canałi i połe sernir el nùmaro màsemo de reasion so cauna publegasion.
• So i grupi che gà ativà i argomenti, tirando par sù ła chat se połe pasar da uno a cheł'altro.

Premium
• I utenti Premium i połe desìdar se tornar a védar łe reclan, par controłar chełe creàe da łori o par jutar i canałi.
• Deso se połe ativar ła modałidà "Varda de scondon" anca da ła łista chat.
• So i sondaji i połe doparar łe emoji anemàe.

Telegram Desktop
• Zontada ła modałidà de Vizion imediada.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.10 par Android, iOS, macOS e 4.16 par Desktop.

Telegram Business
Da uncó i utenti Premium i połe trasformar el propio account inte un profiło de na atividà e 'ver aceso a tute łe funsion par el łaoro, cofà:
• Ore de atividà e pozision: łe atividà łe połe mostrar in che ore che łe ze verte e na mapa co ła pozision de ndove che i utenti i połe catarle.
• Pàjina de inisio: sernendo el testo e la figureta che łe parsone łe vedarà prima de scominsiar na conversasion se połe zontar info so prodoti e servisi so tute łe chat vode.
• Resposte ràpide: se połe crear scurtarołe par reciamar mesaji preinpostài co testi, media e file zvariegài che se dòpara tante volte.
• Mesaji de sałudo: so i profiłi Business se połe inpostar un mesajo de sałudo che ghe vegnarà mandà in automàtego a i utenti che te contata par ła prima volta.
• Mesaji de manca: un mesajo automàtego da mandarghe a łe parsone co l'atividà ła ze sarada sù o ła ze in vacansa.
• Nomi de łe cartełe: par jutar a defarensiar i cronpadori da amighi, cołeghi o fameja, se połe organizar i utenti in cartełe e far conparir so ła łista chat prinsipałe el nome cołorà de łe cartełe ndove che i ze rento.
• Link de contato: 'sti link parsonałizài i parmete de sujerirghe a i utenti che łi dòpara un mesajo da mandarghe a ła tó atividà.
• Bot de ciàcoła: i utenti Business i połe cołegar bot che podarà respóndarghe a łe chat par só conto, in magnera da automatizar e mejorar ła só comunegasion co i cronpadori.

Vadagni sconpartìi co i creadori de canałi
• I paroni de i canałi Telegram i połe resévar el 50% de i vadagni de łe reclan mostràe so i só canałi.
• El vadagno el połe èsar retirà sensa speze o investìo danovo so Telegram.
• Vegnarà doparada ła criptomoneda Toncoin e ła só blockchain TON par łe comision base e ła só vełosidà de tranzasion.
• Łe reclan de Telegram no łe vien mai mostràe so łe chat o in altre parte de l'apl ma soło so i canałi pì grandi.
• Gnauna reclan ła dòpara i dati de i utenti ma łe depende soło da'l canałe ndove che łe vien mostràe.
• Co Telegram Premium chi che vołe el połe dezativar tute łe reclan.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.10 par Android, iOS, macOS e 4.16 par Desktop.

Potensiadori par i grupi
• Deso anca i grupi i połe ndar sù de łeveło grasie a i potensiadori de i utenti Premium o tacando concorsi.
• Man man che un grupo el ndarà sù de łeveło se ghe dezblocarà funsion in pì.

Storie de i grupi
• I aministradori de i grupi i połe publegar storie e tute łe resposte a łe storie łe vegnarà voltàe so'l grupo.

Emoji de stado, parsonałizasion profiło, sfondi e stiłe de i link
• I grupi potensiài i gavarà a dispozision racuante opsion de parsonałizasion.
• I połe canbiar cołor e icona de'l profiło.
• I połe inpostar na emoji de stado.
• I połe sernir un sfondo predefenìo o parsonałizà.
• I połe parsonałizar el stiłe de i link che vien mandài so'l grupo.

Emoji de'l grupo
• I grupi de łeveło pì alto i podarà métarghe a dispozision de i menbri na serie de emoji.
• Ła serie emoji de'l grupo ła połe èsar doparada da tuti i menbri, anca da chi che ze senpre Premium.

Conversion da voze a testo
• I utenti de i grupi potensiài i połe 'ver a dispozision ła funsion de trascrision vogałe de calsìase mesajo àudio o video mandà so'l grupo.

Parmesi in pì par chi che potensia
• I mesaji de i menbri che potensia el grupo deso i mostra na icona de potensiamento.
• I aministradori i połe inpostarghe a i menbri che gà potensià parmesi partegołari, in magnera da farghe mandar mesaji sensa gnanca na restrision.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.6 par Android, iOS, macOS e 4.14 par Desktop.

Spasio parsonałe 2.0
• Co 'sto ajornamento el Spasio parsonałe el ze deventà un vero e propio sistema de salvatajo de mesaji, link e media.
• Strucando so➕o ➕ se połe sełesionar Mostra cofà chat par védar tuti i mesaji salvài sconpartìi par łe só chat de orìjine.
• Par organizar mejo tuti i mesaji, i utenti Premium i połe zontarghe marcadori defarenti e par dopararli cofà tamizi inte łe reserche.

Mesaji video e vogałi mejorài
• Ze stà zontà l'inpostasion de autodestrusion anca par i mesaji video e vogałi in magnera che posa vegner ełimenài anca daspò na reprodusion soło.
• Deso se połe métar in pàuza ła rejistrasion de i mesaji video e vogałi e retacarli sensa mandarghine tanti defarenti.

Ora de łetura e ùltema entrada mejoràe
• Inte łe chat privàe ze stà zontada ła presiza ora de łetura de i mesaji.
• Łe ore de łetura łe gà ła só inpostasion de reservadesa, rento l'inpostasion de reservadesa de l'ùltema entrada.
• Co Telegram Premium te połi védar l'ùltema entrada e łe ore de łetura anca se te ghe łe scondi a cheł'altri.

Tanto altro
• So ła sesion Media sparpagnài de tute łe chat ze stà zontada ła scheda Mesaji salvài, co rento tuti i mesaji voltài so'l Spasio parsonałe.
• Ze stà mejorada ła funsion de reserca e se połe védar i rezultài cofà na łista.
• I utenti Premium i połe desìdar chi che połe scrìvarghe, se tuti o soło i só contati e utenti Premium.
• Łe storie łe se carga 4 volte pì in presa e i utenti Premium i połe desìdar se védarle a alta cuałidà.
• I contati sparpagnài deso i gà na gràfega mejorada.
• So macOS se połe sernir infrà 15 icone defarenti par l'apl.

Dòpara Telegram da profesionista!
Varda tuti i "sujerimenti de Telegram" traduzesti!

🎆 Auguri orijinałi de bon 2024? 🎆
Eco par vualtri na bela imàjine da doparar co tuti i vostri amighi e fameje par farghe i auguri in łengua veneta!

Bon 2️⃣🔠2️⃣4️⃣ da VeC!

Telegram 10.5 par Android, iOS, macOS e 4.14 par Desktop.

Ciamàe mejoràe
• Redesegnàe de'l tuto, deso łe ciamàe łe gà sfondi e anemasion nove gran bełi che i muda in magnera dinàmega drio el stado de ciamada.
• L'interfasa nova ła sconsuma manco batarìa donca funsiona tuto mejo anca so i dispozidivi pì veci.
• Ze stà mejorada anca ła cuałidà de łe ciamàe.

Efeto scioco de Thanos
• Co se ełìmena un mesajo calsìase ze stà zonta un efeto de vaporizasion.
• Par sparagnar batarìa ze stà zontà 'sto efeto infrà łe inpostasion de sparagno enerjètego.

Ajornamento so'l dezviłupo de i bot
• Ze stà mołà fora el pì grando ajornamento de senpre so ła piataforma de creasion de i bot.
• Deso i bot i połe métarghe na reasion a i mesaji, mandar resposte so altre chat, jestir reasion, sitasion, link e tanto uncora.
• I bot i ze boni anca de otegner informasion so concorsi e potensiadori de i canałi ndove che i ze aministradori.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.4 par Android, iOS, macOS e 4.13 par Desktop.

Parsonałizasion canałi
• I canałi i połe canbiar ła só parensa man man che i và sù de łeveło.
• Drio el nùmaro de potensiadori i połe canbiar el cołor de łe publegasion, el łogo e el cołor de l'intestasion, inpostarse na emoji de stado e un sfondo parsonałizà par tuti, publegar pì storie e rèndar disponìbiłi reasion parsonałizàe.

Republegasion mejoràe
• I mesaji de i canałi i połe èsar republegài cofà storie.
• Łe republegasion łe suporta tuti i tipi de mesajo e ła copia ła połe èsar spostada, mudada e parsonałizada.
• Utenti e canałi i połe védar chi che'l gà republegà łe só storie.

Regałi e premi parsonałizài
• Inte łe inpostasion deso se połe regałar Premium a pì parsone insenbre e pì in presa.
• I canałi che crea un concorso deso i połe regałar premi parsonałizài in zonta a i abonamenti de Telegram.
• Ła funsion "mostra vinsidori" ła parmete de sełebrar pì in grando chi che vinse.

Funsion retajo
• Par crear efeti uncora pì bełi deso se połe tajar fora el sojeto de łe foto e tratarlo cofà ojeto independente.
• So'l mudador de media basta ndar so'l paneło figurete, sełesionar Foto e sernir l'opsion Retaja.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.3 par Android, iOS, macOS e 4.12 par Desktop.

Concorsi
• I aministradori i połe reclamizar i só canałi organizando concorsi par regałar premi a i iscrivesti.
• Tuti i premi i gavarà rento anca un abonamento a Telegram Premium.
• Telegram el sełesionarà a cazo i vinsidori de i concorsi, ma in magnera verifegàbiłe e trasparente.
• Par caun abonamento regałà, el canałe organizador el vadagnarà 4 potensiadori.
• Se połe inpostar co presizion chi che połe partesipar a un concorso, tuti i iscrivesti o soło chełi novi, drio ła Nasion da ndove che i riva e se i gà da zontarse so altri canałi.

Republegasion de le storie
• Deso se połe republegar łe storie de cheł'altri utenti e de i canałi so ła propia pàjina.
• Republegando na storia se połe anca zontarghe sora altri contegnùi, cofà testi, àudio e mesaji video.
• Połe èsar republegàe soło łe storie co ła reservadesa inpostada so "Tuti", ma łe republegasion łe gavarà inpostasion de reservadesa tute sue.
• I mesaji video i połe èsar ingrandìi o reduzesti e spostài so'l tenpo de ła storia.

Canałi mejorài
• Co se se iscrive a un canałe deso vien mostrada na łista de canałi pùbleghi somejanti.
• Ze stà reorganizà el menù inpostasion de i canałi.
• I canałi deso i gà a dispozision anca łe statìsteghe de łe storie par védarghine łe prestasion.
• I canałi i połe zontarse 1 reasion parsonałizada par caun łeveło de potensiamento.

Tanto altro
• Telegram el ze deventà bon a reconósar el łenguajo de programasion.
• Łe prefarense so l'ativasion de i argomenti so i grupi łe ze stà mejoràe.
• So iOS i mesaji co autodestrusion i vegnarà ełimenài co na nova fantàstega anemasion.

Funsion Premium par tuti
• Pian pian tuti i utenti i podarà convertir in testo fin a 2 mesaji vogałi e video a setemana.

Funsion nove par i utenti Premium
• I połe canbiar el cołor de'l propio profiło parsonałe, insenbre a'l cołor de i link mandài e de łe resposte che se ciapa.
• I połe sernir anca na icona cofà motivo de sfondo de łe resposte che se ciapa o co se vien sitài.
• I połe inpostar sfondi parsonałizài par tuti do so łe chat privàe.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.2 par Android, iOS, macOS e 4.11 par Desktop.

Sitasion
• I utenti i połe sitar tochi spesìfeghi de mesajo par crear resposte 100% presize.
• Tocando na sitasion, na beła anemasion ła farà védar ła só orìjine presiza.
• Par sitar un toco de mesajo basta tegner strucà un mesajo, sełesionar el toco che intaresa e strucar so Sitasion.
• Se połe sitar anca co'l menù de formatasion, in magnera da poder sitar pì volte so un mesajo ùgnoło.
• Da uncó se połe respóndar anca so chat defarenti, par ndar vanti co na discusion in privà o so altri grupi o canałi.

Preociàe de i link regołàbiłi
• Deso se połe canbiar ła grandesa de'l media de ła preociada.
• Se ghe ze pì link se połe sełesionar che preociada far védar.
• Ze stà zontada ła posibiłidà de móvar ła preociada sora o soto el mesajo de testo.
• Se cata anca schede nove so i menù de resposta, volta de i mesaji o zonta de link.

Cołor de i account
• Se połe canbiar el cołor de'l nome, insenbre a'l cołor de i link mandài e de łe resposte che se ciapa.
• Se połe sernir anca na icona cofà motivo de sfondo de łe resposte che se ciapa o co se vien sitài.
• 'Ste inpostasion łe ze disponìbiłi anca par i canałi che gà almanco 5 potensiadori ativi.

Storie mejoràe
• Se połe mandar vanti e indrìo i video de łe storie tegnéndoghine strucada una e zlisando vanti e indrìo.
• Par autofoto pì bełe se połe mudar łe inpostasion całor e intensidà de'l flash de ła fotocàmara davanti tegnendo strucà el sìnboło ⚡️.

Statìsteghe so Telegram Desktop
• Ze stà zontada ła pàjina statìsteghe par i grupi e canałi.

Dòpara Telegram da profesionista!
Varda tuti i "sujerimenti de Telegram" traduzesti!

Telegram 10.1 par Android, iOS, macOS e 4.10 par Desktop.

Storie par i canałi
• I utenti Telegram i połe parmétarghe a i só canałi prefarìi de publegar storie dàndoghe potensiadori.
• Tuti i utenti Premium i gà un potensiador da darghe a un canałe calsìase.
• I canałi che ciapa potensiadori i và sù de łeveło e caun łeveło el ghe parmete a'l canałe de publegar na storia in pì a'l dì.
• Se połe spostar el potensiador da un canałe a n'antro, tenpo 24 ore.
• I canałi i połe dimandar potensiadori co un link spesiałe che se cata so Info de'l canałe > Altro > Statìsteghe > Potensiadori.

Figurete de reasion
• Anbo utenti e canałi i połe zontar figurete de reasion so łe storie.
• Łe figurete de reasion łe gà un contador par védar cuanta zente gà sernìo ła mèdema reasion.
• I utenti Premium i połe zontar fin 5 figurete de reasion e doparar tute łe emoji parsonałizàe.

Mùzega so łe storie
• Deso i àudio so'l dispozidivo i połe deventar łe cołone sonore parsonałizàe de łe storie.
• Połe èsar tegnesto l'àudio orijinałe e pozisionarghe sora efeti àudio curti in calsìase ponto de ła storia o métar na mùzega par sararla sù.

Tanto altro
• Inte łe chat privàe ze stà mejorà el sistema de autodestrusion de i media, zontando l'opsion par èsar vardài soło che na volta.
• Łe notìfeghe de aceso łe ze stà spostàe insima ła łista chat e mudàe parché sipie pì ràpido métar a'l seguro el propio account.
• Ze stà postà dezine de bug, mejorà el cargamento de i video so iOS e cresùe łe prestasion jenerałi so Android.

Dòpara Telegram da profesionista!
Varda tuti i "sujerimenti de Telegram" traduzesti!