الشاعر كرار حسين الكربلائي टेलीग्राम पोस्ट

والاكبار
الك حسين اظل خادم والك بار
ازغار الشيعه يفدونك والاكبر
احلفك سيدي بزينب والاكبر
ردت نظرة ابو منك اليه
...
علي خيال ابن وادم خياله
واكبر من خيال الطف خياله
اهل يوسف اذا شافو خياله
مثل يعگوب تسجدله سويه
...
نزل نورك من الجنه ويانه
وبنار العشگ والحب ويانه
الليله فاطمه فرحت ويانه
لعلي الاكبر وطشت واهليه
...
الك مرسال وديته وصليت
يالنارك چوت گلبي وصليت
جمالك أذن بروحي وصليت
صلاة ايات من غصبن عليه
...

وَحي شِعري نِزّل ما جايب أشعار
عليّه بمصحف العشّاگ رَتّل

شايل بيده صورة وگال يا صاح
شوف الوجه هذا وبي تِغَزَل

ما عندي سوابق أنتوا تدرون
أنه دربي حسيني من الأول

خليته إعله فِكري وفِكري محتار
وفوگ الساعة بي فكري يتّأمل

الحچي بيناتنا مو بشَر يا ناس
منه يغار حتى البَدِر لو هل

وسيوف الحواجب فوگ العيون
من شِفته أحِس حيلي تحلحل

من تضحك شفافه يضحك الكون
من يزعل الدنيا وياه تزعل

إذا عالوادي مَر يحَرّك أموات
إحسِب مرة ميّت شافه هلهل

عالنسوان ما وزّع سچاچين
لا كُل وحدة كون أنطيها مِنجَل

نسوان العزيز الگطعَن إچفوف
والله عقولهن گدامه تِختَل

زليخه من تشوفه يمكن تموت
تطلِگ يوسف وبخياله تقبل

علي الأكبر محمد ثاني يا ناس
وقَسَم لو ما محمد هو الأجمل

إذكَرِت إسم النَبي شو ما تِصَلون
صلوا إعله النبي وكل شِده تِنحَل
ـــــــــــــــــــــــــــــــــــــــــــــــــــــــــــــ
المقطوعة للشاعر كرار حسين الكربلائي

https://youtu.be/BdYxDgtk8v0?si=jXdtTYjIKdWgbmsJ

حياك بدر العشيره
تارس دنيانه غيره
يبو فاضل .. يبو فاضل .. يبو فاضل
...
بكلشي عالي يا بدر عالي
غالي تبقه وتسوه كل غالي
هالجنون البيه يحلالي
عندي مثلك والله هنيالي
عباس هيبة عمامه
بيرغ ينثر شهامه
يبو فاضل .. يبو فاضل .. يبو فاضل
...
الليله نورك يسطع ادخيله
وفي وام الوفه تلوليله
يا علي بكامل تفاصيله
الدنيه مطرت غيره هالليله
من شاف هاي الكرامات
جبريل سوه صلوات
يبو فاضل .. يبو فاضل .. يبو فاضل
...
آيه جانت تضوي بزنودك
فسروها وافي بعهودك
ضگنه طعم الماي بوجودك
والعطش مذبوح يم جودك
عطشان ما يبقه حاشه
وعباس ساقي العطاشه
يبو فاضل .. يبو فاضل .. يبو فاضل
...
أمنيات ويا حلم حيدر
انت تكبر والامل يكبر
بكربله تتكفل الخدر
وانت تلزم ظهر ابو الاكبر
مثلك يحصل اخو منين
يا كاشف الكرب الحسين
يبو فاضل .. يبو فاضل .. يبو فاضل
...
يا امير الحومه لو ضهضب
الكون يتعب وانت ما تتعب
يا هله بنبضة گلب زينب
انت رايه ومحمل ومعصب
عباس خدر العقيله
غيرك ماكو كفيله
يبو فاضل .. يبو فاضل .. يبو فاضل
...
خادم الحسين ( عليه السلام)
كرار حسين الكربلائي
( ابو كميل)

4(مقطوعه صلواتيه للإمام الحسين ۞۞ عليه السلام۞۞)

يالمحبوب ۞۞ أسمك عالرمش وبناظري مكتوب۞۞ يالمحبوب
البست ثوب بخدمتك ما اعيف الثوب ۞۞ وخلها الدنيــــــــــــــــه تمشي وياي بالمگلوب
نار محبتك بيها الدليل يــــــــــــــــــذوب ۞۞ وكلما انچوي اصــــرخ بصوتي النوبي يالمحبوب
انته الي تراعيني۞۞ اعوزن انت تغنيني ۞۞ امرض انت تشفيني۞۞ شريد تنفذ المطلوب
بأربع احرفك مجنـــــــــون ۞۞ حاء وسين ياء ونـــــــــــون ۞۞ يا من بالشـــــــــدد مندوب
ضماير رددت وكلــــوب ۞۞ لو حبك ذنب عن هــــــالذنب منتوب ۞۞ يالمحبــــــوب








5 (هوسات وابوذيات للحسين)
صلي وزكّي والمعبـــــــــــود عِبده ۞۞ وطريق الآخره بحسين عَبده
إِخدمه والشرف لو صرت عبده ۞۞ تحصّل آخره ودنيه سويه

أناجي وصار بسم حسين منجاي ۞۞ لأن محبته بكل عسر منجاي
شفت نوروصحت ياناس من جاي ۞۞ گالولي الحسين السطع ضيه

سألوني إعله أسمي واعله اصلي منين ۞۞ ومنين اهلك وگالولي تسكن وين
كلتلهم حياتي وكل وجودي حسـين ۞۞ (وخادم لحسين يسموني)

دنيه بغير حب حسين ماتنراد ۞۞ ويظل هذا الشعار بكل وكت ينعاد
كل ارواحنه فدوه لبو السجـاد ۞۞ (وبحب احسين انجنينه)

هلالك بالسمه لعْيونّه من بـــــــــان ۞۞ نسينه همومنه والدمعه والأحزان
الف رحمه اعله ابيك ياشهر شعبان ۞۞ (بالغالي فرحّت الشيعه)

6(هوسات ابوذيات للعباس عليه السلام)
هله بالوفي الما يخــــــلف وعيده فرحنه بيوم ميلاده وعيده
لهذا البيت راح اقــــره واعيده للعباس تحله الأبوذيه

اليشوفه ينذهل فكــــــره ورايه ورث من والده غيره ورايه
بسمه لو صحت صيحو ورايه هله بعباس ليث الغاضريه

وصل للمشرعه العباس وعين العلگمي اتشوفه دگ رايته اعله الشاطي وترجف گامت جروفه
ما دنّگ اخو زينب الماي ارتفع لچفوفــــــــــــه (والماي اندار بنص جوده)

يوم الرابع بشعبان شع من الگمر ضيه وتكلّم بالمهد عباس وعينه لحيدر اربيه
يگله بشّر الشيعه الحوائج كلها مگضيــه (وعيونك كل حاجه اگضيها)

سوّه معجزه العباس يشيعه بيوم ميلاده الحسن وحسين يم مهده وضحك بوجوه اسياده
وزينب من اجت يمه گام يگطّع امهــــــاده ( ولزينب أشّر بجفوفه)
خادم الحسين (عليه السلام)
كرار حسين الكربلائي

من جمال اعيونه
الوادم ايسمونه
يا يوسف المدينه .. يا يوسف المدينه
...
علي الاكبر عشگ يكبر على مر الدهر
وفه وغيره بتعابيره تراتيل السحر
على عمه طلع رسمه جماله من الگمر
نبع صافي و حلم غافي عله رموش السهر

كل شمايل حيدر
اتجمعت بالاكبر
بآس النجم جبينه
...
السموات السبع نزلت سمه تتبع سمه
تبسم وانتشر جوهر جمال بمبسمه
محمد كربله قادم فرحنه بمقدمه
هوادج نور نزلتله بقيادة فاطمه

فاطميه اوصافه
والعسل بشفافه
غٓيمة مطر حنينه
...
علي الاكبر سطع وجهه البدر خل تختفي
الشمس لو شاهدت نوره ضياها ينطفي
زليخه الآن لو تنظر جماله اليوسفي
تجي وتسجد له وبطلعة خياله تكتفي

ليله تسلم ايدج
يا حلاة وليدج
صٓلو على نبينه
...
اذا يمشي بأرض جدمه تخضر بالورد
اليمر بالصيف من يمه يموت من البرد
الزعل بعيونه لو بيّن علي چنه ويهد
الحرب والبالحرب تاخذ تحيه وتستعد

من يهوّس سيفه
تصير كلها بكيفه
يٓمنة علي يمينه
...
شگولن عنه وبوجهه مهابة بسمله
شسميه علي لو عباس لو سيد المله
سمعنه بيوم ميلاده تهلهل كربله
هله بنوره هله بسيفه هله و مية هله

حاير بتفسيره
كربلائي الغيره
وٓينه اليشبهه وينه
...
خادم الحسين ( عليه السلام)
كرار حسين الكربلائي
( ابو كميل)

انت عالم ثاني .. عايش بوجداني
هله هله هله هله يعباس
....
يا گمر عالي ولا ينلاح
من تجي ابالي الگلب يرتاح
يا بو فاضل انت ظهر حسين
يالجمالك من ضوه المصباح

والنعم يبو فاضل يا گمر متكامل
بس الك يالغالي تحله كلمة كافل

دنيه كلها اتطوفك
كعبه بين اجفوفك
هله هله هله هله يعباس
....
طيفك اعله عيوني رايح جاي
ناسي كلشي بعمري وانت وياي
بمولدك فرحان حته الغيم
گال ابو فاضل امير الماي

يا امير الغيره انت شيخ الديره
من جمال عيونك عقلي صار بحيره

انت عم الساده
النفرح ميلاده
هله هله هله هله يعباس
....
هبت انفاسك عطر للناس
منك يغار الورد والياس
أذن بإذن العطش جبريل
النهر گطره بجربة العباس

خلها تدري الوادم الماي عندك خادم
الدنيه والبالدنيه يسجد لبني هاشم

يابو فاضل جودك
غيمه بين زنودك
هله هله هله هله يعباس
....
ابو طالب كافل المختار
وانت كافل روح للكرار
خدر زينب سر الاعظم بي
وباني بعيونك لزينب دار

زينبك بإحساسك غيرة الله براسك
وچي تشم بحسينك طيب الله انفاسك

سيد الوفايه
رايه شايل رايه
هله هله هله هله يعباس
....
حُبك بروحي يعيش سنين
حُبك بگد كربله مرتين
ماكو واحد يوصف العباس
اليوصف العباس بس حسين

والگمر لو شافك يخجل من اوصافك
والفجر يتوضه من النده البشفافك

يا دوه لجروحي
انت مالك روحي
هله هله هله هله يعباس
....
خادم العباس ( عليه السلام)
كرار حسين الكربلائي
( ابو كميل )

هله يا بو علي
عشگي الاولي
حبيتك سميتك
عشكي الاولي
..
ميلادك ما اجمله هالليله الفرح حله ميلاد الإباء
هله يا بو علي هله هله بيك بگد كربله وبگد السماء

انت شمعة كربله ومصباحها
والسمه علنت الك افراحها
والملائك صفگت بجناحها
يا بو علي

فرحانه السمه
يا بن فاطمه
ناديتك سميتك
عشكي الاولي
..
عله مهدك فطرس نزل
شفه جنحه وشافك امل مثلك يلگه وين
گالوله شنهو الحصل
ردد هذا المستهل محبوبي حسين

وصاح ابو السجاد روحو لبابه
سجلو اسمكم يا خلگ بكتابه
يا هو مثلك و الدوه بترابه
يا بو علي

دوه اسمك دوه
واغله من الهوه
شميتك سميتك
عشگي الاولي
...
أرضه بنارك احترگ هيهات عنك افترگ يا اعظم إمام
لولاك گلبي ما يدگ مهيوب وياك العشگ ولغيرك حرام

انت مو صدفه رزق رباني
واليضيعني ايعرف عنواني
تراب يم باب الصحن يلگاني
يا بو علي

وداعة گبتك
بيتي بحضرتك
يم بيتك سميتك
عشگي الاولي
...
اهواك يا جنة عدن اهواك يشهدلي الزمن وايام السنين
ضايع دونك يا وطن لو گالو انت لمن اصرخ للحسين


آنه عله الفطره اصيح بصيحتي
حسين احبنك يبعد رويحتي
حروفك بوكت الصلاه تسبيحتي
يا بو علي

مربيني بزغر
مدللني بكُبر
تربيتك سميتك
عشگي الاولي
...
مولاي يا عطر الورد ما يوم عنك ابتعد يا كهف الحنان
تاخذني الدنيه وترد يحسين وارجعلك عبد والگاك الأمان

انت سر العاجز بتفسيرك
تضيع روحي من تروح لغيرك
الخير انت وكلنه عشنه بخيرك
يا بو علي

والحب كلمتين
خادم للحسين
وبصيتك سميتك
عشگي الاولي
...
خادم الحسين ( عليه السلام)
كرار حسين الكربلائي
( ابو كميل)

جديد 💔 استشهاد الإمام الكاظم 💔

| *غريب * |

🎙️أداء ملا :
‏خالد الكربلائي

🖋️كلمات الشاعر:
‏كرارحسين الكربلائي

🎛️ الهندسة الصوتية والتوزيع:
اركان السلامي

‏اشراف العام
خالدالبراك

🎥 إخراج:
‏نشوان النصراوي
________________________________
*للمشاهدة* *YOUTUBE*
https://youtu.be/8arFVb4Wr7o?si=nHz_zkBhUxaGJW8Z