الشاعر الحاج ثائر الربيعي

استشهاد الامام الكاظم ع

غربه ومتت موتت مساجين
عن اهلي كثرت چلمة الوين
رمشي ياهو الغمضه
عني وينك يالرضا
موتت مساجين
++++++++++
لچمه لچمه روحي طلعت واعتبر موتي مريح
من تجيني لوية السم آه يبني الحگني اصيح
مره اگعد مره انهض وارجع الوجهي اطيح
ساعه ابرد ساعه احتر مشكله بچبدي جريح

سجانه ما صاحو سلامات
بس چلمة البشرني ها مات؟
سمَي بعروگي مضه
عني وينك يالرضا
موتت مساجين
++++++++++
اگبالي صارت كل صوركم من اجاني الاحتضار
روحي تطلع وآنه اتاني باقي بعيوني انتظار
رايد اعيوني اليسدها چف عزيز وگلبه حار
گلبي عطشان اعله چلمة بويه من ولدي الزغار

لو عالاقـل معصومه وياي
چفها اعله شفتي ايگطر الماي
اتگلي سجنك ماگضه
عني وينك يالرضا
موتت مساجين
+++++++++++
بروحي ضلت هالوصيه والتفت مامش حبيب
مني ياخذ للمدينه چلمه يحچيها بنحيب
فوگ ربوه ايعلَي صوته مات ابن جعفر غريب
جسمه منرض بالسلاسل وثوبه من دمعه خضيب

تركوها گعدتكم عله الباب
المن بعد ماترجع احباب
الكاظم النحبه قضى
عني وينك يالرضا
موتت مساجين
+++++++++++
من اجاني موتي وينك وانتظرتك ما اجيت
ايگلبوني يمنه يسره او من دروا بيه انتهيت
ايمددوني وارجع التم من زغر گيدي انحنيت
ابقسوه اديه مددوها ياهو يسمع لو شكيت

سجّـانه واتجبلـلها مسجون
سدوهن بسطرات الاعيون
المن دمعها فايِضه
عني وينك يالرضا
موتت مساجين
+++++++++++
هسه اقلها لو تجيني للنعش رايدله شيل
الغربه بويه استثگلوني والحچي يطلع ثجيل
منهم اسمع تعبتنه وعالنعش جسمي يميل
مو هداوه بكل حملهم عالجسر شمروني حيل

ويه النعش ماعدهم انصاف
شمروا شمر من فوگ الاجتاف
اعضامي كلها مرضرضه
عني وينك يالرضا
موتت مساجين

ثائر الربيعي

وفاة السيده زينب ع

كتلتني لهموم/منتظره هاليوم
يجمعني وياچ الگبر
منتظره يالزهره شكثر
++++++++++
خلصت وصارت سوالف دمعي يحچيها يزهره
التاكل ابگلبه الهظيمه نبرة الصوت التفسره
اتجاوزت عثرت مشيتي بالنفس صارتلي عثره
اتطول سالفتي الگصيره بين چلمه وچلمه حسره

لمصيبة جسين/وحرگ الصواوين
نگعد سوه ونبچي جمر
مشتاگه يالزهره شكثر
+++++++++++++
لا تلچميني والچمچ من اشبگچ الزچيه
لا تنزليها عيونچ لاتصد اثار اديه
بالبقى مني اجيتچ كلشي غالي راح اليه
طاحت ابطيحة اخوتي مني چلمة هاشميه

هسه اعله كل حال/اتمنه تنگال
چلمة هله ام الخدر
مشتاگه يالزهره شكثر
+++++++++++
شيلتچ هاي اعله راسي امتربه يمچ جبتها
رمله چانت من خيامي الوگعت حسين اركضتها
من صرت عنه مسافه خيل يم جسمه شفتها
مو بعيده التله عنّه كسرت ضلوعه سمعتها

وابونّته چان/ايناديني عطشان
وي ينحره ذابحني الشمر
مشتاگه ياازهره اشكثر
++++++++++++
امحمّله بگلبي سوالف لكن اذكر منها وحده
زلمه ليسلّب رقيه وانه حرمه شلون ارده
يالبديچ اشگفتي سوطه امچتفه انه بيش اصده
شوغت البسمار ارحم من حبل لبئيدي شده

يجرح بلحساس/يْمه حچي الناس
والموتي عالهزله انتظر
مشتاگه ياازهره اشكثر
++++++++++++
لسه رجفه امعاشرتني من درب ذاك المشيته
مانشف حبل البديه من دمع عيني البچيته
اعيون ماهي عيون اهلنه والغريب الرافگيته
والسبي شطوله نهاره ياعلي ادرگني گضيته

لمن يجي اليل/ونوح المداليل
ادعي يجي وكت الفجر
مشتاگه يالزهره شكثر
+++++++++++
الغربه ما عافتني تالي حته بالموته غريبه
قلّه لحباب التجيها ازيارتي صعبه المصيبه
اتنشف جروحي المواكب
واليون اسمع نحيبه
حته وانه بگبري انادي منين ابو فاضل اجيبه

لا ينقفل باب/وتعود الاحباب
لطمتهم ابصحني تِسر
مشتاگه يالزهره شكثر


ثائر الربيعي

وفاة السيده زينب ع

انتهت غربة حياتي
وماتفارگني امنياتي
ردتك بساعة مماتي
يابو فاضل
++++++++
يالگمر آنه/والله تعبانه
من الم سنيني

صار چم الليله/موتي ادعيله
بالعجل يجيني

الشام غربه وارجعت مجبوره
ماتفارگ بالي ذيچ الصوره
للمجالس دخلت المستوره

وانتهت ذيج وعجيبه
ردت اعليه المصيبه
موتي بالشام وغريبه
يابو فاضل
++++++++
انتهت روحي/وفزّت جروحي
محتاجه اهلها

لا اهل عندي/موتتي الوحدي
حيرتي اشيحلها

روحي تطلع وانه اگلها اتاني
بلكي واحد يحضر امن اخواني
يسمع آخر خويه من الساني

اتسلهم اعيوني واردها
ماردت تغمض وحدها
بلكي بچفوفك تسدها
يابو فاضل
+++++++++
امنيتي عباسي/هسه يم راسي
يبچي عله اخته

ويلطم ضلوعه/وتنزل ادموعه
وعالي نحبته

لو تجيني وحته اموت اگبالك
شلون تبچي واشيصير بحالك
آ يخيتي اتصيح وانه ابرالك

لو اموت ابين اخوتي
والله هنيالي اعله موتي
يحچي آخر كلمه صوتي
يابو فاضل
++++++++
ميته والناعي/ايهيج اوجاعي
صوته الاسمعه

وين اهل زينب/نعشي يتعجب
مافوگه دمعه

ما بقالي واحد امن اولادي
آ ييمه من اموت اينادي
ممشه نعشي چن هذاك الحادي

من عرف بيه العقيله
ايعثّر ابممشه الهزيله
والنعش غربه التشيله
يابو فاضل
+++++++++
انت هسه ادري/گاعد بگبري
الجيتي اتّاني

يمته نتلاگه/والله مشتاگه
وتعرف حناني

عيني اول ما اشوفك بيها
وبدموعي اسوالفي احچها
حسين يمسح دمعتي الابچيها

ترجع الگعده سويه
يلزم حسين ابأديه
وتشبگ اعليه رقيه
يابو فاضل
++++++++
ابگبري من نلتم/عيفو الامخييم
وذيچه ركضتي

اولا تسألوني/اشتعّب اعيوني
واشگد سهرتي

نار گلبي امن المخيم ناره
يمته ادعي المهدي ياخذ ثاره
الشيعه تالي هم تتاني اخباره

بكل عزاء ايلم شملهم
ابو صالح كل ذكرهم
للفرج يدعوله كلهم
يابو فاضل

ثائر الربيعي

وفاة
السيده زينب عليها السلام

زوروني/حته لو من البْعد زوروني
حرموني/ليش من دمع اليحب حرموني
واني ارد الكم سلام
الكم اشتاگ المقام
حرموني
++±+++++++++
من سنه واحسب واتاني ازيارتك
يالتعطر صحني چنت بحسرتك
وايدك اتلامس ضريحي بعبرتك
حضرتي مشتاگه حيل الحضرتك

تنطيها/حگها يمي دمعتك تنطيها
احچيها/ابصدري تخنگ عبرتي واحچيها
ينتظر حته الحمام
الكم اشتاگ المقام
حرموني
++++++++++++++
من اسمعه يملي صوتك مسمعي
وتنعى يمي والله اموتن عالنعي
چن احس دمعك يخالط مدمعي
ايّردكم الله بالسلامه اندعي

اتهموني/اعزاز عندي كلش اتهموني
اتذكروني/بالمجالس يامن اتذكروني
مختصر كل الكلام
الكم اشتاگ المقام
حرموني
++++++++++++
يمته رايتكم تهل من كربله
البي عطر كفالي بيرغ شايله
گاصديني بغربتي ميّة هله
بالمواكب روحي احسها امدلـله

مادامت/اعليه فزعتكم لچن مادامت
مانامت/اعيوني من ذاك الضعن مانامت
ظلمه بس وينه الينام
الكم اشتاگ المقام
حرموني
++++++++++++
رجعت وهم ابرقيه گمت اهم
ياهو يمها من تفز من الحلم
ابابها من تسمع اصياح الزلم
چانت اتلزّم عباتي وتنلچم

الخايفه/هسه تلزم ياعبايه الخايفه
ماشايفه/هيچي حيره من قبل ماشايفه
ناس ماتعرف حرام
الكم اشتاگ المقام
حرموني
+++++++++++
كلمن اليوصل ضريحي وماگدر
ايزور ماسمحت ظروفه واعتذر
يلگه فوك التله من عندي اثر
ادعي يم الخيمگه للمنتظر

يحبابي/لو ذكرتو المنتظر يحبابي
يفك بابي/خل ترد زيارتي يفك باب
وانسه نيران الخيام
الكم اشتاگ المقام
حرموني
+++++++++++
ثائر الربيعي

لو يرد بيه زمان
وبوفاتج حاضر اني
برايتي ودمعة حناني
يزينب يزينب
++++++++++++
الناعي اتصوره لو جاني ينعه
ماتت زينبك عباس اسمعه
اگوم وعالوجه اخذلي وگعه
مفرع حافي اركض كلي دمعه

بركضي اعثرحيلي مختل
يشبه اصعودچ عله التل
حاير وفگدچ دهاني

يزينب يزينب
+++++++++++
بصوت الماله غيرچ رحتي عنّه
اعله نعشج راح اون شلون ونه
دمــع عباس زينب ماكو منّه
بي طعم الوفه وريحة محنّه

دمعت الكافل چبــيره
ابگد جرح ذيچ المسيره
امخيمچ جمره چواني

يزينب يزينب
+++++++++
الميته وناس غربه ايشيعوها
عليها اثار من چلمه الحچوها
عن اجنازة اخته وين اخوها
بعيده اطفوفهم يمكن نسوها

كون ارد ابعمري ليله
نعشچ اعله متوني اشيله
فكري يم گبرچ خذاني

يزينب يزينب
++++++++++++
اعليچ امن النهر چانت نظرتي
انتظارچ كسّر ابگلبي حسرتي
ابگد دعواچ وشگد انتظرتي
اعله نعشچ رايد انحبها عبرتي

غالي دمعي وما ابالي
بس الج مايبقى غالي
كلشي بغيابچ يعاني

يزينب يزينب
++++++++++
حزينه واضــح بوجهچ عذابچ
اعــرف وين يتجسد مصابچ
لا باقــي ولد يورث ثيابــچ
عدمن ضل حرز زينب حجابچ

البي عطر اختي الاميره
وفوگه اثر لوعة اسيره
وبي امل حرمه تتاني
يزينب يزينب
+++++++++++

ثائر الربيعي

استشهاد الامام علي الهادي ع

تذكر الروايه بحزن الامام العسكري ع عله والده وشق ثوبه.
لسان حاله

ابچي وادرع ثوبي
الوالدي ومحبوبي
فاگد والدي الهادي مو اي بشر
حگي كون امن البچي اعمي النظر
++++++++
العسكري آنه يمن صوتي سمعته
من صحت يابويه مبحوح بعبرته
حاسر الراس وحزن ثوبي درعته
ياقدر عني المشه ماتعرف انته

حافي والطم راسي
عبره تملي انفاسي
هذا وجه الله المشه عالي القدر
حگي كون امن البچي اعمي النظر
. والدي ومحبوبي
+++++++++
الصادق الگال الجزع لهلي عباده
امشردين بيا ذنب غير احنه ساده
والقتل سم وذبح صار النه عاده
شفت ابوي يعالج السم عالوساده

امذبلات اعيونه
الهادي اصفر لونه
چنه ضلع الزهره دلالي انكسر
حگي كون امن البچي اعمي النظر
والدي ومحبوبي
+++++++++++
بياذنب شمسوي ابو روح الحنينه
فتره ضل ايعالج الامه بونينه
يلفظ انفاسه الاخير وتجري عينه
گلي جدي حسين ياهو المد ادينه

حسن ماخذ باله
عن جروحه وحاله
للمشت فوگ الهزل مييت قهر
حگي كون امن البچي اعمي النظر
والدي ومحبوبي
+++++++++++
احنه وين اوين سامره وسجنّه
ليش من دون الخلگ ضايع وطنه
يا اهل لو ناشدت وشضل باهلنه
ياشمل ضل وبعد شيلم شملنه

يامن اتنشدوني
ليش حمره اعيوني
ابعيد عن اهله اندفن عودي انجبر
حگي كون امن البچي اعمي النظر
والدي ومحبوبي
+++++++++++
انه زين ونعش ابوي بجتفي اشيله
حسين ضل اعله الرمل فتره طويله
والوكت حار وثياب امسلبيله
وعمتي زينب تبچي اخوها اعله الهزيله

بين هاي وهايه
بدمعي چانت غايه
مايفارگنهرالحزن طول الدهر
حگي كون امن البچي اعمي النظر
والدي ومحبوبي

ثائر الربيعي

ام البنين ع. زيارة عاشوراء

بعاشوراء ازورك/واختمها بسجودي
يرزقني حضورك/يحسين بورودي
والموتي انتظر
يجمعنه الگبر
يحسين بورودي
+++++++++++
ليل انهار اعيش زيارتك هاي
وتعقيبة صلاتي
واحمد الله بس لحسين دنياي
خلصت كل حياتي
يل رازقني دمعه فضلك اهواي
وإكملها بمماتي
وجيهه بالحسين اقبلني مولاي
بس هاي امنياتي

ربي اقبل دمعتي/بس لحسين عيني
واتقبل خدمتي/وارباي البنيني
وچفوف البدر
يجمعنه الگبر
+++++++++++
ابني اگبور طين الاربع اقمار
وگبرك بي مناره
احضن گبرك وعن ولدي اندار
واقراها الزياره
عله حسين او على اولاده الاطهار
سلامي بي حراره
واسجد ربي اخذ روحي البُعد نار
حسين اليطفي ناره

وبگبري تجيلي/هلبت ياحبيبي
يالجارح دليلي/بس انت طبيبي
من يگضي العمر
يجمعنه الگبر
يحسين بوردوي
++++++++++
عشت فتره انتظار اوياك مرتين
ابموتك وبوجودك
جنت روحي اگلها لاتموتين
الضعن هلبت يعودك
اگولن خاف اموت ويرجع حسين
عشت گوه اعله مودك
وهسه ادواره ادور عالاجل وين
ويشع لحدي بورودك

منتظريني ادري/مشتاگين اليه
هسه اباب گبري/انته والزچيه
ماريدن شكر
يجمعنه الگبر
يحسين بورودي
+++++++++
محتاره بدمعتي شلون ملگاك
دمع شوگ اعله خدي
لو ابچي الجروحك واگعد انعاك
اغله امنيّه عندي
واگلك هل وفيت بخدمتي وياك
واحچيلي اعله ولدي
يأشرلي ابو فاضل واگف هناك
شوفي يُمه زندي

يالمقبول عذرچ/من طاحت چفوفي
مرفوعات ابشرچ/بيد الزهره شوفي
مقبول العذر
يجمعنه الگبر
++++++++++
گضت بس روحي هم ودها ترجعون
ساعات المنيه
منكم ماردت بس سدت اعيون
واليسبل اديه
يجي العباس لكن نفرض شلون
دمعه ابني عليه
بيش ايشيل نعشي فوگ الامتون
بچفوفه قضيه


يحرگ بالمشاعر/موت الغربه اثاري
ابحالك شنهي صاير/يالمدفون عاري
ما فوگك ستر
يجمعنه الگبر

ثائر الربيعي

دفن مولاتي الزهراء

چلمتها ابخجل تحچها وتردها
وين امي ادفنتها وجيت من عدها
+++++++++++
ليش امي ادفنتها وبسواد الليل
راجع منحني بالممشه بويه اتميل
لو فگد الزچيه اخذ ذاك الحيل

اجروحك چانت الزهره التضمدها
+++++++++++
شلون وللـگبر مـن نزلـتها هناك
اشحچيت اويه الزچيه وشحچت وياك
ابخد امي جرح احچيلي بويه ارجاك

شلون اعله الترب من وسدت خدها
+++++++++++
احچيلچ يزينب كونچ اتگدرين
ريتچ يمنه وكت الدفن وتسمعين
اشلون اعله امه صاح بصوت يُمه حسين

لازم بالچفن مايقبل ايهدها
++++++++++
مو ونه اسمعت من عدها صوت النوح
گلت يمكن الزهره ردت الها الروح
مدت ايدها ولحسين بيها اتلوح

ارجع زينبك ضلت الوحدها
+++++++++++
اصعبهن يزينب بيها گلبي انصاب
من شافوني فوگ امهم اهيل اتراب
اثنعش يايمه صاح حسين بويه حساب

اخذ من ثوبه وصله وعالچفن شدها
++++++++++
وي الحسن گعدو عالگبر يبچون
ماضلت الواحدهم ابوجها اعيون
نرد الدارنه يالحسن خويه شلون

زينب لو درت الله يساعدها
++++++++++
امي ماتردلي او لا گبر ينزار
لو دافنها بويه بوسط هاي الدار
نغفه اعله الگبر انه واخوتي زغار

الدار ابلايه ام شلون اشاهدها

ثائر الربيعي

مولاتي الزهراء. ع. كربلائي

شكر وحمد.... وكلمه بقصد
المولاته يحچيها العبد

محتاج الچ واتريدين
مني دمع يالزهره
+++++++++
كل يوم امد ايدي عليچ امن ابعيد
وبالمجلس اعليه تمدين الايد
اليسألني منك فاطمه شنهي اتريد؟

من تستمع. ..ونه ابجمع
اتمد چفها واتدور دمع

وينه اليساعدني اتگول ضامي ابني گطعو نحره
+++++++
يالزهـره وانتي الرايـده تهـدينه
اتلزمينه لاقرب مجلس اتودينه
المايبچي انتي اعله البچي اتعلمينه

والما بچت....عينه وسكت
اتهمسيله زينبنه انسبت

من تعثر بچفها احبال ضالم ابقوته ايجره
+++++++++
يانعمة الله ورحمته امسمـيها
ليحبها فاطم يشكر الله اعليها
يرضى الرضاها واليحب يرضيها

ايعيف الذنب...لجل اليحب
بدفترها خادم ينكتب

روحيه بانفاسه اتصير مولاتي من إتحضره
+++++++
يا ام ابوها يَـم حـنان الدافي
ما اطلب اكثر نظره منچ كافي
اخلص خدمتي ودمعي ينزل صافي

للمنسلب .. واعله الترب
عاري اعله وجهه منگلب

بلكي ومثل عينچ كون
دمعاتي تنزل حمره
++++++++
كلشي بديكم الله كلشي انطاكم
غير البچي ماعندي غايه اوياكم
لبس السواد وحب دموع اهواكم

للمنسطر.. والمنكسر
گلبه ورِكض فوگ الجمر

من الخيم چوية نار بگلبي وتفسره العبره
++++++++
اتگول انه احسبها الخدم اشرف ناس
منتظره منهم موقف الكله حساس
اويه المهدي يرفع بيده راية عباس

وداعت علي .. ثارات الي
امن الثاني قبل الاولي

للمهدي ادعوا بكل يوم الله يعجل امره

ثائر الربيعي

مولاتي الزهراء. ع

اتذكرتك فوگي الباب من دفعوها
عيني بچف ياعباس من سطروها
دمعاتي نهر
وينك يالگمر
من سطروها
+++++++++
زينب يمه هالمكتوب وصليه للگمر تالي
الى حضرة ابو النوماس عباس الوفي الغالي
خلني ابالك اعله الماي مثل ماجيتني ابالي
كلمن بچه زينب غاد يبني اعتبره چتالي

ضلعي ومحسن والعين هاي اخباري
ياعباس اعله الماي تاخذ ثاري
كاتلني القهر
وينك يالگمر
من سطروها
++++++++
مابين الحيا والموت وامشاهگ عله النسمه
انوي يا علي وما صيح ما اتمالك الچلمه
گلت هيچ الگمر عباس زينب باچر اتحشمه
مو بضلاعي لا لعيون التوجعني ترى الحشمه

اشگف عن عيني صواب صرت بحيره
لو الزم طرف حجاب يابو الغيره
وزينب عالاثر
وينك يالگمر
من سطروها
++++++++++
شحچي وعمري ياعباس چان 18 بعده
شده الحايط بمگفاي وعالباب الرفس شده
محسن مختنگ وياي مثلي حيل ماعنده
اوگع وانهض وعالگاع جمره بچفي تتعده

تطلع واترد بيه الروح واتمناها
ماترجع بس زينب اه يامبچاها
صوت اختك ظهر
وينك يالگمر
من سطروها
++++++++
صحت يا فضه مدي الايد من الگاع گوميني
ماشوف الدرب لاوين ماضل كل ضوه بعيني
زينب لاتجي وياچ وعن حسين ضميني
لو گال شعجب ممشاچ محني انتي وگفيني

ماريد انظر كون حسين دمعه بعينه
ناديله امك هسه بخير وتطمنينه
لا يحني الظهر
وينك يالگمر
من سطروها
+++++++++
بفراش المرض لويات واوجاعي تگلبني
حسين او لو نظر مبچاي نظراته تعذبني
عطشانه يگلي وگام بچفوفه يشربني
واگله دِين الك وياي ارجعه كون الك يبني

يم راسك يبني بيوم هم تلگاني
مو ماي اهناك ارويك دمع احزاني
لو شفت النحر
وينك يالگمر
من سطروها
+++++++

ثائر الربيعي

وفاة القاسم ابن الامام الكاظم. ع
++++++
الغريب اتجرحه كلمة اهلك امنين
ابن الكاظم انه وجدي الاحسين
جرحه عايش اوياي
ابثوابه وزعت ماي..
جدي لحسين
+++++++++++++
غريب اذكر هلك وينه الوصلهم
اعيوني بالمنيه احتاجت الهم
مثلرالوادموالتحتاج اهلهم
شسوي وعني اهلي ابعاد كلهم

جزاك الله يشيخ اهواي ممنون
صيح ابنيتي خل تغمضلي لعيون
اموت واحيه بهداي
بثوابه وزعت ماي
جدي لحسين
+++++++++++
اجه وكته الحچي الما بيك حيله
اجرحك بالحقيقه والثجيله
انه العمته مشت رحله طويله
مسبيه وعله ظهور الهزيله

سيد انه اخبرك واهلي سادات
الغربه مو جديده وشفنه لوعات
ورثنه احسينه ابهاي
بثوابه وزعت ماي
جدي لحسين
+++++++++++++
عندي بس وصيه اسمعها عمي
امانه ابنيتي عندك بيها همه
اذا حانت وفاتي وهيه يمي
لاتحضني واتموت اعله جسمي

للحج لو خذتها وراحت وياك
من عطره اتعرفها دارنه هناك
الدموع اثارها هواي
بثوابه وزعت ماي
جدي لحسين
++++++++++
تعالي ابنيتي اجت ساعت منيتي
اودعچ وارد اوصيچ ابوصيتي
باچر للمدينه لو مشيتي
يعلويه او وگفتي اباب بيتي

على كيفچ يبنتي ابدگت الباب
گلب امي ايعرفها دگت احباب
القاسم تعتقد جاي
بثوابه وزعت ماي
جدي لحسين
++++++++++++
ابعينچ من تصد امي ابحزنها
اتحضنچ حيل تشتم عطر ابنها
شعره ابثوبها اتأكديلي منها
من راسي چنت اغفه ابحضنها

ابزغري دللتني هالحبيبه
موتي بغربه لوتدري المصيبه

حنان البيها منواي
بثوابه وزعت ماي
جدي لحسين
+++++++++++++
جوابچ لمّي من تسأل عليه
الها بختصار احجي القضيه
العزيز ابغربه وا فته المنيه
الچ وصاني يا يُمه بوصيه

مات ابنچ ييمه وگال من. مات
جدي حسين كثريله الثوابه
المصابه طال مبچاي
بثوابه وزعت ماي
جدي لحسين

ثائر الربيعي

الزهراء ع

عيفي موتي ونحچي بالجاي
يالـعـقيلـه الـقــادم اهـواي
    انسي ضلعي والكسر
    خل نسولف عالخدر
        +++++++++
لو متت والمثلچ اليجرح وضعها
تنحچي لو شافو بخدها دمعها
هاي بت الماتت وكسروا ضلعها
هاذي امها ابيتها او واحد صفعها

انتي اميره/والبنات ايصيحن اعليچ اليتيمه
انتي اميره/لو كبرتي اسمچ الماعدها خيمه

     هيچ حسبي الناسچ حساب
     مات ابـوي وحرگو الباب
والخيم من تستعر
خل نسولف عالخدر
       +++++++++
اهواي الـچ من عدها ما مـرن عليه
والحبل ماجربت جرحه ابـأديـه
يُمه صح خدي انضرب وآنه الزچيه
بس عَلَي ماصاحو الـزهـره السبيه

مو بعيده/محسن وما بيني اوبينه المسافه
مو بعيده/مافتحها عيونه خاطر دمعي شافه

    ما سمعته ناده عطشان
   راسه محسن بلجسد چان
لو رجع خالي المهر
خل نسولف عالخدر
       +++++++++
امصايبي اتشوفيهن واكثر مصابچ
بيتج ايحرگونه ماتبقى اعله بابچ
مو مهم السوط مو هذا عذابچ
عنـه تنشغـلين يايـمه ابحجابچ

تالي تالي/يطلع اعليچ الالم مو بالبدايه
تالي تالي/دمچ اتشوفينه جامد عالعبايه

    لـمّن ايتامـچ يـسألـون
    سوطه طابع فوك لمتون
هذا قنفذ لو شمر؟
خل نسولف عالخدر
       ++++++++++
اكـثـر الالـمنـي لتقـصـد  نـظـرنـي
وثاني شال ايده وعله عيوني سطرني
او واحد بضربة چعب رمحه شمرني
ومن لذت بالباب حط رجله وعصرني

اتعلميها/خنگة الصوت وخجل واحد يسمعه
اتعلميها/الصوت يوصل بطرف اشفافه ويرجعه

       اليشهگ وبنفاسه دخان
       وده يركض وين ماچان
لاچن ايلزمه الستر
خل نسولف عالخدر
      ++++++++++++
اثمنطعش خمسين مايفرق عمرها
تبچي دم الحرمه اذا واحد نهرها
العاشت وكل همها لحجاب وخدرها
ابيت اهلها اشلون اذا واحد سطرها

صدگيني/خيمه يمه وبابي مايفرق جمرهن
صدگيني/شوفي مثل اجدامي هم يطبع اثرهن

     نفسه نفسه بجدمج يصير
     مثلي جفنچ يصبح زغير
مثلي تبچين اشكثر
خل نسولف عالخدر
       ++++++++++
يمه زينب هـاي نظرتنه الاخيره
وتنحفر لم الحسن حفره زغيره
وتبقى حسره ازيارته گبري مصيره
وانتي هم بالغربه گبرچ يالاميره

ملتقانه/ يم رسول الله ونسولفله المصيبه
ملتقانه/ويسمع حسين الكلام اخته الحبيبه

      من يشوفچ يمي تبچين
     يعله صوته مبچه لحسين
يبدي حزني امن الصفر
خل نسولف عالخدر

ثائر الربيعي

استشهاد الزهراء  ع

محتاره بخدري ومحتاره ابأبني
اشما ادفع روحي والباب ايردني
       حاولت اشگد
     كل حيلي انهد    
     ++++++++++
قبل ما يلتقي المسمار بضلوعي
محسن والحجاب وستري موضوعي
ابذلت مجهودي كله ونزلت ادموعي
الوع ابسكته ما واحد سمع لوعي

اشد الايد//لچن شيفيد
عالباب ابرفسته ايزيد

تطلع اتمنه وما طلعت روحي
مو عيني وضلعي اكثرها جروحي
     ايسبني اتعمد
     كل حيلي انهد
      ++++++++++
بين العصره والدخانه والخنگه
ادور عالهوى وما تحصل الشهگه
بقت فتره عليه بابي والطبگه
امد ايدي اعله تچوه بصفي ما الگه

ولهيب النار //اعله وجهي وحار.
وين انطي الوجه احتار

بيتي ومحتاره وما اندل دربي
تطلع لحگوني من دگت گلبي
     ماجاني احد
     كل حيلي انهد
     ++++++++++
اكثر من وگعتي اتألم النهضه
بسطرته ادموعي عالجدران تتشضه
اصيح وصوتي من النشغه بي كضه
طلعت گوه بس لحگيني يافضه

تعالي بساع//كسيره اضلاع
  ضاع اوليدي محسن ضاع

مافكني بسوطه هم رد يضربني
انهض بالگوه وللگاع ايذبني
      صحته وما رد
      كل حيلي انهد
     +++++++++
سطرو عيني وبعيني الوكت ظلمه
الخنگه والهوى البالگوه اشتمه
صوت اسمعته وينچ فاطمه يمه
زينب والحسن وحسين اجه ابهمه

شبگ ليدين //عليه حسين
وين ايگلي جرحچ وين

گتله انته اكبرها جروحي وآلامي
يومك عن يومي يفرق يالضامي
      الزينب من صد
      كل حيلي انهد
     +++++++++
عليه التمو اولادي يحاموني
شگف السوط لا يوصل عله متوني
وهگ بيهم ضرب يايمه نادوني
من وگعوا عليه بضلعي لچموني

اون بهداي//جروحي اهواي
   اضمه وما طلبت الماي

اعطش واتحمل واتذكر  خيمه
محترگه وزينب تركض بالهميه
       وكلشي اتفرهد
       كل حيلي انهد

ثائر الربيعي

ميلاد سيد البريه.ص.

صلوها/ورفعوها/وعيدوها
الصلاة اعله النبي
****
اسم ابو الزهره.. كرر بذكره
صلي عالهادي.. السانك اتعطره.

الصله لو مره..ال طه والعتره
منه يقبلها..ايردها اله بعشره

للهادي/لينادي/مو عادي.
الصلاة اعله النبي
صلوها..ورفعوها.وعيدوها..الصلاة اعله النبي
***
عافية ديني..ونور البعيني
منك اكسبته.. حبي لحسيني

طه محبوبي..امنور دروبي
بس ذكر اسمه.. يغفر اذنوبي

فرحتنه/وبسمتنه/ولمتنه.
الصلاة اعله النبي
صلوها.ورفعوها.وعيدوها
الصلاة اعله النبي
****
من اصليها..استلذ بيها
الجنه بارينه..بيها ينطيها

الكثرة اقواله..بالنبي واله
دنيه واخرته..امرتب احواله

كررنه/ ورددنه/بمحفلنه
الصلاة اعله النبي
صلوها .ورفعوها.وعيدوها
الصلاة اعله النبي
****
مولد الرحمه...ياجمال اسمه
بالمدينه انت..وعطرك اشتمه

اغله كل غالي..ونعمة العالي
الحمد لله..للنبي اموالي

اتنجيني/وتحويني/وترويني
الصلاة اعله النبي
صلوها..ورفعوها..وعيدوها.الصلاة اعله النبي
*
يا اللهي اشهد..انه احب احمد
بذكره بلساني..روحي تتورد

يا اللهي اقبل..مني هالمحفل
وفرحة احبابه..بالنبي المرسل

قرآنك/اذانك/ايمانك
الصلاة اعله النبي
صلوها..ورفعوها..وعيدوها.الصلاة اعله النبي

ثائر الربيعي

ياليلي طوّل ساعاتك
خل نخدم هاي آخر ليله

ضل حيل بجسمي وللخدمه
مغلوب الي ايرد ابحيله

طول ساعاتك خل اخدم
من تخلص هليله اتغّرب
ماريد ارجع لامي وبيتي
بالموكب ارد ابقى امترب

ايطيح الموكب وانه بگلبي
چم موكب جرحك بانيله
ضل حيل بجسمي وللخدمه
مغلوب الي ايرد ابحيله

كلمات
علي ثائر الربيعي

الاربعين

ياهله ابريحة اهلنه ياهله
يابو فاضل رد ضعنّه الكربله
+++++++++
ياهو بينه ايگوم يتلگه الضعن
اشلون ملگاگ الچفوف اتگطعن
اليوگف اعله التله يتلگه الاجن

ياهو بينه والضعن استقبله
+++++++++
وينه لينسيهن الآم السفر
شلونواصيحن ياهله من النحر
لو اجت شتگول زينب يالگمر

چف اخو لا ضل يلاگي امدلـله
++++++++
الحمد لله اعله السلامه مالگت
بيها روح وعدله زينبنه اجت
من بعيد اسمعته صوت اختك بچت

صوت وينك من بعيد اترتله
++++++++++
اشلون ياعباس من اتمر عليك
والضعن عطشان يالكافل يجيك
خويه من تراب گبرك شيل اديك

منظر اسكينه صعب تتحمله
++++++++
ابني عبد الله فتح عينه وگعد
من بُعد يسمع دللو يالولد
لسه عطشان ودليله المابرد

بس حضن امه اليحل المسأله
+++++++
ماكو رايه اتلاگي اختنه لا علم
وين مگعدهن منو الينصب خيم
فوگ گبري تگعد الحره بالم

من دموع الحره گبري اتبلـله

ثائر الربيعي

استشهاد المام الحسن ع

عذابي ومماتي اعله جرحچ يهون
وغربتچ يزينب ابهذيچ الضعون
مثل هيچي ليله
اعله ظهر الهزيله
بهذيچ الضعون
++++++++
تودعين الحسن وانتي بوداعچ هسه مستوره
چبير اخوانچ واعرف عليه بكلشي معذوره
عزيزه انتي تصد عيني عليچ وتنرسم صوره
ماتبجيها يم حسين دمعتج هايه مجبوره

بحرگهن خيامچ يشغلچ يتيم
يلوذ بعباتچ وصياح الحريم
حسرتچ طويله
اعله ظهر الهزيله
بهذيچ الضعون
+++++++++
مو آخر طشت هذا يخيتي اتشاهده اعيونچ
ولا آخر چبد مفتوت تخطف شوفته لونچ
هسه اگبالي من تبچين واخوانچ يسكتونچ
تجيلچ فتره من تبچين سوط ايدگ عله امتونچ

اموت ابدياري وعيالي ابأمان
يزيتب غربتچ تحير الزمان
العظيمه العقيله
اعله ظهر الهزيله
بهذيچ الضعون
++++++++
قبل موتي اريد العين عليچ دموعي تهملها
يزينب دخلتچ للشام شده وياهو ليحلها
تذكريني وعليچ اتصيح هاي اخت الحسن كلها
ادموعچ لو اجه طرواي لثيابچ تبلـلها

زمن مايرجعه اليدفنه التراب
يريت انه يمچ بهذاك المصاب
عذابچ اشيله
اعله ظهر الهزيله
بهذيچ الضعون
++++++++
يصادفكم سنة وانتي وفاتي بناگه تحييها
اعله رمله تنظر اعيونچ بالنظره تعزيها
اشلون الحرمه تلطم عاد اذا مچتوفه ايديها
بين احسينچ وجسّام نظراتچ تديريها

يعين الله گلبچ چثيره الجروح
عله اخوتها زينب تخلصيها نوح
ولا تبقى حيله
اعله ظهر الهزيله
بهذيچ الضعون
++++++++
يشيعوني الاهل باچر اخوتي الي يشيعوني
على طولي جسد والراس ملتحمه يدفنوني
اعليه ماتم ايعزون وادمهم ينوحوني
وتجيني انتي بظلام الليل اويه اخوانچ تزوروني

لچن يالعقيله اضل تالي وين
بعيده دفنتي اعله اخوي الحسين
طويله الرحيله
اعله ظهر الهزيله
بهذيچ الضعون

ثائر الربيعي

السجاد. عليه السلام

يسألون السجاد ع
اما آن لحزنك ان ينقضي يبن رسول الله. ص
+++++++++
يامن على حـزني تسألوني
ما ينقضي لو يرحن اعيوني
ماينحچي الشففته
اتموتون اذا گلـته
لو يرحن اعيوني
+++++++
ليش الحزن طال
مو قتل الارجال
گلتوها يالسجاد عدكـم عاده

صح لكن اووين
اسمعتو بنساوين
يوم انسبت ياناس من الساده

اتلوموني وانه الشاف اخته ابعينه
مسبيه وايضربون يمي اسكينه
تتلافت وعالرمح راس الكافل
يهتز زعل رمحه ويشوف البينه

مو سهله كلش احنه اهل غيره
كل فتره ضعني داخل بديره
اشيحچيها سالفته
اتموتون اذا گلته
+++++++++
گلتوا يسجاد
ماتاكل الزاد
الا ودمـوعك بللت ماعـونـه

اكل السبي چان
ايطبخونه عدوان
وهيجي شمر بوجوهنه ايشمرونه

تاكل شلون الايدها محروگه
والثانيه چف بالحبل مطبوگه
تفتر عليهن عمتي وتواكلهن
ذيچ الي من ذيچ الطعام اتضوكه

تگعد رباب امكتره ابعيده
تگول الاكل عذروني ماريده
اتعذبوني اذا ضگته
اتموتون اذا گلته
+++++++++++
بعض الروايات
احچيها هيهات
اقروها بين ادموعي من ابچيها

عاده اصبحت هاي
قبل الذبح ماي
يسگونه بس سالفتي صعبه احچيها

ابن الزجيه قبل گطعت راسه
عطشان يحچيها باخير انفاسه
واگبال عينه ماي جابو بدوه
اكبر جروحه جان جرح حساسه

عباسي خويه الحگني بلسانه
بس ماحچاها خلصت اخوانه
لابيه والحگته
اتموتون لو گلته
+++++++++++
بذاك الوكت حيل
مابيه واعليل
اصعود الهزيله ماتفارگ بالي

عالهزّل اشلون
رچبتهن ام عون
وضلينه انه وعمتي زينب تالي

واحد للاخر دمعه ينزل سكته
گلتلها صعدي اتگلي عمه وانتت؟
فوگ الهزيله بالدفع صعدوني
وذاك الحچي الماتنحچي سالفته

ثگل السلاسل والمرض بيه
وكثر السياط الطاحت اعليه
وذل التحـملـته
تموتون اذا گلته
+++++++++
جابوها لحبال
ايچتفون الاعيال
حرمه الغريب ايلامس ايد الحرمه

صرت انه مجبور
اچتفها لخدور
چف الزغير الحبل ادري ايألمه

اتصدگوني لو گلتلكم ابأيديه
بذاك الحبل شديت ايد ارقيه
تنظرلي بستغراب بعد اعيوني
شمسويه ليش اتگلي انه شبيه

كلتلها فدوه دمعي لعيونچ
عن لاتچي الغربه يچتفونچ
ياخدر چتفته
تموتون اذا گلته
+++++++++
بس روس الاقلام
عن محنة الشام
والباقي من ذاك الحديث اجتازه

لمگييد ايطيح
عكازتي ايصيح
وعني مسافه شمروا العكازه

يالشام بس الله بجرحها العالم
ماعدها رحمه وياي ذيج الوادم
ايعرفوني حق المعرفه وعذبوني
مابقى امن اهلي غيري واحد سالم

ومنهن بعد موتي تعرفوها
بمتوني اثر لمن تغسلوها
والينحچي بوكته
اتموتون اذا گلته

ثائر الربيعي

نزال. السبي

كون امي بالسبي ويـّاچن
تحرس وطول الدرب ترعاچن
ام البنين
__
الخيمه لو اجو ليها
ادري دموع مابيها
بس تگدر تطفيها ..بغيرتها

شحده  اليسلب اسكينه
تنادي الحرمله وينه
الا اليوم اسد عينه.. وارمدها


غيره ام الگمر عدها
كلها توگف بسدها
جيش اتصير وحدها .. بشيلتها

بشيلة امي خل يرف الواچن
كون امي بالسبي ويـّاچن
ام البنين
****
زينب تحمي عيلتها
وامي يمها تسندها
وترفع الها رايتها .. بأيديها

ياهزله اليجيبوها
ويم زينب يخلوها
بهزله مايمشوها .. تحميها

امي عگبي تكفلها
وعالناگه تدللها
هودج رايتي الها.. تخليها


انه ما انسه ولا تنساچن
كون امي بالسبي ويـّاچن
ام البنين
**
امي حرمه بدويه
تسمي ام عون علويه
لو نادوها مسبيه .. تمحيهم

الكوفه لو دخلتنها
لام عباس خلنها
ذيچ الساعه شوفنها ..تراويهم

ام عباس معروفه
اليشمر حجر بچفوفه
بنص بيوتها الكوفه.. تلاويهم

وتگطع السانه الذي سباچن
كون امي بالسبي ويـّاچن
ام البنين

***
بدرب الشام تكضيهم
خدم الچن تخليهم
مو مسبيه تسبيهم .. وتگدرهم

والحبل اليجيبونه
للخدر يراوونه
اتگلهم ما تشدونه ... وترعبهم

خدرچن ياهو ليشتمه
وامي عن الف زلمه
الجيش بعسكره تلمه.. تصگرهم


تگطعه امي السوط اذا اذاچن
كون امي بالسبي ويـّاچن
ام البنين
****
اذا دخلوچن ولايه
شحده اليشمر حجايه
اتسكته بعصت الرايه.. بشيمتها

الشام امي تطب ليها
متخلي زلم بيها
كاس الذله ترويها.. بغيرتها

ذاك المجلس وناسه
يازلمه الرفع راسه
نظرة امي حساسه .. بخزرتها

يازمان بهالوضع خلاچن
كون امي بالسبي ويـّاچن
ام البنين
*

علي الربيعي

https://t.me/yaAlihusseinmehdi

استشهاد الامام السجاد ع

جرحي لو جرحك يلكبر
ياهو بيهن يوجع اكثر
خناجر كربله
وجروح السلسله
+++++++++
هذا اول واحد انته بگبري يا خويه الاجالي
اعرض جروحك يلكبر وانته قارنها اويه حالي
مو عطش ماي بدليلي گلبي عطشان اعله غالي
من إخوتي اليبچي فوگي ويحني ظهره ما بقالي

لا اخو يحضن اخيه
وينكسر گلبه عليه
ودموعه هامله
وجروح السلسله
++++++++++
تذكر الخيمه يالاكبر بيها اجيت او ودعتني
بالمرض ثگلانه جدمي ونار اجتني حاوطتني
صارت العوچيه جمره والزمت بيها چوتني
وبين دخان المخيم عمتي تسحبني اجتني

هيه تسحبني بأديها
والسياط اتدگ عليها
ابهظمها مايله
وجروح السلسله
++++++++
ما اقارن انته تحكم ياهو بينه الجرحه اكبر
انته برماح وخناجر والطعن جسمك توذر
لو الف سيف اعله نحري اولا حبل بچفوفي وانجر
آه يا صوت اليصيحه ابوجهي من اجدامي تعثر

زلمه مو سهله بچفوفه
احبال واعياله تشوفه
سبيها العايله
وجروح السلسله
++++++++++
عن رمح خاصرتك ابلغ لو الم حچي الشماته
اشينزف امن اعروگه گلي التنضرب يمه خواته
آه ماصاحن عليه حال اخوهن عاذراته
امضيّگين ابگيده عنقي اتجرحه ابسط التفاته

مادرت عيني عليهن
ساكت واسمع بچيهن
بچي لمدلـله
وجروح السلسله
++++++++++
الشام آ يالشام بيها ابگلبي چن محترگه خيمه
بكل نفس تطلع واردها روحي من گد الهظيمه
ديره ديره ايدخلونه وليه يولوها اليتيمه
واسمع ايصيحوني هذا عايش وسلبوا حريمه

ياكبر چلمه الحچوها
روحي بيها گطعوها
چبيره المسأله
وجروح السلسله
++++++++++
اسنيني والفتره وراكم غربه يا خويه العشتها
الدمعه لحسين ومصابه ليله ابد مافارگتها
من اجت ساعة وفاتي الكربله اعيوني درتها
خويه يالاكبر چفوفك تحمل النعشي ردتها

هسه اجيت واني يمك
ضمني ياخويه واضمك
بقدومك يا هله
وجروح السلسله

ثائر الربيعي

‏مقطع صوتي من ثائر الربيعي

يابو فاضل غالي انته
راسك اتحاشه نظرته
وجهي عن راسك اديره
لاتشوف اختك اسيره
يابو فاضل
+++++++++
الدرب كل وكت
عليك التفت
اعيونك ماتفارگ عيني لحظه شفت

الوجه موزعل
اديره خجل
ولو مجبوره بس كلفه هزيله اصعدت

كلشي واضح للاسف ماگادره اخفيه
اخفي دمعي بس حبل ايدي اشيغطيه
املزمه حدبة ناگتي طول الدرب ذاك
ماكو هودج وانجبر مگفاها اگض بيه

اچفوفي طبعت بالهزيله
وگعت الحرمه ثجيله
تِعرِف ابعمري چبيره
لاتشوف اختك اسيره
+++++++++
دليلي يدگ
احن واختنگ
عليك وانته عباس الهوى الينشهگ

ابخيالي الِم
واعيشك حلم
ويطشر صفنتي السوط ونرد نفترگ

حته لو وكت الصلا شالوها لحبال
عن يساري يِمِنـِتي ماترضه تنشال
والمشاعر يالگمر تحچيها لچفوف
امجرّحات اتيمم وتلچمها الارمال

وبدعائي ارفع اديه
امن الرمح تنظر عليه
بالحرم اگعد لخيره
لاتشوف اختك اسيره
++++++++++
المسه من يجن
عليكم احن
حرام الچانت اعيون تسلهم جفن

ليالي السفره
ونين وسهر
كل ما لامس الگاع انلچملي متن

اغفه گعده المشكله واتمايل شلون
الا انام امفتّحه ماسدها لعيون
اعليه تلتم الحرم يجمعهن الخوف
والحرس داير مدايرنه يطوفون

اشلون نومتها الحراير
والحرس داير مداير
امنين ماصدلها حيره
لاتشوف اختك اسيره
+++++++++
الفجر من يحل
الاگي ام طفل
الابنها بالهوى اتلولي وبديها الحبل

تجي كل صبح
تهز بالرمح
علت شمس الله يُمه اگعد صباح النبل

انزل انزل يالولد وبحضني اخليك
ضامي بعدك بالدمع يوليدي ارويك
لا فياي اولا منام ولا ضگت زاد
ما فتر وني ابد يمدلل اعليك

كلها تسأل ياهي هايه
الصارت بلون العبايه
من شمس حر الظهيره
وجهي عن راسك اديره
++++++++
گضيت الدرب
وبديت اقترب
مكتض مدخل الشام ابعيون الغرب

لويـن اتجه
وادير الوجه
وآنه بكل جها منها يجيني ضرب

ناگه عن ناگه مسافه مشّوا النوگ
وحده وحده بالاسم دخلونه للسوگ
بيش اصده امچتفه وهواي الاحجار
واكثر الاذّاني ذاك اليرمي من فوگ

اخته صاحو عذبوها
هاكثر تشبه لخوها
ودي التم ابحصيره
لاتشوف اختك اسيره
+++++++
المهم والاهم
واشدهن الم
زادت ناري بالشام اعله نار الخيم

حلم لواعلم
اعله مجلس زلم
افوت وبيده يحرگ گلبي شال العالم

الما قصدني والقصد اذتني الانظار
واحد لواحد همس من اقترب صار
هاذي اسمعهم اخت عباس وحسين
عدله ماماتت قهر وانه اشتعل نار

من اجه شايل عصاته
وراسك ايدير التفاته
بعده راسك كله غيره
وجهي عن راسك اديره

ثائر الربيعي

الدفن

في خربة الكوفه عاد الامام السجاد من دفن الاجسات
  بعد ماسمعت الخبر النساء والاطفال تعالى الصياح والبكاء  لقد دفنوا الحسين دفنوا الحسين
  مولاتي رقيه
ذهبت لرأس ابيها وهو فوق الرمح تخاطبه


يالفوگ الرمح جاوبني گد عمري
عدنه حسين غيرك وآني ما ادري
       گالو دفنو حسين
       انت الفوگنه منين؟
      +++++++++
ما يفهمني غيرك بويه اذا تگدر
صح عندگ جسم ضل منترك بالبر
شلون وباقي ليهسه اعله ذاك الحر

اذا جسمك قصدهم توه دفنوه
راسك ليش ما يم نحره ردوه
بلكت لو رجع يم جسمك اتعيش
اذا بالماي وجهك بويـه رشـوه

خاطر افتهم هذا انته مو انته
گلي يا رقيه صووتچ اسمعته
       بسـچ لاتـگـولـي
      انته الفوگنه منين
    ++++++++++++
كلها رد علي السجاد من صاحت
فجئه وبالخرابه ريحتك فاحـت
ثوبه اتشم ترابه زينب وطاحت

گالـلـها دفنـته وعـيفي الاشلون
لمگطّع وصـل منـه اشيغـسلون
اسم حسين اسمعه مره مرتين
وارجع هم اسأله ياهـو مدفون

أهل البيت كلها حسين بس واحد
لو عندك شبيه وعالرمح صاعد
       ياروحي شتحسين
       انته الفوگنه منين
      ++++++++++
نفرض انت ذاك الوسدك لحدك
ماعندك چفن واثياب ماعندك
للقبله اشيـوسـد عالرمـح خـدك

عيني لو خطت مايخطي لحساس
انت حسين هذا صاحب الراس
كلما عمتي زينب لاحها السوط
كل راسك تديره الراس عـباس

انت مو عدل شيْقـنـعـه دلالـي
وآنه اشلون عدله الهسه يالغالي
      اشوفك شوف بالعين
       انته الفوگنه امنين
     ++++++++++
عليك اسأل امس گلتلها ياعمه
منو ضل اليداوي اجروحه لبجسمه
امي الزهره گالت تگعـد اتلـمه

خل افرض تِلِم لمْطَشْرِته الخيل
مابيها اعله جسمك فاطمه اتشيل
هم ضليت اشك مو سفره وتعود
برمحك من اسولف شفتك اتميل

بعيونك حچي وافهم بواچيها
مييت لو عدل بلسانك احچيها
      جاوب هالچلمتين
     انت الفوگنه منين
      ++++++++++
احسن ما اسألك خلني بوهامي
ادعي ايردلي جسمك حته لو  دامي
بيدي اگعد اشربك ماي يالضامي

يكفيني الدقايق تگعد اوياي
بعدك ضامي باذنك احچي بهداي
ارجع من سفرتك وآني اروَيك
خير امن الله عدنه جابو الماي

من ترجعلي اشمّك حته تاخذني
عذبني اليسر يا بويـه عذبـني
      يمته ترجع او وين
     انته الفوگنه منين

ثائر الربيعي

ابلا هودچ شلون اصعد اعليچ
يا ناگه آنه ارقيه احاچيچ

خوفي لا تدفعني ريح
مِن يصعدني امن اطيح
..يا ناگه
**
ارقيه انه الچانوا اهلي امدللين
چان ابوي الّه يقبلني اعله عيني
بالضعن چنت العزيزه املقبيني
بالدرب كله ابحجرهم شايلني

محتازه واحد هسه وياي
فوگج يرجبني ردت هاي

شفته ظهرچ مو مريح
من يصعدني امن اطيح
يا ناگه
*****
چنت ياناگه امن افز ابتالي ليلي
ماعرف ياهو القبل منهم يجيلي
هسه وينك بويه ناديت اعله حيلي
جاني بس راس برمح عذب دليلي

راح اقتنع بالغالي مكتول
ما صدگت دم ال بلخيول

ثاري دم صدره صحيح
من يرچبني امن اطيح
ياناگه
***
لو اسولفلچ عله حرگة خيمنه
امطشره ركضتنه واسياط التلمنه
اسكينه وآنه رحنه يم جثه الزلمنه
من ضربنه اگباله بالسوط انهظمنه

ليش ابركضتي اتعاثر بساع
بجدامي تچوي احرورة الگاع

واركضت ركض الجريح
من يصعدني امن اطيح
يا ناگه
***
چنچ استغربتي لمن شفتي حالي
شلون اگول مدلـله وبيدي حبالي
لون ماباين على اعيوني دلالي
صدي ياناگه على ارماح الغوالي

لحسين ابوي وعمي عباس
كلما بچيت ايدنگ الراس

اعليه ضل باله الذبيح
من يركبني امن اطيح
ياناگه
**
عندي يا ناگه بقت طلبه وحيده
احنه مچويات گلمن جرحه بيده
شمس تكتل واحنه سفرتنه بعيده
سرعي ممشاچ السبي يخلص اريده

مامش غطه لا هودچ شلون
وحر الضهاري امغير اللون

كون اموت واستريح
من يصعدني امن اطيح
ياناگه
*

علي الربيعي

الدفن

دفنوا العباس يا سكنه تعاي
هذا اخوچ امن الشريعه هسه جاي
دافن الجود
يم ابو الجود
++++++++++
دفني كل آمالچ ابگلبچ سكينه
چلمه وانسيها الگمر يرجع علينه
اتأكدي ابنفسچ تعالي يالحنينه
سلمي عالسجاد وإشتميها ادينه


باقي بيها امن الدفن عطر الكفيل
مايرد عباس هذا اكبر دليل
عطره موجود
وي ابو الجود
+++++++++
خل نسئله ونسمع اخبار الاكيده
من دفن عباس هم بايس وريده
ماسمع كلمة بقت زينب وحيده
من دفنها سادها لو فاتح ايده

چان مفتوحه الي امودي سلام
ومعتذر ياسكنه مارد للخيام
انسي الاوعود
يم ابو الجود
+++++++++
رمله سمعتنه واجت كل خطوه وگعه
ها يزيب مندفن جاسم اسمعه
هذا ثوبه اوياي جبته شلون ارجعه
گلت ادفنه ابگبره واعلگ يمه شمعه

عالاقل يصبح چفن ثوب الزفاف
خاف باچر يرجع ايعاتبني خاف
بمكن ايعود
يم ابو الجود
+++++++++
والرباب البالشمس خلصتها گعده
عالتراب اصبعها يرسم خالي مهده
يالدفنت اوليدي صاحت ضامي بعده
ودي ساعه اينام بحضيني وارده

هوّه اخييك وإعذر ادموع الرباب
وين يتحملها نومه اعله التراب
والضمه ايزود
يم ابو الجود
++++++++++
وين صاحت ليله وين ادفنت الاكبر
اشلون جمعته وسمعت ابني توذر
وانحنه ظهرك لخوك ادفنته تگدر
هوه لو لحسين ياهو اجروحه لكثر

بس گبر واحد كفاهم من اجوه
اتخالطت اوصال الاكبر وي ابوه
وگلبي ممرود
يم ابو الجود
+++++++++
حسين توگع منه وصله اشما رفعته
بالحصيره منجبر جسمه جمعته
وجهت للقبله نحره ومن وضعته
الصدري وسدلي الطفل بويه سمعته

وگال بلغ شيعتي خل يامنون
لا يقصرون بزيارة گبري كون
والعزه ايزود
يم ابو الجود
+++++++++


ثائر الربيعي

اادفن

ماحچت بس اشرتلي ابأيدها
تريد اسألك عمه عن اوليدها
++++++++
صوت ماعدها الحچي من عدها غاب
هاي ثلث ايام ماتحچي الرباب
گاعده اتلولي الحضنها بالتراب
اتشيل اديها وحيل تحضن جيدها
++++++++
بالبالخرابه چي سگف بيها اعله هاي
اتكترت ماترضه تگعد بالفياي
اشرتلي اتگول ساگي اوليدي ماي
لو بعد جثته العذب شيفيدها
++++++++++
اتگول وين ادفنته چا عبد الله وين
الهسه ملفوفات بگماطه الادين
الوحده دافن ابني لو وي الحسين
والگبر وحشه اعله ابني ايزيدها
++++++++++
نـام ابـنـها بالتراب الغالي نـام
فوگ صدر حسين مابين السهام
شالهن ذرعانه وافهمت الكلام
من بچه عبد الله امه ايريدها
++++++++++
ويه ابوه حسين وبنفس الحصير
حته جسم حسين هم صاير زغير
ما امـّيز بيـن الاول والاخـير
لا تساليني وبعد ماعيدها
++++++++
عمه من عبد الله مگطوع النصيب
خل تبطل من دللول الحبيب
الراح مايرجع ولا حته النحيب
ايرد اهلنه هناك سكنت بيدها

ثائر الربيعي

السبي

ماتت دمعتي/ متأثره بجروحها
ماتت دمعتي/ والشام طلّع روحها
      الما تكفي لحزانه عبرته
       ماتت وسط عينه دمعته
والشام طلّع روحه
        +++++++++
اول دمع عندي انخطف
اگبالي المهر خالي وگف
يفهم نظرتي اعله الدمه
من صفنِتي ابعينه رجف

فحطانه واركضلك صعب
كل خطوه يوگعلي گلب
تبچي حوافر مو دمع
لتلم اخوها امن الترب

مستعجله خوف ورعب والي اگدرت جمعته
انظر خيمنه تشتعل عاري الجسد  تركته

خيل بطريقي/ومنين ارد لخيامي
خيل بطريقي/ تسحگ طفل گدامي
      والاگدرت منهم سحبته
      ماتت وسط عينه دمعته
والشام طلع روحهه
       ++++++++++
يالليلة الوحشه الاجت
بين الجثث ممشه گضت
موقف اخذ حيل الدمع
ابعون ابني جدمي تعثرت

جاب الصبح وجه الهزل
اشرولي كلهم بالحبل
ضليت ارچب بالحرم
يصعد طفل يوگع طفل

والصعده كلفه عالهزل وهوايه كررتها
والدمعه من سوط الشمر وي متني ودعتها

فوگ الهزيله/ تسترني بس چفوفي
فوگ الهزيله/ مذبوح طولي وشوفي
        راس الگمر لمن ندبته
       ماتت وسط عينه دمعته
والشام طالع روحها
      ++++++++
درب السبي صرت بوضع
مايكفي لطمه اولا دمع
من يبچي لجروحي الگلب
دگـاتـه تبـقى تنـسمـع

اهوايه واكثرهن الــم
ليل ويسر وبلا خـيم
اتغطه باحضر يا علي
متغرّبه واكفل حرم

ماتعذر ابهذا الظرف من تشتكي رقيه
ياعمه عيني ماغفت اذّاني حبل اديه

خالي حضنها / اتلولي رباب اگبالي
خالي حضنها / واتگلي نام الغالي
        ليل السبي ذاك السهرته
        ماتت وسط عينه دمعته
والشام طلع روحها
     +++++++++
وضع الشمس ما مستقر
كلساعه تاخذني بكتر
الظهريه تلسع هامتي
واتطول اخيالي العصر

من ينسحگ ضلي يحس
من يبچي هم يطلعله حس
كل ضل يعيش امن الضوه
بس ضلي كاتلته الشمس

إخيالي گضّيت العمر بعيوني مانظرته
وگبالي اشوفه ينسحگ مثلي يون سمعته

درب المشيته/كل خطوه ماتت روحي
درب المشيته/من عنده كل جروحي
         وگبالي راسه كافل اخته
         ماتت وسط عينه دمعته
والشام طلع روحه
       +++++++++++
للشام كلمـا نقتـرب
ياكل ضوه عيوني الدرب
اسمي اسمعه ابدگته
دمامهم من ينضرب

چي اختلف عن كل مره
الكل صوبي فاتح ناظره
عن لا يلاگوني ابوجه
عالناگه اگعد ليوره

ملتمه نسوان وزلم يحچوها بالاشاره
وجهج تديرنه شعجب يا سيدت لساره

حچي الشماته/بسمار طر ضلوعي
حچي الشماته/سيف وذبحلي دموعي
        ماينحمل حچي السمعته
        ماتت وسط عينه دمعته
والشام طلع روحها
          +++++++++++
آخر دموعي الي هوت
من عدها وعيوني انتهت
الديوانه اوول دخلِتي
بت فاطمه صاحو اجت

مابيينت متألمه
ضل كبريائي كالسمه
گتلهم اي ام الخدر
بت حيدر وبت فاطمه

والعنده من عدكم حچي اخت الگمر تراني
لمن سمعني بالطشت راس الگمر حياني

هاي النهايه/وي دمعتي امن عيوني
هاي النهايه/ووصيتي لليبچوني
     واليذكر الشام وغربته
     ماتت وسط عينه دمعته
والشام طلع روحها


ثائر الربيعي

ليلة ابو فاضل عليه السلام

الاااااان.  قلت حيلتي
الااااان.   زادت كربتي
الااااان    نزلت دمعتي
    يابو فاضل
      ++++++++++
انـت غالي ورخـصت كلـشي وراك
دمعِتي وهيبة خـدر مـحمي بلـواك
حســين ياعـباس اگـعـدله  اجـــاك
مـا گمتـلي ويـن ابـو فاضـل هـذاك

مديت.  چفي وللاسف
مديت.  زندك ماكـو چف
مديت.  صوتي بونتي
      ++++++++++
يالچنت تترسني ملگه من اجيك
وين طولك كلشي متغيير علـيك
جوه ظهرك ليـش خافيهن  اديك
مستحي من دمعتي رغم الي بيـك

والعين/حمره بل دمه
والعين/تشبه فاطمه
والعين/ذبحت نظرتي
     ++++++++++++
مالگيتك من وصلتك بس ثياب
وين طولك ذاك ضايع بالـتراب
لنتـظارك تـبـجي مـرتـين الربـاب
للخـدر مـرّه وطـفـل دلالــه ذاب

لطفال/منتظره الوعد
لطفال/عبد الله گعد
لطفال/سمعو صيحتي
      ++++++++++++
گطّعت گلبي وكسر فگدك گفاي
گوم واعدل مشيتي ماريد مـاي
اني اتچيـلك يخـويه ارجـع وياي
مو بعيده خيامي شوف سكينه هاي

بحجاب/اشرتلك ترى
بحجاب/كل همها المره
بحجاب/سكنه حيرتي

          ++++++++++
يل خجل عينك مثل زعلك ثجيل
تنظر الثوبي ودمع عيـنك يسـيل
ينسلب ادري وتدوس اعليه خيل
راح اصيحك حيل وآنه ابلايه حيل

عباس/ وينك يالگمر
عباس/ضلع امي انكسر
عباس/لزمو شيبتي
    
       ++++++++++++
هسّه گلي الزينب بيا حاله اعـود
تسأل امن تشوفني حمره الخدود
إحضـنتـني ولاحـهن دم الزنـود
واضح بعيني كسر وجفوني سود

والشيب/لرمـوشي نـزل
والشيب/بدموعي انغسل
والشيب/يشرح محنتي
     
       ++++++++++

ثائر الربيعي

ليلة العاشر

متروسه حچي نظرات الاوداع
ويّه ام الخدر بس خلصت بساع

بالوگعه من ميموني
فاتحها چنت اعيوني
++++++++
أول حجر لآخر سهم
ياخويه اسمع بالخيم
كلش گلب زينب عِلَم
وصورتها تمشي اگبالي

كل جسمي لچمات انترس
وبيا علي اسحب نفس
نزَّلني من ظهره الفرس
رد اعله زينب خالي

رايح للخيم فزّاع بس ياهو البقه ايفزعه
ياهو عن سحگ لخيول جسمي الخيمته ايرجعه

إلما عنده اخو من يوگع ابضيج
گد ما يلتفت يتنشّف الريج
يندارن اعله امتوني
فاتحها چنت اعيوني
++++++++++
من رد للاخيام المهر
خطرت عله بالي اشكثر
صورة ركض لأم الخدر
ومني ترِيد املاگه

صانع وساده امن الترب
لاحت سواده اعله الدرب
مشيتها يقراها الگلب
جيّيت اخت مشتاگه

اموت اتمنه لو ماموت عليه اثنينهن كلفه
مشتاگ الهه بس شلون نايم عالترب وسفه

لاعندي حيل ايحرك الايد
ويّايه من تتسالم اتريد
وشباقي بعد ابلوني
فاتحها چنت اعيوني
+++++++++
كل دمي بعروگي نزف
حدما احس جسمي نشف
كل حيلي ما يرفعله چف
ايئأشّر لزينب ردي

بس فتحت اعيوني بقت
عن كل حچي الساني سكت
يا وسفه زيـنب مـن اجت
حيل الهله ماعندي

حگها استغربت ملگاي ما انهض والاگيها
ترجع خطوه عني انوب عطر امي يدنيها

تسألني بقت هذا انت يحسين
بعد اختك مشه ذاك الحِسِن وين
ابنظره قرت مضموني
فاتحه چنت اعيوني
+++++++++
هسه اني غيرني الضمه
واعضامي كلها امهشمه
حاچيني يا بت فاطمه
بنظراتي گمت اسألها

هل انتي زينب ياتُرى
شكلچ شجا واشغيره
لو صعدت التل للمره
اگبال العدو تكتلها

دمعتها حچتلي اهواي يا مصعب حچي النظره
الممشه امن الخيم يحسين للتل هيچي متغيره

گالتلي بيك اهواي الاجروح
گلتلها جرحچ يطلع الروح
بحرگ الخيم اذوني
فاتحها چنت اعيوني
+++++++++++
عني مشت تخطي بحذر
ماناطيه الجسمي ظهر
والراسي چان آخر نظر
موجود بعده بجسمي

وهنا بده صوت اعتله
رِيحوا الحسين ابمقتله
شفت الشمر صدري اعتله
لا باقي واحد يمي

طعنات اثنعش وحساب هوّه اشباقي من صدري
گلبني اعله الوجه ويلاه
واتربع عله ظهري

وارموشي ثگلت گوه تنشال
نظره الاخيره بعيني لرمال
من الظهر ذبحوني
فاتحها چنت اعيوني
+++++++++

ثائر الربيعي

العليله

اوياي ترحين آنه باچر رايحه
اقره يم گبر الزچيه الفاتحه
اهناك يا ام البنين
اعرف اخبار الحسين
++++++++++
حاولت دلّالي اقنعه گتله اتاني وما قبل
ليش اچذّب جفني وآنه حالي حال الماله اهل
عالدرب ليله ونهاره
من الامباوع ذبل
غير ازور الزهره واشكي همي عدها ماكو حل

اهوايه لبگلبي سوالف بايته
يحچي يم گبر الزچيه حچايته

اوياي اذا ودج تجين
اعرف اخبار الحسين
++++++++++
آنه اندلها الزچيه بين گبره ومنبره
ارد اگلها يالحبيبه سافر اوليدچ ترى
گلي ارجع ما رجعلي مدري شنهي الاخّره
هم مثل ضلعچ ييمه بصدري عبره امكسره

عيني من كثر البواچي طافيه
بعتبة الباب اشبقت من عافيه

وين زينب هسه وين
اعرف اخبار الحسين
++++++++++
انتي يم عباس اذانچ قربيها اعله الگبر
سمعي ونّتها الزچيه زين اذا بيها گصر
كون ونتها طويله گولي معناها الشمر
لازم الشيبه العظيمه وگاضيه ضلوعه كسر

ليش اتاني ابابي والمن گاعده
كون هسه ارقيه بالبر شارده
لو كثر منها الونين
اعرف اخبار الحسين
+++++++++
نادي إم عباس آنه الگاعده يَم الحسن
كون عندچ يالحبيبه اخبار عن راعي الضعن
كونه سالم كلها سلمت لو وگع چفه انسبن
اخته وين ابيا خرابه هسه وين ابيا وطن

يم حسن طمنيني عن اخيامهم
سالـمه لو بالبراري ايتامهم
كون مگطوعه الادين
اعرف اخبار الحسين
++++++++
طيف والطيف اشيجيبه والجفن ماينغمض
تخطر افكار اعله بالي طول تاخذني وعرض
ماتوا حسين وإخوته هيچي خل نفرض فرض
والضعن گالو رجعلچ واطلع اتلگاه ركض


صوت اسمعه الناعي ذاع اخبارهم
اهله يثرب لا تضل ابدارهم
بالسواد امگبعين
اعرف اخبار الحسين
++++++++++

ثائر الربيعي

واحد محرم

هيه هيه/اشچان اسمها كربله لو غاضريه
هيه هيه/البيها ذبحي وغربة اختي الهاشميه
بهاي الارض عدنه وعد
اشـريـها يـا بنـي أسـد
+++++++++++
اشتريها بدم رضيعي وآنه بيدي شايله
مالي غايه غير حفره الدفني منها كربله
لو لگيتوا من ثيابي اوصال ضلت بالفله
بيها شدو خنصر ايدي للگبر لو نزَله

ماهي خشنه/حضروها كون من هسه الحصيره
ماهي خشنه/اولا چبيره اتلمني لو حته زغيره
وعبد الله وياي الولد
اشريـها يابـني اسـد
++++++++++++
ياهو مثلي يشري رمله بيها جرحه وذبحته
بيها اشمر دم رضيعي وراح ادفنه ابنبلته
ضامي الاكبر لو اجاني الساني يجرح شفته
وعالشريعه ايطيح ظهري وراسي تكثر شيبته

مو بعيده/ذيج هيه من اصد الها الشريعه
مو بعيده/وجدمي يثگل لو وگع تصبح وسيعه
لليمشي خطوات وگعد
اشـريـها يا بـني اسـد
++++++++++
كلها فتره ايام عشره وتخلص اوياي بضمه
والنهايه لو نظرتوا نار صعدت للسمه
گولو يعني حسين مييت واحترگله امخيمه
ركضت اخته وهسه صعدت فوگ تل بت فاطمه

لو سمعتو/طفله تبچي بحرگه عِرفوها رقيه
لو سمعتو/اصهيل عالي خيلهم داست عليه
فهموها ضل عاري الجسد
اشريـها يا بـني اسـد
++++++++++
اشلون جسمي اتميزونه بالدفن راسي برمح
مدري اگلكم حفظوا ثوبي وثوب فوگي مايصح
ياعلامه بجسمي تبقى بيها ما واصل جرح
وحده بس من ظهري ذبحي ميزوني امن الذبح

اهوايه يمي/احجار باقي امشمّر وصابغها دمي
اهوايه يمي/آثار گعده حرمه هاي الزهره امي
متفارگ الغالي ابد
اشريها يـا بـني أسد
++++++++++
ابو فاضل خيمة اخته حطها مابين الخيم
لو گضينه ومحد الهن يمها تلتم الحرم
باب ثاني فاتح الها حته لو عسكر هجم
منه تركض للبراري وجمره ماتچوي الجدم

احبال خشنه/من نصبها غايه اله ماخله بيها
احبال خشنه/هنه ذني تالي تَنشَد ابأديها
بچف العقيله اتسوي حد
اشـريـها يا بـني اسـد

ثائر الربيعي

(دموع العهد

      نبدي ابدموع العهد
      ومنك يمهدي المدد
في عاشور هذا وكلّ عاشور
نجددلك دمعنه ولطم الاصدور
       +++++++++++
عهداً وعقداً سيدي عمري ابقه لاخر يومه
النور العظيم المنذبح ابچي اعله سلب هدومه
توراة وانجيل بدمه نحر الطفل مرسومه
مزجور نهر العلگمي ومنه الحرم محرومه

     ضل وحرور وخدر
     والفزعه ذاك الظهر
عله شاخص مره ماشايفه النور
نجددلك دمعنه ولطم الاضددور
       +++++++++
متواصل ابطول السنه مجلسنه وبكل جمعه
لكن محرم تختلف يالمهدي تدري الدمعه
ليهسه يتگاطر دمه الزهره القميص ترفعه
وينه اليساعد بالبچي صوت الزجيه انسمعه

       محنيه من الضلع
      واتلم بديها الدمع
من مجلس لمجلس فاطمه اتدور
نجددلك دمعنه ولطم الاصدور
      ++++++++++
والدمعك الجرح السبي اكتبنه من اعوانك
ومن الدعات المجلسك وامآزرين احزانك
ان لم نكن اهلاً الك رحمه وعطف عنوانك
آجركم الله تنقبل من تطلع امن السانك

      هيّه المصيبه الك
      الماتو عطاشه هلك
واليحضر مصابك هوه ماجور
نجددلك دمعنه ولطم الاصدور
        ++++++++
گلبي اذا فتره قسه وماتت دمعتي بعيني
للنزل ادموعك حمر الذاك الجرح دليني
اندبله كل صبح ومسه مثلك بعد خليني
بالچاوي جدم ام الخدر يبن الحسن چويني

      عييشني ذاك الالم
      وبروحي جمر الخيم
مثل خاطر سكينه گلبي مكسور
نجددلك دمعنه ولطم الاصدور
        +++++++++
ادعي عله عيوني العمه لو گلبي حزنك عافه
الوجه الكريم امن الظمه متفطرات اشفافه
بس بالسمع ما ينحمل ويساعد الله الشافه
انت ابن امي النادته اخته وامضيعه اوصافه

    دم ورمل عالجرح
    واتلچمه من ينمسح
بحجر موضع سجوده الغالي مفطور
نجددلك دمعنه ولطم الاصدور
        ++++++++
ما اوفي گطعت خنصره لو ابچي لاخر عمري
عهدي بحياتي اولو متت احچيها وآني بگبري
ربي ارجعون اقضي دمع ماباچي زين بزغري
شاهر دموعي امن الگبر اطلع ولاطم صدري

     اسود اصبغه الچفن
      لبيك يبن الحسن
ننصبها المجالس بين الاگبور
نجددلك دمعنه ولطم الاصدور
      ++++++++++
يمته وتكحّل كل نظر مشتاگ الك ناظرنه
طلعه الرشيده وللفرج ندعيلك ابمجلسنه
باقي عهدنا بكل عزه يالحاضر وتسمعنه
آخر ثلث دگات الك تفهمها بايدي اليمنه

     عجل بحق فاطمه
     والماتو امن الضمه
واحدنه اعله ثارك گلبه مجمور
نجددلك دمعنه ولطم الاصدور

ثائر الربيعي