جرعة وعي

أيام (المدنية الدايرنها) كنا بنتكلم عن (معايير الكفاءة) و(منو الأكفأ)
أيام (العسكرية الدايرنها) الأشوس ده بقينا نقول (التعليم ضرانا ودايرين زول لايعرف يكتب ولايقرا وغير نخس مادايرين حاجة والنبي كان قائد خلا)
مافي زول قال ليه النبي(علمه شديد القوى)
حملة التذكير بالعسكرية الدايرنها

للمرة المية الجيوش بتكتسب شرعيتها في الدولة من خلال (واجب دستوري وحق دستوري) الواجب الدستوري هو (حماية الدولة بمكوناتها الثلاثة: الأرض والشعب ونظام الحكم) والحق الدستوري هو(إحتكار السلاح)!
أها سعاتلعميد أركان حرب تيكتوك ده جيشو مقصر في واجبو وفرط في حقو وعايز يرمي بلاهو على الناس

إنا لله وإنا إليه راجعون!
نعزي السودان والسودانيين في فقيد الوطن
الشاعر هاشم صديق
رحمه الله وغفر له وألهم أهله الصبر والسلوان

لمن الناس سكتت على تقصير الجيش في حماية مدني وانسحابو غير المفهوم منها طلع ليهم سعاتلعميد أركان حرب تيكتوك كجاب بنظرية إنو أهل الجزيرة مادافعوا عنها!
الحاجة دي بتشبه نكتة الفنان محمد موسى عن الراجل المتسلبط(إنت ميتك ضامنها، خليني أطلع قروشي من الحرامي ده)

تصدق يامؤمن إنو المهندس عبدالباسط قرين محكوم بالإعدام بتهمة تقويض النظام الدستوري!
ليه؟
بحسب حيثيات الحكم إنو إتواصل مع كيكل ووصف البرهان بـ(التيس)

ننتظر الدولجية يطلعوا لينا بي تخريجة لكيكل القلع الكاكي الأصفر ولبس الكاكي الأخضر!
زمان الدولجية قالوا استسلم!
هاك الإستسلام ده!

الدولجية الحاولوا يقنعونا بحنك (ندعم الجيش هسه والحساب مع القيادة العملت الجنجويد بعدين)
ماقادرين يحاسبوا زول ساي زي كيكل عشان الجيش عفا عنو
ماورونا حيحاسبوا البرهان وشلتو على جريمة تمكين الجنجويد كيف؟
من الكذب انك تلتزم بحاجة عارف يقينا إنك مابتقدر تنفذها!
دولجية كضابين

ماهو انت ماممكن تكون كاتب #أنقذوا_الجزيرة وفي نفس الوقت شايف الناس مامفروض تسأل(ليه الجيش ماينتشر في الجزيرة؟ عشان حيتعرض لخسائر)
طيب المفروض ينقذها منو لو ماالجيش يعني؟
هل عندك استعداد لتقبل قوات أممية لحماية المدنيين؟
متلازمة ال(ده حار وده مابنكوي بيه)

لجان المقاومة الحصاحيصا

تتعرض قريتا السريحة وأزرق للهجوم من قبل مليشيا الدعم السريع.
حيث وصل عدد الشهداء في قرية السريحة الى 50 شهيد وأكثر من 200 إصابة مع إنعدام كامل للمعينات الطبية والصحية وعدم إمكانية إخراج الاصابات من القرية بسبب التدوين والقناصة من جانب المليشيا.
كما تتعرض قرية أزرق للحصار الكامل من قبل المليشيا ونفس الانتهاكات التي حدثت في قرية السريحة.

الذكرى الثالثة لتصحيح مسار الثورة وإبعاد أربعة طويلة الكانت عايزة تدخلنا في حرب أهلية!

بيان من لجنة مقاومة الخرطوم 1و2 حول تزايد انتهاكات ميليشيا الدعم السريع في ولاية الجزيرة

في ظل تصاعد وتيرة العنف والجرائم المرتكبة في حق الشعب السوداني، تواصل ميليشيا الدعم السريع "الجنجويد" الإرهابية استباحة قرى وحلال شرق ولاية الجزيرة منذ انضمام المجرم "كيكل" إلى القوات المسلحة. هذه الميليشيا الفاشية تمارس أبشع الجرائم ضد الإنسانية، حيث ارتكبت مجازر وقامت بقتل الرجال والنساء والأطفال والشيوخ دون رحمة أو شفقة. بالإضافة إلى ذلك، تواردت أنباء عن ارتكابهم لجرائم اغتصاب ممنهجة ضد النساء في عدة قرى، في انتهاك صارخ لكل القيم الإنسانية والقوانين الدولية.

حسب ما ورد إلينا المناطق التي شملتها حملات الجنجويد الانتقامية هي: تمبول، أزرق، رفاعة، صفيته الغنوماب، الجنيد الحلة، الهلالية، العزيبة، العريباب، الهبيكة النقر، بانت، وود رحوم. ورغم أن أرقام الضحايا ما زالت غير مؤكدة، إلا أن المؤكد أن عدد الشهداء قد تجاوز 200 من المواطنين العُزل، الذين سقطوا ضحايا للعنف الوحشي الذي تمارسه هذه الميليشيا الإرهابية.

نحن في لجنة مقاومة الخرطوم 1و2 نحمل ميليشيا الدعم السريع المسؤولية الكاملة عن هذه الجرائم البشعة، وخصوصاً جرائم الاغتصابات والجرائم الجنسية التي تستهدف النساء في هذه المناطق. كما نحمل القوات المسلحة السودانية مسؤولية انسحابها من بعض القرى، مما ترك المدنيين عرضة لهذه الانتهاكات الجسيمة.

نسأل الله أن ينهي معاناة الشعب السوداني، وأن يرفع البلاء عن أهلنا في أقرب وقت. ونؤكد أننا لن نقف صامتين على هذه الجرائم، وسنعمل على نشرها على أوسع نطاق. كما نؤكد أن هذه الجرائم لن تسقط بالتقادم أبداً.

24 أكتوبر 2024م

سؤال للدولجية
انتو الجيش القاعد يحافظ على الدولة ده، مامن مسؤولياتو المحافظة على أرواح المواطنين برضو؟

رحلتي من بل بس حتى آخر جنجويدي!
إلى بل بس حتى آخر جنجويدي قبل كيكل!
جنجويد جياشة

قصف جوي لطيران الجيش على مسجد حى الامتداد فى ود مدنى أثناء صلاة العشاء، مساء الأحد 21 أكتوبر، حصيلة أولية للشهداء 15 شهيد وعدد غير معروف من الجرحى، وماتزال جهود البحث عن مفقودين تحت الانقاض مستمرة!
إنا لله وإنا إليه راجعون

اللهم لطفك بأهلنا في الجزيرة
قوات المليشيا اقتحمت قرية الشرفة بركات بشرق الجزيرة، وترتكب الفظائع بحق أهلها!
استشهاد ثلاثة شباب وسيدة وفي وإصابة عدد غير معلوم من المواطنين.
رافق ذلك حملة نهب واسعة للسيارات والمحال التجارية!

امتدادا لسلسلة جرائمها بحق إنسان الجزيرة، هاجمت قوات الدعم السريع قرية العزيبه شرق ولاية الجزبره
في يوم ٢١/١٠/٢٠٢٤
أدى إلى استشهاد علي محمد صديق بريق
مدافعا عن عرضه وماله
حسبنا الله ونعم الوكيل

لجان مقاومة مدينة رفاعة
بيان مهم
بعد محاولة القوات المسلحة التوغل في عمق محلية شرق الجزيرة ، و الانسحاب من مدينة تمبول بعد السيطرة عليها لمدة لم تتجاوز الخمسه ساعات ، قامت مليشيا الدعم السريع بأستهداف مدن و قرى شرق الجزيرة منذ مساء يوم أمس الموافق 20/10/2024، مما جعل مليشيا الدعم السريع تنتهك المنطقة مره أخرى بعمليات أشبه بالانتقامية من مواطن شرق الجزيرة الاعزل.
حيث تم الاعتداء علي قرية الجنيد الحلة و هنالك انباء عن وقوع إصابات متفاوتة بين مواطني القرية.
كما تم ايضا إستهداف العزيبة مما ادى الى استشهاد عمر عبد القادر وصفيته تيراب مما أدى الى إستشهاد يوسف الصديق نسأل الله لهم الرحمة والمغفرة ونحتسبهم عند الله شهيداً.
كما تمت إستباحة مدينة رفاعه بالكامل و قد إستشهد المهندس محمد الرشيد المسؤول من تشغيل مركز غسيل الكلى بمستشفى رفاعة ،و أسشتهد أيضاً سيف حسيب ، نحتسبهم عند الله شهداء.
كما تم إستهداف العك والبيوضاء أيضاً، وتوجد أنباء عن وجود أعدد أخرى من الضحايا لمن يتم التأكد منه حتى الأن وجاري حصرهم.
إننا في لجان مقاومة مدينة رفاعة نحمل طرفي الصراع مسؤولية سلامة وأمن مواطني المنطقة فأجساد و ممتلكات وأعراض المواطنين العُزل ليست مكاناً لتصفيه الحسابات والخصومات العسكرية والسياسية وللمعارك أماكنها ونرفض أيضاً إستخدام المواطن المغلوب على أمره كدرع بشرية في هذه الحرب العبثية.

كتب عضو تنسيقية لجان مقاومة أمبدة محمد طاهر:
الكلام كتير عن حادثة كيكل دي لكن الواحد برجع وبقول هو البعامل المؤتمر الوطني كحامي حمى والبرهان برغم انه هو سبب الورطة كلها ككاهن كبير ومعلم حيمنعو شنو يشوف كيكل قائد وعاقل ؟!
ده كله جاي من التعامل مع موت السودانيين وحقهم في الحياة كاخطاء جانبية وتضحيات طبيعية في سبيل تخبط العاهات ديل في مواقفهم وبحثهم عن مصالحهم .
حيجي اليوم الحيبقى فيه حق السودانيين في الحياة مقدس وانتهاكهم جريمة ما خطأ وما ذلك على الله ببعيد

وبرضو بنهتف يا أكتوبر
لما يطل في فجرنا ظالم
نحمي شعار الثورة نقاوم
نبقى صفوف.. تتقدم وتهدر
لما يعود الفجر الحالم..

ذكرى 21 أكتوبر 1964 في السودان التي أطاحت بحكم إبراهيم عبود!

آفة حارتنا النسيان!
على طول حروب السودان كان في جماعة بيلعبوا على الحبلين حسب الميركاتو العسكري!
كاربينو كوانين، رياك مشار، مناوي، بحر أبو قردة وكتار غيرهم إتمردوا وانضموا للجيش واتمردوا تاني.
وللمفارقة إعلام السلطة في وقتها صور المسخرة دي كنصر حاسم.
وللمفارقة برضو السلطة اضطرت بعد سنوات إنها توقع إتفاق سلام فيهو قسمة سلطة مع الحركة الشعبية بتاعت كوانين ومشار في 2005، ومع الثورية بتاعت مناوي في 2020.
الحاجة الوحيدة الطلعنا بيها من قصة (عودة كيكل للرحم المبارك بحسب بيان الناطق الرسمي للجيش وليس استسلام كما يصور البلابسة) أنو الناس مستعدة تتناسى الانتهاكات وقتل الأبرياء واغتصاب الحرائر مقابل الانضمام للجيش!
طالما الشغلة كده وفعلا ممكن تعبروا فوق الدماء وقعوا اتفاق سلام يحقن الدماء وينهي الحرب بدل التهريج الذي لايحقن الدماء ولايحقق النصر ده!