"هُواة ألشعر ألشعبي💜"

انا تعبان وانفاسي قليلة
والروجة العلى متوني ثگيلة

انا بنادم صدك مذبوح واحتاج
بنادم مثلي مذبوح اشتكيله

من دكات گلبي وروحي زعلان
وحچي المرتاح احسه بگلبي چيله

انا اليجرحني اعذره وگلبي مرتاح
وگبل لا اعاتبه بعيني . استحيله

وما سامح لحدما اغسل الغيض
وانظف گلبي من حقده وغليله

شكد فارش شليلي وي اليحبون
بس ما عاتب الفارش شليله

واذا غلطان ادنگ للصلح ماي
وما اخلي الزعل يعبرني ليلة

الكرامة براسي تاج وما انذليت
وحرام تلوگلي الهامة الذليلة

انا لو ذالها ومن وجهي وطيت
صرت هسه انه ابو اليد الطويلة

ليلية انه روحي اعله السما تروح
و احير بفاتحة گلبي الثجيلة

انگع وجهي بدموع الخسارات
وعلى وجوه الشموس انشر غسيله

احس الصار بيه اكبر من الصار
وابد ما توصفه ابياتي الهزيلة

الشعر لو ما يوصف حالة الروح
على روح الشعر نقرا العديلة

واذا صار المغالب ماله عنوان
ما اورط العرجة وي الاصيلة

نسيت عيوني بخدود المحطات
وتهت والرجعة صارت مستحيلة

- عقيل العرد

باچر تمر
عگب باچر
وانه والشوگ

وحچي الوادم خناچر
تنتظر باچر او باچر


-كاظم الرويعي

هواي ناس بكلبي تالي الليل تكعد
وانت ما خسران لو منهم تصير
وبالجذب عن حالي تنشد
هذا ليل وحتى المصوب يلم روحه و يهيد
وانه اناطر مدري المن
ما ينام الما عرف روحه شتريد




-عقيل العرد

لا هي سنة وسنتين ولا هيه صحوة موت
حسبة عُمر عطشان والماي حدره يفوت





- ذياب گزار

مريت اعله بابك والدرابين
عزتني وبجت كل الحياطين

-ناظم السماوي

من درت وجهك ..وأمانك شـٓح عليه
خوفة الكاتل خَفت حتـى من أديه

- علي مهدي

سفر بس فارغة الجنطه الحمل بالروح.

ابشرك من وراك الليل ما نمته
وما خليت موقف ما تذكرته.

شبَعد بالرّوح غّير مناطرك سكتة!.

ولت روحي كالو ياهو ولها
عفتني وريتي ظلت ياهوى الها

عظيمه ايام هجرك ياهولها
سنه بوداعك يسكتون بيه..

-علي البديري

أهدمني ايام هجرك ودرچني
طحت لوماصورك ودرچني
ومحمد حذر منهن ودري چني
ضحك ذيچ الليالي يعم عليه..

-كرم السراي

‏
الدنيا لو رادت تذلك تعتني ‎لگلبك
تلچمك بالعزيز ..


السيد عريان

تعال اشتاقلي بگدي
إذا ما ارسم عيونك على الشباك
هذا الليل مَيعدي
ولأن ما عندي غيرك
اشكي حزني وياه
جنت ابچيلك لوحدي.

تمنيتك نــــهر واغفه بشليلك ماي
واغسل گصب روحي بعافية طينك


عريان السيد خلف

يجوز اشوفك
هاي دنيا ..
ولازم تمر بيه صدفه وبيها اشوفك
يجوز اموت وانت ماكو !
يجوز امر جنازه متسلم عليها
وانت تمشي ويه التحبه ..
يحوز الله يقوي گلبي
والزم سوارك واذبه !
يجوز تنصاب بمرض والدنيا تصغر
ما يطب ريتك هوا ..
يجوز تتمرض حبيبي واني انطيك الدوا
يجوز ابني يلاعب ابنك
بالدرابين المشيناها سوا
وكله منك !..
يجوز نتلاگه بوسط سوگ المدينة
وگايد ابنك
يجوز انسى احنا افتركنا
واركض بلهفه واحضنك …

احمد عادل

قصيدة كتبتها منذ سنوات ولم أنشرها ولم أقرأها الى الان
(تُنشر لإول مرة )

( إلهي )

إلهي
يرحمه التحمي حتى اوراق الاشجار ..
صعب حيل
أشوفك بس عذاب ومقبره ونار ..
وأبد ما
يعذبّنه الخلق ضحكات الصغار ..
حبيبي
أدورك بالگلب ساعات الأحتار ..
يا محبوبي
وضوه دوربي
ينسمه ومسحت الدمعة من العيون ..
يفي روحي
وأنه ونوحي
اجيناگ بدمعنه وشوگ مجنون ..
إلهي
ادورك بالنوراس فوگ الانهار ..
وبعد وين
أشوفك بأمي من تضحك للصغار ..
وصعب حيل
أشوفك بس عذاب ومقبره ونار ..
إلهي
الناس الما تعرفك ظلمت الناس ..
حبيبي
حچوا باسمك وسرقوا حتى الانفاس ..
يا روحي
ودمعتي ودمي وي الاحساس ..
قسوا حيل
خضار اوراحنا وكلماتهم فاس ..
يا معبودي
وندي ورودي
حچوا عنك وگالوا خوف من خوف ..
صعب حيل
فقط ليل
يشوفك شمس بس اليگدر يشوف ..
إلهي
أشوفك غيمة تمطر فوگ الازهار ..
وبعد وين
اشوفك بامي من تضحك للصغار ..
وصعب حيل
اشوفك بس عذاب ومقبرة ونار ..
إلهي
ليش يخوّفونه باسمك اليوم ..
وعظمتك
تجلت بالسما وضحكات الغيوم ..
ورحمتك
سعت كل البشر مو بس اليصوم !..
وفهمتك
من شفت الگمر يضوي وية النجوم ..
يكل عمري
ونفس صدري
ونبض دمي وحنيني وشوگ الگلوب ..
يا معشوگي
وطعم شوگي
أشوفك بامي من تصفن بالغروب ..
إلهي
أدورك بالحمام اليحط عل الدار ..
وبعد وين
أشوفك بالندى وضحكات الصغار ..
وصعب حيل
أشوفك بس عذاب ومقبرة ونار ..

#ادهم_عادل

كون يمك
يا بخت جنحة اليذبه الريح يمك!
كون أشوفك ..
كون ويّ فجر السوالف تغبش عيوني عليك
اتشيل خطوة شوفها وتنكلها يمك
وديّ اشوفك ..
ودي أطيرن محترك واطفة عتب حار اعله دمك..
بلجن اباجي الطفو غيرة دفو وتذوب رسوم الشتة الصك اعله دمك !

ودي اغافل ليلهم و أبحر واذب كَلبي بشريعة
ودي ابوكن جسمي وابعد
وديّ افك باب السنين السودة واشرد

وديّ لاجن شدو برجلي جرس يشهد علية
وبس اشيلن خطوتي الحراس تكعد!

بس اشيلن خطوتي ايردهة الكزاز ..اعيونهم صارت كزاز
ابكل جفن يندله حلمك!
ظفروا رموشي حبل وتنطروا جية ظلام ..وصلبوا اعله عيوني حلمك!

وانت يا المجروح خاف احجي والجمك ..
لو تطاوعني الجروح تصير غيمة
وحتى اراويك شكثر ينزل مطر بالكاع دمك
فاهية الدنيا
طفت لذة طعمها
ولبست انكاب اعلة نجمك ..

كون يمــــــــــــــــــــــــك !

الخالد كاظم اسماعيل الكاطع

الدنيا ماتنفهم
مرات حلوه وتصح
مرات مو حلوه...

تارسني ضحك الجذب
ماتدري بي الخلك
عايشها بالكوه...

وكل الخساير كضت
والي يجني بعد
سميتهن كبوه...

مو ماي وطشرن
من عمري شكم سنه
جاليش ياهو اليجي
وصاحالهن فدوه...

الكتلتني من ابعدت
وجهي انسى وشبهو
اي هوه مو هوه...

ماانسى كلمن ضحك
من شاف جرحي نزف
واليمهم اتلوه...

لابيه اصدك الحجي
ولابيه اجذب الحجو
شو هي هم بلوه...

حسين ال حبتري

مدرسة العصافير

للشاعر جواد الحمراني

كون يموت كلمن رايد يموت
وكون أيظل عدل بس النريدة
وكون أيرد غني ومحمد أردود
ورحيم وبارق وروحه الشهيدة
وكون أنرد جهال التاتي توات
ويجينة الطنطل وصوت الرعيدة
أو..نداوم صبحي وي درس العصافير
ونقرة أبشامتچ يا ست وحيدة
ونركض من نحِّل حفاي للبيت
ونشاور بعض ها....شفتوا غيدة
شفتو أش..أشرت لبن ابو الدكان؟؟
حمامة سيد ورادت تصيده
ونسألها يعيِّدة الشوط ياشوط
أوشنحمله الهوى عيدة ونزيدة
أيييييياه أشرجع السبعين للبال
بخت ينراد للذكرى السعيدة
ياريحة مطر بخدود التراب
چن ريحة كتب ريحة جريدة

أفيش لو طوح عتابك
حتّى صبير البراري ينسى روحة ويطك
قداح عالبابك


- عبدالأمير العضاض