In_Sync

🃏مين حضر فيلم joker و لاحظ الحالة الغريبة اللي كانت تخلّيه يضحك بدون سبب و بصوت عالي؟!
أخونا الجوكر هون كان يعاني من حالة اسمها التقلقل العاطفي
Pseudobulbar Affect(PBA)
أو التأثير البصلي الكاذب
✔️شو هوّي؟
اضطراب بالتعبير العاطفي،بيجي على شكل نوبات مفاجئة من البكاء أو الضحك اللا إراديين ، هالنوبة بتتعارض مع الحالة الداخليّة للفرد، بمعنى ممكن يكون مبسوط بس تجيه نوبة بكاء(الحالة الأشيع)
✔️من اللي حكيناه فوق فينا ببساطة نعرف إنو بيصير في خربطة بالتشخيص بينو و بين كذا اضطراب(الاكتئاب، ثنائي القطب، القلق المعمم،شيزوفرينيا)

✔️أسبابو
عصبيّة ، في عنا ممرات عصبيّة بالدماغ هية اللي بتنظّم كيف منعبّر عن عواطفنا، ف وقت بتتأذّى هي الممرّات متل ما قلنا رح يصير في خربطة بين اللي منحسّو و اللي منظهرو
أمّا اللي بيأذي هالممرات:
◾سكتر دماغيّة
◾التصلّب الجانبي الضموريAlS
◾التصلّب المتعددMS(حكينا عنو سابقاً)
◾داء باركنسون
◾ألزهايمر
◾إصابات الدماغ الرضحيّة

✔️العلاج :
مضادات الاكتئاب للتخفيف من شدّة و تواتر النوبات
و كمان في دواء هوي الوحيد المصرّح عنّو، عملوه خصوصاً مشان PBA و أثبت فعاليتو لمّا مرضى الMS و ALS أخدوه، ف انخفض عدد النوبات للنصف !!

✔️نصائح للتعامل مع النوبة :
◾تشتيت الانتباه
◾الاسترخاء
◾التنفّس بعمق و بطء
◾تغيير وضعيّة الجلوس أو الوقوف

و ختاماً ، بعيداً عن المرض، حتحضروا الجزء التاني من الجوكر؟👀

وبتشوفوا معلومات إضافية بالتعليقات.

إعداد: د. إسراء حسن

اكيد كتير منكون مهتم بعلم الاعصاب و حابب يتعرف على احدث الابحاث بهاد العلم و يغوص بتفاصيل الدماغ و الدارات العصبية فيه و آليات عمل الذاكرة و التعلم و غيرها كتير .....


لهيك اليوم رح نحكي عن شخصية يمكن كتير منكون سمعو عنو يلي هو عالم الاعصاب اندرو هوبرمان/Andrew Huberman


هوبرمان هو عالم اعصاب بجامعة ستانفورد و صاحب بودكاست Huberman lab يلي هو احد اشهر البودكاست بالعالم


المواضيع يلي بيحكي عنها كلها مهمة و ممتعة كتير بنفس الوقت و بأسلوب حلو و لغة و شرح بسيطين ممكن يفهمون اي شخص عادي حتى لو مو مختص لهيك نصيحة تابعوه لأنو حتستفادو كتير حتى بحياتكون اليومية و خاصة انو احيانا بيحكي عن مواضيع تانية غير الأعصاب متل (التغذية، علم النفس، الرياضة.....)

على سبيل المثال حتلاقو بودكاست عن :
آلية عمل الجهاز العصبي
الصحة النفسية
دور الدوبامين بالتركيز
طرائق التعلم
الحميات الغذائية
بناء العادات
و اكتر من ٢٠٠ بودكاست كمان فيهون حرفيا كنوز من المعرفة


البودكاست فيك تحملو و تسمعو من غوغل بودكاست و انت طالع بالمواصلات مثلا او و انت واقف عم تستنى شي بدال ما تفتح فيس او انستا و تضيع وقتك 😁🫠
حتى كمان موجود على اليوتيوب و فيك تتابعو


و اخيراً رح انصحكون ببودكاست انا شخصياً استفدت منو كتير عن طرق تحسين التركيز و خاصة عند الدراسة او الشغل اذا كان تركيزكون مشتت كتير متلي 😁
و احكولنا اذا بدكون نعمل بوست نلخص فيه الموضوع

إعداد:
#Yuri

🤨حالات سريرية مباشرة بعد دراسة كروت انكي

🔥درست قسم او معلومات جديدة و حابب تاخد حالات سريعة من نفس الموضوع تازة بعده بمساعدة الانكي و امبوس(اللي نشرنا سابقا عنها)
صار فيكم تاخدوا حالة سريرية باي موضوع بشكل تلقائي و بسيط جدا

💪بعد ما تدرس الsubdeck المطلوبة بتجرب الطريقة اللي بتعتمد بشكل مباشر على الاطلاع على محتويات الكروت المكتوبة باللغة الانجليزية بكل رزمة لتبحث عن حالات سريرية موجودة عند Amboss. طبعا جربنا الموضوع برزمة Duke Pathoma مسبقة الصنع و لكن من المفترض ان تعمل مع كافة البطاقات حتى الشخصية


📩لتحميل ال Add-on:
بعد فتح تطبيق الAnki » خيار الـ Tools » ثم Add-on » من الأعلى في اليسار Get Add-ons
و الصق الكود التالي و انتظر اكتمال التحميل
🧷 1044112126

👩‍⚕️اما بالنسبة للوصول للحالات السريرية
مثل ما هو موضح بال GIF المرفق 👇
1. من الاعلى خيار Browse
2. اختر القسم التي تريد
3. اخيرا start Qbank session

بنتمنى نكون ساعدناكم👋

اعداد: نور ضوا

استنشاق العطر بيحسّن الذاكرة👀
كيف؟!
❕بدايةً خلّونا نعرف إنو الشم إلو مكانة VIP ضمن الحواس😂لأن هوّي الحاسة الوحيدة اللي الها ارتباط مباشر ب جميع مراكز الذاكرة و الإدراك بالدماغ..
❕ العلماء عملوا دراسة ليشوفوا تأثير الروائح العطريّة على الذاكرة و الإدراك،
ف جابوا المجموعة1 و عرّضوها ل روائح زيوت عطرية لمدة ساعتين كل ليلة(أثناء النوم) لمدة 6 أشهر
و جابوا المجموعة 2 و كمان عرّضوها ل روائح عطرية بس بكميّة قلييلة

💡ف وجدوا إنو الغروب الأوّل تحسّنت الذاكرة عندون 226% !!
و كمان بتصوير الرنين المغناطيسي الوظيفيfMRI لهالغروب لاحظوا تحسن واضح بمناطق الدماغ المرتبطة بالذاكرة و الإدراك(اللي مع الأسف بتقل فعاليتها مع التقدّم بالعمر)

❕بتجربة أُخرى كمان وجدوا إنّو استنشاق زيوت عطريّة يوميّاً 30دقيقة لمدة 3 أشهر حفّز تكوينخلايا عصبيّةبالبصلة الشمية و الحصين

🔶من الشغلات المثيرة للاهتمام اللي وصلولها:
متل ما الشم حسّن الذاكرة، ف تضرر هالحاسّة عمل تدهور بمراكز الذاكرة!

+خلل الحاسة الشميّة بيشير ل كتير أمراض
ف هوّي العرض الأوّل للألزهايمر
و منشوفو كمان بعدة اضطرابات نفسيّة و عصبيّة(متل القلق، الاكتئاب،اضطراب نقص الانتباه و فرط النشاط adhd...إلخ)

🚫لكن من عيوب هالدراسة إنّو الأشخاص اللي عندون اضطرابات غير شميّة بتأثر ع الانتباه و الإدراك ف استنشاق الروائح العطريّة حسّن فقط الذاكرة اللفظيّة

🌹🌿و هلّأ بعد هالبوست صار فيكون تحطّوا جنبكون شمعة عطريّة و انتوا عم تدرسوا (أو تبخبخوا من عطركون المفضل مفيش مانع😂) كرمال تركّزوا أكتر و تتفاجؤوا بذاكرتكون💪🏻

د.إسراء حسن

عيد فطر مبارك عليكم جميعاً 💙
منعتذر عن عدم النشر بالفترة الماضية نظرا للامتحانات وظروف شخصية 😥
انشالله بعد العيد عائدون 💙

أي حدا في عندو شي استفسار او موضوع حابب نحكي عنو قادر يحطوا بالتعليقات او يتواصل معي وانشالله منجاوبو او مننزل بوست بالجواب 💙
أعذرونا ع التقصير 😅

جورج جيل دو لاتوريت طبيب اعصاب و نفسي فرنسي وأول من شخص هي المتلازمة وسميت ع اسمه 😊

متلازمة توريت (tourette syndrome)
🔺 شو هي هالمتلازمة برأيكم؟

باختصار هي عبارة عن خلل عصبي وراثي او يمكن تكون العوامل البيئة مؤثرة او النواقل العصبية

بصيب الاطفال من عمر سنتين ل العشرينات ويعتبر الذكور اكثر تأثراً بهي المتلازمة من الاناث وتبدأ اعراضها بالتناقص مع التقدم بالعمر

🔺 الاعراض:
بينصاب المرضى بتشجنات وتقلصات بالوجه او بالجسم كامله والضرب بالقدمين على الارض  واصدار اصوات مكررة والصراخ وتردد الفاظ نابية وكل ذلك يتم لا ارادياً
بتتغير هي التشجنات مع مرور الوقت بعدد مرات تكرارها ونوعها وحدتها وتعقيدها 

تصنف هي المتلازمة حسب النوع والاعراض؛ فيمكن تكون التشجنات بسيطة متل رمش العين وهز الكتفين  مابتم استخدام كتير من العضلات

او يمكن تكون التشجنات معقدة وبتم استخدام كتير من العضلات مثل القفز والدوران او التلفظ بالفاظ بذيئة
 
🔺 برافق هي المتلازمة حالات مثل:
1.اضطراب فرط الحركة والتشتتADAH
2.القلق
3.صعوبة التعلم متل القراءة والكتابة
4.مشكلات سلوكية يمكن يتصرف تصرفات غير لائقة وعدوانية
4.مشكلات معالجة الحسية بعاني بصعوبة بالاستجابة للحواس مثل اللمس او التذوق او الشم
5.اضطراب او سلوكيات الوسواس القهري 
متل مو معروف الوسواس القهري هو تكرار افعال وتصرفات او افكار غير مرغوب فيها  وهالشيء بيتفاقم مع هي المتلازمة

🔺 طيب شو هوي علاج هالمتلازمة:

العلاج بشكل عام بيهدف للتحكم في العرات (اللزمات) اللارادية ويلي بتتعارض مع الانشطة اليومية

السؤال هلق .....
1.شو هي الادوية يلي فينا نستخدمها ؟
2.هل فينا نخفف الاعراض بطرق اخرى غير الادوية؟
3.كيف يكون مستوى الدوبامين عندهم وماعلاقتها بداء باركنسون؟
4. طالما هالمرض الو علاقة بحركات لا ارادية فيه تشابه بينو وبين متلازمة اليد الغريبة!
سمعانين فيها وشو هي؟

المصدر والأجوبة رح تنحط بالردود بعد شوي.

إعداد: الصيدلانية أروى محفوض

GIF عن الموقع تبعهن.
البوست من إعداد: نور ضوا

👋مرحبا جميعاً

رجعنا الكم بمصدر رائع للدخول لعالم الطب باللغة الانكليزية Zero to finals ...

مصدرنا لليوم بقدم المعلومات من خلال تلت طرق
👂مسموعة عن طريق بودكاست ( اللي التركيز عليها اليوم )
✏️مكتوبة عن طريق الموقع
و اخيرا عن طريق 🎞️ فيديوهات على اليوتيوب

جمال البودكاست انه مفهوم و واضح ليدخلكم عالحالة باللغة الانكليزية بسهولة و دائما الموضوع مكتوب و فيكم تقراؤوه عن طريق الرابط اللي بينذكر ببداية كل مقطع...

مواضيع متنوعة و بكتير مجالات..
نشالله تساعدكم و تستطيعوا الاستفادة منها و خاصة بالفترة القادمة من زنقة الامتحانات🫡

روابط :
الموقع الخاص فيهم
على تطبيق Podcasts
قناة اليوتيوب

أنماط التعلم! حقيقة أم خيال.
من أقدم البوستات اللي كتبتها وتعبت عليها.

#أنماط_التعلم/نظرة أقرب!

في عالم بتدرس بناءاً على السمع والشرح.. وعالم بناءاً على الصور والربط.. شي بصم وشي فهم وإلخ..

دائما بينصحونا "شوف الطريقة اللي بتناسبك وادرس"..
طيب ليش مو كل الطرق تنفعنا بالدراسة؟

لهيك تعو معي لخبركن عن #أنماط_التعلم واللي بتتسمى:
#VARK

V➡️ visual:
- مرئي أي التعلم بالرؤية والربط بين الكلام والصورة مثلا، وانك بتتعلم وتفهم اكتر إذا بتشوف فيديو مثلا أو #رسوم_توضيحية.
A➡️ auditory:
- سماعي أي بتتعلم عن طريق سماع الصوت وتسجيلات للمواد.

R➡️ Reading/Writing:
- وهاد النوع بيتعلم أكتر عن طريق القراءة والكتابة وببعض التصنيفات تم ضمو للمرئي Visual..

K➡️ kinesthetic:
- عملي يعني بتتعلم اذا بتشتغل بإيدك.

بس هدول الأنماط مانها إلا شيء نظري لحد هلق ومع هيك كلياتنا مصدقينها ومقتنعين فيها.. ليش؟
ممكن لأنها حجة مقنعة لإلنا لنبرر فشلنا بشي معين!

لأن فيك بكل بساطة تقول أنا رسبت بالامتحان العملي لأن بعتمد ع البصم! ..
أو تقول إنك رسبت بالتاريخ أو الفلسفة لأنك بتعتمد ع الفهم والشغل العملي!!
ف بالتأكيد هي حجة حلوة إلنا 😁.

لكن في دراسة تمت على 427 طالب في الولايات المتحدة بجامعة انديانا..
وبالتحديد على مدار فصلين بال 2015 و 2016 وطلبوا منهن يعملوا VARK test ليعرفوا شو نمط تعلمهن حسب هالاختبار...

وبعد ما قدمو الإمتحان الفصلي النهائي طلبوا منهن يخبروهن عن تفاصيل دراستهن للمقرر وكيف كانت الخطة تبعهن...

للصدمة، طلعت النتائج انو 67% من الطلاب استخدموا خطة غير متناسبة مع طرق أو طريقة تعلمهن حسب VARK test.

ولقت الدراسة انو الطلاب اللي استخدمت طرق دراسة متوافقة مع نمط تعلمهن ما حققوا نتائج مختلفة كتير عن أقرانهن اللي استخدمو طرق غير متوافقة...

✨لهيك يا عزيزي بعد ما قرأت هالبوست بس حدا يستخدم حجة "درست بالطريقة كذا مشان هيك ما نجحت" قلو لا يا حبيبي ما صح بتكون ما درست منيح🤨

✨وخلينا نوضّح نقطة مهمة، كلياتنا عنا طريقة مفضلة للتعلم ولكن هالشي ما بيعني مثلا انو نحن ما فينا نفهم أو نتعلم اذا غيّرنا هي الطريقة...

وكمان ما ننسى انو الشخص الواحد ممكن يكون عندو اكتر من طريقة مفضلة للدراسة!🔥.

هاد أحد البوستات الأولى اللي كتبتها وتعبت عليها بين قراءة كذا دراسة لأطلع بالموجود هون.

بتمنى يتم دعم القناة اذا شايفين إنها بتستاهل الدعم سواء بالنفاعل ع الرسائل والتعليق... او مشاركة البوستات مع اصدقائكن واضافتهن ع القناة... وشكرا لأخذ الرقت بالقراءة لهون واذا وصلت لهون حط قلب ع الرسالة بطريقك 😂💙

المصدر بالردود ورح حط رابط لفيديو ظريف عن الموضوع ع اليوتيوب كمان.

#In_Sync

كل عام وانتو بألف خير جميعاً...
انشالله تكون سنة خير عليكن وع أهلكن وينعاد عليكن بالصحة والعافية...

ولكن يبقى السؤال، ماذا علمتك 2023 او ماذا تركت 2023 أثرا في نفسك!
رح حط جوابي لهالسؤال بشكل بسيط بالرد ع هالرسالة... وبتمنى تشاركوني الأمر...

معقول في تشابه بين ال AI و دماغ الإنسان ؟🤔

بناء على دراسات عملها الباحثين وجدوا انو في تشابه كبير بين عمل الحصين بدماغ الانسان و عملية معالجة الذاكرة عند الذكاء الصنعي AI .
الدراسة سلطت الضوء على التشابه الكبير بيناتون بعملية ترميز الذاكرة اي تحويل الذاكرة قصيرة الامد الى طويلة الامد .
الباحثين ركزوا على نموذج المحول "transformer model " يلي هو اليوم حجر الأساس بتطور ال AI و وجدوا انو طريقة معالجته للمعلومات شبيهة بآلية عمل مستقبلات NMDA عند الانسان .


طيب شو هاد ال NDMA و شو هاد المحول ؟
باختصار
مستقبلات NMDA هي مستقبلات للناقل العصبي الغوتامات يلي يعتبر المنشط الأساسي في الجهاز العصبي المركزي عند الإنسان و يلي اله دور هام باللدونة المشبكية يلي تعد الاساس بعملية تشكيل الذاكرة عنا .

اما نموذج المحول فهو احد نماذج التعلم العميق "deep learning" يلي بتعالج البيانات المدخلة عن طريق فهم السياق و تحليل العلاقة بين هي البيانات ( و هاد يلي بميزها عن غيرها ) و بعدها بتعطي النتائج .


منرجع لموضوعنا
بالدماغ البشري مستقبلات NMDA تمتلك بوابات ايونية ، بتفتح وقت ينفرز الناقل العصبي الغلوتامات و هاد الشي يلي بنشط الخلايا العصبية و بالتالي بتسهل عملية تشكيل الذاكرة و لكن من ناحية اخرى في عنا بالدماغ ايونات المغنزيوم يلي بتشتغل كحاصرات لهي القنوات الايونية يعني بتمنع فتحها المفرط وبتتحكم بالاغلاق تبعا و بالتالي ما بتتنبه الخلايا العصبية الدماغية الا عند تنحي المغنزيوم عن البوابة .
طيب المفاجئة انو الباحثين لاحظو بنموذج المحول transformer model طريقة معالجة بيانات شبيهة بعمل البوابات الأيونية بالدماغ ، الشي يلي دفع العلماء لمحاولة للاعتقاد انو طريقة تشكيل الذاكرة متشابهة بين الاثنين ،تمامًا كما في الدماغ حيث يؤثر تغيير مستويات المغنزيوم على تشكيل و قوة الذاكرة، أدى تعديل وسيط "parameter" المحول بشكل مشابه لحركة بوابات مستقبل NMDA إلى تحسين الذاكرة في نموذج الذكاء الاصطناعي.



بالنهاية هدف هاد النوع من الابحاث هو محاولة لتوفير وجهة نظر هامة عن طريقة عمل الدماغ من خلال نماذج الذكاء الاصطناعي و بالتالي زيادة فهمنا للدماغ البشري و زيادة فهمنا لأنفسنا.

المصدر:
https://ibs.re.kr/cop/bbs/BBSMSTR_000000000738/selectBoardArticle.do?nttId=24264&pageIndex=1&searchCnd=&searchWrd=

مسا الخير جميعا 💙
استكمالاً لبوست #منحة كورسيرا والكورسات #المجانية 🔥

جبتلكن اليوم كورس كتابة الايميلات بشكل احترافي... ما بيصير ما تعرف تكتب #ايميل بطريقة لدكتور بالجامعة او لأي جهة كانت...
وانطلاقا من كون الموضوع #مهم جداً... انعمل كورس لهالموضوع ع منصة #كورسيرا...

بنصح كل حدا ما بيعرف يكتب ويبعت ايميل يسجل فيه لان عاجلا او آجلا رح يلزمك الموضوع...

وبالتوفيق جميعا 💙
اعملو فولو للصفحة وأدعوا رفقاتكن رجاءاً 😊

عنوان الكورس بمنصة كورسيرا مع الرابط:
Write Professional Emails in English:
https://www.coursera.org/learn/professional-emails-english

إعادة نشر لكورس خفيف ظريف ومهم لأي حدا حابب يصير يستخدم الايميلات كونها طريقة التواصل الرسمية مع المنظمات والشركات والجهات الخارجية...