شێعرێ هەورامیێ

جە تەقیۆمی بە ساتوو دووری تۆ وەی
دماو عەسری کە سەی‌پڕ بۆ نەبی و نەی

جە تاریکی شەواو بێ‌تۆیی تەرسوو
جە جێژوانێ کە غه‌یروو من تۆ ڕا دەی

جە ماسیوایت زوان لاڵ و چەمم لێڵ
جیاو نانی خەموو نەبیەیت هەتا بەی

ئەگەر سەروەش کەرا بەعزێ بە بادە
مەیاوۆ نیم‌نگاهێ تۆ دە سا دەی

کەرەم فەرماوە بۆ جارێ بە سەر دای
بیەن وڵ وڵ دەروونم حەر پێسەو نەی

مەبا ساڕێژ خەمێ هێجرێ کە دانات
ئەچی شێعرێ مەگەر تۆ پەردە لا دەی

#سه‌یێد_جه‌لال_ئه‌کبه‌ری (#ئاڵۆز)


@hawramyanah

پیری

ژیوای گردیما تا بە سەر نیەن
عومر تەمامەن، لوولەپێچ بیەن

خەزان جە باخان وێش دانش دیار
گەردەلوول بیەن، گەڵای بێشمار

هەوار نەمەنەن، چۆڵ بی چەم و دۆڵ
ماواو نازارا هەم خاکەن و خۆڵ

جوانی لوا و گۆچان ئاما دەنگ
جەسە سەفەر کەرد پەرێ قەبری تەنگ

وەشڵەی بە پاری، دەس لەرزان نەبێ
باڵا نەونەمام ، بێ سامان نەبێ

پیری ئامان و شادٚی بارش کەرد
عومری ویەردە و هەناسانی سەرد

خێمەو زمسانی هۆرش دان دەوار
ئاخ پەی جوانی، داخم پەی وەهار

#هومایون_موحەممەدنژاد

@hawramyanah

‍ وەختێ دڵ مەڕیا بە یەکجار بازە خەم تا سەر بلۆ
یانەباوانش نیا خەم چارەش ئانەن هەر بلۆ

پێسە ڕۆخانێ کە بێ مەقسەد ملۆ پا دۆڵەرە
تەختوو سینەو تاسەباری  ڕاو دڵینە  مەر بلۆ

پاو پیاسەو دەردەدارا کێ دییەن مرڐۆ گوڵم
بێ قەراری تاونۆشۆ عاشق ئەر کەمتەر بلۆ

خاتراتوو ڕوومەتیت خۆ بی سیاوی پەی دڵی
ئای کە چن دوور و مەحاڵا، وەر بە بێ سێوەر بلۆ

پێسەنا ڕۆحوو چناری وەختێ پاییز مێ سەرش
مەنزەرێ تاڵا  کە  زانۆ ئاڐ مشۆ بێ بەر بلۆ

من کە دەورانوو جوانیم داری شەوقوو وەسڵوو تۆ
گردوو پیریم لازماری خاترت یەکسەر بلۆ


شێعرە: #ناتیق_ئەداک

@hawramyanah

📖 مەشقوو کەلیما

منویسوو ئاوی،
         وەڵات تەژنە بۆ
منویسوو نان،
            زاڕۆ ئاورا...
منویسوو زمسان،
وەروە،
       قژاو ئەدٚایم ڕەنگ کەرۆ و
کوڵبەرێو،
        ڕچیۆ تل و تاشیەرە و
هەناسەو هەرمانبەرێوە،
                   تاسنۆ دەلاقەی!
منویسوو پاییز،
           گەڵاو عەمری گیان مازۆرە
منویسوو ئازادی،
             وەڵات گڕە گێرۆ!
شمە واچدێم:
       جە چێشی واچوو
قەڵەم گۆرانیێ بنویسۆوە و
دڵ حەکایەتوو جوانیەکا
گێڵنۆوە پەی دماڕۆی؟
من کە توانتۆو دەروونیم و
               ڕەگاوڕەگوو وەڵاتیم
خێزگەو ئاخەزەردان...!

وەشم ئسیێ
نویستایێم ئاوی،
            وەڵات سەوزیایێ
نویستایێم نان،
             زاڕۆ تێر بیایێ
نویستایێم زمسان،
                وەهار دێویایێ
نویستایێم پاییز،
        ڕەنگەکا دەسەملانوو یۆی بیاینێ!
نویستایێم ئازادی،
    ئاسمان پەڕ بیایێ کاوەتری
بەڵام...!
ئیسەیچە،
ئەرێ...
ئیسەیچە،
      هۆمێدٚم سەوزا و
جادٚە پیمۆ چەمەڕاییم...

شێعره‌: #شارۆ

ده‌نگ: #بارین

@hawramyanah

خۆ من وه‌هاریچم لوا

شێعره‌ و ئه‌وه‌وانای: #سوهه‌یب_ئه‌داک

@hawramyanah

چە شیرین بێ
شکۆو ئامایت

دڵم،
فەرشی سووروو ڕاو سەفەریت

چەمێم،
قوربانەو تیجیەو وەریت

دەسێم سەروو سینەیمەوە،
مل کەچەنا و
کڕنۆش بەروو
پەی سەرەوەریت.



#ڕەعنا

@hawramyanah

#جارێچ_من

بۆرێ پەی یەک جاریچ بیەن
با یاگێما فاڕمێوە
ئی جارە من تۆریەو چەنەت
ئی جارە من
بێ‌خیاڵ بوو
جارێ پەشتی کەروەو وەنەت
ئی جارە من
با چەنی ڕەقیبی خوو
وێم بدٚەو لانوو بێ‌عاری
بزانوو تۆ حاڵت چێشا
مەتۆریەی؟
مەبی برجوو زەهرەماری ؟

#ساڵح_ڕەسوولی (#کەشەوان)

@hawramyanah

ڕەنج،
تاسێوەن
  پەیجەو ژیوایەرە هۆرت وەزنۆ
و

نەدٚامەتی ،
  سەوزیای مارێوەن
          سەرەڕاتەنە...!

✍️ #شارۆ


@hawramyanah

کەرەم سورمە
دەم چەمەکات
تا شاهێدٚوو دیدٚەنیت بوو
وەختێ چەمەکات مڕەژی
ناخەڵاف،
لکوونە هانەو تەماشەیت
سێبەرەو برژانگاتەنە
چۆکێ مدٚەو...

باوڕ کەرە،
ئانە تەنگێش هۆرچنیەنا،
بێتاقەتین ...
پەنەم وەشا هامدەمت بوو

کەرەم سورمە
با وەختێوە خەمبارەنی،
بوو تێکەڵوو هەرسەو چەمات
هام‌خەمت بوو

#ساڵح_ڕەسووڵی ( #کەشەوان )

@hawramyanah

ئەگەر زوان وانایش پەی من تاوانەن
چی پەی تۆ قیبلەی دین و ئیمانەن؟

ئەگەر زوانوو وێم کەسری شان بارۆ
زوانوو بێگانەی ناقیم وشارۆ!

#شاهۆ_مەعازی
@hawramyanah

‍ ئەوەڵ به نامێو خودٚای ڕەحمانی
زاتی بێ هامتا ، فەردی ڕەبانی
هاوارێو کەرمێ پێغەممەر گیانی
ڕۆحش حازر بۆ فەخروو ئێنسانی
هیمەتێو کەرۆ پەی هەورامانی
شادٚیانەما هەن چلێو زمسانی

خاکوو وەڵاتیم پاک و بێ‌گەردٚا
مەڵهەمارێ پەی سارێشیو دەردٚا
دژمەن چی خاکە مات و دڵ‌سەردٚا
بە دۆعاو خاسا دایم ڕەنگ‌زەردٚا
یا ڕەب ڕەحمەتیت بدٚەی وارانی
شادٚیانەما هەن چلێو زمسانی

هەوراماناتم خاکش گەوهەرا
درەختش قەڵەم سیروان جەوهەرا
ئاسمانی بەرزش لەوح و دەفتەرا
هانەچەمێچش ماچی کەوسەرا
یا ڕەب پارێزنی پیر و جوانی
شادٚیانەما هەن چلێو زمسانی

وەڵاتم یانەو شاعێراو دەورین
قەڵەمشا شمشێر پەی دڵوو گەورین
شێرە‌کناچێم کەفەنشا هەورین
ئینەیە ماچا بەهەشتی بەرین
یا ڕەب نەوینا مەکروو شەیتانی
شادٚیانەما هەن چلێو زمسانی

وەڵاتوو سەیدی عێلمش کیمیان
تۆموو خیرەتی جە خاکش شنیان
بە سەوداو عەشقی مامەڵە کریان
یا فەردی ئەعزەم بێ ڕیا ونیان
یا ڕەب پارێزنی عەیشوو یارانی
شادٚیانەما هەن چلێو زمسانی

هەوارێ چۆڵێ ماتێ و بێ نازێ
هانەچەمێشا پەڕێنێ ڕازێ
مەگەر شاعێرێ ، ئاواتەوازێ
ناسک خیاڵێ سەمفوونی‌سازێ
بەراشا دەقوو وەشیو جارانی
شادٚیانەما هەن چلێو زمسانی

ئارۆ هەراڵەو شادٚی چووزەش دان
ئەرێ ڕەعیەتێو ماچی کوڕە شان
زانی هێممەتوو پیراما دەوان؟
ئێشوو سەدٚ زاما جە دڵما سرەوان
هاوارێو کەروو ئەو شا عوسمانی
شادٚیانەما هەن چلێو زمسانی

کەپروو هەوارگەو ئاواتا ئارۆ
مێمانێوەتەر شاعێر مەدارۆ
بەشکم وارانوو ڕەحمەتی وارۆ
زوڵفێ نازارا چین چین ونارۆ
بەننەن دەرەویان باباحەیرانی
شادٚیانەما هەن چلێو زمسانی

مورادی بەقوو هەواراو تەختین
مێخەکوو ملوو دڵداراو تەختین
وەش کەلام مەکین جە یاراو تەختین
وەتەن پەروەروو بناراو تەختین
بە ئێرسوو ژەنێ شاعێرا، زانی؟
شادٚیانەما هەن چلێو زمسانی

حەیران شوکرانەو شەرەفیش وازۆ
بە یەکڕەنگیش و یەک دڵیش نازۆ
بەرگوو دەروێشی کەڵپۆس ورازۆ
جەفاو هیچ کەسی جە دڵ نمازۆ
گەناوە چڕۆ پەی تەختی سانی
شادٚیانەما هەن چلێو زمسانی


ئازاد مورادی_حەیران

https://t.me/sheerhawrami

هاو هەناسەیت ڕۆح مەبەخشۆ ئەی مەسیحاو سەردەمی
بۆی وەشوو زوڵفات بە ئانێو گیان وزۆنێ شادەمار

من بە زوقموو مەینەتوو دووریت بە یەکجار مەردەنا
مەر بە ئامایت گیان وزی لەش، ڕابڕانم بۆ وەهار

#شارۆ

@hawramyanah

ئەی بێ‌خەمی دێوانەدڵ شێتی وەسێن دڵ بێ‌کەسا
دایێم بە یادٚوو ئا چەما ڕەوتش کەچا ویرش مەسا

بەش لابەری دێوانەگی چارش کەری بێچارەگی
ئاوا کەری وێرانەگی ساکن کەری ئاوارەگی

دڵ بێ‌قەراری تابە کەی؟ شەوزینەداری تا بەکەی؟‌
نامەی وهاری تا بەکەی؟ دووری جە یاری تا بەکەی؟

تاقەت نەمەن هاوار وەنەم، هجری هه‌ناسه‌ش ناست په‌نه‌م
سڵامت کەروو ئەی دڵ وەسێن به‌شکه‌م تۆ واز باری چەنەم


#مه‌نووچێهر_ته‌وفیقی

@hawramyanah

چەم ڕەوێڵەو شەوقوو ئاماین پەی بەری
کلکە هیلیانەو خەیاڵارە بەری

ڕەق بیەو ئەیروو هەناسه‌ی و سۆو دڵی
وەروە عەقدوو مارەییش بەس چن وەری

ساکوو شانەیم خاترێش ئاستێ جیا
قورسەبارێو پەی دڵی سەوداسەری

وێم مرووناوە چەمات، چا مەحشەری
پەڕ ڕەجا و خەوفێ مەدارا یۆتەری

ئامەشۆشا پاو چەمی کۆڵانەنە
تاقەتش بێتاقەتی کۆشت دوودەری

دەس مەیاوۆ پەشتۆ مازیم لاتەنە
ئاسمانەو پایوە مدرانا پەری!

دڵ غەریبوو شارەکەو لەیلاو دڵین
بێ‌پەناگاو ساتەکاو بێ‌مەنزڵین

ئای گولا پەڕ بوو جە تۆ و تۆ هەر نەبی
پاو سەهۆڵوو مەیلەکەیت پەیم وەر نەبی

هارەقین مدروو دیارتەو، سەی نەبۆ
ئاخرین تاکسی بلۆ و ڕام پەی نەبۆ

من مەنوو ئەوشۆن‌دیا و ئاهێوی داخ
چن خیاڵێ چەم‌بەهەرسێ و بێ‌قوڵاخ

نامنیشانوو ڕاو دڵیت پەرسوو جە کێ؟
ڕاسەکەێش واچۆ پەنەم، وەربوونە کێ؟

ئاننە خەمما تووڵەڕایێم تۆریا
هەر نەیاونام لات نیشانێم شۆریا

ژیرەنا دەی، پەوسە ماچام شێتەنی
چن سوێست ئاشنان، تۆ کێتەنی؟

چن هەزار ئاننێم هەنێ کەمشا دیەن
ئاسمانەو تۆ فرێشتا وێتەنی

کێ متاوۆ بەزموو مانگێوێ وەنۆ؟
یا پێسەو تۆ بۆ، نیا، تۆ وێتەنی

هه‌و غەزاڵی شێوە شیرین پاسەرەو
بێخەنە عەقڵ و کەماڵی ڕێتەنی

ڕۆح مەتاوۆ دڵنە تۆ هێڵەک کەرۆ
دڵ بە ڕۆحت پێوەنا و ئامێتەنی

دەسچنوو گوڵزاروو ڕەنگیش، نەووەهار
پەی گوڵوو سەرتاجوو عەشقیش پێتەنی

دێویا ئاوەو قەراخوو ساوەکا
شێویا سازوو وەنەی ماساوەکا

چەم بڕوو ئاما و لوایاو لاشەکا
ئاوەزی مانیا کەرۆ کێش پێشەکا

تەژنەما و دووریت برێژنۆم ئاننەتەر
هەڵمۆ جادەی پەی لوایت ئاماوە سەر

چێگە هەرتا ئاسمان لام دوورەنی
من ملوو گم بوو جە وێم، تۆ سوورەنی

پاو لوایت هەرسه‌و چەمام مارۆ خۆوە
ئامیانوو تاسەکەیت مارۆ تۆوە

قاو قڕی و گەرما و غەریب و دەربەدەر
یۆ چڕۆ تا شاروو لەیلای یەک نەفەر

#خالێد_ئه‌حمه‌دی



@hawramyanah

🔻خەڵکوو دنیاینا


ڕوێوە مەی،
ئینسانی بە نیمەیوە سەوزی و هەسارە و
نیمەیوە جە پاکی ئاوەکا وینمێ

چاگە
گرد پێوەرە جە زوانێوە
سەوادٚوو سادەگی مسمێ
گوڵەکێ
بە زوانوو تۆ مەخوا و
تۆ
جە دایرەتولمەعارفوو مێرەبانینە
شۆنەو ڕازەو چەکنای مەماو لەولاویەرە گێڵی

ڕۆجیاریچ
وەڵ جە وێرەگای
هەزار هەزار هەسارێ پەی تۆ چنۆ
نەکا،
شەوێ جە تەنیایی دەساتەنە پەرێشان بی

ڕوێوە مەی،
دنیا بۆ به‌ باخچەیوە بێ بەرەو زاڕۆڵا
چاگە هەرکەس ئەرکوو سەرشانیش
"ئەلف" تا "ی"ا
بە خاسی و ڕاسی فێر بیەن

یۆ،
مێرەبانی نەقاشی کەرۆ
ئەویتەر،
گوڵەکا کەرۆ مێمانوو نووری و
یەرۆمشا سەرقاڵوو شێعرەو هەسارەین
پەی ستایشوو ئینسانی

چاگە
نە خەبەرێوە جە نام و نیشانوو قەبیلەین و
نە گرم و قاڵ
گرد یۆترینی ئازیزم ئازیز چڕانێ!

ڕوێوە مەی
زاڕۆڵێ پەی تەماشاو کینە و غەرەزی ملانێ مووزە
تا هاگادٚارێ با جە نەزانی وەڵینەکاشا
ئا ڕوە، یاگێ درەختی بێ‌سەمەروو تەنیایی
کەناروو هەر کووجیێ و خیابانیەنە
شکۆفێ وەهاری و بەرەکەتی و هۆشیاری درۆسا و
هەر زاڕۆڵێوی
هەزاران هەزار ئەدٚای مێرەبانێش هەنێ و
هەر ئەدٚایوە
هەزاران هەزار تفڵێ زەریفتەر جە غەزەڵێ

ئا ڕوە، شاو عاشقا وەزۆرە زەمین و
پەی وێش یانێوە کەرۆوە
گاهه‌زیچ، بی دڵبەسەو کناچێوە
هێشتای
سەی شێعرەکاو منەنە غەزەڵێ واچۆ!

ڕوێوە مەی
کۆڵانێ و کەپرێ و بۆسانەکێ
بە نامێ هەسارەی و ئاشتی و وەشبەختی واناوە

ڕوێو مەی،
دنیا،
دنیاو شادی و شعووری، نوور و نما و نیایشیەنە
ستایشوو وەهاری و بەرەکەتی و بێداری
نیایشوو تۆ... ئەی ئێنسان!
ئەی شکۆدٚاری بێ‌عەیب
مێهر و مانگە و هەسارە
ئەی عەشقی هەتایی
وەشەسیای بێ شک
گیانداری جوان
ئەی نیایشوو خاسی ... شاعێر!
مامۆساو من،
مامۆساو گردیما
ئێنسان، ئێنسان، ئێنسان!

ڕوێوە مەی
ملمێ تەماشاو جوغڕافیاو دنیای
تا بە مەرزوو (ئینە هنوو منا و ئانە هنوو تۆن) خوومێ.
ئا ڕوە،
چەمێ خەڵکوو ئورووپای تەنگ و
پێسە وامی وینمێ و
زوڵفێ کناچاو وەرکەوتی
بە زەردی سمەرا درەوشیا و
ئەگەر زاڕۆڵێو چەنەت پەرسۆ:
خەڵکوو کۆگەینی؟
بە زەردەخوێوە پەڕ جە مێرەبانی واچی:
خەڵکوو دنیاینا

ئا ڕوە ئیتر
شوعارەو "مەرگ پەی ..." و " مەردە بۆ ... "ی
یادٚمانە ڕەمان و
گردوو خەڵکوو دنیای
چێروو ئاڵایێوە یەک ڕەنگیەنە
ئادٚیچ بە ڕەنگەو ئازادٚی
سروودە وانا

ئا ڕوە
پەلەوەرەکێ بیابانەو گێڵاوە و
پەی جەژنەو جە ئەدٚابیەی پەپوولەی
مانگەیچ،
پەڕوو دامنەیش نوور مارۆ سەوقات

ئا ڕوە ... وەشەسیاو من!
پەی یاوای بە تۆ
موحتاجوو قێخای و یانە و بەهانەی نیەنا
من،
پەی تەنیایی تۆ، گۆرانیێوە ماچوو
تۆیچ،
بە ئیشارەو پێڵەو چەما
جوابوو دنیای و وەشەسیایی و مارەیی مدٚەیەو
ئینەن، دماڕۆی چەرمە و سادە
کە ئینا ئێنتێزاروو ئێنسانیەنە...

✍️ سەی عەلی ساڵحی
🖌 بە هەورامی: #شارۆ


@hawramyanah

ئی جارە مەحاڵاری سەفەرمانە دڵێ بۆ
چی بەڕڕ و بیابانوو وجوودینە گوڵێ بۆ

هۆ ئەی منی وا بەردٚە ئەرێ هەر دڵی هاڕای
هۆ ئەی دڵی وێ کەردٚە ئەرێ هەر دڵی ماڕای

داخەو ملی ئانێنە کە دامانی خنیکنا
داخوو بڵی ئانێنە کە سیروانی خنیکنا

توویچ پێسە من ئاواتوو دڵیت لاو چەمی یاڤۆ
توویچ پێسە من ئاواتوو چەمیت لاو نەمی یاڤۆ

ئا لاشە بە ئاواتێ سەماواتۆ پڕا بێ
دیما گەز و نیمێ سەروو خاکیوە وڕا بێ

پووشێوە دەموو وایوە خوێ و واچێ زەمینی
توویچ تۆمی نەیاوا ڕوێ مێ ئینەیە وینی

وەڵڵا ڕوێ مێ تۆ خەمەکات باریوە لاما
تاڵا کە غەریبێوە بە هەرسی گنۆ پاما


شێعرە و ئه‌وه‌وانای: #ناتێق_ئەداک

@hawramyanah

ئەرێ ئەی تۆتەرین من! من‌تەرین تۆ!
کەسی بێگانە! ئەی ساراتەرین کۆ!
تەمامی ناتەمام! ملیۆن‌تەرین یۆ!
ئەرێ ئەی ڕۆتەرین شەو! شەوتەرین ڕۆ!

فێراقیت کەرد جوانیم پیرە زمسان
نەلان مەیلت جه لام تا بەیوە دیسان

هەواڵوو سەروەتی مەر شا بزانۆش
حەیاو سەبروو گەڵای شی وا بزانۆش
تەڕی دیدٚەو بەڵێ مەر نا بزانۆش
هەڕەو پاڵای هەواڵش پا بزانۆش

هەواڵوو من ئەگەرچی تۆ نەپەرسان
نەلان مەیلت جه لام تا بەیوە دیسان

قەرارم بێ‌سەرووشۆن کەوتەنت شۆن
نە تازەن تاسە دیدٚارت نە بۆ کۆن
ئەگەرچی دیدٚەنوو تۆ چێگە ئاشۆن
تکەو دیدٚەی تکاو دیدٚارەکەو تۆن

به دیدٚارت خەمێم بانێ هەراسان
نەلان مەیلت جه لام تا بەیوە دیسان

نە گوڵزاروو وەهاری و ئەرخەوانش
نە گەرماو هامنی و خورماپەزانش
نە پاییز و نە دڵتەنگی و خەزانش
نە زمسان و نە قرچە و یەخ‌بەنانش

دڵم دان وەرزه وەسڵوو تۆوە ئاسان
نەلان مەیلت جه لام تا بەیوە دیسان

ئەرێ ئەی نۆبەری ئاخر بەرم تۆ!
ئەرێ ئەی زووتەرین دێری دماڕۆ!
قەسەم پا ڕۆ چەنەش بڕیۆوە ئارۆ
خەیاڵوو تۆ مەگەر خەم‌‌بەرکەرم بۆ

به دیدٚەو تۆ قەسەم سەبرم نەتەرسان
نەلان مەیلت جه لام تا بەیوە دیسان


#جەماڵ_قادرپوور

@hawramyanah

دڵنیا بە دەرفەتوو ژیوای عەتابێوەن فەقەت
گەورە بەحرێ ئێمە دی تەنیا سەرابێوەن فەقەت

با نەرەجیۆت ئی بیەی بەزم و بەساتوو سەروەشین
ڕاسەکێش مەی هەرسینێ و جەرگیچ کەبابێوەن فەقەت

پەی خەمی و ئێشی و نەژیوای، پەی هەتیمی ساتەکا
دڵ سپارای و ئاشقی وەشتەر جوابێوەن فەقەت

ئەر بە گا ئامای حەز و ئاواتەکاما کفرێ بۆ
پا نیای ئەو بارەگاو خۆلیای سەوابێوەن فەقەت

نا نەنازی تۆ بە پەلکه و یا سەر و ڕیشیت، کە چی
چەرمە بۆ یا خۆ سیاو حازر غیابێوەن فەقەت

ئێمە ڕەنج و ئێمە زامێ، خۆ "خلقنا فی كبد"
پەوکەتەی پەی ئاقڵ و ژیری خەتابێوەن فەقەت...

#ژوان

پاییزوو 2724


@hawramyanah

‍ مەتەرسە


مەتەرسە با جە وساڵوو هەناسەکاتەنە مەس بوو
شەرابەنی بە خیاڵێو جە تاسەکاتەنە مەس بوو

جە فاڵەکامەنە پەوکای قەسەم وەروو چەمەڕانا
بە تاسەنا سەفەرێوتەر پیاسەکاتەنە مەس بوو

جە من غەریبە بە وێم و جیا جە گردٚ هەوەسێنا
سەفەر کەروو جە منێوی جناسەکاتەنە مەس بوو

جبەرتەروو خەمەکامۆ بەرێوە تا وەشەویسین
بە عاشقانە چڕیم و جە واسەکاتەنە مەس بوو

دڵێوە لێوە ئەگەر بۆ بە ئارەزوو مەنەن و هەن
هەتا مەنۆ نەفەسێو گیان کیاسەکاتەنە مەس بوو

بە عاشقانە کەستنا، جە شەرتەکاتەنە زانوو
ئەگەر چڕیم بە پەنا قەوڵە ڕاسەکاتەنە مەس بوو


#ئازاد_مورادی_حەیران


https://t.me/sheerhawrami

📖 پەخشانە شێعرە

هۆمێدٚ،
نێگاشەنە کڵاوەش قیتە و
ڕوخسارش،
ڕۆشنایی‌بەخشوو دماڕۆی و
هەنگ،
شیرینی خوەیشەنە،
پەنجەدەم!

گوڵاو کوێسانی،
بوەو زوڵفاشەنە قەتارەشا بینا بێ و
دوێ زەنجیرە مرواریێ،
ڕازیەیبێنێوە،
بە لەعل و یاقووتوو دووکانچەو دەمیش!

پلەو یاوێ،
لارەملوو گەرمی دەساش و
خوماری چەماش،
هاشاڵە پەی وەنەوزێ دێنێ
تا
چەمێ ئاواتەکاش،
هەگبەو خەیاڵینە کڵەڕژ کەرۆ...

ڕۆجیار،
سیماشەنە ڕۆشنایی دزێ و
نەرگس،
حەسرەتمەندٚوو هەناسەیش

چەمێش،
گرەوشا جە واشەی بەردەبێوە و
هەڵۆ،
بەخێڵوو بەرزەفڕیش

وەختێوە،
سەروو تەختوو نەوەشیانەینە
ژیوای،
سەرساموو نێگایەکاش بیەبێ


📝 #شارۆ

@hawramyanah

ڕاوه‌ به‌ی

شێعره‌: #ژوان

ده‌نگ: #شوعه‌یب_خالدی_زاد

مەینەتێ ساڵاو فێراقی گردٚ ملانێ، ڕاوه‌ به‌ی
وشکەساڵی لا مشۆ من بوو به هانێ، ڕاوه‌ به‌ی

ڕوومەتت ڕۆجیاروو ئەشقین، ئاسمانیم دۆنەوە
بەشکەتەی زقمێ جه دڵمەو لا بشانێ، ڕاوە بەی

تا چه‌مێم وینا چه‌مێت شه‌وگاره‌کێم باوه‌ به‌ ڕۆ
هه‌رسێ شه‌وقی مه‌ینێ واری دانه‌ دانێ، ڕاوه‌ به‌ی

ئەر تەقەو هەنگامەکاو تۆ بژنەواش گۆشێ دڵیم
بۆ به ئاوازی وەشوو یانەو ژوانێ ، ڕاوه‌ به‌ی

تا نەمامێ باخوو من بانێ به باخێ پەڕ سەمەر
مشیۆ تۆ بەی مشیۆ تۆ بەی، هەر زەمانێ، ڕاوه‌ به‌ی

@hawramyanah

خاڵێ ماچا بۆ، چەمێ ماچا نەی
دڵ گیرەن جە دام تەختی سینە و بەی

هەزار تەڵە و دام بە زڵفش نیان
بۆی عەترش جە بۆی هەزار گوڵ جیان

دڵم شۆن کەوتەی خاڵی زارشەن
خەڕیدٚار کاڵای وەش‌بازارشەن

#حامی_غەریبی

@hawramyanah

نەبی ساتێ ئەجۆ جەرگیم برێژا
هەزار ساڵێ بە ساتێ تۆ نمێژا

خەمێ دووریت چەنی تەی‌ با هەناسەم
پێسەو یەلداشەوێ پەلکەت درێژا

#ئاڵۆز


@hawramyanah

تەماموو شەوا یەلدایچ سەرش بۆ
گرد کەس پەی ئامایش گۆش‌خەوەرش بۆ

ویارایش چەنی بەندی دڵ نەبۆ
یا کە مێمانش تاقەگوڵ نەبۆ

هەلهەلەو شادیش چ سوودێ دارۆ
چەم بە ئینتێزار خەماش بشمارۆ

#شاهۆ_مەعازی

@hawramyanah

سۆحەن و نم نم واران موارۆ
سەرێ کێشە بەر زوڵفەکات دارۆ

با سوور و چەرمەو گۆنایت تەڕ کەرۆ
شاعرێ چوون من جە تۆ پەڕ کەرۆ

تۆ بەی بەر مەوۆ وارانەشێتە
خاکیچ شێت مەوۆ مەوۆ بە لیتە

ئەمجار جیاواز جە وەشتوو جاران
مەگنا پێوەرە ڕۆجیار و واران

#سه‌یێد_ڕه‌حمان_ مه‌حموودی

@hawramyanah

چن وەشەن دنیا ئاشتی وەشتە بۆ
چوارفەسڵوو ژیوای سەوزی ڕەشتە بۆ

شەڕ و ئاژاوە، تۆرمش بن‌بڕ
ئەسڵەحە مانیا، بازنشەستە بۆ

#شارۆ

@hawramyanah

تاڵی قچێش پێکێنێ سوەت گێڵانە گیانی
وشکا پێسەو درەختێ بێ‌ئاوی تۆو زوانی

عومرم سوەیلی ڕەشتەن هاکا گەڵاش گنارە
ئێرسش مەگەر بە من بۆ گەڵاو زەردوو خەزانی؟

دڵ پێسە ڕۆچەوانین پەی بانگوو مزگی ماتڵ
ئاوران و تەژنەدیدٚار چی وێت مەدٚەی نیشانی؟

هەرسەم خڕۆش جە تاسەی، تۆمەش تەقا بە بێ تۆ
پیریمه‌و پیری ئامان، تۆریا و لوا جوانی

ئاماوە خەم به لەشکەر تاڵان کەرۆوه شادٚی
مەینەت بیەن خوراکم بەجیاتی ئاو و نانی

بێ ڕەحمتەر جە پاییز! ئێلهاموو شێعرەکاو من!
(یَومَ الوَعید) هەتا نەی حاڵوو دڵیم مەزانی

وادٚەو ویساڵەکەیما چی بەردٚەنت جە یادٚت؟
ئی لاشە پەڕ جە زامەی دەی‌با مەکیش نە شانی

#سه‌یێد_جه‌لا_ئه‌کبه‌ری (#ئاڵۆز)

@hawramyanah

زوو بیەن دێر و بە شێنەی باوەڕی پاڵەیش وەتێ
ئەیروو کوورێ ناو دەروونی عومری سۆتەش پەی پەتێ

چرکەچرکە پەردە تابڵۆو ئەلوێداعی لامشۆ
دەی سەرەنجێ بوومی هاڵیش حەسرەتا کەردٚەن خەتێ

ڕۆژمار سۆیا جە واخوا کەردەیەو بێتاقەتی
مانیەینێ ئی هەناسێ چن بدٚا بەر مەینەتێ؟

ساعەتەو یاوای خیاڵوو دڵوەشی پیلێش وتێ
مۆڵەتش چنیا و نەدٚاش سەودا بە تیکی فرسەتێ

مەر بە دووکەڵ یاونۆش دڵ نامەشەرحوو ئی خەمی
شارژوو ڕۆحی سوور بیەن بێ هاز و نووز کەوتەن ڕەتێ

چەم تەمەش ئاردە و نەدٚیم تا (راجعون) پەی کۆی ملۆ؟
ئاخروو ڕای نوقتەکۆرا دەنگ نمارا ئایەتێ

ئی قەتارە هەر میاوۆ ئاخروو ویسگەی بەڵام
تا تەمامیای، بینەشا گەرم و گۆڕێنێ حەسرەتێ

#خالێد_ئه‌حمه‌دی


@hawramyanah

شاروو ئەم

بۆ بدٚیەنە شاروو ئەم خەم لێشەنە سالارەن
ئانەی کە مەوینۆ چەم دنیایوە دڵازارەن

خەندٚێوە جە دڵ هۆرزۆ بڕیا بە سەروو لچیه‌و
ئا تاسە بەڕەحمەت بۆ مەیتێوە گونابارەن

ئی سازە کەچێ سازەن پی ‌بەزمەیە ناسازەن
بێگانە پەنەش شادٚەن وێمانە بەناچارەن

پەیمانە زەڕ و زێڕەن دانامە بە پووڵ ژیرەن
چی‌ شارەنە خەروارەن هەرچی بەدڵت عارەن

تا هەم‌‌ قەدٚمم وا بۆ زەوقم بە سەروو ڕایەن
تەرسەم جە ڕەفێقێوەن ئەغیاری نقابدارەن

هەی دادٚ بە ئی دەورانەی کەوتەن وەروو وەرگانه‌و
هەرکەس جە پەلامارەو وەرگێوەنە ئەوگارەن

دەم بنیە دەموو مەرگی سەدٚ ئاندٚە بەکام یاوی
ئی‌ چەرخە جە ئێمەش‌ گرت ئیسەیچە تەڵەبکارەن

تەرسوونە بە ناکامی بمروونە نەوۆ‌ ساڕێژ
ئا زامە جە قووڵایی شارینە بە هاوارەن

داخۆ نەکەران لۆمەم واچوو ئینە کەی شارەن
بڕیان بە لچوو خەڵکی بێدەنگی سزاوارەن

#ڕه‌حمه‌ت_سه‌ففاری (#شه‌فه‌ق)

@hawramyanah

ئەگەر هێنەم بە ماتی یا بە هاوار و بە قاوا
گەرەکما مەینەتێ واچوو دڵم کەردەش بە ماوا

فەڵەک نەژنیش تکا و لاڵەم، هەزار جارێ کە واتم:
ئەئی شانێ زەعیفێنێ، دەشا بارەی کە تاوا

خەمت ئانەن سەرەت چەرمەن پێسەو پێشات، مەزانی
کناچێوە پێشە و مەژگش پێسەو زڵفاش سیاوا!

ڕەشا چارەش، دەروونیچش بیەن پێسەو زۆخاڵی
بەڵام دایم گجی و شاڵیش کەرۆ ڕەنگێ کە باوا!

حەقوو وێشا کە سەرمەنزڵ نەگۆنجیۆنە خیاڵش
سەرەوکۆیێ و سەرەوچێرێ فرێ ڕەمما و نەیاوا

کەڵەک‌ئاسا ئەگەر عازات وڕابۆرە، بزانە
کە خاپووری کەلارێوێ مەبۆ یانێوە ئاوا

بیەی زامدارە تا ئاخر ونیت مشیۆم چکۆرە
ئەرێ پەترۆک ئەرێ ساڕێژ خیاڵێوەن کە خاوا...

#ژوان

پاییزوو 2724

@hawramyanah

حەقشا کە دڵوو تۆ دلێ داخانە مەژیڤۆ
وەڵڵاهی وەهاریچ دلێ زاخانە مەژیڤۆ

من وێم وەڵێ ئانەینە بلی وێمنە لوانا
من وێمنە هەناسەم  دلێ ئاخانە مەژیڤۆ

ئەی شارێوە ئاوا بە زەریفی چەمەکاو تۆ
بایــیقوشی وێڵ خۆ دلێ کاخانە مەژیڤۆ

دڵوەش مەبە ئەی دەم بە مەنەیوەو لچەکاشا
مەوجوو دڵوو دەریای جە قەراخانە مەژیڤۆ

وەختێوە خوێ بوڵبوڵە واچێ بە حەزینی
ئی سەوزییە تا سەر دلێ باخانە مەژیڤۆ

شێعره‌: #ناتێق_ئه‌داک

ده‌نگ: #سوهه‌یب_عه‌بدی

@hawramyanah

چەم چەمەڕاتا ئەی هەرچی کەسم

                  ئەگەر تۆ نەبی، گێریۆ نەفەسم

تاقەت جە لاو من نەمەنەن ساتێ

                  بۆرێوە  ئازیز  تۆ  گێرە  دەسم

✍️ #هومایون_موحەممەدنژاد

@hawramyanah

کناچێ

عەساو دەسیەنە وەختوو تەنگانەی
ڕۆشنــایی دڵی و چـــراوەو یانــەی

ئــەر کناچێت بۆ، گیانم بــە بێ‌شک
ئــەوەجەت مەگنۆ قەوم و بێگانەی

✍️ #شارۆ

@hawramyanah

هه‌ڵای ئادیداسێ

شێعره‌ و ده‌نگ: #ئه‌حسه‌ن_ڕه‌شیدی

@hawramyanah

فەڵەک! شەوگارەکەت پەی من بەقاش سەرتەر جە ساڵی بێ
بەرەی بەسیاو وەشیت پەی من بەرەو یانەو گەڕاڵی بێ

کەوای کۆنەو هەناسەیما هەزاران لاوه پینەش هەن
به حوکموو حیله‌شەرعی ئا کەوا دڵوەش به شاڵی بێ

هەزاران پێوەنێ دریەی به داراو جەنگەڵوو عەدڵی
سنۆبەر بێ بەشم، پێوەن جه شاخەو پرتەقاڵی بێ

بەشەر یاوا بە مافوو وێش، تەنانەت ئاژەڵێ و چێگه
کەسێ مافش کەرێ داوا هەری خەسیاو دەجاڵی بێ

دەسش دابێ زەمین ئاوەز، نەزانای کاکە بێ و ئاغا
شەڕی گەورەو من و کاکەی سەروو چەتفە و حەکاڵی بێ

نەمەن سەبر و تەمەن دڕیا به تێخی بێ‌دەموو ئاخی
هەناسەم گەورە یەخچاڵی پەڕوو کۆڵوو حەماڵی بێ

فەڵەک! قەرزارمەنی وەڵڵا به شادٚی قەڕنە ژیوایێ
که ئی ژیوایه مەردەی بێ و بەناو کەردەی زەواڵی بێ

#جەماڵ_قادرپوور

@hawramyanah

ترازیێ ترازییا



نووک ئاستەیرە
ملوو قاقەزارە
‌ مەڕیان
دەسوو کەسێوەنە
جە واتەی حەقیەنە.
قەڵەم،
فرەتەر
ت
را
ز
یا
ن

سەرو دێڕەکارە

★ ★



جگەرەێوە کێشیارە
مەڕیای قەڵەمی
سەروو تەپڵەکوو خەمێوەرە
نووک ئاستەیرە
ملوو
مەڕیای دەسارە
زیای
ت
ر
ا
ز
ی
ا
ن

دەس ئاستەیرە !
★ ★

کوشیایه‌و
قەڵەمی سەروو قاقەزارە
نووک
مڕیای ملوو
مل مەڕیای واچە کارە
تار نیای
حەقیش مێ شۆنیەرە
ت --- را----- زنای
تایێ

سەروو
ترازیانە!

★ ★

کوشیای
حەقی
قەڵەم کۆشیۆ
یاوۆ بە قاقەزی
بە نووک ئاستەیرە.
وەڵێ ترازیەی
ترازیانە !

★ ★

لارەسەنگی
ڕاس نەبیه‌و حەقی
نەمەدرای
ترازیێ
ترازنای ترازیا .
مەڕیای دەسیا
قەڵەم
لەنگوو لاڵا .

★ ★

نەوینایم
ترازیایی
دەسێم مەڕیا.
ملوو قاقەزارە
نووکما ئاستەرە
جە واتە ی حەقیەنە
سەروو تەپڵەکوو خەماوە
لارەسەنگا
حەق پووش پیازا
تاو ترازیانە
دریان دەموو
وا گژەکاوە
قەڵەم کوشیان
بە دەس ئاستەیرە
بە دەس گێرتەیرە
ترازیای
سەروو
ترازیاوە .


#عه‌بدولڕه‌حیم_سه‌عید


@hawramyanah

خەیاڵ نـەکەردێ شادٚ و سازێنمێ
ورەما بـــەرزا و پەڕ جە هـازێنمێ

یەرەم کۆتێبا بێ‌حیلەی شـــەرعی
چل ساڵێ و سەرا گردٚ جەنازێنمێ

#شارۆ


@hawramyanah

بیۆ حەوزوو حەزوو تاسەی، چیۆ کۆپڕ جە سەردەی
چەمێ مازارە بەیسێ بەی وەهارێ نەیوە سەردەی

نەقاشوو قاپی حەوت ڕەنگی خەزانی کێشۆ ئاوی
هەچی سوورین خیاڵێنە پەنا مارۆوە زەردەی

دماو تەققەو تفەنگیوی جە ئیلیانێوێ پەرسە
چەنینا وەزع و ئەحواڵوو دەمی ئاواتە مەردەی

شەوە زڕیۆ چەنی باسوو دڵی مەڕیای مەوینۆ
وەرەشێڵێ سەباحانی دەسێ ماشانە پەردەی

نەزانام داخەکێم قەدٚروو وساڵیت سا دماو تۆ
بیەن عادٚەت پەشیمانی بە خەم پیمانە کەردەی

چەنی تێژی وەروو ژیوای ڕەموو یاوو دماڕۆی
نەبا حەسرەت سەیێ باخی و خەمێ عومری ویەردەی

چەقۆ پووشوو سەروو ئاوێ جە گێجاوەو خیاڵا
مەدٚۆ دادٚم، شکایەت لاو شەپۆلەو تافی بەردەی

#خالێد_ئه‌حمه‌دی

@hawramyanah

چەنی ڕێزای گەڵاو زەردو چناری
جە هێجروو دڵبەری شیرین نگاری

ئەرێ، پاییزەکەم گردٚش خەزانا
هەنا گیانێ کە ئادٚیچ نیمەگیانا

#ئاڵۆز
@hawramyanah

هێشتا دڵەکەم هەر بە تەماو تۆن و بەتاسەن
هێشتا بە ئومێدٚت دڵوو من گەرمەهەناسەن

هێشتا شەوێ تا سەعبێ خیاڵت مەشۆ سەرنە
گیانم بە خڤەو تۆوە لکەم دان و وراسەن

#ئاڵۆز

@hawramyanah

بۆرێ مه‌له‌

شێعرە: #خەمیار_هەورامی

دەنگ: #شاهۆ_حوسەینی


@hawramyanah

پاییزەن و باخێوە سەدٚ ئننە گەڵا زەردٚەن
پا دارێ کە ڕووتێ با وەیشوومەن و دڵ مەردٚەن

پاییزوو وێساڵیمان ئاماوە بە مل‌زەردٚی
پەی هێجروو وەهاریمان لەم پەڕ بە کزی و دەردٚەن


مەدٚیەیمێ بە ڕۆجیاری و چن زوو مەپڕۆ و گوم بۆ
یا سوحەن و یا مەغریو ئای چننە هەوا سەردٚەن!

تەرسێوە ئەزەڵ دانش کەردٚش بە خەڵاتیمان
یا بەختوو ڕەشیما بۆ یا نا کە خۆدٚای کەردٚەن

تا هامنوو دڵ سەردٚی تەرسەش جە خەزانی بۆ
پاییزی کەرۆ پاشا و وێچش کزەن و بەردٚەن

تا کەی بە وەشی ناوەش بچڕانێ خەمێ تا کەی؟!
یا خەم جە وەشی بەرزەن یا نا کە چەتە و جەردٚەن

سەیێدٚ! بە خەمی بەندەن بەند و غەزەڵ و فەردٚت
پاییزوو کەس و کاریت وێت کەردٚەن و ئاوەردٚەن

#سه‌یێد_ڕه‌حمان_مه‌حموودی


@hawramyanah

تاسەو دووریتەنە
سەرەم بێ‌سەبرا

واچەم
کام هەوارنە
دەواروو دیدٚاری هۆردەو؟

✍️ #شارۆ

@hawramyanah

سەفەرم
کۆچوو گەڵایێوەن
وەرزەو خەزانیەنە...

✍️ #شارۆ

@hawramyanah

پاییزەن فەسڵەو دڵ‌ئینتزارین
گۆش بە تەمەنای چرپەو پاو یارین

ئاخ کە چند وەشه‌ن تەق تەق دۆ بەرەی
ڕۆشنایی وزۆ ئەو چەماو سەرەی

زیندٚە کەرۆوە ئاواتێ مەردێ
جە دڵ لابەرۆ هەزاران دەردێ

کێ واتەن؟ پاییز زەردیش پەی خەمەن
پاییز دەلاقەی دید٘ەی هام دەمەن

زەردی ڕۆخسارش نمادی ئەشقەن
پەی وەسفی دڵبەر دەفتەری مەشقەن

#شاهو_مەعازی

@hawramuanah

ئەهوەنی سێحروو چەماو تۆ داوە بێ
وه‌رزی سەوزوو عاشقیما تاوە بێ

چرکەچرکە تا لوای، چەم ئەو دمان
دڵوەشی ئی عومریە تاڵاوە بێ

ساڵ بە ساڵ واتما وەشی ئیجارە مەی
هەر نەبی و بەی، پەرگەماما خاوە بێ

شەوگەڕوو شەوگاری دڵ مارۆ تەلێ
ڕا نەبێ نیشۆ، خیاڵش پاوە بێ

تۆریا و ڕا گم کەرۆ شەوقوو دڵی
کێ چڕۆش «دا وا مەچۆ ئا واوە بێ»؟

تەژنەچەم پەرداخەمەیلێو تاسەشا
نیم‌نگاو نازوو چه‌مات لافاوە بێ

یار بە خەمزێوە چڕۆم ساراو چەماش
بێ‌حەزەر کەوتا بنەش چاڵاوە بێ

دڵ چەقا تا غرغرە و کەیف‌وەش بە وێ
حەزرەتوو والاو حەزیما گاوە بێ

#خالێد_ئه‌حمه‌دی

@hawramyanah

ئاخۆ ڕوێو بەی گۆش پەڕ بۆ نەوات
دڵ وەقرە گێرۆ، بە ئەیروو چەمات

دیدٚێ پەڕ کەروو جە نێگای نازت
ئاواتم بڕیۆ، یاوو بە ئاوات

#شارۆ

@hawramyanah

وێرەگان و حاڵەکەم گول، زەردەوەر حاڵم هەنش
تاقە داری تەژنه ها وینۆ تەوەر حاڵم هەنش

دایرەو زەجرینە مدرانا و حەقوو قەوسیم نیەن
پاوه مەردەی بی به حوکموو من، وەتەر حاڵم هەنش

دڵبەسەو چەنگێوەنا سازش به نازوو یۆتەرین
پابەسەو سێخێوە داخی بۆ یەهەر حاڵم هەنش

زمهەریرەن دڵوەشی، من سۆتەکەو سۆبەو خەمی
قۆتەرەی گەورەو وەنێ بگنۆ سەقەر حاڵم هەنش

کۆڵەکەم چل ساڵەن و قورسەن، فەڵەک تەژنەو ونێم
کۆڵبەری پێکیای هەژاری کۆڵ‌نەدەر حاڵم هەنش

سەرچلەو ئاواتەکام یۆیۆ لوا و ناما قەرار
مەردەمۆدٚار مەردەکەیش باریوه بەر حاڵم هەنش

شەوقەکەم یاوا وەروو ئاخی و نەیاوانێ پەنەش
سا ئەدٚای ساڵێ جه ڕۆڵەی بێخەبەر حاڵم هەنش

شێعره‌ و ئه‌وه‌وانای: #جه‌ماڵ_قادرپوور

@hawramyanah

تاتە

دەسێش،
بوەو نانی تازەی مدٚانێ!
وەختێ
بە لاتایێو مانیایی و
بوخچەیوە ئارەقوو میاچەماش
سەروو هەرمانێوە گێڵۆوە

✍️ #شارۆ


@hawramyanah

ئەی کۆنە خەمی تازەم! کولیاوه دڵی ڕێشم
کریامەوە تاسەو تۆ چی چەرمه نەبۆ ڕیشم؟

بۆ وینه هەرم ژیرەن، دانامه زەمین‌گیرەن
چل ساڵەنه دڵ پیرەن چی چەرمه نەبۆ ڕیشم؟

دەنگش نەمەنەن گۆشم، بی خەنده فەرامۆشم
هۆشش نەمەنەن هۆشم چی چەرمه نەبۆ ڕیشم؟

ویرم وەنە ئازارەن، شەوقم چەنە بێزارەن
خەم دڵمەنە نازارەن چی چەرمه نەبۆ ڕیشم؟

دوور کەوتە جه هاتینا، بێ‌پاو دەسەڵاتینا
بڕیا جه حەیاتینا چی چەرمه نەبۆ ڕیشم؟

بێ تۆ شەوەزەنگەن ڕۆ، ژیوای شەکەتەن بێ تۆ
مەردەی گوزەرانم بۆ چی چەرمه نەبۆ ڕیشم؟

وادٚەو تەمەنی پەڕ بی، مەرگم به چەموو وێم دی
شی وادٚە، جە ویرت شی چی چەرمه نەبۆ ڕیشم؟


#جه‌ماڵ_قادرپوور


@hawramyanah

ئی دەردێ کە نا دڵمەنە دەردێوە گرانە
بدٚیە ڕواڵەتەرە و کاغەزی چەرمە بوانە

دەردێوە کە ساڕێش مەبۆ زامش تا مەنوو من
تا زەردەوەروو عەمری مەنۆ پا سەرملانە

بۆ بدٚیەنە دیدٚەم کە گێجاوەو خەموو ھەڵسا
ناکاوەنە ھۆرزۆ شەپۆلەش ھەور و ھەڵانە

ماچانێ وەشەسیایی نەماما مەدٚۆ سەیکەوت
پەی من لەق و پۆپش گێچەڵ و دەرد و بەڵانە

دا بارە دەست بازە دەسم ئیسە وەشش بۆ
ئی زقمەیە ماڕە بۆ کەرەش پەیم ملوانە

گەرمی ھەناسەیت یاوۆ ملوو ئاوات و تاسەی
دڵ چۆپی کێشا، ڕەژبەڵەکا بێ بڕ و بەھانە

ماچێوە نەماڕۆ دەسوودیموو وەشەویسی
فلسێو مەیێژۆ با بلۆ تەوقێوە وەڵانە

دەردێوە کە لاو تۆوە گنۆ لاشەو خەیاڵا
پەیم مەڵهەموو زامانە کە ساڕێش و دەوانە

ئەی بوڵبوڵە وەش لەحنەکەو پاساروو ئەوینی
ئا دەی بوانە دەنگوو تۆ پەیم ساز و نەوانە

تاقانە ولە پەنج پەڕەکێ باخوو وەشەسیای
باوشە وەڵاکێت تینەو ژیوای پەشت و پەنانە

تا مەیل بە بیەی ھەن جە دڵەو حەزرەتوو یاری
نامە وەشەکێت وردوو ڕوا و زێکروو شەوانە

سا ساڕێش و دەرمانوو زاما وێتەنی ئازیز
مانگەشەوەکێم دا بە مێمان مجیەنە ھانە

#ماریا_عه‌زیزی(#هانه)

@hawramyanah

چەمێت،
نەرگسوو بێهبەهانی

لچێت،
سوورەهەنجیری ڕێژاوی و

زوڵفێت، ...

تەحااااا...
چ وەششا واتەن:

"دزڵیەیەنی، زڵف دێزەنی
پەروەردەی چنوور داڵەمێزەنی"



✍️ #شارۆ


@hawramyanah

هیزیم
دەمەواقو ئارۆین
نانم کەفتەن کەلەبەرێ و
لچوو سفرەیم خەڵتانوو ونەین

ڕەنگەو دۆعای کاڵەوە بیێنە
حاجەت بادٚش نەمەندەن
شه‌یتان قسێ خودٚایێ مەکەرۆ

توشیاروو خودٚایا بیەنا
ئه‌مر کەرێ و فتوا دەرێ
دەسە دەسە
ملایەکێ و پێغەمبەرێ
سەدٚ قابێزێ کۆڵانیەنە و
قابێزیەتەر پەنامەکی
شه‌یتانیچ
حەدیسەو خودٚایی موانۆ
نمەز، تاوانباروو کامین خودٚاینا و
شەرعەو کامی کەروو ئەزبەر ؟
تاڵعەم دەستخەتوو کامیشانەن ؟
کاکیلەم،
نانوو کامینیشا مەژاوۆ و
سجدەم
کامین بەیتی گێرۆ قەرەوڵ
هەرتا عەبدیم نەلەنگنۆ ؟

نمەز شەرحەم
بە شەرعەو شمشێری موانیۆ یا
بە شەرعەو بارووتی ؟؟؟

#جه‌واد_حه‌مزه‌ (#فێراق)


@hawramyanah

هاڵنگاری



نەیجەکێ
قنج و قیت
بێ شەرت و مەرج
خزێنێنە دلێ یۆترینی
تەڕ و وشک.

***

ملەگاوە
سەی لارێ بیێوە
پەی سەروو هانەخاتونێ
هەڵای
تەڕکەکێ
پەل و پژششا
شێویان
هاڵنگاروو
یۆترینی بیێنێ .

***

کێڵگەکێنە
داهۆڵەکە
قنج و قیت بێ
هۆرداریا
خۆفیشا فرەتەرە بیە
تا پایێوە بێ.

***

دێوجامە
قڕ و قپا
پێسە وێش
پەشتیشه‌و
یۆ کڕ کەوتەن
ملوو بێ‌ڕحمیشەرە .

***
تەڕ و ناسکی
مێرگەکێچ
ئەسپەکەی
نەمرکنێرە
هەر سەرسۆح
حیلێوەش
ئەژنەویێبێ .

***

بیێنێ
داهۆڵی هۆرداریێ
پەی یۆترینی
خزه‌ینێنە
باخەڵێ
ته‌ڕه‌و مێرگه‌کێ .

***

سەیادٚ
داخێش چن سەختێنێ
تاق بیەنه‌و
وەهارش
بیەن کۆپڕ
بەقێوەش
کڕ وستەن .


#عه‌بدولڕه‌حیم_سه‌عید


@hawramyanah

بۆ چنیم وەرمیچەنە پاوانە بە
واچە نیشە پەی دڵیم باوانە بە

واچە حورمەت ئانەنە گێرووت بە دڵ
بۆ سەروو شانامەوە پەروانە بە

خزمەتوو دەنگیتەنە هەر ورکەما
تۆ بە ویژدانت مەلە، مێوانە بە

واچە موشتاقوو چەماو تۆنا کەسەم
من نەبوو شۆنیمەرە وێرانە بە

گردٚ ڕوێ شێعرێوە پەی تۆ گڕ مدٚەو
سا شەوێوە تۆیچ کەمێ دێوانە بە


#مانیا


@hawramyanah

تۆم،
سەدٚان‌جارێ
     وێمنە کوشتێنی

کە چی خەیاڵنە،
       وەچێ ترەکنی...!


✍️ #شارۆ


@hawramyanah

بۆ چەنیم...







بدٚەم دەست ڕاشا!
کە وەرموو زاگرۆسینە
کۆڵانێوە هەنە
نەدٚاینەم پایێهۆر،

کە تۆشەبەرەو ئاسمانینە
هەسارێوە مەنەن
تاوو تەنیایینە
دەخیلم نەبەستەننە،

کە دماهەمین یەسەو لاشەیمنە
مشتێوە خاک شکە بەروو
نەدٚانم "کەمە"رە،٭

کە قەفەسوو گڵوێمنە
قەناریێوە سەردٚا نەبەردٚێ مەنێنە
نۆتێ دەنگیش
دماهەمین وێپارێزوو٭٭ مننێ
وەراوەروو خامۆشیوە،

کە زاڕۆڵەیی جیا مەنەم
سێوەروو لایە لایێوەنە
باوڕش هەن
دماهەمین سۆزوو سلەو ڕەحمی
ترەکێ نەوستەننە،

بدٚەم دەست ڕاشا گیان!
من زانوو
ئازای کاول و خەسەمنە
مچکلە کەڵەکێوە مەنێنە
ئەر چی لەمەش دەینە
بەڵام
پەیش هەن
-ئەرێ!
گردٚوو زانایی من
جە فەلسەفەو سەبای
ماچۆ؛
پەیش هەن-
کە نەوڕۆرە و
تۆزێوە جە ژیوای
بازۆ ڕواڵەتمەو...


چێگە ڕاشا!
چێگە کە من هەنا
جامەکا "بێوێ" چڕانێ
بۆ چەنیم
تا سەراونوو
خولیای ڕۆشن و بێگەردیشا
با گەلەبێرەو حەسرەتانە
قڵێشێ نەبەرۆ
سینەی چواردەساڵەو سوینێشا،

چێگە
دژمانی مدٚا هێمەتەو هانەی و
جوێ
دامان مۆرێ ماچانێ
بۆ چەنیم
تا ئەوپەڕوو ڕەسالەتی پاکوو ئاوێ
با سەرابی دەسکردوو بەشەرانە
سووچێ نەحسێ تەژنایی
یاخیێ نەبا وەنەو
دڵۆپە شەونمێوە
سەروو گەڵاڕێحانیوە
ئەهوەنی منویسۆوە،

چێگە
لەقەبوو خوێڕیێ مدٚا
بە دانە بەرزەڵنگێوە
کە لچ بەرۆوە پەی خوەی!
بۆ چەنیم
تا ئاواتوو دەشتێو بێ سنوورێ
کە قلەو گوراڵاش
شان بدٚۆ شانوو
فەڵەکیوە،

چێگە
سلامت را نخواهند گفت پاسخ!٭٭٭
بۆ چەنیم
تا وەراوەروو
ڕوێ وەشەو سەفەری و
تا جوابوو
درێژتەین جادەی بێ سەرمەنزڵی و
تا وەرهەیوانەو لوایێوە
کە هەڕەشێ نەکەرۆ وەنەش یاوای!

بدٚەم دەست ڕاشا گیان!
بۆ چەنیم...


#ژوان


هامنوو ۲۷۲۲

٭کەمە؛ نۆعێو هێڵەکە/الک
٭٭دفاع
٭٭٭ئەخوان سالێس

@hawramyanah

زوانی ئه‌دٚایی

شێعره‌: #هومایوون_موحه‌ممه‌دنژاد

ده‌نگ: #نێشات_حوسه‌ینی

@hawramyanah