الشاعر حيدر الحلفي

@haidar_alhelfi

قصائد حسينية منبرية

الشاعر حيدر الحلفي (Arabic)

قناة الشاعر حيدر الحلفي على تطبيق تليجرام هي وجهتك المثالية للاستمتاع بقصائد حسينية منبرية مميزة. يعتبر الشاعر حيدر الحلفي من أبرز الشعراء الحسينيين الذين يعبرون عن مشاعرهم وأفكارهم من خلال كلمات معبرة ومؤثرة. تتنوع قصائده بين الحب والولاء لأهل البيت والنبي محمد صلى الله عليه وسلم. يتميز الشاعر حيدر الحلفي بأسلوب شِعري فريد يجذب القلوب ويحمل السامعين في رحلة فنية ممتعة. ما يميز هذه القناة هو تقديم قصائد حسينية منبرية بطريقة ملهمة ومؤثرة، تجعلك تعيش كل كلمة وتشعر بالعمق الروحاني. تعتبر هذه القناة ملاذًا لعشاق الشعر الحسيني الذين يبحثون عن الجمال والتأمل والتأمل. انضم إلينا اليوم لتستمتع بأروع القصائد وتعيش تجربة شعرية لا تنسى.

الشاعر حيدر الحلفي

15 Nov, 16:15

#الليالي_الفاطمية

خل ننصب اقراية .. يزينب يزينب
لمنه او نشد راية .. يزينب يزينب
بلكت تجي أمنه الزچية
ابوكت العزه هاي المسية
لمنه او نشد راية .. يزينب يزينب

هذا المسه يازينب . خل نبچي لمنه او ننحب
وننصب عزية اعليها
وگفي اعله باب المجلس . اهنا أمنه تگعد تجلس
تستقبل اللي ايجيها

بلكت تجينه ابهالمسه . او ويانه تگعد جالسه
واشكبره بختي يختي لو . چف امي أرجع المسه

بالمجلس الگاها .. يزينب يزينب
وساعة ابقى وياها .. يزينب يزينب
ومن دمعة امي اترس إديه
ابوكت العزه هاي المسية
لمنه او نشد راية .. يزينب يزينب
_____
مو گالوا امنه الزهرة . الينصب عزاء اتحضره
او تگعد يخويه ابابه
هلبت تجينه الليلة . او تلتم يخويه العيلة
او كلمن يشوف احبابه

من تستمعها ونتي . بلكت تحن الشوفتي
وابسرعة تحضر هالعزه . اتدورني واتشم ريحتي

ويه امي أتلاگه .. يزينب يزينب
هم مثلي مشتاگه .. يزينب يزينب
وانون سوى او نگعد سويه
ابوكت العزه هاي المسية
لمنه او نشد راية .. يزينب يزينب
_____
بالمجلس انتي اقريلي . اشصار اعله أمنه احچيلي
ابطور الحزن ونيلي
ابيا يا يمى زينب إبدي . حتى آنه أللطم خدي
واصرخ بعد عيديلي

راح آنه أكتبلچ شعر . عن امنه أحچي ابكل شطر
خوفي اعله گلبچ ينفطر . امن اكتب إلچ كلمة كسر

خالتسمع الزهرة .. يزينب يزينب
اعليها ابحزن نقره .. يزينب يزينب
خل تستمع ونتي الشجية
ابوكت العزه هاي المسية
لمنه او نشد راية .. يزينب يزينب
_____
لو بالعزه شفتيها . يازينب اتلگيها
او گعديها يم المنبر
لا تلطم اتخليها . فوگ الصدر بيديها
يختي لأن ما تگدر

منعيها تلطم عالصدر . أمچ ضلعها منكسر
ومن تنعي خويه بالعزه . إسمي أبد لاينذكر

لو سمعت ابأسمي .. يزينب يزينب
يوگف گلبها امي .. يزينب يزينب
ما أحتمل تنحب عليه
ابوكت العزه هاي لمسية
لمنه او نشد راية .. يزينب يزينب
_____
خل ننصب احسينية . وانون سوى ليلية
حتى الزجية اتجينه
او تقره النه عن اطفوفي . اشمكتوب فوگ اچفوفي
يازينب اتراوينه

تحجيلي قصة كربله . عن الشمر عن حرمله
شلون انتي من اتشاهدي . راسي عدوچ شايله

اتگلي الشهر إسمه .. محرم محرم
اتموت انته بي يمى .. محرم محرم
اجروحك ترى بالغاضرية
ابوكت العزه هاي المسية
لمنه او نشد راية .. يزينب يزينب
_____
اول عزه يالحره . راح امنه عالطف تقره
وابقصتي أشعر تبدي
تقره اعله گطعة نحري . تقره اعله كسرة ضهري
ولمن أضل الوحدي

تقره اعله صدري الينهشم . تقره اعله صبعي الينگطم
واتحملي ياخويه لو . گالت أضل ابلا هدم

واتگلي گدامي .. يزينب يزينب
تتسلب ايتامي .. يزينب يزينب
وتحچي ابإسم طفلة رقية
ابوكت العزه هاي المسية
لمنه او نشد راية .. يزينب يزينب
_____
ثاني عزه اعليچ انتي . قصتچ وحد عن قصتي
بيها خيم محروگه
بيها ركض بالصحره . بيها مشي اعله الجمرة
وطفله تون مخنوگه

بيها يبت حيدر سبي . او نومه عله الشوك او حبي
او صعده اعله نوگ ابكربله . او صعده اعله تل الزينبي

تحچيلچ البضعة .. يزينب يزينب
كل قصتچ او تنعه .. يزينب يزينب
اينادونچ اهناكى السبية
ابوكت العزه هاي المسية
لمنه او نشد راية .. يزينب يزينب

حيدر الحلفي

160

الشاعر حيدر الحلفي

09 Aug, 20:14

وانته اعله الرمح ما ينحمل بعدك
واشتاگيت ابوسك والدي ابخدك
واشتاگيت لحظات . روحي ابحضنك اتبات

بينك او بيني مسافه يالهجرت ابنيتك
والرمح عالي يبويه او گمت احن البوستك
ارقيه آنه او يمي رتك تنزل اشتم ريحتك
حتى احضنك حتى اخلي ابراسك انته اعمامتك

حتى اتذكرك واتذكر ايامي
چنت اتگلي بويه ابهالحضن نامي
نامي ابحضني ساعات . روحي ابحضنك اتبات
_____
عالي رمحك وآنه مگدر اوصل الخدك واحب
يمتى تنزل حتى احضنك بويه شيخلصه الدرب
گمت احن العطرك اشتم بويه وايحن الگلب
والله مشتاگه إمن ادينك اشرب الماي العذب

ما مشتاگ تشبگ بنتك الحلوه
او من اضحك تگلي فدوه الچ فدوه
يمك احله ضحكات . روحي ابحضنك اتبات
_____
من يجيني الليل گلي وين انام ابيا حضن
الورده من تعطش يبويه تشتكي الهم للغصن
وانته بس راس ابجواري او روحي الحضنك تحن
وين احط راسي ابحضن من او من اونن وين اون

مشتاگ النفس يا بويه لانفاسك
مشتاگه اخلي راسي يم راسك
واشبع بويه نظرات . روحي ابحضنك اتبات
_____
خوفي لو شبگنه راسك بويه تگرب موتتي
واعله راسك نفس بويه مايظل ابريتي
ويه راسك آنه اريدن ياحبيبي دفنتي
وابحفرتك كون بويه اتصير لازم حفرتي

آنه اوياك اريد اتلمنه بس حفره
راسك يمتى اشبگه بويه منتظره
مو بس مره مرات . روحي ابحضنك اتبات
____
واشحلاة الموته يمك بويه يم راسك اريد
ادري صح بس راسك انته يمي او جسمك بعيد
بس اذا ما موت گربك ما اظن روحي تهيد
هالعمر من غبر وجهك يا ابو اليمه اشيفيد

يم راسك اموتن آنه مقتنعه
الجفن العين لازم ترجع الدمعه
روحي كلها دمعات . روحي ابحضنك اتبات
____
قبل ما موتن يبويه ارد اشوفك بالحلم
انته وي راسك اشوفك لاتجيني ابلا جسم
اتشيلني بالحلم ردتك بويه والجسمك تظم
بنتك ارقيه يغالي او عظم يطبگ عالعظم

قبل الموت جسمك ارد اشبگنه
او عطر اثيابك آنه ارد اشمنه
مر بحلامي لحظات . روحي ابحضنك اتبات

حيدر الحلفي

852

الشاعر حيدر الحلفي

09 Aug, 20:10

رقية عليها السلام

انته لو مو انته مو انته
البارحه الشابگته شابگته
حظني شو ماشفته ماشفته

انته معقوله ابوي البالأمس حاظني
لو صدگ لحسين إنته گوم هسه اشبگني
گوم واحظني يبويه ابغربه شو عايفني
جيت ادور عنك آنه والمشي تعبني

اعتذر معرفتك معرفتك
اشموسهم غيرتك غيرتك
او خدك امسومرته امسومرته
____
ماعرفتك بس عرفتك بويه من وجناتك
بيها بوسات العزيزة الحره وابنياتك
عاين الوجناتي بويه بيها اثر لمساتك
راح تعرفني رقية آنه من بوساتك

السوط كلشي ماسح اي ماسح
بس اثر ما رايح ما رايح
خدي من قبلته قبلته
_
فتح اعيونك ثواني وابتسم گدامي
حيل مشتاگه الضحكتك وين ذيجه ايامي
افتحلي حظنك ياحبيبي او گلي غمظي او نامي
فدوه بس لا لا تگلي طلعيلي اسهامي

طلبه يا محبوبي محبوبي
اتغطه انته ابثوبي ابثوبي
ابلا هدم ليش انته ليش انته
_
ردت انام او راسي بويه عالترب خليته
جيت انامن فوگ صدرك والصدر ملگيته
إلسهم شفته اعله نحرك بس ولا جريته
ازغيره ايدي اچبير سهمك والدي حسيته

گمت اظم بالشيله بالشيله
جسمك ابهالليلة ابهالليلة
والصبع دورته دورته
___
امجرحه اجدامي يبويه شوكهم ماذيني
محترگ ثوبي يغالي گوملي او طفيني
ما اشوفن بويه دربي والجمر عاميني
فتح اعيونك اريدك تنظر الأيديني

حرمله طيحني طيحني
عالجمر من ذبني من ذبني
او چفي هالحارگته حارگته

حيدر الحلفي

458

الشاعر حيدر الحلفي

20 Jul, 21:10

محررررم 1446هـ الحُسين والزهراء عليهم السلام

هلا يمى تعاي .. جيتي ابوكتچ هالساع
هلا يمى تعاي .. آنه الطايح عالگاع
كافي لا تدوري . آنه اهنانه نظري . ماشميتي عطري
تعاي . تعاي

هلا يمى چنت انتظرچ . أعرف مشتاگه الشوفي
لتمدين ايدچ ليه . ترى مگطوعات اچفوفي
لتدورين اعله اثيابي . كلشي الأجل ابنچ عوفي
جيتيلي اهنا مشتاگه . وبيه اشسوه الطف شوفي

خليني ابحضنچ فدوه . اتراب الطف يحرگ گوه . يمى ابروحي
ذكريني ابذيچ ايامي . اتنوميني يلله اتنامي . طيبي اجروحي

انه جرحي الچبير .. ودعتچ وآنه اصغير
انه جرحي الچبير .. إبنچ مذبوح ايصير
زين وما نظرتي . من گطعوا رگبتي . چا هم يمي متي
تعاي . تعاي
____
صار اسنين ابچي انتظرچ . مشتاگ آنه الحنيتچ
بس ابيا حال اشتمچ . ابدمي اهنانه اتلگيتچ
يمي وملزمتچ وسفه . ولا گمت ولا شميتچ
منتظرچ كل هالمده . او بحضاني ما ضميتچ

منو أمه گاعد يمها . بس مايگدر يشتمها . وشيحملها
هاي اصعب حالة اعليه . أمي اتجيني ابعوچيه . وما گوم الها

ترى هذا اللقاء .. مجروح ايصد مجروح
ترى هذا اللقاء .. أم واضناها المذبوح
ماشايف حبايب . اتلاگوا عالترايب . عاشوا بس مصايب
تعاي . تعاي
____
حگچ لو معرفتيني . ابلا راس او جسمي امگطع
لتشيليني إمن الحومه . اضلوعي ابأحضانچ توگع
لا صدر اللي اتشمينه . كلشي اعله الكاع اتوزع
البي ألف او مية طعنة . شتضني ايرد يتجمع ?

شتلمين إمن الحومه . إبنچ مدفونه ارسومه . ما يرجعلچ
ندري الأيديه مگطومه . مابي يافاطم گومه . شلون ايردلچ

عله روحي السلام .. إقري ونادي يحسين
عله روحي السلام .. راحت فاطم مرتين
مره يم بو فاضل . ومره وآنه شايل . عبدالله واسائل
تعاي . تعاي
____
هم شفتي اخيول اتعدت . ترفس بيه وبطفالي
الگاطع منحر من عندي . شفتيه إمن اتعنالي
ماريد احچيلچ أكثر . بس موقف ضل ابالي
اطلبت الماي وما واحد . يالزهرة اشوي ودالي

ماجبتي ابإيدچ بلله . ماي اشويه العبدالله . ميت ضامي
ماجبتي الزينب خيمة . ماشفتي اشچم ايتيمه . اتون گدامي

سوى من الخيام .. طلعن شفتي النسوان
سوى من الخيام .. صاحن ذبحوه عطشان
زينب دورتني . هم مثلچ إجتني . بس ماوچدتني
تعاي . تعاي
_____
الخد الچنتي اتقبلينه . محفور وما يتقبل
راسي وجسمي اللي اتگطع . مايرجع مثل الأول
عبدالله الميت ضامي . يافاطم ماظن يعدل
الحبل البيدين الحره . ملفوف ولا ماينفل

ماترجع زينب زينب . وما تطفه اخيامي التلهب . راحوا أهلي
ميرد عبدالله ابحضني . ولا لاكبر يرجع إبني . وبويه ايگلي

وله يرجع أكيد .. عباس وبيده اللواي
وله يرجع أكيد .. ونشوف ابإيده الماي
ماترجع إليه . يافاطم رقية . لتدور عليه
تعاي . تعاي

حيدر الحلفي

1,257

الشاعر حيدر الحلفي

18 Jul, 21:35

محررررم 1446هـ ( ألم اللقاء في يوم عاشوراء بين الحُسين والزهراء بعد طول الفراق )

من اسنين فارگتك . ويبني اليوم اسمعتك
يمى اتصيح لحگيلي . وجيت اركاض واشبگتك
ملهوفة الشوفك جيتك . بس امگطعيك الگيتك
يبني اليوم . يبني اليوم

من غبت عنك . أحلف ابإبنك
ماحضرت الواحد او لا صيحت
يمى بس انته . صوتك اسمعتة
وجيتك اركض وآنه عمري مركضت

مو صحتلي وگلت يمى هالأجيتك ماتگوم
چنت مشتاگة اللقائك يمى بس مو هيچي يوم
وين زينب والكفلها ليش باقي ابلا هدوم
ليش وحدك يبني طايح اعليك بس آنه الأحوم

بيك انفاس لا گلي . زينب وين أشرلي
اخيامك وين دليني . بالإحساس بينلي
أللزم چفك أمنيتك . بس امگطعيك الگيتك
يبني اليوم . يبني اليوم
__
جيتك اتلوه . يبني بالگوه
الكربلة تدري اوصلت بآخر نفس
اتگلي لحگيلي . يمى هد حيلي
إلشمر گد ماذبح راسي او رفس

اهنا وگف گلبي او إجيتك يالحبيب اشبگ عليك
ليك مديت ايدي تنهض يمى لكن وين اديك
ذبحتك ماكو مثلها الذابحك شمسوي بيك
حمرة شيباتك ييمى ليش هيچي امگطعيك

صدرك هذ لو ضهرك . اهواي ارماح شو حدرك
والطعنات لبجسمك . وصلت ليش حد نحرك
مشتاگ الحضني ادريتك . بس امگطعيك الگيتك
يبني اليوم . يبني اليوم
_
جسمك انظرلة . مختفي كله
صدرك امغطينة برماد الخيم
والشمر أنظر . صدرك امكسر
وچنها يمك راكضة اهواي الحرم

يبني چم مره اعله جسمك خيل تلفيك وتروح
الخيل من روحك أضنها طَلّعت يوليدي روح
خيل تسحگ خيل تگلب جسمك وتچويه جروح
حتى عطرك راح يبني هسه بس دمك يفوح

كل اعضاك متكسرة . ابصدرك هاي چم حفرة
كلشي البيك ظل يخلص . حتى ادماك بس گطرة
لو رايد نبضي انطيتك . بس امگطعيك الگيتك
يبني اليوم . يبني اليوم
__
ردت اشيلنك . ابحضني اخلنك
يبني بس شلون وانته اتطشرت
بيش المنك . وين اضمنك
اتطيح من اچفوف ادي كلما شلت

صدرك إمن اگفاك وينه عذبوني العذبوك
يمى لسهام اعله طولك چم سهم گلي رموك
قبل ميذبحوك گلي شربة اميه نطوك ?
يبني چنك متت ضامي وحتى محبس سلبوك

مو ذبحوك ماكافي . ليش اهنا اتظل غافي
ابهالـشموس يوليدي . ابلايه اهدوم او حافي
ابثوب امك چا غطيتك . بس امگطعيك الگيتك
يبني اليوم . يبني اليوم
____
إكعد او إحچي . لشوكت أبچي
تعبتني وفدوه الك يمى التعب
وينه عبدالله . يولدي اسم الله
لاتگلي مات ضامي او ماشرب

ذاكى چنه اگماط إبنك يمى چا عبدالله وين
وذيچ من ابعيد طفلة اتصيح وينك ياحُسين
وينه جاسم وين الاكبر وينه عباس الحنين
هيچي تتلگوني يمى من بعد ذيچ السنين

زينب ليش مو يمك . كون اوياي واتلمك
إنته ابعيد لو هيه . گول إحسين بعد امك
اليم اختك چا وديتك . بس امگطعيك الگيتك
يبني اليوم . يبني اليوم

حيدر الحلفي

653

الشاعر حيدر الحلفي

25 Jun, 20:10

نص آنه اوياچ خنلوليه
حيدر الحلفي

969

الشاعر حيدر الحلفي

25 Jun, 20:09

مستهل آنه اوياچ خنلوليه
حيدر الحلفي

922

الشاعر حيدر الحلفي

25 Jun, 20:08

محرررم 1446 هـ ليلة الوداع رقية وعبدالله الرضيع ع

آنه اوياچ خنلوليه خنلوليه عبدالله ابمهده
طول الليل وانشم بيه وانشم بيه ومنعوفه الوحده
ابحظن امه وصوت اخته . بلكت تضحك شفته
عبدالله ابمهده

يالرباب الليلة اريدن أغفه يمه . وحيل اشمه . هذا اخوي الغالي
آنه من لغروب أشعر صاح اليه . يارقية . هذا اخوي الغالي
هذا آخر ليل چنه وي عضيدي . ولازم ايدي . هذا اخوي الغالي
فدوه فتحي اگماطه رايد خيي چنه . حيل احضنه . هذا اخوي الغالي

عالچفين كون اينام كون اينام خيي ويتبسم
ومو بالماي لو بخيام لو بخيام يبچي ويتحلم
واهنا لو نومته . بلكت تضحك شفته
عبدالله ابمهده
____
من حنان اخته أريدن خيي يشبع . كافي مدمع . ذبلت ادري اعيونه
إمن البچي عالماي ذَّبل حتى خده . ازغير بعده . وذبلت ادري اعيونه
اجفونه ماغمضن ثواني ابهالمخيم . اشگد تألم . وذبلت ادري اعيونه
لو ثواني مايشوف إحسين يبچي . ودمعة يحچي . ذبلت ادري اعيونه

مدري اشبيه شو مهموم شو مهموم عبدالله انظرله
يشعر خاف آخر يوم آخر يوم باقيله اويه اهله
مدمع لو شربته . بلكت تضحك شفته
عبدالله ابمهده
____
يارقية اوليدي آخر ليلة عندي . يمنه گعدي . وخلنلولي اثنينه
وخلي آخر صوت يسمع أمه واخته . انصد ضحكته . وخلنلولي اثنينه
خالي باچر يارقية يبقى مهده . ابلايه وردة . خلنلولي اثنينه
منه بس لگماط يبقى أحلى ذكرى . بيه عطره . خلنلولي اثنينه

يضحك ليچ إبني اهواي إبني اهواي من اتشيلينه
هو ايريد تنطي ماي تنطي ماي واتغسلي اجبينه
ماي ايريد اعرفته . بلكت تضحك شفته
عبدالله ابمهده
____
هذي آخر ضحكة من عبدالله شوفي . كلشي عوفي . وخل نناغي اوليدنه
ضامي إبني او ماگدر بضماه يغفه . لزمي چفه . خل نناغي اوليدنه
قَبلي عالمنحر وشيليه ساعة . حل وداعه . خل نناغي اوليدنه
يادللول الولد صيحيه فدوه . نام توه . خل نناغي اوليدنه

يم إحسين خنوديه خنوديه وابحضنه انخله
بلكي اينام لو شم بيه لو شم بيه الوالد وايقبله
ابحضن الوالد عفته . بلكت تضحك شفته
عبدالله ابمهده
____
يالرباب العمي خنوديه يلله . شفته صلى . وصاح ياعبدالله
بلكي من عباس يشتم كل حنانه . ايحس بامانه . وصاح ياعبدالله
الأكبر اباب المخيم يندعيله . ويه ليلى .وصاح ياعبدالله
وجاسم الحزنه عله ابنچ عاف عرسه . اسمعته هسه . وصاح ياعبدالله

سكنة اتصيح بويه إحسين بويه إحسين چيف اصبر يلله
من الموت يرحل وين يرحل وين باچر عبدالله
بچفوفك لو شلته . بلكت تضحك شفته
عبدالله ابمهده

حيدر الحلفي

1,001

الشاعر حيدر الحلفي

22 Jun, 09:13

نص تدري يالوجهك ضوه
حيدر الحلفي

1,053

الشاعر حيدر الحلفي

22 Jun, 09:12

مستهل تدري يالوجهك ضوه
حيدر الحلفي

1,096

الشاعر حيدر الحلفي

22 Jun, 09:12

محرررم 1446 هـ حميدة ومسلم بن عقيل ع

تدري يالوجهك ضوه . شوفة الوالد دوى . وفگدك افراگ الهوى . إلهوى إلهوى
بلله شيهود الگلب . وانته گاطع هالدرب . تبتعد ما تقترب . تقترب تقترب

چلمة بس يابويه اگلك . بالسلامة بالسلامة
ورايده اتبين رجعتك . ياضوه اعيوني ابعلامة
تدري حد ماتوصل آنه . ليلي ماچني أنامه
مايهود البنت يبويه . بس ابوها وبس كلامه

چم عذاب .. من بعدك راح اتعذب . وياخيمة البعدك تنطب . چم عذاب
عالتراب .. يابويه اخيالك أرسم . واكتب فدوه ارجع مسلم . عالتراب

يچوي دلالي السفر . يذبح ويكسر ضهر . الراح ابو چيف انتظر . إنتظر إنتظر
____
بويه لو هين وداعك . ادموعي چا ماطيحتها
ولا گضت ليلتها تبچي . بنتك او لا شيبتها
روحي من اضلوعي طلعت . بويه إيدك من شلتها
وگتلي رايح ياحميدة . دنيتي اهنا وگفتها

ردت اصيح .. اصياح الطفلة المرعوبة . اصياح الفارگ محبوبه . ردت اصيح
ردت اطيح .. فوگ اجدامك واتوسل . إرحم گلبي ولاترحل . ردت اطيح

بلله شيسوي الطفل . والده من يرتحل . والهجر ما ينحمل . ينحمل ينحمل
___
حاضنه اهدومك ليالي . بالمخيم يم رقية
ياحميدة اتگلي صبري . صح لابو افراگه أذيه
اتعودت بحضانه أبچي . لخوتي كل مغربيه
إلمن ايعيش اللي يبقى . ابلا أبو وابلا أخيه

إنتهيت .. لا والد يبعد خوفي . ولا أخ يلزملي إچفوفي . إنتهيت
أيسيت .. من الدنيا او أحبابي . چفهم مايلزم بابي . أيسيت

مايهد عمري الفگد . چم عزيز الما يرد . حزني بابك ماتسد . ماتسد ماتسد
____
الكربله اوصلنه يبويه . او گلبي ضل يرجف ثواني
ساعة لن عمي نضرته . يركض ابدمعاته اجاني
ابحضنه گعدني يبويه . الخيمته احسينك خذاني
الچنتي تنتظرينه گلي . مايردلچ لا تتاني

بنتي راح .. مسلم مابعد انشوفه . غدروا بيه أهل الكوفة . بنتي راح
واستراح .. من دنياه ابلا رجعة . بس ما لحگنه انودعه . واستراح

يعني عمي اتيتمت . ابلا أبو وحدي صرت . كون اموت وماعشت . ماعشت ماعشت
___
وگفت الدنيا ابعيوني . وانحنيت او دمعي هامل
ومن شلت راسي أخذني . الحضنه يابويه بوفاضل
يمسح ابراسي ويگلي . آنه ابوچ او آنه كافل
إنتي مثل اسكينة عندي . التطلبينه مني قابل

خذني ريت .. عباس انظر للوالد . وارحم دلالي الفاگد . خذني ريت
اتعذبيت .. وارد احظر ساعة دفنه . بلكي اوداع اشبع منه . اتعذبيت

منهو غسل جثته . منهو حضر حفرته . منهو ظل لبنيته . ابنيته ابنيته

حيدر الحلفي

1,406

الشاعر حيدر الحلفي

21 Jun, 10:26

نص ياعباس امودع بالله
حيدر الحلفي

893

الشاعر حيدر الحلفي

21 Jun, 10:26

مستهل ياعباس امودع بالله
حيدر الحلفي

877

الشاعر حيدر الحلفي

21 Jun, 10:25

محررررم 1446 هـ العباس ع

ياعباس .. امودع بالله . امودع بالله
ياعباس .. بس جيب الماي العبدالله
شيل اچفوفك . لو ماشوفك
من توگع ياخويه اسم الله

امودعك بالله .. عباس او ما أملك راي . بس جيب العبدالله الماي . واعيونك رايد بس هاي
خويه اسم الله .. ما ريدن فرگاك ايصير . ومتشوفك عيني إمن اتدير . إرجعلي لاروحي اتحير

إحضني وخليني احتضنك واشتم خوه
ماريد اوداعك يالغالي بس بالگوه
عباس ابلا شوفك گلي الدنيا اشتسوى
مر اوداعك يچوي ابگلبي او عشته توه

ياعباس .. اتگرب ليه . اتگرب ليه
ياعباس .. لاتمشي وما تحضن بيه
أول تالي . اتروح اگبالي
واتفارگ إيديك ايديه
____
مُر اوداعك .. مو هينه اتوادع وياك . وبالخيمة انظر ما أللگاك . شتنفس خويه ابلياك
مد اذراعك .. خل نتشابگ بين الناس . حتى ايعرفونك عباس . غالي اعليه وما تنجاس

ياروح إحسين او أنفاسه ياشرياني
واحد عباس او ماعندي غيرك ثاني
راح انتظرك مثل الوالد إبنه ايتاني
وراح اگعد خويه اعله اركبي ابهذا امكاني

من اتصيح .. إحسين الحگلي . إحسين الحگلي
من اتصيح .. طايح خويه وما تنظرلي
حيل اركضلك . ومن اوصلك
إحسين اهنا لو منهو اتگلي
____
آنه وزينب .. لو ماترجع لينه انموت . وانصيحك مانسمع صوت . للخيمة ابيا حال انفوت
لا ماتنطب .. خيمتنه لو ماصد ليك . اهنا تگعد متعود اعليك . وزينب إيديها ابإيديك

متعود تگعد بس يمي وزينب يمك
وسكنة إمن اتنام امعوديها إله اتشمك
إختك ماتغمض عيناها إله اتكلمك
وعبدالله إمن ايخاف انگله يمك عمك

ياعباس .. تكسر ضهري . تكسر ضهري
ياعباس .. لو ما ترجع أحفر گبري
لمن تمشي . يرحل كلشي
ومن ترجع يرجع كل عمري
____
روح وعيني .. عالراية اتظل تنظر دوم . لو طاحت خويه ومتگوم . أركضلك ركضة ملچوم
إمن اتناديني .. واتگلي أدركني إحسين . أركض واتعثر مرتين . واوصلك ماصد چفين

من توصل خويه اعله الشاطي اشگد تتعذب
ساعة اتصد عالماي او ساعة اتصد الزينب
اتكظ الماي او گبل احسينك ترفض يشرب
لحظة او عيناك ايصوبوها ابسهم اليلهب

اتصيح إحسين .. بَدوا مايك . بَدوا مايك
اتصيح إحسين .. صعبة ارجع أمشي اعله افيايك
اتگلي احچايه . اعذرني اهوايه
ماجبت الأطفالك مايك
____
هاي الخيمة .. بعدك تتوذر بالنار . ومن عدها ايفرون اصغار . أيتام وماعدهم دار
ابوسط الهيمه .. أطفالك خويه ايگعدون . وين العباس ايصيحون . عنك بالصحرة ايدورون

تمشي النار ابطارف زينب شيطفيها
ابلياك ايحرگون الخيمة كلها اعليها
تطلع سكنة اتدورك ياهو ليدليها
اتعاين لا إنته ولا راية التنظر ليها

لومه اتعود .. راح اتعذب . راح اتعذب
لومه اتعود .. ايذبحوني اگبال اختك زينب
تركض ليه . وتحضن بيه
واتدور ثوبي اللي اتسلب

حيدر الحلفي

1,237

الشاعر حيدر الحلفي

19 Jun, 20:36

نص عله بالي من تروح

حيدر الحلفي

895

الشاعر حيدر الحلفي

19 Jun, 20:35

مستهل عله بالي من تروح

حيدر الحلفي

921

الشاعر حيدر الحلفي

19 Jun, 20:35

محررررم 1446 هـ ( أم البنين ع )

عله بالي من تروح . تاخذ من عندي روح . واتگلي اوياك اروح . ها يبعد امك
حسبالي اتگلي امشينه . يمى الطف امتانينه
ها يبعد امك

انه بالي راح ابعيد . وحضرت الأجلك كلشي
وي كل اولادي انروح . وگدام اضعونك نمشي
ما گتلي امشينه او گام . غرگ بالمدمع رمشي
وانه چنت اتمنه اهناك . نعشك يرجع وي نعشي

انه دهري ابلا حُسين . تدري ايوديني وين . ياخذ مني الحنين . يمى لومه اسمك
خلي الحادي ايودينه . يمى الطف امتانينه
ها يبعد امك
____
انه لا ماريد افراگ . فرگاك ايوگف گلبي
تطفه اعيوني ابلياك . لو ما لعيونك تربي
حبيتك حب اجنون . خليني اثبتلك حبي
خذني وخليني ارتاح . وياك اشمحلاه دربي

انه اريد إمن الطفوف . اتخليني اشويه اشوف . واعيونك ما أعوف . يالولد جسمك
سوى نمشي اهنا خلينه . يمى الطف امتانينه
ها يبعد امك
____
گضه عمري اوياك إحسين . معقولة الموت ايبعدك
عني وماحضنك دوم . وما أشتم باچر خدك
اتعودت اهواي اعليك . تغفه او عله صوتي أگعدك
محبوبي المن اسنين . شلون اتفارگني أنشدك

ترى دنيا ابلا حبيب . تخلص نوح وثغيب . يترس راسه المشيب . الما گعد يمك
الما شافك شله ابعينه . يمى الطف امتانينه
ها يبعد امك
____
انه اشوف ابعينك ليش . روحه او ماشوفن رجعة
لاتخفي اعليه إحسين . سولفلي اعليك البضعة
صح راسك يمى اهناك ? الما شايل رحمة ايگطعه
وصابيعك صح يحسين ? يوليدي ايضلن تسعة

انه گلبي ايگلي راح . اتسمعين الغالي طاح . بالطف مايستراح . واشعر ابهمك
جاوبني يابو اسكينة . يمى الطف امتانينه
ها يبعد امك
____
انه يمى ابگلبي احساس . ثوبك هذا ايسلبونه
وابعشر اخيول إحسين . صدرك يمى ايحفرونه
جسمك مابين ارمال . گلبي ايگلي ايغطونه
وعبدالله ايريد الماي . ايبح صوته وما ينطونه

انه صح برض البقيع . بس اشعر بالرضيع . ابحضنك يوگع صريع . دمه وي دمك
طفلك يبقى امعطشينه . يمى الطف امتانينه
ها يبعد امك
____
أشعر هاليوم اجريب . زينب ترجعلي اوحيدة
وانشدها احسينچ وين . واتگلي ضل عالبيده
واسأل عن العباس . واتجاوب گطعوا إيده
عن عبدالله انشد وين . وتصرخ گطعوه اوريده

أفى تبقى عالتراب . عطشان ابلا ثياب . ابحضنك إبن الرباب . بالضمه ايكلمك
مذبوح او ما راوينه . يمى الطف امتانينه
ها يبعد امك

حيدر الحلفي

1,333

الشاعر حيدر الحلفي

18 Jun, 21:11

نص خلصت كل الرسايل
حيدر الحلفي

802

الشاعر حيدر الحلفي

18 Jun, 21:11

مستهل خلصت كل الرسايل
حيدر الحلفي

824

الشاعر حيدر الحلفي

18 Jun, 21:10

محرررم 1446 هـ ( العليلة ع )

خلصت كل الرسايل . مابقى شي ماكتبته
كلشي من عدكم أتاني . لو هوى هم چا حضنته
يمتى يمتى .. اتعاودولي
عمري خلص .. لحگولي

من الفگد من السهر . دلالي بالهم انحفر
دار الزمن اوحيدة ابوطن . طفلة وگلب گلبي انكسر
كلشي اللي بگليبي اكتبت . حتى اشكثر إلكم صحت
اشكد صيحت يهلي متت . ومنكم ولا رد اسمعت

ماكسر بگلوبكم حالي حالي
مافكدتوا امچاني الخالي الخالي
ابعيدة عنكم ليش من تالي تالي

عالعدد أكتب رسايل . ابكل إسم مفجوعة وانحب
چلمة بس ردولي منكم . الينتظر أحبابه يتعب
مره مره . إكتبولي
عمري خلص . لحگولي
____
بالجربة دمعي فرغت . والكم هلي اشگد ارسلت
دمعة حزن إلكم تحن . ابدال الدمع كون اوصلت
إمن اول رسالة اتأكدت . ناسيني واشگد اصرخت
يهلي اشعجب محد كتب . اشتاگينه الچ چان افرحت

تنطفي ابمرسالكم ناري ناري
يالصوركم شايله ابداري داري
الحالي ظل ينحب علَي جاري جاري

تارسه ادموعي الرسايل . والدمع يكتب أسامي
ويه عبدالله دمعتي . اچبيرة يمكن باقي ضامي
دمعة دمعة . إنثرولي
عمري خلص . لحگولي
____
مرسال مامنكم أبد . حاچوني چا شكتب بعد
كل الحچي وهذا البچي . معقولة ما أثر بحد
شنهو العذر من البُعد . امبارك ولو واحد يرد
حتى الهوى صدري چوه . ولمن يمر بابي يسد

لاخبر لاهدهد ايجيني ايجيني
انسدت الدنيا ترى ابعيني ابعيني
اليمتى اتاني وخلصن اسنيني اسنيني

عالعدد أشعل شموعي . وكلهن ايذوبن بديه
ثاري منكم ماكو رجعة . وانعصر كل مغربيه
أدري أدري . ماتجولي
عمري خلص . لحگولي
____
أكتب رسالة وتنمسح . من يوم عاشور الصبح
وشفت القلم وحده رسم . راس وتعلگ بالرمح
وانرسمت ابعيني الخيم . محترگه واعليهن علم
صحت ابكدر عمي الگمر . أتمنه ما صابك سهم

ابعيني شفت انكتبت احچايه احچايه
هذا عبدالله انتظر مايه مايه
وهذا عمي ماخذ الراية الراية

وهذي زينب بالمخيم . شافت إحسين او أخيه
اتشابگوا والحره صاحت . ربي رجعهم سويه
مره مره . إنظرولي
عمري خلص . لحگولي
____
خذني الخيال الكربله . وناس اشكثر متچتله
شفت الأبو شابگ أخو . وعالشاطي چفه شايله
شفت الحُسين اعله الترب . بالخيل كل سا ينگلب
خده انحفر ظهره انكسر . ودم منحره اگباله يصب

والدي امگطعينه بطفوفه اطفوفه
والرضيع امتد عله اچفوفه اچفوفه
وگوه زينب رايحه اتعوفه اتعوفه

طلعت اتدور رقية . عن ابوي وتبچي سكته
شمت إمن ابعيد عطره . بس بلا راسه لگته
راسه راسه .. رجعولي
عمري خلص .. لحگولي

حيدر الحلفي

988