Publicaciones de Telegram de الخادم علي هادي الخزعلي

الليلة اتموت مرتين .. زينب
نعشها ايريد الاحسين.. زينب
يجيها اشلون حاير .. التشيّع بالحوافر
••••••••••
مثل جثة احسين اجنازة ام عون
ناس اشگد تمرها وما يشيعون
متن الرادته ايشيعها .. بالخيل
صار اتراب من گد اليسحگون

اتريد اجتاف الاجنازة.. واخوها اجتافة مسحوگه
ويا ماي اليغسلها .. الاديها بخيمة محروگه

الماعده اهل هم واحد بحالة
غريبة والغريب ايعاتب اخيالة
تعالوا لزينب الشام انترس شمات
ومطروحة الجنازة وماكو شيالة

التموتها الخرابة .. زينب
تشيّعها الترابة .. زينب
وبعيد اعليها صاير .. التشيّع بالحوافر
••••••••••••••••••>>>
تابوت المحنة اتشيعه الاحنان
يريد اربع اجتاف وكلهم اخوان
روحك شيلها امن الخيل يحسين
وجيب اخوانك و صيرلها دفّان

اختكم طاحت ابوادم .. تكره طاري المرّوه
تشيعها الغرب يحسين .. الما عدها چتف خّوه

علي السجاد صاح وصوته من گلبة
الحيهم ترست اذن الوادم الغربة
اليموته الشام ما يرجع يشيعه الشام
التموته الغربة بيش المگبرة اتطلبة

غريبة وماكو جناز .. زينب
بحسرة وادم اعزاز .. زينب
تريد المالة ناصر .. التشيّع بالحوافر
••••••••••••••••>>>
زينب گاضيه امن الشام والناس
بكل شتمة تطلّع شيبة بالراس
عيد الشام ذاك امّوت ام عون
وما تتشيّع الما عدها عباس

التحب الله وسترها ابساع ..اعيون السوگ تكتلها
وما يدفنها اي اتراب .. إلّه اتراب من تلها

دفّانة رقية اتريد دفّانة؟؟
زينب ماتت اعله الخّوة عطشانة
الما يمه اخو امن ايموت ما مرتاح
و يرد دمه اعله وجهه اليّمة خوّانة

يهل زينب سبوها .. زينب
امنين اتجيب اخوها .. زينب
يجي بس ماهو گادر .. التشيّع بالحوافر
•••••••••••••••••>>>>>>
السبي ايخلّي السبية امسلمة للموت
ويگّعدها ابخرابة بنت الابيوت
اللمت ولد الاحسين امن الاخيول
هم يگدر ايلمها الليلة تابوت

الما طاحت عبايتها .. عبايتها التچفنها
المدفونة بتراب الطف .. هم يحتاج ندفنها

وينك يخو زينب إترس الجربة
وغسلها اعله چفك چفك اتحبة
وجيب محمد وعون البزر مريود
و سوو الفاتحة امن الشام للكعبة

تريد الاخو ملثم .. زينب
وچادرها المخيّم .. زينب
وتمنت عطره حاظر .. التشيّع بالحوافر
••••••••••••••••••>>>>
بقة التابوت محّد گالة شبيك
وبقت يمك علي وزينب تحاچيك
علي شيل الجنازة انترست اعيون
اعتبر زينب دخيلة ودخلت اعليك

يتعطل نعشها اشلون .. العدها اسبعطعش زلمة
بس ذولة الزلم برماح.. صاروا سبحة ملتمة

التموت انگول عنها ماتت ارتاحت
و ماترتاح زينب حتى لو ماتت
علي بتك سبية وتعبت امن النوگ
ما طايب متنها امنهد ما طاحت

شبعت ضيم واصياح .. زينب
هلبت هسه ترتاح .. زينب
وتشوفة اعليها داير ... التشيّع بالحوافر
••••••••••••••>>>
علي هادي الخزعلي

https://youtu.be/TyIfy0iXC7A?si=0cHBDoUTGmi9b5hY

https://youtu.be/ANLB0XmiqPg

يالهادي يا عمة .. هاك الحرگ شمة .. تارس عباتي
سامرة مو تلة .. والسجن مو هزلة .. وعثرت بناتي
——————-
للسجن جيتك يعمة و آنه عطشانة
تذكرت حايط خرابة الطاح فوگانة
عمة حتى الهوة هناكة عاند اويانة
بسندس اخضر ما ينام الذبحو اخوانة

يالهادي اسمع هاية .. فطرت گلبي حچاية
امشي بشور الحادي .. وانه امشي اعله الراية

ذبحوا گمر عيني .. الايده تمشيني .. ومأمنه يمة
صح السجن خنگة .. بس آنه محترگة .. وتحرگني نسمة
——————-
عمة شوف اتراب طفهم بعده بمتوني
عمة لو مگطوع راسي ولا يسبّوني
عمة شفت حسين يشهگ واطبگ جفوني
امن الذبح وحدها ادية ايسدن اعيوني

گطعوا رگبة راسة .. ومحد راح وباسة
وصلت روحي لراسي .. من الحافر داسة

هيچي ايدي عالحاجب .. وشفت البخت ذايب.. جوه الحوافر
ابن امي ما شوفة .. بس طارف اچفوفة .. چنهن مناير
—————-
عمة عباس ابو فاضل عينة ممرودة
ومن حَمار الدم يعمه مغرب اخدودة
گطع شريان الحياة الگطّع ازنودة
شگ سمة الله ولاح گلبي يا سهم جودة

والاصعب من ذني .. يمة وما يندلني
من دخان الخيمة.. زينب ما يشتمني

يالهادي ظل يسأل .. انتي مرة لو تل ؟ .. يمتربه اهواي
لون العباية احمر .. زينب بعيد الشر .. شسوالچ الماي
————————
عمة لون السجن يشبهه خيمة محترگة
والشمر سجان واحنة رية مختنگة
وماكو زلمة اتطگ حميتة يردة ويحگة
وابن الحسين النشبگة بسلسلة مشبگة

سجانك مو مثلة .. مُر امرورة دلة
عين وعمدة يهزها .. بس مو نخلة الهزلة

بدرب السبي الزلمة .. ينشف عرِگ دمة .. واجدامة تذبل
حتى الجبل ينطَر .. لو طفلة تتعثر .. كل عثرة مقتل
——————-
ما سبوها اختك حكيمة ولا يسبّوها
وزينب بچم شام يكتل عمة فروها
وانت ماعندك رقية بنحر كتلوها
وانت ما عندك سكِينة وجربة گطعوها

عمه الهادي اعذرني .. بس جدك كاسرني
محد يهدم زينب .. وحسين امطشرني

يا عمة بچيتّك .. و الوين وديتك .. بس هذا صاير
كل الحچي بصفحة .. بس نشغة الذبحة .. بنص گلبي حافر
—————————
علي هادي الخزعلي

https://youtu.be/PkT5HeSSVKo?si=LFCjJDs7zIVIRlzj

https://youtu.be/b482ySo2PWw?si=CqQ0gpfFG22tFDKH

ام روحي بذمتك يتراب
شبعت ضيم امن العصرة
متهشم من ذاكَ الباب
هنت الله بضلع الزهرة
——————
بالليل اجيتك يا گبر .. جايب على اچتافي العمر
وبگلبي ديرة امن الجمر .. وبوجهي بس شيب

يتراب الك انه ابو .. هم شايف امچفّن دفو
اتموّت شكو بعينك حلو .. يجنازة الطيب

شلتها اعله متني وعرج گلبي شايل
ودرع گلبي مدروع بقيت امشي مايل
مطر ماي على الجام احس حيلي سايل

عافيتي وعافية البيت
شايلها بچتفي و امشي
من گد ما باچي ومهدوم
طلعن غيمات برمشي
——————-
ما ودي ادفنها وارد .. مالح اترابك عالورد
فاطمتي يخنگها اللحد .. مگفاها مكسور

لا توگف اويه اهل الـ وإن .. الدنيا برمل ما تندفن
ازرع دمع يطلع حزن .. بتراب الگبور

يالتراب عليها شمرتك ثگيلة
تره الريشة صخرة تحسها النحيلة
الهوه اعليها يثگل ضلو ع العليلة

بالك يمها وما اوصيك
لا تاخذ دور المذنب
افتح بابك خل ترتاح
يتراب بوكت المغرب
—————-
لا طبرة لا طعنة برمح .. مثل ام حسن مامش جرح
امن المگفة فرگاها ذبح … ويطفّي الاعيون

محد يهدني امن ارد اهد .. وطيحني للگاع الفگد
نعش العشگ يمرد مرد .. حافر عالامتون

التحبه اعله متنك تحس نعشه حافر
وصباح الله بعيونك اتحسه عاشر
هدم ناس ثگيلة يحظن المگابر

انه القالع باب وروس
ربعي وولدي يتچولي
هدت حيلي الزهره وصار
حاجب يا وادم طولي
——————
خليتلك طاسة دمع … يومية رشها اعله الضلع
ما حط بخور ولا شمع .. تتذكر النار

يتراب ذممتك تره .. هَنت الله بيها امكسره
امن البيت اظل للمگبرة .. خلاني بسمار

شيعوضني يتراب طفه بعيني كلشي
ولا بيه اگومن ولا اگدر امشي
مشت روحي زهراء گطع وكتي هرشي

اعله ترابك نايم يتراب
وترابك تارس جيدي
من گد ما ضعفني البين
المحبس ما يثبت بيدي
——————-
مَعَ السلامة تندثر .. مَعَ اليتامة والكسر
بالك عله امهم ياگبر .. زينب والحسين

راح ارجعلهم مو علي .. مو حيلي ذاك الاولي
امخوصر ودافن كل هلي .. وبخدي شطّين

دفنت الامومة ودفنت الابوّة
ومشيتي اعله حيطان واجر خطوة خطوة
تتچيلي زينب يگعدوني گوة

من طبيت البيت احاه
لاگاني الباب ودمها
طگ ضلعي وطحت اعله الباب
ودموعي شمصعب لمها
————-
علي هادي الخزعلي

ضعفت لحد ما صارت خيال
ومحدبة اكثر من الهلال
ومن تتنفس تبجي بحرگة
وتطلع جنها اسهام الشهگة
——————-
ما مرها اي انسان .. يعصرونة عالحيطان
ويضربة چف شيطان .. ويطيحة للگاع

بالزهرة اكثر صار .. عصروها جوه النار
وبيها انلوه البسمار .. ومنها الطفل ضاع

واللعين برجله يركل ما يحس
سورة الكوثر يوادم تنرفس ؟
غيمة سودة وعصرة خيوط الشمس
الباب يغلي وعالجذع دفعوها

طگة ضلعها بدفعة افلان
واصل دويها لبيت الاحزان
تحچي احچايتها ومختنگة
وتطلع چنها اسهام الشهگة
———————-
طاحت عليها اجذوع .. تكسر صخر وضلوع
وبسمارة ما مشلوع .. باب وقوي اهواي

والمحسن امن انصاب .. طاح اعله طرف الباب
واتگمط بعطاب .. ودمع امه مو ماي


ما شفت لا بالچذب لا بالصدگ
المحترگ گلبة ويطفونة بحرگ
وعتبة الزهرة التشور تنسحگ
و الـ وإن بذن الزمن زرعوها

مرأة ونحيلة وتدفع الناس
وجرة القوس اتجر بالأنفاس
الشمعة اتموتها المحترگة
وتطلع چنها اسهام الشهگة
——————

لحگتها فضة تريد .. تلزمها من چف ايد
تحملها بس تبيد .. ضعفت اديها

چفها انترس تجريح .. اتچيها بس تطيح
فضة لولدها اتصيح .. وركضو عليها

طافح اعليها الحسن سيل وطفح
شالها امن الباب واذراعة انجرح
والاحسين اعليها من هسه انذبح
عمت عيني امن الجذع شالوها

وزينب تضمد بيها وتگول
شيضمد احسين من الاخيول
الكسرو ضلعة شلون انشبگة
وتطلع چنه اسهام الشهگة
—————
باتت نحيلة هواي .. صارت خيال بماي
ونتها تكسر ناي .. وتفطر گلوب

وصلت وجع والالام .. مابيها حيل تنام
تنكسر مثل الجام .. وي وكت الغروب

من يجيها المغرب تكض الضلع
تحس هوه الله اعليها رايد يندفع
امن الوجع ظل صوتها اولا ينسمع
يمها يتدنون ويسمعوها

اليا يمه فاگدها الحسن حيل
عازتها عازة اليمة للحيل
مثل امه ابن ادم ما يلگة
وتطلع چنها اسهام الشهگة
———————
وصلت بعد للموت .. گطعت نفس والصوت
وظل يخطف التابوت .. گدام العيون

جمعت ولدها اغيوم .. المذبوح والمسموم
تگلهم وراي بيوم .. كلكم تموتون

يالحسن چبدك تشوفه بطشت راح
ويا احسين بصدرك امكاسر رماح
وكل مصايبكم لزينبكم اطياح
وزينب الما طالعة يطلعوها

كسرة اضلوعك يمة يحسين
من صوتها اتطيح الصواوين
تحظن بي لا خيل تسحگة
وتطلع چنها اسهام الشهگة
—————-
علي هادي الخزعلي

الله اكبر عصروها ومنها المحسن طاح
مو طف بس البسمار تحسبه احساب ارماح
حيل .. دفعوها
ضلوع .. كسروها
—————————-
زغيرة ومعصورة بقوة وصاحت فضة بساع
سندي امتوني

ماشوفن دربي اتصيّح ضاعت بيه الگاع
مغوشة عيوني

صاحت آه .. فضتاه .. لزمي چفوفي
دوري زين.. ابني وين .. طايح شوفي

رحت اركض ركضت خايف چوّت وجهي النار
ومديت ايدي لفاطمتي وصب دم البسمار
موت .. راووها
ضلوع .. كسروها
———————-
دخّان الباب العالي الخانگ بيها الصوت
ما اسمعها

ضلوع ومحترگة ورفسة الوصلت بيها الموت
وچف يدفعها

إنعصار.. عالجدار … وانت اتخيّل
هذا حال .. لو رجال .. ما تتحمل

العصرة اللاگتها الزهرة تمّوت حتى الصوت
الزلمة وما يتحملها بساع بساع ايموت
ليش .. عصروها
ضلوع .. كسروها
———————-
سنّد ظهرة اعله الحايط حيل ويعصر صار
ضلع الزهرة

بخيبر لابد بالخيمة وهسه بباب الدار
نارة موجرة

البلحروب .. يبقة ثوب .. طلعت عينة
وهسة جاي .. عنده راي .. ومكبرينة

لو مرخوص الهم حيدر كون وشاف النار
اله الاول والثاني ايشدهم ع الفقار
الروس .. يحنوها
ضلوع .. كسروها
——————
انه وزينب شلناها شويه شوية بخوف
ونبچي اعليها

ما نلمس ظهر الزهرة نحذر چي مخسوف
ونأذيها

ماكو عين .. ولا ادين .. ما موجوعة
والكسير .. من يحير .. يكض ضلوعة

ما نامت ليلة براحة ايغثها الليل اهواي
شما تتحرك تتشاهد حتى بشرب الماي
نوم .. حرموها
ضلوع ..كسروها
———————
شهرين بهاي الحالة اسم الله اسم الله نصيح
لمن تمشي

ندعي شما تمشي الخطوة خاف الزهرة تطيح
وتهدم كلشي

بخطوتين .. ياحسين .. صاحت يبني
بهالندا .. للصلا .. يمه اسندني

سامع صوت القارورة الطاحت فوگ الگاع
هيچ نكسرن يا ناس بصدر الزهرة اضلاع
اخيال .. سووها
ضلوع .. كسروها
——————-
حطت چفها اعله الگاع وصاحت اه يحسين
يا موضوعك

اضلوعك الله يساعدها وذيچ اخيول البين
اتهدم اضلوعك

ياحرام .. للخيام .. ضلعك يوصل
يوذروك .. يطشروك.. وما تتحصل


تتطشر گالتله وثوبك حدر الحافر ضاع
تتوذر راح وتترسها احسين احسين الگاع
ضلوع .. طحنوها
ضلوع .. كسروها
———————
علي هادي الخزعلي

https://t.me/wdadhussenia