ХУНУК ТАҚДИР
( Тақдирни кўриб бўлмайди аммо уни чиройли ёки хунуклигини хатто кўзи ожиз одам хам тасаввур қила олади, бу узундан узун ёзилган шеърим хаётдан олинди )
*
Хаёлларга ғарқ бўлиб гоҳо,
Тундан тонгга етиб бораман.
Нега мени суймадинг дунё,
Остонангда бағри пораман !
Варақласам йилларни кезиб,
Туғулганим дунё суймабди.
Йўргагимни хазондан бичиб,
Сийратим ва руҳим ўрабди !
Қизғанмабди табассумларин,
Шундан хамон юзимда кулгу.
Аямабди аммо ғамларин,
Либосларим энимда қайғу !
Болаликда эшитган эдим,
Икки хилмиш тақдир дегани.
Бири гўзал, ойдек малагим,
Бири хунук, ғаммиш кийгани !
Йиллар ўтиб кўп ўйланаман,
Қандай экан менинг тақдирим.
Гўзал аксин топа олмайман,
Бадбашара юзин танидим !
Тақдиримнинг илон излари,
Бир умрга руҳим эзарми.
Ё алҳазар, қўтр юзлари,
Шунчалар хам хунук бўларми !
Назар солсам яқинроқ бориб,
Менга насиб қилган қисматни.
Бир биридан ночор ва ғариб,
Бир бирига отар тўхматни !
Бирам хунук, ранги бир совуқ,
Хатто дардман, ўлакса экан.
Бахтим сувсиз, қум босган қудуқ,
Икки кўзи сўқр кўр экан !
Кўриб қолдим букри соямни,
Оёғида кишанлари бор.
Раҳм қилмай йиллар, танамни,
Тегирмонга ташлабди минг бор !
Танимадим қадримни кўриб,
Ғилай экан икки кўзлари.
Дод солганча сочларин юлиб,
Йиғлаб турар арзон сўзлари !
Ўтмишимни оралаб кезсам,
Ўзим йўғу, соям бор экан.
Юрак ютиб ўзни изласам,
Ўзлигимдан дил безор экан !
Дил уйимга кирсам, охиста,
Қоп-қоранғу, дарчаси хам йўқ.
Очмоқ учун қўл чўзсам аста,
Эшигида дастаги хам йўқ !
Хайхот, дедим, бу қандай кўнгил,
На дстагу, на дарчаси бор.
Жой топмайди хатто битта қил,
Хиёнатнинг қуртлари бисёр !
Бунча хунук, оҳ бунча таххир,
Нахот дунё суймагани рост.
Болаликда эшитган тақдир,
Нахот мени танлагани рост !
Билганим шу, икки тақдир бор,
Бири гўзал тенги йўқ, танҳо.
Бири хунук, сўқр кўзи бор,
Шу сўқрни етаклар дунё !
Гул Баҳор
Исроилова
Москва. 07.11.2018.
@gulbahor_isroilova
Bizdan uzoqlashmang
@gulbahor_isroilova👈