First Aid "اسعافات أولية"

ودلوقتى مع عاشر فقرة عندنا من فقرات إسعافات اوليه وهى #التسمم.
(Poisoning)

ازاى نتعامل مع حد حصله تسمم لا قدر الله.

أول حاجة لازم نعرف ايه هو التسمم:
-التسمم هو تعرض الجسم لجرعة زائدة من أى ماده ذات آثار ضارة مما قد يؤدى إلى فقدان الجسم لبعض وظائفه الحيوية.

وفى حالة الشك ان حصل تسمم مضيعش وقتى فى محاولة معرفه نوع السم لازم ابادر باسعاف المصاب ونقله على أكبر وحده طبية.

ايه هى بقى أسباب التسمم:-
1- تناول المواد الضارة (عن طريق الخطأ أو بقصد الانتحار).
2- التعرض لجرعات زائدة من الأدوية.
3- استنشاق جرعة كبيرة من غاز سام.
4- الجرعات الزائدة من المواد المخدرة.
5- الإفراط فى تناول الكحوليات.
6- التسمم الغذائى.
7- العضات السامة من بعض الافاعى والعقارب.

الأعراض العامة بقى اللى بتظهر هى:-
- اتساع او ضيق حدقة العين.
- عدم انتظام التنفس.
- غثيان او تقيؤ او اسهال.
- حرق او صبغة حول الفم.
- زيادة إفراز اللعاب او العرق او الدموع.
- تشنجات.

لو لحظنا العلامات دى او بعضها بنبدا بالاسعافات الأولية وهى:

-بنراقب ABC
وده اختصار ل Airway اللى هو مجرى التنفس.
و breathing مراقبه النفس منتظم ولا لا.
و circulation اللى هو النبض.
والفقره الجاية ان شاء الله بعنوان #وسائل_تدعيم_الحياة هيتم شرح كل ده فيها باستفاضة.

الحاجة التانية فى الإسعافات الأولية هى انى :-
-اتصل بأقرب متخصص طبى.

فى إجراءات عامة لإسعاف مريض التسمم:-

وهى اهم حاجة انى ازيل السم من الجسم وده طبعا بيختلف على حسب طريقة التسمم

*لو كان السم عن طريق (الاستنشاق):
هبعد المصاب عن مصدر الغاز واطلب المساعدة الطبية.

*لو كان السم عن طريق (الجلد):
هغسل الجلد كويس جدا فى موضع التعرض للسم.

*لو كان السم عن طريق (الفم):
هخلى الشخص يتقيأ عن طريق انى اديله لبن ممزوج ببيض نيئ عن طريق الفم.
بس لو كان "*التسمم عن طريق الفم بمادة كاوية ممنوع مانعاً باتا انى اخلى الشخص يتقيأ*"

وهنا لازم اذكر شوية ملاحظات:-

-ممنوع مانعا باتا محاولة انى اخلى المريض يتقيأ لو كان متسمم باحماض او قلويات قوية زى (منظفات الحمام او البوتاس) او مواد بترولية زى (الكيروسين)

- محاولش انى اعادل التسمم بالكيماويات بمعنى انى اعادل التاثير لان ده هيبقى تفاعل كيميائى يتنج عنه حراره هتتسبب فى حرق لانسجة جسم المريض.

- ممنوع استخدام محلول الملح لزيادة القئ.

- لو كان المريض فاقد الوعد محاولش اخليه يتقيأ ولا اديله اى سوائل.

-لو مش عندى لبن علشان اخليه يتقيأ استخدم الملينات.

*لو كان التسمم بسبب عضات الافاعى والعقارب:

-بحط رباط ضاغط بين موضع الاصابة وبين القلب (بس لازم افكه كل نص ساعة علشان مسار الدورة الدموية والدم ميفسدش)

- بخلى دائما الجزء المصاب متوجه للاسفل وتحت مستوى القلب.

- بشرّط موضع العضه (بعمل جروح سطحية فقط)

- مص الدم من الجرح وبصقه (لان السم ده هيتدمر فى الجهاز الهضمى بس لازم يكون الفم مفهوش اى جروح)

- بحدد نوع الافعى او العقرب (عن طريق قتلها واوديها المستشفى)

- مستخدمش اى ترياق بدون استشارة طبية.

- لو ظهرت اى اعراض حساسية على المريض بسبب السم لازم اودية المستشفى فوراً.

- ممنوع إعطاء المريض خل او ليمون علشان اعادل السمية علشان هتزيد من تفاقم الإصابة.

- لازم ادى معلومات طبية مهمه للأطباء:
زى عمر المريض .. اسم السم وكيفية التعرض ليه .. هل تقيأ المصاب او لا.. ايه هى الإسعافات الأولية اللى قدمتها .. لازم احدد زمن الإصابة.

وبكدة تبقى الفقرة العاشرة من إسعافات أولية خلصت. 💪🏻❤️
استنوا الفقرة الجاية ان شاء الله بعنوان #وسائل_تدعيم_الحياة .

ودلوقتى مع تاسع فقرة عندنا من فقرات إسعافات اوليه وهى #المريض_متعدد_الاصابات.
(Polytraumatized patient)

ازاى نتعامل مع حد عنده كذا اصابه فى نفس الوقت لا قدر الله.

أول حاجة لازم نعرف مين هو المريض متعدد الإصابات:
-ده شخص عنده كسر ونزيف وجرح وكذا حاجة مع بعض فى نفس الوقت.

ده بيبقى نتيجة الحوادث أو السقوط من الأسطح العالية.

ايه بقى الإسعافات الأولية اللى اقدر اقدمهاله على ما يوصل المستشفى:
1- التأكد من دخول الهواء إلى الرئتين، والتأكد من إزالة أى شئ عالق فى القصبة الهوائية.
2- التأكد من تنفس المريض ونبضه والتعامل مع حالة المريض وفى حالة عدم التنفس أو النبض بنبدأ نعمل CPR اللى هو التنفس الصناعى
(وده هيتشرح فى فقرة كامله بالتفصيل بعنوان #وسائل_تدعيم_الحياه)
3- فى حالة وجود نزيف يضغط جيداً على مكان النزيف أو يربط فوقه فى إتجاه القلب.
4- الإتصال بالاسعاف بسرعة على قدر الإمكان.
5- فحص المريض كاملاً للتأكد من إحصاء جميع الإصابات.

وبكده تبقى الفقرة التاسعة من إسعافات أوليه خلصت. ⁦💪🏻⁩⁦❤️⁩
استنوا الفقرة الجاية ان شاء الله بعنوان
#التسمم.

كسر فى الضلوع.

كسر فى الحوض.

كسر فى الساق.

كسر فى الفك.

حالة كسر فى الجزء العلوى من الذراع.

التنفس أو نزيف شديد فإن الأولوية فى الاسعافات لمساعدته على التنفس ووقوف النزيف قبل معالجة الكسر.

وبكده تبقى الفقرة الثامنة من إسعافات أوليه خلصت. ⁦💪🏻⁩⁦❤️⁩
استنوا الفقرة الجاية ان شاء الله بعنوان #المريض_متعدد_الاصابات.

ودلوقتى مع ثامن فقرة عندنا من فقرات إسعافات أوليه وهى #الكسور (Fracture)
ازاى نتعامل مع حد حصله كسر لا قدر الله.
أول حاجة لازم نعرفها إيه هو الكسر.
"الكسر ده عباره عن انقسام أو شقوق فى العظام."

طب إيه هى أسباب الكسر:
1- الحوادث: حوادث السيارات والسقوط والخبطات.
2- ضعف العظام: هشاشة العظام فى كبار السن والأمراض السرطانية.

أنواع الكسور:
1- كسور مغلقة (بسيطة):
دى كسور بتبقى آثارها محصورة فى العظم بس الجلد اللى بيعلو مكان الإصابة متأذاش.
2- كسور مفتوحة:
العظم المكسور هنا اخترق الجلد ومزقه.

إيه بقى خطوره الكسور:
بتعمل هبوط حاد فى الدورة الدموية وده بسبب النزيف الدموى.
وبتعمل التهابات جرثومية بسبب دخول أى جراثيم للدم.

الاعراض:
-ممكن أثناء الإصابة أسمع صوت كسر العظام.
-صعوبة الحركة وألم فى العضو المصاب.
-ظهور تورم فى مكان الإصابة بعد مرور بعض الوقت.
-تشوه الشكل الخارجى للعضو المصاب.
-شحوب الوجه بسبب الصدمة.
-بيكون فى ألم وده من أهم الأعراض اللى بيحسن بيها المريض.

*ملحوظة هامة*
ممكن الأعصاب والأوعية الدموية القريبة من مكان الكسر تتأذى علشان كده لازم اتوخى الحذر وانا بحاول اساعد الشخص المصاب أو احركه.

أهم حاجة بقى ازاى اسعف الشخص اللى حصله كسر؟
1- فى حاله الكسور المغلقة:
اول ما يحصل الكسر
-بخلى الأجزاء المصابة والمفاصل ثابتة بدون حركة.
-بفرد الطرف المصاب بحرص شديد لوضعه الطبيعى(لو المصاب حس بألم بقف علطول مش بكمل)
-بحط قماش مطوى أو بطانية حول الطرف المصاب لحد ما احضر ادوات الجبيرة.
-لو فى إصابة بالغة بتأكد من سلامه مجرى الهواء والتنفس والنبض.

إيه هو بقى (التجبير) ده:
انى بحط دعامة سانده لذراع أو ساق المصاب والغرض هو تثبيت العضو المصاب وتقليل حركة طرفى الكسر وبالتالى تقليل الألم.
بصنع الجبيرة من الكرتون أو الورق المقوى أو الصحف أو الألواح أو الاعواد المستقيمة أو الرباط الضاغط.

لو كان الكسر فى الساعد بعمل الجبيرة ازاى؟
-لو كان الكسر فى الجزء السفلى من الذراع لازم أخلى مفصل الكوع ومفصل الرسغ ساكنين.
-بحط ايد فوق الكسر وايد تحته.
-بثبت الورق المقوى أسفل الساعد المصاب.
-بلف شريط من الرباط الضاغط حول الساعد.
-بربط الوشاح الطبى حول الساعد والرقبة.

لو كان الكسر فى الجزء العلوى من الذراع بعمل الجبيرة ازاى؟
-لو كان الكسر فى الجزء العلوى من الذراع لازم أخلى مفصل الكوع ومفصل الكتف ساكنين.

والخطوات بتكون زى اللى فى الصورة اللى تحت كده ⁦👇🏻⁩

لو كان الكسر فى الفك بعمل الجبيرة ازاى ؟
-بربط الرباط الأول حول الفك ومؤخره الرأس.
-بربط الرباط الضاغط التانى حول الفك والرأس.
زى الصوره تحت كده. ⁦👇🏻⁩

لو كان الكسر فى الساق بعمل الجبيرة ازاى؟
-بحاول افرد الساق المصابه تدريجياً (لو المريض حس بألم بتوقف)
-بلف الرباط الضاغط حول الدعامة جيداً.
-بحط الدعامة للتثبيت أسفل الرجل المصابه وما بين الرجلين.
زى الصوره كده . 👇🏻⁩

الكسر فى الحوض بقى :-

الاعراض :
1- ألم شديد فى الحوض والظهر بيزيد مع الحركة.
2- عدم القدره على الوقوف والمشى بالرغم من عدم وجود اصابه بالساق.
3- ظهور علامات الصدمة على المصاب نتيجة الزيف الداخلى.
4- وجود دم فى للبول.

الاسعافات الأولية:-
-لازم أخلى كل من مفصل الركبة ومفصل الحوض ومفصل الكاحل ساكنين.
-احط وسادة بين الركبتين.
-اربط الركبتين والقدمين ببعضهما.
زى الصوره كده. ⁦👇🏻⁩

كسر فى الضلوع:-

الاعراض :-
1- صعوبة فى التنفس (ألم يزيد من النفس)
2- فى حاله الكسر الشديد (الضلع العائم) تتحرك الضلوع المكسوره عكس حركه الصدر مما يؤثر على التنفس.

الاسعافات الاوليه:-
-بثبت الذراع فى الناحية المصابة من الصدر فى وضع مرفوع.
-فى حالة الضلع العائم بربط الرباط الضاغط حول الصدر لتثبيت الجزء المكسور.
زى الصوره كده. ⁦👇🏻⁩

كسر فى العمود الفقرى:-
النوع ده من أخطر أنواع الكسور لانه بيؤدى لقطع الحبل الشوكى وقد يؤدى إلى الشلل.

الأعراض:-
1- انحناء شديد فى الجسم.
2- تنميل فى الأطراف.
3- الم شديد.
4- قد يصحبها صعوبة فى التنفس.
5- قد يكون هناك جرح بالغ فى الظهر.

*ملاحظه هامه*
-عدم قدرة المصاب تحريك قدمه ضد مقاومة يدك قد يعنى اصابه العمود الفقرى.

الاسعافات الاوليه:-
-لا تلوى الظهر أو الرقبة.
-ضع بطانية أو ملابس مطوية على كلا جانبى الجذع والرقبة.
-حاول جعل الأنف على خط مستقيم مع السره.
-اذا لزم تحريك الجسم لازم يكون فى فريق مكون على الأقل من 5 أفراد لتحريم الجسم كقطعة واحدة.

نتكلم بقى عن الكسور المفتوحة:-
ودى عباره عن قسمين
(التعامل مع النزيف + التعامل مع الكسور المغلقة)
-اقف ناحية الطرف السليم.
-اغطى العظم بالشاش بعد تطهير الجرح باستخدام اى نوع من المطهرات.
-اضع من القطن لتغطية العظم تماما واربط بالشاش مره تانية.
-اعمل الجبيره اللازمة (كما فى الكسر المغلق)

*ملاحظات هامه*
-لا تحاول دفع العظم المكسور إلى مكانه.
-لو كان المصاب بيعانى من صعوبة فى

دى Rule of nine بالنسبة للأطفال 👆

ودلوقتى مع سابع فقرة عندنا من فقرات إسعافات أولية وهى #الحروق (Burns)
ازاى نتعامل مع حد حصله حرق لا قدر الله.
لازم نعرف الأول أسباب الحروق.

الحروق ممكن تحصل نتيجة:
-اللهب المباشر.
-الماء المغلى.
-حرق كهربى. (ماس كهربى)
-حروق كيميائية. (حمض الكبريتيك)

ثانى حاجة لازم نعرفها تقسيمات الحروق ودى بتتقسم من ناحية حاجتين:

أول حاجة "من حيث امتداد الحروق"
ودى تبعاً لطريقة إسمها (Rule of nine) زى ما عندنا فى الصورة تحت.
-الرأس 9%
-كل أيد بتمثيل 7%
-كل جزء علوى من الجسم سواء قدام أو ورا 18%
-كل رجل 18%
-منطقة ال genital 1%

وعلى حسب ما أحسب نسبة الحرق لو طلعت عندى النسبة :
-أقل من 15% ---> يبقى دى حروق صغيرة
-من 15% ل 30% ---> يبقى دى حروق متوسطة
-أكثر من 30% ---> يبقى دى حروق كبيرة

ثانى حاجة فى التصنيف "من حيث العمق" ودى بتتقسم ثلاث درجات :
-حروق الدرجة الأولى: يشمل الطبقة السطحية من الجلد.
-حروق الدرجة الثانية: بتنقسم إلى :
●حروق سطحية: مؤلمة، لونها أحمر، حساسة للهواء.
●حروق عميقة: غير مؤلمة، بيضاء اللون، غير حساسة للهواء.
-حروق الدرجة الثالثة: دى يصاحبها تدمير كامل لكل طبقات الجلد وبيكون لونه أسود.

●تنبيهات عامة للتعامل مع الحروق:
-لازم اخرج المصاب من مكان الحريق واتصل بالإسعاف وبعد كده اخلع الملابس المحروقة إلا إذا كانت ملتصقة بالجلد.
-اطمئن على سلامة ممرات التنفس، التنفس والدورة الدموية.
-غسل الحرق بماء الصنبور(ماء بارد).
-وضع شاش فازلين على الحرق ثم ضمادة من القطن والشاش فى الحروق الكبيرة وانقله للمستشفى.

●أشياء يجب تجنبها فى التعامل مع الحروق:
-فقأ الفقاعات المتكونة مع الحرق.
-وضع الثلج، معجون الأسنان أو الزيت.
-إعطاء أى شئ بالفم للمريض ولو كان حاسس بجفاف بحطله حته ثلج فى فمه يمصها.

●كيفية إسعاف كل نوع:

- حرق الدرجة الأولى:
1- طمئن المريض.
2- اغسل الحرق بالماء البارد لمدة 10 دقائق.
3- ضع ضمادات معقمة على الجرح.
4- إذا كان الحرق أكبر من راحة اليد لازم انقل المريض للمستشفى.

- حرق الدرجة الثانية:
1- يعامل معاملة حرق الدرجة الأولى.
2- يتم نقل المصاب للمستشفى لاعطاؤه السوائل اللى فقدها.

- حرق الدرجة الثالثة:
1- اطلب المساعدة الطبية فوراً.
2- طمئن المريض.
3- غط المنطقة المحروقة بقطعة قماش نظيفة أو غيار معقم.
4- إذا كان الوجه محروقا فاجعل المصاب جالساً.
5- ارفع الأطراف واجعل المصاب راقدا إذا كان الحرق ليس فى الوجه.
6- اعط المصاب جرعات صغيرة متكررة من السوائل البادرة.
7- راقب المصاب حتى وصول المساعدة الطبية.

وبكده تبقى الفقرة السابعة من فقرات إسعافات أولية خلصت. 💪❤️
استنوا الفقرة الجاية ان شاء الله بعنوان #الكسور

ودلوقتى مع سادس فقرة عندنا من فقرات إسعافات أولية وهى #الجروح (Wounds)
ازاى نتعامل مع حد حصله جرح.
لازم نعرف إن تصنيف الجروح بيختلف على أساس الأوجه الطبيه والجنائية وكمان على أساس الأداة المسسبة، بس أكثر الجروح شيوعاً فى حالات الطوارئ هى ...

#الخدوش : من أبسط أنواع الجروح.
الخدش ده عبارة عن تدمير الطبقة السطحية من الجلد نتيجة للضغط على الجلد أو الاحتكاك بجسم خشن غير حاد.

علشان نعالج الخدش بنطهر الجرح الأول وبعدين بنحط ضماده نظيفة.

#الكدمات : عبارة عن تجمعات دموية فى الانسجة نتيجة انفجار الشعيرات الدموية السطحية.

علشان نعالج الكدمات بنحط ثلج لإزالة التجمعات الدموية دى وبنفحص المريض لمحلاحظة أى كسور أو جروح ثانية.

#التمزقات : بتحصل بسبب اصطدام الجسم بأدوات ثقيلة وغير حاده بتؤدى لتمزق الجلد.

الحاجة اللى بتميز التمزق إن حافته بتكون غير منتظمة مع نزيف قليل.

#القطع : بيحصل نتيجة تعرض أنسجة الجسم للقطع بأداه حاده زى سكينة أو زجاج مكسور.

وهنا بتكون الحافة منتظمة مع نزيف أكثر.

#الجرح_النافذ : جرح ناتج عن إصابة بطلقة نارية أو ما شابه.

الإسعافات الأولية للجرح المفتوح زى (التمزق - القطع - الجرح النافذ ) :

1- الاطمئنان على سلامة الجهاز التنفسى وانتظام التنفس.
2- وقف النزيف فورا.
3- تطهير الجرح وتضميده.
4- الفحص الشامل وملاحظة أى جروح ثانية.
5- فى الحالات الحرجة أو النزيف الحاد يجب نقل دم للمصاب.

وبكده تبقى الفقرة السادسة من فقرات إسعافات أولية خلصت. 💪❤️
استنوا الفقرة الجاية ان شاء الله بعنوان #الحروق

ودلوقتى مع خامس فقرة عندنا من فقرات اسعافات أوليه وهى #النزيف (Bleeding)
ازاى نتعامل مع حد حصله نزيف لا قدر الله.
لازم نعرف إن خطورة النزيف بتكمن فى انه ممكن يسبب #صدمة فى حالة اننا موقفناش النزيف بسرعة وممكن كمان يسبب وفاه لا قدر الله.
علشان كده لازم نعرف أماكن النزيف.
النزيف ممكن يبقى من 3 أماكن :
- #شرايين ولون الدم بيبقى أحمر فاتح وبيخرج الدم كانه نافورة.
- #أوردة ولون الدم بيكون أحمر قاتم (مائل للزرقة) والدم بيسيل من الجرح.
- #شعيرات_دموية ولون الدم بيكون أحمر وبيبقى عباره عن نقط دم قليلة.

النزيف بقى ليه أنواع :
- نزيف خارجى.
- نزيف داخلى.

وهنبدأ نتكلم عن طرق التحكم فى #النزيف_الخارجى ...

أول طريقة هى "الضغط المباشر" ودى من افضل الطرق وأكثرها فاعلية فى وقف النزيف وهنا بنحط ضمادة نظيفة على الجرح وبنضغط عليه.

تانى طريقة هى "الرفع" عن طريق رفع الطرف المصاب سواء كان ذراع او قدم فى وضع أعلى من مستوى القلب علشان ده بيؤدى لتخفيف ضغط الدم فى العضو المصاب.

ثالث طريقة هى "الضغط غير المباشر" وده معناه انى بضغط على الوعاء الدموى الرئيسى اللى بيمد مكان الاصابة بالدم مقابل العظم اللى موجود تحت الوعاء الدموى فبيؤدى لإغلاق الدورة الدموية للعضو المصاب.

رابع طريقة هى "الرباط الضاغط" ودى بتستخدم كوسيلة اخيرة لإيقاف النزيف.

فى شوية ملاحظات لازم نعرفها عن الرباط الضاغط :
- وضع مركز الرباط بين العضو المجروح والقلب بحيث نترك مسافة 2 بوصة بين الجرح ونقطة الضغط.
- لازم نحافظ على شد الرباط الضاغط وتثبيته فى مكانه وربط عقدة على السطح العلوى من الطرف المجروح.
- نحط عصايه أو اى حاجة تانيه ممكن نستخدمها كعصايه على العقده ونربط فوقه عقدة تانيه.
- نلف العصايه مرتين علشان نتأكد من شدة الضغط على الشريان لحد ما يقف النزيف.

* فى هنا تنبيه مهم لازم نشيل الرباط الضاغط خلال 30 دقيقة علشان ميسببش نقص الامداد الدموى للطرف المصاب*

*دلوقتى هنتكلم عن نقطة تانية وهى #النزيف_من_الأنف
وده من اكتر اشكال النزيف الخارجى شيوعا وبيكون نتيجة لمرض زى ارتفاع ضغط الدم أو مرض معين فالأنف وممكن يحصل عند التواجد فى أماكن مرتفعة وخطورتة بتكون فى انه ممكن يسبب صدمة نتيجة النزف الحاد ممكن تؤدى للموت لا قدر الله.

علشان كده لازم نعرف ازاى نتعامل مع النزيف لو حصل :

- نحافظ على المريض ساكن.
- إماله رأسه الى الامام علشان نمنع دخول الدم للرئتين أو المعده (والنقطه دى مهمه علشان اغلب الناس بترجع راس الشخص لورا لكن ده غلط علشان الدم ممكن يوصل للرئه، لازم فى حاله النزيف #اميل_الراس_قدام )
- الضغط على الانف.
- الضغط على الشفه العلويه أسفل الانف.
- وضع ثلج على جبهه وأنف المريض.
- وضع شاشة على الأنف عليها مادة تؤدى إلى تضييق الشعيرات الدموية النازفه فى الأنف.
- وفى حاله إن المريض فقد الوعى بنخليه يرقد على جنبه علشان الدم ميدخلش جهازه التنفسى أو الهضمى وبعدها نسعفه من #الصدمة

*ندخل بقى فى النوع التانى وهو #النزيف_الداخلى وده نوعين :

*النوع الاول :
- نزيف مرئى : وده يمكن الاستدلال عليه ورؤيته وبيبقى موجود فى 4 أماكن.

1- الرئة : المريض بيكح دم لونه أحمر فاتح.
2- المعده : بيتقيأ دم لونه أحمر قاتم (لون القهوه)
3- الامعاء : بيكون الدم داكن اللون، غير متماسك، وليه رائحة الوقود.
4- المستقيم أو فتحة الشرج : بيبقى دم أحمر ممزوج بماده شبه المخاط.

*وفى حاله كون المريض فاقد الوعى بنخليه يرقد على جنبه علشان الدم ميدخلش جهازه التنفسى أو الهضمى وبعدها نسعفه من #الصدمة

*النوع التانى :
- نزيف غير مرئى : وده مبعرفش استدل عليه وصعب انى اعرفه فبيؤدى لحدوث صدمة .

(اعراض الصدمة)
- شحوب البشره وبرودتها.
- عطش، غثيان وقئ.
- نبض سريع وضعيف.
- ضغط منخفض.
- انخفاض درجة الحراره.
- تنفس سريع وغير عميق.
- ألم وعدم الشعور بالراحة.

وتكون الاعراض دى نفس أعراض النزيف الداخلى المرئى فى حاله عدم إسعافه بسرعه.

علاج النزيف الداخلي بقى بيعتمد بشكل أساسي على حدة النزيف نفسه.
فلو كان النزيف الداخلي طفيف، فالعلاج ممكن يشمل الراحة وشرب سوائل كثيره.

أما لعلاج النزيف الداخلي المعتدل والحاد، فممكن الطبيب يحقن فيتامين K وبلازما مجمدة والدم والصفائح الدموية إلى الأوعية الدموية.

في بعض الأحيان ممكن يكون فى حاجة للخضوع لجراحة لإصلاح الضرر اللى حصل في الوعاء الدموى والتخلص من الدم الخارج منه.

وبكده تبقى الفقرة الخامسة من فقرات اسعافات أولية خلصت. 💪❤️
استنوا الفقرة الجاية ان شاء الله بعنوان #الجروح

ودلوقتى مع رابع فقرة عندنا من فقرات اسعافات أوليه وهى #الغيبوبة (Coma)
ازاى نتعامل مع حد حصلتله غيبوبة لا قدر الله.
أول حاجة لازم نعرفها هى يعنى ايه غيبوبة.
"الغيبوبة هى خلل فى وظائف الجهاز العصبى المركزى ، قد يكون هذا بسبب خلل فيه أو فى أى عضو من أعضاء الجسم يؤثر عليه."

وفى نوعين من الغيبوبة :

*أول نوع من الغيبوبة :
1- غيبوبة نتيجة ارتفاع نسبة الجلوكوز فى الدم :

*دى سببها : زيادة نسبة السكر فى الدم فى مريض السكر اللى مش بياخد علاجه بإنتظام.

*الأعراض اللى ممكن تظهر على المريض :
1- رائحة أسيتون فى الفم. (رائحة تفاح فاسد)
2- التنفس سريع وقوى.
3- النبض سريع وضعيف.
4- جفاف الجلد.
5- غور العينين.

*طريقة إسعاف المريض :
لازم أنقل المريض للمستشفى بسرعة علشان اديله أنسولين مائى بالوريد.

*تانى نوع من الغيبوبة :
2- غيبوبة نتيجة نقص نسبة الجلوكوز فى الدم :

*دى سببها : أخذ كمية كبيرة من الإنسولين لمريض السكر وعدم تناول الطعام بعدها.

*الأعراض اللى ممكن تظهر على المريض :
1- يشعر المصاب بضعف عام مع الشعور بالجوع.
2- عرق.
3- سرعة فى ضربات القلب.
4- اضطراب فى التفكير.
5- إغماءة مع حدوث تشنجات.

*طريقة إسعاف المريض :
لازم أنقل المريض للمستشفى بسرعة علشان اديله محلول جلوكوز بالوريد.

وبكده تبقى الفقرة الرابعة من فقرات اسعافات أولية خلصت. 💪❤️
استنوا الفقرة الجاية ان شاء الله بعنوان #النزيف

ودلوقتى مع تالت فقرة عندنا من فقرات اسعافات أوليه وهى #الاغماء (Fainting)
ازاى نتعامل مع حد حصله إغماء لا قدر الله .
أول حاجه لازم نعرفها هى يعنى ايه إغماء.
"الإغماء هو هبوط عام فى جميع أجهزة الجسم."

طب ليه ممكن يحصل للشخص إغماء من الإسباب اللى ممكن تخلى حد يغمى عليه
-الإجهاد
-الضعف العام بعد مرض طويل
-الانفعالات الشديدة

طيب ايه الأعراض اللى ممكن اشوفها على الشخص المغمى ؟!
الأعراض :
-إصفرار الوجه
-عرق غزير
-تنفس سريع وسطحى
-نبض ضعيف وسريع

أهم حاجه بقى ازاى اسعف الشخص المغمى عليه ؟
1- احط المصاب على ظهره وارفع رجليه لفوق علشان الدم يوصل للمخ كويس.
2- استعمل منبهات زى الشاى او القهوة لو كان المريض لسه فى واعيه.
3- مينفعش أدى للمريض أى سوائل عن طريق الفم لو مكنش واعى لازم يستعيد وعيه الاول وبعدين اديله.
4- ممكن استعمل محلول النشادر علشان افوق المريض.

وبكده تبقى الفقرة التالتة من فقرات اسعافات أولية خلصت. 💪❤️
استنوا الفقرة الجاية ان شاء الله بعنوان #الغيبوبة

ودلوقتى مع تانى فقرة عندنا من فقرات اسعافات أولية وهى #الصدمة (Shock)
ازاى نتعامل مع حد حصلتله صدمة لا قدر الله.
أول حاجه لازم نعرفها هى يعنى ايه صدمة.
" الصدمة هى حالة طارئة تنشأ من هبوط معظم الوظائف الحيوية للجسم نتيجة لنقص امداد أنسجة الجسم بالدم "
ودلوقتى هنتكلم عن أنواع الصدمات وهم خمس أنواع :
-النوع الأول :
صدمة نتيجة نقص حجم الدم ( Hypovolemic Shock )
تنتج نتيجة ثلاثة عوامل :
- فقد الدم بكامل محتوياته نتيجة النزيف.
- فقد البلازما نتيجة الحروق.
- فقد سوائل الجسم مثل القئ أو الاسهال أو ضربة الشمس.
-النوع التانى :
صدمة عصبية ( Psychogenic Shock )
ودى تنتج بسبب التعرض لمواقف مأساوية أو سماع أخبار محزنة.
-النوع التالت :
صدمة نتيجة للألم الشديد ( Neurogenic Shock )
-النوع الرابع :
صدمة نتيجة للحساسية ( Anaphylactic Shock )
ودى بتحصل نتيجة التعرض لمواد مسببة للحساسية ذى لسع النحل والبنسلسين وبعض الاطعمة.
والنوع دة تأثيره بيختلف من شخص لآخر.
-النوع الخامس :
صدمة نتيجة للتعرض للميكروبات ( Septic Shock )
ايه بقى هى أعراض الصدمات :
1- شحوب.
2- تلون الشفاه بلون أزرق.
3- زيادة العرق.
4- غثيان وعطش.
5- زيادة ضربات القلب.
6- زيادة معدل التنفس.
أهم حاجة بقي الاسعافات الأولية للصدمة :
1- تأمين الأكسجين ودة عن طريق فتح مجرى الهوا والتحكم فى النزيف لو كان فى نزيف.
2- وضع الصدمة : رفع قدمى المصاب أعلى من رأسه بزاوية 45 بحيث يكون المصاب مستلق على ظهره لأن ده بيساعد على تدفق الدم المحمل بالأكسجين لحد ما يوصل للدماغ.
3- تغطية المصاب ببطانية للحفاظ على درجة حرارته.
4- الاتصال بالاسعاف أو نقله للمستشفى بسرعه.
فى شوية ملاحظات مهمة عندنا فى الاخر :
1- مش ضرورى تبقى عارف نوع الصدمة أهم حاجة هى انك توصل أكسجين وتعتنى بالمصاب لحد ما توصل الاسعاف.
2- المصاب باصابة فى العمود الفقرى مينفعش تحركه خالص ولا ترفع رجليه لفوق.
3- مينفعش تدى المصاب أى طعلم او شراب وهو فى حالة الصدمة أو الاغماء.
وبكدة تبقي الفقرة التانية من فقرات اسعافات أولية خلصت. 💪❤️
استنوا الفقرة الجاية ان شاء الله بعنوان #الاغماء .