ايهاب عيال الظالمي || قصائد منبرية

أخي .. لِمَ الجفى
كفى .. هجراً كفى
هُنا .. قد ذقتُ أنواعَ العذاب

سولفتك ضوه ورديت .. خاف يسومك الأعمى
شميتك وشفت الگاع .. هذا حسين لو دمه !
شتسوي المرة من تشوف .. إعلى اخوها إزلام ملتمه

بس طلب منك من تلاگيني
شگد بچت عيني بوسني بعيني
الله يرحمك گالن ونزيت ..
ما گلت ميت گلت ناسيني


أخي .. لِمَ الجفى



بدّلت الحزن بالحيل .. وگعدت إبّاب المتانه
اشما مرّت يخوية عليك .. مرة محترگة ، هاي أنا
اوخر گلبك من الخيل .. واحطّن گلبي بمچانه

باين الضيم وگلت ما باين
إعتب عليمن والوكت خاين
غمض عيونك أختك وركضت ..
غمض عيونك بعد شتعاين !

أخي .. لِمَ الجفى



يحسين العطش وياك .. يسوه الماي والجربة
شفتك ميت بعيني .. خبر فرگاك شيچذبه
اليحب يموت من يشوف .. الناس تدوس اليحبه

گطعت انفاسي من إنگطع نحرك
عميه الخيول الداست بصدرك
غيّر مچانك بلكي يبن أمي ..
يسويها حظي الحافر يعبرك

أخي .. لِمَ الجفى


بيدك كلشي يا كلشي .. بس أصبع نقص بيدك
ظلّت بس عباتي وياي .. حتى من أبقى ما افيدك
اريدك ترجع لبيتك .. وانت الوادم تريدك

گالولي مات وگلت لا چِذبه
گدما نزف گلبك صرت خشبه
ياهوه مثلك گلي يبن أمي ..
مذبوح وعيونه اعلى اليحبه

أخي .. لِمَ الجفى


خفت من شفت اليضحكون .. وبسيوف الغرب عطرك
أعاين مو ذبح هذا .. مدري شصاير بنحرك
سويلي مجال حسين .. طلع السيف من صدرك

يالنمت بين الگاع والحافر
دارت وصاير تكسر الخاطر
خليت إيدي بإيدك وشفتك ..
بس تسع اصابع ليلة العاشر

الشمس طلعت لو فتحت عيونك
انا الحچايه الما جزيت اسنونك
خصم الحجي ما عرف اعيش بدونك

امدمّه الضوه ورجعت ظلام الوادم !
شهالنومه بحضان الخناجر نايم
طشو متونك طشة الحنطه بگاع ..
يالمنثلم لا گاعد و لا گايم
تتشاهد اختك من يمر
كتالك بجثتك يجر
جثتك گضت ظَل بس عطر
مخطوف لونك ما اگول شلونك
خصم الحجي ما عرف اعيش بدونك

من رخصة الـ خويه ارد اصيحك بسمك
ترست شليل الگاع غيمة دمك
من كثر ما جسمك مطشر بالگاع
وين ما اطيح انا اطيحن يمك
جا بيش احلفك يالنمت
من چتفو اختك ما گمت
وداعت رقيه اتبهذلت
يا نعمة الله بحافر يطشرونك
خصم الحجي ما عرف اعيش بدونك

انت الجنت فيّ هسه گلبك يچوي
يالغافي واختك ما درت شتسوي
ردت ارفع ايدي وزمخ بچفوفي السوط
من كل كتر مچتوفه خيمة بدوي
جيتك يعز من الظنّه
جيّة غريبه مدوهنه
امشي شبر واگعد سنه
وانا الگبل من خيمتي لمتونك
خصم الحجي ما عرف اعيش بدونك

يالمنطي كل شي الناس بيش تطلبك ؟
يبرودة الحِب والرماح اتشربك
مامش وجه عندك وبيك أحتاريت ..
تبقى على وجهك مچفي كلما اگلبك
جيتك اجدامي اتغالبن
من شفت أديك اتحركن
غلبتني الخيول و جزن
يا رجفة إيدي لمن يسحگونك
خصم الحجي ما عرف اعيش بدونك

اهنا يالگبل فيّ رمشك يسبّگلي
ما گتلي ابقي بالچذب ما گتلي
مو كلك انتَ وانا اجيتك كلي
مكسور ضلعك مدري جاي يصلي
اهنا يالأخذ كلشي وجزه
يغفه واصياحي يفززه
ما متت عگبك معجزه
لمّة الزاد من الثرى يلمونك
خصم الحجي ما عرف اعيش بدونك

مولاتي زينب تخاطب سيد الشهداء الحسين :


يالطشرتنا بخبر موتك
يالصحت حد ما راح صوتك
ومحد فزعلك من اخوتك
إگعد نواعي اختك تفوتك

لهالساعة أذكر ذاك الغروب
چم دوب أتاني الموت چم دوب
هوّه الگلب شتحطله ويتوب
ثاري المحنه إتعب الگلوب

ثاري الفراگ إهجام البيوت
بس گوم شوف شلوني وموت
يالمالك إخوه الرمح زاتوت
مگطوع راسك والهوه يفوت

يالبالع السيف إعلى ريجه
يالنايم بحفرة غميجة
شوف الگلب صاير حريجة
وجدمك جزه وضيع طريجه

هذا الحزن موش إعلى گدي
يا رب دخيلك هذا حدي
يبدي الغروب وشوگي يبدي
يگلولي ضيم وگلت عندي

إسمع اعتابي الجايبك جيب
البچي إعلى الميتين مو عيب
وداعت الباري اليعلم الغيب
ليلية دمعي يبلل الشيب

ما شِئتُ أن أبقى وحيداً كالغريب ..
صبراً لربِّ التائهين وما يشاء
أبكي وما نفعُ البكاءِ لضائعٍ !
لكنَّ عيني أمسكتْ كفَّ البكاء


غريب وماتو اهلي وربعي واحلامي
ثلث مرات عثرت اختي گدامي
عبرت على النهر والخيل تشرب ماي ..
رخيص الماي واغلى إنسان ظَل ضامي

شوگ وما اعرف شلون
اسمع صوت اليموتون

خوفٌ يحيطُ الضاعنونَ إلى الأمان ..
ما عادَ يرجو مُنقِذاً حُزنُ الغريق
ربّاهُ إنّي متعبٌ ، أينَ السبيل ؟
لا أدري فيما ينتهي هذا الطريق


تعبت من الگلت والگال وأنفاسي
وبقت تفتر أوجوه الماتوا براسي
يا شباچ ! أنه المخنوگ من الناس ..
خلصوا ناسي وأنا لهسه ما ناسي

حالة والدي حاله
و شابع نوم چتاله


شاءَ القديرُ وخيرُ ما شاءَ يكون
لكنَّ عمّاتي يخافنَّ العيون
قد أتعبَ العباسَ صوتُ صُراخِهن
كادَ يجرُ السيفَ في طرفِ السِنون

راد يگوم أبو فاضل و رجعوله
عاين خدرك بلا خيم گالوله
شال عيونه المغطيها دم وأتراب
وجابوا جثة التاريخ مشيولة

ولكن حكمة الباري
يزيد يچتّف أسراري

سحگت الظلمة بعيوني و اجيتك هَم
وأحتاريت وجهك لو ضوه ملثم
اشما عن وجهك امسح دم يظل بس دَم
موش أرماد ليش بجيسه تتثلم
رضيت انشاف و اطلع ركض و أتشتم
بس چتالك اگبال النسه أتبسم

يضحكون و يبچوني
مبري الذمة شافوني
مبري الذمة بس يحسين طگوني ..


وعلي ما ردت اعوفك لچن شفت الويل
عنك خوية شالني العلاوي شيل
أچتفاتي للعباس احبك حيل
يتربات الشمس واختك ترافگ ليل
عرفتك منطحن شميت ريحة هيل
و وصل من ثوبك مچلبه اعلى جدم الخيل

هاي حسين تاليتي
غرب ، واتمشوا ابيتي
متت شيطلع الدخان من ريتي


تعبت من الهضم ومناشغ السكتة
يا شيخ التنام اعلى التراب أخته
صعد شيب اعلى راسي الحچي الما گلته
يگلولي البگه براسچ واگول انتَ
حسبالي حلم ما اصدگ الشفته
وگفت اتلمس بگلبي گلت ميتة

اجيتك من رخص كلشي
خيمه مچتفه وتمشي
وعمه عيوني الرماد الواصل لرمشي


ثلث تيام دمك ما يريد يجف
دخيل الله الحسين على الرمل ينزف
كلما اتخيلك مذبوح أفز ارجف
ركض الخوف موش اركاض متلهف
على وجهه يوگع الماخوذ متچتف
لا تحلف بعد معذور لا تحلف

وحگ گلبك الما هوه
العمر بالضيم ما يسوه
الموگد مو بگد اجدامي يتچوه ..


يكل ناسي وخذو بالخيل كل ناسي
بميّة يا علي ما تنجر أنفاسي
هاي انا الوحيده وبالنسه تواسي
موش الشيب هذا حسين البراسي
انا التعبت انا ام عون إذا ناسي
أحسك منذبح شيچذب احساسي

ترضى أتوسل الغربة
لحد يوصل لگلبه
يالسحگوك واحنه نبوس بالتربة

بعد إستشهاد القاسم إبن الحسن ( عليه السلام )
مولاتي رملة تكلّم نفسها :

امن تبدت الحِنة رضـو للخيل اصير امتاع
الما ضايع من امه گبل جوه الحوافر ضاع
يبقى العزيز اليندفن وردة اعلى خد الگاع
ها يروحي .. ينسى تعبي
الچنت أصيحه .. يبـن گلبـي
انه رملة و ضاع دربي ، ها يروحي
ليش اعاتب .. و احچي بيمن
و انا گلبـي .. مدري عد من !
گومي اطلعي ارد اموتن ، ها يروحي

گتلچ يروحي اعلى التعب ركضة شلب للماي
عفت ابني نايم ع الرمل سوي الثواب افياي
الحلفولي يبقولي مشو هسه الغرب وياي
بيش ابشرچ .. كلها راحت
امن المدافَع .. روحي شاغت
احچي و ابچي اعلى النعافت ، ها يروحي
مطشر ابني .. بيش المه ؟
گلي "احبچ" .. هيَ چلمة
ابني يرجعلچ امدمَّه ، ها يروحي

زفة شمع للظلمة وديت الضحك و الـحيل
و القاسم اشما يبتسم تخزرني عين الخيل
بالليل الوج و اطلع من الخيمة و اجزه الليل
العمره ظلمه .. حزنه شوفه
و عينه تبقى .. اعلى اليعوفه
و جرحچ المـحد يروفه ، ها يروحي
الما نـسيته .. و لا نسانـي
مشه عني .. و ما خذاني
الشمعه عافيت الصواني ، ها يروحي

يجيبولي طاريه و افـز عشت الـعمر وياه
ما ادري ليش الما يجي ابقى انتظر ملگاه
ما ترهم الضحكة الي بس ترهم الـ "ويلاه"
انا گتلچ .. كافي منهم
فـارگـوني .. و فارگـتـهم
شـمعه يم شمعه عفـتهم ، ها يروحي
هذا گلبي .. و هذا حزني
ما عرفته .. و هـوه ابني
و اليحب عيني لچمني ، ها يروحي

شلت الضوه اعلى متوني ادور عن گمر مبيوگ
و الدنيا دارت بينا من شفت الورد مسحوگ
الفرگة و الغربة و ركضتي و طبتي اعلى السوگ
گتله كافي .. و گال اگعدي
يمه غيـرچ .. ياهـو عندي !
و گتله وي الفرگة نبدي ، ها يروحي
من الحوافر .. ابني ذابـل
وجهه غيمة .. اعلى السنابل
و انخطف لون الرسايل ، ها يروحي

لا تجرح النايَ لكي ..
لا ينزف اللحنُ دماً

الكلُ في الحبِ انظلم ..
لن تلقى فينا ظالماً

لا ، لم يكن حزناً فقط
بل كانَ موتاً دائماً

يا خِنجرَ الشمسِ كفى ..
طعناً بجثمانِ الزمن


لميته و سألت الظال مِنه
گتله شبهذلك ؟ گال المحنة

و گتله اشبعد يالشابع جروح
لِم دمك و خل نمشي و نروح
فـوگ الصـور يوميه مذبوح

چا مو هين .. للخيمة غريب يفوت
بس مبين .. مو اول مـرة تموت !

هضيمة تشوف واحد ياخذ هدومك ..
لهسه عيوني للباب و تشوفك جاي
ما لحگنا من الدنيا نشبع ماي

ندري احنه اذيناكم ..
بس ردنه نبقى وياكم ،
مو ترحون

چا بيش جازيتونه ..
ردناكم و عفتونه ،
ابلايه عيون



قلبٌ هوى وجهاً رحل ..
و احتارَ ما بين الصور

القلبُ في كفِ الهوى ..
كالطير في كفِ المطر

حين ارتوى شوقاً مضى ..
يبكي و بالشوقِ انكسر

للآن لا يـدري متى ..
تكسوه اوراقُ الشجر


لو ادري اكض گلبي و اگله
دنيا ابلا حسين تصير ذِلة

راح الخدر عگبك يالحسين
منين الدرب للمشرعة منين ؟
راح امشي چا محد نِشد "وين"

ترضون امشي .. و لا واحد يتانيني
باگـو كلشي .. انباگ الطيف من عيني

يبو السجاد ما رحمو ضعن گلبك ..
برجل الخيل اجه اعلى الخيمة چم اگماط
و احنه متون مستحية و اجونه اسياط

انحبكم و عاتبنه ..
و شفناها صارت مِنّه ،
ما تحچون

چا بيش جازيتونه ..
ردناكم و عفتونه ،
ابلايه عيون



الموتُ لن ينسى بشر ..
و الخوف مفتاحُ الأمل

كم من حبيبٍ ينتظر ..
حُلماً صغيراً قد رحل

هل فينا بعض خطيئةٍ !
او هل اصابكم الملل ؟

ذاكَ الحديث قد انتهى ..
و الرعبُ يسري في الجُمَل


عازت فزعتك يا خويه عازه
ارجـع حـتى لو تـرجع جنازه

كافي انتظر مشتاگه العيون
املاگه ردت مثل اليحبون
كثر الضرب ذبيت المـتون

ارجع لينه .. خذتنا الغربة مو كافي
طگ سكينه .. و تدري السوط متعافي

يحسيـن اليحبـك تـعبّو گلبه ..
بيش تفيدني عيوني و خذو وجهك
شوف وجوهم ما واحد يشبهك

ما گلنا منكم كافي ..
نشبع لچم و نوافي ،
و تلچمون

چا بيش جازيتونه ..
ردناكم و عفتونه ،
ابلايه عيون

الإمام الحسين يخاطب الإمام العباس ( عليهم السلام ) :


أخوي .. بس گوم وياي
أخوي .. ما لازم ماي


شمسويه الرماح بوجهك اغتاضيت ..
شيلمك والطعن ما خلّه شي ينجاس
الضحك واصل لسابع خيمه گوم وياي ..
چبيره عليه چلمت ميت العباس
أنه أدنيت و اتحرك طرف رجليك ..
و شبگتك گوه تتمضحك عليه الناس
اشيلك بيدي و يظل منك على الگاع ..
إذا تبقى على هاي النومه راح أنداس

إذا ما تمسح دموعي
الحوافر تسحگ ضلوعي


يبعد ارسوم اخوك شتحمل ارسومك ..
الحافر و السهم و الطين و الدخان
بلايه چفوف لو بس گلبك امشي وياي ..
يتعيّر تره التفزع وراه نسوان
من اشلع رمح تشهگ گلت بي روح ..
تعبت وياي بس منين اجيب إخوان
حتى الما يعرفك گال غلبه يموت ..
يشرب ماي گدامك المو عطشان

يعباس الزلم صوبين
و كلها تصيح اذبحو حسين


الرمح ماخذ مچاني وگاعد بگلبك ..
و نحرك بالسيوف الباتره امثلم
بحلوگ الحوافر سالفه العباس ..
ما ينشاف جسمك بس بقى ينشم
الملامح ذيچ داستها الزلم والخيل ..
دارت و إبن أبوك تعرفه من الدم
شاغت روحي من گالولي "فنه يگوم" ..
دعيت شگد گلت بلكي الله جاي أحلم

گالولي و صرت دخان
خطيه ما بقوله إخوان


وحگ عيونك الصارت مضيف اتراب ..
يدفنوني أريد بهيمت عيونك
شلونك گتلك و هزيت نحرك زين ..
أول تالي تتعب من الشلونك
الما يعرف يلوح اتعلم بصدرك ..
الرمح والمو رمح مشچوخ بمتونك
گد ما گاضي جسمك بالطعن والخيل ..
صاير ترهم بدرعك يشيعونك

متت عباس چا وانا ؟
أنا الخلصو اخوانه


يخوي الناس ما ترحم اليبقى وحيد ..
حتى الماله شغله يهف عليّه احجار
أنا اشوايت الله الستر موش بخير ..
التمو ع الخيم لمّت اليطلب ثار
طلعت زينب ولمّو ضحك و عيون ..
ركض و مچلبه بطراف العبايه النار
صرت شويه وانت التشگ ثوب العين ..
چفك جبته رهمه و گوم شوف شصار

أخيك أنا و يحلفك
اثاري هذا مو چفك

الامام الحسين يخاطب الإمام الحسن ( عليهم السلام ) :


أخي .. ما هـٰكذا الوداع
أخي .. مَشَيتُ في الضياع


الحگ طبو الخيمة .. و سحگو فوگ كل ذكرى
مو نسوان صارن نار .. جمرة تسحل بجمرة
يالبصغرك چنت غيمه .. اوجوه من العطش صفره
جرو اختي گدامي .. و أنا الما أجر حسره

الحگ يالحسن يا عازتك يمي
الحوافر صلفه گطعت سالفة دمي

أخي .. الموتُ لا يُباع


يبعد الناس و المو ناس .. انكسر مثل الغصن ضلعي
لو غربه اگول تهون .. كسرو خاطري بربعي
وگف گلبي و بقيت اركض .. گمت أنا و وگع دمعي
رادو مني بس محبس .. انطيت المحبس و صبعي

توصل للهدم ما حاسب احسابي
الله والرمل سترو على اثيابي

أخي .. حزنُ الحُسينِ شاع


تعلمت الكرم منك .. ما خليت شي مضموم
عفتني وانا المحسب .. بس وجه الله وانتَ تدوم
وكت والله اليوزع حيل .. يحط چفوفه يلا يگوم
وكت والساتر الدنيا .. ما ظلت عليه هدوم

وحگك من هوان الدنيا أنا انگاد
الدنيا بلايه چلمة خويه ما تنراد

أخي .. في خَيمتي جِياع


يالمتعود اعليه .. و انا عليك تعويدي
يالطولك يچمل الفيّ .. الشمس چوّت تجاعيدي
خفت لا تلمح الخنصر .. احط تراب فوگ ايدي
شني تنساني وانا ادري .. ما تنسى مواليدي

كل شي بروحي ما يشتاگ ما ردته
عزيز و فشله فاتحتي تظل سكته

أخي .. الشوقُ للنُخاع


انا الشايل الدنيا .. جنازه و ما لگيت اچتاف
من گد السحگ بالخيل .. من عندي رقيه تخاف
توصل يمي و تكضني .. زلمه و بس تراب انشاف
الحنين الما يعرف افراگ .. جوه الخيل ما ينعاف

تعبت بموتي ما طلعت الروح بساع
كل وصله بكتر مني ترست الگاع

أخي .. قلبي مضى شِراع

خلي يموت ..
حسين من الذبح تعبان ، خلي يموت
وحگ آخر نفس بحسين احب حسين ..
بس كافي سحگ بحسين خلي يموت
خلي يموت ..
كل شي بروحي يوجعني ،
ترس متروسة ريتي ارماد حتى النفس گوه يفوت
گضيت من التعب والضيم ،
امشي و اسمع يسألون زينب هاي لو تابوت
اليموت بلا تعب مبخوت
راح حسين والفرگة هجام بيوت

شمسويتله حتى يروح ؟
مشه امرايه و رجع مذبوح


ماكو أخوان ..
خير من الله عندي جروح ،
بس ما حصلت من نعمة النسيان
ماكو أخوان ..
عافوني و تهت وحدي ،
ردت منهم وداع "اسم الله" كل شي الچان
أول مرة اطلع وحدي شَندَل والدرب دخان
زلم ما تستحي و تتشمت بنسوان
چنت انتچي على العباس هسه انتچي على الحيطان

طلعت اركض و صاحو ناس
ركضت "شارب العباس"


ما شفتوه ..
سألت شگد على العباس ما شفتوه
أخو بگد الضوه و متعوب ،
آخر مرة شفته يسمي و يذبحوه
ما شفتوه ..
فتحت عيوني بالغربة
و كل من حاير بگلبه
و كل ما انكث هدومي تطيح اوجوه
ما شفتوه ..
أخوي يصيحلي و يدنّه و يسحگوه
مكروه السحگ مكروه

مالي غيره اي واحد
و ذبحتوه بگلب بارد


تعبت هواي ..
اركض والجمر ما يرحم الحفاي
الراح يهون ما عندي گلب للجاي
مبين من بعيد الجاي متشتم
زينب ما تطب السوگ هوه السوگ كلشي يلم
خفت ننباع ادعي ما يصح شراي
تعبت هواي ..
تعبت من العطش بس ما اريد الماي
و شمرو ماي حار علينا و حجار و شتايم توجع الميت
و الما عنده اخو يسكت

اسمي عرفته الحلوگ
الله اليستر من السوگ


كلشي يهون ..
گلت لخاطر العافوني أتعب بلكي يرتاحون
ابچي بلكت يضحكون
اموتن بلكت يعدلون
كلشي يهون ..
ازرگ من زراگ الماي عندي متون
أنه بعازة الـ خويه مشيت و ما رضو يحچون
رضو گدامنا يموتون
سمعت اشكال حتى السكتة عدها اسنون
هيچ أهل المحنة بساع يتغيرون

ماتو و احنا ظلينا
نتعير بأسامينا

متاني عاشور .. وأحسب من العام .. شگد گضيت ايام .. ما عفت دربي
متاني عاشور .. والدمع بالعين .. و من اگول حسين .. ينعصر گلبي

يحسين انتَ العرِف و الدنيا والغربه
و الما يحب من صدگ ما ينكسر گلبه
اعظم وطن حضرتك و اعظم دوه التربه
كتالك انتَ العذب مو انا اليشربه

يالعطشان .. و نساونه طبت ديوان
و سمعن حچي ما ينگال
بس نسوان .. بالعبي تشتم دخان
بس عبي ظَلّن و اخيال



ما ابطل دوم .. دمعتي و حزني .. حاشه تطردني .. لو همت يمك
ما ابطل دوم .. اسمك براسي .. لآخر انفاسي .. انا أصيح اسمك

ما عندي غيرك دفو من تبرد متوني
يلوموني چي ما عشت خلهم يلوموني
لو اموت من البچي لو يعمن عيوني
و استغفر من الضحك لو يوصل اسنوني

كل عمرك .. يعزب الحوافر صدرك
و تتلگه حزنك بدموع
ياهو يجرك .. عن الخيول يوخرك
راحت وي الخيل ضلوع



مو مثل الناس .. اضحك و أرتاح .. و انسى كل الراح .. من حزن عمرك
مو مثل الناس .. عايش بحزني .. الدنيا توجعني .. و البد بكترك

يالمالي غيرك ربع اتغرب بدونك
بعيوني أحلف چذب يحلفوني بعيونك
يا كون أضم ضحكتك عن اليحبونك
يذبحون كل البشر بس لا يذبحونك

مو مذبوح .. ما اصدگ حسين يروح
انت أعلى من كل ذباح
بيك جروح .. مو بس جسد لا بالروح
جوه السحگ ما ترتاح



لو ردت انساك .. روحي تكرهني .. و ظِلي يكرهني .. و التفت وحدي
لو ردت انساك .. چا اروح لوين .. ماكو مثل حسين .. غيرك شعندي

بگلبك ردت مو سهم انا التخليني
بنص الفرح لو يمر اسمك يبچيني
أتخيلك بالحلم مرة تلاگيني
ما اريد بس شوفتك كون الله ينطيني


الناس تلوم .. كافي سحگ بسك گوم
صدرك گضه من الخيل
ما مفهوم .. انت البچي الردته يدوم
متعوب و توزع حيل

أم البنين ( ع ) :


يحسين العتب شيفيد
الگريب لگلبي صار بعيد
گضت ذيچ الوعود
ردتك بس تعود

____

تانيني يا حزني .. طيفك متعبني
مني شبدر گد السهر صرت انحسب شمعة
چا محد يگلك .. گلبي يأشرلك
بگلبي حزن كسرة غصن دمعة تجر دمعة

ريتك اتعود .. ادعي ربي بدمع عيني .. ريتك اتعود
كون موجود .. يمه محد يبجيني .. كون موجود

كون تشوفك عيوني
و اضحك ع اليبچوني

يقرآن الخلود .. ردتك بس تعود

____

يا آخر احلامي .. اشما امشي گدامي
و اتوسلت حد ما شغت يا چلمة التعطلك !
وين الگه من عندك .. ديرة ضوه بخدك
و هجرك بده عركة نده يا ورده توصلك

وگفة الباب .. تهضم عيون اليتاني .. وگفة الباب
مامش احباب .. وبمكانك ماكو ثاني .. مامش احباب

ضحكتك تعرض بدربي
صحت حد ما وگف گلبي

يأول كل وجود .. ردتك بس تعود

____

يوليدي يا حبيبي .. ليش الهجر نصيبي
مدري شحصل چان النخل شامخ مثل طولك
بالفرگة بيتي ظلمه .. و مشتهيه چلمة يُمه
گلبي يحن صار الجفن ناگع يگلولك

مثلك منين .. چانت عيونك معاضد .. مثلك منين
مات الحسين .. واحد يشاور بواحد .. مات الحسين

متعوبة وعلي يحسين
مو زين الگطع مو زين

من تالي البرود .. ردتك بس تعود

____

امك تتاني عيونك .. يمتعب اليحبونك
تالي شصفه لونك طفه و اتبدت الگمرة
صار الحلم تردلي .. تبچيني كلما صلي
ضاع العمر عوف الهجر يالما عفت ذكرى

ابچي بالليل .. اختنگ وحدي و أعاتب .. و ابچي بالليل
خلص الحيل .. گلبي صاير چنه شايب .. خلص الحيل

الرسايل ناگعه بدمي
و احس شيبي جزه لحلمي

يالبنفسك تجود .. ردتك بس تعود

____

هو البعد مصيبة .. ياهو النسه حبيبه
اول عشگ و آخر عشگ و بس انت تلچمني
چا ما خذتني خيمة .. طيحت نده اعلى هيمه
طحت و گمت و اتعذبت غيرك منو يحبني

ولدي وياك .. ماتو و ما يرد موتك .. ولدي وياك
وين انساك .. أنا افك ريجي اعلى صوتك .. وين انساك

شگلك يا حزن عمري
چبيرة و منكسر ظهري

نمتو بلا لحود .. ردتك بس تعود

كافي .. مو گتله مبري الذمه
كافي .. بكل سالفه تجيب اسمه
يا گلبي يرضى الوادم يبچوني ؟
كافي عتب بطَّل يحب عيوني


يا گلبي أبد ما طاب الصواب
المن تدگ ما يندگ الباب
شباچ و أمشي بسِد التراب
حزنك دِمه ما غطّته اثياب

عافك .. يا گلبي چا شتسوي
عافك .. و الحچي البارد يچوي
اركض وراه حزّت بخاطر دربي
شيفيد التِوسِل بعد يا گلبي ؟



صار الگبل كل خوفك يصير
ينساك و تظل التصاوير
عطشانة بس ما عاتبت بير
ما ترمش عيون النواطير

وسفة .. راح وبعد ما يرجع
وسفة .. مو هيچ أنا اتودع
بهاي الحياه كلشي وصفاته ولونه
يگلولي يا لون احلى ؟ اگول عيونه


يالتنلچم لو صِدفة تنجاس
ضِخ دَم يگلبي وعوف الأحساس
مو كافي صرنا عِبره للناس
إهنا لو طحت لو نعمه تنداس

ادري .. اشما عمري تمشي إسنينه
ادري .. ما تحلف إلا بعينه
يا گلبي مو مرّت سنة و أتاني
يمتى تمل يمكن گدر ينساني


هذا الحزن من عيني لهناك
اشما اسوي ما ارتاح وياك
كل من يريد يعيش بجفاك
يا گلبي بأول لچمه ينساك

خوفي .. لا توصل و لا تصبر
خوفي .. بفراگي ما متغير
غير اليحبك يحچي لو عاتبته
چا ليش يتلگه الرسايل سكتة


يا گلبي امشي بچلمتي يوم
چم ليلة مرّت ما شفت نوم
گتلك گبل محد يظل دوم
ميت العيد شينفع الصوم

غربة .. كل عمري خلص غربة
غربة .. و كل من جروحه بگلبه
أنا الچنت يمه و وراه و بصفه
گد ما نسولف ما نلحگ نغفه

رثاء :


حَلّ الفِراقُ و قلبي صاحَ بعبرةٍ ..
أين السبيلُ و أدمُعي صارتْ سبيل
أبكي لأني لم أمُتْ من بَعدِكُم ..
يا مَن رحلتوا وليس ذا وقت الرحيل
ما كانَ في الحسبانِ تسرُقني القبور ..
زادَ اشتياقُ القلبِ والصبرُ قليل
أن أبقى حياً بالفراقِ خيانةٌ ..
لستم بقتلى من يظلّ هُنا قَتيل
إذ ما يمرُ الموتُ مَن عاشَ كتوم ..
قد ماتَ طوداً شامخاً موتَ النخيل
فرضُ الأخوّةِ أن اموتَ بقربكم ..
الدمعُ لا يكفي و إن نهراً يسيل
القبرُ كيفَ يضمُ حُسْنَ وجوهكم !
هذا الفؤادُ يأنُّ فالحِملُ ثقيل
يا حلوى روحي والحياةُ بِمُرِّها ..
من ليسَ عندهُ اخوةٌ يحيا ذليل
شوقاً يداي تحسست وجه التُراب ..
استيقظوا فالحزنُ لا يشفي الغليل
وجهٌ على وجهٍ يضيعُ بلحظةٍ ..
إلا وجوهً عاندتْ قلبي العليل
الذُلُ كلَ الذُلِ أن انساكمُ ..
و انا الذي مِن بعدِ مَن رحلوا نحيل

الإمام الحسين يخاطب علي الأكبر ( عليهم السلام ) :


ضميت گلبي بطرف ردني
بس ردت اگلك تعبتني


يبني بعد ما تصبر الروح
گالو "صلاة الليل" مذبوح
اسمك نواعي وصوتي مبحوح
مجروح كاسر گلب مجروح
امن الله العزيز ايخلي و يروح
نحرك عثگ والشامت يلوح
كونك ترد يا لون حزني

كل شي انتهى من ذيچ الايام
عشره وگضت لف گلبك ونام
الملگه البقى اعلى الله وع الاحلام
اشما احاول اجزه الشوگ گدام
و الميت ابنه شلون ينلام
انتَ عليه ادموع ما ضام
چا موتك ايضمونه عني

سوله الصبر عد اليحبون
كتال گلبي چلمت تهون
الوادم عجيب شلون ينسون
طيفك صدر ديوان العيون
لاگيني ملگه ارماح و متون
كون البچي يرد اليموتون
چا هسه شط يمشي على متني

يالوجهك ايصبرني ع الناس
تمشي و توزع شوگ و احساس
يا وجه ابوك و گلب عباس
مو گاع گلبي و هيچ ينداس
وجه وگفه يالنعمه تنباس
كلك رحت رديت بس راس
مخنوگ و الطف ما يهدني

گالولي مات و ودع الحيل
ينشال الحسين بفرگتك شيل
لا گالها الله اتدوسك الخيل
تترس الحافر ريحة الهيل
كون الله يكسر خاطر الليل
طگت دموعي بفرگتك سيل
ترس اذني چلمت ميت ابني

حميدة تخاطب والدها مسلم بن عقيل ( ع ) :

مو يمي عايش بيه
گبرك بعيد عليه


ينسمه و وگفت اعلى الباب چا يمتى تدگ الباب
عافيتي و ضواي وياك فوگ الناگه بس اثياب
وديت العتب بالريح يكسر خاطر الغيّاب
ينجاب اسمك و اشتاگ بس انتَ و لا تنجاب
محتار الگلب شيريد
احسك يمي وانت بعيد
امشي و تخط رجليه .. گبرك بعيد عليه


اجيت اتبده ملگه و شوگ بس انترس گلبي اوداع
جرو جسمك و فزيت عطرك كسر گلب الگاع
يتمشه على كيفه الموت للرايد يموت بساع
يواهس كل اليحبون صوتك بالموادع ضاع
يبويه شگد بچيت عليك
فز يالشوگك مبچيك
أدّنه بويه إليه .. گبرك بعيد عليه


يمسلم مو عتب بس عود اريد حچايتي تنبهك
اعاين للگمر و احتار احس هذا الضوه يشبهك
اطرد حلمي نص الليل اذا مو بالحلم وجهك
من فوگ القصر شمروك الله يعابي اليكرهك
وحگ ضلوع عمي حسين
يلچمني الحچي الـ بالعين
چا فوگ ما مسبيه .. گبرك بعيد عليه


بنتك كبرت على النوگ تحلم وجهك تشوفه
اسمك يبقى للتاريخ چويه بگصة الكوفه
من يروح اعز انسان يتعب گلبك بخوفه
يغلط و انتَ تتعذر إذا ما تگدر تعوفه
عايفني بگلب محروگ
يخلص سوگ اطب بسوگ
شيوصل المچويه .. گبرك بعيد عليه


يآخر چلمة بشفافي يأول طيف ما عفته
صحتلك والصدى يوازيك وانت التسمع السكته
يـ إنجيل المحنة شلون أبو و يفارگ إبنيته
كل شمعه انطفت بالخوف هذا الحچي الما گلته
تعبانة و ادوّر حيل
اون عليك نص الليل
عيوني تفز ليليه .. گبرك بعيد عليه

حبيب ابن مظاهر مخاطباً الأنصار :


لا يربعي ..
الموت قسمه و قسمة البيبان صفنة و صوت ريح
لا يربعي يموت فوگ الما عرف يمتى يطيح
كل من ايكض گلبه بيده
و يرسم عيون اليريده
باچر بيوم القيامة تسكت حلوگ المناير و احنا نتمشه قصيدة
لا يربعي اشما ثگل دم القميص يصير راية
احنا اول ناس تبدي من النهاية
احنا نفزع حتى الله يجازي ربعه
عركة العباس ما تحتاج فزعة
لا يربعي .. الخوف طيف و عينكم ذبحت النوم الليل من يتعب يدور گلب خايف
فشله ع الزلمة اليرد من الحرب والسيف ناشف
وين ما عد الله ظلمه عيونكم زفة نجوم ..
الزلمه زلمه اشما تحط بإيده ليل

لا يربعي ..
حسين چلمة گول للخايف يگول
حسين مو حي الله گاع و تركض عليه الخيول
لا يربعي الثورة ع الظالم خلود
نموت وي الشمس قاده و لا نعيش بذلة الظلمه جنود
حسين حسّب للبعيد
حسين گال التاج چذبه اتصنعه رجفات العبيد
لو تخضر "لا" بعيون اليذلك لو تظل كل عمرك اتجامل يزيد

لا يربعي ..
الدنيا للما عرف دربه
الموت للما گدر ياخذ ثار گلبه
اشما تضيگ الدنيا عدنا عيون عباس بكبرها و گلب الأكبر
و اليشوف حسين يصغر عمره بس عند الله يكبر
لا يربعي متونكم سفرة حنان
و اليخاف يرزقه عبد الله أمان
الـ "هسه" لو رادت تعيش تصير "چان"
هاي مو قسمه الخلود أعظم قرار
احنا ما دورنا فيّ يحمينا من ضكنا النهار
احنا عزبنا التعب بالـ استريح
الموت قسمه و قسمة البيبان صفنة و صوت ريح

الشمر ( لعنة الله عليه ) :


شفته ينازع و دامي .. دفعته و أصعدت فوگه
راد يموت مو بالسيف .. راد يموت من شوگه
دمه ترس وجه الطين .. حد ما يبست عروگه
شفت حرمة تأشرله .. اصابع چفها محروگة
تصيح و ما وصلني الصوت .. بالدخان مخنوگة

صاحت ع البقى منه ..
خلي يبطل الونه


گبل لا ينگطع نفسه .. گمت عنه و محنه هَب
ما ردته يموت بساع .. ردته بموته يتعذب
ذبحته گبل لا يحچي .. بقى على السانه اسم زينب
گلت الذبح مو كافي .. و فوگه شچم مهر يلعب
تطلع كون نساونه .. لازم خدره يتسلب

بخدره اليوم اذبحنه ..
خلي يبطل الونه


صحت ع الخيل جيبوها .. خلي اتشوفها اعياله
خليهم يشوفونه .. تدوس ضلوعه خيّاله
تطلع روحه بالهيمه .. غريب و محد بحاله
ما يتميز من الخيل .. جسمه ما ادري اخياله
خلي ابنه يشوف شلون .. يضحك حيل چتاله

روحه و رده داسنه ..
خلي يبطل الونه


خل يتعذب اگبالي .. و خل تشوف خلگ الله
مو بس هو اذبحه اليوم .. اذبح حتى عبد الله
تعثر أخته نص السوگ .. تتحسر الـ اسم الله
يا ضيم الغريب الراد .. يمشي و محد يعطله
صاحت زينب على النوگ .. ماني من البچي مبطله

خواته اليوم ماهنه ..
خلي يبطل الونه


كلشي بكيفي صار اليوم .. بشوري راحت ضعونه
عفته اعلى الرمل مگلوب .. ما ارضى يدفنونه
يعاين للضعن من راح .. مات و فاتح عيونه
احط سيفي على خد الگاع .. لو رادو يشيلونه
خلي الشمس تاكل بي .. خلي ينگلب لونه

التعب والضيم كتلنه ..
خلي يبطل الونه

إلى مسلم بن عقيل ( ع ) :


مسلم يا اعگال ورفعة الراس
يالعوزك شبر و تصير عباس
يبن عم الضوه و جدك القرآن ..
حدر اجدامك شگد روس تنداس

ولو بالطف و تعارچ .. چا هزيت الگاع


يدواس اليخوفن يا عفي الحيل
يالتستنگي بس الراچب الخيل
من طبيت ليها احتارت الناس ..
شنو هذا سواد عيونه لو ليل ؟

و ماكو اگبالك شارب .. من طريت الجيش


يا شيخ العرك يا غيض عدنان
بس مسلم الزلمه اگباله نسوان
من كضيت بيدك شارب الليل ..
احترگت روحه حد ما طلع دخان

حيد و مامش مثلك .. يا تربات حسين


يهزبر حتى طيفك ما لحگناه
انتَ بكل مچان اهناك و اهنا
يالتفتر مثل فرة الشواهين ..
المو وياك واگف الله وياه

عيونك سيف و باتر .. تذبح بالخزرات


يمسلم انت وين و جيشهم وين
ثلث ترباع من گلبك للحسين
و باقي الناس كلها بربع و يزود ..
گلبك دنيا مثله نحصل منين

من طعنوك بگلبك .. بالكوفة انطش هيل

الإمام الحسين ( ع ) :


اعذريني وگف گلبي .. بعد ما توگف اجدامي
درت وجهي و بقى گلبي .. طبت ناس لخيامي
احط اتراب بعيوني .. تنطگين گدامي

يزينب صعبة اغمض و التفت صعبة
برگبتي گتلچ و انا بلا رگبة


مرة و سبعين ألف زلمة .. الحچي بنص النحر يعرض
المصيبة مو مشي طلعت .. بت حيدر ركض تركض
ركضه من الخيم للعيب .. سوالف ما تريد تفض

من النار يا خويه العبي گصرن
الحمد لله انحنيتن ظلّن يسترن


يزينب ميت و حنيت .. تره المسلوب ما يسلم
ردت چي مستحي من الناس .. اغطي جسمي لو بالدم
جسمي بكثر ما مطعون .. بس ينجاس يتثلم

يختي افترت الدنيا و طحت تعبان
و تاليت الخيم وبالخيم دخان


شكض من روحي يوجعني .. ردت بس يگضي الأمنازع
اسم الله من الركض و الناس .. و اسم الله من الأمدافع
الينام على الرمل يتعب .. بس تعبني الموادع

حتى بموتي أتعب قسمتي و حظي
گضه نص نحري چا يمتى الذبح يگضي


صحيت من الوجع مچتوف .. و كل شي البيه يوجعني
ما اگدر احرك ايدي .. اتلمس شنو الناقصني
الرمح و السيف و الحافر .. مو هنه العتب هدني

شكثر بيه وجع ما يشفه من احچي
الدمع من نحري يطلع لو ردت ابچي


هالمرة الكسر بالروح .. مدري شلون يتداوه
اليعاين أخته يم الناس .. شيگدر بعد يتلاوه
المهر من يصعد ابنادم .. وي الگاع يتساوه

أنه فوگي المهر بس بالي يم طولچ
و سمعت الناس فنه يگوم گالولچ

الإمام الحسين يخاطب الإمام الحسن ( عليهم السلام ) :


يا تعبي و دلالي .. كون تشوف حالي


مشيت دروب أخاف امشيها من دونك
شصبر ! والحزن اكبر من عيونك
الحِمل أعمى يدوّر حايط متونك
انتَ الشيب باليتعب يشوفونك

أهلنا موش أهلنا
انسحگ صدر المحنة
عگب كل الجرالي .. كون تشوف حالي



وجهك يالحسن كل ساعة أشوفنه
كل ما اشوف دم يابس اعلى الحنة
احسك تسأل الما يعثر بحزنه
يا حافر دنت نفسه على الجنة !

شگلك يا ضحكتي
كسرت گلبي أختي
صحت وانت على بالي .. كون تشوف حالي



ردتك من ثگل وجه الهوه عليه
تگلي شبيك حتى يطيبن البيه
اسم زينب اليرهب صار مسبية
يفز الرمل من اتطيح علوية

ردتك بس شسوي
العتب والرمل يچوي
ردتك يا خيالي .. كون تشوف حالي



يخوي شگد حزن ما ردتك تشوفه
مغمض و احس مرّت شمس مچتوفة
الوكت نزلها من السمه للكوفة
معروفة و تغث عثرت المعروفة

و الراح شيرجعه
الغريب عيونه ربعه
ضعت بالغربة تالي .. كون تشوف حالي



ما جاي ابچي يا دنيا التبچيني !
الماي مقصر وهلطاح من عيني
مثل جسمي بعد ما تلتم اسنيني
جيّت شيب ما واحد متانيني

لو ترجعلي نفرض
أنا و گلبي نركض
ولا واحد بقالي .. كون تشوف حالي

إلى أمير المؤمنين علي بن ابي طالب ( ع ) :


اجيتك والمحنة تگوم و تطيح
يـ سنبل ما يهز ايده بگفه الريح
ايدك زرگة تمشي و تجي بتسبيح
يـ اول عيد يبچي اعلى المراجيح
يحيدر وجهك الخير
شجرة تربي كل طير


الله يعين گلبك وانت التعين
يـ تاج الدنيا ليش ترافگ الطين
چنت تمطر محنة اعلى المساكين
صلب للسيف گدام البچي تلين
گلبك للفرح صار
عشرة بير و اسرار


يا شيخ البوكتك مامش شيوخ
البشر رجلين كلهم وانتَ يافوخ
اتلمس گلبي دم براس مفشوخ
يا حرگة ابو المكتول و تفوخ
ترهم يا علي شلون
راس يصاحب متون


انت النعمة و التاريخ والحيل
گمر ما صاعد اعلى متون الليل
ظهر ما عدها حتى اتحملك الخيل
عطش متروس گلبك والوجه سيل
انت العطش والماي
اكثر مني وياي


يا عثگ المحنة الدوم مگطوف
يـ حتى من تغمض عينك تشوف
يالمديت سفرة و مدوا چفوف
بس شبعوا اندارو يمك سيوف
مثلك ما يصح دوم
حلم ما رافگ النوم

السيدة زينب ( ع ) :

يحسين التعب وياك يسوه الناس
عشر سنين من الخيمة للعباس
عطرك نكث إيده بمشية الدخان ..
الأترف من حچي البستان ما ينداس
غريبة شلون انسى
التعب مرات ونسة

اباوع من وره الخيمة و اريدك راي
بچيت عليك حد ما يبس ريج الماي
بصلاة الليل ادعي يطول عمر الليل ..
شفت عباس رايح بس اگولن جاي
كلشي راح كلشي
مدري شلون امشي

يرب جروحي باهلت البلاسم بيك
أنه الزعلانة و التعتب و التراضيك
ربيت السراب الترس عين الگاع ..
هضيمة الجاب عمره يضحكك يبچيك
أتاني شگد أتاني
لما خضّر مكاني

كل شي بگلبي يتنفس حزن فرگاك
مو بس الله حيلي و ضحكتي وياك
يكون أرهم رمل حتى على گلبي تنام ..
عيونك ثوب يوسف اصغر بملگاك
كون الشيب اگله
افراگ حسين ذلة

بعد بيه حزن ما شربته عيونك
الزعل مثل الذنب ما واصل متونك
الوعود أغصان يكسرها الوكت والريح ..
العتب مو حافر و يكسر ضوه سنونك
بطرگ چلمة خطيه
انت و دمي بيه