الجيش الابيض

مرحبا 🌚🩺

سوري ع الانقطاع الطويل كانت فتره امتحانات 🤍… الكسور خلص بعد ما انشر عليه بالوقت الحالي حاولت انشر مواضيع هواية قدر الامكان بس هذا الي كدرت انشره 🥲 وهنا جمعتهن https://t.me/Dr_ar19_2/57

من اليوم ان شاء الله نبلش ننشر مواضيع باطنية (قلبية ، تنفسية ) 🫁🫀🩺


#جيش_الابيض 『 @Dr_ar19 』

{متلازمة النفق الرسغي carpal tunnel syndrome }
قبل كل شيء اسمه (نفق) عود يشبه النفق الي يمر بي قطارات وسيارات 🚇
(رسغي ) لان موجود بالرسغ
فهـسه النفق الرسغي هو نفق موجود براحه كف اليد 🤚🏻

هـل نفق تحيط بي عظام الرسغ من جهه ومن جهه ثانية الاربطه مال اليد (مثل الصورة )
داخل هذا النفق يمر عصب اسمه( median nerve ) بالعربي اسمه( العصب الاوسط)

هذا العصب مسؤول عن الاحساس براحة كف اليد وحركة اليد وحركة الابهام ويغذي الإبهام وإصبع سبابه والأوسط ونص اصبع البنصر (half of ring finger )

اذا صار التهاب ع سبيل المثال هل التهاب يصير بمنطقة مغلقه ما بين العظم والاربطه فـ العصب راح ينجعص وينضغط
من صار ضغط على العصب راح يصير خدر وتنميل براحة اليد وبعدين ممكن تتطور الى ضعف بـ قبضه اليد

التكملة باول تعليق ☃️

فهـمت ؟حـط ☃️☃️☃️

#جيش_الابيض 『 @Dr_ar19 』

نسولف على هشاشه العظام شوية 🐣✨

المريض يجي يكول عندي هشاشه موتتني ، سويت تحليل d3 وطلع بي نقص يعني عندي هشاشه الخ…❌
الهشاشه متسوي اعراض ، العرض الي يجي بي المريض هو مضاعفات

يعني الاعراض مال هشاشه هي مضاعفات🪿✨
مثل الكسور ، يعني مثلا قبل كم اسبوع بالاستشارية شفت مريضه جتي كالت دكتور اني بالسوك تخربطت ووكعت بالكاع وصارت عندي كسور

مريضة ثانية دكتور جريت مجمده وانكسرت فقراتي

مريضة ثالثة دكتور عندي كحة قويه وصار وجع لا يحتمل بظهري الخ…

فـ بالعادة أحنه إذا نجر مجمده او نسقط بالارض متسويلنا هيج كسور

👵🏻النساء بعد سن انقطاع الدورة اكثر عرضه للإصابة بالهشاشة من الرجال ليش؟؟
التكملة اول تعليق 🐣✨ ، فهمت حط ☃️


#ألـجـيـش_الابـيـض『 @Dr_ar19 』

💗طفل عمره 9 سنوات اجه للطوارئ لان وكع ع ايده هو ومادها اثناء لعب الطوبة⚽️
فـ اجه للطوارئ لان عنده الم قوي +تشوه(deformity) بيده مثل ما واضح بالصوره …

💗هذا النوع من الكسور شائع جداً واسمه (كسر كوليز ) (colle's fracture ) يجي بالقصه الي ذكرتها وكع وهو ماد ايده يعني عود حتى يسند جسمه او يلزم الكاع وهـيج شي على ايده فـ يصير كسر بعظمة اسمها radius 🦴 (صورة رقم 1)

💗راح يصير تشوه بيده لان العظمة نكسرت نص بقه مرفوع ونص ثاني نزل جوه (صوره رقم 3 ،2)
هذا التشوه يشبه شوكة الطعام (چطل)🍴 يسمو “dinner_fork deformity “


التكملة اول تعليق ، فهمت حط ☃️☃️

#كسور
#جراحه

#ألـجـيـش_الابـيـض『 @Dr_ar19 』

🦶🏻اليوم شفت طفل عنده Club foot ما اعرف شنو يسمو بالعربي …

👣 بس هو شلون التشوه او الخلل الولادي ويعتبر شائع كُلش
وحده او ثنين من أقدامه تنحني وهـيج عبالك معوجه للداخل

👣السبب مالتها غير معروف ،بس هو شنو بالتطور الجنيني يعني من ينمو الطفل وهو داخل الرحم باطن قدمه يكون هيج للداخل مثل الصوره وشويه شويه اثناء النمو قدمه تنمو وتصير طبيعيه حالها حال اي قدم ، يعني باطن القدم يرجع ينزل

👣بحال إذا التطور او النمو مال القدم توقف ، ليش توقف ؟ محد يدري المهم توقف فـ راح ينولد بهل خلل يعني رجله تبقه عوجه للداخل

👣شلون اشخصه ؟ مبين يعني 😂 هو تشخيصه سريري
الاشعه بالعادة بحديثي الولادة تكون مو كُلش مفيده لان العظام بعدها ممكتمله النمو ، بس تفيد من يتقدمون بالعمر حتى نقيم الحاله اكثر …

اول تعليق ، فهمت حط ☃️☃️

#كسور
#جراحه

#ألـجـيـش_الابـيـض『 @Dr_ar19 』

✨واحد من اكثر الكسور شائعة هو (كسر گليازي) ‏galeazzi fracture ✨

🦴يجيك المريض العراقي واكع هو ويركض هو ويلعب طوبه وهو وواكع من سكلة بناء تزحلك ووكع مرته كشفته متزوج عليها ودفعته ووكع (ذني الي يجون بيها المرضى العراقيين والي شفتهن 😂) من تسأله شلون وكعت ايدك شلون صارت يمثلها الك مثل الصوره
(رقم 1 ) يكلك هيج صديت الكاع او حطيت ايدي ع الكاع

🦴هذا الكسر مو بس كسر وانما يشمل (كسر +خلع ) 🦴

🦴(صورة رقم 2)باليد عندنا عظمتين عظمة صايره باتجاه اصبع الإبهام اسمها Radius
العظمة الثانية باتجاه آخر اصبع صغيروني اسمها ulna

🦴ذني العظمتين لازم وحده تچلب بالثانية فـ يرتبطن مع بعظهن بـ joint (مفصل )اسمه rido_ulnar joint (قاعده ثابته احطها ببالي كل عظمتين يلتقن يسون مفصل )

التكملة اول تعليق ، فهمت حط ☃️☃️

#كسور
#جراحه

#ألـجـيـش_الابـيـض『 @Dr_ar19 』

اليوم بالردهات شفت طفل ما اتذكر عمره شكد 😂 بس عنده DDH
شنو هو الـ DDH ؟

🦴الصوره الي على اليسار …اني عندي عظمه الفخذ بيها شلون الراس هذا الدائري (head of femur ) هذا لازم يكعد بالحوض بتجويف acetublum
فهسه اني وانت وكلنا الحوض مالتنا ثابت لان هذا التجويف يحتاج good head (راس جيد ) و good acetublum (تجويف جيد ) فـ احتاج تجويف جيد حتى يكعد بي الراس مال عظم الفخذ بشكل جيد حتى يحفز النمو مالته بمرور الوقت بشكل طبيعي


🦴الصوره على اليمين …اني ممكن تصير عندي مشكلة بلـ راس (head ) مثلا خلع يعني الراس مكاعد بالتحويف مالته فهنا الـ head مراح ينمو بشكل طبيعي كذلك التجويف acetublum راح يصير بس ضمور

او ممكن اني الراس head كاعد بمكانه طبيعي بس الـ acetublum التجويف هيج ممجوف كُلش بحيث يلزم الـ head بشكل جيد فـ (head )الراس ماكو شي يلزمه فـ راح يبدي يطلع من مكانه

التكملة اول تعليق ☃️☃️☃️

#كسور
#جراحه

#ألـجـيـش_الابـيـض『 @Dr_ar19 』

✨Fracture of patella
بالعربي يسموها الرضفه بالعراقي يمكن يسموها صابونه (صوره رقم 1 ورقم2 )

شاب لاعب كرة قدم ⚽️ تعرض لاصابة اثناء مباراة ورا ما وگع مباشرة وكعه قويه على ركبته 🎀، صار عنده الم قوي مكدر بعد يوكف على رجله ورمت وورا نصف ساعه هيج شي بدت تظهر كدمات زرقاء 😭

الم وتورم والكدمات ذني كُلهن دلاله على وجود نزيف او تجمع سوائل بسبب كسر واكيد الحركة راح تكون محدوده عنده😶

(صورة رقم 3) هاي الصابونه تچلب بيها (tendon )أربطة هاي تخلينا نمد قدمنا بشكل مستقيم يعني (Extension of the Knee) وهم تنطي ثباتيه للركبه
فـ إذا چان صاير تمزق بيهن المريض مراح يكدر يمد رجله بشكل مستقيم واذا لا يكدر معناها ماكو تمزق (المريض مچان يكدر يمدها )

والتكملة اول تعليق💕💕

#كسور
#جراحه

#ألـجـيـش_الابـيـض『 @Dr_ar19 』

💙من كيسات اليوم الي شفتها
رجال عمره 38 سنة مسوي حادث (RTA)
عنده ربو ، ضغط ، سكر
PMH:DM, HT, asthma

💙سووله اشعه هاي مبينه كسر بـ عظمة الفخذ femoral shift fracture
المريض اجه :رجله المكسوره قصيرة اقصر من السليمة ، طالعه للخارج ، متشوهه، مزرقه كدمات يعني ، منتفخه (swelling )لان صاير نزف (soft tissue bleeding )

💙الحل اكيد اني كـ طوارئ اول شي اسويله ABC

1️⃣A: airway…اتاكد خاف اكو شي بحلكه سادلي المجرى الهوائي مالته مثل دم او سنون مكسوره فـ احجي ويا حجي شسمك تكدر تحجي الخ… إذا كدر يحجي يعني مابي شي إذا لا فـ انظف حلكه

2️⃣B:Breathing
التنفس اتاكد المريض يتنفس لا اباوع ع صدره ، انطي اوكسيجن إذا احتاج (اكو حالات ميفيدها الاوكسجين اسويله chest tube )

3️⃣C:circulation الدورة الدموية
اشوف نبض مالته شلونه كافي لا هو طبعا كسر وحادث ودنيا مكلوبه اكيد هنا يحتاج دم وسوائل وريدية IV fluid

التكملة اول تعليق ، فهمت حط☃️☃️☃️

#كسور
#جراحه

#ألـجـيـش_الابـيـض『 @Dr_ar19 』

منشور سريع خفيف معلوماته خفيفة سهلة ✨✨

بما ان الشتاء قرب❄️والأمهات يبدن يفرشن البيت 🏠 فـ هي وتشيل وتحط بالغراض والفرش اصبع القدم ينضرب بشوف شنو راح يصير عندها الم بس مراح تهتم وراح تكمل يومها طبيعي …بس وراها راح تشوف الالم يزداد عندها ويمتد شويه ع رجلها
تشوف تورم خفيف بالإصبع ، تشوف متكدر تمشي او تلبس الحذاء ، كدمات زركه تبدي تطلع ورا كم ساعه

بعد الإصرار من قبل الأبناء انو تزور طبيب قررت الام واخيراً ثاني يوم تزور الطبيب
سوالها اشعه (x ray ) تبين كسر
العلاج سهل وبسيط نلف الاصبع بشريط ويه الاصبع الي بصفه( strapping)
نبقي لمدة أسبوعين او 4 وهاهيه يرجع طبيعي


عاشوا عيشة سعيدة باجر قصة جديدة ☃️☃️☃️

#كسور
#جراحه

#ألـجـيـش_الابـيـض『 @Dr_ar19 』

سارة طالبة طب مرحلة اولى قررت تكشخ كشخه قويه وتلبس حذاء كعب 👠 هي وتمشي نلوت رجلها للداخل (مثل الصورة ) ووكعت وصاحت (اخ رجلييي)😩

صديقاتها التمن عليها ها يمعوده سلامات كومي كومي مابيج شي (اكيد وحده من صديقاتها خربانه ضحك😂 )هاي متكدر تكوم يعني متكدر ترتكز ع رجلها تأذيها كُلش خطوه وحده متكدر تمشي

انتَ او انتِ طالب/ة طب مراحل متقدمة (وممكن مراحل أولية بس متابعني 😄😄) تجي شبيها سلامات شلون وكعتي
هي :نلوت رجلي
انت :شلون نلوت للداخل لو للخارج؟ هي : لا للداخل

تشوف قدمها هاي مورمه وبسرعه صار زراك ،كومي يمعوده تكلك ما اكدر خطوه وحده ما اكدر امشي فـ تحط ببالك هنا احتمال تمزق بالأربطة (نستثني الكسر بالأشعة )

التكملة اول تعليق ، فهمت ؟تفاعل بـ⛄️⛄️⛄️

#كسور

#ألـجـيـش_الابـيـض『 @Dr_ar19 』

علي، شاب عمره 30 سنة، يشتغل عامل بناء. بيوم من الأيام، وهو يشيل قطعة ثقيلة مال طابوك حس فجأة بوجع قوي بظهره، وكع او كعد بالكاع ميكدر يوكف زين.
راح على طبيب، وهنا بدت رحلة التشخيص والعلاج

العمود الفقري متكون من فقرات ، الفقرات هي عظم ، العظم صلب فـ خوما رب العالمين يحط عظمه فوك عظمه يسفطهن تسفط طبعاً لا ،شلون نتحرك إذا هيج ؟
حط بينهم قرص فقري او يسمو غضروف او دسك
إذا نجي نفصخها راح نشوفها تتكون من :

🩵طبقة خارجية قوية ليفية (Annulus Fibrosus) الي باللون السمائي

🩷بداخلها مادة جلاتينية(Nucleus Pulposus) الي باللون الوردي هاي من خصائصها تكون محبه للماء تحب السوائل يعني تمتص السوائل حتى تبقه مرنه ونكدر نتحرك براحتنا
بالشباب والصغار بالعمر مثلي ومثلكم عندنا تكون رطبة ومليانه سوائل ، بس كل ما نتقدم بالعمر تبدي تنشف بالتالي تقل مرونتها 😢

التكملة راح تكون اول تعليق ، بحال فهمت حط ⛄️

#كسور
#جراحه

#ألـجـيـش_الابـيـض『 @Dr_ar19 』

مره عجوز 👵🏻عمرها 65 سنة عندها ربو وتستخدم ستيرويد للربو ، اصبع قدمها نضرب بالكاربت ووكعت وجتك للعيادة بكرسي متحرك تشكو من الم هيج قريب من الحوض (مثل الصورة بالضبط ) وجها جان عريض وسمين عبالك گمر 🌚
فـ اولادها كالولك دكتور/ة والدتنا عثرت ووكعت وبعد متكدر تمشي تتألم

كبار السن بالعادة يصير عندهم Osteoporosis (هشاشه عظام )

1️⃣خصوصاً النساء بعد سن انقطاع الدورة الشهرية لان الهرمونات مهمة لصحة العظام وحتى تمنع هشاشه العظام فـ بعد سن إنقطاع الدورة العظم راح يبدي يهش هاي نقطة

2️⃣نقطة ثانية هي جتك تستعمل ستيرويد(مثل الكورتزيون وجماعته ) هذا بحد ذاته بالاستعمال طويل الامد يسوي هشاشه بالعظم بواسطة طرق :
الاولى 👈 تقلل من نشاط الخلايا الي تبني العظم (Osteoblasts)وتمنع تكوينها
الثاني 👈تزيد من نشاط الخلايا الي تهدم العظم (Osteoclasts) وتحفزها
الثالث 👈 يقلل من امتصاص الكالسيوم عن طريق الأمعاء ، يعني انت تاكل اكل بي كالسيوم وتاخذ ستيرويد بدل ما جان الكالسيوم تمتصه الامعاء كلها هنا نصه راح تمتصه

💙كُل هل عوامل اجتمعت وخلت تصير عندها هشاشه بالعظم بالتالي من اقل وگعه او عثره راح يصير عندهم كسر
واشهر كسر يصير بالكبار بالعمر وشائع جداً هو (femoral neck fracture )

📌التكملة بأول تعليق ، إذا فهمت حط ⛄️⛄️

#كسور #جراحه


#ألـجـيـش_الابـيـض『 @Dr_ar19 』

شخص واكف عدل 🧍🏻‍♂️🧍🏻‍♂️ واجته سيارة 🚗 كباله عدل عليه ضربته من الامام ع بطنه هيج جوه السره يعني ع الحوض

فـ شراح يصير ؟
1️⃣اول شي الحوض عبارة عن عظم يرتبط مع بعضها بواسطة أربطة (ذني الي لونهن ابيض )
واحد من الأربطة الي هو اول واحد يتمزق (‏Symphysis Pubis)
🔖(رقم واحد مؤشر بالاحمر )هذا اضعف واحد بيهم فـ هو صاير بالواجهه فـ تمزق فلتت العظمتين عن بعضهن
شوفوا اول صورة

2️⃣منو راح يتلكاها ويلزم العظمتين ؟ قابل راح تبقه تايها هيج اكيد لا رب العالمين خلقه مليان اربطه
فـ راح يلزمهن للعظمتين اربطه ثانية وهي (anterior sacroiliac ligaments)
🔖(رقم ثنين مؤشر بالأحمر ) بحال كانت الضربة قوية فـ حتى هذا يتمزق ، شوفوا ثاني صورة فوك

التكملة اول تعليق ، فهمت حط ⛄️

#كسور #جراحه
#ألـجـيـش_الابـيـض『 @Dr_ar19 』

🐠انت طبيب/ة واجاك رجل عمره 45 سنة يشكو من أصابعه يكول اني صارلي بالخمس سنوات تقريبا أصابعي هيج يبيضن ويخدرن ويصيرن مؤلمات وتزداد عندي من اتعرض للبرد

🐠نلاحظ يد المريض نشوف ايده يابسه وشلون الي متصلبه وتلمع (إذا شايفين الناس الي يتعرضون لحرق شلون تصير ايدهم بدون تجاعيد وخطوط وهـيج تلمع )
تباوع ع وجهه هذا هم بي تجاعيد وخصوصاً حول منطقة الفم وهـيج تشوف فمه مفتوح شلون حلك السمجة 🐠 تشوف خشمه طويل ونحيف
تشوف وجهه بيها هيج نقاط صغار حمر

🐠تسأله حجي عندك اعراض ثانية ؟
راح يكلك لا والله يا دكتور هاي بس هيج معدتي مو زينه
شبيها معدتك يابه ؟
حموضه ترجع ويصير عندي جالي وهم مرات عندي صعوبة بالبلع ما اكدر ابلع اللگمه


التكملة اول تعليق ، فهمت حط ⛄️⛄️

#مفاصل #روماتولجي

#ألـجـيـش_الابـيـض『 @Dr_ar19 』

احمد طفل عمره 3 اشهر جابته امه وجتي للعيادة بسبب:
🦋 ملاحظه إن طفلها يصير لونه أزرق بعد ما يبجي بالخصوص الشفتين والأصابع

🦋 تكول من ارضعه يختنك احسه ويزرك وتكول مرات يبجي لفترات طويلة وهم دكتور تنفسه سريع وعميق هيج يسحب من كل صدره الهواء ومره من بجه زرك وفقد الوعي

🦋دكتور هم شوف شكل اظافره احسها مو قانونية

❤هسه بناء على الاعراض والفحص السريري(بالسماعة الطبيب يسمع صوت murmur ) فالتشخيص يتجه نحو رباعية فالوت (tetralogy of Fallot)

❤الدكتور بلش يشرح للأم شنو هي :عبارة عن تشوه خلقي بالقلب يتكون من 4 مشاكل هاي المشاكل تتضمن:
💔Pulmonary Stenosis ....تضيق الشريان الرئوي

💔Overriding aorta....الابهر الراكب

💔VSD....ثقب بالحاجز البطيني

💔Right Ventricular Hypertrophy...تضخم البطين الايمن

🌟🩶شهد شنو هاي كُل شي مفهمنه وضحي أكثر

🐱التوضيح بأول تعليق ، فهمت حط ☃️
#باطنية
#قلبية
#جراحه

#ألـجـيـش_الابـيـض『 @Dr_ar19 』

💡مريض عمره 60 سنة اجه يشكو من وجع بركبته مستمر ويكول دكتور ما اكدر امشي خطوتين رجليه تموتني يزداد عليه من امشي وهاي دكتور شوفه عينك رگبتي مورمه وحتى ما اكدر أحركها براحتي
هم دكتور من أحركها اسمع صوت طگطگه وهاي بالفتره الاخيره خلف الرگبه صار عندي انتفاخ وطلعتلي هيج تنفوخه

↖️السوفان osteoarthritis#
شوفوا الصورة اليسار ، العظم (لونه ابيض) يغطي غضروف (لونه سمائي )

☁️الغضروف مادة ناعمة لينه تغطي العظم وتعمل شلون الوسادة تحمي العظم من الصدمات وتمنع احتكاك عظمه بالثانية

☁️بداخل هذا المفصل اكو سائل زلالي لزج يساعد بحركة الغضاريف فوق بعضها ويغذي الغضروف واله وظائف هوايه

☁️بمرور الوقت والتقدم بالعمر والوزن الزائد والعوامل الهرمونية والوراثة هذا الغضروف الي يغطي العظم راح يبدي يتأكل فمن راح الغضروف بعد ماكو شي يغطي العظم فـ العظمات وحده راح تطخ بالثانيه اثناء المشي والحركة فـ راح يصير الم قوي لا يحتمل

التكملة اول تعليق 🤍 +فهمت ؟ حط ☃️☃️☃️

#مفاصل
#روماتولجي
#rheumatology

#ألـجـيـش_الابـيـض『 @Dr_ar19 』

🎀مريض عمره 28 سنة اجه للطوارئ بعد ما وكع من البايسكل وهو يحاول يحمي نفسه ويسند نفسه من الوكعه فـ مد كف ايده وسنده ع الكاع ومن وكع سند نفسه ع ايده فكل ثقله ع ايده صار فـ كام يحس بألم جداً قوي حول الابهام ومعصم ايده

👨🏻‍⚕️:شلون صارت الاصابة ؟

👱🏼‍♂️:والله جنت راكب بايسكل ونزلت هيج من شارع منحدر وتزحلكت ورحت للگاع وايدي جانت ممدوده اول ما وكعت وحسيت بألم قوي دكتور لحد الان ديأذيني

👨🏻‍⚕️:خل اشوف (المكان منتفخ وصاير ع زراك)
تكدر تحركها ؟

👱🏼‍♂️:لا دكتور حتى ما اكدر الزم شي من احرك ايدي توجعني

👨🏻‍⚕️:يضغط على منطقة السناف بوكس ويباوع ع وجه المريض

👱🏼‍♂️:اخخ😖😖😖

👨🏻‍⚕️:التشخيص #scaphoid_fracture كسر بعظمة السكايفود بالعربي يسمو عظمة الزورقي عود شكلها مثل الزورق صايره

🎀والتكملة اول تعليق ، فهمت حط☃️☃️☃️

#كسور
#جراحه
#ألـجـيـش_الابـيـض『 @Dr_ar19 』

🧕🏻هاي اكو ام طالعه هي وطفلها لمنتزه والطفل يركض يريد فـ الام جارته من ايده

👶🏻فـ ابنها كام يبجي وأيده كامت تأذي وميكدر يحركها

🧕🏻جتي الام للمستشفى :دكتور ابني ايده توجعه من سحبته قبل شويه وميكدر يحركها ما ادري شبي

👨🏻‍⚕️:خل اشوف (يلاحظ ايد الطفل ممدودة وميكدر يحركها ويخاف ) يحاول يتأكد اكثر ينطي شي بيده السليمة يكله هاك الزمها يلزمها ، ينطي بيده الثانية يكله هاك الطفل يخاف يحرك ايده وميلزمها

✅ثبت التشخيص (pulled elbow ) ، (المرفق المسحوب ) ومن الحالات الشائعة بالأطفال


💡التكملة اول تعليق ، إذا فهمت حط ☃️
#كسور
#جراحه

#ألـجـيـش_الابـيـض『 @Dr_ar19 』

💛واحد من اكثر أنواع الكسور مال الاطراف العليا شائع هو كسر عظم الترقوة clavicle

💌هذا يصير نتيجة وكعه وانت ماد ايدك 🎀، هو اكيد من نوكع راح نستند ع ايدنا فـ احنه ونمد ايدنا ونسند نفسنا القوة مال الوكعه وسنده الجسم ع اليد كلها راح تنقل للكتف وتسبب كسر بعظم الترقوة ، او يصير نتيجة ضربه مباشرة ع الترقوة

💌الترقوة اقسمها 3 اقسام جزء قريب من يم الصدر وجزء بالنص وجزء قريب يم الكتف فـ اكثر نوع شائع هو الي يصير بالنص

💌بالنسبة للأطفال فـ العظمة عندهم تنعوج بس متنكسر بالعراقي نسمي( فطر بالعظم ) (greenstick fracture) كسر الغصن الاخضر
سمو هيج لان شايفين الغصن مال وردة او شجرة يكون هيج رقيق ومن نجي نحاول نكسره مينكسر كله ، ينكسر من جهه وحده او من صفحه وحده فهنا نفس الفكرة

💌بالبالغين لا ينكسر وينقسم قسمين قسم يطلع للخارج والقسم الثاني للداخل

📌التكملة اول تعليق ،تفاعل ☃️

#كسور
#جراحه


#ألـجـيـش_الابـيـض『 @Dr_ar19 』

هل أيام ماعندي منشورات تخص الأمراض انتظروا لحد ما أداوم ويبدي المحتوى الجديد 🔥😎😎
فـ هل كم يوم راح نگضيها بسوالف skin care فـ تعالوا اسولف الكم ع الفرق بين AHA و BHA الي نشوفهن بالمنتجات العلاجية للعناية بالبشرة

🤔AHA
مختصر لـ alpha-hydroxy acids احماض الفا هايدروكسي🤔

🤔هذا الحامض من الأحماض الذائبة بالماء
🤔يشتغل ع سطح الجلد يفكك الروابط بين خلايا البشرة بالتالي الخلية تموت ويصير تقشير وتجديد لخلايا البشرة
🤔ننطي للناس الي عندهم خطوط بوجهم أو الي بشرتهم متضرره من أشعة الشمس وللبشرات الجافة (عادي للدهنية ماكو مشكلة )
🤔يصير تحسس من أشعة الشمس والبشرة تتهيج وتتحسس إذا تعرضت اله (لذلك استعماله لازم يكون ليلي وبالنهار نستعمل واقي شمس )


🤔BHA
اختصار لـ beta-hydroxy acid احماض بيتا هايدروكسي🤔
🤔يعتبر من الأحماض الي تذوب بالدهون
🤔يخترق المسام ويذوب بالدهون
🤔لذلك يشتغل على الحبوب والرؤوس السوداء والخيوط الدهنية البيض


#ألـجـيـش_الابـيـض『 @Dr_ar19 』

😊تدرون ان الرئة يحيط بيها غشاء اسمه بلورا (pleura) او غشاء الرئة فائدة هذا الغشاء يحمي الرئة ويسمح للرئة انو تتحرك وتتمدد على راحتها اثناء الشهيق ومن تنملي بالهواء واله وظيفة مناعية

🩵هل ممكن هذا الغشاء الي يحيط الرئة يُصاب بالامراض ؟ الجواب اي ممكن …🫁
وحده من هاي المشاكل الشائعة جداً هي (Pleural effusion) يعني يصير تجمع سوائل بين هذا الغشاء والرئة
هاي السوائل ممكن تكون
🌸دم وهنا راح يسمو (Hemothorax)
🌸ممكن يكون قيح (empyema)
🌸ممكن ماء (Hydrothorax)
يعني هاي السوائل مختلفة وكل واحد اله تسميه خاصه ومسببات خاصة

🩵راح نحجي ع الدم لان هو اقصر واحد وأسهلهن ومابي تفاصيل كثيرة
بحالات الحوادث الطرق او الطعن بالسكين او الطلق او اصابات اللاعبين الرياضيين (مثل ما صار ويه ايمن حسين ) او بحالات سرطان الرئة
هنا الأوعية الدموية راح تتمزق وراح يصير نزف ويبقه الدم يتجمع يتجمع بهل مساحه الي بين الغشاء الرئوي والرئة

🩵شنو ممكن يصير إذا تجمع الدم ؟ التكملة اول تعليق

فهمت حط ☃️☃️☃️


#ألـجـيـش_الابـيـض『 @Dr_ar19 』

🩵شايفين من وحده بشرتها حلوة تسألوها شتسوين تكلج اشرب مي …المي يفيد للترطيب الداخلي للجسم (لان اني عندي ترطيب داخلي وترطيب خارجي )
الجسم يتكون 70%من الماء فـ الجسم مثل النباتات بالضبط تحتاج مي حتى متذبل فهنا نفس الفكرة جسمنا كله يحتاج المي …وهل معلومة كُلنا ندري بيها

🩵الجلد يتكون من 3 طبقات
الطبقة الاولى خلاياها تكون ميته فنسبة الماء بيها قليلة (فائدة الماء هنا ينطي مظهر ناعم ولماع ويحميها من جفاف ) سبق وان كلتلكم الجلد عنده فد اله معينه حتى يحمي نفسه من الجفاف والي هي افراز الدهون وحتى يحبس الرطوبة ويقلل من تبخر الماء من سطح الجلد وهـيج يحمي نفسه من الجفاف

التكملة اول تعليق ، تفاعل بـ ☃️


#ألـجـيـش_الابـيـض『 @Dr_ar19 』

هلو حبايب ، سوري ع الانقطاع 🥺
راح اشرحلكم على الترطيب وأنواع المرطبات بالتفصيل الممل 🌚🩵

بـين ما اكتب المنشور هاي قناتي الخاصة بالسكن كير انزل بيها بعض مواد الكوزمتك الصيدلانية الممتازة وأرفقه بشرح يخصه https://t.me/skin_care_shahad



#ألـجـيـش_الابـيـض『 @Dr_ar19 』