الملهمة🌎🦋

إزاي تتعلم كتابة المحتوى بنفسك وطرق الربح من المجال ❤️🔥

المرحلة الأولى

الكتابة الصحيحة بدون أخطاء إملائية أو لغوية وتقدر تتعلم دا من خلال المصادر دي:

- كتاب المنجد في الإملاء إعداد أبو السعود سلامة أبو السعود

- كتاب عزيزي المحرر لمحمود عبدالرازق جمعة

- كتاب أكثر الأخطاء الإملائية واللغوية شيوعًا ل د. ضرغام الأجودي


- المرحلة الثانية

في المرحلة دي هنبدأ نتعرف على المجال بشكل أوسع

- هتقرأ مقال كيف أتعلم صناعة المحتوى؟ الدليل العملي الشامل 2023 ( المقال دا شامل وفيه مصادر كتيير للتعلم وهو مقال من مدونة الأستاذة شيماء عفيفي)

- هتقرأ كتاب دليل الكتابة للكاتب معاذ يوسف

- هتسمع على اليوتيوب كورس أساسيات كتابة المحتوى ل د. حسن المراعي

- هتاخد كورس تعلم كتابة المحتوى خطوة بخطوة في 8 أيام للأستاذ أسامة صلاح (اكتب على جوجل كدا هيظهرلك)

- كتاب How to content marketing بالمصري للأستاذ أحمد سيف

- كورس كتابة المحتوى التفصيلي من قناة فريلانس أكاديمي

- كتاب ماركتنج بالمصري ل حسام حسان

- ممكن تاخد كورس تعلم كتابة المحتوى مع أستاذة إسراء شحته وهي هتدربك

المرحلة الثالثة

ودي مرحلة بتتعمق فيها أكتر وممكن تستعين بالمصادر دي فيها

- دورة العمل على الإنترنت عن طريق منصة بلوجر مقدمة من قناة اجتهاد

- كورس أساسيات التسويق الرقمي من مهارات من جوجل

- كتاب كوتلر يتحدث عن التسويق

- كورس content marketing certification المقدم من منصة hubspot

- لو عايز تتعمق في مجال التسويق الرقمي فأنت بتقدم على منحة مستقبلنا رقمي التابعة لوزارة الإتصالات بالتعاون مع يودستي


المرحلة الرابعة

مرحلة الاستمرار في التعلم
الرحلة مش بتنتهي وأنت لازم تكمل وتدور على مصادر مختلفة تفيدك وعلشان تكون على دراية بكل جديد:

- اعمل أكونت على لينكيدان وتابع خبراء المجال؛ لإن أغلب المصادر والمعلومات اللي حصلت عليها كانت من لينكيدان، ليا وقت مخصص كل يوم بدخل عليه

- انضم لجروب عبر بالمحتوى وهتلاقي فيه ناس كتيير تفيدك

- تابع صناع المحتوى اللي بيقدموا معلومات مستمرة في المجال ذي أستاذ معاذ يوسف، والأستاذة شيماء عفيفي

- موقع hubspot academy

- موقع copy blogger

- موقع كورسيرا بيقدم كورسات كتيير لتعلم المجال

المرحلة الخامسة

مرحلة بناء نماذج أعمال (بورتفوليو)

أنا اتعلمت وحاسس إن عايز أطبق على اللي اتعلمته أعمل أي

- تطوع: في أي مكان كويس بيطلب متطوعين وأنشر أعمالك هناك

- قدم على تدريب في موقع: في مواقع بتقدم تدريبات مجانية فيها وبتتيح ليك إنك تنشر أعمالك

- تقدر تعمل مدونة خاصة بيك وتنشر فيها أعمالك

- تقدر تعمل نماذج وهمية لشركات كبيرة وتشاركها في جروبات المحتوى وتحطها في البورتفوليو (أقصد بوهمية إنك مش بتشتغل معاهم لكن بتعمل نماذج كما لو كنت شغال معاهم)


المرحلة السادسة

مرحلة البحث عن شغل

وهنا هعرض عليك بعض الأفكار

- بتعمل حساب على موقع من مواقع العمل الحر ذي: ( خمسات، مستقل، موقع فريلانسر، موقع up work...) وتقدر تتعرف على المواقع دي وكيفية الربح من خلالها بالبحث عنها على اليوتيوب

- بتتابع مواقع التوظيف ذي: (موقع وظف، موقع تنقيب، موقع بعيد، موقع بيت دوت كوم...)

- بتعمل حساب على لينكيدان، ومن خلال تجربتي الشخصية هقولك إن لينكيدان من أكتر المنصات اللي جالي شغل من عليها وناس كتيير كانت بتبعتلي بدون سعي مني للوظايف هما كانوا بيعرضوا عليا وظايفهم

طيب لو عايز تعمل أكونت احترافي على لينكيدان عشان تلاقي وظيفة تعمل أي؟

تقدر تسمع للفيديوهات والدورات دي على اليوتيوب: (كورس تعلم LinkedIn في ٤٠ دقيقة لغريب الشيخ، فيديو تحسين بروفايل لينكيدان لوليد طه)
ممكن تتابع محمد بهاء على الفيسبوك أو لينكيدان هو بيعمل محاضرات عن لينكيدان

- تالت طريقة للربح وهي إنك بتعمل مدونة أو موقع خاص بيك وتبدأ تربح من خلاله

-بتنشر البورتفوليو بتاعك على جروبات خاصة بالمحتوى ذي جروب (عبر بالمحتوى) ولو متاح شغل حد هيرد عليك)

- ممكن تقدم نفسك لأصحاب المواقع وتعرض عليهم أعمالك في البداية

- ممكن تطلب من زمايل ليك بيشتغلوا في المجال إنهم لو لقوا أي شغل متاح يقترحوا عليك

- ولو عامل بيرسونال براندنج لنفسك فالشغل ممكن يجي لحد عندك

- كل ما زادت دايرة معارفك كل ما زاد ترشيحك في الشغل

بس كدا لو صلت لحد هنا فياريت تسبلي رأيك في البوست دا لإن تعبت فيه، وقولي ممكن أساعدك في أي تاني 🌻❤️

Waiting...!

#خطة_تعلم_كتابة_المحتوى

ودي بلانر كنت محملها من موقع أجنبي ممكن تفيدكم في التخطيط 🌻🤸‍♂️