تورکی شعیرلر، دیکلمه لر، کلیپ لر🔈 Telegram 帖子

سید عظیم شیروانی نین یاشاییشی

سید عظیم شیروانی دن دیوان تورکی
۷۲۶ صفحه

https://turuz.com/

فضولینی غزلی نین تخمیسی

قدح لرده حباب آسا کؤنول دوشموش هوا لردن،
شراب نابسیز دل کعبه سی دوشدو صفا لردن،
قوتارماز، اولمایینجا مست، عشق اهلی بلا لردن،
“کرم قیل، کسمه ساقی، التفاتین بینوا لردن،
الیندن گلدیگی خیری دریغ ائتمه گدالاردن”.

در دلبرده حاصلدیرمی اهل عشقین آمالی
و یا دست فلک دن من تک اولموش غصه پاما لی،
منی، حال اهلی سن، بیر حال ایله قیل حال دن حالی،
“صبا، کویینده دلدارین ندیر اوفتاده‌لر حالی،
بیزیم یئردن گلیرسن، بیر خبر وئر آشنا لردن”.

شکسته کاسۀ چینی مثالی، بیر صدامیز یوخ،
سینیق نئی تک هوادن دوشموشوک، بیر دم نوامیز یوخ،
صبا، اول گول بدندن نامۀ راحت فزامیز یوخ،
“اسیر غربتیز، بیر سندن اؤزگه آشنامیز یوخ،
آیاغین کسمه، باشینچون، بیزیم محنت سرا لردن”.

تنور چشمیمه گردون قیلیب طوفان تلقینی،
سرشک چشم خونباریمدان آلمیش صبر و تمکینی،
او سروین تلخ بادامینه وئردیم جان شیرینی،
“طبیبا، خاک کوی یاردن دیر اشک تسکینی،
منه آرتیرما زحمت، گؤز یاشارار طوطیا لردن”.

قسم پیر مغانه، پاریسا لر پیروی اولمام،
بو قوم خود فروش و خود نما لر پیروی اولمام،
حقیقت اهلییم، اهل ریا لر پیروی اولمام،
“گیریب مسجیدلره گر مقتدا لر پیروی اولمام،
بودور وجهی کی، هرگز گؤرمدیم اوز مقتدا لردن”.

مقیم کعبه سنانین گؤریدی یار ترساسین،
سالاردی بوینونا زنجیر گیسوی چلیپاسین،
کؤز آچ، ای بی بصر، هر یئرده گؤر حقین تجّلاسین،
“دئمه زاهد کی، ترک ائت سیمبر بت لر تماشاسین.
منی کیم قورتارار تانری ساتاشدیرمیش بلا لردن”.

وصال خرمن نیندن ائتمدیم بیر خوشه ده حاصل،
وصاله یئتمگیم دشوار، هجره دؤزمگیم مشکل،
نه اؤلدوم قورتاریم کیم، من نه اولدوم وصلینه واصیل،
“فلک دیر مهری زایل، یار غافل، عمر مستعجیل،
ندیر تدبیر بیلمم، جانه یئتدیم بیوفا لردن”.

قویوب حسنون تماشاسینی هرگز میل ماه ائتمن،
بو یوزدن نامۀ اعمالیمی هرگز سیاه ائتمن،
نه گون دور کیم، غبار آسیتانن سجدگاه ائتمن،
“وجودوم نئی کیمی سوراخ سوراخ اولسا آه ائتمن،
محبتدن دم اوردوم، اینجیمک اولماز جفا لردن”.

دئمم کی، لطفوو چوخ، یا کی، جور و ظلمو آز ائیله،
آچیب زلف سیاهین سیّدین عمرون دراز ائیله،
حقیقت خواهش ائتسن، مشقینی عشق مجاز ائیله،
“فضولی، نازنین لر گؤرسن اظهار نیاز ائیله،
ترحم اومسا عیب اولماز گدا لر پادشاه لردن”.
سید عظیم شیروانی

خوش اول زامان کی، یار منه همزبان ایدی،
بزمیم جمال یارایله رشک جنان ایدی،
سلطان ایدیم کی، هر یانا حکموم روان ایدی،
دولت غلام ایدی منه، بختیم جوان ایدی،

جان حزینه همدم و آرام جان ایدی؛
دملر او دملر ایدی، زامان اول زامان ایدی.

خورشید گون شرابله دولموشدو جامیمیز،
اول ماه ایله کئچیردی بیزیم صبح وشامیمیز،
دور فلکده حاصل اولوردو مرامیمیز،
خاک دریندن اؤزگه یوخ ایدی مقامیمیز،

بولبول لره او ساحت قدس آشیان ایدی،
دملر او دملر ایدی، زامان اول زامان ایدی
.
هجرین اگرچی گؤرموش ایدیم مبتلا لرین،
دیلدن دdله ائشیتمیش ایدیم ماجرا لرین،
بونجا تصور ائیله مز ایدیم بلا لرین.
جان چکمیش ایدی محنت هجران جفا لرین،

خلوت سرای وصلده دل کامران ایدی؛
دملر او دملر ایدی، زامان اول زامان ایدی.

کؤنلوم او ماه دن آچیلیردی کرم گؤروب،
مهرین زیاده، جور و جفاسینی کم گؤروب.
اول گول منه آچیلدیغینی دم به دم گؤروب،
بزم وصالده اؤزونو محترم گؤروب،

رشک ایله غنچه تک دل بدخواه قان ایدی؛
دملر او دملر ایدی، زامان اول زامان ایدی
.
اول گول منیمله همدم ایدی هر باهاردا،
گه دامن چمنده، گهی لاله زاردا،
بولبول تکی ایشیم یوخ ایدی آه و زاردا،
سیّد کی، مسکن ائتمیش ایدی کوی یاردا،

اعزاز ایله بیر آدم جنت مکان ایدی؛
دملر او دملر ایدی، زامان اول زامان ایدی.

مسدس یا التیلیقلار سید عظیم شیروانی

غزل‌لر
رۆباعیلر
قوشا بیتلر
تک بیتلر
قطعه‌لر
ترکیب‌بندلر
دؤردلوکلر
مۆخمّسلر
مۆسدّسلر
مۆستزادلار
ترجیع‌بندلر
ربیع الاطفال
مثنوی
قصیده‌لر
نوحه‌لر
مکتوبلار
ساتایر
باشقا شعرلر

سید عظیم شیروانی
ساتایر بیر نفر دوستا یازیلان زارافات دیر


عالی جاها، غنیمین قادر سبحان اولسون
غضب آیاتی سنه آیۀ قرآن اولسون.
سنی سوزان ائله سین آیۀ فیهون فیهی،
منزلین روز جزا اسفل نیران اولسون.
دوشه سن دور گؤروم سن بو عمارت لردن.
یاتاجاق یئر سنه بیر کنج دییرمان اولسون.
آی اؤته، هفته اؤته، هئچ دیلووه دیمه یه ات،
بیلمنم ایل دولانا بلکه کی، قربان اولسون.
گزه سن کوچه لری، گشت ائده سن شام و سحر،
بیر قپیک دن اؤتری گؤز یاشین افشان اولسون.
یاستیغین قیرمیزی کرپیج، دؤشیین کهنه حصیر،
بیر دنه ییرتیق ابا اوستوه یورغان اولسون.
استراحتله سنه اولمایا بیر منزل خاص،
جامه دار میرزه لی تک منزلین کولخان اولسون.
جان وئرنده ییغیلا اوستوه جینن ایله پری
عملین کیسه سی نین مخزنی شیطان اولسون.
شاطر عبدالله، قوبوش قاره ننه، شؤلتی تقی،
قارداشیم وای! – دئییب، اوستونده نواخوان اولسون.
نه کی…. وار ایسه قنشعرینده ذکر دئسین،
ال چالان جعفر آغا، مطربون تاتیان اولسون.
گورجوان چاخری پیشوازه گله قنشرووه،
نوش بر نوش دئین شیطن دغوان اولسون.
عرصاته بو تهر کئف لی، خرامان گله سن –
کی، گؤره ن لر سنی بو شکلده حیران اولسون.
خلق سنی لوتی بیلیر، اما کی، سن خودکئشسن،
قوی دلیلین گتیریم، عالمه برهان اولسون.
بیر گلیر یادووه سابقده کئچن کوهنه دوکان؟
قوی کی، فاش ائیله‌مه ییم بو سؤزو، پنهان اولسون.
سنی من مرد بیلیب درگهوه اوز توتدوم،
فرض بیلدیم بو کیشی صاحب احسان اولسون.
دئمه سن ذاتی غلیظ حاجی ترابین بیریسن،
قارا ائششک ندی کیم، داخل انسان اولسون؟
سن دئییرسن کی، آتام مجتهد عالم دیر،
بو سؤزه باور ائدن سن کیمی حیوان اولسون.
مجتهد اوغلو گرک قابل اولا آتاسی تک
یوخسا، سن کیمی لوطو ناییب لولان اولسون.
تاج سر، هجو دئییل دیر بو کی، من ائیله‌میشم،
غرض اولدور کی، سنه بیر نئچه هزیان اولسون.
وای اگر حالووا مندن اولوسان رنجیده
هجو قیللام کی، سنی شهرۀ شیروان اولسون.
سید عظیم شیروانی

سید عظیم شیروانی ربیع الاطفال نادیره
نادیره

(جوها) بیر واخت بیر نئچه تویوق آلیب، یاغدا تویوقلاری بریان ائله دی، بیر قابا قویدو، آغزینی اؤرتدو، گئتدی کی، رفیق لرین یئمه یه گتیرسین. عورتی او بیشمیش تویوقلاری گؤتوروب بیر نئچه وحشی گؤیرچین لر او قابا قویوب، آغزین اؤرتدو. ائله کی جوها قوناقلاری ائوه گتیریب اوتورتدو، گئتدی کی، مسما اولان تویوقلاری گتیرسین، قابین کی سرپوشون گؤتوردو، قوشلار هامی سی بیردن اوچدولار، گئتدی لر. جوها مات و معطل قالدی، دئدی کی، خداوندا، برفرض کی، سن بو قوشلارا ترحم ائله دین، زنده قیلدین. قدرتیندن اوزاق دئیل دیر، ایندی منه دئ گؤروم کی، یاغین پولونو و اؤزگه مخارجی کیمدن آلیم، قوناقلاریم نه یئسین؟
سید عظیم شیروانی حکایه

جانان سیزین اولسون
“بیت الصفایه”
ای دوست لار، اول سرو خرامان سیزین اولسون،
جانان سیزین اولسون.
سئیر گول گولزار و گولوستان سیزین اولسون،
ریحان سیزین اولسون.
بیز آتش هجران ایله دوزخ لره یاندیق،
سودایه بویاندیق.
وصل عالمی اول روضۀ رضوان سیزین اولسون،
قیلمان سیزین اولسون.
بیز جمع ایکن اول سلسله دن تفرقه دوشدوک،
بو دانه ایلیشدوک،
سرحلقۀ گیسوی پریشان سیزین اولسون،
سامان سیزین اولسون.
زلفو هوسیندن بیزه شام اولدو نشیمن،
ائتدیک اونو مسکن.
اول عارضی خورشید ایله شیروان سیزین اولسون،
دوران سیزین اولسون.
اول مورخطین قالدی کؤنول وصلینه حسرت،
یوخدور منه فرصت.
گولزار صبا، ملک سلیمان سیزین اولسون،
فرمان سیزین اولسون.
ای ظاهری اخوان صفا، گور گدا لر،
بی حدو وفا لر.
یعقوب من اولدوم، مه کنعان سیزین اولسون،
اول جان سیزین اولسون.
سیّد تکی سیز اولمایین البته وفا سیز،
بی شرم و حیا سیز،
جان اول قاراگؤز دلبریمین، جان سیزین اولسون،
جانان سیزین اولسون
سید عظیم شیروانی مستزاد

دئدیم، ای جان و کؤنول خستۀ آزار غمین،
خم قیلیب قامتیمی بار بلا و سیتمین.
یوخدو بیر دم کی، ستم گؤرمه یه سندن کؤنلوم،
چکیرم عالم آرا من ستم دم به دمین.
نئتمیشم* من سنه، ای شاه، مقصرلر تک،
باغلاییب گردنیمی ترۀ پرپیچ و خمین.
نظر مرحمتین وار ایدی اززلده منه،
سورمه ایدی گؤزومه شوق ایله خاک قدمین.
نه گناه ائتمیشم، ای سرو ریاز جنّت –
کی، باشیمدان گئدیب اول سایۀ لطف و کرمین.
بوندان آرتیق منه سن ائتمه دخی جور وجفا،
قالماییب دلده دخی طاقت بار المین.
دئدی: سن طالب اکسیر سن، ای بی سر و پا،
کیم گؤروبدور، گؤره سن سن ده پری لرده وفا.
سید عظیم شیروانی ترکیب بند

دئدیم: ای روح روان، ائیله‌مه بونجا منی زار،
خوش دئگیل دیر بو قدر کیم، ائده سن جور شعار.
گؤزومون مردمونو ائیله‌مه خونابه یه غرق،
نه روا دیر اولاسان مردم مردم آزار.
نخل جور اکمه کی، وئرمز ثمر خوب سنه،
رحم قیل تا کی، جاهاندا اولاسان برخوردار.
دور گوش ائیله‌مه اغیار مخالف سؤزونو،
ائیله‌مه اولفت یاران موافق دن عار.
بو قدر، ماهروخوم، حسنوه اولما غره،
تئز یئتر حسنوه عالمده زوا ل شب تار.
خط گلیب آیینۀ حسنوو ائیلر تیره،
صورتین محو اولو، قالماز بو صفادن آثار.
تاپار آفاقده تغییر گول رخسارین،
آتشین دود قیلار، سرد اولور بازارین
ترکیب بند سید عظیم شیروانی