شوية ضو

"رب إني ضلمت نفسي فاغفرلي "
تصبحون على خير يا أحلى متابعين 🤍

ونتا تسعى في أرض الله الواسعة وكامل تخمامك في وقتاش نسلك وواش نشري وكيفاش نوسع في رزقي ندير مشروع ولا نتعلم حرفة جديدة... يصادفك موقف لشخص يخدم وين تخدم يتعرض فيه لضربة مميتة ، تخليه بين الحياة والموت ..تعطيك الحياة خير مثال على حقيقتها، وكيفاش في لحظة تردك من حال لحال، حبيت نقول متكتروش التخمام اطلبوا رزقكم بنفس راضية وركزوا على هاد النفس أولا إذا مستعدة لمواقف مفاجأة هكا، في الأخير نحن في رعاية الله بصح اخرجوا كل يوم من الدار ونتوما حاطين في بالكم ممكن يكون آخر يوم حصنوا نفسكم وسامحوا، وبعدوا قد ما تقدرو على كل ما هو حرام.
#غيمة

#علابالك_دين #علابالك_شخصيات
سمعتو عن مسلم جاهد في سبيل الجنة بصح سمعتو عن المسلم لي جاهد في سبيل جهنم في المعركـ ـة؟

قال الرسول ﷺ عن هذا المسلم: "إنه من أهل النار!"، وتخيلوا، هذا الشخص قاتل أشد القتال، لدرجة أن الصحابة شكوا في كلام النبي ﷺ ..

لُقبت بمعركة الحصون، وهي من أشرس المعارك لي فاتت على المسلمين ضد اليهـ ـود، المعركة لي دمر فيها المسلمين أقوى حصون الجزيرة العربية ودمرو معاها غرور اليهـ ـود، نفسها المعركة لي قال فيها الرسول ﷺ: 'لأعطين الراية غدًا لرجل يحبه الله ورسوله'، ونفسها المعركة لي اقتلع فيها علي بن أبي طالب حصن عجز عن حمله 7 رجال ⬇️

خَيْبَر، منطقة كانو اليهود يفتخرو بيها، قلعة مُهندسة بالحصون، كل حصن يمثل قلعة مستقلة بأبواب ثقيلة يعجز عليها سبع رجال أشداء، هذا هو الشي لي خلاهم يقولو عليها: "مستحيلة الاختراق وأي جيش يوقف ضدهم رح يتكسر قبل ما يقدر يوصل للأسوار"

الذكاء الحربي هذا خلى اليهـ ـود يغرقو في غرورهم ورجعت خيبر وكر خبيث للفتن والمؤامرات ضد المسلمين .. بصح النصر راه قريب فقد نزلت آية 'وَعَدَكُمُ اللَّهُ مَغَانِمَ كَثِيرَةً تَأْخُذُونَهَا فَعَجَّلَ لَكُمْ هَذِهِ وَكَفَّ أَيْدِيَ النَّاسِ عَنْكُمْ'

بعدما آن الأوان لتصفية الحسابات مع اليهـ ود لي كانو حابين يضربو الإسلام من الداخل، خرج جـ ـيش المسلمين سنة 7 هـ لخيبر لي كانت بعيدة عن المدينة 180 كيلو، خرجو يمشيو على خطة فيها نوع من التمويه، يخرجو فليل وميهاجموش حتى يوصل الصباح وين يكونو اليهـ ـود مشغولين بأمورهم المعتادة

وصل الصباح وخرجو اليهـ ود من حصونهم مشغولين بالزراعة في يديهم الآلات الزراعية وغير شافو النبي ﷺ قالوا: "محمد والله، محمد والخميس (الجيوش) وهنا قال النبي صلى الله عليه وسلم: "الله أكبر خربت خيبر" .. يا جماعة، قُبح صباح المُنذرين وإنتهت خيبر

بداو المسلمين في اقتلاع الحصون حصن ورا خوه، لي كانت مهمة صعيبة كـ 'حصن ناعم' لي استغرق فتحه عشرة أيام كاملين واستشهد في ذلك الصحابي 'محمود بن مسلمة'

نحكيو شوية على المسلمين في الغزوة هذي .. 1600 واحد يعيطو 'الله أكبر' حتى كادت تُقتلع احبالهم الصوتية .. كانو يعيطو لدرجة انو الرسول طلب منهم يرحمو أنفسهم فقال 'أيها الناس! تدعون سميعا قريبا وهو معكم'

شجعان المسلمين لي كانو سيوفهم وسهامهم اشجع من العدو .. بصح بين هذي السهام، سهمًا قتل صاحبه المسلم ..

"الشجاع قُزمان" من بين المسلمين لي التحقو بصفوف جيش الرسول ودخلو يحاربو وماهمهمش يخرجو أحياء أو لا ..

قزمان كان ميفوتش عليه عـ ـدو إلا وقتـ لو .. اشتد سيفه على اليهـ ـود، فقتـ ل منهم ما قتـ ـل حتى تعجبو منه الصحابة .. وأثناء القتـ ـال جرحوه الكفار بسيوفهم وسهامهم حتى اشتد الوجع على جسمو

نزف وتوجع، ثم مـ ـات وجروح الحـ ـرب تغطي جسمه .. بعدها فرحو بيه الصحابة وتهيأ لهم انو مكانه في الجنة ولكن قال لهم الرسول ﷺ انه في النار

تعجب الصحابة نفس تعجبنا وربما أكثر .. كيفاش هذا لي بذل ما بذل في المعركة لجانب المسلمين، وجُرح لدرجة انو جروحه قد أقعـ ـدته يكون في النار؟!

راح واحد من الصحابة للرسول ﷺ على سبيل الاستفهام كيف يكون في جهــنم بِمِثْلِ مَنْ يُقاتِلُ في سَبيلِ اللهِ عزَّ وجلَّ وهو مُسلِمٌ أنْ يكونَ مِن أهلِ النَّارِ؟! فأكدله الرسول ﷺ انو هذا الرجل راه في النار رغم عن الشي لي بذلو في صفوف المسلمين

بعض الناس جاهم الشك في قلوبهم من قول الرسول ﷺ بصح رسول الحق لا يأتي إلا بالحق، قزمان بعدما حس بوجع الجراح مقدرش يتحمل .. مقدرش يتحمل حريق جروحه ولا نزيف دمه فقرر يوقف هذا الألم

مد يدو نحو الكِنانة وهي وعاء من الجلد كانو يخبيو فيه الأسهم .. جبد قزمان سهم من السهام بصح المرة هذي السهم مكانش موجه للعدو الكافر لالا .. السهم كان موجه لقزمان .. وقف قزمان السهم في الأرض ورقد عليه وهكذا أنهى ألمه وأنهى حيـ ـاته

قزمان كان يملك الشجاع والقوة لكنو ماملكش "صلاح القلب" .. القلب مضغة صلاحها بالاستقامة .. انك تمتثل لأوامره وتتجنب نواهيه، الاستقامة ما تتطلبش القوة في القتال وخلاص، بل يتطلب النية الصافية والإخلاص لله

والجهاد ميكونش قدام الناس بقوة السيوف وفوز بالغنائم بل نصرة لله والرسوله وإن اللَّهَ لَيُؤَيِّدُ هذا الدِّينَ بالرَّجُلِ الفاجِرِ


جهـ ـاد النفس أصعب جهـ ـاد ووعد منا لكم اننا رح نغوصو في الموضوع مع بعض 💛

إن الله يمهل ولا يهمل ان الله قادر جبار ،
نفس مشهد جباليا و خيام الناز/حين لي كلاتهم ألسنة الن$ار ، تكرر في لوس انجلوس أمريكا وين السكان و المرضى لي كانو في المستشفيات لحقتهم النا$ر ، حريق في عز فصل الشتاء يا رب ما أعظمك يا رب انصرنا على القوم الكافرين .

#بيازيد

كاين وحد القصة تحكي على حالنا اليوم و حال الدول العربية لي رانا نشوفوه يوميا القصة تقول " أُكلت يوم أُكِل الثور الأبيض " ...

في الغابة كانو كاينين 3 ثيران واحد ابيض واحد بني و واحد اسود و كاين أسد ، هذاك الأسد بغا ياكلهم ڨاع راح عند الثور الأسود و البني قاللهم صاحبكم هذاك الثور الأبيض راه غير يهدر فيكم و صراحة ما يبغيلكمش الخير لوكان تخلوني ناكله نخليكم دورو فالغابة عادي و راها ليكم ڨاع الويدان و الحشيش قالوله اتفقنا كوله ، بعد ايام راح الاسد عند الثور البني قاله يا ودي هذاك الثور الأسود راني نشوفه تبدل عليك لوكان تخليهلي ناكله و نهنيك منه و نبقاو انا وياك صحاب و زيد بزيادة لوننا كما لون بعض قاله الثور البني اتفقنا هاوك راه ليك ، بعد ايام رجع الاسد للثور البني قاله دوك جا دورك قاله الثور البني أُكلت يوم أُكل الثور الأبيض ...


يعني ما حاماش على خوته لي من نفس فصيلته و استباح لحمهم و خلا أقوى حيوان يسطر على كلش من جميع النواح و زاد وفرله الجو باش يدير رايه و فالتالي جا دوره نفس الشيء ينطبق على الحياة لي رانا عايشينها ، صح ربي مكتبلنا نعيشو هك حبينا و لا كرهنا لكن لما تشارك انت و غيرك في حاجات ما عندها حتى علاقة لا بمادئك ولا بدينك و تقولي كل واحد يدفن بوه كي بغى و كل واحد حر يجي النهار لي تخلصها عند ربي و تخلصها غالية ، درنا العديد من المنشورات حنا و بزاف صفحات باش ننبهو على المقاطعة و على الاحتفالات لي في غير محلها و على بزاف صوالح على مدار سنوات ...

لكن شي لي رانا نشوفوه أنه الناس مزال معمدة و مزال تتفاخر بالرذيلة و الوسخ و البخس تحت مسميات أخرى و كل واحد يبرر و كل واحد يجيب جزء من حديث او جزء من أية فصلها على حسابه باش تناسب وش راه يدير و ما قراش باقي المعنى . ربي يهدينا و يهديكم و ربي يثبتنا على ديننا باش نكملو باقي الايام جهادا للنفس و للمجتمع .

#بيازيد

#علابالك_أخبار #علابالك_ترند
في الأيام اللي فاتت .. راجت أخبار على ظهور فيروس جديد في الصين .. اسمو الميتابينوموفيروس البشري (HMPV) .. هاذ الفيروس يسبب أعراض تشبه الزكام والأنفلونزا . كيما الحمى و السعال و صعوبة في التنفس .. والأخبار هذا وين وصلت للصفحات الجزائرية وراكم تعرفو حجم التهويل وكاين لي فيكم ربما تصادف مع أحد المنشورات المعنية ..

الحمد لله هاذ المرة راهم يقولو الفيروس ماشي قاتل في الغالب .. بصح يقدر يكون خطير على الناس الكبار في العمر و الصغار واللي عندهم أمراض مزمنة ولا مناعة ضعيفة .. وفي حالات نادرة يقدر يسبب مضاعفات خطيرة كيما الالتهاب الرئوي ..

وللعلم السلطات الصينية قالت بلي الفيروس هذا موسمي وماشي وباء جديد .. بصح الوقاية تبقى حاجة ضرورية باش تحمي روحك وعائلتك.

"الشتاء غنيمة العابدين ، الليل طويل للقيام ، و النهار قصير للصيام"
رانا غافلين بزاف صح ولا !؟ … علابيها بغيت نقولكم هذا هو افضل و احسن الأوقات لي نجمعوا فيهم الحسنات مليح و خاصة صلاة الجماعة و الصلاة فوقتها ،.. للجماعة لي تقرا و تخدم ياك صلاة الفجر ماهيش بعيدة على ال 7 صباحا بزاف يعني ماهيش بعيدة على النهوض تاعكم ، تقدر تروح تصلي و ترجع و توجد روحك و تروح تخدم ول تقرا ، و ثاني صلاة العشاء نقولوا كي تصلي و تكمل تكون الثمنية (20) و من ذاك الوقت يبدا قيام الليل يعني قبل ما ترقد تصلي زوج ركعات ول ربعة و غيرها و مزال تلقى الوقت كاين باش ترقد و ممكن تكون حتى مزال ما تعشيتش ، و حاجة اخرى لي هي الصيام .. النهار قصير جدا و الجو مليح ، علابيها لازمك تغتنم الفرص لي راهم عندك فهذا الوقت من ادراك لصلاة الفجر و قيام الليل و صوم و غيرها ، لأنه فهذا الوقت راك تدرب نفسك على الصوالح هاذوا لانه كي يبدا يطلع الوقت و يتبدل ما يجيكش صعيب و تكون انسان مداوم و تولي فيك حلاوة العبادة و ما أجملها من صفة 🤎
نسأل الله أن يوفقنا لما يحبه و يرضاه.
#عمر_الفاروق

وصلنا منذ سنوات ، لمرحلة تعتيم الواقع و تسمية الأشياء بغير مسمياتها ، مثلا واحدة من بزاف أشياء هي التداول و ولاو يهدرو معانا على أساس حنا جهلة و مانعرفوش الدنيا وش فيها ، حابين يردونا حابسين و هوما عارفين أنو التداول هو مجرد دراسة تحليلية للسوق و للعملات و يوضحولنا انو هذاك علم و موهبة و خبرة و بلي كلما تقرا مليح على السوق رح تربح دراهم كبار ، تحب ولا تكره و مهما زينت الكلمة و قدمتلها تعريفات رح تبقى اسمها قمار ، ماتقولي لا دراسة لا تحليل ، لانو لو أصبح الأمر هكذا ، الكازينو مشي حرام بسك لاعب البوكر يحلل طريقة لعب الخصم و يراهن و يربح ، بكل بساطة و توسامبلومو التداول حرام كامل كيما راهو بدون استثناء و هذا ليس جهدا مني ولا نفتي انما ننقل ما هو معلوم ....
#يـــعقوب

الانسان السوي كي يغلط يقول اعتذر ، اما هداك لي برهوش و مستواه الأخلاقي و التعليمي تحت الصفر وش يقول ، مغلوقين ، جاهلين ، معقدين ، ارتقوو ، ولينا في زمان الجاهل هو لي يتذمر من ناس واعيين و قاريين و فاهمين ياسبحان الله ، و باختلاف أجناسهم ماولاش يحشمو بجهلهم ، كاين حاجات ثابتين مالازم يتوشيهم حتى بنادم ، مثل الدين و الرجولة و الغيرة و المروءة و الأنوثة و العفة ، جاونا مخلوقات حبو يردونا بلا دين ، حبو يذلو الرجل باش يتخلى على رجولته و غيرته و مروءته ، و باش يحققو هادو كامل هاجمو انوثة المرأة و عفتها ، خرجو المرأة للشارع و عراوها ، خلاو المجتمع ينحل أخلاقيا ، خلاو الاطفال الصغار يترباو على الأغاني و الشطيح ، خلاو النساء في الشارع يسمعو التطياح ، خلاو الشباب طايرين و تايهين ، و العقول الثقيلة تتمرمد ولا تهجر
و هكذا رانا عايشين في هناء مع العفن ، في حين لازم نردو الأمور لما يجب ان تكون عليه ، الراجل راجل مايوريش مرتو لصحابو و يزيرها باش ما يدوروش بيها ذيابا ، و المرأة تحترم نفسها و تستر روحها . و تربي ولادها احسن تربية هي و زوجها ، بسك هادوك امانة مشي ربحتوهم فطومبولا ، و يترباو على الدين و الاحترام و يتغرسو فيهم الأخلاق الحميدة لأنو صح رانا في أخنز عصر اجتمعت فيه كل الانتكاسات الفطرية و كل الرذائل و الاخلاق البذيئة ، عسوا رواحكم و أخلاقكم من الضياع ، و ديرو مشروع تعكم انو تربو ولادكم أحسن تربية و يخرجو نقايا و يلبسو حوايج شابين مشي سنانهم رايبين و لابسين سيرفات و يطيحو فالشارع و ياكلو دوا ، بسك الحل الوحيد باش نتسڨمو كمجتمع ماكانش فهاد الوقت ، طامعين فالجيل الجاي عل و عسى يكبرو صحاح فعقلهم و واعيين
#يـــعقوب

قال تعالى: (وما خلقۡت ٱلۡجن وٱلۡإنس إلا ‌ليعۡبدون) [الذاريات: 56].

قال تعالى: (وإذۡ ‌صرفۡنآ إليۡك نفرٗا من ٱلۡجن يسۡتمعون ٱلۡقرۡءان فلما حضروه قالوٓا أنصتواۖ فلما قضي ولوۡا إلى قوۡمهم منذرين) [الأحقاف: 29].

وقال تعالى: (‌قلۡ ‌أوحي إلي أنه ٱسۡتمع نفرٞ من ٱلۡجن فقالوٓا إنا سمعۡنا قرۡءانا عجبٗا) [الجن: 1].

وقت لي طلب الجن من الرسول صلى الله عليه و سلم باش يقابلوه و يبايعوه راح و بعد ما سأل الصحابة شكون يقدر مستعد أنه يجي معايا قال عبد الله بن مسعود رضي الله عنه انا نروح ، كي وصلو لأعالي جبال مكة خط الرسول صلى الله عليه و سلم خط فالارض و قال لسيدنا عبد الله بن مسعود و إياك و تتخطاه اذا تخطيتو رح يخطفوك الجن خطف و ما نزيدش نشوفك حتى يوم القيامة في قوله صلى الله عليه و سلم (لا تخرج منه، فإنك إن خرجت لم ترني ولم أرك إلى يوم القيامة) ، راح الرسول صلى الله عليه و سلم في مشهد مهيب وين هبطت غيمة كبيرة سوداء و إختفى رسول الله صلى الله عليه و سلم بعدها ، عبد الله بن مسعود خاف على النبي صلى الله عليه و سلم و كان حاب يتخطى هذاك الخط حتى سمع ضربة عصى الرسول صلى الله عليه و سلم في الارض لما قال للجن إجلسوا ، يا خاوتي مجرد انك تتخيل هذا المشهد المهيب تخاف فما بالك تكون حاضر فيه و تشوف تفاصيله ، و هنا وين نفر من الجن أسلمو و بايعو رسول الله صلى الله عليه و سلم و بالتالي كانو كاينين صحابة من الجن الله أعلى و اعلم عن عددهم .



وقد ثبت أنه صلى الله عليه وسلم قد التقى بالجن مرات كثيرة في مكة والمدينة، وفي بعض أسفاره أيضا، و الشاهد على هذا اللقاءات كان بلال الحبشي، وعبد الله ابن مسعود، والزبير بن العوام وغيرهم. وكان من الجن الذين أسلموا وصاروا يأتون إلى رسول الله صلى الله عليه وسلم يسألوه: جن نصيبين، وقال فيهم رسول الله صلى الله عليه وسلم: ( وإنه أتاني وفد ‌جن ‌نصيبين، ونعم الجن، فسألوني الزاد، فدعوت الله لهم أن لا يمروا بعظم ولا بروثة إلا وجدوا عليها طعاما ) رواه البخاري

كما انهم كان عندهم أسماء كما سَرْق ، الأرقم ، زوبعة ، حاصر ، عمرو بن جابر الجني و غيرهم من الصحابة الكرام .

نتمنى يكون عجبكم المنشور .

#بيازيد

لَا تَدْرِي لَعَلَّ اللَّهَ يُحْدِثُ بَعْدَ ذَٰلِكَ أَمْرًا (1)

مكانش أوضح من هادي الآية ، و مكانش انسان رح يقدر يصبرك على كل المتاعب تاعك بقدر هذه الآية ، شكون قالها ؟ لي خلقك و لي كتب عليك تتعب و تشقى و تبكي و تحزن ، لا تدري ، بلاك بعد الحزن لي راك فيه رح تفرح منبعد و يزول كل تعب و كل هم ، اصبر و خلي ثقتك في ربي لعله يحدث بعد ذلك أمرا
#يـــعقوب

كرهت الروتين ، رانا مع الروتين ...
عبارتين يتكررو على لساننا في العديد من المرات و اذا حبينا نحطولو تعريف نلقاوه أنه هو النعم المتكررة ، أنك تنوض صباح و تتوضى و تصلي و تروح تشرب قهوة مع عائلتك او وحدك و تروح تخدم و توفر لولادك واش ياكلو و لا تتوفر لنفسك واش تلبس ، و انت في صحة جيدة و لباس بيك مفيك حتى ضر و ترجع لعشية للدار سالم مفيك حتى ضر ، هذو ڨاع نعم ألفناها فنسيناها انها نعم فسميناها بمسميات اخرى و نسينا نحمدو ربي عليها ، و دخلنا في دوامة أنه روتين طبعا من ثقافات اخرى ، ولو كنا حنا نحمدو ربي على هذا النعم المتكررة و نشوفو فالناس لي أقل مننا ما نشوفوهاش نقمة .

#منقول بالتصرف

#بيازيد

ما شاء الله كان وما لم يشأ لم يكن.. فلا تذهب نفسك حسرات.
نهاركم زين لحباب 🤍

ما يحدث في السعودية يقشعر له البدن أكثر مما يحدث في أي بلد آخر ، شي لي راه يصرى و الايام لي رانا نعيشوها و الزمن هذا لي رانا عايشين فيه مقرف و مقزز إلى أبعد الحدود ، في عرض للمصمم اللبناني إلي صعب دارو أكبر ستوديو لعرض الأزياء و العارضات لي كانو كاسيات عاريات طبعا كانو يديرو الديفيلي أمام مجسم كبير يشبه الكعبة يا سيدي معليش بلاك انا و بعض الناس تخايلنا بلي يشبه للكعبة ، تقولي السعودية كبلد ماعندها حتى علاقة مع الحرمين الشريفين عندها علاقة مدام المسؤول عنهم واحد و مدام أجمل و أنظف بقعة على وجه الأرض موجودة فيه غايتهم واحدة هو تدنيس كل ماهو متعلق بالدين الإسلام ، مش اول مرة تصرى و مزال يزيدو يصراو صوالح اخرين انا نذكركم و نذكر نفسي تمسكو بحبل الله و ما تخلوش الدنيا تغويكم لعلنا نلتقي في الجنة .
سلام
#بيازيد

"إنما ابتلي الخلق بالفراق ، لئلا يكون لأحد سكون مع غير الله تعالى "
ابن عطاء رحمه الله

في كل مرة يكون فيها اس//تشهاد احد القادة او احد الشخصيات المقا//ومة يكون مقابلها م..وت او إنتhارا احد الشخصيات الامريكية التافهة باش يعتمو على الخبر ، البارح نصف الصفحات كانو يحكو على انتhار ليام باين احد اعضاء فرقة وان دايركشن الامريكية و بطبيعة الحال الانظار ڨاع راحتله و ممكن ڨاع تلقى ناس تعرف محتوى الشخص الثاني و حياته و واش دار و عدد الاغاني لي اصدرهم و تاريخ انضمامه للفرقة و ما يعرفو والو على الشخصية الاولى الهم الكبير ماجاش في يعرفوه او لا كانو يترحمو عليه في التعليقات و الدموع و الخناين و RIP و منعرف شوي و يدعوله بجنات عرضها السماوات و الارض وهو كافر . الغفلة لي رحنا عايشين فيها لم تحدث في أي عصر مضى حسبنا الله و نعم الوكيل.
#بيازيد

عمرك خممت انك تستاهل كثر من وش عندك بصح الحاجة الوحيدة لي محبساتك هي قناعاتك بأنك متقدرش توصل لكثر؟

اول حاجة رح تخطر على بالكم هي"القناعة كنز لا يفنى" ولكن .. القناعة هي الرضى بالموجود بعد بذل المجهود، أما الشي لي رانا نحكيو عليه هو الرضى المزيف

الرضى لي يعكس نوع من الاستسلام وين يقبل الواحد بأي حاجة غير لأنو خايف يغامر ولا يفشل وميوصلش .. والصادم انو بزاف ناس مقتنعين انو القليل لي بين يديهم يكفيهم ويصبرو روحهم بالجملة الشهيرة "البركة في القليل"

كامل علابالنا انها طريقة يعتمدها اغلب الناس باه يريحو رواحهم من تعب المحاولة، لأنو البركة والقناعة الحقيقية تجي بالجهد والإصرار، بعدما تتعب باش توصل لأفضل حاجة تقدر عليها، على عكس انك تستسلم لأي حاجة بلا ما تجرب توصل لكثر
#جُـو

تعيش أغلبية الأسر الجزائرية تحت ضغط اجتماعي كبير، وين تتداخل العادات و التقاليد مع طموحات الأفراد. على هذي ينعكس الضغط هذا في سلوكيات الناس واختياراتهم، و هذا اللي يؤثر على حياتهم اليومية.

ياسر تلقاهم يخمموا غير كيفاه تشوفهم الناس ،وواش يقولوا عليهم ، و هذا اللي يخلي الواحد يشري حوايج و يكلف نفسو فوق طاقته، غير باه يبين أنه عايش مرتاح و لباس بيه. وفي الغالب، الدراهم تروح على أمور ماشي في حاجة ليها أصلا.

كيما تلقى عائلات تدفع مصاريف كبيرة على عرس باه تبقى الناس تحكي بيه،و هذا اللي يتسبب في ضغط كبير على الأزواج الجدد،و يشوفوا رواحهم لازم يكلفوا أنفسهم، و يديروا واش داروا لي قبلهم ،والفرحة تتحول لمنافسة عائلية ،في بلاصة ما تكون مناسبة سعيدة.

كيما تلقى اللي يهتموا بالمظاهر أكثر من الجوهر. تلقاه يشري و يلبس غير من ماركات عالمية .و سيارات و هواتف آخر ما خرج فالسوق، بصح في الحقيقة حياتهم اليومية تعاني. تجي تتناقش معاه تولي انت لي تعاني ،الأهم في قيمك و مبادئك، ماشي فواش كسبت.

المشكل ماشي في المال ولا المظاهر، المشكل في الطريقة اللي نفكروا بيها.في العقلية. التغيير يبدأ من إعادة تقييم أولوياتنا وفهم القيم الحقيقية في الحياة،و كيما قال مالك بن نبي "كن أنت التغيير الذي تريد أن تراه في العالم ".
#أمل

مقطع للناس لي تتحجج بالظروف وهي نهار كامل فالتلفون تبع التافهين

بعد عودته لأرض الوطن كثرت بزاف الهدرة عليه و كل فئة واش تقول .. "ان شاء الله يتسفادوا من الخبرة تاعه .. لازم يستغلوه …الخ"
ما علاباليش وش سمعتوا بيه ول لا .. المشكل حتى فالقنوات تاعنا و هدرت عليه .. تحير .. من شدة ما رجع عندنا بزاف الفراغ في حياتنا و ما عندنا ما يندار ، ولينا كلش نحكوا فيه و نفقهوا فيه ، بالإضافة إلى ذلك رجعت عندنا حاجة ولي هي "تقديس البشر" يعني هو صح دار و ساعد والله اعلم و درك الناس تبقى تجبد فالبطولات تاوعه " وكان يسرق و يبعث للجمعيات .. الخ" صح كاينة منها مي كاين بزاف كيفه الفرق بيناتهم هو أنه حكموه و الآخرين لا و ماهيش حاجة صعيبة بزاف و كل انسان و الوقت تاعه و فواش يصلح يعني صرات و فاتت علاش كل مرة نفس الحكاية لي مافيها حتى إضافة و المشكل كي تشوف الناس تقول يستفادوا من الخبرة تاعه و قاع ، كاين بزاف هنا فدزاير كيفه و ممكن افضل منه لكن هاذي هي بلادنا و المشكل انه دوكا كون يخدموه ول يقدر لي يكون كيفه ول افضل منه محتاج بزاف لديك الخدمة ولكن هذي هي التمييز و بزاف عفايس عندنا هنا لا حدود لها ..

كخلاصة للموضوع ، اول شي الانسان يحاول يركز مع العفايس لي يفيدوه و يشوفهم ينفعوه و يشارجي وقت الفراغ تاعه لأنه في حالة ما كان عندك فراغ، تلقائيا رح تبدا تغطي في احساس الفراغ هذا بتعظيم إنجازات الماضي، وتنسى تركز على التقدم في المستقبل، كيما الصفحات الجزائرية لي تحاول تلقى اي حاجة ترفعلها قيمتها بشكل مفرط غير باه تشغل الناس على واقع انو سنين وحنا فنفس البلاصة

ثاني شي "تعظيم الأشخاص" في عوض ما نستفادوا من الاشخاص لي ينفعونا لا بالعكس .. كاين صح ناس تسحق ترفع من قيمتها فالمجتمع من اهل العلم و المخترعين و … الخ ، مي رانا نشوفوا ليوم شكون رانا نطلعوا و ننزلوا و لي عنده الفايدة ثان منسمعوش بيه كامل .. مانيش نقارن بين هذا و ذا لكن راني نهدر بصفة عامة على موضوع راه طاغي جدا فالواقع.

#عمر_الفاروق

لا خير فينا اذا نسينا 😢

اليوم 7 أكتوبر ، سنة كاملة من الفقد ، يوسف شعرو كورلي و هند ( عمو انا خايفة ) و خواتهم و أهلهم و جيرانهم و كل شه.يد في أرض السلام التي لم تذق يوما طعم السلام ، ألا إن نصر الله قريب ، درع بشري راه يحمي الأمة الإسلامية كلها أمام مرأى و مسمع العالم و الله لو اختلقتم ألف قصة ( بيديدي ، تانالاند ... ) لن تشتتو أنظارنا أبدا . لا يسعنا سوى الدعاء فيا رب العالمين و يا أرحم الراحمين انصرهم نصرا عاجلا غير آجل.
#بيازيد

اسمحولي بصح لازم نقوللكم بلي البلد القارة تاعنا يتميز الشعب تاعها بصفة التلحليح ولي تكون ضمن لهفة البدايات، صحابات جدد عائلات جدد ولا مهما تكون طبيعة العلاقة، المهم أنهم يرميو كامل أوراقهم ويكون كلش اوفر دوز فالبداية، محبة زايدة وعطاء بلا حدود وتغاضي على كامل الأخطاء، حتى وين يفوت الوقت ويوالفو بعض، تبدا الحالة تبان والقناع يولي تقيل حتى وين يهبط وكل واحد يقول بركات أنا عييت.. شكون قالك عيي روحك! علاه إنسان عرفتو جديد ديرلو سياسة التبربير! وتخاف عليه من النسمة، حتى توصل لنهاية هكا.. في حين كانت قادرة البداية تكون عادية وكل واحد يدير واش مطلوب بلا زيادة وبلا تقديس للجديد والحياة جميلة
#غيمة

كما لي تلفونك يحتاج شحن و القمر يحتاج وقت باش يرجع بدر و الشمس تحتاج وقت باش تغرب و بزاف أشياء تحتاج وقت باش تتحول من حالة الى حالة اخرى انت تاني تحتاج وقت ، وقت باش تتخطى الازمات و وقت باش تنسى و وقت باش تتأقلم في وضع معين ، صح قادر تلقى إنسان يفوت بلخف لكن في فترة من فترات حياته يتعب نفسيا ، نحن بشر و لسنا في سباق مع الوقت و لنفسك عليك حق .
#بيازيد

كاين مثل نقولوه وشايع بزاف عندنا " البعيد على العين بعيد على القلب " ... بصح كاين موشح أندلسي يقول العكس " ضاق وجدي بكم رحب الفضا، لا أبالي شرقه من غربه " .. بمعنى شفتو الفضاء شحال واسع! الحب والحنين كبير لحد الفضاء حتى لوين ميهمش الشرق من الغرب ، يعبر الموشح هذا على مشاعرنا كي نكونو بعاد على ناس نحبوهم ونحسو بلي ضايقة الدنيا بلا بيهم.
#غيمة

في زمن النبي صلى الله عليه و سلم ، كان انسان اسمو مرثد بن أبي مرثد ، كان يحب وحدة اسمها " عناق " ايا و هادي عناق اكرمكم الله كانت " زانية "

مرثد دخل الاسلام و كانت الخدمة تاعو انو يقوم بتهريب البشر ، يرفد أسير مسلم من مكة و يديه للمدينة يهربو على المشركين

فيوم من الايام كان خارج يسلك واحد ، و هو يمشي رايح يسلكو سمع خطوات بنادم جاي مور الصور تخبى ، فإذا بها عناق شافتو ، قاتلو نتا مرثد قالها ايه قاتلو ارواح تبات عندي اليوم ، قالها لالا مانجيش و الزنى حرام و انا اصبحت مسلما

هنا كيشغل زعفت الطفلة قاتلو مالا دوك نعيطلهم نقولهم راك تهرب فالأسرى ، عيطت للكفار و جراو موراه حتى تخبالهم داخل وحد الكهف و ماصابوهش ، كي راحو عاود خرج و راح يهرب هداك المسلم

لما رجع للمدينة راح للرسول صلى الله عليه و سلم قالو راني سلكت واحد و حكالو وش صرا ، و سقساه يارسول الله ، هل أتزوج " عناق " ؟ ، هنا الإجابة كانت نزول آية و هاد الاية منفصلة يعني نزلت هكاك وحدها

" الزاني لا ينكح إلا زانية أو مشركة والزانية لا ينكحها إلا زان أو مشرك وحرم ذلك على المؤمنين "


و هنا الحكم نزل على مرثد و عموم المسلمين
بتحريم الزنا ، و تحريم زواج التقي بزانية ، و زواج التقية بزاني ، هذا تقريبا ما توصلت اليه من عند بزاف مصادر انه سبب نزول هاد الاية
قد تختلف الروايات طبعا ، و الله اعلى و اعلم

#يـــعقوب

يقول ابن القيِّم رحمه الله: "قلَّة التوفيق، وخفاء الحق، وخمول الذِّكر، ونفرة الخلق، والوحشة بين العبد وبين ربُّه، ومنع إجابة الدعاء؛ تتولَّد من المعصية " |
المقولة هذي تفكرني بقصة زوج صحاب كانوا فايتين على مسجد مع أذان المغرب واحد  بتوفيق من الله سبحانه وتعالى  دخل يصلي و الثاني قالو  انا  منصليش ضرك نستناك برا،  هنا نفهمو بلي الإنسان مخير  بين انو يتبع سبل الهداية ،و يستجيب لأوامر الله و نواهيه و بين انو يبقى على ضلالة ،بصح يتحمل نتيجة اختيارو لي كان بكل وعي منو .

العبرة أنو كثرة المعاصي والذنوب تعمي بصيرة القلب،  و تسدّ أبواب الرزق، و تمنع إجابة الدعاء و تخلق فجوة بين العبد و ربه، و ديما تجي في بالي الآية هذي
" وَما كُنّا لِنَهتَدِيَ لَولا أَن هَدانَا اللَّهُ "
الهداية والله نعمة من عند ربي سبحانو ،و على رأي الصحابة رضوان الله عليهم في قولهم
والله لولا الله ما اهتدينا ولا تصدقنا ولا صلينا.
اللهم انا نسألك الهداية و الثبات.
#أمل

سبب إستحياء الملائكة من سيدنا عثمان بن عفان رضي الله عنه هو أخلاقه وعفته وحسن سيرته، فقد كان شديييد الحياء فأضفى ذلك عليه هيبة ووقارا وحياء من الآخرين حتى من الملائكة

يقول ﷺ : "لكلِّ دينٍ خُلقٌ وخلقُ الإسلامِ الحياءُ"
ويقلك أن الحياء شعار الصالحين ودليل عقل ودين، تلاحظوا أننا في زمن أصبح فيه كلمة مسلم هي لفظ برك أما المسلم اللي يتميز بصفات المسلم مكانش إلا من رحم ربي، كيما قلنا أبسط مثال الحياء رآه في قَرَار للأسف..

لما الطفل يكبر في بيئة مفيهاش حياء بين الوالدين وبين العائلة توقع أنو رح يولي أسوء من البيئة لي عاش فيها،
نعطيكم مثال يقتدى به في الحياء "ذي النورين" كانت الملائكة تستحي منه، وحتى نبي الله ﷺ
ففي حديث عائشة رضي الله عنها قالت أن رسول الله كان مريح في بيتها، كاشفا عن ساقيه، فإستأذن أبو بكر فأذن له بالدخول، ثم إستأذن عمر فأذن له بالدخول، ثم إستأذن عثمان فجلس نبي الله ﷺ وسوى لباسه وإعتدل.. فلما خرج قالت عائشة: دخل أبو بكر لم تبال له، ودخل عمر لم تبال له، ثم دخل عثمان فسويت ثيابك..!
ثم قال : " ألا أستحي من رجل تستحي منه الملائكة"
#ميما

Feelings are just visitors ,let them come" "and go
المشاعر مجرد زوار ،خليها تجي و تروح..
بصح المشاعر هذي ماهيش برك زوار عابرين، يجوا مبعد يروحوا. هي في جوهرها، تجارب مؤقتة مهما كانت الشدة تاعها، سوا كانت حزن، ولا  فرحة ولا  إحباط ولا ايا كان .
لازم برك نعرفو كيفاش تتعاملو معاها بشكل مدروس. عيشوا كل لحظة بكل تفاصيلها، بصح ديروا في بالكم بلي المشاعر هذي مشي  نهاية كل شيء، و مش رايحة تبقى بنفس القوة للأبد ..
#أمل

شفتو رقاقات الثلج كيفاش يذوبو مع تقيسهم الشمس! الجيل تاع دوكا شبهوه ليها لأنو حساس بزاف ويتقلق من أي حاجة صغيرة.. وليه ليه يحس بالإهانة ، يبان هش كيما رقاقات الثلج فسماوه عليها، وهو الجيل لي كبر مع التكنولوجيا والهواتف الذكية، مكبروش فالزنقة واللعب فالطبيعة، تعلمو بضغطة زر يوصلهم كلش..وهدا لي خلاهم يفقدو التواصل الحقيقي، وعلى الرغم من أنو كاين إحصائيات تقول بلي هاد الحاجة زادتهم ذكاء وساعدتهم فالتعلم، بصح كاين أخرى تقول بلي 50% منهم خلاتهم يحسو بالعزلة..
#غيمة

‏أعوذ بالله من شر نفسي.. حين أنطق كلمة لأحدهم أحسبُها عادية وهي تفتت قلبهُ وتحزنهُ أيامًا..
ياجماعة الخير اليوم نهدروا في موضوع الأغلبية منا يشوفوه شيء طبيعي وميستاهلش..

لما تكون تهدر يليق توزن كلامك وتعرف واش تخرج ألفاظ باش متقيسش الشخص الآخر، أتعلموا يا ناس تراعوا مشاعر الناس الكلمة لي متقبلهاش في روحك متقولهاش للناس، واخطينا من عقلية أنا لي في قلبي على لساني وتحسبها صفة مليحة وزعما صريح، وهي فالصح وقاحة، ديفوا تهدر هدرة بنيتك بصح تأثر في لي مقابلك بطريقة مش مليحة وتخليه يحس شيء سيء في نفسوا...

أما بالنسبة للإنسان لي يتقصد أنه يجرح الناس هذا ذنب عظيم قال تعالى : ( وتحسبونه هينا وهو عند الله عظيم )، إنما على المسلم أن يكون هَيِّنٍ، ليِّنٍ، سَهْلٍ فتحرم عن النار 💗
#ميما

حنا كشعب فينا عفسة لما تكون حاجة عوجة نزيدي حنا نكملو عليها مش نديرو ميزة معينة قال معليش عوجة بصح حنا جملناها من جانب واحد فقط ، مثال الطريق السيار شرق غرب حنا كملنا عليه بالشكاير و القرع نتاع الماء تكون تمشي 140 تلقى شكارة جاياتك من السيارة ليقبلك و لا قرعة نتاع الماء يتلاحو من الحافلة لي قبلك. يا سيدي كلش مش مليح غير حنا شعب الله المختار و حنا فينا هوايل الدنيا و عيوبها ، صيف كله وصفحات يشجعو على النظافة و غرس الأشجار نهار ناضو يغرسو خلاو ڨاع التربة تاع سيدي ربي و ڨاع الأراضي و غرسو فوق تروتوار و بطريقة عشوائية وين المفروض الناس تمشي . لما تقرر أنك تشير لأمر مش مليح فالبلاد اتفكر روحك انت وش راك دير و عدله مش انتظارا من أنه الدولة تتحسن حتى هي لا فقط من باب أنك مسلم .

#بيازيد

تخيل إنسان يعيش في بيئة تتبدل فيها الأمور بشكل بطيء وسلبي، متلا المدير فالخدمة يبدا يطلب من العامل يخدم ساعات زايدة بلا مقابل .. بصح بطريقة تدريجية

وهو يقبل لأنو حاسبها حاجة مؤقتة، مبعد يولي يخدم هديك الزيادة وميحسش بلي الوضع قاعد يتدهور ..

كون التغيير هدا صرا ديراكت متلا المدير طلب من العامل يخدم عشر ساعات ضربة وحدة كان حيرفض، بصح كي التغيير صرا تدريجيا ماحسش بالخطر حتى صار الوضع لا يطاق

هاد الحالة عندها إسم ولي هو إسقاط لنظرية " سلق الضفدع " وين الضفدع كي يتحط في ما سخون يبقى يتأقلم معاه، وميديرش رد فعل لأنو درجة الحرارة هديك ماهيش تحرق فيه، حتى يوصل الماء لدرجة الغليان ويموت..

فلازم منتأقلموش مع التغييرات السلبية الصغيرة لأنو حتولي كارثية ومنحسوش بالخطر تاعها حتى يفوت الأوان ..قولولنا في طريقكم على مثال في حياتكم اليومية، يعبر على هاد النظرية.. بلاك يوله شخص وهو ماش فايق .
#أمل