آسِــيـة مـحمّـد.

حبيبة نوڤمبر رغم أنها وليدة مايو،
فالأكثر مفاجآتٍ هو الأقرب للروح .

قال ﷺ :
‏"أكثروا من الصلاة عليّ ليلة الجمعة
‏ ويوم الجمعة فإن صلاتكم معروضة عليّ"
‏اللَّهُمَّ صَلِّ وَسَلِم عَلَى نَبِيِّنَا مُحَمَّد ﷺ.

انخلقنا بفطرة الحدود، حتى لو القلب مستمر يعاند العقل، ولكن في آخر المطاف المسيطر هو فطرة الحدود فينا..
سبحان الله كل جزء مننا عنده حد معين تنتهي فيه كل علاقة ويقدر يتخطى كل شخص مهما كانت غلاوته في السابق..
العين عندها حدود النظر، والأذنين برضوا عندها حدود، اللسان والإيدين وطبعًا العقل أولًا وآخرًا..

لما كل شيء فيك يتفق على إن هالشخص قطع الحدود عندها، العين حتعاف شوفته، واللسان حيعاف اسمه، والإيدين حتبطل ترجفله وتعاف كل لمسة تحسست بيه، والعقل حيعاف التفكير فيه وحينكر كل لحظة عاشها معاه من قبل على إنها حقيقة..

حتى لو عضلة القلب استمرت تعاند وتحب، حيطغوا عليها حدود جسمك بالكامل، وتقعد كل حاجة فيك رافضة الشخص صوت وصورة ووجود، وأكثر ما يتردد بيه ( أنا كيف كنت مع هالشخص من قبل؟) .

والحمد لله على نعمة الحدود.

شعلمك ع الخيل يا ابن المراجيح!

كثرة أحبابك سبب يلهمك الطمأنينة ودافع لكل وَنس تحس بيه.

الله يديمهم جنبنا طول العمر.

تقرّ عينيّ المرء بصُحبته ♥️..

صاحبتي ورفيقة عمري ودربي، ومش بس هكي.. هي واحدة منا وفينا في عيلتي، عشنا مع بعض سنين طويلة بكل مافيهم من فرح وسعادة وظروف وأوقات صعبة، شدتني لما رخيت يدي من أشباه الصاحبات، غمرتني في حضنها لما طعنوا في ظهري، صاحبتني بكل ما فيا، حبتني بلا شروط ومكاني في قلبها انا متأكدة منه لأن عيونها تحكي بيه..

صُحبتي بيها ماكانتش صدفة، أنا اخترتها وهي اختارتني من بعد جربنا لذع وغدر المزيفات، كنا ومازلنا لبعض إنتقائيات جدًا، مانفضلش حد عليها لو مهما دار، ولا هي انحازت لغيري لو شن ما قدّملها..
ولا عمري خيبتلها ظن، وحاشا قلبها لو يوم خيّبني.

في أكثر أيامي العادية كانت جنبي وماخلتنيش ولا لحظة، فما بالك في هاليوم الموعود شن تتوقعوا؟!

عمرها ما فصلتني عليها حتى بالكلام، ظرفي ظرفها وفرحي فرحها، مناسبتي هي مناسبتها، واهتمت بكل تفاصيلي من غير أي نسيان أو نقص في أدق التفاصيل.

الحمد لله على نعمة وجودك وقُربك،
مايحرمني منك يا حبيبة القلب إنتِ ♥️♥️

📌🎓14/11/2024

الحمد لله الذي أنعم عليّ بلذة البدايات، وأعانني على الدرب وثقل الخطوات، حتى وصلتُ هاهنا للشعور بفرحـة النهايات.

تم بالأمس تتويجي كخريجة لكلية تقنية المعلومات وتحصلت على درجة البكالوريوس في هندسة البرمجيات بتقدير عام ممتاز.

الدعاء مش مجرد عبادة تتقرب بيها لله وحده وبس، ادعي لكل الأسباب، ادعي لطاعته ومغفرته وإنك تنال رضوانه، وادعي لحتى تتعلى درجتك ومقامك، ادعي لأنك محتاج السند من ربي مش من حد غيره، ولأنك كل يوم قاعد تتعرض في خفاك وظهرك لأشخاص تحاول اضرك وتوصل في كيانك بأذية، لأنك محتاج للجنود الخفية اللي يسخرهالك ربي تحميك وتصد الأسهم الضارة تجاهك..

ادعي لأنك الأحوج للفائدة من الدعاء
فالله غني عني وعنك وعن العالمين.

الفكرة مش في إنهم حيطمعوا منك العرجون كان مديتلهم تمرة.. هي في إنهم مستعدين يقلعوا نخلتك أول ما يودهم غيرك بنفس التمرة.

ماتخليش لومك على نفسك يمتص السلام النفسي منها، مش كل حاجة صارت شرط تتلبس معاها دور الضحية، أو تخلي أي ثغرة بسيطة يدخل منها شك إن ليك إيد فيها، فيه مواقف وقصص وأشخاص وحكايات غريبة انجبرنا عليها جبر قاطع، يابتعيشها يابتعيشها مافيش ثالث، فبطّل تحطها في دوامة اللوم والتأنيب، لأنها وإن كانت مش السبب حتجذبها غصبًا وتجرها لساحة الحادثة وتوقعها في عواقبها السلبية..

حاول تتعايش في منتصف الأدوار، لا جاني ولا متهم، حاول تتعلم فنيات المنتصف وكيف تحافظ على نفسك في برّه، لأننا في بعض الأحيان والحالات محتاجين نقعدوا في المنتصف حتى وإن كان بيوجعنا بس حينفعنا.

طول ما البلاء مخليك صابر وشاكر ومش جاحد، امدحه.

مساء الورد✨

انا جاية نقوللكم شيء مهم وحسّاس

شوفوا معاي..
عمرك عمرك في حياتك ماتعطي لشخص قيمة أكثر من اللي قدمهالك ولو كان هو كويس جدًا معاك ومش منقص احترام، اعطيه بنفس مايعطيك، وبادل بالإحترام وبادر في الوقت المناسب فقط، وخليك على نفس هالمنوال لعند ما هووووب يصير موقف أو أي لقطة بسيطة يبينلك فيها الطرف الثاني إنك ميت عليه اهتمام، أو تحس معاه إنك صغير المقام وهو مكبر روحه قدامك.. دغري انسحب انسحاب مش تكتيكي لا.. انسحاب سلمي واضح، و رد اعتبار لحظي..

لأنك شخص يستاهل زي مايعطي ياخد، وكل إنسان عنده قدره واحترامه محفوظ ولا أي حد غيره المفروض يتجرأ يتعدى عليهم..
بس للأسف حتواجهوا زي هكي موقف وحتنحطوا في نفس التصرف، مايهمش من ماكان دارها معاك، المهم نفسك عليها فوووق وخلي الكل يعرف إن مكانتها عالية وغالية وتقدر تتخطى كل من يقرب جيهتها ويمسها بتكبر وبُغض..

خليك قوي، وبالمعنى الحرفي حتكون هكي لما تقدر تتخطى كل من مَس مكانتك بسوء، سواء صديق، زوج، خطيب، أخ، صاحبة، أخت، زميلة، حد معروف ومشهور، حد تربطك بيه علاقة عمل أو مصلحة… كلهم يطيحوا ويسقط شأنهم بمجرد يقربوا من احترامك..وقتها صار لازم تغادرهم بسلام


ونتمنالكم كل الحب بأشكاله وكل الخير اللي تستاهلوه، شخص شخص 🤍

الجاهل هو من يعيب غيره في ميزةً تمناها فيه.

لا تُبالغ في وصف مشاعر لا تحسها فعلاً، لا تتحدث عن بقاء أبدي وأنت غير متأكد من أنك قادر على مواجهة كل أسباب الفراق، الإنسان إبن لسانه، فلا تتخذ لسانك وسيلة طائشة لثرثرة أنت عاجز عن تنفيذها، فلا شيء يقتل الإنسان مثل تعلّقه بآمال تُقال في ساعة إنشراح ثم تُطوى وتُبتلع ‏فلا يعود لها وجود ولا يعود لها صدى، كُن متأكدًا تمامًا من أن ما تتحدث عنه هو ما تشعر به وهو تمامًا ما تستطيع تقديمه.

حلو إنك تكون إنسان بالنسبة لغيرك وكأنك محط راحة وعفوية، واخدين راحتهم التامة معاك، لما بيتكلموا مايفكروش في هل حتفهم غلط أو حتنجرح من البصارة، ولما بيفكروا يقصدوك في شيء معين مش حيراود حد منهم أي تردد أو شك في رفضك، والله حلو إنك تكون شخص سهل مع الناس مش متخوفين منه ومن حُكمه على التصرفات والمواقف.

الموقف حار،
لكن الضريبة برود،
والخاسر أكيد مش أنا.

ينتهي كل شخص مهما كان قدره وكُبر معزته لما يقطع خط حسّاس وشخصي من حدودي.

من مدة مصورتها
وفكرتيني بيها شكل ودقة ولون🤎