BAC 2025

راك مقلق و خايف من الاختبارات :

1️⃣ الإمتحانات الفصلية هي مجرد امتحانات عادية كتلك التي اجتزتموها في السنوات الماضية، يعني ما تتقلق ما تخاف، لكن برك باش تعرف روحك وين راك دور !!

2️⃣ راح تشوف روحك اذا تعرف تتعامل مع المواضيع و تقيم نفسك فيها، الموهيم انت أي مادة تعامل معاها كأنها مادة مهمة باش تعرف روحك في كل مادة اذا مزال عندك نقائص ولالا

3️⃣ هاديك تاع تخلي الورقة فارغة و تخرج قبل الوقت و الصح في الباك خليك منها، انت جاوب على الشيء لي تعرفه و لي ما تعرفوش حاول فيه حتى و كانت محاولتك خاطئة، وكي تتلاقى بتمارين ذات افكار جديدة " لي تبانلكم صعبة " ما تتقلقش و تقول ما نجاوبش !!

• ملاحظة : الإختبارات فعلاً حاجة مهمة لتقييم مدى تقدمك ولكن ما تخليهاش تأثر عليك في حالة ما خدمتش مليح فيهم

كيفاش تتحصل على نقاط ممتازة في مواد الحفظ ✨️ :

1️⃣ لازملك تفهم الدرس مليح اولاً و تربط بين الأفكار و العناصر تاعو ما تفهمش كل حاجة وحدها

2️⃣ كذلك عاون روحك بالخرائط الذهنية و المخططات بزاف يساعدوو + نوع في مصادر تلقي المعلومات باش ما تكرهش مرة فيديو يوتيوب مرة كتاب مرة مخطط كل مرة كيفاه

3️⃣ تحفظ و تكرر الحفظ تاعك طوال السنة الدراسية + تعرف منهجية الإجابة على الاسئلة لأنه مرات تكون تعرف المعلومة و ما تعرفش المنهجية و بذلك ما تديش نقطة ممتازة

4️⃣ وقتاش نبدا نحفظ : نقترح عليك تفهمي كل درس في وقتو في الفصل الاول و تحفظي لاختبارات الفصل الاول و خلال الفصلين الثاني و الثالث تكملي تحفظي الدروس الجديدة و تكرري الدروس السابقة

تقنية التلخيص ✅️ :

1️⃣ التلخيص هو إعادة كتابة نص ما في حدود ثلث حجمه بمراعاة استعمال أفكاره الأساسية بنفس عددها وترتيبها ونمطها وبأسلوب ذاتي مغاير ومختلف عن أسلوب الكاتب.

2️⃣ بأسلوب آخر : أعد كتابة نص الامتحان بأسلوبك الخاص ولا تتأثر بأسلوب الكاتب مراعيا الحجم بحيث تقترب من ثلث حجم النص الذي تلخصه بزيادة أو نقصان قليلين، معتمدا على الأفكار الاساسية التي طرحها الكاتب واستغنى عن الشروحات والشواهد وحواشي الأفكار ولاتخرج عن مضمون النص بإضافة أفكار خارجة عنه ( إن فعلت فأنت تشرح وتحلل ولا تلخص )
ملاحظة : التلخيص يصلح للنصوص الشعرية وكذا النثرية

3️⃣ مراحل التلخيص :
• قراءة النص جيدا قراءة متأنية واعية قصد فهمه
• شرح مفرداته الصعبة وتبسيط أفكاره المغلقة
• تحديد أفكاره الأساسية وفصلها عن الأفكار الجزئية و الشروحات وحواشي الأفكار.
• تحديد نمط النص قصد محاكاته
• اخفاء النص الأصلي و الاعتماد على المخطط فقط
• بناء النص بمراعاة الشروط الثلاثة ( الحجم والمضمون واللغة السليمة المغايرة للغة الكاتب )
• مقارنته بالنص الأصلي ( التقويم الذتي )

4️⃣ ملاحظة : مهم جدا التدرب على تلخيص نصوص متنوعة حتى يصل التلميذ إلى مرحلة التمكن من التقنية خصوصا لأنه سؤال شبه ثابت في البكالوريا ويخص في الغالب بثلاث نقاط مهمة في العلامة النهائية ومن السهل الحصول عليها

لكل انسان مازال مابداش ✨️ :

1️⃣ لكل واحد راه يقول راح الحال والناس بدات وناس أخرى راي كملت البرنامج وأنا مستحيل نلحق! صدقني يا صديقي، كاين بزاف عباد وبزااف عباد والله العلي العظيم، كانوا أذكياء وكانوا مجتهدين وكانوا ديما فايتين الاستاذ ولكن مالحقوش لأحلامهم! جابوا معدلات ضعيفة!! علاش؟ لأنهم إرتكبوا أخطاء! قادر كانوا مايرتاحوش، ولا مايقراوش بذكاء ولا عندهم طريقة خاطئة! ولكن صدقني، كاين بزاف ناس لي حرفيا بداو في فيفري ولحقوا لمعدلات الإمتياز! تسما دائما أبدا مهما كان الوقت. ذك نجيو للسؤال الشهير : كيفاش نبدا؟ معليش، لازم يكون علابالك بلي المواد تنقسم ل3 أقسام : مواد علمية ومواد حفظ واللغات.

2️⃣ أبدا كل مادة بالشوي، يعني ماتحوسش زعما مع تبدا الرياضيات اليوم تكملها اليوم، أبدا كل حاجة شوي وماتتحمسش في النهار الأول وتعميها، أبدا كل وحدة وكل درس أقراه من الكتاب المدرسي ولا من اليوتيوب ولا في دروس الدعم، وأمشي معاه بالشوي، يعني ماتزربش مع الأول حتى تتأقلم، لازم يكون علابالك بلي أهم حاجة الدرس ومبعد التمارين متدرجة الصعوبة

3️⃣ لكن كاين حاجة نذكروا بيها :
- قبل ما تبدا الدراسة لازم تكون منظم مراجعك، يعني وشي هوما الأساتذة ولا الكتب لي راح تقرا منهم؟
- لازم تنظم وقتك وتدير مكان مخصص للدراسة + نحي كل ما يشتت تفكيرك ولا يضيعلك وقتك كيما التيليفون و الخرجات.
- لازم تكون على قناعة تامة بلي كي تجتهد وتجتهد فعلا، راك راح تلحق للمعدل لي حبيتوا صح

4️⃣ و اخيرا حبيت نقولكم : البداية تكون من اليوم، دير برنامج و ابدا، حاول تنظم وقتك و تبدا بالمواد الأساسية لأنه الوقت راه يمشي بالخف، لازم تعفس على قلبك و تبدا و تتجنب التسويف و غدوة نبدا و هديك الحجج لي ما تخليكش تقرا، ما تهملش المواد الثانوية لأنها تعاونك و الكثير من من الطلبة بفضل هذه المواد نجح في الباك ولا طلعلو المعدل و لحق للامتياز، سأحاول ان اجمع لكم أفضل الملخصات التي يمكنكم الاعتماد عليها، سأرافقكم حتى النهاية

كيفاش تدي علامة ممتازة في الفلسفة :

لازم تعرف بلي المقال النموذجي لازم يتوفرو فيه 3 شروط :

1)- المنهجية الصحيحة.
2)- المعلومات الصحيحة.
3)- اللغة السليمة.

1️⃣ يتسما لازم الحاجة الأولى تولي تعرف المنهجيات مليح مليح وبالتفاصيل تاعها.

2️⃣ ماذا نقصد بتفاصيل المنهجيات؟ أقصد أن تعرف مقدمة الجدل مما تتكون (تمهيد - تعريف - جدال فلسفي - إشكالية) وأن تعرف مكونات الموقف وكذلك النقد والتركيب والخاتمة ..... وهكذا مع باقي المنهجيات.

3️⃣ وبعدها تبدا تفهم المقالات تعرف المواقف وتبحث عن أفكار الفلاسفة ونظرياتهم وحججهم وحفظ أقوالهم. كلما كثرت الأفكار والحجج والأقوال كان ذلك أفضل.

4️⃣ راح تقولي منين نجيب هذو كامل راح نقلك كاين الكتب الخارجية وكاين اساتذة في اليوتيوب وكاين اساتذة في الانستاغرام وتلغرام يحطو مقالات.

5️⃣ بعدما تفهم المنهجيات مليح ويكون عندك حجج واقوال وكلشي لازم تطلع على المقالات لي يكتبوها الأساتذة في الكتب ولا من أي بلاصة المهم اقرا المقالات تاع الأساتذة باش تشوفهم كيفاش يكتبو المقال وتدي منهم الأسلوب.

6️⃣ آخر خطوة هي أنك تحاول تكتب مقال بنفسك و علابالي بلي مع البداية تجيك صعيبة بصح تكسر راسك معاه شوي تتسرح وتولي تعرف تكتب وحدك بسهولة.

مزالك حاصل مع مادة الرياضيات ؟ ✨️ :

1️⃣ مادة الرياضيات فيها 20 عادي خصوصا كي تقراها من لول وتقراها بالطريقة الصحيحة، هي مادة تعتمد 95% على الفهم و5% على الحفظ يعني حط في بالك أول شيء لازم تقراها في وقت لي تكون مركز فيه مليييييح، تقدر تقراها في الليل ولا الصباح كي تكون vraiment ناشط، تسما لوكان تكون ماكش مركز غير ماتقراش رياضيات لأنو ماكش راح تستفاد

2️⃣ فهم الدرس والقوانين، الدرس في الرياضيات راح يكون بسيط جدا يعني مافيهش حاجة كبيرة لكن لازم تكون فاهموا مليح

3️⃣ لازم تحفظ القوانين والمفاهيم، يعني ماتصلحش زعما تبدا تحل التمارين ونتا ماكش حافظهم، حاول تحفظهم ويكون علابالك بيهم + كي تبدا تحل التمارين في البداية حط قدامك ورقة فيها أهم القوانين باه ترجعلهم كي تنساهم

كيفية تنظيم الوقت بين الثانوية والدروس الخصوصية والاجتهاد النفسي ✨️ :

• أول حاجة لازم ننظموا أولياتنا، يعني لازم كامل نفهموا بلي الاجتهاد في المنزل هو أهم شيء في عام الباك، كاين بزاف ناس قراو عند أساتذة ملاح وقراو في أحسن الثانويات وفي النهاية كاين حتى لي ماجابش البكالوريا ولا مالحقوش على المعدلات لي حبوها، علاش؟ لأنهم مكانوش يجتهدوا في المنزل ومكانوش يعاودوا دروسهم ومكانوش يحلوا التمارين، كانوا من هاذاك النوع تع يشوفوا الأستاذ يحل وتبالهم فاهمين لكن في الصح مكان والو، إذن : الدراسة في المنزل أهم شيء!!!!
• الان نجيو لطريقة تنظيم الوقت : كالعادة، مكانش حاجة ستوندار للناس كامل لكن كاين قواعد لازم نمشيو عليها :

1️⃣ يا جماعة راو مكانش الوقت!! لازم تنحيو جميع الملهيات، نقصوا التيليفون ونقصوا الخرجات ونقصوا التمسخير بزاف!

2️⃣ ماتديرش ليكووووور بزاااااف!! دير في المواد لي تحتاجها برك ولي ماتفهمهاش برك ماشي دير عند بزاف اساتذة لأنه صاحبك مداير عندهم ولا لأنه أستاذ مشهور، راح تضر روحك برك

3️⃣ أجمل ليكور تاعك في أوقات مع بعض وفي بلاصة وحدة باه مايروحلكش بزاف وقت في الذهاب والإياب

4️⃣ إمنح حصة الأسد للاجتهاد في المنزل، يعني كل حاجة لازم تعاودها في المنزل وحذاري ماتعاودش هديك الحاجة لأنو راح تطفرها غير في روحك

لازم تقرا 12 ساعة باش تجيب معدل 18 😨 :

1️⃣ اكبر كذبة و اكبر خطأ في هذه الفترة هو انو تربطو نتيجتكم بعدد ساعات الدراسة مثلا تقول لازم في هذه الفترة نقرا 12 ساعة باه ندي الباك 18 ...

2️⃣ صدقوني مانزيد عليكم في كلمة !! ماشي مهم شحال تقرا مهم كي تقرا تكون انتاجي و تفهم و تستوعب واش قريت + تستفاد من كل دقيقة قعدتها فالمكتب تاعك ..

3️⃣ اما عدد الساعات يختلف من انسان لاخر كاين انسان راسو خفيف كيما نقولو بالعامية يعني يقرا 4 ساعات تكفيه و كاين لي ثقيل شوي مالا يشد 6 ساعات و هكذا

4️⃣ المهم اعرفو تنظمو وقتكم و اعرفو تسيروه برك والله المهم و الاهم هو الانتاجية كي تقعد تقرا اقرا صح لاشتا ساعة المهم اقرا صح صح ماتتمسخرش و ماضيعش وقتك

راك خايف تقرا و تتعب و ما توصلش وين حاب ‼️ :

1️⃣ شوفو حبيت نقولكم حاجة، على قد تعبكم تجيبو، تقرا قيس 12 تجيب 12 !! تقرا قيس 15 تجيب 15 !! تقرا قيس 18 تجيب 18!!، يعني ما تقولش في بالك انا نقرا شوية و نجيب بزاف، لي حاب معدل ممتاز و شهادة باكالوريا بإمتياز يتعب و يقراااا و يدير واش يقدر، ما تقولش انا نقرا غير شوية و ندي بزااف انا عبقري ولا ذكي ولا راسي خفيف

2️⃣ في نفس الوقت ديرو ثقة في نفسكم ! كي تتعب قول تعبت و قريت و بإذن الله نوصل، يعني الثقة بالنفس تجي بعد ما تتعبو و تقراو، و قد ما قريت قول لازم نزيد، صحا اليوم قريت مليح غدا نجرب نقرا اكثر

3️⃣ قد ما حليت تمارين " متنوعة " قد ما راح يجيك موضوع الباك easy، قد ما كررت الحفظ تاع تاريخ و جغرافيا مثلا قد ما يجيوك الافكار نهار الباك و تكتب و تحط معلومات و افكار و امثلة، المصحح مستحيل يشوف ورقة ثرية بالافكار و ما يمدش لمولاها 19/20، قد ما تدربت على الفقرات تاع الانجليزية و الفرنسية قد ما جاوك الكلمات و الافكار باش تكتب فقرة مميزة و بالتوفيق 💗

كيفاش تتعامل مع مادة الفيزياء ✨️ :

1️⃣ كيفية دراستها :
• الدرس : لازم تقرا الدروس تع كل وحدة مليح مليح، يعني لازم تفهم كل التفاصيل، حط بالك مليح باه تفهم ميش تحفظ! ( باك 2023 ) كاين بزاف ناس ماجابوش نقاط مليحة وجاتهم الفيزياء صعيبة لانه كانو يحفظوا التمارين ماشي يفهموا!! ماكانوش فاهمين الدروس!! يعني انت لازم تفهم الدرس ملييييييح! ولازم تفهم منين جا القانون قبل ما تحفظوا وقبل ما تطبقوا

• الملخص : لازم يكون عندك ملخص خاص لكل وحدة! أقل شيء لازم تكتب فيه قوانين الوحدة ومفاهيم أساسية لي لازم تكون شافي عليها قبل ما تحل أي تمرين، هاذ الملخص راح يفيدك في 3 حاجات! الأولى تثبيت الوحدة، يعني كي تقرا الدرس وتفهموا وتزيد تكتبوا وتلخصوا راح يترسخ في دماغك، الثانية راح يعاونك في حل التمارين وثالثا راح يعاونك في نهاية العام كي تكون تراجع وتنسى حاجة في اي وحدة تقدر مباشرة ترجع للملخص تاعك

• التمارين : أبداو تحلوا تمارين بعد نهاية كل وحدة، وحلوا تمارين متدرجة الصعوبة، يعني من السهل للصعب، وماتحلوش نفس الفكرة في أشكال مختلفة!!! حذاري!! لأنو لوكان يجيبلك في الباك فكرة جديدة راك ماتقدرش تحلها! يعني دير كراس خاص لحل التمارين وأبدا تدريجيا، أبقى تحل تمارين على الوحدات السابقة، يعني كي تكمل أكسدة إرجاع وتدخل ميكانيك، أبقى تحل أكسدة، وكي تكمل ميكانيك، أبقا تحل أكسدة إرجاع وميكانيك وهكذا، راو يكفيك الوقت ماتخافش

2️⃣ بالنسبة للمراجع :
• الأساتذة : كاين زدون، ترير، عبد اللطيف وغيرهم... هاذوا كامل ملاااااح وبزاف من تلاميذهم لحقوا للعلامات الكاملة! يعني خيروا أستاذ واحد وتبعوه
• بالنسبة للتمارين : كاين بزاف des guides وأشهرهم تأشيرة النجاح للأستاذ شنايت لي تعتبر مليحة بزااااف واعتمدت عليها شخصيا لأنو حرفيا تمارينها راهم من السهل للصعب تسما ماتخممش في الجانب هذا + فيها ملخص لكل وحدة ومواضيع تجريبية لنهاية السنة

كيفاش تتخلص من الستراس تاع الباك ✨️ :

1️⃣ للتخلص من الإجهاد أثناء فترة البكالوريا، تقدر تتبع عدة استراتيجيات. أولًا وقبل كل شيء، يُفضل أنو تنظم وقتك بشكل جيد. قم بإعداد جدول زمني يحدد أوقات الدراسة والراحة والمراجعة. تأكد من تخصيص وقت كافٍ للنوم، حيث أن النوم الجيد يلعب دورًا مهمًا في تقليل التوتر وزيادة التركيز.

2️⃣ قم بتقليل التشتت والعفسات لي يضيعولك وقتك. استخدم تقنيات الإدارة الزمنية مثل تقنية "بومودور" لتنظيم وقت الدراسة والاستراحة. اجعل هاتفك المحمول في وضع "عدم الازعاج" أثناء الدراسة لتجنب الانحراف ولا طيشوا ديراكت

3️⃣ تأكد من الغذاء الجيد والرياضة اليومية. تناول وجبات صحية ومتوازنة لتمد جسمك بالطاقة اللازمة. يا جماعة مارسوا التمارين الرياضية بانتظام، پيسك النشاط البدني يساهم في تحسين المزاج والتخلص من التوتر.

4️⃣ ماتترددش في طلب المساعدة من المعلمين أو الأصدقاء إذا واجهت صعوبة في فهم المواد. التعاون ومشاركة المعرفة مع الآخرين يمكن أن يساعد في تقليل الضغط

5️⃣ من المهم ثاني أنو تمنح نفسك وقتًا للاستراحة والاسترخاء. امنح نفسك الوقت لممارسة الأنشطة التي تستمتع بها مثل القراءة أو الاستماع للموسيقى أو ممارسة الهوايات.

✅️ أخيرًا لا تنسى أن البكالوريا هي مرحلة مؤقتة في حياتك، وستمر بنجاح. حافظ على تفاؤلك وقدم كل ما استطعت في جهودك، وتذكر أنك قادر على التغلب على أي تحدي

كيفاش تتعامل مع مادة الرياضيات ✨️ :

1️⃣ مادة الرياضيات فيها 20 عادي خصوصا كي تقراها من لول وتقراها بالطريقة الصحيحة، هي مادة تعتمد 95% على الفهم و5% على الحفظ يعني حط في بالك أول شيء لازم تقراها في وقت لي تكون مركز فيه مليييييح، تقدر تقراها في الليل ولا الصباح كي تكون vraiment ناشط، تسما لوكان تكون ماكش مركز غير ماتقراش رياضيات لأنو ماكش راح تستفاد

2️⃣ فهم الدرس والقوانين، الدرس في الرياضيات راح يكون بسيط جدا يعني مافيهش حاجة كبيرة لكن لازم تكون فاهموا مليح

3️⃣ لازم تحفظ القوانين والمفاهيم، يعني ماتصلحش زعما تبدا تحل التمارين ونتا ماكش حافظهم، حاول تحفظهم ويكون علابالك بيهم + كي تبدا تحل التمارين في البداية حط قدامك ورقة فيها أهم القوانين باه ترجعلهم كي تنساهم

4️⃣ حل!!! طبق!!! بزاف تلاميذ يديرو الغلطة تع يتبعوا الشرح تع الأستاذ وتبالهم فاهمين مي كي يبداو يحلوا التمارين يلقاو رواحهم حابسين، لأنو ماكانوش يحلوا من قبل، لذلك حلوا التمارين من بداية العام

5️⃣ ملاحظات إضافية :
• كي تبداو وحدة معينة، مثلا الدوال، راكم ماتقدروش تحلوا تمارين شاملة، فبالتالي حاولوا تحلوا تطبيقات بسيطة على وين وصلتوا ومبعد كي تكملوا حلوا تمارين شاملة
• مع مرور الأيام، وتفوتوا من وحدة لوحدة، أبقاو حافظوا على مكتسباتكم، يعني كي تدخلوا للمتتاليات، أبقاو حلوا تمارين الدوال، وكي تدخلوا الإحتمالات أبقاو تحلوا تمارين للوحدات السابقة باه ماتنساوهمش

كيفاش تتعامل مع مادة الإنجليزية + الفرنسية ✨️ :

1️⃣ أنا نشوف بلي تقدروا تطلعوا بيهم معدلكم بكل سهولة و أغلبية المتفوقين يجيبوا فيهم نقاط ممتازة، وهنا لازم تعرف حاجة : ماشي لازم تكون متمكن من اللغة باه تجيب فيها نقطة مليحة، كاين بزاف تلاميذ لي جابوا نقاط كاملة وقريبة من الكاملة ومستواهم في اللغة عادي

2️⃣ هذا أهم شيء في اللغات وهو أنو لازم تفهم على واش راك تقرا، يعني تفهم les thèmes وتفهم المواضيع

3️⃣ لازم تقرا مواضيع بزاف ونصوص بزاف لأنو الفرنسية و الإنجليزية عام الباك يعتمدوا على الثروة اللغوية وعلى كمية المصطلحات لي فاتت عليك، يعني لازم تقرا نصوص الكتاب المدرسي ونصوص مواضيع البكالوريات السابقة وتهز منها كلمات لي ماتفهمهاش ولا جديدة بالنسبة ليك

4️⃣ لازم تميتريزي الأسئلة المتكررة، كاين بعض الأسئلة لي تتعاود سواء في الفرنسية أو الإنجليزية، يعني تلقاهم يتكرروا بزاف في مواضيع الباك، بعبارة أخرى أعرفهم وأضمن نقطتهم

5️⃣ لازم تدير ملخص صغير حول القواعد، لأنو كاين جزء أساسي في الموضوع لي فيه ديما قواعد، يعني لازم تتمكن منهم

كيفاش دير ملخصات ✨️ :

1️⃣ أول حاجة لازم تعرفوها هي أنو الملخصات شيء ضروري ليكم كاااامل و تقريبا في جميع المواد ( باستثناء بعض مواد الحفظ )، راح تقولي علاش ضرورية؟ نقولك بكل بساطة كي يلحق مارس ما تقدرش ترجع تحوس على قوانين الكيمياء في الكراريس والمجلات، لازم يكون عندك ملخص فيه القوانين باه يسهل عليك الأمر

2️⃣ كيفية إعداد ملخصات ؟
• الفهم الجيد للدرس : ماتقدرش تدير ملخص لحاجة ماكش فاهمها! أفهم ثم لخص، كاين بزاف تلاميذ يبداو زعما يلخصوا ومبعد يقولك نفهموا من الملخص! لالااااا أفهم، لأنو كي تفهم راح تعرف وش تحط في الملخص تاعك!

• حطوا الرسمي : بالنسبة لمواد الفهم، حط القوانين والمواد المعرفية الأساسية، يعني أكتب وش تحتاج فقط!! ماتزيدش التفاصيل طول لأنو راه ملخص ماشي درس!! حط فيه رؤوس أقلام وعناوين وعناوين التعاريف باه مبعد في نهاية العام تعرف على واش تركز

• نظم ملخصاتك : في مارس، لازم يكون عندك ملخص باين تع الدوال وملخص باين تع المتتاليات ميش تبدا تحوس وماتلقاش ولا تلقا روحك درت ملخص تع وحدة و وحدة أخرى لالا

3️⃣ من المستحسن تديرو ملخصات في أوراق بيضاء وتحتفظوا بيهم في حافظة ولا كلاسور باه يبقاولكم

كيفاش تنظم وقتك في أيام الدراسة ✨️ :

1️⃣ بالنسبة للدراسة : كنت نقرا في الثانوية يوم كامل! من 8 إلى 5، وهنا نلقاو 3 أنواع من الناس : كاين لي يقرا غير في الليل، كاين لي يقرا غير الصباح ( يرقد بكري )، وكاين لي يقسم وقتو، هنا انت لازم تجرب وتشوف روحك! أنا شخصيا واحد من الناس كنت نسهر بزاف تلقاني نقرا من 6 حتان 12 ( طبعا ننوض ناكل، نصلي، نريح شوي ) ولكن دراستي كامل كانت في الليل لأنو كنت كي نوض صباح نبقى غير نثاوب ومنكونش مركز طوووول، لكن كاين لي تلقاهم يقراو في الليل بصح يرقدو جوايه العشرة وينوضوا صباح على الخمسة تلقاهم يحفظوا ولا حتى يقراو مواد فهم ويحلوا تمارين، فبالتالي انت لازم تجرب روحك، جرب خطرة أسهر وجرب خطرة نوووض صباح بكري وشوف روحك وين تكون مركز أكثر

2️⃣ بالنسبة للمواد : كاين لي تلقاهم يقراو مادة واحدة فقط وكاين لي يقراو مادتين علميتين في اليوم ( كيما أنا ) وطبعا دايما يزيدو معاها مادة أدبية، يعني كمثال :
من 6 إلى 7:30 : رياضيات
من 8 إلى 9:30 : فيزياء
من 10 إلى 11 : فرنسية
هذا مثال على أمسية تقرا فيها ثلاث مواد بأريحية، وطبعا كلما اقتربت البكالوريا أكثر كلما زاد اجتهادك وزاد الوقت الذي تمضيه في كل جلسة وكل مادة

كيفاش تكون المراجعة اليومية بالنسبة للمواد الأساسية ✨️ :

1️⃣ مراجعة ما درسته في الثانوية أو في دروس الدعم أو في اليوتيوب، يعني أبدا بالدرس ولا بواش درت مع الأستاذ، أفهموا مليح وماتفوت حتى جزئية فيه، قادر هاذاك التفصيل يجيك عليه تمرين في الباااك، فحذاري

2️⃣ لازم يكون عندك ملخص، صدقني راح يفيدك بزاااااف، طبعا ميش أي حاجة تديرلها ملخص وماشي كل درس تديرلو ملخص وحدو، ولكن حاول كل وحدة تديرلها ملخص تاعها لي تقدر ترجعلو في مارس وتفهم منو الدرس عادي

3️⃣ حاول ثبت واحفظ ما يحتاج للحفظ، هناك في العلوم وحتى الفيزياء ما يحتاج للحفظ من تعاريف نظرية وبروتوكلات تجريبية وعبارات علمية، يعني أتأكد أنو ماتهملش مثل هذه الجزئيات لي تجيك في الباك ويكون عليها نقطة ونقطتين وحتى ثلاث نقاط في بعض الحالات

4️⃣ إبدأ بحل التمارين من السهلة للصعبة، من الأسئلة البسيطة ذات المستوى المتوسط إلى المستوى الصعب، تقدر تستعين بالكثير من المراجع، إبتداءا من دروس الدعم والكتاب المدرسي، في العلوم تقدر تستعين بكتب الأستاذة كتفي، في الرياضيات عندك الكثير من الخيارات مثل كتب الأستاذ نورالدين أو عبد الباسط أو سلسلة المغني وغيرها، في الفيزياء هناك تأشيرة النجاح وغيرها، لكن تأكد أنو ماتستعملش الكثير من المراجع، يعني إختار مرجع وأبقا معاه

الثقة في النفس عام الباك ✨️ :

1️⃣ لازم يكون عندك هدف وخطة واضحة، لوكان مايكونش عندك هدف وخطة واضحة راو من المستحيل، حرفيا من المستحيل أنك تكون واثق من نفسك، كي يكون علابالك بلي عندك هدف وخطة، المهمة ستكون أسهل

2️⃣ لازم تتبع هاذيك الخطة!!!! لازم تلتزم بأهدافك اليومية وتمشي مع أساتذتك من أجل الوصول لهدفك، كاينة حكمة أمريكية رائعة تقول: "الثقة في النفس تأتي من إنشاء خطة واتباعها للوصول إلى هدفك"

3️⃣ أرجوووووووووووك، لا تقارن نفسك، راح تلقا تلاميذ خير منك، راح تلقا تمارين صعيبة عليك، راح تلقا أساتذة ماتفهمش عليهم، راح يوصل وقت وين انسان دروسك، لكن أعرف بلي طول ما أنت تجتهد ومداير وخطة وتمشي عليها، ربي موش حا يخيبك

وتذكر دائما ✅️ : البكالوريا ليست للذكي وإنما للمجتهد، كم من تلاميذ أذكياء لم يبلغوا أحلامهم، وكم من تلاميذ جد عاديين حققوا معدلات ممتازة

كيفاش تقدر تركز لمدة أطول دون فشل او تعب ✨️ :

1️⃣ توكل على الله وتذكر لماذا بدأت! أتفكر بلي الحاجة لي راك حابها ماتجيش بالساهل ولوكان جات ساهلة رانا ولينا كامل ناجحين! أتفكر بلي 90% من التلاميذ راهم كي يقراو ساعتين وثلاث سوايع وربع سوايع راهم يتعبوا ويحبسوا، وهاذوك هوما 90% لي مايوصلوش لأحلامهم! غير هاذوك لي كملوا يقراو لما كانوا تعبانين ومنهكين هوما لي يوصلوا لأحلامهم في الأخير! وأكتب في ورقة وعلقها في الحيط في غرفتك وزيد أكتب في كراريسك وفي كل مكان متوفر عبارات تحفيزية تذكرك بأهدافك

2️⃣ لازم تكون راقد مليح وتكون كليت مليح، لانه ماتصلحش ترقد زوج سوايع وتنوض حاب تحفظ 10 شخصيات، مستحيل! منيش نقولك أرقد 10 ساعات بصح لازم أقل شيء تكون راقد 6 ساعات ولازملك تاكل مليح وتهتم بصحتك

3️⃣ وبالرغم من أني ماننصحش بيهم إلا أنو بعض المحفظات والمكملات الغذائية كيما القهوة، الفيتامين ج (c) وغيرها، رايحة تعاونك تركز + تقدر تدير مشروبات تشرب منها أثناء الدراسة كيما العصائر

العام طويل و مزال باش تبداو✨️ :

1️⃣ اياكم ثم إياكم تقولو العام طويل و نبداو من بعد و مزال الحال و إياكم تقراو ليكور و كي توليو للدار ما تراجعوش واش درتو، تبداو الأحد بالنسبة للي ما حبوش يديرو ليكور ولا، تبداو الأحد راني قتلكم، لانه اسبوع يجر اسبوع و شهر يجر شهر و تبقاو حايرين فالوقت كيفاش يجوز، صحيتو ابداو الأحد و اللي بداو ما نهدرش معاكم، بصح كي تبداو ما تبقاوش تأجلو، اقراو كل يوم ولو شوية ولو ثلاث ساعات خير من والو

2️⃣ " قليل مستمر خير من كثير منقطع "، الاستمرارية شرط أساسي باش تنجحو و توصلو، مكانش حاجة سبيسيال تديروها في هذو اليومين، انا كنت مزلت ننظم في الحالة، كنت ديجا بديت بصح شغل حبست هذو اليومين حتى بدينا في الدروس مع الأساتذة، المراجع ني هدرتلكم عليهم، لازم تكتبو ثاني البرنامج الدراسي تاع كل مادة، و تخليوه قدامكم ( المقرر الجديد ) باش تعرفو التقدم تاعكم منا و جاي و ثاني باش تقدرو ديرو تخطيط شهري ( ما نقدرش نمدلكم تخطيط شهري واجد انا ممكن نمدلكم طريقتي برك و نتوما خططو )

3️⃣ و في الأخير حبيت نقول : اللهُمَّ اجعله عام دراسي مليئ بالطموحات وآلامال المُحققة.. اللهُمَّ اجعله بداية خير لهم في مسيرتهم و يسر لهم كل خير وابعدهم عن كل شر ووفقهم يالله لما تحبه وترضاه .. اللهُمَّ اجعله عام دراسي مليئ
بالطموحات وآلامال المُحققة.. اللهم اليسر والتيسير والمسرة

شحال تقرا من ساعة في اليوم ✨️ :

1️⃣ في الأشهر الأولى ( اكتوبر إلى ديسمبر ) : كنت نقرا بطريقة مريحة جدا جدااااا، ماكنتش نتعب خلااااص، كانت الفكرة حد بسيطة، وهي أنو تبقا آجووور معا البرنامج، ماتحوسش تتقدم، كنت في اليوم نقرا في الثانوية ومبعد نقرا على الأكثر أربع ساعات في المنزل و مانقراهمش متواصلين يعني كنت نرتح وننوض ونتحرك + كنت دائما مداير يوم في الأسبوع مانقراش فيه طوووووووول يعني نتمسخر فرات، وحتى في الجمعة والسبت، كنت نقرا ست ساعات يوميا بارتياح، بعبارة أخرى التعب والاجتهاد والجد يبدأ من شهر جانفي، يعني لثم اي لازم تشمر على ذراعيك وتبذل أقصى ما لديك.

2️⃣ كي نجيو نحكيو بطريقة أكثر عملية :
• في الأشهر الثلاثة الأولى : أقرا في الثانوية + على الأكثر 3 أو 4 ساعات في المنزل + تقدر حتى تدير يوم راحة وماتكثرش على روحك في الويكاند

• أما إبتداءا من جانفي فلازم تزيد الريتم وتقرا أكثر، كاين لي يكمل يقرا في الثانوية ويزيد يقرا حتان ل6 ساعات في المنزل يوميا (هذا كأقصى حد) وكاين لي مايروحش للثانوية ويقرا مباشرة 10 أو 12 ساعة وكاين حتى لي يوصل في مارس ل14 ساعة ( ولكن هذا كثير جدا ومنهك )

• في الشهر الأخير لي قبل البكالوريا لازم تعاود تنقص الريتم باه تعاود تستجمع طاقتك للإمتحان

3️⃣ الملخص المفيد : لازم يكون مستواك تصاعدي وليس العكس، تبدا في عقلك وتزيد، لأنو كاين بزاف تلاميذ إندفعوا في البداية وأهملوا النهايات، فالعبرة بالخواتيم

أخطاء ملازمش ديرهم عام الباك ✨️ :

1️⃣ إهمال بعض المواد الثانوية والتي قد تحدد مصيرك، مثل الفلسفة، شريعة، عربية، وتبان للتلميذ بلي مافيهم والو وكي يلحق مارس يقدر يقراهم إلا أنو العكس تماما يحدث وفي أغلب الأحيان تكون هذه المواد سببا في عدم وصول الكثيرين لأحلامهم

2️⃣ الدراسة عند عدد كبير من أساتذة دروس الدعم !! هذا يشتت الذهن و المعلومة ويستهلك وقتك وجهدك فقط، أقرا عند أستاذ واحد متمكن وتفهم عليه

3️⃣ عبارة "راو مازال الحال" ولا عبارة " لي قرا قرا بكري" زوج عبارات متضادة ويستعملوها نوعين من الناس، كاين الجماعة المتشائمة لي ديما تقولك راح الحال وكاين لي تبالهم الباك هذا لعبة ديما يقولولك مازال الحال، ولوكان تتبع واحد من هاذو راك راح تضيع حرفيا، لازملك تكون واقعي، تؤمن بلي الوقت المتبقي كافي إن استطعت استغلاله على النحو المطلوب

4️⃣ عدم حل التمارين خصوصا في المواد العلمية، يا جماعة لازم تحلوا التمارين، ميش شرط بزاف ولكن لازم تحل لأنو كاين شي أفكار لازم تفوت عليك قبل الباك + راك حا تتوله لأخطائك ونقائصك كي تهز الستيلو وتبدا تخدم

5️⃣ عدم حل مواضيع وتمارين في المواد الأدبية خاصة الحفظ، يا جماعة الشريعة لم تعد مادة حفظ فقط، هي مادة فهم وحفظ !! أحفظ وروح حل مواضيع بكالوريات للسنوات الأخيرة، حتى ولو تحلها شفهيا دون كتابة ولكن لازم تحل مواضيع

6️⃣ لا تعلن الخطوات .. أعلن الوصول : في هذا العام تاع الباك متغلطوش غلطة الكثير تحكو واش رح تقراو وواش درتو وشنو برنامجكم تفاداو الهدرة بزاف على خطوات دراستكم ميعنيش اني نقلكم متعاونوش الناس لالا العكس متبخلوش كامل بصح متكثروش الهدرة على واش قريتو وواش حابين تولو لأنو هادي حقيقة يغفل عنها الكثير

كيفاش توفق بين الدراسة في الثانوية + المنزل ✨️ :

1️⃣ راح تقراو من الأحد إلى الخميس فالليسي ( النظاميين ) يعني، تنوضو صباح قبل ساعة من الوقت اللي لازم تنوضو فيه، تقراو في هذيك الساعة مادة حفظ ( تاريخ و جغرافيا / إسلامية )، كي تجيو العشية ترتاحو ساعة إلى ساعة و نص، من بعد تبداو تحطو مادتين أساسيتين و تعاودو الدرس اللي قريتوه فالقسم و تحلو تمارين ( 2 ولا 3 ) و ترقدو مع الـ 11 تاع الليل هكاك وهكذا راكم قريتو فالدار و مع القراية تاع الكلاصة ما شكيتش راح يكون كاين نقص

2️⃣ في الويكند نوضو في نفس الوقت اللي تنوضو فيه في أيام الأسبوع، قسمو النهار تاعكم على الدار و ليكور ( اذا ديرو ليكور طبعا ) و اقراو المواد الاساسية كامل فوتو عليهم عاودو كامل واش درتو فالسمانة هذيك كمراجعة و زيدو حلو التمارين

3️⃣ المواد الثانوية ديرولهم وقت في الويكند عاودو كامل واش قريتو فالسمانة ( ما راحش يكونو بزاف دروس ) و هكا تدخلو للسمانة اللي موراها و نتوما مطمئنين بلي كملتو واش قريتو فالسمانة اللي قبلها

✅️ ملاحظة : لازم تركزو على المواد الأساسية بزاف في بداية السنة لانه كون ما تقراوهمش من الآن راح يتراكمو عليكم و دروسهم مكثفة !! و لازم تحلو فيهم بزاف بزاف تمارين باش تتمكنو من الأفكار اللي فيهم، يعني إياكم ثم إياكم تخلو المواد الأساسية و لا تهملوهم في بداية العام راهي غلطة إذا درتوها تحملوا النتائج تاع هاد الغلطة و ما عندكمش أصلا كيفاش تصلحوها

كيفاش تعاملت مع مادة العلوم ✨️ :

1️⃣ كنت حرفيا معتمد إعتماد كلي على دروس الدعم، لأنه من جهة في الوقت هذاك ماكنتش نعرف الأساتذة في اليوتيوب نهائيا وبالنسبة للثانوية حكمتنا أستاذة أول مرة تحكم طلاب الباك يعني ماكانتش متحكمة مليح في المادة المعرفية والمنهجية

2️⃣ كانت طريقتي بسيطة جدا : نقرا الدرس في دروس الدعم ( ولا في حالتك نتا قادر تقراه في الثانوية ولا اليوتيوب... )، نعاود نفهمو مليييييح في المنزل، يعني نتمكن من كافة المفاهيم وماتغيبلي في حتى حاجة، نحفظ مايجب حفظه في ذلك الدرس ( أكيد أنو 80% من العلوم عبارة عن فهم لكن كاين بعض التعاريف وبعض المصطلحات والجمل العلمية لي لازم تحفظها باه تجيب النقطة نتاعك )، ومشيت بهذه الطريقة مع كل درس كنت دائما نحل تمارين الاسترجاع المعرفي ( تمارين 5 نقاط ) وأنا نقرا في الدروس، يعني وين نقرا درس نحل ف les guides والمراجع لي عندي التمارين لي فكرتهم نقدر نحلها بينما كنت نحل تمارين الاستدلال والمسعى العلمي ( تمارين 7 و8 نقاط ) في نهاية الوحدة باه نكون متمكن من كلش وعندي جميع الموارد المعرفية

3️⃣ أنا ارتكبت خطأ وهو أنو مابديتش نقرا العلوم من بداية العام وماحليتش تمارين من بداية العام، خلال ال4 أشهر الأولى كنت نتبع مع الأستاذة ولكن سطحيا برككك، ماكنتش نعاود الدرس في المنزل، ماكنتش نكتب نصوص علمية، ماكنتش نحل تمارين، يعني كنت نتبع برك وتبالي في روحي فاهم، حتان كي وصل جانفي باه فقت لروحي ولقيت روحي حرفيا 0 في المادة المعرفية و 0 في المنهجية، يعني كنت نقرا تركيب البروتين في جانفي !! وبديت نحل تمارين ونقارنهم مع الحلول وأحيانا نديهم لأستاذة دروس الدعم تصححلي وتنبهني، فبالتالي تعبت لأنو مابديتش من بداية العام في حل التمارين وكتابة النصوص العلمية، فأهم نصيحة في العلوم هي أنك أولا تتمكن من المادة المعرفية وثانيا والأهم أنك تحرك يدك وتكتب نصوص علمية وتحل تمارين 7 و 8 نقاط وتمارس المنهجية

4️⃣ بالمختصر المفيد : العلوم الطبيعية = فهم الدرس بالتفصيل و بتعمق " مشي سطحيًا برك " + فهم الوثائق و التجارب المدرجة في الكتاب المدرسي + فيديوهات الأستاذة كتفي في نهاية الوحدة + الملخص + تمارين من الباكالوريات الى تمارين الاستاذ بوالريش

الأساتذة لي تبعهم + المراجع لي تعتمد عليهم ✨️ :

1️⃣ الأساتذة :
• رياضيات : الاستاذ نورالدين + الاستاذ عبد الباسط
• فيزياء : محمد الأمين زدون + أحمد ترير
• علوم : الاستاذة كتفي شريف + ربيع ياسين
• فلسفة : الاستاذ الهواري + عادل مقرود
• عربية : الاستاذ حيقون أسامة + الاستاذ ابو بكر
• إسلامية : الاستاذة بوسعادي + شمس الدين
• اجتماعيات : الاستاذ بورنان + قنشوبة
• انجليزية : الاستاذ ناصري + منصوري
• فرنسية : الاستاذة سالي + منير شبوة / منصوري
• هندسة مدنية : استاذ فيلالي + كمال مخلوفي
• هندسة كهربائية : لعروسي + كناز زكرياء
• هندسة طرائق : رهواني سفيان + محمد الهاشمي
• هندسة ميكانيكية : رابحي أكرم وليد + رحاب قلعي
• ألمانية : شوقي + نوايري
• اسبانية : الاستاذ طه + مامون
• محاسبة : عبد الفتاح

2️⃣ المراجع :
• رياضيات : كتب نورالدين، مجلة الرائد، الحقيبة المعلوماتية لعقبة بن نافع
• فيزياء : كتاب المغني، تأشيرة النجاح، الحقيبة المعلوماتية لعقبة بن نافع
• علوم : سلسلة احمد بوالريش، كتاب الطالبة إكرام بوزار
• فلسفة : كتاب هبة جبابرية، كتاب إسكندر غربي
• عربية : كتاب حيقون أسامة، كتاب المراجعة النهائية
• إسلامية : كتاب بوسعادي، كتاب شمس الدين
• اجتماعيات : كتب بورنان، كتاب محمودي عادل
• انجليزية : كتاب المراجعة النهائية، كتاب ناصري
• فرنسية : كتاب المراجعة النهائية، كتاب منير شبوة

3️⃣ كيفاش نعرف افضل قناة تفيدني :
تدخل اكثر من قناة تتفرج فيديوهات من بعد تختار الاستاذ لي كانت طريقته مميزة و فهمت عندو بالخف .. و دير في بالك بلي افضل قناة لك ليس بالضرورة هي الأفضل بالنسبة للجميع .. جرب تعرف .. افرز روحك قبل بداية السنة الدراسية حتى تقرا بكل راحة

بداية رحلة البكالوريا ✨️ :

1️⃣ بداية رحلة جديدة راح تكون الختام ل 12 سنة دراسية، اليوم هو البداية الرسمية تاعكم، اليوم تحطو الباك صح صح في راسكم و تبداو تقراو بجدية تامة، و تديرو خطة محكمة ليكم، البداية تكون اليوم، راني نقول و نعاود ما تخلوش لغدوة ولا الأسبوع القادم ولا نوفمبر، توكلو على ربي و حطو هدف في راسكم باش تقدرو تصبرو عام كامل

2️⃣ ما نكذبش عليكم العام تاع الباك مراحش يكون ساهل و يحتاج جهد و صبر و صبر و صبر و استمرارية، اليوم بداية جديدة راح تخليكم توصلو لتخصصات احلامكم و الباك هو أول خطوة حقيقية باش تبنو مستقبلكم، ديرو في بالكم بلي راهم جايينكم لحظات صعبة و لازم تصبرو عليهم باش تقدرو تكملو

3️⃣ الوقت يفوت بالخف صدقوني، كونوا جديين في قرايتكم و ديرو في قلبكم و اصبرو باش تقدرو تكملو للدقيقة الأخيرة، اعزموا على معدل مليح و خليكم متفائلين و عيشوا العام هذا بكل لحظاته الصعبة و المؤلمة و الجميلة و المميزة، لأنها و ببساطة مراحش تتكرر و عام الباك عام special بزاف

4️⃣ عاونوا اللي يستاهل و ما تبخلوش بالمعلومة لانه ببساطة مراحش تنقص من معدلك اذا شاركتها مع غيرك، انطلقوا انطلاقة قوية يعني اذا بديتو صح راح تكملو صح

5️⃣ راني هنا نزيد نوقف معاكم اكثر و اكثر، ديرو توثيق للعام تاعكم باش منبعد تخرج النتيجة و تشوفوا كامل وش جوزتوا " وحد الشعور "، و صدقوني لي يقرا يدي و لي يسعى يلقى و ربي يوفقكم

عندك باك و ما عرفتش اذا لازم دير دروس الدعم ؟ :

1️⃣ أساتذة الدروس الخصوصية هاته ينقسمو إلى نوعين :
• النوع الأول : ولي أنا معارضو و هما الأساتذة لي يتاجرو بالمعلومات، ويبيعو المعلومة للتلميذ ويتبعو إستراتيجية أنهم في نهاية الحصة يخليلك نص معلومة مرتبطة بالحصة لي فاتت هذي كامل باش يجبرك انك ترجع ليه وهذا النوع بالذات لا أنصح به بتاتا

• النوع الثاني : الأساتذة ذوي الضمائر، هذا النوع من الاساتذة بلاك راكم تصادفتو معاهم، تلقاه لا يلقي بالا للمبلغ وإنما همه الوحيد انك تخرج فاهم بأي طريقة كانت، وتلقاه يشمخ التريكو ويعرق من أجل إيصال معلومته مهما كان مستوى التلميذ، وتجده يتبع في طلبة لي قراو عندو عام كامل وفي الباك كذلك يشوف النقاط لي جابوها، هذا النوع لي أنصح به وبشدة

✅️ ملاحظة مهمة : لي عائلته ميسورة الحال قادرين بطريقة سهلة بسيطة يستغلو أمور فقط تغنيهم وبكثير عن الدروس الخصوصية ولي هي اليوتيوب، خصوصا وأننا في زمن التكنولوجيا والتطور

‼️ كيفاه يا بلال وضحلي أكثر النقطة هاذي ؟

ساهلة، ماعليك إلا البحث عن القنوات تاع الأساتذة لي ينصح بهم من قبل الطلبة وتبعوهم والله يغنوكم عن الدروس الخصوصية بالكامل ( اذا راكم حابين نتكلم على قنوات بعض الأساتذة لي استفدت منهم انا و الطلبة المتفوقين قولولي في التعليقات )

2️⃣ الدروس الخصوصية : وجدت لمن لم يستطع فهم الدروس في القسم يعني من طرف استاذ القسم، يلجأ الى استاذ اخر لعل وعسى باسلوبه ( طبعا المختلف عن اسلوب استاذه في القسم ) يفهم تلك الدروس ويحصل المعرفة المطلوبة، طبعا بمجهود منه هو الاخر، لانه قادر المشكل ما يكونش في استاذ القسم، يكون فيه هو ما يبحثش وما يبذلش جهد باش يفهم اصلا، لذلك تلقاه يتخبط من استاذ لاستاذ بدون فائدة، وهنا حبيت نوضح حاجة، الاستاذ المتمكن واللي عندو المعلومة والاسلوب وكذلك الوقت هو اللي يحقلو يدير دروس خصوصية "فقط"، هنا يحقلو يفيد التلاميذ ويستفيد هو ايضا، اما اللي مهوش متمكن لا من المعلومة لا من طريقة ايصال المعلومة، وحاسب انو الدروس الخصوصية بزنسة فقط، هذا راح يظلم نفسو اولا واولاد الناس ثانيا، كما قلت سابقا ( المعلومات راهي في كل بلاصة )

كيفاش تتعامل مع مادة الفلسفة ؟

1️⃣ اولا و قبل كل شيء يجب عليك تغيير عقليتك، بمعنى آخر يجب عليك أن تنتزع من عقلك فكرة الفلسفة صعبة و انت لا تحبها ... هيا انزع هذه الفكرة السلبية حتى نبدأ الرحلة ... أنت الآن تحب الفلسفة و هي مادة سهلة و مشوقة، تحتاج فقط منك بذل بعض من الجهد و الصبر، كما أن مادة الفلسفة 80% منها فهم و 20% المتبقية للحفظ عكس ما يشاع عنها و خطأ الطلبة الشائع أنهم يحفظون مقالات كما يجدونها

2️⃣ قراءة الدروس و فهمها : عليك بفهم الدرس من خلال المقالة جيدا، لأنك لو حفظت المقالة بدون فهم قد تنسى نصفها يوم الإمتحان، و لا يمكنك الاستمرار بأسلوبك الخاص، ولكن ان قمت بفهمها جيدا يمكنك التعبير دون قيود، و أيضا بعد الفهم سيسهل عليك حفظ الحجج و البراهين و اقوال الفلاسفة

3️⃣ التمكن من المنهجية : هناك طريقة أسهل بكثير و تختصر عنك عناء البحث و الحفظ و هي أن تتقن المنهجية الخاصة بكل من : المقارنة - الجدلية - الاستقصاء بالوضع - الاستقصاء بالرفع، بعد التمكن من المنهجية الخاصة بالانواع 4 لي تكلمت عليهم الآن يبقى شيء واحد و هو أن تحفظ القليل من الأقوال الفلسفية و الحجج المقابلة لكل موضوع، و بصحتك راك قريت الفلسفة بذكاء و تجنبت كامل الجهد

4️⃣ هل الطريقة فعالة : الطريقة هادي تبعتها انا شخصيا و تحصلت على 16 مع العلم انني كنت علمي و ليس لي اطلاع على هذه المادة و لكن الذكاء في التعامل مع أي مادة هو ما يصنع الفارق، الموهيم نفس الشيء للشعب الادبية

أسرار التفوق في العلوم الفيزيائية ؟

1️⃣ من أسرار التفوق في الفيزياء هو تصحيح إنطباعك حولها حيث أغلب تلاميذ يظلمون الفيزياء بإعتبارها مادة صعبة الفهم ومخيفة ... لكن هذا غير صحيح قطعا وإنطباعك هذا نتيجة دراستك الفيزياء سابقا بطريقة غير ملائمة

2️⃣ المكتسبات القبلية، تعتبر القاعدة الأساسية لفهم الفيزياء، بدونها لن تتمكن من التحكم في الوحدات التعليمية للبرنامج الدراسي، في الفيزياء الدرس الجديد للطور الموالي ماهو إلا عبارة عن الجزء الثاني و تكملة لدرس متناول في الطور السابق، على سبيل المثال : من المستحيل تناول الوحدة الأولى من دون أن تكون ملما بتفاعلات الأكسدة الإرجاع و قوانين كمية المادة المدروسة سلفا في برنامج السنة الأولى و الثانية ...
بالتركيز على المكتسبات القبلية أولا تكون قد أعددت أرضية خصبة وجاهزة لإستيعاب و فهم الدروس الجديدة و التي لن تصعب عليك إثر تحكمك بما سبق من معلومات، علابالي راك تقول كيفاه ندير ذرك ما المطلوب مني، ملخص pdf خفيف للمكتسبات القبلية تقرأه تفهم مليح وتحاول تحفظ القوانين، ضع الملخص أمامك و جيب سلسلة تمارين مرفقة بالحلول و توكل على الله حل التمارين و صحح أخطائك

3️⃣ تركز أثناء شرح الدروس الجديدة تفهم و كي تولي لدار تلخص الدرس ( تكتب القوانين و التعريفات... )، تحضر سلسلة تمارين متدرجة الصعوبة و مرفقة بالحلول المفصلة لتدرب و تتوكل على الله، تحل التمارين و تصحح أخطائك

4️⃣ حل التمارين النوعية و البكالوريات السابقة، تذكرا دوما أهم شيء التدرج في حل أكبر عدد من التمارين من السهلة إلى الصعبة و بأفكار متنوعة ، في الفيزياء لايختلف إثنان على وجوب و ضرورة حل التمارين لهضم الدرس و إستيعابه ، بعد كل هذه التحديات التي ستجدها في التمارين و تحاول فهمها تكون قادرا على الإنتقال لمستوى أعلى ألا وهو البكالوريا التجريبية و البكالوريات السابقة و التي في العادة تحمل منهجية تتكرر في كل سنة مع أفكار حديثة ، أحسن إختبار للذات قبل دخول الإمتحان الرسمي هي البكالوريات السابقة من 2012 إلى غاية 2024، هنا تحل التمارين بمنهجية صحيحة و تحسن من طريقة إجابتك و خطك

5️⃣ تحدد أهم المراجع لي راح تستعملهم : مثلا أنا تبعت هادو : كتاب المغني + تأشيرة النجاح + الحقيبة المعلوماتية لعقبة بن نافع، دون أن ننسى تمارين الكتاب المدرسي لأنها اساسية
• أهم القنوات : محمد الأمين زدون + أحمد ترير

الأسئلة التي تتبادر في ذهن كل الطلبة هذه الفترة ؟

1️⃣ شحال من ساعة نخصصوها للمواد الأساسية : المواد الأساسية خصصلها جل الوقت، ولكن حاول تقرا بذكاء وليس بجهد، بدل ما تقرا ساعتين مع الضغط و تشد معلومة او اثنين حاول تجيب طريقة اخرى تجيب بها معلومات أكثر في وقت اقل، و الطريقة تستخرجها بالتجربة يعني كلما تجرب كلما تلقى الطريقة لي تساعدك في المذاكرة

2️⃣ شحال من تمرين نحلوه في المواد الأساسية : ليس الأهم في شحال من تمرين تحلوه في المواد الأساسية قد ما شحال من فكرة تشدها من حلك للتمرين، مثلا في الرياضيات هناك تمارين شاملة يطرحها الاستاذ نورالدين تقريبا فيها كامل الافكار، كي تفهم هذاك التمرين مليح مليح تقدر تسقطو على اي تمرين فيه هذوك الافكار بكل بساطة

3️⃣ وقتاش نبداو نحفظوا : الحفظ أسهل حاجة و وقتها هو الفصل الأول، و كذلك لازم تكون خاضعة لإستراتيجية و طريقة صحيحة، تخليك تخليك الحاجة لي تحفظها تترسخ في الذهن، ماشي غير تحفظ و يوم الإمتحان تنسى كل شيء، و هاد النقطة بالذات تكلمت عليها في الريل السابق وين عطيتكم الطريقة الصحيحة للحفظ الفعال و بإذن الله كي تطبقوها تعجبكم النتيجة

4️⃣ كيفاش نقسموا أيام الأسبوع : تقسيم أيام الأسبوع حاجة شخصية، و غالط لي يقولك انا خصني برنامج أسبوعي نمشي عليه، علاه؟؟ لأنه كل واحد و ظروفه و ظروف المنزل و الأسرة تاعه، يعني البرنامج لازم ديره انت شخصيا و ماشي تنقلو من شخص آخر، و بطبيعة الحال لازم تراعي في هذا البرنامج " المواد الأساسية و المواد الثانوية "، و كذلك المواد لي عندك فيهم نقص، يعني ترتبو و تنظمو على حساب اولوياتك

كيفاش تحفظ الدروس ؟

سؤال يطرحه الكثير من الطلبة " لي يعانوا من مشكل الحفظ و النسيان " لذلك انصحكم بالاعتماد على الذاكرة البصرية و الذاكرة السمعية و التكرار

1️⃣ الذاكرة البصرية : هي الاعتماد على التلوين و المخططات و الخرائط الذهنية و الرسومات لأنها تعزز قدرة الاستيعاب و التذكر

2️⃣ الذاكرة السمعية : احفظ بالصوت و كرر على مسامعك الدرس مرة و اثنان و ثلاثة، حتى تتعود عليه و يكون سهل عليك تذكره، و ممكن تسجل هدرتك و تعاود تسمعها

3️⃣ التكرار : لا تحفظ الدرس من اول مرة بل اقرأه أولا قراءة تحليلية و افهمه، و في المرة الثانية اشرع في الحفظ، و إذا وجدت صعوبة اعد قراءته فقط و اترك الحفظ للمرة الثالثة، التكرار يخلصك من مشكلة النسيان، الموسم الدراسي طويل لذا اعد دروسك مرة على مرة حتى تتذكر

⛔️ ملاحظة : لا تترك الحفظ لآخر العام لانه لما يقترب موعد امتحان شهادة البكالوريا راح تكون تحت ضغط لا متناهي

كيفية المراجعة و تقسيم الوقت ؟

1️⃣ اولا و قبل كل شيء اعلم عزيزي الطالب أن هذا العام هو عام عادي مثل باقي الأعوام من يجتهد و يتعب سينجح في آخر المطاف، ومن الأسباب الرئيسية للتوفيق هي الدعاء و التقرب الى الله

2️⃣ الدراسة تكون مع بداية الموسم، مع مراعاة الوقت و تقسيمه تقسيما محكما بما يناسب المواد الأساسية و المواد الثانوية، يعني تخصيص وقت اكثر للمواد الأساسية وعدم اهمال المواد الثانوية و تأخير مراجعتها لآخر العام ( هذ شي راح يخليك في ضغط لا متناهي )، تقدر تقرا مادتين أساسيتين في اليوم + مادة ثانوية في اليوم، مع الأول قادر تبانلك صعيبة لانها حاجة جديدة عليك لكن بمرور الوقت تولي تقرا اكثر من ذلك، مالا مع الاول دير مادة اساسية + مادة ثانوية، يعني تقدر تقراهم في 3 ساعات و راح يكفوك و مع مرور الوقت ابدا ارفع من الوتيرة بدل 3 ساعات ارفعها ل 5 و هكذا ... انا عطيتك مثال و انت قسم وقتك كيما تساعدك انت ماشي بالضرورة تقسم وقتك كيما قتلك، لازم ديما دير وش يخرج عليك أنت ماشي وش يخرج على الناس، بالمناسبة انا نفضل الدراسة تكون بالأهداف و ليس بالساعات و انت دير وش يخرج عليك

3️⃣ " العلم صيد و الكتابة قيد " مالا لي تقراها سجلها و اي معلومة جديدة تمر عليك اكتبها في كناش صغير و حتى النصائح لي نوجهوهالكم سجلوها، و لازم ايضا الاعتماد التام على المجهود الشخصي و ليس الدروس الخصوصية يعني دير ليكور في المادة لي راك ضعيف فيها بصح ابحث اكثر فبحثك الشخصي راح يخلي المعلومة تترسخ، ساعات الدروس الخصوصية يجب ان تكون محدودة ( مش تقرا نهار كامل ليكور و تقول راني قريت ... لانه كما قلت سابقا التحضير للبكالوريا يعتمد اعتمادا تام على جهدك الشخصي و ليس ليكور )

4️⃣ حل التمارين هو أكثر وسيلة مجدية لتثبيت المعلومات و اكتشاف طرق تساعدك على تنظيم مواردك المعرفية و كيف تصيغها ( خصوصا في المواد العلمية )

كيفاش تحصلت على 20 في الرياضيات :

1️⃣ لازم تعرف انه مكان حتى حاجة مستحيلة، يعني 20 في الرياضيات اي واحد قادر يجيبها لانه الرياضيات تاع الباك ليست تلك الرياضيات الصعبة و المعقدة، هي مجرد أسئلة تتعاود لكن طريقة طرحها تختلف في التمارين، برك الرياضيات لازم المداومة و التدرب على حل التمارين

2️⃣ لازم تحدد أهم المراجع لي تخدم بيهم و دير خطة منظمة، انا مثلا درت هكذا :

• البداية بتمارين الكتاب المدرسي : وهي اساسية جدا لكن لازم تصبر عليها لأن البعض منها صعب و معقد لكن مفيدة في نفس الوقت، لازم ديما تبقى تحاول و تحل جميع التمارين دون استثناء، ان قمت بحلها لوحدها و استوعبت جميع أفكارها فمبارك عليك العلامة الكاملة
• مقترحات مجلة الرائد : تضم 20 اختبار من نمط بكالوريا و تمارين رائعة اغلبها أجنبية
• الحقيبة المعلوماتية لعقبة بن نافع : هذه من أفضل المراجع لي تقدر تعتمد عليهم ( تقدر تقول فيها كل شيء )
• سلاسل مصطفاي : تمارين ممنهجة و نمط بكالوريا
• حل البكالوريات السابقة + متابعة حلول هذه البكالوريات مع الاستاذ نورالدين لغرض اكتساب منهجية الإجابة
• حل البكالوريات التجريبية لمختلف ولايات الوطن : حلها سينمي قوة التحمل لديكم

3️⃣ و أخيرا بعد اتخاذكم لجميع الأسباب يبقى اهم شيء وهو التوكل على الله و تفويض أمركم له فما التوفيق الا من عند الله

كيفاش نوفق بين الجامعة و الباك 🧠 :

✅️ ديرو في بالكم المقولة هادي " NO PAIN NO GAIN " يعني في هاد العام راح تسوفريو و تتعبو تعب مضاعف و تواجهوو مشاكل مادية و عائلية كثيرة و لكن" لا شيء يقف أمام حلمك و طريقك للنجاح "

1️⃣ الدراسة في الجامعة :
أولا لازم عليك تحضر حصص الكور و حصص التيدي و تشارك فيهم و هذا لشيئين، أولا باه يشوفك الأستاذ بلي حاب تخدم و يعاونك فلانوط تيدي ( النقاط مهمة راح تحتاج كل نقطة زايدة )، و ثانيا كي تحضر الدروس راح تخفف على روحك تعب المراجعة في البيت و ينقص عليك الضغط

2️⃣ التحضير للباك :
من المستحسن تبدا توجد روحك من درك، ما تخليش حتى لخر تع العام و تبدا تحضر، راح يكون عليك ضغط كبير خصوصا اذا تزامنت فترة المراجعة النهائية مع امتحانات السداسي الثاني فالجامعة، تقدرو مع الاول تبداو بالمواد الأساسية و في جانفي زيدو معاهم المواد الثانوية، كل مادة اعطوها حقها و ما تهمل حتى مادة و استغلو بداية الدراسة فالجامعة لانه مراحش تكون فيها الضغط

3️⃣ يبقى العامل الأساسي في أي عمل هو تنظيم الوقت، لازم عليك تحط خطط يومية و اسبوعية و شهرية مثال غدا راح نحفظ درس كذا من الجغرافيا، ولا هذا الاسبوع نحي عليا درس فلاني من الرياضيات

4️⃣ ما تحطش فكرة تع كون ما نديش مليح فالباك و تقول ضيعت وقتي في باطل، أخي أختي ما راكم خاسرين والو من المحاولة، اذا وفقك ربي ديت مليح فالباك اللهم بارك، ما سهلش ربي عادي راك طلعت للسنة الثانية فالجامعة و ادا حبيت زيد عاود الباك ( أنت لست في سباق مع أحد )

5️⃣ في الاخير حبيت نقولكم كل ما تفشلوا ولا تكرهوا اتفكروا هادي " بوسعي أن أُناضِل لأجل أحلامي، وسواء حقّقتها أو حققتُ جُزءًا منها، فذلك أفضلُ من الشّعور بالهزيمة والاستسلام “

خطة شهر أكتوبر 💯 :

1️⃣ علوم الطبيعة و الحياة :
• المكتسبات القبلية: ✅
• التمكن من الوحدة 1 و ارفاقها بملخص خاص ( مخططات، رسومات، نصوص علمية )
• الدخول للوحدة الثانية في حال إكمال الوحدة الأولى
• إكمال حل تمارين البكالوريات السابقة الخاصة بالوحدة 1

2️⃣ العلوم الفيزيائية :
• المكتسبات القبلية: ✅
• دراسة الوحدة الأولى (أكسدة إرجاع) كاملة.
• وضع ملخص خاص لهذه الوحدة
• حل بعض التمارين للتدرب على الوحدة.

3️⃣ الرياضيات :
• المكتسبات القبلية: ✅
• وضع ملخص لوحدة الدوال العددية.
• حل تمارين البكالوريات السابقة الخاصة بالدوال العددية.
• بدأ درس الدالة الأسية.

4️⃣ الاجتماعيات :
• فهم الوحدة الأولى في التاريخ (الحرب الباردة) جيدا.
• فهم الوحدة الأولى في الجغرافيا (المبادلات) جيدا.
• بدأ حفظ الأساسيات.
• الفهم الجيد لمنهجية الإجابة في الإجتماعيات.

5️⃣ الشريعة :
الفهم الجيد للدروس الأولى (الثلاث دروس الأولى) + مراجعتها.

6️⃣ الأدب العربي :
• المكتسبات القبلية: ✅
• إلقاء نظرة على محتوى الوحدة الأولى

7️⃣ الإنجليزية :
• التمكن من مصطلحات الوحدة 1 " ETHICS IN BUSINESS " (حفظها)
• بدأ دراسة قواعد الوحدة الأولى.

8️⃣ الفرنسية :
• التمكن من مصطلحات الوحدة الأولى " TEXTE HISTORIQUE "
• إلقاء نظرة على البكالوريات السابقة ومطالعة نصوص.

9️⃣ الفلسفة :
• التمكن من المنهجيات المقررة ( المقارنة، الجدلية، استقصاء بالوضع ... )
• فهم درس العلم والفلسفة + أهمية الفلسفة جيدا.

ملاحظة هامة ✅️ : هذه الخطة مجرد إقتراح للدراسة، يعني لي مايمشيش عليه حرفيا، مثلا يكون متقدم شوي ولا متأخر شوي فعادي جداااا!! هذا مجرد مثال