𓆩𖤐𝗕𝗔𝟳𝗥𖤐𓆪

لو عندى أمنية واحدة محتاجها بإلحاح هي إني ماضيعش وقت.. آخد قراراتى بشكل أسرع.. أحسم وجهة نظري فـ الناس بدري بدري بدون ما يتسرسب عُمر ، ووقت فـ اكتشافهم..

أتمنى أفهم ، وأكمل ، وأنسحب ، وأسكت ، وأتكلم فـ الوقت المناسب.. مابقاش قاسي على نفسي أو غيري فـ وقت مش عايز إلا اللين..

أتمنى ماتوجعش فـ وقت غلط ، وأتمنى اتعافى فـ وقت صح.. لما حد يحتاجني أتواجد ، ولما أحس إني فـ مكان مش شبهي أمشي فـ الوقت المناسب..

حاجات كتير ضاعت رغم أهميتها بسبب التردد فـ حسم الإحتفاظ بيها ، وحاجات فضلت مستمرة رغم عدم جدواها ، وضررها بسبب تردد التخلص منها..!

يارب مش عايزين غير وقت مناسب عارفين نستغل كل ثانية فيه صح.

‏صحيح الظروف مش احسن حاجه عليناا كلنا بس بييجي فـ بالي دايماً كلام ربنا فـ الآيه الكريمة ﴿لَا تَخَفْ وَلَا تَحْزَنْ ۖ إِنَّا مُنَجُّوكَ﴾.. هو ده مربط الفرس..! الثقة فـ ربنا هي اللـ شقت لسيدنا "موسى" البحر.. هي اللـ خلّت السيدة "مريم" تخرج للناس بطفلها بشجاعة وتواجههم.. هي اللـ بردت النار على سيدنا "إبراهيم" لما أهله رموه وسطها.. هي اللـ أنقذت سيدنا "يونس" من بطن الحوت.. هي اللـ حولت سيدنا "يوسف" من طفل تايه لعزيز مصر..!

حتى إحنا كبشر عاديين مش أنبياء فـ عز اللحظات الفارقة الصعبة اللـ بنحس فيها إن فيه حد رابط حبل على رقبتنا ، وإنها اتقفلت من كل إتجاه بيظهرلنا سرسوب نور بيقول لك "ماتخافش"، "لأ مش دلوقتي"، "شوية صبر".. ثقتنا فـ ربنا كانت طوق نجاة لكل واحد فينا مليون مرة..!

كله سهل على ربنا واللـ معاه ربنا مابيخسرش.. مادمت عامل اللـ عليك سيب القدر يشوف شغله ، وإدي نفسك فرصة تشوف تدابيره.. ربنا يصبرنا على أى فترة صعبة ، ويوهبنا بصيرة شوفّان النجاة ، ويجعل لحظة الوجع هي نفسها نقطة البداية لمرحلة أجدد ، أنضف ، وأريح.

فيه بعض القرارات القاسية اللـ بتحتاج تاخدها فـ حياتك من وقت للتاني بدون النظر لقسوتها لكن لقدرتها على تعديل مسار مستقبل خطواتك بعد كده..

لو بحسبة العقل حسيت إنك محتاج تقول "لأ" ، أو "كفاية" ، أو "مش هقدر أعمل كذا تاني" نفذ فوراً.. مش كل الأمور ينفع تمشي على هوا القلب.. فيه حاجات كتير متعلقة مش ناقصها غير شوية حسم وقساوة مع النفس لمصلحتك أنت.. تأثير الدواء بيتقاس بمدى فاعليته مش بحلاوة طعمه..

ربنا يلهمنا ناخد القرار الصح ، في الوقت الصح، ويقدرنا نتحمل قسوته ، ومانشوفش غير ضرورته.

لو كنت تقدر تمنع شعور من الحياه هتمنع شعور ايه؟

العشم فـ الناس خيبة ، وكسرة نِفس ، وهتك سترك ، وإستغلال مالهومش آخر.. كإنك بتحط رقبتك بإيدك تحت رحمة البشر، ورحمة تلقباتهم ، وجنانهم.. طب ليه، وعشان إيه!..

فلان لما دماغه تكون رايقة يخدمك ، ولو مزاجه متعكنن يبيع ويشتري فيك!.. يا سلام!..

البشر ملوك الخذلان واللـ يتعلق بقشتهم غرقان.. تغور الحوجة للناس وفيه رب كريم موجود دايماً وبابه مفتوح وتدابير كل الأمور بإيده هو.. سبحانه هو الوحيد الأحق بسؤالك ، توددك ، ثقتك ، ومحبتك.. وهو الكريم اللـ لو الدنيا كلها اجتمعت عشان تمنع عنك خير هو كاتبه ليك مش هيحصل.

لو فيه شيء اتوفرلك مجاناً مدى الحياة هتختاره يكون إيه؟.

‏في وسط النفوس الخربانة اللي محاوطانا ليل نهار دي لو ربنا رازقك بشخص قريب منك نفسيته سوية أو لو أنت نفسك صاحب "نفسية سوية" دي نعمة تستحق تشكر ربنا عليها للأبد..

صاحب النفسية السوية هيساعد غيره بدون ما يمن عليهم ولا يذلهم.. هيحب الخير للكل بدون ما يتمنى نعمة الغير تزول عشان تجيله.. مش هيفسر كلامك بمليون معنى مليان بسوء الظن وبعيد عن معناه الحقيقي.. هينشغل بتحسين نفسه وهيغمض عينه عن سقطات الناس وعيوبهم.. لا هيدخل نفسه فـ حوارات ، ولا قالوا وقولنا..

صاحب النفسية السوية عرف من بدري إن الحياة قصيرة ، وإن اللـ بيفضل السيرة ، وإن الرزق بتاع ربنا مش بإيد الناس ، وإن النصيب هييجي هييجي مهما العالم وقف على راسه..

مش محتاحين فـ صدورنا أكتر من "نفسية سوية"، ولا فـ دوايرنا غير ناس سوية..💙

‏عمري لا خفت ولا هخاف من الناس.. الحمدلله الواحد مناخيره فـ السما ، ودراعه مابيتلويش ، ومراعي ربنا فـ كل حد دخل حياتي.. اللـ أنا بخاف منه إني أكون مش مستعد.. مش مستعد لفرصة مهمة فتضيع بسبب عدم إدراك أهميتها.. مش مستعد لمقابلة ربنا.. مش مستعد للفقد.. مش مستعد للوحدة.. مش مستعد اختار بين اختيارين لازم اختار ما بينهم.. عدم الاستعداد هو أكتر حاجة تخوف.

انتو بقاا بتخافو م ايي؟! 🌚

عمرها ما كانت ولا هتكون ضلمة فـ المطلق بس ساعات وبسبب قصر نظرنا بيضايقنا الرخيص البعيد الصغير وإحنا فـ إيدينا القريب الكتير الغالي.. فـ نهاية كل يوم ومهما كانت كمية الضغوط اللـ شوفتها خلاله ياريت تبص بصة على النعم اللـ كانت خلاله برضه.. نعمة إبعاد ربنا لـ حد مؤذي من طريقك ، ونعمة وجود حد جنبك وقت ما بتعوزه بتلاقيه.. نعمة الليالي اللـ بتبات فيها نار وتصبح رماد.. نعمة إن أنا تمام.. صحتي كويسة.. اللـ بحبهم بخير.. فيه على الأقل شخص واحد أنا أولوية عنده.. لسه قادر أضحك ، أحلم ، اتجاوز ، وقادر أشكر ربنا على ملايين النعم اللـ محاوطاني..

كفة ملايين النعم هي اللـ هتطب دايماً مهما كان حجم الضغوطات.. ألف شكر ليك يارب رغم إننا أوقات مانستحقش كرمك ده بس الحمدلله وألف شكر.

القوة الحقيقية إنك تكون قادر ترد ، وتجرح ، وتضر بس ماتعملش ده.. تبقى فاهم بس تستغبى.. تسمع الكذبة لكن تسكت وتعمل مصدقها عشان ماتحرجش اللـ بيقولها.. تكون متأكد إن السبب الفلاني اللي بيتقال ما هو إلا حجة خايبة بس تمام هبلعها مادام اللي قدامي اعتبر اللف والدوران منهج..

عقولنا فاهمة ، وذكاءنا عمره ما خيب ظننا ، ولساننا يقدر بسهولة يكون سكينة بس إحنا بنقرر إن لأ.. فكرة إنك تنتصر لأخلاقك وتربيتك أصعب بكتير من العكس..

فـ النهاية كل واحد عارف كويس هو مين ، عمل إيه ، وغيره مين.. السكوت فـ أوقات كتير بيبقى نعمة.. مش سكوت الضُعاف لكن سكوت النُضاف.

خلصت كد الفقره دي وكل خميس انشاء الله نعملهاا 💙

http://yuo.sarhne.com
صباح الفل ، دا لينك صراحه اللـ حابب يقول اي حاجه يقولها وناخد رأي بعض ف اي حاجه وناخد رأي بعض ف مشاكلناا وهكذا يلا كلو يبعت بقا🌚💙

لما تهاودني فـ الغلط أنت كده مش بترضيني لكن بتضرني.. صححلي وصحصحني بدون ما تقعد تحسبها.. أصل اللـ يزعل من كلمة الحق يتفلق.. الحقيقة مش بتوجع إلا اللـ على راسه بطحة..

كتير اللـ هتلاقي منهم كلام يرضيك حتى وأنت غلطان لمجرد إن لهم مصلحة معاك ، لكن اللـ أنت نفسك مصلحتهم قليلين وهيشاورولك على الصح بما يرضى ربنا ويرضى ضميرهم بدون ما يشغلوا نفسهم أنت هترضى ولا لأ..

الفكرة إن كله بيبان.. اللـ بينصح من قلبه ، وبنية صافية ، وكل همه إني أكون أفضل بيبان ، واللـ بينصح من ورا قلبه ولأسباب خبيثة بيبان.. الكلام ، والأفعال كشافين للـ فـ القلوب.

‏"أعطِ الإشارات قدرها"..

قبل كل خطوة ، وقرار ربنا بيبعت الإشارات اللي تشاورلك على الإتجاه الصح.. إشارات ربنا دايماً قدامك بس شوفانك، وإستيعابك ليها هما اللـ مش دايماً حاضرين وبيستخبوا ورا غشاوة من المكابرة ، والعناد ، والرفض!..

يمكن لسه فيه أمل فـ فلان.. يمكن الحال المهبب العلاني ينصلح.. يمكن نفس المعادلة بنفس العناصر هتديني نتيجة مختلفة.. يمكن مش قاصدين.. يمكن الحيطة اللـ قافلة الطريق ده هتتكسر لما أخبط راسي فيها!..

المليون "يمكن" بتوعك سبقهم مليون إشارة تم تجاهلهم، وجه بعدهم سيل من التبرير الأهبل لحقيقة هي نفسها قالت لك إنها كذبة بس أنت مازلت مصمم تشوفها بغير حقيقتها..

عشان خاطر صحتك ، ووقتك ، ونفسك من فضلك كفاية غباء وأعطِ الإشارات قدرها.

المحافظة على مشاعر الناس، وعلى خواطرهم، وتنقية الكلام اللي هيتقال لهم عبادة بتقربك من ربنا.. من زاوية الدين، والإنسانية، وحتى الذوق مفيش سبب واحد بيسمح لحد إنه يجرح غيره بمنتهى الجليطة، أو بحجة إن اللــ فـ قلبه على لسانه، أو بالهزار.. لو يعرف الناس حجم الأثر سواء الحلو أو السيء اللي بيسيبوه فـ غيرهم بأفعالهم، وكلامهم هيفكروا مليون مرة قبل ما ينطقوا أو يعملوا..

الأديب "نجيب محفوظ" قال: (الإنسانية هي أيضًا صلاة لها حسناتها وهي أفضل بكثير من ركعات المنافقين).

ماتوجعش دماغك ولا تضيع وقتك فـ محاول إيجاد تفسير لرغبة البعض فـ التقليل من كل نجاح بتحققه أو خطوة بتاخدها لإنها غيّة ومزاج عند القلوب اللي مش بتحب لك الخير مهما شوفت وشوش أصحابها بتضحك فـ وشك أو كلامهم نقط عسل فـ ودانك ومهما شافوا منك كل طيب..

اختار عدوك زي ما بتختار صديقك.. استنضف.. مش أي حد كده ينفع يبقى اسمه مزعلك أو يهز سلامك النفسي ويأثر عليك بالسلب.. ماتدخلش معارك مجانية مع حد مايسواش، لأن كُتر الخناق مع الصغيرين هيصغرك.. خلّي زعلك شرف مش أى حد ينوله.. الأيام لوحدها كفيلة إنها توقع كل اللـ صمم يسحبك لتحت.. ترفّع، وركز، وكمل.

𓆩𝗕𝗔𝟳𝗥𓆪 pinned «المحتوي لسه لطيف ولا حابين اغيرر حاجه؟! 🌚»

بصة حيادية كده على كل اللي فات وهتلاقي إن إيمانك بيزيد بالجملة اللـ بتقول: "إن الله لا يعطي أصعب المعارك إلا لأقوى جنوده"..
من كل الجوانب الحياة مش مستاهلة، وكله بيعدي.. الظروف هتتغير.. الفرص هتتكرر.. الناس هتروح وهتيجي.. بتزعل على إيه ولا على مين جاتك ستين نيلة.. إنت الوحيد اللـ باقيلك، وإنت الوحيد اللي تكون حريص إنك ماتروحش من نفسك.. أى إستثمار ف ذاتك هو ده اللي مكمل معاك..

اهتم بصحتك ، اهتم بشغلك ، اهتم بدراستك ، وبمستقبلك.. هما دول اللـ باقيين..

مادام أسرتك ودايرتك القريبة بخير وف أمان هو ده اللي بالدنيا ومافيها.. كله بيتعوض.

مش لازم إن وجهة نظر غيرك فيك وف الحاجات اللـ تخصك تبقى مخلصة ، أو خالصة لوجه الله ، أو حتى عاقلة..

مينفعش أى حد معدي يهز سلامك النفسي بكلمتين يرميهم والسلام زى رأيه فيك ، أو ف خطواتك ، أو ف اختياراتك ، أو ف شغلك..

السؤال الأهم قبل ما تتأثر هو: هل دي الدماغ ، والشخصية اللـ الواحد ينفع يشوف نفسه بلسانها؟..

كل واحد مننا أدرى بنفسه م أى حد ، وشايفها وقاريها أكتر م أى حد .. سيدنا "علي بن ابي طالب" قال: (لا تدع جَهْل الناس بك يغلب علمك بنفسك).