عزة عادل العمروسي 💙.

النهاردة جالنا في العيادة بنت حوالي ٢٣سنة وزوجها متجوزين من حوالي ٣ سنين مشكلتهم انهم كل ما تحمل بيحصل اجهاض بشكل متكرر وهيا حاليا حامل ف الحمل الخامس وخايفين تحصل نفس المشكلة ف حد ما نصحهم يشوفوا دكتور مناعة بقي

المهم الموضوع حصل اربع مرات خلال ٣ سنين مع اختلاف المدة بين كل حمل والتاني واختلاف عمر الجنين وأحداث عملية الإجهاض نفسها

البنت كانت جاية يعيني خايفة كدة ومستكينة
وزوجها هو اللي بيقول كل الداتا..البنت نفسها مش فاكرة احداث كتير وقت الحمل

الزوج بقي ماشاء الله حافظ كل حرف ف حالتها وبالأيام والتاريخ ويوم كذا حصلها كذا لغاية التحاليل كوم من التحاليل حرفيا .. احنا تهنا فيها من كترها
وهو عارف كل تحليل تحديدا اتعمل امتي وليه ونتيجته كانت ايه وخدت علاج ايه وقتها

وكل شوية يبصلها يقولها متخافيش انا هنا اهو وهتبقي كويسة ..فتاخد نفس وتهدي كدة

ولما اتطلب منه يعيد بعض الفحوصات تاني اللي ممكن تكون نتيجتها مش مظبوطة او اتغيرت مع الوقت مع انه عارف انه عمل التحاليل دى مرة وممكن تكون غالية ومكلفة تاني
بس تقبل الموضوع جداً وعلي عكس أغلب الأزواج اللي ممكن لما تقولهم حاجة زى دى يظهر منهم امتعاض واللي هو يا دكتورة ما تمشي نفسك بالتحاليل دى بقي واديها اي حاجة وخلاص دة لو جم مع زوجاتهم اصلا

حسيته خايف عليها وعلي نفسيتها من خوض تجربة الاجهاض دى نفسها تاني اكتر من اي حاجة تانية

ف حقيقي بقيت قاعدة مندهشة ومبسوطة بصراحة من موقفه اللي نادراً ما بقينا نشوفهم الفترة دى

وجه ف بالي مقولة
‏ لا نُسمي الرجُل رجُلًا
‏حتىٰ ننظُر إلىٰ زوجتهِ
‏أعزيزةٌ هِي أَم مُهانة!

ربنا يبارك للشاب دة ويجزيه كل خير عنها
ويقر عينهم بطفل سليم معافي🤍🤍

نُقل

إيه الصوت ده عندكم موهبة في البيت!

كنت معزوم عند مديري في الشغل، بس مصاحبني وبيعتبرني زي ابنه، رن عليا وقالي:

تعالى يامحمد نقضي يوم مع بعض.

روحتله وقعدنا سوا وفتح الشاشة وفتح برامج من على موبايله، استنيت يشغل فيلم بس معملش كدا، ولما جه ميعاد الأكل، كلنا وخلصنا، شاورلي على الحمام عشان أغسل إيدي وانا ماشي سمعت صوت بنت بتقرأ قرآن بس صوتها ملائكي، الصوت يعملك تنويم مغناطيسي، فضلت واقف مكاني بسمع، قلبي عاوز يرتوي، مش عارف أشبع، قربت شوية لاقيت الصوت بدأ ينخفض، كل ما أقرب الصوت يختفي تدريجي لحد ما انقطع!

باب الأوضة كان مقفول، دخلت غسلت إيدي وطلعت فبهزر وأقوله:

إيه الصوت ده؟ ده أنت عندك موهبة عظيمة.

لاقيت وشه اتغير وملامحه اتلونت باللون الأحمر وقالي بصوت فيه بحَّة:

صوت إيه!

قولتله والله ما قصدي أنا سمعته غصب عني وانا داخل أغسل إيدي كانت بتقرأ آيات مُعينة وبتعيد فيها كل شوية:

إِنَّ لِلْمُتَّقِينَ مَفَازًا (31) حَدَائِقَ وَأَعْنَابًا (32) وَكَوَاعِبَ أَتْرَابًا (33) وَكَأْسًا دِهَاقًا (34) لَّا يَسْمَعُونَ فِيهَا لَغْوًا وَلَا كِذَّابًا (35) جَزَاءً مِّن رَّبِّكَ عَطَاءً حِسَابًا.

رد وقالي وهو باصص للأرض والدموع بتقع من عينه:

الله يرحمها ويغفرلها كانت ونعم الابنة يابني.

قولتله بدون إدراك: نعممممم!

رفع راسه وبصلي، خفضت صوتي وقولت:

مش قصدي حاجة بس مش فاهم كلام حضرتك!

رسم على شفايفه ضحكة كدابة وقال:

الصوت اللي سمعته ده صوت بنتي المتوفية، هي كانت دايمًا بتقعد في الركن ده من أوضتها وتقرأ، كانت ممكن متاكلش ولا تشرب بس تقرأ كل يوم جزء من القرآن، ساعات كنت بتنرفز عليها وأقولها تعالي كلي الأول وبعدين ادخلي اعملي اللي تعمليه.

كانت تطبطب عليا وتقولي:

يا بابا ده هيبقى ونيسي في أيام مفيهاش ونيس.

كنت باخد كلامها عادي لكن عمري ما تخيلت تفارق الحياه وهي بتقراه، غابت في القراءة ولما دخلنا عليها لاقينها واقعة وجبهتها على المصحف.

من الوقت ده وكل ما أعدي من قدام الأوضة أسمع صوتها وهي بتقرأ مع إنها مش موجودة، ساعات بحس إنها لسه عايشة بس لما بقرب من الأوضة الصوت بيروح، سألت مشايخ قبل كدا قالولي:

" دي ملائكة محاوطة مكانها، عشان المكان ده الملايكة اتجمعت حواليها فيه كتير.. "

ببصله لاقيت وشه مليان بكاء منكرش إن قلبي وجعني عليه، بس البنت دي غيرت حياتي.

كل يوم مبقيتش بفارق مصحفي، في المواصلات ووقت الفراغ وكل وقت بكون فاضي فيه.

يا حظ من كان القرآن صاحبه، أنار قلبه وقبره! ♥

#واقعية
#عزة_العمروسي

يلا قومي نمشي العيال هتنام مننا.

لما كنت عيلة صغيرة أبويا رفع صوته على أمي ودي كانت أول مرة تحصل، ووسط الغضب قالها كلمة متصحش!

هي كانت عارفة إنه غصب عنه بس الكلمة جرحت كرامتها برضو.

خدتنا ومشت على بيت جدي، ترقبت أمي تحكي لكنها قعدت ساكتة وهادية، وجدي مسألهاش عن حاجة سابها على راحتها.. وشوية لاقينا بابا داخل قعد شوية وشربوا الشاي ولما لقى أمي مقالتش حاجة عن الخناقة ضحكلها وقال:

ما يلا بينا بقا عشان العيال هتنام ياحبيبتي.

غريبة أبويا مكنش بيقول الكلمة دي، دايمًا كان بيناديلها يا أم كريم!

هو حس إنها هتفرحها وفعلاً عينها لمعت، كانت أول مرة أفهم معنى الحب وتأثير الكلمة الحلوة من الحبيب لحبيبه، مشينا شوية على الكورنيش وجابلنا درة مشوي وحط دراعه على كتف أمي وقالها:

مهما حصل وزعلتي مني متسبيش البيت، أنا اللي أسيبه!

ومن اليوم ده كل ما يحصل بينهم زعل يسيب البيت شوية لحد ما أمي تهدى ويرجع وإيده فيها الحاجات اللي بنحبها.

ولما روحنا عند جدي زيارة لاقيته بيقول لأمي:

ها اتصالحتوا ولا لسه؟

ماما استغربت إنه حس بيها فقالتله: غريبة إنك مسألتنيش وقتها؟

قالها وهو بيطبطب على إيديها بكفوفه:

وقت الزعل الكلام بيخرب البيت وإن مسيركم لبعض، يبقى نشيل النفوس الكبيرة من بعضها ليه؟

أمي ضحكت وقالتله:

" أنت ربيتنا صح وهفضل طول عمري أعمل بالتربية دي.. "

خلينا نرجع بالزمن لعاداتنا وتقاليدنا، بلاش نبص لناس حياتها كلها مشاعة لينا، بيتشكوا لكل الناس عن مشاكلهم وبيتطلقوا على المٌشاع، وبيدخلونا في كل تفصيلة في حياتهم.

عاوزين نرجع حياتنا البسيطة والمصالحة الصادقة مش الصلح اللي بياخدوا عشانه اللقطة ♥

#واقعية
#عزة_العمروسي

جوزي سواق أوبر بس كل ما بيدخل عليا الشقة بيكون مفرفش وباله رايق وبيضحك، ولو لقاني مخلصتش الأكل أو الشقة مكركبة مش بيحاسبني وبيستنى حتى لو جعان، برغم إنه وصلني مرة لبيت أهلي شوفت قد إيه هو بيتعب من وقفة الشمس، والدوشة طول النهار.

كنت بستغرب كتير معاملته وصبره عليا رغم إني طول الوقت كنت بسمع من أهله إنه عصبي ومش بيعجبه العجب، وكمان جوازنا كان صالونات واتجوزنا بسرعة عشان هو كان ولد وحيد وأبوه كان بيجهزله شقته من بدري وأنا كنت مخطوبة قبله فكنت مخلصة جهازي.

وصليت استخارة يومها ووافقت.

وفي يوم كان راجع خنقة الدنيا كلها باينة في وشه أنا وقتها خوفت منه واتجنبت الكلام معاه بس من التوتر كان شوية حاجة تقع مني، كان بيبصلي ويبتسم، لما قعدنا ناكل قعد يقولي تسلم إيدك الأكل طالع جميل ومظبوط مش بطعم التوتر وقعد يضحك فضولي زاد فقررت أفتح كلام معاه واسأله:

أنت ليه عمرك ما اتعصبت عليا برغم غلطاتي وتأخيري عليك أحيانًا في تجهيز أكلك وهدومك رغم إنك بترجع تعبان ومحتاج كل حاجة تكون جاهزة والبيت يكون هادي.

ملامحه اتبدلت من الضحك لاسترجاع الملامح اللي باين عليها التعب مرة تانية وقالي:

ملاحظتيش يا منة لما وصلتك لأهلك إني كنت مشغل قرآن طول الطريق؟

هزيت راسي فكمل كلامه:

القرآن بيربي البني آدم، مينفعش أبقى مؤمن بالآيات دي غير لما أكون بطبقها، بس بطبقها بجد، مش أبقى قاعد هادي وكل حاجة مترتبة وأقول أنا بطبق كلام ربنا على نفسي وأهلي والناس لا.. الصِدق مع ربنا بيبان في أكتر وقت ممكن أتعصب فيه وأمسك نفسي، في أشد موقف ممكن أشتم فيه وأمسك لساني.

الصدق بيبان في المجاهدة..

أنا مش ملاك على فكرة أنا بجاهد ربنا فيكي وفي اللي حواليا، واتعلمت ده منك، انتي مفكرة لما بتصحي بدري من النوم وتشغلي قرآن في الشقة، وتحطيلي الأذكار قدام الأكل بتاعي ده سراب!

ده بيخليني نازل مستعد ليومي مهما كان عامل إزاي.

وعاوزاني أتعصب لغلطة غير مقصودة منك، انتي عمرك ما هتتأخري عليا في حاجة إلا لو حاجة منعتك أو عطلتك، شخصية هادية زيك ربنا هيحاسبني لو بهدلتها معايا وبعدين سكت شوية وقال:

منة أنا بحمد ربنا على نعمة وجودك.

وبعد سنة بالظبط لاقيته حافظ جزء كبير من القرآن من كتر ما بيسمعه، حرفيًا لما بيكون بيفطر الصبح والقرآن شغال على الشاشة كالعادة بلاقيه بيكمل مع الشيخ بدون ما يبص للشاشة.

أحيانًا روتينك اليومي ممكن يغيَّر حياة إنسان.

لا يكتمل البيت إلا لو كان صاحبه حكيمًا، لا يغضب كالأطفال، يقدِّر نعمة الزوجة ويقدِّس أساسيات التعامل معها.

#دفا_البيت
#عزة_العمروسي

مين خد المية من التلاجة.

عندي أخويا لما يحب يقابل صحابه بيقابلهم بره البيت أو في المضيفة اللي بابا عاملها في الدور الأرضي.

كان عندي أزازة مُفضَّلة جدًا بالنسبالي ونبهت على اللي يشرب منها يملاها تاني، وبالفعل كانوا بيعملوا كدا ويحطوها في التلاجة تاني، وسر المية دي إني من أربع سنين كنت عروسة جميلة أوي وخطيبي مات في حادثة يوم الخطوبة، ومواضيع كتير تبوظ في حياتي.

أبقى مذاكرة وحافظة المنهج صم وأسقط وحاجات كتير زي دي، لدرجة إني بقيت حد فاقد الشغف في كل حاجة حتى إنه يرد على اللي بيكلمه، إنسان شبه ميت!

لحد ما شوفت شيخ بيقول:
الرقية الشرعية هي حصن الإنسان من الجن والأنس ومن نفسه.. هي حياة لمن لا حياة له، عماد البيوت ووتر النجاح.

من يومها وأنا مسكت أزازة مية وقريت عليها ما تيسَّر من سورة البقرة والرقية، وبقينا كلنا بنشرب منها، حياتنا بجد أتغيرت بشكل غير طبيعي، بابا اللي بيتعصب من أتفه الأسباب بقا إنسان صبور وأخويا اللي مكنش بيحب يخرج بره أوضته بعد الشغل بقا يوميًا بره البيت ومع صحابه، جيت في يوم بفتح التلاجة مقلتش المية.

بسأل ماما قالتلي معرفش، لما أخويا طلع سألته قالي:

كنا بنشرب منها أنا ومحمود صاحبي، وسابني ودخل الأوضة.

تاني يوم لاقيته بيقولي: تخيلي ياعلياء إن محمود كان جايلي بيقولي هطلق مراتي؟ رغم إنهم بيحبوا بعض فوق مما تتخيلي، بس بقالهم فترة بيتخانقوا ومش طايقين بعض، ومش متفاهمين سوا.

بس لما قعد معايا امبارح وكنت قاصد أشربه من الرقية دي، النهاردة بيقولي أنت عملت فيا إيه أنا رجعت البيت لاقيت مراتي وحشاني كأني أول مرة أشوفها.. وسهرنا طول الليل نتكلم ونهزر سوا.

بصيتله بعدم استغراب وقولتله: حسبي الله ونعم الوكيل في كل إنسان بيأذي غيره وبينغص حياة الناس.

سبحان الله العظيم..

إحنا مش من الناس القليلة..

إحنا من الناس الكثيرة ولكن كثيرة عدم الشكر..

عمرنا ما هنرتاح في حياتنا إلا لو بقينا من الناس اللي ربنا قال عليهم: وَقَلِيلٌ مِّنْ عِبَادِيَ الشَّكُورُ..

القليل اللي بيشكر ربنا في السراء والضراء، لو شكرنا هنرضى والرضا بيهدي أعصاب الإنسان في أكتر المواقف اللي ممكن تجننك على أهلك ومراتك وصحابك.

الشكر باب الرزق والحصن باب الحفظ ♥.

فاللهم اجعلنا من الشاكرين المحافظين على أذكارنا وصلاتنا.

#حقيقة_نغفلها
#عزة_العمروسي

الناس اللي عملت ذنوب في الأشهر الحرم اللي عدت وانا للاسف منكم ممكن نقولوا الدعاء دة

اللهم إن عصيتك فهذا ليس استخفافا بامرك ولا استهتارا و لكن من ضعف نفسي فإنها تأمر بالسوء فسامحني و اليك قربني و عن عصيانك يا رباه جنبني و ابعدني

هتاخد ثواب كل واحد يقوله بسببك ، ذَكِّرْ فَإِنَّ الذِّكْرَىٰ تَنفَعُ الْمُؤْمِنِينَ.

وقفت قدام الدولاب شوية محتارة ألبس طقم إيه في حفلة التخرج!
أصل اللي كان بيختارلي مش هينفع يشاركني المرة دي..

قررت أفسخ الخطوبة اللي بقالها أربع سنين مستمرة وانتهت بكتب كتاب ونهاية سعيدة بس مكملتش!

أنا وخطيبي كان بينا خلافات كتير وعدم تفاهم أحيانًا.
بس كان بيعرف يحتوي خلافي وعصبيتي، كان حنين في الخصام قبل ما يكون في الود والحب، بس حسيت للحظة إنه مش هيناسبني بعد المسئولية اللي داخلة عليها..

شديت طقم مش أشيك حاجة وقفلت الدولاب بتنهيدة كلها مرار وغُصة في قلبي وكأنِّي مش عارفة أخطي خطوة بدونه!

صحيت تاني يوم لبست وخدت ماما وروحنا الحفلة، فلاقيتها بصتلي باستغراب وقالت:" خالد مش جاي؟ "
ضحكت بالنفي وقولتلها بصوت مُتقطع:" ميقدرش ميجيش أكيد متشعلق في زحمة المواصلات "

واستأذنتها بحجة إني رايحة أشتري عصير بسبب الحجر وجريت أدور على عابر سبيل أفرحه بأي حاجة، لما بقع في أي مأزق بدوَّر على أي مخرج للصدقة لإنها حل لكل مشاكلي وعن تجربة؛ فاكرة في مرة كُنَّا هنسيب بعض ورجعنا بسبب الصدقة، ومرة حليت وحش في الأمتحانات وجبت تقدير بسبب الصدقة، من بعدها وأنا عرفت إن حل المشاكل عمرها ما كانت بشطارتي ولكن بترتيب ربنا ليا.

وقتها أفتكرت سورة الضحى وسبب نزولها على النبي ﷺ
لما الوحى غاب ٦ شهور ميجيش للنبي ولا حتى في الرؤية النبي زعل وقلبه صابه الحزن لدرجة إن الكفار قالوا:
" إن شيطانه قد هجاه "

ومر النبي فترة من أصعب الفترات وكان مفكَّر إن ربنا مبقاش يحبه وإنه اختار نبي غيره، وكلنا مرينا بموقف النبي بدون استثناء لمَّا بنمر بمشكلة ساعات بنفكر بالطريقه دي، وبنحس إن ربنا مش عايزنا ولا بيحبنا .. والشيطان يبدأ يوسوس بقى إن خلاص بقى فيه انقطاع بينك و بين ربنا وتقعد تقول:
" دعائي مش هيستجاب، حياتى مش متظبطة، أكيد ربنا زعلان مني وكارهني ووو "
ولما الأفكار السلبية بتدأت تحاوط قلب الحبيب ﷺ ربنا نزله
سورة من أعظم سور القرآن وأجملها على قلب النبي.
واللي تعتبر طاقة أمل وتفاؤل لقلوبنا وبالذات وقت الحزن ولما تقراها وأنت مُكتئب هتحس وكأنَّها نزلت خصيصًا لك!

اسمع كدا.
والضحى: ربنا بيقسم بفترة طلوع الشمس بسبب إنها لحظة تفاؤل وبيقوله متخافش الأيام هتحلو.

والليل إذا سجى: الضلمة مسيرها تروح

ما ودعك ربك وما قلى : ربنا مش بيكرهك ولا عمره هينساك

وللاخره خير لك من الأولى : و اللي جاي أحسن ولو مكنش في الدنيا هيبقى في الآخرة.

وهوب يجي القسم الكبير جدًا وربنا بيقول:
« ولسوف يعطيك ربك فترضى »
ألم يجدك يتيما فآوى ووجدك ضالاً فهدى ووجدك عائلاً فأغنى : وكأن ربنا بيفركنا بنعمه علينا عشان وقت الحزن منكفرش بيها.

فأما اليتيم فلا تقهر وأما السائل فلا تنهر : واجبات عملية لازم تعملها وإنك لما تراضي اليتيم والسائل وتخرج صدقات وتنشر الخير على اللى حواليك هيتردلك بسعادة دايمة.

وأما بنعمة ربك فحدث : حدث بيها نفسك ..فكر نفسك دايمًا بنعم ربنا
ودايمًا خليك واثق إن الصدقة مفتاح لمغاليق مكنتش هتتفتح غير بفرحة غيرك ودعائهم ليك.

دخلت القاعة وعيني بتترقب المكان على أمل إنه يجي!
لكن خاب ظني فيه، ورجعت ماما تعيد سؤالها؟

رديت بعصبية وقولتلها: "مش هيجي عشان"
لاقيت صوت مُفضل بالنسبالي بيقول: " عشان كان بيعملك مفاجئة! "
ببص لاقيته واقف ورايا وماسك بوكس هدايا وبوكيه ورد وبيبص عليا وأنا لابسة الروب بفرحة وفخر وكمَّل كلامه بلمعة في عيونه وهو بيقول:
افتكرت كلمتك لما قولتيلي " ألطف أنوع الحنيَّة، الحنيَّة وقت الخصام وبصراحة كدا محبتش أسيبك في يوم زي ده ما هو انتي متهونيش! "

متهونيش؟

حقيقي إحنا عاوزين ناس منهونش عليهم حتى في خصامنا.

أما التُقل ده فَـ لا نحنُ أهله ولا مرحبًا به في قلوبنا ♥🌿.

#عزة_العمروسي

س/ الست اللي ما بتبصش غير لجوزها ليها وصف معين عند العرب ؟!

نعم، يعبرون عن المرأة التي لا تمدّ عينيها إلى غير بعلها لقناعتها و اكتفائها به بـ"قاصرة الطَّرف".

و هي صفة من صفات نساء أهل الجنة كما في قوله تعالى:

﴿و عندهم قاصرات الطرف عِين﴾

اللهم أبعد عنا فتن الدنيا وأرزقنا رضاك والجنة.

العلاقات اللي كان المفروض ننسحب منها من بدايتها ورغم شعورنا بعدم الارتياح كملنا.. النهاردا بقت أكبر ذكرياتنا المؤذية المُخزية!

القرارات اللي متجرّأناش إننا ناخدها في وقتها.. اتحولت لبوابة ندم مابتتقفلش!

الكلام اللي كان المفروض نقوله ولسبب ما سكتنا.. بيكرر نفسه في دماغنا ألف مرة،

التمادي في الكتمان وتجاهل إشارات الحياة من أسوأ الطرق اللي ممكن إنسان يمشيها.. بس الأسوأ منه إننا بعد ما نخرج منه نختار نرجع نمشيه تاني وكأن الدرس ماكانش كفاية!

بيحكي وبيقول:

بعد سنة من زواجنا قررنا الطلاق!

حاولت معاها بكل جهدي وطاقتي عشان اتغاطى عن عنادها وصنعها للمشاكل بسبب اخواتي.

ولما كنت بواجهها كانت بتبرر لأفعالها وعنادها إنه بسبب إن اخواتي البنات بيدخلوا في حياتنا بشكل مش طبيعي، يوم طلاقنا كانت واقفة هادية على عكس ما توقعت تمامًا وكانت بتتعامل ببرود مع اجراءات الطلاق، كنت مفكر إنها هتنهار أو على الأقل هتعيط بسبب الحب اللي كان بينا، رجعت لشقتي في نهاية اليوم وأنا مستغرب هدوئها بس كنت حاسس إن الدنيا كلها فوق قلبي!

اخواتي قالولي إن قراري كان عين العقل، وبعد كام يوم رجعت كل واحدة لبيت جوزها بس الغريب إنهم مكنوش بيهتموا بيا ومحدش كان بيسألني أكلت إيه؟ ولا خرجت فين؟ ولا حتى هترجع إمتى؟

ومبقوش بيجوا زيارة زي الأول، رغم إنهم كانوا دايمًا عندنا ولما يجوا يمشوا كانوا بيسيبوا ولادهم عندنا عشان مراتي تذاكرلهم؟ وبحجة إن لازم تتدرب على تربية الأطفال وتتحمّل المسئولية؟

وفي يوم كنت مريض فأختي اتصلت بيا عشان تطلب هدية لبنتها اللي نجحت وحتى مقالتش ألف سلامة عليك؟!
وقتها افتكرت مراتي اللي كانت بتحس بيا من أقل حركة ولو كحيت أو تعبت شوية كانت بتفضل جنبي وتخدمني بكل حب وود!
وللأسف في الوقت ده بس عرفت إنها كانت صح لما قالت إن أهلي واخواتي كانوا بيدخلوا في حياتي كتير جدًا لدرجة إن مكنش عندنا حياه شخصية خاصة بينا.

كنت دايمًا بشتمها لما تطلع شقتها وتسيب اخواتي قاعدين.
كنت بتهمها إنها قليلة الأصل وإنها عاوزة تفرق بينا.
ولما حاولت أرجعها وروحت بيتها عشان أخليها تسامحني لاقيت أهلها بيستقبلوني بكل إحترام، ملامحها كانت باهتة بس وحشاني جدًا .. كنت مفكر إنها مشتاقة ليا هي كمان لكني صُعقت لما قالتلي إنها مستحيل ترجعلي وإني استنزفت طاقتها وكسرتها وكنت مصدر تعب ليها، وإنها ادتني فرص كتير ولما سألتني هما فين اللي شجعوك على قرار طلاقنا؟

ملقتش حد جنبي، ملقتش وسوستهم للرجوع زي ما كانوا بيحاولوا جاهدين لطلاقي من زوجتي.

بيتي اتخرب وخسرت حب حياتي، للأسف مش دايمًا الباب بيبقى مفتوح لينا لما بنغلط في حق الناس اللي بتحبنا.

مينفعش نضمن وجودهم عشان هيجي وقت الباب هيتقفل فيه لحد يوم القيامة.

صدقني اللي هتسيبه النهاردة هتتمنى بكره ترجعه ومش هتلاقيه فحافظ عليه ♥🌿

أبواب القلوب التي تُغلق بالقسوة لا تفتح بألف باب من الود.

أحسنوا سكن القلوب فإن خرابها ليس بهيِّن ♥.

#واقعية
#عزة_العمروسي

كان في راجل بسيط مهنته الخياطة ، وكان فاتح محل صغير وكان المحل ده قدامه محل جزارة.

وكان كل يوم جمعة صاحب محل الجزارة يجمع الناس الغلابة اللي موجودين في المنطقة ويديهم اللي فيه النصيب.

تمر الأيام وصاحب محل الخياطة الراجل البسيط ربنا يكرمه اخر كرم ويفتح مصنع ملابس ويبقي سبب في أن ناس كتير تشتغل ويفتحوا بيوت ، وعلى الرغم إن بقي عنده مصنع بس كان سايب المحل البسيط بردو وكان بيروح بيقعد فيه ، وفي مرة واحد عدي عليه وقاله يعني انت ربنا كرمك وبقي عندك مصنع ومش بتخرج حاجة لله ، فـ الراجل البسيط أبتسمله وطبطب عليه ومردش عليه.

تمر الأيام والراجل البسيط يموت ، ويجي يوم الجمعة والناس تتجمع عند الجزار عشان ياخدوا اللحمة ، فـ الجزار يقولهم خلاص اللي كان بيخرج ليكم الصدقة مات ، فـ طلع اللي كان بيخرج ليهم الصدقة كل يوم جمعة هو الراجل الخياط البسيط عشان كدا ربنا أكرمه بالمصنع.

والناس كانت مفكره أنه بيحوش ومش بيخرج صدقات ولكن كان بينه وبين الله باب لا يعلمه أحد.

فـ أجعل لك طاعة بينك وبين الله لا يعلم بيها أحد لعلها تكون سبب في رزقك ونجاتك في الدنيا وسبب لـ دخولك الجنة.

ساعات الشيطان بيحاول يقولك لما تطلع 10 جنيه صدقة هتفيدك بإيه ده غيرك بيطلع كذا وكذا...

فتقوم متطلعش وتفكر إنها مش مقبولة!!

في مرة واحدة كانت معاهت فلوس كتير جدًا بس عربيتها وقفت في طريق مقطوع وحست بضيق تنفس رهيب كأنها بتحسب الهوا من خرم إبرة نزلت وقفت على الطريق بس كل اللي كان بيشوف معاها عربية مكنش بيبص حتى هي محتاجة إيه، جالها راجل غلبان قالها مالك؟ بس معرفتش ترد واقفة بتحاول تتنفس وبس ونطقت بصعوبة فهم إنها معهاش تركب للمستشفى، طلع من جيبه عشرة جنيه ووقفلها عربية وقالها:

بالله عليكي تدعي لصاحب العشرة جنيه دي بالذرية الصالحة!

ووصى السواق عليها يوصلها لباب المستشفى، الست كان عندها بوادر جلطة في القلب ولو كانت اتأخرت خمس دقايق كانت ماتت.

قعدت تدعي لصاحب العشرة جنيه بالذرية لإنها محرومة منها.

سيبك من إن العشرة جنيه أنقذت حياة إنسان..

لما دورت على الراجل ده في مكانه نزلت تديله فلوس قالها ما حق العشرة جنيه رجعت كنوز الدنيا؟

قالتله إزاي قالها الراجل اللي قولتلك إدعيله كان معاه فلوس كتير جدًا بس كل يوم يطلع فلوس كتير لله ويديني عشرات ويقولي وزع على كل واحد عشرة وقوله يدعيلي أخلف، النهاردة جه يبشرني إنه مراته حامل في تؤام بعد 16 سنة من عدم الخلفة وفلوس عمليات..

الست قعدت تعيط وتقوله الراجل ده جوزي وأنا الست الحامل دي!

تدابير ربنا مفيش عقل بشري يقدر يتخيلها، كلنا حلقة موصولة في بعضها ومحتاجين بعض.. ♥

لعلها المنجية.

#عزة_العمروسي

" انتي لسه فاكراني! "

كنت راكبة في العربية ورايحة الجامعة بشغف وحماس لإنها كانت أوَّل سنة ليا.

ركبت العربية وبعد شوية لاقيت موبايل البنت اللي جنبي بيرن، كانت مخطوبة وبعدين فتحت عليه ولإن الصوت كان عالي شوية سمعته بيقولها:
" حقك عليا والله متزعليش مني "
ضحكت وقالتله: " خلاص مش زعلانة "
قفل وهو مش مقتنع بكلامها وبعد شوية أخته كلمتها وقعدت تراضيها فالبنت قالتلها:
" أنا قولتله مش زعلانة والله "
وبعدين قفلت معاها واتصلت عليه وقالتله:
" بتخليها ترن ليه أنا قولتلك مش زعلانة! "
رد وقالها بندم: " ما دام زعلتك قدام الكل لازم أصالحك قدام الكل عشان كرامتك من كرامتي "
وبعدين قعدوا يتكلموا شوية وقفلوا...
ببص للبنت وبقولها " صالحتيه بسرعة يعني! "
بصتلي باستغراب وقالت: " عشان أنا اللي غلطانة "

سكت ومحبتش اسأل في حاجة تانية فقطعت فضولي وقالت: " كُنا في فرح واحدة قريبته وروحت بفستان ضيق جدًا رغم إنه قايلي أكتر من مرة بلاش ضيق، وفي آخر الفرح في شباب اتكلمت عليا وهو لاحظ فجه زعقلي قدام أهله "
بصيت للدبلة اللي في إيدي وافتكرت المواقف الكتير اللي كانت بتحصل وكنت بهون عليه فيها، والأيام اللي نمت فيها معيطة والتجاهل الغير مُبرر والغياب المتواصل والجفاف والقسوة في المشاعر افتكرت كل موقف جرح كرامتي وكل ده وجملة خطيب البنت بتردد في وداني:
" ما دام زعلتك قدام الكل لازم اصالحك قدامهم! "

طيب واللي بيزعلنا بينا وبينه ومبيفكرش يمسح الزعل من جوانا ولو بمحاولة بسيطة تفرحنا؟

رجعت البيت وصليت استخارة وبعدين سيبته، ركزت في دراستي وطلعت كسرة خاطري وهمِّي كله في المذاكرة، وبعد سبع سنين بقيت دكتورة في نفس الجامعة واتخطبت لدكتور معايا وكنا بنروح ونيجي مع بعض، مكنش بيسمح للزعل يأثر عليا وكان دايمًا مؤمن بمواقف النبي مع زوجاته..
وكان بيعذرني في تقلباتي النفسيَّة ويراضيني حتى لو مش غلطان بس المهم مزعلش!

وفي يوم كنت واقفة قدام مسجد نساء جنب الجامعة لاقيت بنوتة منتقبة بتنادي عليا وبتقولي: " فكراني! "

بصيتلها وقولتلها: " عفوًا مش فاكرة والله "
ردت وقالتلي: " أنا البنت اللي كانت راكبة معاكي العربية "
ومجرد ما قالت كدا افتكرتها، بصيت لطريقة لبسها الفضفاض وابنها اللي شايلاه على إيديها، ولاحظت التغيير اللي حصلها.

كملت كلامها بصوت هادي وقالت: " من بعد ما زعلني وهو في كل موقف كنت بغلط فيه كان بيفهمني غلطي بهدوء لحد ما حاولت أكون أحسن ست تملي عيونه "

ومعاه اكتشفت إن:

العلاقات محتاجة خفض جناح وتسامح عشان نقدر نكمِّل!
واللي ينفع يعدي لازم نعديه، وإن مينفعش طرف ينام زعلان.

والعلاقة اللي فيها طرف بينام زعلان علاقة مُسممة حتى لو كانوا من أغنياء الأرض..

الحنية دوا بتشفي الزعل.

فضلت واقفة قدامها عاجزة عن الرد لإنها لخصت الحياه في كلمتين، كان نفسي أقولها معقولة مكنش فاكرة انتي مين؟
انتي نفس الشخص اللي انتشلني من اختياراتي الغلط لأجمل قدر ربنا كتبلي أعيشه!
وبجد في ناس كدا لازم نقولها:
" شكرًا ليكم لإنكم من غير قصد بتخلونا نفوق! "

وبعد شوية زوجها جه وطبطب على كتفها وخدها ومشى!

" لا شيء يصالحك مع الحياة بكسورها الموجعة وضرباتها المؤذية مثل حب عظيم ." ❤🌻

#عزة_العمروسي

السعادة لقلبك 💚

أول تعليق بسرعة

البنت تبقى مخطوبة فـ نقولها مش من حقه أيام الخطوبة تستأذنيه قبل ما تخرجي،، فتعمل فيها البنت المطيعة اللي محصلتش وتقولك ازاي وحقه ومستحقه وتستأذنه
(وآلو ايوا يا "بابا" قال يعني كدا بتكبره وتخلي ليه مكانة ف المجتمع بكلمة بابا ممكن اخرج لو سمحت.!) وان قالها متخرجيش ماتخرجش.!

=وبعد الزواج نقولها مينفعش تخرجي بدون إذنه،، تقولك ليه هو اشتراني وانا زيي زيه وانتم وأمثالكم اللي مضيعين حق المرأة واستقلاليتها ومأخرين تقدم المجتمع وخرمتوا الاوزون

-لو عندك فرصة ماتنامش لوحدك في شقتك ماتنامش لوحدك وأسمع كلام سيدنا النبي.
=سيدنا النبي قال كده؟!

من سنة تقريبًا جالنا خبر وفاة واحد في العيلة، بس الخبر كان صعب شوية، مش عشان هو مات فجأة وبس أو عشان هو صغير في السن وبس، لكن عشان هو ما.ت لوحده وماحسوش بيه غير بعد يوم وليلة ولما قلقوا عليه ودخلوا شقته لقوه واقع على الأرض وريحته بدأ تنتشر في المكان!💔
فين أهله؟!
متجوز ومعاه أولاد بس زوجته للأسف سافرت عند والدتها يومين الأجازة عشان يغيروا جو.
فللأسف لما غاب عن الشغل يوم وأخوه عرف راحله جري ولكن قضاء الله نفذ، والدكتور قال إنه توفى نتيجة سكتة قلبية بالليل.

لما جالنا الخبر تذكرت نهي سيدنا النبي صلى الله عليه وسلم إننا ننام لوحدنا أو نسافر لوحدنا!
قال عبدالله بن عمر:"النبيَّ صلَّى اللهُ عليهِ وسلَّمَ نهى عن الوِحدةِ أنْ يبيتَ الرجلُ وحده أو يسافرَ وحده"

طب ليه نهانا صلى الله عليه وسلم؟!
عشان لو حد سافر أو بات في شقته لوحده ممكن لا قدر الله يتعرض لتعب فيحتاج حد يلحقه، أو عشان لو طلع عليه حرامي ممكن مايعرفش يواجهه لواحده، أو عشان الشياطين لو لقته لواحده ممكن تحاول تفزعه وتقلقه، أو عشان قلبه ممكن يحزن بسبب وحدته!

سبحان الله دينا ماسابش حاجة إلا ووضع لها ضوابط!

ادعوله بالرحمة وبلاش تناموا لوحدكم أو تسافروا لوحدكوا تحت إي ظرف!
وده طبعًا مايمنعش أقدار الله ولكن أخذ بالأسباب والله أعلم.
#أوامر_رسول_الله
#هبة_شلبي

" هي اللي بتعجن الأسمنت! "

عندي ابني الوحيد مسافر بيدرس بره في كلية طب ولإن الحمد لله حالتي المادية كانت كويسة فقولت أعمله شقته بحيث يخلص الجامعة يفتحله عيادة ويشوفله عروسة ويتجوز!

لكنه لما سافر بره وشاف البنات جاله اضطراب نفسي من ناحية الجواز وبقى طول الوقت يقول: أهم حاجة عندي شغلي!

وكل ما كنت بحاول أفاتحه في الموضوع كان بيضايق وجبتله عرايس كتير جدًا ومنهم معارف ورفضهم بلا استثناء لحد ما وصلت معاه لحل بالعافية وهو إني أختارله بنت بمواصفات خيالية!
قعد يعد في صفاتها لدرجة إني حسيت إنه مستحيل هيتجوز ولا حتى هيقدر يثق في مراته بعد كدا.

كانت من أهم صفاته إنها تكون مش عاوزة تشتغل برغم إنه دكتور والدكاترة بتتجوز بنات عندها كارير ومستقبل!
كان عاوز واحدة تقعد بولاده في البيت تربيهم بس، واحدة لما يرجع البيت يلاقيه نضيف ولبسها واسع، وتقعد بالعيل تقراله قصص تبني شخصيته على السلام النفسي بس.
لما كنت بقرب من ابني في كل مرة كنت بحس إنه معاه حق لإننا في زمن صعب دلوقتي، وكل ما كنت أقوله:
" بس زي ما الزمن صعب، إنك تلاقي البنت دي برضو صعب! "

كان يقولي ببساطة ونبرة هادية: حضرتك بتتكلم يابابا وكأن أمور الكون في إيدك، متزعلش مني بس ربنا مبيقولش لعباده مستحيل دي، ربنا قالنا ندعيله بقلب متيَّقن برحمته وهو هيستجيب وهيدبر أمورنا بترتيب وإحكام رهيب لدرجة إن الشخص بيحس إنه ربه هو لوحده مش رب ملايين البشر دي من جمال الإستجابة!
فتخيل معايا إنه بيتسجيب للملايين دول بنفس الحكمة والجمال!

حسيت الكلام واقف في زوري، ولأول مرة أحس إني خلفته عشان يربيني مش أنا اللي أربيه!
وفضلت حوالي سنتين بشوفله عروسة بس مش لاقي!

وفي يوم الشقة كملت وجيت أعمل المحارة ناس كتير دلتني على راجل طيب وسعره رخيص ورحيم بالناس، كلمته فورًا وقولتله يجي يعملي شقة ابني، لاقيته جه وبص على الشقة وقالي أسعار خيالية ومش موجودة في الزمن ده لدرجة إني كنت بقول:
أمال فين مكسبه!

لاقيته بيقرب مني وبيقولي: عاوز أطلب منك خدمة صغيرة؟

قولتله باستغراب: اتفضل ياطيِّب!
بلع ريقه بكسوف وقالي: مش عاوز حد يدخل عليا الشقة خالص واسمحلي أقفل الباب على نفسي وانا بشتغل!
بصيتله باهتمام وقولتله بتعجب: ليه؟

رد وقالي: بنتي بتشتغل معايا وهي في كلية آداب وبدل ما أجيب مساعد هي بتيجي معايا وبتاخد الفلوس تشتري حاجات لجهازها عشان لو اتخطبت مش هقدر على جهازها لوحدي!

رديت بدون تفكير وقولتله: أنت أسعارك رخيصة جدًا ليه مترفعهاش شوية.

لاقيته ضحك ضحكة صافية وجميلة جدًا وقالي:
" ومن يتق الله يجعل له مخرجا ويرزقه من حيث لا يحتسب "

وقفت قدامه وأنا حاسس بخجل غريب، حتى مكسوف إني أبصله من رفعة أخلاقه وقولتله: متجبهاش وهديك أجرتها وهشتغل معاك أنا المرة دي!

أول ما سمع كلامي معرفش يمسك دموعه، طبطبت عليه واشتغلت معاه فعلاً وحكينا في كل حاجة، وبرغم إن عشت عمري كله شغل وبدون صحاب حسيت ربنا عوضني بالراجل ده!
وأول ما ابني كلمني حكيتله كل حاجة عن الناس دي، لاقيته بيقولي: بس يابابا لاقيتها، بنت عمي حسين هي اللي هتكون مراتي!

لما اتقدمنا ليها قالت لياسين ابني إنها كانت دايمًا بتدعي الدعاء ده:
" اللهم يا مسخّر القويّ للضّعيف ومسخر الجن والرّيح لنبيّنا سليمان، ومسخّر الطّير والحديد لنبيّنا داود، ومسخّر النّار لنبيّنا إبراهيم، اللهمّ سخّر لي زوجاً يخافك يا ربّ العالمين بحولك وقوّتك وعزّتك وقدرتك، أنت القادر على ذلك وحدك لا شريك لك "

وكانت دايمًا تقوله: ربنا سمع منِّي ومخذلنيش.
دلوقتي هما اتجوزوا ومش بس كدا ده خلاها تكمل دكتوراه برغم إن قالي عاوز مراتي تقعد في البيت!

والإتنين دلوقتي بقوا دكاترة اللهم بارك! ❤

ولما سألته وقولتله: غيّرت قرارك يعني؟

لاقيته قالي: بصراحة يابابا اللي زي دي مينفعش تحس ولو من جواها إني أحسن منها.. ولما قررت أخليها تكمل كنت صح!

دي بنت مشوفتش زيها في عمري كله، وبجد مش عارف إزاي قادرة توفق بين شغلها وبيني وبين ابننا " موسى "

سبحان من باركلها في وقتها ❤

#واقعية
#عزة_العمروسي

السعادة لقلبك 💚

السلام عليكم ورحمة الله وبركاته

أنا ملاحظ إن الناس بدأت تنزل عن المولد النبوي
فحابب أفكركم أنه بدعة وكل بدعة ضلاله وكل ضلاله ف النار

إلقاء السلام سنة ورد السلام فرض

-من بروڤة إحدي براندات الزيّ الشرعي🤍

كنت بكشف على مراتي في يوم عند دكتور عظام عشان كانت واقعة على رجليها.

كنا قاعدين في العيادة وكل واحد مشغول بحاجة.. اللي ماسك الموبايل واللي قاعدة بتتكلم مع اللي جنبها واللي واقف يشرب سجاير وخنقة الدنيا كلها باينة في وجوه الكل!

حسيت بملل فطلعت وقفت شوية في البلكونة وبعدين دخلت تاني.
ولما قعدت عرفت إن احساسك لما بتقرأ كلمة في كتاب أو على السوشيال ميديا غير شعورك لما تكون مطبقها في الواقع، الواقع طلع لُه هيبة ووشعور باللذة رهيب.

فجأة ساد الصمت وكله قعد سرحان وساكت لحد ما جه آذان العشاء، الكل ردد الآذان وخلاص.. ولما رددنا ورا الإمام لاقينا طفل عنده حوالي سبع سنين بيشمَّر هدومه وبيقول لأمه:
" الحمام فين؟ "
خدته من إيده ورايحة معاه للحمام فالطفل وقف فجأة وبصلنا وقال: " أنتو هتفصلوا قاعدين؟ محدش هيصلي ولا إيه؟ "
ضحكنا على كلامه وسكتنا.
فساب ايد أمه بزعل ومشى، اتوضأ ورجع وشه زي البدر وبعدين قعد يدوَّر على حاجة يصلي عليها، فالسكرتيرة دخلت وجابتله مصلية، الولد وقف على المصلية وقال: " أنا هصلي لوحدي؟ "

فضلوا ساكتين!
فرد وقال ببراءة: " هو مش ربنا اللي بنصلي علشانه هو اللي بيشفينا؟ وانتو جايين هنا عشان يشفيكم؟ طيب هيشفي حد فيكم إزاي وهو مش بيشكره ويحمده ويتحامى بفضله؟ "
الناس عيونها دمعت!
فكمِّل كلامه وقال: " عمومًا كل واحد حر في حسناته "

ولسه هيكبر ويبدأ في الصلاة، قمت وقفت وقولتله:
" استنى انا هصلي معاك "
ولسه داخل عشان اتوضأ لاقيت النساء والرجالة وقفوا..
الرجالة دخلت اتوضت الأول وبعدين النساء، النساء وقفت شوية وبعدين السكرتيرة دخلتهم أوضة فاضية يصلوا فيها، واحنا وقفنا ولسه هنصلي لاقينا الدكتور طالع بيقول:
" محدش دخلي ليه هي فين السكرتيرة؟ "
وقفت وحكيتله الموقف، وقف مصدوم شوية، وبعدين مسح على شعر الطفل بفخر وقال وعيونه مليانة فرحة: " طيب استنوني، هي جات عليا يعني! "

صلينا وقعدنا استغفرنا شوية.
وبعدين اتفاجئنا إن الدكتور مخدش فلوس من حد وقرر يخلي باقي الكشوفات مجاني، ووهب الحسنات للطفل ده!

أم الطفل وقفت وايديها فضلت تترعش وتقول:
" هل جزاء الإحسان إلا الإحسان! "

واتصلت بزوجها المُغترب وحكتله الموقف!
والله من ضحكه وفرحته كنا تقريبًا سامعينه وحاسين بفرحته.

هنا بس أقدر أقول إن:

الذرية الصالحة هي العَصب اللي بيربط قلوب الناس ببعض.

أنت مش مُجبر تخلف بس لو خلّفت فـ أنت مُجبر تربي .

#عزة_العمروسي

نفسي بيتي يومه يبتدي من بعد صلاة الفجر ونربط كل مواعدنا بالصلاة، نفسي ولادي يطلعوا يقولوا (أبي - أمي) مش بابي ومامي، واحديثنا كلها تكون عن (الحياة والدين لا نغتاب احد اطلاقًا).

ونفسي ولادي يطلعوا يبصوا للبنت اللي بتلبس بنطلون مثلًا على انها مبتليه مش كافرة وهتدخل النار ويدعوا لها بالهداية، وانهم يكونوا عون لأي شخص مبتلي بإنه يقرب من ربنا ويتوب، مش يجتنبوه ويبعدوا عنه.

وعايز اعلمهم الحُب واخدهم ونروح سينما (إن وجدت أعمال مناسبة) عايزهم يشتروا كتب من مصروفهم ويتفاعلوا مع المجتمع ومايكونش عندهم حسابات على السوشيال ميديا، عايز بنتي سقف طموحها يعلى من علاقتي باباها.

وعايز أربي بنتي على احترام وتقديس زوجها وانها تكون نسخه من والدتها اللي بتتفن في ارضاء وطاعة زوجها، مش عايز اربي ناشذ وفيمنست، مش عايز أموت وأسيب بنتي او ابني مع شخص يدعي على اللي رباهم.

مينفعش ربنا يسلّمك "حته لحمة حمرا" في اللفة، وتيجي بعد 20 سنه تقول الواد ده بايظ وأخلاقه زي الزفت! حضرتك أنت مستلمه أبيض، فحرفياً هو منتجك، بتربيتك وصورتك ومشاكلك ومشاكل بيتك وبيئتك. فرجاءاً يعني، متبقاش متخلف وكمان غير متصالح مع نفسك!

-لا يجوز للمرأة أن تصلي وقدميها مكشوفتان.

يجب علينا التنبيه لعل إحداهن تجهل

أنا نفسي فـ بيت بيطل عليك تبقىٰ أنت الشارع والناس. ❤️🪴"))

العمر مجرد رقم لكن الحياة للجميع
‏عمر الإنسان لا يقاس بالسنوات عمره الحقيقي يقاس باللحظات الجميلة التي عاشها إن بعض اللحظات تعادل عمراً بأكمله
الروح لا تشيب ولا تشيخ الروح في عالم اخر
اياك ان تصدق بٱنك كبرت
ماتخافش تكبر.. خاف تنطفي
العُمر هيفضل مجرد رقم في معادلة حياتك.. لكن روحك وشغفك وفرحتك لو انطفوا مش هيفرق عندك ٢٠ أو ٦٠ أو حتي ١٠٠ سنة.

انتي حساسة زيادة عن اللزوم :

قال النبي صل الله عليه وسلم: "يدخل الجنة أناس أفئدتهم كأفئدة الطير "

من شدة رقتها وطيبتها، تبكي من أقل شيء، تضحك من أقل شيء، تسامح من أقل شيء.

قال عليه السلام " حرم النار على كل هين لين، سهل، قريب من الناس "

د/حازم شومان في خطبة ليه اتكلم عن صلاة الفجر وقال جملة احسبها موقظة لكل تارك لها

قال: "من لم يُلبي نداء الله في بداية يومه لا ينتظر أن يُلبي الله نداءه في باقي يومه"

من منّا يستطيع الصبر على ساعة بدون معونة الله!

‏عايز تعرف يعني ايه عوض ربنا؟!

- وهو طفل صُغير أُصيب بالعمى، أمُه كانت كل ليلة تدعي ربنا إنه يرد إليه بصره، في يوم رأت في المنام خليل الرحمن
يقول لها، تعجّبت ملائكة السماء من كثره الدعاء، قومي فقد رد الله لولدك بصره فأيقظته فقام بصيرًا، فوهبتهٌ للعلم، فكان الإمام البُخاري .

لسة قلقان؟!

-قيام الليل.

" انتي لسه فاكراني! "

كنت راكبة في العربية ورايحة الجامعة بشغف وحماس لإنها كانت أوَّل سنة ليا.

ركبت العربية وبعد شوية لاقيت موبايل البنت اللي جنبي بيرن، كانت مخطوبة وبعدين فتحت عليه ولإن الصوت كان عالي شوية سمعته بيقولها:
" حقك عليا والله متزعليش مني "
ضحكت وقالتله: " خلاص مش زعلانة "
قفل وهو مش مقتنع بكلامها وبعد شوية أخته كلمتها وقعدت تراضيها فالبنت قالتلها:
" أنا قولتله مش زعلانة والله "
وبعدين قفلت معاها واتصلت عليه وقالتله:
" بتخليها ترن ليه أنا قولتلك مش زعلانة! "
رد وقالها بندم: " ما دام زعلتك قدام الكل لازم أصالحك قدام الكل عشان كرامتك من كرامتي "
وبعدين قعدوا يتكلموا شوية وقفلوا...
ببص للبنت وبقولها " صالحتيه بسرعة يعني! "
بصتلي باستغراب وقالت: " عشان أنا اللي غلطانة "

سكت ومحبتش اسأل في حاجة تانية فقطعت فضولي وقالت: " كُنا في فرح واحدة قريبته وروحت بفستان ضيق جدًا رغم إنه قايلي أكتر من مرة بلاش ضيق، وفي آخر الفرح في شباب اتكلمت عليا وهو لاحظ فجه زعقلي قدام أهله "
بصيت للدبلة اللي في إيدي وافتكرت المواقف الكتير اللي كانت بتحصل وكنت بهون عليه فيها، والأيام اللي نمت فيها معيطة والتجاهل الغير مُبرر والغياب المتواصل والجفاف والقسوة في المشاعر افتكرت كل موقف جرح كرامتي وكل ده وجملة خطيب البنت بتردد في وداني:
" ما دام زعلتك قدام الكل لازم اصالحك قدامهم! "

طيب واللي بيزعلنا بينا وبينه ومبيفكرش يمسح الزعل من جوانا ولو بمحاولة بسيطة تفرحنا؟

رجعت البيت وصليت استخارة وبعدين سيبته، ركزت في دراستي وطلعت كسرة خاطري وهمِّي كله في المذاكرة، وبعد سبع سنين بقيت دكتورة في نفس الجامعة واتخطبت لدكتور معايا وكنا بنروح ونيجي مع بعض، مكنش بيسمح للزعل يأثر عليا وكان دايمًا مؤمن بمواقف النبي مع زوجاته..
وكان بيعذرني في تقلباتي النفسيَّة ويراضيني حتى لو مش غلطان بس المهم مزعلش!

وفي يوم كنت واقفة قدام مسجد نساء جنب الجامعة لاقيت بنوتة منتقبة بتنادي عليا وبتقولي: " فكراني! "

بصيتلها وقولتلها: " عفوًا مش فاكرة والله "
ردت وقالتلي: " أنا البنت اللي كانت راكبة معاكي العربية "
ومجرد ما قالت كدا افتكرتها، بصيت لطريقة لبسها الفضفاض وابنها اللي شايلاه على إيديها، ولاحظت التغيير اللي حصلها.

كملت كلامها بصوت هادي وقالت: " من بعد ما زعلني وهو في كل موقف كنت بغلط فيه كان بيفهمني غلطي بهدوء لحد ما حاولت أكون أحسن ست تملي عيونه "

ومعاه اكتشفت إن:

العلاقات محتاجة خفض جناح وتسامح عشان نقدر نكمِّل!
واللي ينفع يعدي لازم نعديه، وإن مينفعش طرف ينام زعلان.

والعلاقة اللي فيها طرف بينام زعلان علاقة مُسممة حتى لو كانوا من أغنياء الأرض..

الحنية دوا بتشفي الزعل.

فضلت واقفة قدامها عاجزة عن الرد لإنها لخصت الحياه في كلمتين، كان نفسي أقولها معقولة مكنش فاكرة انتي مين؟
انتي نفس الشخص اللي انتشلني من اختياراتي الغلط لأجمل قدر ربنا كتبلي أعيشه!
وبجد في ناس كدا لازم نقولها:
" شكرًا ليكم لإنكم من غير قصد بتخلونا نفوق! "

وبعد شوية زوجها جه وطبطب على كتفها وخدها ومشى!

" لا شيء يصالحك مع الحياة بكسورها الموجعة وضرباتها المؤذية مثل حب عظيم ." ❤🌻

#عزة_العمروسي

السعادة لقلبك 💚

أول تعليق بسرعة

صفحتي البديلة، استوعدت تعبي وشقايا عند ربنا..