Short Medical Tips💊✍

كل عام وانتو بالف خير صيادلة 🩷 ان شاء الله سنة سعيدة وتحققوون بيها كل امنياتكم يارب 🙏🤍

البيشنت مالتي مدلليني 😍😍❤️❤️
مو اني اسوي دسكاونت همة يشترولي 🥹❤️

يريد ابرة سبگتي 🤦‍♀️🤦‍♀️ المشكلة ماعدنا بس ابرة اندومي 😂😂

شكلة فلاونزا وجوعان راد يكتب ابرة اسبجك وكتب سبكتي 🥺😂😂
شفتو شلون ابرر للبيشنت 😂

حلو الشكل الجديد لابر نيروبين شركة اسينو ضافتلة ليدوكايين ❤️👍
حبيت الفكرة هواي ناس يكولون توجع 🥺

السلام عليكِ يا سيدة نساء العالمين السلام عليكِ يا والدة الحجج على الناس أجمعين السلام عليكِ أيتها المظلومة الممنوعةُ حقّها ،
اللهم صلِّ على أمتك وابنةِ نبيكَ وزوجة وصيِّ نبيك صلاةً تزلفها فوق زلفى عبادك المكرمين من أهل السماوات وأهل الأرضين..

أعظم الله أجورنا وأجوركم بأستشهاد مولاتنا وشفيعتنا السيدة فاطمة الزهراء (سلام الله عليها)

"قَدِ اسْتُرْجِعَتِ الْوَدِيعَة، وَأُخِذَتِ الرَّهِينَةُ، وَأُخْلِسَتِ الزَّهْرَاءُ، فَمَا أَقْبَحَ الْخَضْرَاءَ وَالْغَبْرَاءَ. يَا رَسُولَ اللَّهِ، أَمَّا حُزْنِي فَسَرْمَدٌ، وَأَمَّا لَيْلِي فَمُسَهَّدٌ، وَهَمٌّ لَا يَبْرَحُ مِنْ قَلْبِي أَوْ يَخْتَارَ اللَّهُ لِي دَارَكَ الَّتِي أَنْتَ فِيهَا مُقِيمٌ، كَمَدٌ مُقَيِّحٌ، وهَمٌّ مُهَيِّجٌ، سَرْعَانَ مَا فَرَّقَ بَيْنَنَا، وَإِلَى اللَّهِ أَشْكُو.."
- مِن كلامِ الإمام علي بعد دفنِه لفاطِمة (عليهما السّلام)💔

الحمدلله دائما وابدا 🥺🙏

صباح الخير 💜

هاي ثلاجة وحدة صيدلانية عدها اثنين اطفال كل يومين يتمرضون 🥺🥺 وتجيني طايرة للصيدلية تاخذ علاج 😅

دكولي شسوي ؟؟ حتى العلاج بعد ميشتغل عليهم الة ابر ☹️☹️

ف گتلها لازم تنطيهم multivitamin او اخذيلهم شراب max immune حتى تقوين مناعتهم

دكول ميتقبلون طعم الملتي فيتامين واخذت max immune راسا يتقيئون ميتقبلون ☹️☹️

نصحتها انو تخلي الشراب بالعصير واذا طعمة كولش قوي ويبين سوي مرتين 3cc الصبح وبالليل ❤️👍

ومعلومة ثانية ... گتلها اذا الشراب d3 وكالسيوم و omega3 خلي الهم بالحليب ❤️👍

واذا الشراب فيتامينات B او C او حديد خلي الهم ويا عصير برتقال ❤️👍

وهواي يجوني بيشنت للصيدلية نفس الشي يگولون اطفالهم مديتقبلون طعمة ويبقى بالثلاجة لحد ميكسبر ويذبو ... ودائما انصحهم بهالشي .. وهواي ناس يفرحون من اكوللهم هيج عبالهم ميصير ويا العصير❤️👍

صباح الخير 💜

اجاني واحد عندة كحة ومدخن كال زادت البارحة كولش اختنكت .. والدتي انطتج عمرها ورحنا دفناها

هو يكولي والدتي انطتج عمرها
اني اكولة صحة وعافية 😂😂😂😂😂 قافلة ع الصحة والعافية 😂😂 هو يكولي الله يسلمج


هسة اني الي يكولي صباح الخير اكولة صحة وعافية 😂😂

كاعدة ادور الفروقات بين البروفدين الاحمر والابيض مال سامراء

اول شي شفت الابيض non drawsy رحت للاحمر هم لكيت non drawsy لعد المن مسوين شكلين ولونين الباكيت 🤔
زين هو وين اكو علاج بي pseudoephedrine ومينعس 🤔🤔غير يسطر سطر 🤦‍♀️🤦‍♀️

احلى شي من يجوكم ناس يخبلون اول متفتحون 🥹🥹 ناس اخلاق وكلام حلو وبدون ميتعامل ينطيكم طاقة كولش حلوة ع الشغل🤍 احس نفسي راح ابقى مبتسمة لحد ميخلص الشفت 🥰🥰😍😍

اجاني رجال كبير يكولي عمو اني اخذ منج العلاج واصير زين من اول حباية 😂😂 انتي شوفتج علاج وكولشي من ايدج علاج 🥰🥰

يعني شحجي شرد علية 🥹🥹🥹
الله يزيد هاي الناس ان شاء الله 🙏🥰

مسحولة اليوم شفتين صبح وليل ومسواك مو طبيعي ولود شغل.. رجعت للبيت ميتة تعب ماما دكولي تتعشين كتلها لا اريد اصعد تعبانة
فتت لغرفتي تفاجئت بوكيه ورد ع جربايتي 🥹🥹🥹🥰🥰🥰🥰 لك شووو هااد يااا شنو منو شديصير 😍😍😍 مريوم دازتة توصيل واهلي مستلمي ..دتفاجئني بعيد ميلادي 😍😍 بس اريد اعرف هي شلون نسقت الورد ويا لون ملابسي اليوم 💜💜 حبيت اشاركم فرحتي بالورد 🥰🥰

لا حرفيا راح التعب 💜💜💜
بس سؤال .. هووو الورد ليش يجيب ورد 🤔💜

صدوك چذوب شنو هاي سولاقة 😂😂😂
اني مداافكر بااي شي بس باام الاحياء شلون هيج حاسبتها صح
لا انطتهم 20 درجة ولا شي 😂😂😂😂

الي ميعرف شنو سبب خسارة العراق خل يسمع الاغنية مال اليسا الجديدة قصدي مال تيسير العراقية 😂😂🤦‍♀️

شفتو مو كتلكم خمسة بس بالعربي (٥) 😂😂😂

هسة بس خل تخلص اريد واحد يشتريلي نستلة ماكو الشارع فارغ 😂😂

اكوللكم شنو رأيكم اذا گولنة خمسة 😎😎

بعدين ليش ضايجين من لعب المنتخب احنة متعودين بالشوط الثاني يلا يلعبون ... مدري شيشربهم كاساس بااستراحة بين الشوطين 😂

بما انو استراحة خل اضحكم 😊

اجتني وحدة تاخذ علاج اول مفاتت بدال سلام عليكم كالت سمعت عيطة شنو گول كتلها لا بعد ماكو شي 😁

كالت بلكي يفوزون كتلها بلكت 🙏
كالت ابني المدرسة كلتلهم اذا يفوز المنتخب اليوم انطيكم 20 درجة بالاحياء 😂😂😂 طلعو العراقيين ديحتفلون ويدعون ع مصالحهم 😂😂😂
كتلها لا حقج تسوة 20 درجة مو شوية 😁

كاتب ..
الربع طلع من ديالى وين وصل ؟؟

احب اطمنه وصل لبغداد 😂😂😂 ولو ممصدكة بس ميخالف 😂😂

هاي وحدة اجتني للصيدلية جايبة هاي الورقة .. ع فكرة كولش احب هاي الرسائل الي تجيني بااوراق تونسني 🤍

كتلها فلافل وبراسيتول 😂😂
هي صفنت
كتلها فلافل بعدنا ممگلين فد شوية نسوي
كالت صدك كاتب فلافل
كتلها هو يعني مشتهي فلافل وكتبلج ويا البراسيتول فلافل 😂😂😂
انطيتها الفلو اوت والبراسيتول كتلها دااشاقة😂😂😂

هاي من اداومون شفتين صبح وليل صدك تصير فلافل 😂😂😂

يارب 🙏🩵

11/11/2024

عمو دير ضهرك 😂😂😂😂متت ضحك ذكرني بااول مرة ضربت بابا ابرة 😂😂😂😂 مااحجيلكم شصار 😂😂😎😎

انعل ابو الدوام لابو حظي الاسود 😂😂😂گبل حياتي اظل نايمة لل 2 😂😂 حالتي هسة من اشتاقيت لفراشي والمخدة 😂😂💔 هاي شذكرني بالنوم مو چنت نشطة ونظفت ورتبت وخوش بنية 😂💔

اول يوم اداوم شفت صباحي 🥺❤️

مبدئيا اوك حلو 🤍
بس ترة اني هيج وكت نايمة هسة راح اكعد 😂😂😂

ودااشوف شغلات اني مشايفتها ولا ادري بيها 😂😂😂😂

مثلا تجيني النسوان للصيدلية بالستوتة ماادري عدنا هيج شي بالمنطقة بعد مااجي للصيدلية الة بالستوتة 😂😂😂😂

البارحة اجاني بيشنت ولد شاب عندة كحة كوووولش قوية وبصدرة .. ماخذ ازثرو وشراب كحة وحبوب للتحسس وخلصه وبعدة نفس الشي بحيث ميكدر يحجي حجايتين ويكح ..

سئلتة مدخن ؟ كال اي
كتلة مااكولك اترك التدخين لان ادري متركون بس ابتعد شوية فترة خل يرتاح صدرك شوية وارجع بالتدريج ☹️

وبهالاثناء طبت حجية مرة عجوز منتهية كوة تمشي رادت كولبرايد
رحت اجيب الكولبرايد واني احجي ويا الولد
انطيتة شراب برونكوفينت وانطيتة مونتيلوكاست

چااااان تصدمني الحجية وكل عقلها دتشوفة منتهي وبس يكح .. طلعت باكيت جكاير من جنطتها كلتلة تشتري هذا الباكيت مااريدة اني 🤦‍♀️🤦‍♀️🤦‍♀️🤦‍♀️🤦‍♀️🤦‍♀️ اخ گلبي شحجيلكم 💔💔💔🤦‍♀️🤦‍♀️ ظليت صافنة والله معقولة العجوز تبيع جكاير بالصيدلية 🤦‍♀️ كللها لا مااريد وطلع 💔💔 كتلها خالة مو حرام عليج انتي شفتي شصاير بي كوة ديتنفس وتنطي جكاير بدال مدكوليلة عوف التدخين مو حرام خالة 😔😔 بقت ساكتة

بس حرفيا كارثة اني بقيت صافنة شنو هاي العالم .. كل واحد يفكر بس بنفسة اعتبري ابنج وهيج متأذي منتهي تنطي جكاير ☹️☹️ ليش هيج العالم صايرة 💔💔

شباب الدوفيلان duvaline شنوو الشركات الي متوفرة يمكم ؟؟

هذا مو ميلاتونين ضييييم 😂😂 بس كون هذا الي لونة وردي فاتح مو الجلاتين الي لونة طوخ يجون يكولون ميشتغل...

هذا مو بس ينوم لا يودي لغير عالم 😂😂🥰 بحيث اشوف احلام مو طبيعية بس اكعد تحقق بعدني منازلة من غرفتي تحقق الحلم دخيلك ربي 😂😂😂 بعد تريدون ميزات اكثر 🤔🤔😂

يمكن راح اشتغل مندوبة شنو رأيكم 🤔🙂 ديكولون حلوة طريقة ترويجج للايتم وبسرعة تقنعينا 😎😎

1/11 /2024


ويا بداية شهر نوفمبر مطرت 🌧️🌧️ ان شاء الله مطر خير وشهر كلة خير يارب 🙏🩵

🥺🥺🥺 لا حول ولا قوة الا بالله


شوكت راح تخلص سالفة تعيينا دفعة 2023 تعبنا والله؟؟! 😔😔

🔴يوماً ما سوف ننتصر بتعينه ونعلن الفرحه ان شاء الله 🙏

شلونهم الصيادلة 🥺❤️

شباب اكو احد ديصير عندة تحسس بعيونة من الكبريت الي بالجو 🥺🥺 لو بس اني 🤦‍♀ هم مر عليكم هيج شي 🤔🤔

هاي الكتكوتة من تجي للصيدلية لازم تجيبلي شي وياها 🥹🤍

لانو اول مرة اجت انطيتها چكليتات گامت كل متجي تجيبلي شي 🥹🤍

هالمرة اجت تريد تسوي هاي الحركة ابوها يگول دكتورة تحمليها تريد تسوي حركات مدري منين متعلمة ههههههه گتلة اوكف خل اصورها 🥹😍❤️

شباب اريد اسماء ادوية جديدة اكتشفوها اخر فترة ووافقت عليها ال FDA
واذا هذي الادوية متوفرة بالصيدليات العراقية بعد احسن 🤍👍

طالبة مرحلة خامسة عدها بحث تخرج .. الي يعرف خل يساعدها ويكتبلنا بالتعليقات وشكرا جزيلا 🥺❤️

اجاني طفل گلي اريد تحليل مال حموال .. گتلة شنو عرفتها بس اريد يعيدها 😂😂 گال تحليل مال حموال 😂😂

انطيتة تحليل حمل ..گتلة شنو هذا گال تحليل مال حموال 😂😂😂😂😂

اليوم اجتني ٣ حالات اطفال عدهم سكر 🥺🥺 عمر 3 و 4 و 5 سنين وللعلم ماعدهم احد بالعائلة عندة سكر لا ام ولا اب ولا حتى اجداد ...
صار عدهم مرض سكر نتيجة خوفة او يقهرون الطفل بشي 🥺🥺☹️☹️

الاطفال كولش حساسين رجاءا لتخوفوهم عوفوا هاي سالفة المقالب وتگمزوهم عود دالعب الطفل كولش غلط ☹️☹️ وبعدين تتندمون نتيجة تصرف غلط 💔

الجسم عبارة عن هرمونات وبسرعة تتأثر بعدين الطفل نتيجة خوفة او هبطة يصير عندة سكر او تبول لا ارادي ☹️☹️ ف حتى اذا شفتوا احد يعامل طفل بهيج طريقة انصحو واحجو وياا فهموهم هذا التصرف غلط 🥺💔 شنو ذنبة طفل عمرة ٣ سنين ميكدر ياكل شي حلو وبسبب ابر الانسولين وممنوع من هواي شغلات يحبها صاير الطفل عصبي اعصاب مو طبيعية واصل مرحلة من مينطوا الشي يأذي نفسة 🥺🥺🥺 او يعض ايد امة .. امة تشوفني ايدها زركة من العض دكولي مااعرف شسوي ☹️💔

حجيت بالموضوع حتى تنتبهون ومن تشوفون هيج شي تنصحون الاهل 🥺🤍

ولكن مدري ليش گبالك احتار 🥺💔


ظهور القائد المستشهد و رد 🥺🥺🥺
ع كلاا اذا اذا رايح خسرناك 🥺😔💔

صيادلة اذا احد دخلت بااذنة نملة او حشرة ومطلعت وديحس بيها موجودة بداخل اذنة .. شتسوولة 🤔🤔

انتو احجولي وبعدين اكوللكم شنسوي ❤️👍

كل عام وعراقنا عظيم 🤍🇮🇶

كل عام والعراق اعظم رقعة بخارطة العالم 😍❤️ كافي انو بيها امير المؤمنين عليه السلام وبيها اهل البيت 🥺❤️

شوفوا احنا المتعارف عدنا انو ابرة الحساسية الموسمية الابرة الحليبية هي بيتاكورت ...


بالحقيقة البيتاكورت والكيناكورت والديبوميدرول تلاثتهن ستيرويد وتلاثتهن الدكاترة يكتبوهن للحساسية الموسمية وكلهن الافكت مالتهم حلو ويشتغلون فترة طويلة وكلنا نعرف الستيرويد مفعولة مثل السحر (بس لتنسون السحر ممكن ينگلب ع الساحر 😐 = يعني لتنسوون السايد افكت مالتة )
الدكتورة ذكرت السايد افكت ❤️👍



ف ابسط شي هاي الابر متناخذ اكثر من مرتين بالسنة ❤️👍

منصرفها باي هاند يعني اني اشخصها حساسية موسمية وتعال هاك هاي الابرة.. المفرروووض الدكتور كاتبها سابقا وهو يجي يطلبها وانطي .. واي وحدة تنطي عادي نو بروبلم كلهم نفس الشغل ❤️👍

خلو ببالكم ميصير ننطيها لمريض سكر 👍

وهاي الابر تلاثتهن يصيرن للمفاصل وللانزلاق هم يكتبوها الدكاترة واي وحدة تصرف عادي❤️👍

شرح الوردة دكتورة اساور 😍❤️ بصراحة بدعت واني جنت دااباوع بهاي الصورة بكتاب لبنكوت وهي شرحت الصورة بالتفصيل وبطريقة سهلة وسلسة ❤️👍

عاشت الايادي 🫶

Methylpredisolone and Triamcinolone _kenacort_ and Brtacort

كلهم ستيرويدات
الفرق بالتصنيف حسب

Anti_inflammatory effect and the self retaining effect

وعلى اساسهه نلاحظ اختلاف بطرق الاستخدام بشكل متفاوت
مثلا الkenacort يتميز بأنه ذو عمر متوسط نسبي لكن سريع ويتركز بالمفاصل اكثر من غيره لذلك نلاحظ انه يستخدم intra articular injection

أما methylprednisolone نفس التصنيف مالت الكيناكورت من حيث Anti_inflammatory لكن تكون ابطئ بقليل من الكيناكورت ومده بقائهه أطول
البيتاكورت تتميز بAnti _inflammatory كلش عالي ومده بقاء طويله لذلك هي أكثر شي تنصرف تعتبر فئه c للحامل

يجب عدم اعطائها مع اللقحات لأنها تثبط من فعاليه اللقاح
ملاحظة: قد يزيد نصف عمر الكورتيكوستيرويدات بشكل كبير في حالات الخلل الكبدي.

اليه العمل طويله لكن تعتمد على منع إطلاق الليوكوترين والبروستوكلاندين واكيد لازم ننتبه انو ما يصير كل ست أشهر تضرب ويستمر عليهه لأن ممكن تسبب مشاكل هواي منهه
سكر
ضغط
مشاكل بالfluid retention
مشاكل بالعظام .....الخ

واخيرا ً وليس اخراً كل المصادر ما ذكرت انو البيتاكورت تستخدم للتحسس كل ست أشهر لكن كالت انو medrol ممكن تستخدم لحالات acute asthma
المصدر BNF and Lippincott

شبيكم عبالكم امتحان وزاري تحبون ال without و except 😞

الي جابو صح خل يكتبولي بالتعليقات 🥺🥺 دااشكرهم 🥺😍❤️

بشرفكم معقولة بس 2 يجابون صح 💔💔💔💔💔

شبيهم جماعة البيتا 😭😭😭

راح اغيره بس لتعصبوني 🥺🥺☹️ اريدكم كلكم تجاوبون صح حسب الي دارسي وفاهمي مو حسب الي متعودين علية (حساسية موسمية يعني بيتاكورت 🤦‍♀)
تمام ❤️👍