قصائد باسم الكربلائي

القصيدة:فاطمه كل عام
للشاعر : كرار حسين الكربلائي

📌📌📌📌📌📌
فاطمه كل عام
تشكر الخدام
لا متنساكم
يالخدمتو حسين
📌📌📌📌📌📌
فاطمه بآخر محرمها و صفرها
تجازي أصحاب المآتم و الحضرها
لليقدم تعزية تقدم شكرها
شكرا من الزهراء يا ناس شكبرها
ينكتب إسمه
بدفتر الخدمة
ربنا يرعاكم
يالخدمتو حسين
📌📌📌📌📌📌
تگول يومية چنت للمأتم أسعى
الناعي و الرادود من يقرا له سمعه
لو بچيتو بيدي أحسب دمعه دمعه
والله كل دمعه بگبركم تضوي شمعه
العبرة لوليدي
توگع بإيدي
حاضرة وياكم
يالخدمتو حسين
📌📌📌📌📌📌
انا ما انسى الخدم و الباري يشهد
والصرف درهم ألف مني تسدد
يا بشر أقسم وحق شيبة محمد
چان يجبر خاطري اليلبس أسود
كل شي دين بدين
حتى دمع العين
گلبي يهواكم
يالخدمتو حسين
📌📌📌📌📌📌
اليلطم و يترك على صدره علامة
بهالأثر يتميز بيوم القيامة
ينحشر للجنة بثياب الخدامة
يصير جاري و هذه للخادم كرامة
اللي يخدمنا
منزله يمنا
الجنة مأواكم
يالخدمتو حسين
📌📌📌📌📌📌
بالقيامة هناك مجلس عندنا يا ناس
نشوف عاشوراء واقع مو بالإحساس
من نشوف حسين بس منحر بلا راس
و انا بالمحشر أشيل چفوف عباس
بساحة المحشر
نبچي عالمنحر
هناك ألگاكم
يالخدمتو حسين
📌📌📌📌📌📌
حسين لمن ينذكر لو چانوا اثنين
دوم أصيرن ثالثتهم وهمل العين
يالتناشد عني وين و مرقدي وين
انا گبري بكل گلب ينحب على حسين
ونتي مخفية
بكل حسينية
جرحي واساكم
يالخدمتو حسين


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

نزل مصحف سبايه

19 محرم 1446 هـ

نـِزَل مُصْحَف سَبايه
رُقيّه ابْضِمْنَه آيه
او لِـﮔيت البَسْمَله زينب سِبـيَّـه
**
قِرَيت الفاتِحَه واسْتَـفـْـتَحـِت بالآه
شِفِت ظـَعْن الرِساله للسَبي مَمْشاه
أسْمَع صوت زينب تِحْـﭼـي ما مَعناه
ما يِنْهَض أخويه اشلون مِن انخاه !!
كِتَب للخُوّه سُوره
رِسَم للغيره صُوره
او نِزَل قـُرْآنَه بارْض الغاضريه
**
شِفِت آيات مَسبيـّه ابْحَبِل تِنْـﮔاد
بين الحادي تِمشي او صيحة الجَلّاد
شِفِت بِعْيون زينب نَظرَة الأسياد
صَح مَسبيـّه لكن ترفض الأصفاد
يَهَالتِسْأل عَلى الحَال
الجِبَل مَتْهِمَّه الاغلال
ابْمَشي زينب شُموخ الهاشمية
**
أرَتـِّل آيَه آيَه اوْ دَمْعِي ظـَل هامِلْ
بِسْمِ الله بِدَيت ابْسُورة الكافِلْ
أقرأ وين عَمِّي ؟ ﭼَم طِفِل قائِلْ
ما عَاف السَبايَه راس ابو فاضلْ
نَعَم عالرُمِح راسَه
بُقه اعْليهُم حِراسَه
ابْعَيْنَه الواحِدَه يِحْمِي الرَعيَّه
**
رِحِت يَم المُخَيَّم رُوحي مَدْميَّه
شِفِت طِفله خَذَوا مِن عِدْها تِرﭼـيَّه
اويلاه مِن شِفِتْها دَمْعَة ارْقـَيَّه
ﭼَن قـُرآن وانْتِهْكَوا القـُدْسِيَّه
الوحي يِنْعَه كِتَابَه
رُقيَّه بالخَرابَه
اوْهُبَط جِبْريل يَمْهُم هَالمِسيَّه
**
يَزَيْنَب يا جَبَل مِن الصَبُر واكْثـَرْ
قِرَيتي اشْلون آيَة ﮔـَطـْعَة المَنْحَرْ !
مِن عِفـْتِي الجَسَد بالخَيل يِتْوَذّرْ
سُورَة فاطِر الـْهَالحَال تِتْفَطـَّرْ
تِشُوف اعْيُونِـﭺ اهْواي
اخوﭺ الما شَرَب ماي
اوْ شِفـْتي اعْلَه النَهَر جِثـَّه رِمِيَّه
**
قِرَيت الـ قـُل أعُوذ ُ مِن ابِن جَوْشَنْ
عيونَه اعْله السَبايه ياوِسَف نُظرَن
خَلاّهِن أمَام الجيش يِتْعَدَّن
واعْيون ابو اليِمَّه اعْلَه الرُمِح دِمْعَن
حِبَس دَمْعَه ابْذَبِحْتَه
او بِـﭼـِه اهْواي اعْلَه اخْتِه
غَيور الفاطمي اعْلَه الفاطِميَّه
**
يَقـُرآن السَبايه رَتـَّلِتْ بِيْكُمْ
رَب الكون نَزَّلْكُم اوْ حَامِيْكُمْ
ابوفاضل وَحي وِتْنَزَّل اعْليكُمْ
وحْسين اليِبَلـِّغ هذا واليكُمْ
يِبَلـِّغـْها الرِساله
اوْتِكَمْلوها ابِّدَاله
اهل بيت الرِساله الأحمديّه


الشاعر علي هادي العباسي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

خطة حرب

6 محرم 1446

خطة حرب .. گلب ابگلب
منا حبيب وعابس وجون
ومنا ابو فاضل لليشردون
صاروا درع للخيمه صوبين
منهو البعد يوصل للحسين
گلب ابگلب
*
واحدهم اگباله وگف مثل الجبل گدامه
بجتافهم خله رتب مختومه من اخيامه
متحضرين الكل أمر شياب بس خدامه
واحدهم السيف الحرب شد الظهر بعمامه
ميدان .. شجعان .. لحسين .. خوان
صاروا إله .. بكل كربله
مو بالاسامي يعد بالاحساس
لمن يعد عباس عباس
بالحب مثل عابس مجانين
منهو البعد يوصل للحسين
گلب ابگلب
*
الواحد وسبعين اخو لبسوا خضار الساده
وين اليبيضون الوجه صاروله مثل اولاده
من الجهات الأربعه خيل وزلم تعداده
حتى الرضيع ابفزعته محسوب من القاده
صعبين .. مريين .. ولحسين .. سهلين
للآخره .. جم حيدر
باعوا الدنيا ورخصوها
عشگوا حسين وطلگوها
الـ هاليوم عاشوا كل السنين
منهو البعد يوصل للحسين
گلب ابگلب
*
رسموا الخطة اتوزعوا كل واحد يسويها
واحد يسد الگنطره وواحد أرض يطويها
واحد يجيب الهم عبي القاداتهم ينطيها
واحد يجيب المشرعه بجف زينب ايخليها
فوگاه .. شفناه .. كل صوب .. وياه
الخطه ابتدت .. واتنفذت
نجحت الخطه بغير تحذير
طلعوا يعبدون الدنانير
القرآن ما صافح شياطين
منهو البعد يوصل للحسين
گلب ابگلب
*
دخلوها من الميمنه عالميسره گلبوها
غير الأجوهم راجلاً خيل وزلم سحگوها
مثل القلع خيبر قلع روس العده قلعوها
حتى الشرد من الحرب براسه الحرب خلوها
بالروس .. محبوس .. عباس .. كابوس
يم النهر .. جيش انكسر
من الخوف وين الجان سّلاب
شامر السيف ولابس احجاب
حتى الاصحاب اتهز بالإيدين
منهو البعد يوصل للحسين
گلب ابگلب
*
دخلوها موت ابكل كتر واحد بظهر الثاني
من الكاهلي اليبقه عدل ايطيح ابن نصراني
قادات اميه صيحوا من الحسين انعاني
سبعين كل واحد بألف هذا العدد رباني
لو صال .. خيال .. ينشاف .. زلزال
فزعة زلم .. للمنهزم
واحتاروا ابيا تل يلبدون
من الگاع للشارد يطلعون
واحدهم ابجنحان شاهين
منهو البعد يوصل للحسين
گلب ابگلب
*
سووا حصار اعله النهر بس هجموا الكفالّه
يوگف الفارس اعله الفرس وايطبر الخياله
وگفوا على الماي ابعطش واحدهم وما شاله
ما دروا من ماي الگصص سووا نهر لعياله
اصحاب .. محراب .. للموت .. أحباب
فوگ المهر .. دگوا صدر
خوه ارتووا والجيش حفاي
خلوا اميه ابعازة الماي
متفصلين افصال للدين
منهو البعد يوصل للحسين
گلب ابگلب
*
فرض الصلاة حل وانسحب جيش الحسين البابه
منا بدت حرب الغدر من دنگ ابمحرابه
من بعد يرمون السهم ويوگع ابصدر اصحابه
طاحوا وما خلوا جدم يوصل امن السلابه
ينلاح .. ما طاح .. بسهام .. مرتاح
آخر نفس .. ظلوا حرس
ارواحهم طلعت بالأسهام
وعيونهم ظلت عالخيام
ماتوا وينشافون عدلين
منهو البعد يوصل للحسين
گلب ابگلب
*
الشاعر حسام الحمزاوي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

قلبي خايف

ليلة 10 محرم 1446
گلبي خايف .. وانت شايف .. خوفي
حزني واضح .. من ملامح .. شوفي
اكسر الخاطر .. وآنه من باچر
خوفي
*
هذا الوداع المو سهل ويحمله گلبي
حاچيني يا بعد النفس خل انسه تعبي
بس گلي راجع للخيم من اگضي حربي
أمني ترجع لو بعد ما تمشي گربي
گلي راجع .. وانت سامع .. نوحي
دمعي يجري .. وانت تدري .. بروحي
گرب العاشر .. وآنه من باچر
خوفي
**
يعني انته باجر تنذبح والدم انظره
توگف غريب ومنظر الچتاله كثره
حلي الوحيد اركض على العباس أخبره
الحگ حبيبك حطوا السيف اعله نحره
ها يكافل .. يابو فاضل .. وينك
صدره ضامي .. نحره دامي .. احسينك
ظل بلا ناصر .. وآنه من باچر
خوفي
**
وادعني لكن بس طلب عندي و على أمرك
انطيني من هدمك علگ بي الگه عطرك
خاف الحوفار باجر اتدوس اعله صدرك
خاطر يدليني العطر بيك امن ادورك
فكري شارد .. گلبي فاگد .. غالي
فدوه لأسمك .. آنا يمك .. بالي
ودمعتي تناطر .. وآنه من باچر
خوفي
**
ودع عيالك كلهم بهاي المسيه
انا بغيابك راح اموت بلا منيه
غيم محنه وامطر اعله الغاضرية
احظن عزيزة گلبك الينبض رقية
لحظة صعبة .. غربه غربه .. بصوتك
الله يلطف .. چنها تعرف .. موتك
ظنت مسافر .. وآنه من باچر
خوفي
**
انا ومشاعر فرگتك وبـ هالهضيمه
وتگلي مسحي دمعتج وشدي العزيمة
شيشد عزيمتها التظل مثل اليتيمة
والراحوا اخوتها وبقت ما عدها خيمه
رايي ذايب .. بالمصايب .. هايه
لو مشينه .. ما بدينه .. راية
والخصم فاجر .. وآنه من باچر
خوفي
*
تذكر گبل لمّن گلت يا روح اخوتج
انخينه گبل اول حرف نفزع لصوتج
تذكر سألتك من گلت مو گبلي موتج
يا زينب انتي الحاضره بتشييع اخوتج
وانا اگلك .. ريته گبلك .. موتي
بنفسي عبره .. وحزني نبره .. بصوتي
مو حزن عابر .. وآنه من باچر
خوفي
*
ودعتك الله والبقه بعشرتنه لحظة
أذن آذان التضحية وصلينه فرضه
اهل الله وانطانه السمه وملّكنه ارضه
يمن رفعت ايدك گلت خذ حتى ترضه
هذا دمك .. يبقى لأسمك .. شاهد
سورة وآية .. وانت راية .. وقائد
الغائب الحاضر .. وآنه من باچر
خوفي

الشاعر ايهاب المالكي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

قوة مرة

ليلة 9 محرم 1446
قوة مره .. شافت ابنها
لابس جفن .. لبست جفنها

*

ام الاكبر شدت احزامه وتگله
يبني من تدخل عليهم سوي خله
انت الاكبر انت الاكثر همه قله
الجيش اذا يسمع علي ينهار كله
توصي يريد .. دم لحضنها
لابس جفن .. لبست جفنها

*

خلت الخوذه على راسه والجهاده
تگله يوليدي الك تحلى القياده
تگله يمه الـ بالسمه منمتظره ساده
يبني رفعة راسي من هاي الشهاده
ما بيّنت .. يمه حزنها
لابس جفن .. لبست جفنها

*

للحرب تدخل اريدك بالسياسة
يبني من اربع جهات اخذ الرئاسة
يبني مثل الريح كونك بالحراسة
كون اريد اليلتفت ما يلگه راسه
من شافته .. ما راح عنها
لابس جفن .. لبست جفنها

*

يمه ربيتك تره لهذا زماني
الميمنه اعله الميسره خلها تعاني
كون اريد اعداك تسأل كل ثواني
هذا الاكبر لو علي ينشاف ثاني
كل فزعته .. تنشاف منها
لابس جفن .. لبست جفنها

*

يا حلاتك يبني من صاعد مهرتك
يمه اريدك تترس الطف بضحكتك
اريد اشيلن راسي بالخيمه برجعتك
سمعة امك يبني من تعله سمعتك
يسمع فرح .. ما سمع ونها
لابس جفن .. لبست جفنها

*

يمه اريدن ضربتك تنشاف صوبين
مثل ضربة حيدره الما صارت اثنين
يبني اريدك توگف ابنص الميادين
تگلهم آني حيدره الثارات الحسين
لازمته بإيد .. وإيد بضعنها
لابس جفن .. لبست جفنها

*

وداعك انته مو سهل ويريد مدمع
يمه بس لحسين فدوه الروح تطلع
افتخر لو بس نحر للخيمة ترجع
حتى گلبي وياك يوليدي ايتگطع
طلعت وراه .. ما رف جفنها
لابس جفن .. لبست جفنها

*

منين اجيب الماي .. يبني ياعلي
دربي بعيد هواي .. يبني ياعلي
گطعوا يمين العباس يا فاطمة الحزينة

*
الشاعر حسام الحمزاوي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

حسين كعبتنه

:اليلة 6 محرم 1446 هـ

يا حبيب ابن مظاهر
گوم شيل العلم واظهر
**
حسين كعبتنه واجينه انطوفه
والمناسك اصبحت بطفوفه
**
حسين دين الله فرض يتبع فرض
بي صارت كربلا اقدس ارض
هو كعبه واحنه حجاج الرفض
مو مخيط الحاج ينزع خوفه
**
صوت من وحي الشهاده وبينه ضج
يا حسين عدنه وياك حج
اذن ويأتون ال من كل فج
زلم وكت الموزمه معروفه
**
بكربله الاحرام فصلناه جفن
وبعد غيرك لا عشيره ولا وطن
تراب جدمك سيدي جنة عدن
واسمك القرآن كل احروفه
**
على اخيامك سيدي يصير السعي
احنه انصارك وصيحتنه بوعي
حاشه يحكمنه الدعي وابن الدعي
ارگاب عدنه ما تهاب سيوفه
**
نطوف سبع اشواط ميدان الحرب
بسمك نلبي حجي لسان وگلب
ماي زمزم جود ابو فاضل يصب
ينبع اعلينه وفه من اجفوفه
**
صار رمي الجمرات ابكربله
على جيش يزيد واحنه انقاتله
يا هلا بحرب الكرامه يا هله
هاي زلمك للمجد مصفوفه
**
ما نحل احرامنه انحل الدمه
حتى من انطيح نصعد للسمه
هي بس وياك حسن الخاتمه
وبيك عنوان الصراط انشوفه
**
بكربله يختلف تقصير الشعر
لجل عينك راح ينگص النحر
دون حدك احنه نتگطع وذر
والمهم عدنه العهد منعوفه
**
ابوذيات : ماجن ، منصار

ليلي بغير دمع اعليك .. ما جن
وايام الفرج لولاك .. ماجن
عابس لولا حبك ابد ما جن
ولا جان الجنون اندار بيه
**
يهل تنشد على الانصار .. منصار
هذوله البيهم التنزيل .. من صار
خلقهم ربك الانصار .. من صار
حسين وخط اساميهم سويه

***
الشاعر وسام الشويلي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

غصبا على الما بايعه
5محرم 1446

غصباً على الما بايعه يبقه امير الكوفه
*
مسلم بكل خطوة الله امسدده
هذا ابو السيرة العظيمة الخالده
هُمه بالالاف وهو لـوحده
يبقه امير الكوفة غصباً عالعده
هو الامير وهيبته هيبة علي المعروفه
*
واثق الخطوة ملك يمشي ويسير
شمرته شمرة علي يعني چبير
حيدر الـرباه شـتتوقع يصير
بلايه شك يطلع مثل حيدر امير
هي الامارة تلوگ إله ميعوفها ومتعوفه
*
بني هاشم هُمه اسياد العرب
وآل امية اعليهم العار انكتب
كلشي يلمع مو ذهب الا انحسب
الفضة فضة والذهب يبقه ذهب
من بني طالب والنعم نخوة وشهامة موصوفه
*
وحده صح بس يمه يا ويله الـوصل
يبين هنانه الجبان امن البطل
جبل مسلم والجبل عالي يظل
الوادي وينه ووين يوصل للجبل
مسكين لـگباله وگف گلبه وگف من خوفه
*
المسألة مو مسألة كثرة وعدد
المسألة الـمنطي عهد يوفي العهد
ولابو اليمه وفي چان لاقصى حد
وكلمة السر عنده يا حيدر مدد
كل ضربة يهتف يا علي والجيش ذل صفوفه
*
هاشمي وطبع الهواشم ما تذل
مسلم ومو بس حچي گول وفعل
يدري بالكوفة يموت وينقتل
والمهم ثورة احسينه تكتمل
لحسين يرخص منحره لاجل النصر بطفوفه

*
الشاعر انيس الخفاجي الكربلائي


https://t.me/joinchat/AAAAAFR1edBva4n0mGWz0Q

قصائد باسم الكربلائي اشترك بالقناة👆👆

حلم مذبوح
الشاعرالسيد عبد الخالق المحنة

على عيونج يزينب حلم مذبوح
كل عينج دمع بس ما بجيتي
**
بچيتي جروح طهرتي المسافات
كل خطوة يسر منبر بنيتي
يا هيبة علي دخلت على يزيد
خورزتي الزلم و اتسيديتي
نظرات الزعل بعيونج سيوف
ذو الفقار صوتج من حجيتي
سفينة هم سريتي ببحر الدموع
على ساحل مصايبهن رسيتي
**
اسمحيلي يزينب اسأل اليوم
انتي هواي من اتحمليتي
لأن مجبور اسألچ عاليأذيچ
و ادري بيا مكان اتألميتي اسألچ يالغريبة و چلچل الليل
و حارس للحرم انتي إلبقيتي
اشوفچ چان بيدچ معصب يلوح
احلفچ بالضلع إلمن نخيتي
**
نخيت إلكالفچ مقطوع الزنود
معذورة لأن وحدچ صفيتي
مشيتي بغير طولچ خاف ينشاف
ضم روحه النهر لمن مشيتي
كل جرة نفس وياها عباس
لاچن من وصلتي له اشلقيتي
غمضها السهم وحدة من العيون
بس الثانية اتشوفچ اجيتي
**
صفت انتي وكفيلچ محد وياچ
مسموح العتب لو عاتبيتي
شقلتي له يزينب قوم وياي
وياه چلمة عتب بيها ابتديتي
اشقلتي له يزينب وين الوعود
مو انت إلقلت قومي بحميتي
عمود البيت انت الشايل البيت
تدري من يطيح يطيح بيتي
شقلتي له يزينب قوم وياي
من شفتي الزنود اتعذريتي
صحتي بشاربك آنه يعباس
ما رف شاربه من حشميتي
راويتي يزينب زرقة المتون
لو لا بسهم عينه التهيتي
لو مديتي ايدچ تلزم الايد
من شفتي الزنود اتعذريتي
**
قلتيله الخدر يا ابا الفضل راح
حرقوا خيمتي و طبوا ثنيتي
قلتي له صحت وينك يعباس
يضحك شامتچ و اتسلبيتي
كل هذا الحچي ما ينهض وياچ
قمتي بيا جرح من أيسيتي
على طولچ جرح لمن تقومي
مثل حسين من قمتي انحنيتي
**
رجعتي إلمن رجعتي بس الايتام
يسألونچ يعمة شو بطيتي
اعرفچ بت علي قد هاي الاحزان
مثل عباس يا زينب وفيتي
نعم فوق الهزل و الرووس وياچ
نعم عقب الخدر ذاك انسبيتي
بس الكل تشوفچ اسد مجروح
كلها اتميل عنچ لو مشيتي
اعذريني يزينب لا تزعلين
و آنه بدمعتي اتبين هويتي
**
الشاعرالسيد عبد الخالق المحنة

https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

اليلة 4 محرم 1446 هـ

أربع نشامى لحسين وفّايه
**
غيرة علــي بطف كربله ما همهم البين
عدهم وصيّه من گلب ذايب بالحسين
أُمهم توصّيهــم بقت من يعكس البين
لجل الحبيب إنتم وقف يا گرّة العين
منهم كفيل الحوراء والرايه
**
عونه الصدگ عون وسند لحسين مولاه
عاهد أخوه وما خِلَـف هالعـهـــد وياه
فرض الشهاده ابْخدمتـــك مولاي محلاه
بس ريت گبلك أنذبـــح والمــــوت الگاه
كلنه الخدمتك بالروح شرّايه
**
كل واحد يشد العــزم والفــرض كـبّـر
حيَّ على نصــر الحســيـــــن اللهُ أكبر
ثاني اللــيــوث الأربـعـــه زلــــزال بالبر
زلزل الجيش بصولِـتـــه حي الله جعفر
نادى الحسين إنته الروح والغايه
**
ثالث فحل لمن نزل للحـومــــه مغوار
خله العساكر ترجف ودخّــلــهـــم إنذار
عبد الله ناذرهه النــفــــس لحسين تندار
مو عجبه هاي المرجــلــــه تربــات كرار
ثابت يقينه وللزود دگ ثايه
**
مسك الختام أول گمر بس عالنهر لاح
عباس إسمه واللقب خـــطّاف الأرواح
كفّال زينب تطمـــئـــن كلما إجه وراح
عباس أكبر من سيوف وحرب وارماح
عاف الفرات وما ضاگ من مايه
**
أم البنــيــن الطاهــرة وصّـــت هالبدور
لحسين سور بكربله ويا محلى هالسور
ربت زلم تكــتـــب عـهــد من دم النحور
نورٌ على نــور وسـطــع من دمـهـم النور
كل واحد يعادل جيش وهوايه
**

الشاعر عمار هليل الواسطي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

عفتوني عليلة
3 محرم 1446 هـ

عفتوني عليله .. ما عندي وسيله
عمي يا ابو فاضل .. عمي يا ابو فاضل
****
يا عمي رايح بالضعن وعيوني تراقب
عفتوا المدينه مظلمه بغياب الكواكب
راحت بنات المصطفى وما ظلت حبايب
وبهاي المنازل .. عمي يا ابو فاضل
****
وياكم امشي الكربله ما اصبر وتاني
يا عمي جيتك حايره ما يرحم زماني
ما ما اعتب انا القدر لو وليه ولاني
بعدك عمري راحل .. عمي يا ابو فاضل
****
شد بالرحيل وما رجع سلطان الهواشم
ومنين اجيبك يا صبر بفراگ الفواطم
يا عمي وي طرت الفجر انصب لك مآتم
لاجلك دمعي هامل .. عمي يا ابو فاضل
****
لو ذبل اعيوني السهر لا تعتب عليها
طفله وعليله وكربلا ما ترحم بجيها
والغالي من هذا السفر سالم ما يجيها
سهرانه يكافل .. عمي يا ابو فاضل
****
سفرة مصاب وفاجعة وآهات وملامه
ما يخلص عليك الحزن حد يوم القيامة
يا عمي فوگ العلقمي تنخاك اليتامه
يا تاج المراجل .. عمي يا ابو فاضل
****
اطفالك على المشرعه بيا موقف عفتها
حال العليله سلوتك لمن ودعتها
زينب عزيزه فاطمه بيا حاله شفتها
ما بين المحامل .. عمي يا ابو فاضل
****
حيرني عاشر كربله واحزانه العجيبه
هاليله زينب عمتي حاطتها المصيبه
عگب المهابه بالعرب سموها الغريبه
ما بين القبائل .. عمي يا ابو فاضل

****
الشاعر علي الخفاجي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

عاشور عاش ابدمعتي
اليلة 2 محرم 1446 هـ

عاشور عاش ابدمعتي حسيناه
للموت باقي ابخدمتي حسيناه
 ***
ابهذا المحرم حاضره اجنوده
او راية عزاء احسين موجوده
نرفعها وي عباس وزنوده
مكتوب دوم ابرايتي حسيناه
 ***
خلو البجي ايهز الحسينيه
او تركوا التنازع والحجي اشويه
هوه الحسين ايجازي عالنيه
يا ريت توضح غايتي حسيناه
 ***
يحصل خلاف او هالأمر وارد
بس السواد الينتشر شاهد
إنَّ الحُسَينْ ابكل زمن خالد
موجود يبقى ابمهجتي حسيناه
 ***
إنسه انتماءك وي ابو اليمه
وابقى ابظلام الليل كالنجمه
توسع كواكب خيمة الخدمه
للكون توسع خيمتي حسيناه
 ***
حب الحسين اشسوه ما فاهم
خله الجنون اتعشكه هالوادم
يا ربي نظره انريد من فاطم
الزهراء سر امصيبتي حسيناه
 ***
ابهالخدمه نبقه او بيها ما نتعب
اشكد حلوه من تلتم خدم زينب
لمة شموع اعله الخيم تنحب
وآهات تختم قصتي حُسيناه
 

للشاعر مهيمن الفاطمي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

:دنيا قهرت بنت علي

ليلة 1 محرم 1446 هـ

دنيا قهرت بت علــي بهلالها
هل عليها محرم وشل حالها
****
هل عليها هلال بــي عين وسهم
وجف كطيع وجود مرميه وعلم
وبي تشوف النار شــبت بالخيم
بي تشوف اعــــــله النهر كفالها
****
لا تهــل يهــــلال ويهــل الدمـع
نادته وتلجم دليلــــــي المنفجع
لا تذكرني بعــــلي لـــمن تشــــع
جن علي الاكبر تشـــــوفه كبالها

****
تذكر حســـين وجبيـنه المنجـــرح
تشوفه فوك الكاع طايـــح منذبح
وبالهلال تشوف راسه اعله الرمح
هاي زينــــــــب والحــــزن يبرالها

****
زينب بــيا حـــال وبــيا نايحــــه
شافــت بدور الهـــواشم طايحه
شافت الشـــــبان كلــــها مذبحه
وبالخيم عطشانه كـــــل اطفالها

****
بالهلال تشـــوف جربه ومشرعه
ورايه طاحت من جفوف مگطعه
وبي بنات الهادي كلـــها مـــروعه
وهي مذعـــــوره وتلـــــم بعيالها

****
حيره حيرتها وتعاين للهلال
تشوف قوس ومن يشع يرمي النبال
وبي عليل تشـــوفه مكـــيود بحبال
وطفله طاحت لجن محــــــد شالها

****
تشوف ليل وبي خذوها اعله الهزل
بالصياح وسوط وحجار و ‏حبل
بالهلال تشوف اهوال وتهل
بطلعتك هايه تغير احوالها
****
للشاعر سيد آدم الحسني


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

ليلة 1 محرم الحرام 1446 هـ

كل عام وانا بخيمتك خادم
شكراً الك گد ما بچت فاطم
**
ابسجدة دمع ابدي العزه ناذر
ألطم الك من واحد العاشر
رادود ناعي لاطم وشاعر
كلهن اصير بخدمتك عازم
**
مو كيفي اخدمك انته رايدني
عن منبرك محد يبعدني
عابس اذا اتعب يساعدني
هديت كلشي ورايتك لازم
**
تتبدل الراية ويهل دمعي
يبدي السواد ويختلف وضعي
يا ريت كل حافر سحگ ضلعي
ما يبقى بيه ولا كتر سالم
**
ابقى بعزائك راكض وساعي
كلشي بدونك ما إله داعي
ابجي المصابك مو شرط ناعي
مو موسمي هذا الحزن دائم
**
تبقى دمعتي بكل سنة تريدك
كلما شفت شاب اذكر وليدك
من طاح الأكبر واصفگت ايدك
من انظر عرس اذكر عرس جاسم
**
كل ما شفت اخ الاخوه فاگد
تلطم اذكرك عالنهر گاعد
ابطيحة لوائه كسروا القائد
ظلمه رحل عنك گمر هاشم
**
كلما شفت ماي اذكر اشفافك
من العطش متيبسه اطرافك
تراب ودمه وطعنه على اجتافك
والشمر ذاكه الذبحتك قادم
**
فوگ السهام انكسرت اسهامك
كلما شفت نار اذكر اخيامك
لو تنسحگ لو تنچوي ايتامك
ما ظل عندك ولا طفل سالم
**
شهر السبي وعيني دمه ناحت
كعبة شرف فوگ الهزل راحت
روس اخوتي من الرمح طاحت
من سمعوا ايسب بعلي اللايم

**

الشاعر حمزة السماوي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

أمير الناس

استشهاد أمير المؤمنين الامام علي (ع)
ليلة 19 رمضان 1445

امير الناس جريح الراس يا حيدر ‏
ثمن تقواك نزيف دماك يا حيدر
علي يا فارس الـ بالدنيا يدنالك
خشوعك بالسجود اختاره جتالك
يا حيدر .. يا حيدر
**
علي يامن يلوذ الخايف بسدك
لجل دينك بذلت ابكل عزم جهدك
خبر هالليله يا خير العمل عندك
يتاني ومنتظر جيتك فجر وعدك
أمر مكتوب فرض مطلوب تنفيذه
وعد باريك وجوب عليك تنفيذه
وفي بعهدك ولا موجوده امثالك
خشوعك بالسجود اختاره جتالك
يا حيدر .. يا حيدر
**
گبل لا يصدر امر الله اعله تعينيك
گبل لا يرفع الهادي النبي ايمينك
چنت أول مدافع مخلص الدينك
ختمت ابقبلة الله ياعلي اسنينك
دليلك چان مع الرحمن اخلاصك
يقينك صار نبع اسرار اخلاصك
ثقة نفسك سبب تحقيق آمالك
خشوعك بالسجود اختاره جتالك
يا حيدر .. يا حيدر
**
علي الزاهد علي العابد يسمونك
دعائك والدموع الترست عيونك
وبالحومه ابثغر باسم يشوفونك
لذلك ياعلي اعدائك يبغضونك
ظلم واجحاف عدم انصاف عدوانك
اشكثر عادوك ولا هموك عدوانك
يعرفون اشتريد من الله يجرالك
خشوعك بالسجود اختاره جتالك
يا حيدر .. يا حيدر
**
للباري ابصلاتك سلمت امرك
وشديت الحزام ابعهدك بصبرك
وتدري بوعدك المحتوم ينتظرك
ما چان ابن ملجم يگدر يطبرك
وسافه انصيح صريع اتطيح يالوالي
ضوه المحراب خسوف انصاب يالولي
صيامك ما كمل لا كملت اعمالك
خشوعك بالسجود اختاره جتالك
يا حيدر .. يا حيدر
**
وي تكبيرتك وحي السمه كبّر
والكون اويه جرحك موقفه اتغير
وجوب ابمثل هاي الليلة يا حيدر
كرامة الهامتك هامات تتطبر
ابوفه اناديك ابدمه نواسيك هالليلة
ابلطم ودموع وگلوب تلوع هالليلة
و ما تكفي لون ارواح تفدالك
خشوعك بالسجود اختاره جتالك
يا حيدر .. يا حيدر
**
يخيمة وتحت ظلها امأمنه الفقره
الليلة چم يتيم الخنگته العبرة
وطبرة راسك اتراوينه چم طبرة
وچم جرح وألم وصواب ننتظره
وداع اعمار يحامي الجار توديعك
ونين ايريد اويه جية العيد توديعك
عزاء ابكل مسه ابرمضان نقرالك
خشوعك بالسجود اختاره جتالك
يا حيدر .. يا حيدر
**
وليكم راح لمّن صاح ناعي البين
يا ليل ابأمان البي تغمض عين
جرح چم جرح خلّف ابجسم حسين
ومن عباس لمّن گطعوا الچفين
وعفت زينب بمصاب اصعب مبتليه
تباري اطفال وتحامي اعيال مبتليه
سبية اعله الهزل يا حيدر اعيالك
خشوعك بالسجود اختاره جتالك
يا حيدر .. يا حيدر
**

الشاعر السيد سعيد الصافي الرميثي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

https://vm.tiktok.com/ZM6nsaQ3R/

قصيدة : وين هارون وجيوشه
للشاعر : سيد عبدالخالق المحنة
شهادة الامام الكاظم ع

وينه هارون و جيوشه السامرية
خل يجي وينظر شموخ الكاظمية
بيها أسرار أرض الأحرار .. الكاظمية
***
ها يهارون الملك وينه و مقامك
لو رشيد إنت فلا تسجن إمامك
إنت مغرور وتظن دايم نظامك
هسه ماواحد بقه يسمع كلامك
هذي قبه من الذهب شافتها عينك
هذا بن جعفر سجينك و انت وينك
و السجن صار أرض الأحرار .. الكاظمية
***
تأمر وتنهه جنت و الكل تهابك
ودّع الأملاك و إستقبل عذابك
حوبة المسجون خليها بحسابك
من كثر ذنبك بقه يكرهك ترابك
حته إسمك محد يلفظه ويريده
ظل إبن جعفر ملك والكل عبيده
و إحنه زوار أرض الأحرار .. الكاظميه
***
كلها تسأل وينه هارون وقصوره
ما نفع ملكه و لا فاده غروره
و المعذّب بالسجن حي ونزوره
والله ما تنذل أبد نفس الغيوره
هالأرض ترفض يمر جسمك عليها
يامكان و يا حفيره الإنته بيها
ما إلك دار أرض الأحرار .. الكاظمية
***
لو تجي وإتشاهد أنصاره الغياره
بالملايين التجي تحيي الزياره
الشيعي يتعنه مشي يرفع شعاره
والشعار الرافضي ماننسه ثاره
هذي شيعة حيدره قد المهمه
يشهد اعلينه يظل جسر الأيمه
عندك أخبار أرض الأحرار .. الكاظمية
***
إشتريت الدنيه والمال ابضميرك
إلك ماتوصل لون دامت الغيرك
يالخنت حامي الحمه نعرف مصيرك
من سعير النار قلي من يجيرك
لعنة الباري بقت تنزل عليكم
ابكل زمان املطخه بالدم ايديكم
تبقه  تذكار أرض الأحرار .. الكاظمية
***
يا بني العباس يالحللتوا دمنه
كتبوا التاريخ من دمهم زلمنه
مايهمنه الموت والله مايهمنه
غصبن اعليكم يظل عالي علمنه
مايهمنه الطاغية وكثرة جنوده
والله ياويله الذي اتجاوز حدوده
تبعث  إنذار أرض الأحرار .. الكاظمية


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

تريد المشرعة ركضة
7 محرم 1445

تريد المشرعه ركضه
وأنا گلبي وكف نبضه .. يعباس
يخي وينك يخي وينك
دأشرلي إبسهم عينك .. يعباس
يعباس .. يعباس

*
انا وليلي وبلا خيمه
ولا قوه ولا حال
على جروحي گمت أمشي
بديت أجمع بالأطفال
أكو طفله تون يمي
رعب شافت والأهوال
تناشدني وتنا أسكت
شجاوبها يكفال

تگلي بس هالاحجايه
يعمه صاحب الرايه .. ولا عاد
تره بگلبي بقت حسره
اگول الدگ إلج صدره .. ولا عاد
والأنفاس .. يعباس

***
اجه الثاني طفل خايف
بده يسأل أكو ماي
مشه عمي وخذ جوده
لحد هسه ولا جاي
اذا مارد أبو فاضل
يعمتنه شنو الراي
أريد أغفه عله إزنوده
اكو إبگلبي حجي إهواي

يعمه روحي للساقي
يبلكت بي نفس باقي .. ولادمات
اذا مس الجرح مدمع
أعرفه ميت أويفزع .. ولا مات
بلا راس .. يعباس

*
درت وجهي إضربت راسي
عسن تعمن يالعيون
بعد عينك يبو الغيره
زلم غربه يحرسون
أنا أسمعهم يشتموني
وبعد مدري اشيگولون
و نا حتماً أجي يمك
لجن خوفي يحسون

سواد إهدومي والظلمه
ستر والحارس إتوهمه .. واجي ليك
مشي الخايف ركض ياخي
ظلام وعيني رادت ضي .. واجي ليك
يفراس .. يعباس

***
شفت كثرة زلم ميته
على ايميني شكو اشصار
اذا منا مشه الكافل
يبعد إختك يمغوار
بعد فتره إختلف كلشي
صحت إستر يستار
عله اليمنه شفت قله
لچن كثره باليسار

صحت ما يخفه موضوعه
أكيد إيمينه مگطوعه .. يويلاه
حظنها رايته إبصدره
واخذ بتاره باليسره .. يويلاه
ينوماس .. يعباس

****
إشكثر قتلى عله ايساري
گلت يحصد بالأرواح
وانا أترقب خبر يكسر
عظم صدري والإجناح
بعدهه ما شفت قتله
عله إيساري صحت راح
بلا يمنه ولا يسره
على وجهه أظن طاح

حرت وتأخرت خطوه
شفت دمه او كلت هوه .. تره اهنا
نزيف اجفوفه دلاني
صحت ياخي تلگاني .. تره اهنا
بالإحساس .. يعباس

***
بقيت أتبع خطوط الدم
صحت ويلي عالطفوف
مشي او عثره واذا أوگع
أمد إيدي عالجفوف
لحد إهنا بعد ماكو
أثر للدم ولا شوف
أنا زينب أجي إبظلمه
يهالـ واگع عالجروف

بديت أتحسس اوجودك
بعد لحظه و شفت جودك .. صحت ليش
أتيه و گلبي دلاني
لخوي الما تلگاني .. صحت ليش
حجي الناس يعباس يعباس

***
أنا إبجفك أطگ وجهي
ولا ألطم باليدين
يبو فاضل ولا شايف
لطم زينب عله العين
ولا گتلي هلا إبزينب
ولا تنشد على حسين
بقه وحده يباوعلك
كأن يسأل رحت وين

وگع وعيون لخيامي
ينادي يابشر ضامي .. يعطشان
قبل لا ينگطع نحره
يخي داسو على صدره .. يعطشان
شمر داس .. يعباس

السيد عبدالخالق المحنه


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

عباس يعيوني


عباس ياعيوني ترضى يذلوني
للشام يهدوني ..
***
عندك يابو فاضل يخويه أشتكي حالي
حـــرمة بلا والي والشمـــر يـــبـــرالي
وليحدي لي الناقة زجر عباس يعوني
ترضى يـــذلوني وللشــــام يهدونـي
أنت الجبـتنا من الوطن وتكفلت بيـنا
بيدك تـباريـــنا وهـسه تخلينا
مابين عدوان وكفر عباس يعيوني ..
***
جابوا يا عباس الهزل ونووا يركبونا
وعنك يمشـونا وليزيد يهدونــا
ويسبونا من كتر الكتر عباس يعيوني
ترضى يذلوني وللشـام يهـدونـي
خويه الفواطم بالدرب منهو اليباريـها
عقبك يواليـها يا ويلي عـليهــا
وتروح تاليها بيسـر عباس يعـيونـي ..
**
ترضى الفواطم يانفـل ترفج غرب وتروح
وعلى النياق تـنوح وإنت تظل مطروح
على الرمح راسك كالبدر عباس ياعيوني
ترضى يذلوني وللشـام يهـدونــــي
للشام لو طب الظعن والناس إجت لينا
تتفرج عليـنا وإحنــا يا والينــا
جاتيف مابين أهل الغدر عباس ياعيوني..
*
ردنا للمجلس من نطب ويزيد عـايـنا
وتـــشـــمت بذلنــا عنك يسايلنا
يايو الفضل شنهو العذر عباس ياعيوني
ترضى يـذلوني وللشام يهدونـي

للشاعر سيد عبدالحسين الشرع


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

مثل طبع النسر طبعي
أطير ابهيــــبة الجنحين
وحس يتكسر اجناحي
من أذكر مصاب أحسين
حُسيناٌُ وآ حسيناه 
**
حجب غيم الكدر شمسي
وعليّ وجه الصبا أظلم
أبات وحسرتي بصــدري
الجبل من عدها يتهدم
سحابة عيني عالوجنه
غِداة تمـــطر دموع ودم
حزين وصبري يعصيني
ويطاوعني مرار البين 
حُسيناٌُ وآ حسيناه
****
يوصفولي الصبر وأنا
أدور عالـــصبر ما صح
تهدم ساتر اجفوني
ودمعتي اعله الوجن تسفح
على اللي أخوته وگومه
وبنينه بخـــطة المذبح
يشاهدهم جثث صرعى
ضحايا تناثروا صوبين
حُسيناٌُ وآ حسيناه 
***
تفرق شمله وتوزع
بين الشـــارة والمنحر
وبين أمواج خيل أعداه
يظل وحده أبو الأكبر 
تتعاصف رياح الموت
ويتــــلافع هجير الحر
وحيد استوحدوه الگوم
حـــاير يتجه لاوين
حُسيناٌُ وآ حسيناه 
*
غير السيف ما عنده
مناصر بالوغى أينصره
رموه ابسهم المثلث
وتكــور من ظهر مهره
وگع وگعت أخوه اللي
وگع من عصروا الزهره
ما أشبه أمس باليوم
وجمعت كربله أمصابين 
حُسيناٌُ وآ حسيناه
****
وگع ضامي وجمر گلبه
أنتقل من گلبه لخيامه
بحوافر خيلهم سحگوا
مثل سحگاوا أيــــتامه
رماح اعله الجسد وسهام
من كل كتر تترامه
وهجت غدر وأيتام
ما تعرف دربها امنيـــن 
حُسيناٌُ وآحسيناه 
***
انفصل عن الجسم راسه
وگع طود الصبر يمه
يتامه وغدر انسلبت
مثل ما سلـــبوا جسمه
انطفح دم منحره وحتى
المنايه أختنگت أبدمـــه
بكل العين أنرسم نحره
ودمه تفايض بكل عـين
حسينا واحسيناه

للشاعر الأديب جابر الكاظمي


https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆

ليله اعله ليله تموت العليله


ليلة على ليلة تموت العليلة
****
عليلتكم يهاشم دوروها
تموت من المرض لو ما تجوها
بعدها صغيره لالا تقهروها
مشى عمها واخوها وحتى ابوها 
ليلة طويلة   تموت العليلة
****
يهاشم علاقل واحد يجيها
يشوف شصار ما صاير عليها
اذا يرجع ابوها وعتنيها
اكيدا كل مرض ما يبقى بيها
بهم تشتكيله   تموت العليلة
*****
يجيها الاكبر بهاي المسية
يجيها بصوغة من الغاضرية
ترة صوغتها ترجية رقية
يجي الاخ الجبير وهاي هيه
المدمع يسيله   تموت العليله
******
بعد صار المصاب بطف الجراح
صعوبة الميت يرد بعد ما راح
يكلي شلون بالراسه على رماح
يظول رحيله   تموت العليلة
***
يجي العباس عمها للمدينه
حنين وادري مشتاكه لحنينه
شرط بس من يجي مصيوبة عينه
يجي بلا يسرته وبلا يمينه
مصايب ثجيله   تموت العليله
***
تجي زينب تواسيها بحزنها
عسى بهالشوفة يسكن عادي ونها
شرط زينب تجي ازرق متنها
بعباية تحركت ترد لوطنها
وين العقيله   تموت العليله
*****
واذا رد الحسين العله تبرى
اكيد الطفله تفرح بس تنظره
شرط بس من يجي مكطوع نحره
يجي وطبع الحوافر فوق صدرة 
ذايب دليله  تموت العليله

الشاعر كرار حيدر الخفاجي

https://t.me/joinchat/AAAAAFR1edBva4n0mGWz0Q
قصائد باسم الكربلائي اشترك بالقناة👆👆