علي الفيصل

١
نادة ابطلب ثارة…وفزعتلة أنصارة
كلمن لزلم چفة لوا

محد جنة أگرابة…وللحومة رغابة
العلتهم الحومة دوا

وگفت زلم للحرب كلش عنيدة
ابموقف يدل عاليحب گطعة وريدة
وين اليدك الجبل من سطرة ايدة

كتبوا على الراية
لحسين الاحچاية
غير العشگ والموت
ما عدنا كل غاية

من حيدر العينك
جُندك علىٰ دينك
انموت وتگول الناس
ربعك قرابينك



٢
قد قامت الساعة…محد عِلة أشراعة
خلوا الابن ناكر ابو

عالعيلة عيالة…وعالشگرة خيالة
زلم الخيم هاية كفو

وشايبهم اعلة الحرب شاب اصبح الها
وازغرهم ابنزلتة ايشيب شملها
چا هية أبد مو عبث بس همة اهلها

كلمن نصر يسعي
الحج ابعشگ شرعي
ولهذا گال احسين
محد مثل ربعي

مثل النخل وگفوا
دخانة ما رجعوا
من دارت اعلة احسين
كفوا دمة ووفوا



٣
حي الله حياهم…صالوا علي وياهم
هاي الزلم هاية هلا

بالفزعة نغارة…وبالحومة طبارة
بس بيهم الملگة حلا

منانة واگطع بعد هذا الوفة الزين
مدوا رگبهم فدة لعيون الاحسين
الله اختصرها الربع بالدنيا سبعين

الرايد يقلدهم
ما يوصل الظلهم
الله اختصر الاصحاب
لحسينة خصصهم

اشلون الزلم لچوة
هية الزلم عدوة
امغالب غدوا بالروح
تگوة ابظهر تگوة



٤
الطف مالت اسفوحة…طلعت صدگ روحة
وخيرهم ابنفسة شحط

وين الحرب عيدة…بالمعصم اعلة ايدة
كاتب علي وولدة فقط

نبع الولاية الصدگ بالعاشر ايسود
كتبوا (علي) اعلة الگلب مو بس بالازنود
شافوا عشگهم ثمر ما شافوا احشود

حباً لأبوك أحنة
لاخر نفس صحنة
لاجل الحسين انعيش
هم لاجلة من متنة

گالوا يمولانة
واحدنة عنوانة
لو آخرة وياكم
لو دنيا خسرانة


علي الفيصل
البصرة-هيئة لواء زينب قصر العباس
ليلة اللذي لم يرى أوفى ولا خيراً منهم
#بسم_الأصحاب_١٤٤٦_هــ

١
يزلامنة ويهل المحنة
ام عون نادت هاا يهلنة
اخلافكم موحش ضعنة

اتريد راية
حگها اعلوية اركضت وتريد راية

اشلون هاية
ام عون ما ضل الها احد بس العباية

اخيول شافتها تجول اعلة المصاريع
والما تسحگة الخيل يركض وبفلة ايضيع
بلوة چبيرة

احسين طاح وطلعن ابنيات الاحسين
تشوف اخيها اعلة الترب ماصاحلة امعين
بس الحصيرة


٢
چا وينها اولاد ابو طالب
ندمة على اثخان الشوارب
نساونكم صارن غرايب

اتريد عونة
ام عونكم وحدها هسة اتريد عونة

ولية ولونة
ناس غربة الچم قصر خوية خذونة

امدللتكم رايدتكم يالطواعين
كلفة علية بت علي ابنص الدواوين
اشلون اطبها

ولسانهم مثل السهم حچية بالاگلوب
اتموت وحدة من الحچي ووحدة بالغروب
خانگ گلبها


٣
للموت خوية اتعنة عنوة
ولا سوط بمتوني ايتلوة
بفياي رمحك نمشي گوة

والله مصيبة
الوادم الغربة تسميني غريبة

امنين اجيبة
الما يخلي الهوة ايمرني امنين اجيبة

خوية الضعن كلة مشة ابفي المچاتيل
والما مشة ويانة اضنة سحگتة الخيل
كلها علية

خوية مصايب مو مصيبة وخاطر اتهون
النوگ هزلة وابمشيها اتهدل الامتون
والله خطية


٤
يگضي الصبح وانوب ليلي
بس بالنوايب يعتنيلي
حيلي خلص يا بعد حيلي

الحيل خاوي
والدرب مو بلوة لا خوية بلاوي

الموت ناوي
ياخذ الظلن اوياي امن العلاوي

مكسور گلبي اخلاف طولك كسرة العود
ما تگضي چنها انموت كلنة ونعطش اردود
لملاگة اهلنة

الموت داير عالضعينة دورة الثام
وشحال گلبة المنسبي و ماخوذ للشام
ابعلي متنة



علي الفيصل
البصرة-الحيانية الحُسينية
ما تيسر في ضِل الخدمة ألصباحية المقدسة
من محرم الحرام
#بسم_العقيلة_١٤٤٦_هــ

1
روح احسين الاكبر…والشريان الأبهر
لأمة وكل خواتة

موطن بسمة ام عون…واخوانة ايتباهون
أكبرنة أشحلاتة

هلا بالشعرة اتگول اجناح وضل يرفرف بالريح
علي ابو اعيون الشهلة التعمي الوضحة ومن عدها اتزيح
علي من شامة خدة ايغار الليل ونجماتة اتطيح
علي من شدة حسنة اتحير يوسف والغوث ايصيح

حي الله الاكبر صال…حي الله الاكبر صال

وعمتة تصيح من الخيم
گومي يليلى وهلهلي
مثل الگمر بيدة علم
واسمة علي وچنة علي



2
اتعلة ابمهرة الأدهم…واعلة الطف تحزم
واحزامة اشيحلة

گال انة ابن الاحسين…موتي ولا اضل بين
أرضة اعلة المذلة

هلا بغلام حسين الخلة الطف تل كِسار العوج
الخيل اتگصدة وبيها الفارس دگها ورداها اسروج
علي يا بحر الموت الاحمر يا زلمة اببطنة ايفوج
علي يمخلي الشردة ابصفهم روج وضل يردم روج

حي الله الاكبر صال…حي الله الاكبر صال

چم فارس ابفارس رجع
لا راس عندة ولا اسم
شي سيف الاكبر من ظهر
مثل الضوة ما ينلزم


3
طبها ابنسلة يفخر…زلمة وجدة حيدر
وشتلگة الرجولة

حگة وسولف الحگ…علمهم على الطگ
بالحومة بأصولة

هلا بالخزرة عينة اتجيب الليل وما خلة انهار
ايصول ويرجز عودي حسين وما بيكم لية اگدار
الوادم كلها ازغار ابصفنة وهاشم بس همة اكبار
الزلمة البيكم جدة ابگبرة وبيه سطرة من الكرار

حي الله الاكبر صال…حي الله الاكبر صال

طب چنة حيدر بالحرب
لا خلة شيخ ولا ردي
للشردة بس سيفة درب
ضل يحدي بالدنيا حدي


4
حُب ينضح جبينة…وموعود ابيمينة
بالنصر المُسدد

سلطان الوسامة…واحچاية عمامة
اشبهنا ابمحمد

علي من يصعد مهرة اتعجِب چنها ابساط اسليمان
ايخلي الوادم كلها اتصفن مدري شجابت عدنان
الدنيا ابچِـفة وسيفة ابچِـفة ايهدل امتون الميزان
علي يمخلي الجيش اگبالك لا قادة ولا عنوان

حي الله الاكبر صال…حي الله الاكبر صال

لن صوت الاحسين اعتلة
عفية ابني الاكبر يا شهم
خلها تعرفك كربلة
لو هيچي لو ماكو الزلم




علي الفيصل
ألبصرة -الحيانية الحُسينية
عصر الثامن مِن عاشوراء
في رحاب مُخيم قريب ألظهور
#بسم_الأكبر_بن_الحسين_١٤٤٦_هــ

١
أگوم من التعب ل الليل وفز من ليلي للغربة
انة اليمشي اعلة ظهر الگاع بس فوگ الرمح گلبة
رحت عالهزلة صوب الشام ادري بجدمي مو دربة
ماصح هَـيّـن ابهالظيم صعبة اتجر علي صعبة

هلي اعلة الضيم عينوني
انة بعازتهن اعيوني
هلي اشچمدوب هالغربة
راحن روحي وامتوني


٢
الما فاگد هلة وعطشان عيب ايسولف بجرحة
يومي اليبدي نص الليل يگظي وما شفت صبحة
الشمس طلت علينة اهوااي بس شالفايدة برمحة
عمتي امراية العباس ما شافت بعد وضحة

جرح بس محد ايشلة
اول تالي عالهزلة
هاي الهزلة اول موت
لو تالي اليعوف اهلة


٣
ادور عالنفس مخنوگ واطيح بشهگة الفرگة
هلي ضليت اتاني الموت گلبي امأيس الملگة
البچي اعلة الفارگوا نيشان بس خدي النِطاه حگة
الجِفن لو ما غفة اعلة اعزاز چا يا واهس ايطبگة

هلي اتخاويت وي نوحي
هلي طلعت صدگ روحي
اكابر يا جرح يا آخ
اضمنها اعلة مذبوحي


٤
عفت وين العليه ينگال الف يا حيف يا وسفة
عفتهم ما رحت عالخيل راكبلي ابظهر عجفة
كلهة ابچِفة بس الناس من تتشمت ابچِفة
علينة احچايت التنگال گالوها بلسن صلفة

حچيهم ياكل بعظمي
كسر ظهري ويبس دمي
ما ادري آنة ثاري الموت
اطيح و ماكو ولد امي



علي الفيصل
ألبصرة-الحيانية الحُسينية
ليلة الرابع والعشرين من ذو الحجة
#بسم_ألسجاد_١٤٤٦_هــ

https://youtu.be/6ct_4ARxbRw?si=Fjh3ZU4GA8cL6IOp

١
الا يا ايها العالم
جدي اعلة الرمل نايم
شفت ابعيني بالعاشر
ذبحوا كل بني هاشم

شفت احسين الوحدة أيلوب
ابلايا مناصر لا خوان

اتهب الريح وهوة ايميل
اشضل ابحيلة الضل عطشان

حالوا بينة وبين الماي
وكلشي ايتانيه بالصيوان

طلب ماء الفرات…ابشفاها الذابلات
ارتوة منة الرذيل…وعطش ضعن الحياة



٢
من صار النهر مصرع
خلة اطفالة تتلوع
منهم من قضى نحبة
منهم ينتظر يرجع

بين الماي وبين الضامي
وبين اخيام اتعيش الموت

ومن كثرت بعيالة الحسرة
شفت الطف صاير تابوت

راح احسين وصارت زينب
تبچي وتتعثر بالصوت

وقد ذاب الوتين…بصوت الصارخين
على الدنيا العفى…حبيبي يا حسين


٣
من رد مهرة مخزياً
وشافن سرجة ملوياً
عرفن جدي بجروحة
على الرمضاء مرمياً

حالوا بينه وبين اخيامه
وخيل اگباله اهنا وهناه

وطلعن نسوان من الخيمه
وضل يزحف وتلزمة الآه

من رد مهرة وشايل دمة
لطمن عالخد واويلآه

المُضام المُستباح…المُـثّخن بالجراح
المبضع بالنِبال…وكاسات الرماح




٤
لَمن خُفيت أنفاسة
رفعوا عالقنا راسة
طايح مُحتسب صابر
وضاعت كل هلة وناسة

شفت الحيرة ابحال اضعونة
اتروح الوين وكلها ازغار

نسوان اتلوع ورضعان
تلحكمن زينب تحتار

هذا احسين وهذا الجيش
وكلها اتصيح النار النار

على الخد لاطمات…ابوجوهاً شاحبات
لمهتوك الخباء…جيوباً مُضرجات


علي الفيصل
النجف الأشرف-مرقد السيد الشهيد الثاني
الليلة الأولى من شهر محرم الحرام
مما ورد في الزيارة الناحية المقدسة
#بسم_المهدي_بن_فاطمة_١٤٤٦_هــ

١
يجازي اچفوفها امك عود متعنيتك اتلمني
اجيتك فاتحة اچفوفي لچن ما تگدر اتضمني
اول تالي يمة احسين بس ابتسعة شابگني
اهلال الطف طلع ويلاه قميصك بيه امدوهني

عساه ايرد عساه ايروح
ولا اشوف ابني بيه مذبوح

٢
خذتني الكربلة الشوغة على ابني وتيهيت ابني
موش احسين ذاك الچان يمي وچنة فاگدني
كسر ضلعي نسيتة ابساع صار احسين كاسرني
اجيتك ساعة بس بيها صحت آه يالامتعبني

نسيت اضلوعي يحسيني
اضلوعك هسة تاذيني

٣
چا حضن امك اشمالة تعوفة وعالترب نومك
من غير اعوجيت الخيل ذيچ النهبت ارسومك
يغالي الله غشيمة الناس بالموت انعرف سومك
انة امك يا بعد حيلي جبت ماي وطفح صومك

الماي الجبتة رديتة
ودم اعيوني صبيتة


٤
ينعمة وطشراك البين طحت ابليل مو ليلي
يا تالي الوجع يا آخ گلبي ويا بعد حيلي
اجابلمن وانعة اوياه بس الروس توميلي
عفت اليا بعد روحي وگمت استلذ بالويلي

بلوة وداعتك بلوة
ابچلمة يمة اتلوة


علي الفيصل
كربلاء المقدسة-لمذبح المُقدس
السابع والعشرين من ذوالحجة
#بسم_الزهراء_١٤٤٦_هـــ

١
يا باب الهجر شتريد ماضل يمي كل غالي
كسروا گلبي اهل البيت خلوا بيتهم خالي
طحت وية طيحة دموعي
حنوها ابهالجفة اضلوعي
محامل زايدة وماشوف محمل يرحم ابحالي

وين وين
ابهذا الضعن رايح وين
وعايفلي بس دمعة وعين
ماخذهم وانة احسين…ضل گلبي عالباب

يا بابي اعيوني خطية مو مالت فرگة لو وداع
لا تفتح جرح المنية واتعذب روحي بالضياع

ارحمني من موتي
وخليهم ابداري
بس اذكر حسيني
ما تنطفي ناري


٢
اليتاني وما حضالة ابليل يحمل ونة اجروحة
يعاشر صفنتة اعلة الباب اذا باگ الدرب روحة
هلي اليا ضيم عفتوني
راحن روحي وعيوني
كلشي ابهالجر معدوم بس الدمعة مسموحة

ليل ليل
عاشرتة بجروحي الليل
خلاني احب الياويل
يا ملگة اليردلي الحيل…من ذيچ الاحباب

يا گلبي انا ابقة اتاني ما اگطع ظنة الوِصال
خلاني اببيتي زماني وشدالي ادموعي للرحال

سافرلة بعتابك
يا گلبي واحچيلة
عن ليلي بغيابك
ليلة بالف ليلة


٣
گلبي ابلا حبيبي ايصير عايش عالصبر شمعة
يتفرهد ضواه وايضيع عمرة ابطيحة الدمعة
الحرامات التأذيني
تقراها ابوسط عيني
سفرهم خلة كلشي ايعيل بس ما خلة خط رجعة

آه آه
تاخذني وتردني الآه
راح العمر وين الگاه
ضل گلبي بس آنة وياه…ننعة امن الاغياب

شسويت ابحالي حبيبي ملتني الديرة من وراك
ما هَـوّد ساعة نحيبي لاچمني ابكلشي يا جفاك

انعة وافك عيني
والگة الدمع ساعي
ياخذني لحسيني
ويردني لوداعي



٤
يا گلبي العجاف البيك ما صح يوسف ايبعدة
ابقة ابهالتعب چمدوب مو صار السهر شدة
ذبلن عيني وشفافي
من هذا الهجر كافي
الحد يمتة الحزن وياي ما صح للحزن مُدة

هاي هاي
المتعذبة هاي امك هاي
امخليني ابچي ابلا راي
واكتب رسايل عالماي…بس مامش اجواب

هاي آخر چلمة يروحي ترجع لو الحگ الضعون
تدريني بهجرك اموتن بعدك لا كُنت او أكون

يحسيني وعيونك
ما تنطفي ناري
لو الحگ اضعونك
لو ترجع الداري



علي الفيصل
الحيانية الحسينية
التاسع عشر من ذوالحجة
#بسم_ام_البنين_١٤٤٦_هـــ

يقادم ل الله ضعنك ماهو للناس
ضعن تتقدمة راية العباس

هلة ومية هلة
يگاصد كربلة

١
ضهرك للضجيج انطيته مولاي
لا حجة بفعلهم
وصوتك جان اللهم لبيك
بالوياي كلهم
وتوجهت ل الله وشيبك احرام
حجتك مو مثلهم
طوافك جان من ابلاد لبلاد
لحد الرايحلهم

الصفة والمروى چانت شوف الاعيون
من هودج سكينة الهودج أم عون

طويلة السلسلة
يگاصد كربلة






٢
قوافلها الحجيج ابعام ٦٠
فرض واتعمة سكتة
الما ماشي اوي ضعنك هذا مولاي
ما مقبولة حجتة
العفة اعلة المُسلم الياخذ حچي المال
والطاغي وسلطتة
يقيناً الله ما يرضى اعلة من كان
اذا ما ترضى انتة

الما رافگ رحيلك ضيع أثنين
لا بآخرتة حاضي ولا بالحسين

طمعهم مشكلة
يگاصد كربلة






٣
عفت مهبط وحي الله وجاي عناي
مُصلح للرسالة
صرت طه وعليك اشعاب الارجاس
صدت بالظلالة
ومؤامرة القبائل چنها تنعاد
ابمحمد واغتيالة
ما شافوا علي هالمرة عباس
متكفي الكفالة

علي أول مُجاهد يحمي الأسلام
وأبو فاضل الأول يحمي الأخيام

نبع للمرجلة
يگاصد كربلة





٤
جاي المن حبيبي اتوسلك عوود
صدگهم لا تناطر
رحالك للعشگ شديت مولاي
والذبحك مُهاجر
الودولك رسايل ناس يحسين
ما تملك ضماير
العطش موش اليگلك اقبل اهناا
يتاني ابيوم عاشر

باچر مِن تَصل تلگة اليتانون
ألرمح والسيف وحجار اليبغضون

وتموت البسملة
يگاصد كربلة



علي الفيصل

https://youtu.be/E8AcMIRE6tM?si=HI4pYiKbjSkHLiUq

١
گلبة ابعذابة…كربلاء ساكن
آخ الشبابة…قمر بني الضامن

متوارد ابدمعتة…من والدة وغربتة
عايش جروح الضعن…واشصاير ابعمتة

مصايب كربلة ابكل لحظة تبرالة
الرمح والراس شل حالة الضعن ما بارح اببالة…وجروحة

مثل حال الرضا اوي الدمعة يتلوة
الحزن برسومة يتطوة عايش حزنة مو گوة…اعلة روحة




٢
مولانا نعمة…ومن جودة طالب
يرزقني خدمة…لأم المصايب

أيشد حزم خدمتي…أيچمل حطب حرگتي
عالحشمت بالفلة…خوية احرگوا خيمتي

أرزقني الطهارة ابخدمة أجدادك
يالأمغرگني بمرادك چفيت النعمة من زادك…چفي الماي

حضر گلبي بالنية السليمة ألكم
أطيع وما اتعبكم فضل اتسمى خادمكم…يمولاي



٣
عطفك يالجواد…يسقينة ألورع
وبابك للمُراد…باب أهل الجزع

كسرة غصن كسرتك…من تنحب العمتك
ومن تِذكر أم الحسن…اتطيح اوي صب دمعتك

مُعلم للمواساة وبواچينة
جعلت الخادم ودينة بس الدمعة لحسينة…إنكسارة

فروا للحُسين أنت النطق وحيك
العبد من يختل ابفيك انغرس وي حزنك وضيك…قرارة



٤
يانهج الدموع…خل گلبي وقف
عبدك مو قنوع… يستجدي العطف

مِن مَدْ أديّ ما أمل…مِنك أضلّ أستهل
كل حزني يا سيدي…للصعدت اعلة الهِزل

يالامفضل علي أحضر مجالسكم
أتيهن لو اتيهكم ضايع لايذ ابسدكم…واجيلك

يتاسع وأول ابعطفك على الخادم
آنة الخاذل انة النادم أبعدني عن الوادم…دخيلك



علي الفيصل
ألبصرة-الثاني عشر من ذي القعدة
#بسم_الجواد

ردت اسألك
ماخذ هلك كلهم ونا حاسبني لو لا من هلك
ضلتي المن بهذا الحزن
اليشيل يآخذ كلشي إلة وآنة إلك
ظهر الضعن غورگ عِتب
بدموعي لا مو ماي أبد
خافن تعطشة وما يصح خليني مروي اتخيلك
امدللتك اثجيلة دمع
اخفيفة حمل شو ما گلت وآنة ادري اصير بمحملك
اتوسلك
عالروحة بوية اتوسلك
عالملگة هم اتوسلك
حتة اعلة موتي اتوسلك
بوية ادري بعيوني إلك ما ادري بالغربة شِلَك
ردت اسألك…صارت صدگ
ضعنك مشة وضل العشگ
والروح ما تقنع ابد بوية آنة وياك افترگ
گلبي أنشدة وما حچة
المن تدگ
اعزازك مشوا إلمن تِدگ
خليتني اعثر بالنفس بيك اطفة هسة واحترگ
ردت اسألك…يالغربتني ابديرتي
يسمحلي يا چف دمعتي ردت أسألك
مو تدري اموت ابروحتك
هذا المرض نگدر عليه تدريني اشفة ابشوفتك
واخيال منكم ما بقى
ماخذلي كلشي ابرحلتك
عمتي خواتي وضحكتي
وصبري ووگفتي وگعدتك
ضلتي المن ابهذا الحِزن حاسبني لو لا من هلك
ردت اسألك…



علي الفيصل
ألبصرة-الخامس من ذي القعدة
#بسم_الساقي_١٤٤٦_هــ

١
قصة حب دمة غالي حُب مثالي وعجيب
عشگ الله نهرة ضامي ابلا محامي وغريب

يا دنيا التحلة واسمع صوتة بالطف هل مُناصر
يشهر السيف ويثبت نصرة الدم والمناحر

السلامُ على
ضعن الله وخيمة الحسين
نحميها ونقسم بيمين
دم الحب اعظم اليقين حُسين

قام في الطف نداء العاشقين
نحنُ أنصار الخيام الثائرين
و لنا التأريخ يشهد بالولاء
فوجدنا الحُب في ركب الحسين



٢
فحوة حبنة وغرامة وكل هيامة الحُسين
اشمحلة الموت ابقرارة وإنتصارة المُبين

احلى شي بالطف لگينة اليحب ما عندة غاية
والله فضلنة ابخلقنة وشلنة بالعاشر رواية

السلامُ على
كعبتنة ابحُجة الغرام
وشيبتنة الفارس الهُمام
وقائدنا وسيد السلام…حُسين

نحنُ مَنّ قِدوَتُـنا ذاك َالكفيل
فَرأينة الموت في الحُب قليل
سوف نفدي الآل نحراً ودماء
عندما يشتد في الحرب الصليل



٣
كل شايب بينة نادة اعلة السيادة السلام
عشنة من دون العباد احنة الجهاد ابغرام

ما بينة السيفة يرجع سالم ابلا دم لغمدة
انكيف لو طگها يشتد بالحومة إرجوزة وحدة

السلامُ على
صيحتنة ابساعة القتال
وضربتنة الدكت الجبال
انصارك سووا المُحال…حُسين

نحنُ أرباب ميادين ألحروب
فترى ألشمس إذا غضنا تذوب
فالى الموت قرار المُعتدين
أين ما ساقت بهم تِلك الدروب



٤
الينصر يدرك مماتة اهناا حياتة ومُناه
يا سُلطان الشهامة الدم غرامة هوااه

يحسين الدم ضريبة كلمن ايشوفك سبيلة
أنحور الانصار الفدتلك وداعة اعيونك قليلة

السلامُ على
كلمن ناصر غمض اب اديك
مِن گلبك سيدي وإليك
تستاهل ننذبح عليك…حُسين

نحنُ سَبعينُكَ قُلنا عَنّ يقين
قد وجدناك ملاذ الحائرين
نشهدُ الحُبَّ سِراطاً مُستقيم
فترانا لِسراطك سائرين



علي الفيصل
ألبصرة-ألواحد من ذي القعدة
#بسم_الساقي_١٤٤٦_هــ

١
نبنيها نبنيها أكبور البقيع ان شاء الله نبنيها
نبنيها نبنيها وكون المناير للسمة انعليها
نبنيها نبنيها لو عَجل الله ابفرج مهديها

لو ثار ابو صالح شايل الراية
يعلن عالبقيع اتصير مشاية
وابكل نايبة انسوي اربعينية

غرقدنا نذهبة والملة ايشوفة
وتجي الخدام كلمن رافع اچفوفة
زاير لأبو محمد عاگد النية



٢
عناية عناية نبني الانهدمن بالذهب عناية
عناية عناية واطينة چلمة وبيهة شدة راية
عناية عناية انخلي البقيع اشراع للوفاية

من توصل الخدام الحُسينية
ومن نبني صحن للمرة البدوية
تعرفون ابو فاضل شني امربينة

ما نستنكر وهالمرة نبنيهن
وحگ ارواح دم الخدم نطيهن
لو عارض دربنة الموت يلگينة



٣
نحييها نحييها مشاية الزهرة وعلي نحييها
نحييها نحييها چلمتنة گطع ارگابنة اليشريها
نحييها نحييها غصباً على آل أسعودها انسويها

من يثرب المكة اهناك تلگانة
انحج ونخدم ونلطم ابممشانة
و مجالس عامرة ابنص الوهابية

وتنطي أم البنين الخادم ابشارة
هلا ابخادم اوليدي الجاي من دارة
متعودة تعزب ابصحرة بدوية



٤
نگظيها نگظيها عتبتنة وية ارجاسكم نگظيها
نگظيها نگظيها والگاع لازم ترجع الراعيها
نگظيها نگظيها أرض البقيع ابدمنة ما ننطيها

باچر لو نهض بالأمر قائمنة
ودخولياتنا اتطب ومواكبنة
وللزهرة نهوس حدر گبتها

ذيچ الساعة لو كض راي ميدانة
والثار الهواشم عآت اعنانة
گلي اجمالهم شتفيد ساعتها



علي الفيصل

https://youtu.be/kjrsnR1pEOc?si=k2pNQB77N3nQxwyy

١
بوية گوم…كلشي غربة اخلاف صوتك
بوية گوم…شلون أصدگ صار موتك

انت ابو الكل اليتامة اشلون تقبلها اضل عگبك يتيمة
الدنيا مدري اشضامتلي وانت رايح وين وامخلي الهضيمة

بوية اريد الموت من هسة الية
ولا اموت وانة مچتوفات ادية
بوية ادري الضيم ما يرحمني ساعة
عاد اموت وانة اميرة مو سبية



٢
بوية گوم…ابنومك اشخليت بية
بوية گوم…اوداعتك زينب خطية

انة متعودة اعلة فَيـّك لا اتخليني الشمس ذيچ الصحاري
ليلك الساتر الدنيا وانة باچر طالعة ابنص الظهاري

ناخيتك بوية من هسة اعلة دهري
الينكسر مو خاطر الينكسر ظهري
عاد وياك العمر لو راح فدوة
مو ايروح من الخرايب تالي عمري




٣
بوية گوم…عين گلبي اعلة المصيبة
بوية گوم…لا ايگلولي الغريبة

انة مو مالت امفارگ انة مال اعيونكم تحرس دلالي
مالي حيل ادروب كلفة ولالي حيل افراگكم يهدملي هالي

ابعازتك يالما ترد الابگلبة عازة
الغربة باچر توصل الحد الجنازة
باچر ايگولون زينب وين اهلها
يعني جرت نفسي من تمشي اموازة



٤
بوية گوم…غيبتك ياهو اليحلها
بوية گوم…روحي حگها اتريد اهلها

باچر هواي المصايب وانة وحدي اشچم گلب يراد لية
الخنگة تاخذني وتردني امن الصبح ل الليل عندي المغربية

بوية ياهي اتهون مو كلهن كلافة
وانة حيل امدللة والليل اخافة
باچر ايثگلن علية وحيلي رايح
الدرب خلصتة هضم موش المسافة




علي الفيصل

١
تعب وافراگ وامكاون دمع ينزل عتب سكتة
وسواجي امن الحزن بالروح تخنگ يا هوى الردتة
الضوة وذاك الدرب والليل يلچمن بية حتة انتة
الطف فرهدنة اهل وامتون عساها ابحضة وابختة

ضيمي ثجيل وگوة اجرعة
والدرب كلة احسين گطعة
ينسبي ويشبع موت واحبال
ثاري اليعوف اخوانة صرعة

نايبتي كلفة احيود وامتون
ميتلي عون وفاجدة العون
ماضن بعد تنشاف بالعين
للناگة خواني ايتمشون

الله ولحد فرهدوا كلشي امن ادية
وسفة مو علوية صار اسمي سبية


٢
عطش ملگة وسوالف شوگ بية وناري ما تطفة
واليفارگ متن عباس راسة اعلة الهزل يغفة
الياخذ روحة ميل النوگ صارت راحتة الوگفة
يصفن وامن اليندسون يعاين دمعتة ابصفة

گادونة گوة ومالي نشاد
چا يمتة يفزع خال الاولاد
صارت امغالب آخ وادموع
غير الاخو الهالساعة ينراد

فجة الذبح سوالي فجة
خلاني اروح بناگة عرجة
باگوا الخوة وراح الاحسين
وصار الضعن بالسوگ فرجة

امنين اجاني السوگ وانة الهاشمية
وسفة مو علوية صار اسمي سبية


٣
من ضيمي اشبعد يا ليل اشضل من هالعمر گلي
العمر للغربة ما مريود مريود العمر لاهلي
الدرب يا روحي درب الشام حملي امن التعب حملي
درب لليختنگ ما بيه واحد عالهوى ايدلي

اموازة النفس جرتة بجفاكم
واتعثر ابجرتة وراكم
چم صبح طر وانتم مبعدين
ردوا لاخيتكم شجاكم

هاا يهلي بيش الآه تنزاح
گلب اليفارگ عيب يرتاح
واتنوع بعيني اعلة الادروب
تلفون بس روس اعلة الارماح

كلفة اسمع تالي عمري (انة خطية)
وسفة مو علوية صار اسمي سبية


٤
برد شر الهزل والليل خذن لوني وخذن حيلي
گبل عباس اذا داريت سبع فدوات يغديلي
انحنيت اگبالة بس ما گام چا ياهو اليتچيلي
هلي ليل السبي اشچمدوب اگلكم هذا مو ليلي

اتفطر حياطين الخرابة
ونتي وتعب گلبي ومصابة
يهل الطلايب ما تفزعون
الليل عد زينب اطلابة

الشام مو بلوة بلاوي
كسارها اگلوب العلاوي
ميتة وراكم كون يحسين
ما فوخت گلبي النعاوي

انعة ما الطم لان مچتوفة ادية
وسفة مو علوية صار اسمي سبية




علي الفيصل

٢٨ رجب سنة ٦٠ هـــ خروج ضعن سيد الشهداء ع وآل بيته وبقاء السيدة ألجليلة أم البنين ع والسيدة العليلة ع


١
المدينة
ضلمة ابلا ضواكم…خنگة ابلا هواكم
شحيحة عشرة لآچن هااكثر متواجد الماي

المدينة
شني نفعتها هية…ومضاربكم خلية
وبس آنة ودمعتي وحسرة ام عباس وياي

بعدني استاهد اعيونك وطن للغربة الابروحي
وبعدني اشما عثر گلبي ايتگوة ابحزنة واجروحي

أدركتُ في عينيكَ سُر سَكينتيْ
وديارُ قلبي في هواك ودمعتي
مُرَ ألفُراق أسَلَنيّ يا والدي
ذُبحَ ألوِداد ولا وِصالَ لِمُهجتي

أنة الطير البقة اجناحة ابأثر ضعنك
هيچ الله والحگنة
ضِل ما ضَلّ أثر وابروحي احسنك
ملاك امفارگ الجنة
عطر منك بقة وبأنفاسي اجيسنك
اموتن من اشمنة




٢
ألمدينة
التجافيها العشيرة…ختشوفلها ديرة
كلشي ابلا هلة ايموت التعاشر روحة غربة

ألمدينة
الما شافك صبحها…خل تفتح جرحها
وتشرع للهوى الدمعة وتعيش ابحالة صعبة

چنت يمي وخذاني الشوگ چا بفراگك اشتلگة
آنة أول غريبة ابدار اهلهة اتدور الملگة

ما ذنبي إن لَم أرتقي ظهر الجمال
حتى امنياتي لم تُشد مع الِرحال
مالي ومالَ الهَجرُ لَستُ بِقادِرةَ
إنَ الفُراقَ أشَدَ مِن مرضٍ عِضال

هلي حملتوا بس للضيم وانة أدري
أموت وانة مشتاگة
ازغيرة آنة وحرامات ألزم ابظهري
شي ما جبتوا لَيّ ناگة
الراح وراح وياه صبري وعمري
ترة ذباحي أفراگة




٣
ألمدينة
الأتوادع وطنها…يُستصعب سكنها
دار أحزاني دارك بوية صارت لمن امشيت

ألمدينة
ما يرحمها گلبي…دلتني اعلة تعبي
امن اوميت ابچفوفك للوداع وعني اجفيت

ما چنت أدري هيچ تروح جدامي وتجي اتگلي
آنة الشيباني اجفاك دون الناس الابحلي

ذابَ الفؤادْ تأمُـلاً هَلّ مِن مُعين
يُمحي دموعي الساكبات مع الأنين
أيَسرُ قلبك حالي في هذا الجفاء
ما لذ عيشًُ بعد هَجرِكَ يا حُسين

بيش اتهنة عود ابدنيتي اخلافك
بس ابوجهك اتهنة
درتلي الضيم كلة ابدورة اچتافك
ومامش حيل اشيلنة
رحت من يمنة وانت امفطرة اشفافك
يالامهدم خواطرنة




٤
المدينة
بوية اتريد اهلها…ابرايك شنهي حلها
ترجع لو نجي الطفك غرايب لو سبايا

المدينة
ضكت بوية صدري…ما جارعها عمري
ردتك ما ردت بوية عطش مو انتة ماية

شابت صفنتي اعلة الباب وانة انتظرة مرسالك
مرة اتلوع اعلة اجفاك مرة اتلوع الحالك

أين أستقرت يا حبيبي بِك ألنوى
لا زِلت في قلبي وقلبي قد جوى
تأتي ألطيور بلا رسائل للديار
حتى أتى ذاك المُخضب مِن طِوى

عرفتك نايم اعلة الرمضة واعيونك
تعاين عالضعن گوة
افتهمتك ما خذتني ابرحلة اضعونك
خاف اتحير اببلوة
سمعتك ما ردت صوت اليسحگونك
اسمعة ابصدرك اشسوة



علي الفيصل

١
لابو السلطان شدينة حزمنة ورفعنة وياها راية
طريقك ما انعوفة اولا عشگنة إلى ما لا نهاية
الدلال البلدرب ضيع تعبنة والگبتك ضماية

سواجي امن العطف
درب ما ينوصف
الخدم يابو الرضا
ابطريقك تنعرف

ابعشگ ذيچ المنارة نوينة اعلة الزيارة الك يابو الرضا
مواكبنا وخدمها الك خفت جدمها وملو كبر الفضا



٢
عهد برگابنة وبالدم كتبنة المسيرة الكاظمية
والك بگلوب موش السان صحنة اجوك الرافضية
جسر بغداد نَـوّخ من زحفنة انحنى امن الجعفرية

الگلب گبل الجدم
على ادروبك يهم
عشگ ماضن هوة
ترة ابدربك نشم

يراعي اربع مناير الك بدموعي اسافر واهيم بحضرتك
وطن للمالة ديرة تحل أكبر چبيرة وتشيم طلبتك



٣
يا قاضي حوائجنة وأمرنة نجي لو ما اجينة
گضت والسالفة استوها بگلبنة اذا بسمك نخينة
الك مولاي ل اللوحة عهدنة بمواكبنة ومشينة

الك هذا العهد
الى يوم الوعد
نضل بزيارتك
ومشينة للابد

وحق درب السبايا ترف تبقى الروايا ويضل هذا العشگ
نضل ابهذا حبُك ركض نهوة اعلة دربك ركضتة المحترگ



علي الفيصل

https://youtu.be/FaodjdEMvQg?si=-7hGjKTZlhfNvSId