هقولك اللعبة ماشية ازاي بص اللعبة ماشية بين "مرجو و متاح" شئ عايزه و شئ معايا الحياة ماشية بالنظام القديم..المقايدة،يعني معاك صحة ونفسك ف مال لازم تخسر شئ ف مقابل حصولك علي الاتنين،معاك ولد ومال يمكن تفقد صحة، ستر وولد وصحة تفقد مال وهكذا،ولا يوجد ما هو كامل لازم جزء يكون ليك فيه إختبار.. تمام؟! قيس الموضوع علي النجاح معاك وقت ومجهود وعايز نجاح لازم بدون اي مجال للشك أنك تصرف الوقت والمجهود وتعرق وتنهج وانت بتحاول توصل لأن الحياة مش هتقايد النجاح من غير ما تاخد الوقت والمجهود تمام؟! الجنة مثلا عايزة صبر علي البلاء ومقاومة للشهوة وشكر للنعمة ودفع للباطل وإقرار للحق وهكذا.. هو دا اسلوب الحياة في التعامل معاك عشان كدا خليك ذكي خسارتك لشئ مش معناها انك فقدت اللي معاك..لا..دي معناها انك كسبت حاجة جديدة فبدل ما تفضل تندب انك خسرت فكر إزاي تقايد الجديد اللي معاك باللي انت لسة بتدور عليه بص للحياة بنظور مختلف،
الإهمال دا من الحاجات اللى مُمكن تدمر حياتك وانت مش واخد بالك ، إهمالك في حق ربك ، إهمالك في حياتك وفي نفسك وفي مشاعرك وفي شكلك وفي شُغلك ودراستك وغيرهم كتير ، الإهمال كفيل إنه يضيع منك حاجات كتير بتحبها أو يضيع منك ناس بتحبك والأكيد إنه هيبوظ حياتك وياخُدها لسكه تانيه خالص عُمرك ما كُنت حاببها..
حياتنا تقريبا كلها مشاكل ولو فضلت مركز فيها هتقف مكانك. امسك مشروع اشتغل عليه, امسك كورس تعليمي في اي مجال اتعلمه واندمج فيه هتلاقي نفسك بالتدريج بتركن المشاكل على جنب وجايز في يوم المشروع دة يجيبلك دخل محترم ويحللك المشاكل اللي مكنتش عارف تحلها المهم انك تبدأ.
مادام فلان إتضايق من الحاجة الفلانية تبقي بالنسباله فعلاً تستاهل الضيق.. مش مطلوب منك ناحيته في الوضع ده غير شوية "إستيعاب"، و"لُطف" لا أكتر ولا أقل.. "ويليام استور" قال: (وجعاً لم تجربه لا تخبر صاحبه بأنه لا يستحق الحزن .."