الشاعر عباس فاضل الشمري

🔻هوسه لمولد الامام السجاد ع
ـــــــــــــــــ ❁ ❁ ❁ ــــــــــــــــــ
انولد زين العباد وگامو يبشرون
فرحة بيه زينب والگلب محزون
وتصب دمعة فرحها من العيون
تدري بكربله باچر من يروحون
ترد وياه سبيه وزرگه المـتون

فرحانه والدمعه تهلها
ـــــــــــــــــ ❁ ❁ ❁ ــــــــــــــــــ
🖊️عباس فاضل الشمري

🔻ابوذيه لمولدالعباس_ع

شهر الخير بي صارت..ولاده
فرحان الوصي بمولد ..ولاده
بطن الجابت الكافل ..ولاده
رفعة راس جابت للزجيه ..

🖊️ عباس فاضل الشمري

🔻قصيده لمولد الامام الحسين ع

مولد امامي ❤️

ــــــــــــــــــ✮✩✮ــــــــــــــــــ

بيوم ثالث هل علينه بنوره
ويانه املاك السمه  مسروره

حبي وغرامي...بمولد امامي

ــــــــــــــــــ✮✩✮ــــــــــــــــــ 

بيوم ثالث فرحتي محلاها
بمولـدك يـاسـيدي نـتـباهـا
اننت ياخير البشـر وانقاها
فرحه بعيوني النبي شفنها

يعجز كلامي .. بمولد امامي

ــــــــــــــــــ✮✩✮ــــــــــــــــــ

  من اوصـف مولدك يحسيني
  تنزل ادموع الفرح من عيني
الك  فدوه اهدي كل اسنيني
يالي بيك انت استقامه ديني

ابعث سلامي .. بمولد امامي

ــــــــــــــــــ✮✩✮ــــــــــــــــــ

اليوم اشاهد گبتك فرحانه
والمناره عـدها عيـد ويانه
والگمر شع الضوه وضوانه
الضريح اليوم ذب احزانه

شفته بمنامي .. بمولد امامي

ــــــــــــــــــ✮✩✮ــــــــــــــــــ 
 
فرحتي حـرگة گلب عدوانك
همـه كل همهم تظل بحزانك
ضوة الوان السمه من الوانك
بسمك اتسمه الشهر شعبانك

صارت اسامي .. بمولد امامي

ــــــــــــــــــ✮✩✮ــــــــــــــــــ

بمولدك رب العرش بشرنه
حرنه شنقدم تهاني حرنه
الرسول اليوم ينزع حزنه
گال مني حسين واني منه

واصبح هيامي..بمولد امامي

ــــــــــــــــــ✮✩✮ــــــــــــــــــ

🌸🌸🌸🌸🌸🌸🌸🌸🌸


كلمات

عباس فاضل الشمري

السلام عليك يااباعبدالله الحُسِـــــ﷽ـــــــــيَنَ
يَـاحُسِـــــ﷽ـــــــــيَنَ يَـاحُسِـــــ﷽ـــــــــيَنَ

‏•بدرٌ تألقَ في سَما العليَاءِ..
•ذاكَ الوليدُ لفاطِم الزَهراء💙🌿.

واسجيناه 💔
🎤عصام المحمداوي
🖊️عباس فاضل الشمري

واسجيناه واسجيناه



عباس فاضل الشمري

🔻أستشهاد الامام
موسى ابن جعفر عليه السلام 💔

شوية شمس 💔

ـــــــــــــــــ ❁ ❁ ❁ ــــــــــــــــــ

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

حراس خلــو عالسجن وانه بظلم سجنوني
ما ادري ليلي من الصبح بس بظلام عيوني
والگيد بجفوفي يحــز شمسوي ويگيدوني
موسى امام الرافظه الكاظم انــه يسموني

يـاناس كل هـذا الضوه ماشوفه
عيني عله شوية شمس ملهوفه

محرومه عيني من ضوه دنيايه
تارك نفس وسط السجن ذكرايه

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

طير انه مكسور الجنح وين اليضمد جروحي
صرخه بدليلي وتنسمع وهمومي تمرد روحي
ادعي بصلاتي للفرج وابچي وازيــد بنــوحي
الجمعه موعدنه گرب ياروحي ســرچ بوحي

الاحباب توكف عالجسر منتظره
يردون من ذاك الوجه بس نظره

بس جثه من راحولك ولاگينك
امگيــد وتنـــزف دمــه چفينك

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

الليل يخلص بالدمع عالخـــد تسيــل دموعي
  وعظامي لو لاحت برد صلت عليه ظلوعي
ظيم وقهر انه احملت محــد يهـــدي بروعي
انــه ارهب وما انرهب شجرة امامه فروعي

انطيته علمي للرضا مـــن بعــدي
وانه ابقه بديار الغرب ظل لحدي

وصيتــه بالشيعــه يظل يرعاهم
ويتحمــل انــواع الظلم ويـــاهم

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

ميت انـــه وگيد الظلم طابع اثر من دمي
ماواحد يفك جثتي بگيودي اظلـن مرمي
ماكفت سنين السجن وليل العذاب وهمي
عافوني جثه مگيد ومحد يمـر مـــن يمي

ظليــت وبحــر الشمس عافـوني
بحســرة ضوه ظليتي آ يعيــوني

ماشفتي كل هذا العمر بس ظلمه
چـــان الضوه بزنزانته كــل حلمه

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

مات الحلم بيه اندفن وانـه اندفنت بگبــري
فروني من سجن لسجن ضلو حياره بصبري
مــن شحت ايـام العمر ودريت خلص عمري
كلتلهم الموعد گرب بموتي الفرج انــه ادري

من ابنعش فوگ الجسر شالوني
هاي الابد ماچانت اعله ضنوني

جثــه امــام الرافضـه يشيعونها
بظهر الحماميـل الظهر يـرمونها

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

ياناس من حان الفرج بعدي السجن ظل خالي
كــل ظنكم الموعــد اجـه متانيـن جيت الغالي
رايح انــه ويبقـــه السجن يــردد صدى اقوالي
عنــدي علــم مــن النبــي واســم يظـل بالعالي

معروف مــن خيــر البشــر ابائي
بصبري وصمودي ارعبت اعدائي

غدروني بالسم وبسجن سجنوني
وحرموني من شم الهوه حرموني

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

🖊️عباس فاضل الشمري

أستشهاد باب الحوائج
موسى ابن جعفر عليه السلام

ــــــــــــــــ ❁ ❁ ❁ ــــــــــــــــــ

گيــد وظمه وغربة وطن
بيك وشفت سم الحسن
بمصابــك انجمعن ســوه
عمرك خلص بس المحن

سجين … ظلمك ابد ماننساه

للشاعر عباس فاضل الشمري
꧁꧁꧁꧁꧂꧂꧂꧂

#الخادم_غازي_الساعدي

🔻أستشهاد باب الـحـوائـج
موسى ابن جعفر عليه السلام

گيد وظمه 💔

ــــــــــــــــ ❁ ❁ ❁ ــــــــــــــــــ

گيــد وظمه وغربة وطن
بيك وشفت سم الحسن
بمصابــك انجمعن ســوه
عمرك خلص بس المحن

سجين … ظلمك ابد ماننساه

ــــــــــــــــ ❁ ❁ ❁ ــــــــــــــــــ

سابيني حبك بالزغر وانـه العشگتك بالمهد
صبرك ترك بيه اثر خلاني  مــا هاب الشدد
عمرك گضيته بالسجن ترهبهم وانت الاسد
ظيم الحملته بغربتك ماعـاشه بالدنيه احد

بگيودك تواسي ايتام
يالغربتك مثــل الشام

سجين .... ظلمك ابد ماننساه

ــــــــــــــــ ❁ ❁ ❁ ــــــــــــــــــ

يالعلمتنه اعله الصبر محد مثل صبرك حمل
ماهزتك ريح الظلم شامخ تظل مثـل الجبل
يالجثتك تشبه جثث مرميــه ظلت عالرمل
ماتو عطاشه بكربله وماحضرو ويـاهم اهل

بموتك تواسي العطشان
سجنــك يصير الميــدان

سجين .... ظلمك ابد ماننساه

ـــــــــــــــــ ❁ ❁ ❁ ــــــــــــــــــ

بكيودك تواسي الخدر وتخفــف الام السبي
كيد اليحزچفك مثل گيد اليحز چف زينبي
وبظلمه عيونك شبه چنـــه السواد البالعبي
يالغربتك صارت مثل غربه حــرم ال النبي

ظلمه انگضت كل دنياك
ماتدري صبحك لو جاك

سجين .... ظلمك ابد ماننساه

ـــــــــــــــــ ❁ ❁ ❁ ــــــــــــــــــ

يالچبدك اتگطع وصـل بمصابك تواسي الحسن
بالسم يغدرونك ظلم وانت بوسط ظلمه سجن
لمن سره السم بالجسم من حزنك عيونك بجن
مثل الحسن انته صرت يالغربتك غـــربة وطن

مسموم وسفه ومغدور
ماشافت عيونــك نـور

سجين ... ظلمك ابد ماننساه

ـــــــــــــــــ ❁ ❁ ❁ ــــــــــــــــــ

سجداتك بظلمه وتهل من عينك يطيح الدمع
خلف الحياطين  الذكر صوتك  ترتــل  ينسمع
يالرجفت حته الحجر من هيبتك ذاب وخشع
من الخشوع بسجدتك حته السجن يمك ركع

قران صوتك زلزله
بكيودك انت ترتله

سجين ... ظلمك ابد ماننساه

ـــــــــــــــــ ❁ ❁ ❁ ــــــــــــــــــ

من شالو الجثه بنعش جابو حماميل اربعه
مرميه ظلت بالشمس عادت علينه الفاجعه
ذاك البقه بحر الظهر جثته بسيوف مگطعه
فوگ الترب نايم يظل من القهر هل مدمعه

بمصابك تواسي حسين
وتهمـــل دموعك بالعين

سجين .... ظلمك ابد ماننساه

ـــــــــــــــــ ❁ ❁ ❁ ــــــــــــــــــ
                        
🖊️كلمات

عباس فاضل الشمري

يسجدات
بس اثارجن ظلت يسجدات
وبسم الغدر وسفه الولي مات

يسجدات
بس اثارجن ضلت يسجدات


عباس فاضل الشمري

يسجدات
🎤ابو جعفر السلطاني
✍️عباس فاضل الشمري

أستشهاد الامام الكاظم
عليه السلام
°طور يخيمات °

ـــــــــــــــــ ❁ ❁ ❁ ــــــــــــــــــ

                 يسجدات
       بس اثارچن ظلت يسجدات
     وبسم الغدر وسفه الولي مات
      صبـن عالوجن بعده يدمعات

ـــــــــــــــــ ❁ ❁ ❁ ــــــــــــــــــ
     
الكاظم بسجــن الظلــم گضاها كـــل حياته
موسى امــام الرافضه چـــن حيدر بصفاته
عـــاش بظلــم كــل دنيته وتعـــذب بمماته
امگيد ابنــص السجن ويـــرهبهم ابصلاته

يمسموم .. صبرك حير الطاغي .. يمسموم
      وعزمك ماگدر يثني ولا يوم
       گلبك سيــدي مملي بالهموم

ـــــــــــــــــ ❁ ❁ ❁ ــــــــــــــــــ
   
بشرهــم الجمعه الفـــرج يخلص سجـــن ظلمهم
والشيعه اجت فوگ الجسر بس شوفتك حلمهم
تاليهــا مشيــول بنعـــش مصابــك تــره هضمهم
ســـم الغدر فـــت الچبــد مـــن شوفتك حرمهم

   يخلون .. جثتك عالسجر باچر .. يخلون
        مـــو دمعه دمــه صبــن يالعيون
       امام الرافضه كل عمره مسجون

ـــــــــــــــــ ❁ ❁ ❁ ــــــــــــــــــ 

جثــة الحسين بگربله بحـــر الشمـــس خلوها
خيل العده ادوس الصدر وعظامك يسحگوها
وجثة الغريب اعـــله الجسر عــدوانك يذبوها
مثل الصدر بگيــد الأم ســـاق الولـــي رضوها

يالگيود .. بيچ انرضت اعظامه .. يالگيود
     شالو عالجتف جسمك الجنود
      انهض وطلب بثـــاره يموعود

ـــــــــــــــــ ❁ ❁ ❁ ــــــــــــــــــ   
 
چفوف الگمر عالمشرعه عدوانه يگطعوها
وچفوف ابن جعفر غداً بالسلسله يدموها
وعين الكفيل اعله النهـــر بالنبله ايطفوها
وعيونك بظلمة سجن من الضوه حرموها

الچفوف .. من گيد الظلم تنزف .. الچفوف
      چفين  الگمر طاحت بالطفوف
      تطفه عينه وعيونك ولاتشوف

ـــــــــــــــــ ❁ ❁ ❁ ــــــــــــــــــ

امصابك ايذكرني بحسين وحــرگ خيامه
ومعصومه من تبچي تره تذكرني باليتامه
چني شفت جثـــة الولي ومسلبه العمـامه
بأرض الغرب محد حضر لا اهلــه لاعمامه

يدفان .. من تدفن جسم موسى ..  يدفان 
      خبر كل بني هاشم  والاخوان
      خلص بالغرب عمره ولأحزان

ـــــــــــــــــ ❁ ❁ ❁ ــــــــــــــــــ
كلمات عباس فاضل الشمري

السجن بابه انقفل وبابك المفتوح
دگ بــاب المراد الحاجـه يگظيها

نيتك خلها بيضه وطهر الروح
مگضيــه الحوائج يـمه تدريها

🖊️عباس فاضل الشمري

السلام على كاظم الغيظ 💔

يالمـعـلـم النـوارس رفـة الـجنـحـان
شلـون بنص سـجـن اظلم يخلـونك
رعـب عاشـو عمـرهم منـك العدوان
چـنت راعبهـم انـت بخزرت عيونك
يالمحـرم علـيـهـم حتى نـوم الـلـيل
ولا يطـبگ جـفن نـاس اليـكرهـونك
وبعد كل الخطط والشرح والتـدبير
انحسم كل الحجي ولازم يسجونك
اسـد وبـلا قيـود شحـدهم يقـربون
وعشت حتى بقيودك هـم يهابونك
لذلـك قـررو حتى بسـجن مـتعيـش
وبعـد حتى الهـوه متشـمه يـردونك
وجثتـك عالجـسـر خـلوها حمـاليـن
بعـد مـا سـم غدرهـم بـي يسـمونك
يالمـيتـم البـلابـل عـالشـجر تـنـعـاك
بچـت فـوگ النعـش لمـن يشيعـونك
يالمـثبـت العـقيـد ويـشـهد التـاريـخ
طريـق الـحق طريـقك مـايغـيـرونك
كلـمـا حـاولـو مـن الـگـلـب يـمحـون
نـرد بالـدم نكـتبـك مـا يمســحونـك

🖊️عباس فاضل الشمري

الحوراء عليها السلام 💔
ـــــــــ ❁ ❁ ❁ ــــــــــ

الشام غربه بلايه اخوتي
وياهـو اليـرجعني يـمك
بس اريـد ارجـعلـك انـه
كون اريد بعيـني اضمك
يابـعـد ريـتـي ونفـسـهـا
صارت امنيتي ارداشمك
من العذاب تموت روحي
بيـهـا يكبـر گـام هـضمك
انـت يـامـاي بـچـفـوفـي
طايـح ابـرمـلـه اشيـلمك
عـودتـهـا اعـلـيك روحي
ليـش بـالتـالـي عـفـتـهـا
انت چلمه بشـفـه خرسه
كل عـمرهـا مـا حچـتـهـا
شگـد فگـدتك يالعـفتـني
روحـي طـفلـه ودلـلـتهـا
ياحنـين شـحـالي بعـدك
طيـره والدنـيه اذبحتـها
تـرفـس وتـتـلـوه روحي
گبالـك عيـنك من شفتها
ماتت الدمعه اعلـه خدي
دمـوعي  بـعـدك نـزلتـها
انت تـدري هـواي صعبه
دمـعه بخـدودي ادفنتها

🖊️عباس فاضل الشمري

انكسر ظهر الشمس لمصاب اخت عباس
وشنـو وضـع الگـمر بـمـصابهـا شـحـاله

نخسف صدر الارض بيها الجبل مدفون
جـبل صبـرچ ثكـيـل ويـا نعـش شـالـه

السلام على جبل الصبر زينب 💔

🖊️عباس فاضل الشمري

يزينب والأجل گرب وحانت ساعة الفرگه
لحد يوم المنيه وياچ صور لخيام محترگه
🖊️عباس فاضل ❤️

شوط كربلائي

#الشاعر_عباس_فاضل_الشمري
꧁꧁꧁꧂꧂꧂

#الخادم_غازي_الساعدي

شوط كربلائي
يزينب و الاجل كرب
و حانت ساعة الفركة


كلمات الموفق/ عباس فاضل الشمري
بصوت خادمكم الأقل/ شهاب الموسوي

🔻قصائد استشهاد الزهراء عليها السلام

✅اضغط على الرابط للوصول للقصيده


🔹نعي

https://t.me/aeabasae/16494

https://t.me/aeabasae/16504

🔸🔸القصائد

🔸زهرة دينهم

https://t.me/aeabasae/16506

🔸تموت امنياتي

https://t.me/aeabasae/16514

🔸هديتي حيلي

https://t.me/aeabasae/16521

🔸عطشانه روحي

https://t.me/aeabasae/16540

🔻استشهاد الزهراء عليها السلام
لسان حال الأمام الحسين

عطشانه روحي 💔

ـــــــــــــــــ ❁ ❁ ❁ ــــــــــــــــــ

من راحت امي دنيه ظلمه بعيني
عطشانه روحي ومايچ اليرويني

فگـدچ علـي يصعب
حتى الصخر ينحب

بچالي ... بچالي

ـــــــــــــــــ ❁ ❁ ❁ ــــــــــــــــــ

گلب حزنان .. والهجر حان
بروحتج يايمه روحي تعطش هواي
ابچي وانعاچ ..  بلكن وياچ
امشي ماريدن حياتي شنهي دنياي

گلبي چن طفله ويتيمه وجرحته الناس
مختـنگ رايدلي نسـمه تمـر با الانـفاس
انـه والمذبـوح صـرنـه نفس الاحـساس
يمه .. يمه

چن الشمس يمه بغيابچ طاحت
عافيتي عافتني برحيلچ راحت
ارض وسمه واملاك لچلچ ناحت

ودمع الشجر ينصب
حتى الصخر ينحب

بچالي .. بچالي

ـــــــــــــــــ ❁ ❁ ❁ ــــــــــــــــــ

لمـن اندار .. يمه محتار
والوجه لاوين اديره والتفت وين
روحتچ هاي..  تشبه الماي
عالرمل من جف تبده يرجع منين

ادري متردين اليه خاطر ارتاح
الدمع للعين صعبه يرد لو طاح
كلفه گدام الشماته الزم صفاح
يمه .. يمه

شاب الرمش والعين يمه تعاتب
كلش صـعب لمـن نناطر غايب
ثاري البـعد مـن اكبـر المصايب

نـار الـگـلـب تلـهــب
حتى الصخر ينحب
بچالي .. بچالي

ـــــــــــــــــ ❁ ❁ ❁ ــــــــــــــــــ

امشي مكسور .. گلبي مقهور
الفارگ احباب بحياته عمره ماعاش
عندج احساس .. يشبه الياس
ورده واليوصلها كون بطبعه فراش

يمه چلمات المحنه بحچيچ هواي
نعطش وتروينه چلـمه تشبه الماي
وجهچ النسمه التمره تمشي بهداي
يمه.. يمه

معقـوله يايمـه اعـله خـدچ صفعه
حتى الهـوه يمـر ويحسبـچ شمعه
فوگ الوجن يخلص عمرها الدمعه

مـوت الدمـع يگـرب
حتى الصخر ينحب
بچالي .. بچالي

ـــــــــــــــــ ❁ ❁ ❁ ــــــــــــــــــ

هاي العيون .. بعدچ شلون
تغفـه ويغمـض جفـنها وتهـده وتنام
رحتي لبعيد .. شوفتچ عيد
وصرنه بس نتمنه شوفچ مره بحلام

درب الموادع مشيته وخلص الليل
صعبـه يايـمه وغيابچ فرهد الحيل
منـهو اليتچـيلي حمـلي لمـن يميل
يمه .. يمه

طاح الحـمل والدنـيه ماعـانتني
من زغري وبسهم البعد ذبحتني
مـن اول سـنيـن العمـر يتمـتني

العـاش بيتـم يتعب
حتى الصخر ينحب
بچالي .. بچالي

ـــــــــــــــــ ❁ ❁ ❁ ــــــــــــــــــ

يمه تعبان .. فاگد احضان
روحي مثل الطير فزت دون الجناح
صنته الدروب .. وانه متعوب
حرگو اغصان العليهن روحي ترتاح

بـس الرماد البقالي وكلشي محروگ
لشوفتج مشتاگه روحي يذبح لشوگ
جوه التـراب ارد اظلـن ما ردت فوگ
يمه..  يمه

وسط الگبر وتراب فوگج هالو
من السمه الاملاك نعشج شالو
من دفنتج اعظـم مـكانه نـالو

يمـه الظـهـر حـدب
حتى الصخر ينحب
بچالي .. بچالي

ـــــــــــــــــ ❁ ❁ ❁ ــــــــــــــــــ

🖊️عباس فاضل الشمري

ضلم بعدك يبوي بكل حقد داري يحرگون

الأداء:-#علي_سعد_الدراجي
كلمات:-#عباس_فاضل_الشمري

#مسجد_الكميت_الكبير

رابط التلگرام
https://t.me/Mtrm_26

🎤عصام المحمداوي
🖊️عباس فاضل الشمري

🔻 استشهاد الزهراء عليها السلام قبل استشهادها.   مخاطبتاَ ابيها بما جرى من بعده عليها💔

ظلم 💔
ـــــــــــــــــ ❁ ❁ ❁ ــــــــــــــــــ

ظلم  .. بعدك يبويه بكل حقد داري يحركون
ظلم .. ما تطفه ناري بغيبتك وتصب العيون

واطفيها ناري بدمعتي
واشكيلك انه بحسرتي
بعـدك شفت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

يابويه فگدك من رحت شمسوي بيه
مـن غمضت عيـنك تـره دارو   عليه
بابي احترگ والنار اجت حرگة اديه
ما رف ابـد الهـم گلب وگالـو خطيه

حچي.. يابويه شحجيلك بعد بعيوني دمعي
حچي.. حرمه ويتيمه بلا ابو وما اكدر ادعي

ريتـك تشـاهـد حالـتي
واشكيلك انه بحسرتي
بعـدك شـفت يا خـمتي
ظلم ..

ـــــــــــــــــ ❁ ❁ ❁ ــــــــــــــــــ

لمـن وگع مـني الطفل وبخـدي سطره
ماعايـش ايامه وخـلص بالعتـبه عمره
كلما يجي ابالي اختنگ تخنگني عبره
ذبلنـي يـابويه الـوكت عايـفـني زهـره

متت.. ذبـلانه ابقـه بروحتك ظل عودي محني
متت..يابويه اجوني بكل حقد كسرولي غصني

بفگدك متـت ياشجرتي
واشكيلك انه بحسرتي
بعدك شفت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

يالكاسر جناح الگلب كسـره شيضمده
ذابحني يـا بويه البعد چـي  ماكو رده
مجبـوره ظـميـت الدمـع عـالخـد تبده
مثل الحمامه بچف طفل ما منه شرده

خنگ.. بجفـوفه يكسرلي ضـلع لمن خنگني
خنگ.. خلاني اطيحن عالارض لمن سطرني

انه طحت مـن سطرتي
واشكيلك انه بحسرتي
بعدك شفـت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

هـم شايف بنية نبـي وكسـرو ضلها
وتنـادي يافـضه بقهـر مـحد سمـعها
معقوله ما كسرة كلب جف الصفعها
مقهوره ويظل عالوجن ينزل دمعها

تهل .. دمعاتي مـن بعـدك نهر مايهده يجري
تهل .. يابويه بس نوح ودمع خلصته عمري

ودموعي حفرت وجنتي
واشكيـلك انـه بحسرتي
بعـدك شفـت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

ابشع جريـمه تسجلت يوكع جنيني
كلـما امـر بالباب احس يكثر ونيني
ما اريد اشوفن عتبته اعميها عيني
يابويه ردتك بالحلم اغـفه وتجيني 

حلم .. يالشوفتك صارت حلم اغفه واشوفك
حلم .. يا ريته ما يخلص ابد ما اريد اعوفـك

ما اريد افز مـن نومتي
واشكيلك انه بحسرتي
بعدك شفـت يا خيمتي
ظلم..

ـــــــــــــــــ ❁ ❁ ❁ ــــــــــــــــــ

خلينـي اشمك ياهـوه واترسها ريتي
يا نسمه مـن صوب الكبر لمن اجيتي
حملتي ريحة والـدي وبيـها اعتنيتي
يا نسمه بنفاسي اختنگ لمن مشيتي

هوه .. ما اريد اشم نسمة هوه ما بيها عطرك
هوه .. لمـن يجي ردته يمـر بويه اعلـه كـبرك

عطرك اريـده بشهگتي
واشكيلك انه بحسرتي
بعدك شـفت يا خيمتي
ظلم..
ـــــــــــــــــ ❁ ❁ ❁ ــــــــــــــــــ

  كلمات 🖊️

عباس فاضل الشمري

تموت أمنياتي

كلمات الشاعر
عباس فاضل الشمري
1

تموت امنياتي
للشاعر عباس فاضل الشمري
بصوت الرادود فارس الكربلائي

🔻أستشهاد مولاتي الزهراء عليها السلام

تموت امنياتي 💔

ــــــــــــــــــ ❁ ❁ ❁ ــــــــــــــــــ

تموت امنياتي .. بفگد الزچيـــه
يــمه وحــياتي .. تصعب عليـــه

انه العقيله . انه العقيله . انه العقيله

ـــــــــــــــــ ❁ ❁ ❁ ــــــــــــــــــ

يــمه بغيابچ بچينه ونزلت دموع شكثـــر كون مــن بعدچ ييمه لاطول هـــذ العمـر
طفله وبأول حياتي من نويتي اعله السفر
ماشفت راح برحيلچ گلبي مايحمل هجــر

گلبي بوداعه . من ودع امنه
مو هذا ظني . يطول هجرنه

انــه العقيلــه انـه العقيلــه

ـــــــــــــــــ ❁ ❁ ❁ ــــــــــــــــــ

يمه عفتيني ومشيتي وتنهظم روحي هظم
وانه شاهدت بعيوني وسمعة كسر العظـم
وطيحت المحسن شفتها وزادت بگلبي الم
مــن دفع بابچ بدينه شاهدت صورة خيــم

ناري اعله نارچ . حرگن گلبنه
وشبت عباتي . وهم انظربنـه

انــه العقيلــه انــه العقيلــه

ـــــــــــــــــ ❁ ❁ ❁ ــــــــــــــــــ

تنطفي شمعة حياتي وعيني مـابيها ضوه
واختنگ من ذكرياتي وينشف بريتي الهوه
يـمه من ساعة غيابچ خدي بالدمعه ارتوه
وبـالنفس دخان اشمن يــمه دلالي انچوه

الباب وعصرته . وظــالم سطرنه
وعصرت دليلي . بسوطه ويسبنه

انـــه العقيلــه انــه العقيلــــه

ـــــــــــــــــ ❁ ❁ ❁ ــــــــــــــــــ

وردة احلامي ازرعتها وترست ايامي ورد
منجل الفـرگه گطعها والحلم منـي ابتعـد
وراحت ايامي العشتها بفيچ ومااظن ترد
طفله من تفارگ امها مايظل عدها سنــد

ورده اعله ورده . لمن ذبلـنه
بچف الاعادي . مـن اندفعنه

انــه العقيلــه انـه العقيلــه

ـــــــــــــــــ ❁ ❁ ❁ ــــــــــــــــــ

بويه شاهدتك تعاني وهذا گلبك ينفجع
برجعتك مــن غسلتها بونتك زاد الوجع
گتلي مر چفي عليها ولزمت كسر الضلع
راسمه السطره اصابع ولاثر طابع طبــع

چف اعله خدها . مرسومه شفنه
هــدتلي حيلـي . وبيها انفجعنـه

انـــه العقيلــه انــه العقيلــــه

ـــــــــــــــــ ❁ ❁ ❁ ــــــــــــــــــ

انتي يايمه الحنينه وللصبر صرتي جبـل
مـــن تروحين شبدينه يندفن بينه الامل
واليتيم دموع عينه تجري لو واحد سال
چـم سؤال يمر علينه وشكثر دمع النزل

دمعه اعله دمعه . ويغرگ جفنه
اسچب يدمعي. . اليوم انسألنـه

انـــه العقيلــه انــه العقيلــــه

  ـــــــــــــــــ ❁ ❁ ❁ ــــــــــــــــــ

يـمه لو رحتي مصايب ينترس بيها الگـلب
والحسن چبده يتگطع والخدر يمه انسلب
بــــعدچ بعيني اشاهد كربله وبيها العجب
وخيمه محتركه وأدينه تنچوي بـنار ولهب

وفوگ الشريعه يوگع گمرنه
وبظيم اليالــي يايمه حرنــه

انــه العقيلــه انــه العقيلـــه

ـــــــــــــــــ ❁ ❁ ❁ ــــــــــــــــــ

🖊️عباس فاضل الشمري

إنتي زهرة دينهم



عباس فاضل الشمري

🔻أستشهاد مولاتي الزهراء
﮼عليها ﮼الصلاة ﮼السلام

زهرة دينهم 💔

ـــــــــــــــــ ❁ ❁ ❁ ــــــــــــــــــ


انتي زهرة دينهم
ماوگفتي بعينهم

عالوصي الكرار من تأمـــروا
الحرمة المختار ابداً مارعوا
مو زلم تدرينهم

   ـــــــــــــــــ ❁ ❁ ❁ ــــــــــــــــــ


ماينحسب زلمه من اعد
والشوك مـــا يصبح ورد
وافعاله تشهـــد
بضلعچ اذا يكسر عظم
عالزهره يتجاسر ظلــم
يسطرها عالخد
وحيدر يجتفونه بحبل
مـــن الصبر گلبه جبل
يشكي المحمد
لــو قارنت هذا الامـــر
ماتعجب بفعل الشمر
عالحره من هد

حال يشبه حالـچ
تنرعب اطفالـــچ

والخيم بالنار شبوا واحرگوا
الحرمة المختار ابداً ما رعوا
مو زلم تدرينهم

   ـــــــــــــــــ ❁ ❁ ❁ ــــــــــــــــــ


اخذوها مغصوبه فــدك
بقول النبي منهو اليشك
وصه الوصيه
گلتله بعـدك من رحـت
اعلينه الجماعه تأمـرت
ودارو عليــه
حرمــه وحيده بلاولـــي
ومچتف اگبالــي علــي
وينظر اليـــه
يـابويه راح ادعي بقهـــر
واتلمس تــــراب الگبـــر
بثنين اديـــه

بنتك وحاچيتـــك
بويه حرگوا بيتـك

يطلبونه بثار وعلينه هجموا
الحرمة المختار ابداً ما رعوا
مو زلم تدرينهم

  ـــــــــــــــــ ❁ ❁ ❁ ــــــــــــــــــ


گصدتلك الزهره بــحزن
تشكيلك هموم الزمــــن
من انته غايب
يذبل جفنها امن الدمع
ذاب الگلب مثل الشمع
من المصايب
ترحل حزينه فاطمـــــه
والدنيه تصبح مظلمه
بفگد الحبايب
يم الحسن محسن وگع
يــاوسفــه بابچ يندفــع
بچف النواصب

صار حاكم ظالــم
بحگچ الله العالم

والضلع ينصاب وعظام اكسروا
الحرمة المختار ابــداً مـــارعوا
مو زلم تدرينهم

    ـــــــــــــــــ ❁ ❁ ❁ ــــــــــــــــــ


وحدك يحيدر من تظل
من ترحل يموت الامل
والدنيه ظلمه
عاش بمصايب وبمحــــن
بفگد الحبيبه ام الحسـن
وعيونه تعمه
يظلم بعـد عينچ ضــــوه
لــو غابت يموت الهـــوه
مخنوگه نسمه
والذكره نيران وتشــــب
يتخيل الموقف صعـــب
فگدج يألمه

شلون يذكر موتــچ
بأذنه يسمع صوتچ

من يطب للدار يذكر من اجوا
الحرمة المختار ابــداً مارعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ


يالزهره زينب من بچت
ابلوعه والم لمن حچت
يايمه وينـــچ
طفله ويتيمه وبالزغــر
يــايمه ظهري الينكسر
واذكر ونينچ
محتاجه نظرة والــــده
بعدج اصيــر الفاكـــده
افگد حنينچ
يايمه بعيونـــي حچـي
لمن اسولــف بالبچــي
وبعيني عينچ

بعدچ ايضربوني
يمه ماراعــــوني

يمه واحنه زغار يتمونه ومشوا
الحرمة المختار ابــداً مــارعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ

✍️عباس فاضل الشمري

لسان حال الامام علي عليه السلام:


ادفـن ولـدمـع بلـل لحـيتـي وطـاح
دفنتـج بالگـبر وترابـه صـاير طيـن
انگل بالجدم بـس جدمي ما ينشال
مـايقـبـل يـرد وانتـي بگـبر تبـقـيـن
هـد حيلي الهجر لمـن مشيتي بعيد
فگدج مو سهل والحيل اجيبه منين
من يوم الدفنتج ظل الظهر مكسور
احـس كلمن يصدلي يگـلي متردين

✍️عباس فاضل الشمري

مسلم المطيري نعي

يمه من بعدج تراه البيت مو بيت
كبر صار برحيلج كله ظلمه

كلمات الشاعر/ عباس فاضل الشمري

نعي لسان حال الحوراء، ،،،ع،،،،


كلمات الشاعر، ،،،عباس فاضل الشمري

اول مـره هـاي عيونهـم ترتاح
جفن مايطبگلهم وانت موجود
مو فتره طويله الراحه متدوم
القائد مـن يموت يخلف جنود
بس فترة عزاء ويرجع الخوف
رعبهم كله صـار عمايـم السود
اليفرح لا تلومه وحكه فرحان
حلل دمه تلگه اجداده الـ يهود
خامس كسره هاي بأخر سنين
الموت بدرب حق يصير مريود
🖊️عباس فاضل الشمري

استشهاد الامام الحسن العسكري
عليه السلام
ـــــــــــــــــ ❁ ❁ ❁ ــــــــــــــــــ

اليوم البچي بسامراء
الحادي عشر بچـاهم

ـــــــــــــــــ ❁ ❁ ❁ ــــــــــــــــــ

ياسيدي اليوم الدمع بمصابك
فوگ الوجن لمن يهل يم بابك
لمن رحت كاسر گلب احـبابك

تنعه بحزن هاي الناس
والمهدي ينـعه ويـاهم

ـــــــــــــــــ ❁ ❁ ❁ ــــــــــــــــــ

اليوم  الامـام العسـكري يسمونه
مـن الظـلم  سـال الدمع بـعيـونه
اليوم بحزن كل شيعته يودعونه

عشت بظلـم وتأذيت
بس انت ما تخشاهم

ـــــــــــــــــ ❁ ❁ ❁ ــــــــــــــــــ

بأخر نفس سال الدمع مـن العين
گلت العقيد اقره نعي عن حسين
يالقدمـت عمـرك نـذر لجل الدين

يالكملت درب حسين
بأخـر نفـس تنـعاهـم

ـــــــــــــــــ ❁ ❁ ❁ ــــــــــــــــــ

بزغرك گـلت مخلـوقيـن مـو للعب
واليشـعل النار صـغار مـن الحطب
والسائل تعجب بيك شاف العجب

من زغرك وعندك علم
بحـيره العـده خلاهم

ـــــــــــــــــ ❁ ❁ ❁ ــــــــــــــــــ

سم الغدر بالعنگود وصايم جنت
اليوم بمنيتك حسيت چن گربت
چبدك تگطع واللون احـمر صرت

لمن رحت الهم ضيف
بسـم الغـدر ملگـاهم

ـــــــــــــــــ ❁ ❁ ❁ ــــــــــــــــــ

🖊️كلمات

عباس فاضل الشمري

قصيده لذكرى استشهاد الأمام
الحســـن الـعسكــــــ ع ــــــري 

ـــــــــــــــــ ❁ ❁ ❁ ــــــــــــــــــ

يـامهدينــا تواسي حسينك 
يـامهدينــا بدمعة عينــــك 

مـن الحسن غــاب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

من طاح ابوك اليوم دمعك تصبـــه 
تنحب عله المسموم كضاهـا غربـه 
تذكر مصاب حسين والفركه صعبه 
شاف الجفوف شلون وبصفها جربه 

من فكد الاحبــــاب
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

شفت الجبد ممرود رحت بخيالك 
للمجتبى المظلوم يتعنـــه بـــالك 
تذكر مصابه تريد تشكيله حـــالك 
وتكله ابوي اليوم مسموم اجــالك 

من زغرك وشــــاب
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

بعد الحسن ما مات بعيونه حسره 
ترحل عن الانظار والغيبه صغـــره 
تتبعها وحده انوب تتسمه كبــــره 
والشيعه تطلب ثار  حكمك تنطره
 
وشاهدنه ســرداب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

تشكي الفگد ولظيم شفت الاذيــه 
بعد الابو مــن يروح تحله المنيـــه 
وبعـمر خمس سنين عنـدك وصـيه  
عدهم خبر مكتوب منصــب وليــه 

خل يقره الكتـــاب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

يالمهدي حيدر طاح والطبره بالهــام 
بضلع الزجيه تشوف متكسره لعظام 
وعمتك غريبه تـروح مسبيه للشـــام 
وچف الكفيل وعين وي ظيم الايتام 

كل هاي الاسبـــاب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

حجة انت للاسلام يالمهدي قائم 
تنشر عدل بالگاع مايبقه ظالـــم 
رب العرش خـــلاك للأمه حاكــم 
تطلب تريد الثار ثــــار الهواشــم
 
من لطبره والبــاب 
دلالــــك انـصــاب

ـــــــــــــــــ ❁ ❁ ❁ ــــــــــــــــــ

🖊️كلمات
عباس فاضل الشمري

يامهدينا
الشاعر عباس فاضل الشمري
ملا حسن المجبلي

الشاعر عباس فاضل الشمري pinned «🔸🔸قصائد استشهاد الرسول الأعظم عليه الصلاة والسلام ✅اضغط على الرابط للوصول الى القصيده واللحن 🔻🔻🔻🔻🔻🔻🔻🔻🔻 قصيدة مات النبي 🔻 https://t.me/aeabasae/16436 قصيدة راح ابويه 🔻 https://t.me/aeabasae/16452 قصيدة ظلم 🔻 https://t.me/aeabasae/16468 🖊️كلمات عباس…»

🔸🔸قصائد استشهاد الرسول الأعظم
عليه الصلاة والسلام

✅اضغط على الرابط للوصول الى القصيده واللحن

🔻🔻🔻🔻🔻🔻🔻🔻🔻

قصيدة مات النبي 🔻

https://t.me/aeabasae/16436

قصيدة راح ابويه 🔻

https://t.me/aeabasae/16452

قصيدة ظلم 🔻

https://t.me/aeabasae/16468

🖊️كلمات

عباس فاضل الشمري

🎤عصام المحمداوي
🖊️عباس فاضل الشمري