AJ.

أحبه حب شايب لـ ابنه اللي به لطيف وبار
‏يداري خاطره قبل الحزن يبدي مواريه

‏وأحنّه من كلام'ن يوجعه من عاذلٍ ثرثار
‏دفعه الحقد وأهداف مقاصدها دناويه

‏وعليه أغار من هب النسيم وليلة المطار
‏ليا ذعذع هواه البارد ولمس عراويه

عفيف ومخلصٍ له بالغلا مانيب له بوار
‏ولا قد بحت لحدٍ سره و بينت خافيه

‏حفظته من صواديف الدهر ومجابهة الاقدار
‏واخذت بيده من برد الحّنين ان مالت الفيّه

‏عساني ماخلا ولاعدم طاريه مهما صـار
‏لو انه يحدنا وقتٍ تخالفنا مشاهيه.

لـ سعيد الدفين.

البارحه ليلها ماهو بـ ضيفً خفيف
‏لين اقبل النور و ادّا واجبه وانصرف
‏
‏رسمت وجه المليحه في خيال الكفيف
‏و ابحرت به فالوصوف الين شاف و عرف

‏فيها طهور النزيه اللي مقامه شريف
‏ودك تطهّر بدمع عيونها لا ذرف
‏
‏من شاف وجه القمر فـ الارض حطه وليف
‏حتى لو انه على حد الصراط انحرف

مضارب رموشها اللي حدها حد سيف
‏مكانها الصدر واللي غيرها فـ الطرف
‏
‏في مثل هذي العيون اللي هدبها كثير
‏تسّلم الروح ويموت الشجاع بشرف
‏
‏راحت بقلبي مثل ما راح حكم الشريف
‏مراح غرسً جرفه السيل يوم انجرف

وان مال ذاك القوام المنصهر يالطيف
‏غصنً لا هب النسيم يميل منه طرف
‏
‏اطيح طيحة قوي ماهي بـ طيحة ضعيف
‏" طيحة شجاعً هزمه الحب لين اعترررف ".

لـ جابر النشيرا.

ثقيلة غلا ،،وتقوم لرضى هلي وتطيح
‏وادبها ذكى وارهى لها الرب واعطاها

‏شريفة طريق وقايدة ثورة التصحيح
‏ولها عقل حتى انها علي تفرض اراها

‏عطاني اللذي يعطي العطايا مهوب شحيح
‏ وداعة رفيق ن احسن الها ورباها

‏على الدين والحشمه وعلى كل هبة ريح
‏لو لا حاضر ولبيه ماتسمع حكاها

شريفة طريق وقايدة ثورة التصحيح
‏ولها عقل حتى انها علي تفرض اراها

عطاني اللذي يعطي العطايا مهوب شحيح
‏ تنافس بنات امي على رضاي ورضاها

وبمووت ماجاها قصور ن ولاتجريح
‏وداعة رفيق ن احسن الها ورباها

على الدين والعزه وعلى كل هبة ريح
‏لو لا حاضر ولبيه ماتسمع حكاها

‏- علي بن حمري .

اي والله تمون وزين وجهك جعلك تمون
‏" يا اجمل من عبير الورد و الطف من النسمه ".

‏احبك بمنظور الغلا اللي بدون عيون
‏من مقبلات الحب ل الوجبه الدسمه

‏انا مثل راعي السكر اللي معه مخزون
‏ما يبغي العلاج يبين الضعف في جسمه.

‏- عبد الله الحول .

يابعد من مابعد جا ومن عدّا
‏ويابعد من ساج روض الحشى نَشره
‏
‏يوم كان الشعر جِزيه ولك تِدّا
‏والقصيد اسهل من كتابته نَشره
‏
‏اخذ قصيدي ياشذا الورد لا نَدّى
‏وانتبه لي، واستمع موجز النَشره؛
‏
‏"والله إنّك بالغلا فارقٍ جدّا
‏مثل فرق الإبتسامه عن الكَشره"
‏
‏ - ضيدان بن قضعان.

كل هذا الجمال أمام قلبٍ وحيد
ليه يا مذهل العالم محد يذهلك

‏انت لو ترفع الغطوة يذوب الجليد
‏ويخجل البدر ياخذ دورته فالفلك

‏تدري ان الشروق.. بجيّتك من بعيد
‏وتدري ان اجمل الاشجار.. شجرة هلك

‏أنت يا فاتن النظرات.. خلقٍ جديد
‏منت بـ إنسان ولا جنّ ولا مَلَك

‏ما تشوف الغصون وفارعات الجريد
‏تنثني لك تقول انها تبايع .. ملك

‏إن كتب ربي اطيح بعيونك شهيد
‏وين ابهرب وليه اهرب .. وليه أسألك.

-جمال بندر.

‏افهم علي خل المشاريه .. والراي
‏رجعت اوضح ما رجعت استشيرك

‏لا تنفعل ولا تغرك . . سواياي
‏هذا مصيري وانت هذا مصيرك

‏حظي واعرفه ما يساعد وانا اياي
‏دورت شرك وانت كفيت خيرك

‏طلعت من جنة وصالك بيمناي
" وانا ادري ان متلاتها . . نار غيرك " !

سعيد ال نوره " قرينيس"

‏لا تشوف الناس ضعفك و إنكسارك
‏لو عظامك تنّكسر .. ما جبّروها

‏انّتصب كنّك طلعت من المعارك
‏ماخذٍ ثار القبيلة .. كل ابوها.

‏-ناصر الحمادين

‏" حاكني لبى معاليق الفواد ولبى "
‏كل شي ودك اضيفه معه واضيفه

‏فيك زينٍ واضحٍ جدا وزين مغبا
‏يالاليف اللي تضاريسك ماهيب اليفه

‏انت مايحتاج لك خطة ورسم اطبا
‏الله اللي راسم زينك كذا من كيفه

‏بس يوم تقول ماعندي عسل و مربا
‏شفتها تلميح وانت تشوفها تصريفه

شاعرك ضيفٍ لامر أسمه ماهوب يهبّا
‏والعرب ماترحم اللي مايوجّب ضيفه

‏لاتقول الليل حده .. والديار جنبّا
‏قلت لك ياما سرينا والديار مخيفه

‏-صالح النشيرا.

ادري ان العمر خيله تسابق ركابه
‏بس ابي .. ودّي اسابق ركابه وخيله

يا وجودي على انّه زيد يرجع شبابه
‏ويتنقّى معه عشره من عيال جيله

‏كم جميلٍ يسجّل لي وهو من حسابه
‏جعلني ما اعدم هوماته المستحيله

‏يوم حتى كبير القوم رزقه هبابه
‏مجلسه دارجٍ بنه و عوده و هيله

لا تغارب لاشفته طالع من ثيابه
‏من كثر ما يشوم من الردى والفشيله

‏لا نصوه الضيوف يحطّهم في ضبابه
‏وكرمته من عيال الابل لو انها قليله

‏ما تراخت عزومه للعيال الذيابه
‏غير عاده على الامجاد راعي طويله

‏-صالح النشيرا.