الشاعر يوسف الفتلاوي

ويلي عالزهره المظلومه
عاشت ومات مهضومه
*******************************
ظلت  بالجرح  والونه  مخفيه
ودمعة فاطمه بالحسره يوميه
ويا  كسر الظلع  مايشفه ليليه

يوم الي جره بيها الوصي اتألم
*******************************
عاشت بالحزن  والدمعه سچابه
ويم ظلع الزچيه شاهد اصوابه
كلها من السقيفه زادت امصابه

وصت سر دفنهه  ابليل  الاظلم
*******************************
يمهه  لو  تعنه  يجذب  الحسره
ودمعاته اشكثر يافاطمه الزهره
رجع  للدار حيدر منكسر  ظهره

على امصاب الظلع لوعاته تتأزم
*******************************
تخفي عالوصي والدمعه  تجريهه
وادري الآه  چانت كلمه  تحچيهه
تمسح  بالدمع  كلما  يجي اعليهه

وحيدر ياظلع من فاطمة اتشهم
*******************************
يا  باب  الزچيه  سولف   الاسباب
وبجرم السقيفه اشسوت الاصحاب
نار  اتوجرت منهه الجنين  انصاب

ولاذت للستر  بيها الوفه  اتشيم
*******************************
يا باب الحزن  لو نسأل اجروحه
وحيدر عالزچيه ما هدئ نوحه
ما يهوه الحياة  الي دفن روحه

وحيله عالزچيه  اشگد تره اتهدم
*******************************
تمت بعون الله تعالى الشاعر___يوسف_الفتلاوي

صرخه من السمه
ماتت........فاطمه ......يحيدر
يجرحني الدمع
مكسور الظلع.............يحيدر
*******************************
اشسوت بينه بويه هجمة الدار
واشوفنه الكلب ياويلي بس نار
واحسنه نبت ابظلوعي بسمار
اكدار الزمن جابتلي الاشرار

ليل...... الفاجعه
يحچي الواقعه .......يحيدر
كلبي ينفجع
مكسور الظلع .........يحيدر
*******************************
يحيدر دمعتي تشرح حچيها
يبويه شچم ظلع مكسور بيها
گامت فاطمه وتسمع بچيها
مصيبه ابرجعتك ونك عليها

یمهه من طحت
بويه....اتفاجئت........يحيدر
نوحك ينسمع
مكسور الظلع.........يحيدر
*******************************
تلاگو بالدمع والحسره بيه
وسمعهه تون شفت الزجيه
يفضه اشيبهه امي اتگض اديه
اجت للحجره بس ونه خفيه

نار ... امچيمه
حسرة فاطمه ..... يحيدر
ونك......يرتفع
مكسور الظلع.........يحيدر
*******************************
اسولفلك يبويه اشگد حزنهه
من شفت الزجيه ابعالي ونهه
وگع مثل الجبل طيحة ابنهه
سطرها الظالم وشاهد جفنهه

دمعي والجرح
وانت بلا صبح.......يحيدر
جرحك يتسع
مكسور الظلع.........يحيدر
*******************************
طاحت فاطمه..... وختل نظامك
خلفك ....ما بعد تنظر امامك
تحني شچم ظلع بويه اشعلامك
صعبه الكسره معروفه بكلامك

دمعك بي حچي
وهوايه....البچي........يحيدر
لويطفي الشمع
مكسور الظلع..........يحيدر
*******************************
يبويه انودع امنه ابدمعة العين
واسولف عالظهر وابروحي كسرين
الحسن يمي بنعاويه انچوه البين
بلهفته من شگبهه طاح الحسين

صاحت اتلوعت
من ذاك الوكت.......يحيدر
من هذا الوضع
مكسور الظلع.........يحيدر
*******************************
يبويه بيا دمع تدفنهه عينك
محني عله الكبر وسمع ونينك
چم طحه طحت بويه بحنينك
من هسه بعد ماتت سنينك

حزنك ينبني
ظهرك ينحني.......يحيدر
كلبك ينصدع
مكسور الظلع.........يحيدر
*******************************
#تمت بعون الله تعالى
#خادمكم ......يوسف الفتلاوي

ميثاق الله خانته وخانت نبيها
اتلاثه من بعد نبي هجمو عليها

قالو وأن بالدار احمد
اوكزها والظلع يشهد
****************************
خانو بدين الله وبنهج الرساله
نزلت الايه وتبين كل خصاله
أكملت دينك محمد بعلي واله
هاي معروفه الوصيه وندري بيها
علي يم الباب چا عرفو فعاله

هاي خيبر تشهد الصار وتعرفه
لسه بصمات الاثر تاركهه چفه
والزلم ختلت تجيله تنطي وصفه

عافت العتره وجت تبدي الخليفه
والسبب چان السبب من السقيفه

جاءو ونار الحقد مسند
اوكزها والظلع يشهد
****************************
هاي معروفه الحقيقه وعندي برهان
ما اجامل ليش اجامل خاين افلان
نام والهادي بجراحه بيت الاحزان
والسقيفه اتلطخت بالدم ايديهه
شلون تعقلهه الحريگه بلايه دخان

والمصادر اكدت غدر الصحابه
والثلاثه طعنته وعافت كتابه
بين التخطيط واضح في غيابه

تأمرو عالباب منهو اليدفع اول
والنذل قنفذ وصل لدار يسأل

وستكبره الطاغوت مرتد
اوكزها والظلع يشهد
****************************
ما طفت نار الحقد ظل يلهب الدار
وصحابه شكد صلافه انكلبوا اشرار
چان ناتجهه السقيفه الديه بسمار
فاطمه ظلت بحيره وشافت الگوم
بعد طه اذياب صارو شبو النار

تدري لو مالله حكمه بهالوصيه
علي بالحسره غيور عله الزجيه
چان تدري يمسح بجده الوطيه

اني اعرفهم حقيقه وهمه شيخين
والنذل ضم راسه ماباوع لبوحسين

كانت صلاة الشيخ مفرد
اوكزها والظلع يشهد
*****************************
عندي رباط السوالف شاهد الباب
والاثر بسمار جارح صدر الاطياب
اعرف الجاني تعده شيخ الاصحاب
والصحابه تستغل طوك الوصيه
كالو امچتف علي بالحكمه ابواتراب

وبهجوم الدار چان الهادي معلوم
يدري بيهم وبغدرهم هجمت الكوم
ظلع فاطم ينكسر بالباب مرسوم

ماتت بهمهه الزجيه بعسرة افلان
غاضبه چانت عليهم ال سفيان

كانت عيون الطهر ترمد
اوكزها والظلع يشهد
*****************************
افتى بيها المايخاف الله وجزه الحد
شيخهم امر عليهم حطب ينعد
والنذل نفذ جريمه ويصطر الخد
والزجيه تنحني مكسورة اظلوع
والضحيه اصبحت بنتك محمد

مارعو حك النبي ولاحرمة البيت
دخلو بلايه اذن وبلايه تصويت
احلوگهم خرسه تره بس توابيت

خضرت دار الزجيه حزن وجروح
صار بالسمار نحچي حسره والنوح

بيت الرساله كيف يقصد
اوكزها والظلع يشهد
****************************
تمت بعون الله
خادمكم........ يوسف الفتلاوي

[[ گعديه لليالي الفاطميه]]
____________________________

يالتسأل  علينه  الرافضيه
عن أبً وجد هاي القضيه
هناك الما يضيعون
خدام الزجيه
*******************************
بهااليالي اتشوف موقف هذا اليحب الزچيه
تدري   اليواليهه   باچر    فايز   ابيوم   المنيه
الما يحب الزهره خاسر    بالليالي  الفاطميه

بگلبه تلگه اشگد دغش
احقوق ياكلهه  ونهش
حقد بس گلبه  انفرش

يعتبر من  جيش  اميه

يالتبغض علي تاليها  محنه
أيس    لا تفكر  بيها   جنه

بس همه اليفوزون
خدام الزجيه
*******************************
كلمن  يبين  أصالة   طيبه  والمنبع  يفاخر
ولايصير ابوجه ثاني ثوبه بصناف المظاهر
ينعرف صوت الحقيقه عايش،بحيله ويناظر

بس حسد  گلبه  امتله
شوف  وضعك   عدله
الغيبه  عندك   مشكله

لازم اتصحي  الضماير

تعرف بالكثب وحفظ لسانك
باچر هوه حصنك هوه امانك

كلهم ما يقصرون
خدام الزجيه
*******************************
باچر التوقيع  واضح  بي  ختم  من  الزچيه
يعيش بالدنيا بكرامه والعشك حامي الحميه
هذا  دستور  العقيده  لو  ردت نهج  القضيه

شوف كل  سيره وعجب
ابحبهم   اتنول    الرتب
حب  علي  جوهر ذهب

حب علي هوه الهويه

باچر   بالحشر  تعرف  عقابك
لا تدور  ولاتلف حضر جوابك

بالمحشر  يضيئون
خدام الزجيه
*******************************
كلشي   بالدنيا  يغرك بيت  وموال  وصحاب
عوف عنوان  التفاخر  ونسه  مسألة  العتاب
گول بس حسين عندي هذا يامحلى الجواب

اتريد  تنجه  ابهل الامر
حسين بس هوه الذخر
هناك    يشفع   بالحشر

مبدأ الحق والثواب

يامحلى الخدامه ويعلى شانك
باچر    بالحشر   حاجز  مكانك

بالخدمه يوافون
خدام الزجيه
*******************************
تمت بعون الله تعالى الشاعر_يوسف_الفتلاوي

شلون يالمهدي تون دمعك دمه
اتشوف مگسور الظلع من فاطمه
*******************************
مانشف دمعك ابد يروي الحزن
ليل واهاتك مصيبه من تون
تعيش لوعة فاطمه وجرح الجفن

بيها نارك سيدي هم مضرمه
****************************
نار كلبك بالحزن ذاب الشمع
نوح خلصت العمر تجري الدمع
تعيش حسرة فاطمه وكسر الظلع

جرحك اشكبره صعب لو ترجمه
*****************************
ونك بليل الهجر يحچي الصبح
تحفر الوجنه دمعتك والجرح
حسرة الفاگد عله اجروحه ملح

من حزنهه فاطمه تنوح السمه
****************************
شلون كلبك يحتمل نار وهجر
بس حزن واهات گضيت العمر
اه دمعك بي ظلع یروي الكسر

اتشوف لوعة فاطمه متألمه
*****************************
تعيش ايام المصيبه بيا كلب
حاضر ويانه ويظل دمعك يصب
امصاب امك فاطمه كلش صعب

هجمت اعليهه العصابه الظالمه
****،*،،**********************
شلون حالك سيدي حزنك كلف
هواي نوحك مستمر هم مختلف
وين حاضر كربله لو بالنجف

وين اوصاف الگبر وين احتمه
*****************************
وين تحضر بالعزه ولطم الصدر
وعندك انت اظلوع صعبه تنجبر
حسين ظل الحافر بصدره انكسر

جالت اخيول العده بيها العمه
****************************
تمت بعون الله
خادمكم..... يوسف الفتلاوي

شيعتهه....روحي بنفاس الوصيه
شيعتهه.......اشلون شالتهه اديه
شيعتهه.......للگبر وحدي الزجيه
يازهراء............يازهراء
*******************************
بين ابوجهي التعب ياخذني بالفرگه
ضاعت سنيني العشتهه وطاحت الورگه
راح ...اشيعج للگبر بس انتظر ملگه
مرت ايدي عله الظلع بس وجنتج زرگه

من شفتهه....اتهدم الحيل وخذاني
من شفتهه....ولا علي چنك هذاني
من شفتهه....يصعب الموقف عليه
*******************************
راجع وميت يزهره منخطف لوني
روحي دافن چني بيدي لا تلوموني
الليل بعدج ما أنامه تشهد اعيوني
لو رجعت الدار اولادج ينشدوني

یاحسافه....ضيعت حلمي البنيته
ياحسافه.....والكلب بعدج نسيته
ياحسافه.....معتكف وسط الرزيه
*******************************
وجهي بين حيل اصفر اه يالزهره
احچيلي شنهو الي يلمج ظلت الحسره
اشصار حيدر من رحلتي راحت العشره
الچان خيبر بيده شايل مختنك صدره

فاجئتني.....من خفت عني ظلعهه
فاجئتني...ليش يجري بس دمعهه
فاجئتني.......تسكت ابهاي القضيه
*******************************
مالي عالفرگه سوالف ينهدم حيلي
الدافن بروحه حبيبه صعبه يا ليلي
همي بس للبير احچي وهوه يحچيلي
فاطمه انفاسي صارت كلشي تعنيلي

من عفتهه ....بالچفن اولادي صاحت
من عفتهه ....مهجتي وياهه طاحت
من عفتهه.......اتيقنت ما بيهه جيه
******************************
من دموعي ما اشوفن دربي بعيوني
يزجيه وشوفي حالي من ينادوني
خاف ارد للبيت وعيالي يسألوني
وين عفت الزهره كلبك من يشبگوني

من بچيهه.....حنت وشبگت ولدهه
من بچيهه......بالدمع احفر الحدهه
من بچيهه....... ينجرح نجم الثريه
*******************************
كلشي بيه يعيش ميت زهره بغيابي
بس جسد مابيه روحي دافن احبابي
والله زحمه واني عايش يندفع بابي
وصحابي استغل طيبي عارف اسبابي

من دفعهه....كلشي بغيابي جفيته
من دفعهه.....والظلع محني لگيته
من دفعهه.....ما رعه سيد البريه
*******************************
تمت بعون الله وبركاته
خادمكم●●●●يوسف الفتلاوي

يامهدي....يامهدي
____________________________
ياربي بالموعوْد.........نفتتحُ  العزاءْ
بالدمعِ والبكاء..........لامنا   الزهراء
ونسألُ الحنين.......وينحْني الرجاء
ونلطمُ الصدور.......لصاحبِ الجزاء

يامهدي..........ياااامهدي
____________________________
احداقُنا تنوْح.........بالويلِ والثبور
وقلبنا يذوب.........بالبابِ والنشور
اظلاعُنا جرُاح......لظلعُها المكسور
عجل  فما ترى.........تنتظرُ الدهور

يامهدي.........ياااامهدي
______________________________
نسألُك الدُعاء.........ونرفعُ اليدين
توسلاً نقول........ياربي بالحسين
ننتظرُ اللقاء........قد اثكلَ الأنين
ونسبلُ الدموع.....لقصةِ الجنين

يامهدي..........ياااامهدي
______________________________
بالجبتِ والطاغوت....آما ترى المصاب
ياصاحب الظلوع..........يسألُك الغياب
في دولةِ البكاء............يصطبرُ العذاب
وهل  لناْ  سبيل.............نرجعُ  للكتاب

يامهدي.......ياااامهدي
_____________________________
ياصاحبُ العزاء........انفاسُنا جُراح
حتى يشاء الله.......ويأتي بالصباح
اقبل فما هوى........قد هبت الرياح
الظلمُ فيْنا جار....وتشتكي الصفاح

يامهدي..........ياااامهدي
_____________________________
يانفحة السماء.......قد  ساقتُ الامور
والأرض تستغيث........تنتظرُ الظهور
سائت بنا الاقدار.....في عالم الفجور
قد افسد الطغاة.....بالحكمُ والقصور

يامهدي.........ياااامهدي
______________________________
تمت بعون الله تعالى
خادمكم...... يوسف الفتلاوي

السلام عليكِ  آيتي فاطمه
******************************
حاير من  امنين ابتدي ابشرح المصيبه
نوحي  بس  النوح   مجروحه  الحبيبه
فاطمه   بالحسره چن    امست  غريبه
حيدر   اهمومه   اشكثر   عالي  نحيبه

هوه من  الباب  مفتوحه الرزايا
*******************************
يا دمع   عيني  يسولف دار  الاحزان
كلبي   من  الهم  لگيته يلعن  افلان
عالزچيه اشلون يهجم هذا شيطان
ما درك اية القربى   ايشوف القرآن

اه  والاهات  تحچيهه  المنايا
*******************************
انه  بس  اجروح  اعيشن  قصة الباب
زحمه يم حيدر اجيبن طاري المصاب
يزعل   الفقار  حسره  ابطاري  العتاب
دمع من  الباب  ماخذ  دمعي  سچاب

عدنه مكسور تحچي الروايه
*******************************
اجروح  مليانه المهج  تحچي الرسايل
احنه  خلصنه   العمر   سكته  ونجامل
واضح انشوف الحقيقه كلشي حاصل
حگنه  باب وظلع ما نرضه  التنازل

اهواي معروفه الحقيقه ونوايا
*******************************
ماتت  اگلوب اشكثر ميته الضماير
چان  همهم  ينمحي وضع الشعاير
ليش كل هذا الحقد ينفي المصادر
يريد يبري الزمره من هاي الظواهر

احنه نعرف باليضدهه من البدايه
*******************************
ماتت الزهره وغضبهه  اعله الصحابه
حتى   ظاهرهم  حقد جيش العصابه
شفنه   تاريخ    النذل   اسود   خرابه
حر   جهنم   حصته   ويأخذ   عقابه

حصته اللعنه يظل هاي النهايه
*******************************
تمت...... بعون الله تعالى الشاعر____يوسف_الفتلاوي

سامحيني...بالدمع يبدي اعتذاري
سامحيني ...والظلع حشم فقاري
يازهراء---------- يازهراء
***************************
كاتب البسمار لوحه تقره بعيوني
اخذ من عيني الضوه ومشيب اجفوني
اشما انام اليل حسره تنحني امتوني
ابروحي باني مگبره يالزهره يلگوني

من هضمهه........ماتت بهمهه الزجيه
من هضمهه...عالگبر اخفي الوصيه
يا زهراء________يازهراء
*******************************
اكره الباب من اشوفه اشتعل جمره
كون خيبر حتى اقلعه بيدي يالزهره
من يصد عالباب حيدر ينكلب ذكره
اعتذاري اشلون صاير ميت الف حسره

عذبتهه.........يا دهر ليش الرزيه
عذبتهه.....بيا ذنب بس رد عليه

يازهراء ______يازهراء
*******************************
چني طير بلايه جنحه ودافن اجروحه
والصبح ما مر عليه عيني مشبوحه
ليلي يخلص بس مناحه وخانك ابروحه
عجبه باب الزهره يوگع واني مالوحه

ماشفتهه....حسرتي يمه اليتامه
ما شفتهه...ضمت اعليه العلامه

يا زهراء ________يازهراء
*******************************
اني اول مره حيدر ينكسر ظهري
والنفس مر عله ريتي ومختنك صدري
حسبت كل نجمه چانت تاخذ بعمري
بعيني ما ظل كل دمع تعرفني ياصبري

من عذابي....مابعد بيه انه اشوفي
من عذابي....ينچوي الليل بچفوفي
يازهراء ________يازهراء
*******************************
الروحه دافن ليش عايش يذبح ايامه
چني ظلمه بكاع صحره ضاعت أحلامه
وجهي ظهرت بي علايم كشف الثامه
والدهر خلاني وحدي يرمي بسهامه

لو نختني....... تنتهي شفت القضيه
لو نختني.........تنكلب هسه الوطيه

يازهراء _________يازهراء
*******************************
لو اشوف الباب اسكت والحجي ابعيني
ويلي تجرحني المشاعر ياضوه اسنيني
خلي هذا الصار يحجي بينج وبيني
ظهري يالزهره حنيته بأول ونيني

من فكدهه...يادمع يحچي المواقف
من فكدهه....ماتت بروحي سوالف

يازهراء _________يازهراء
*******************************
صعبه والله فاطمه مااحمل اغيابج
والسقيفه شلون توصل تعتني ابابج
شفت حتى الباب يروي لوعة امصابج
والسطر عينج اويلي شسوه بهدابج

ياحسافه.......الدهر ياخذ زماني
ياحسافه....ولاعلي چنك هذاني
*******************************
تمت بعون الله
خادمكم.....يوسف الفتلاوي

يا هلا ابتاج العداله
طه مبعوث الرساله

يارسول الله  حبيبي♡♡♡♡
*******************************
انولد  أصل الدين  وأصل العقيده
وبتشرت   الاكوان  تكتب  نشيده
محلى الفرح وياك تحلى القصيده
وسند بيك ايصير  شفنه الصميده

يافرحنه الليله ردد
أشهدُ  حبك  محمد

يارسول الله حبيبي♡♡♡♡
*******************************
حلوه  الصفات البيك بانت كماله
ودعوه حب الناس چانت خصاله
والصادق  المحبوب  طيبة  فعاله
رحمه  وبعث  بالنور  رب الجلاله

بالنبي ظهرت علايم
آدم   ايبشر العوالم

يارسول الله حبيبي♡♡♡♡
*******************************
آدم  سجد  تعظيم  شاف النبوه
وبهل الصفات البيك يالهادي حلوه
بساگي العرش والنور لدنيا ضوه
بالمحشر العشاك من چفه تروه

يا جمال الله  ابحروفه
والعشك يرسم طيوفه

يارسول الله حبيبي ♡♡♡♡
*******************************
كل الرسل والنور  بشرت بسمه
هادينه هوه الخير لدنيا  رحمه
مثلك   فلا مخلوق غذانه علمه
مشغوله كل الحور بالجنه رسمه

كل نبي بسمك تودد
خاتم الادياني أحمد

يارسول الله حبيبي ♡♡♡♡
*******************************
هم مثله صار اليوم منتظره الأيام
غايبنه  هم  ايعود  ويحقق احلام
وارث صفاته انهار هم كافل ايتام
منقذها باچر صار ويزيح  الاوهام

ننتظر  ساعة  ظهوره
يابخت نشتم عطوره

يارسول الله حبيبي ♡♡♡♡
*******************************
تمت بعون الله تعالى الشاعر___يوسف_الفتلاوي

(( ابوذيات للرسول ص ))

فرحنه وبالعشك ورده.......ودينه
ورفعنه اشموع يالهادي.....ودينه
خسر كلمن يضد طه ......ودينه

مشرك بالرساله الاحمديه
***************************
تشب الروح وطفي .....من هواهم
وتنفسنه هوانه ...........من هواهم
بني طه يمن تسأل..........من هواهم

محبتهم فرض واجب عليه
*****************************
خبر هالليله بالبهجه..................وردنه
ونثرنه بمولده فرحة..................وردنه
عله الحوض احنه لونعطش.....وردنه

بچفوفك سيدي نشرب سويه
****************************
يوسف عباس الفتلاوي