قصائد حسينيه

قصائد حسينيه pinned «أسعد الله أوقاتكم بكل خير. شنوو القصائد يلي تحتاجون أنزلها راسلوني ع حسابي وبخدمتكم @Azhar_AS أي قصيده لأي شاعر معين أو خاصه لرادود..»

أسعد الله أوقاتكم بكل خير.
شنوو القصائد يلي تحتاجون أنزلها راسلوني ع حسابي وبخدمتكم
@Azhar_AS
أي قصيده لأي شاعر معين أو خاصه لرادود..

طفه البيت يمه من بعد نورج طفه البيت
نبت ريت. بسمارج وصط ضلعي نبت ريت

زينب يمه اني كلميني
بفراكج اموت وتعمه عيني
مااشم الهوه اشتمج تجيني
يكون تصير ادورلج سنيني

مااريدن ضوه بلبيت يمه اني اريدنج
مكسورت ضلع ويلا ميته ولا اشوفنج
كلش يمه حتاريت ما اكدر اشبكنج

...........................

بعد وين مثلج فاطم يلمنه بعد وين
تره العين خلتعمه عكب عينج تره العين

ياراحه التجي الامه راحت
هوه يموت بس دمعاته عاشت
على خده يعيش دمعه الامه ماتت
امي الدنيه كلها شلون طاحت


مو ليله صبحت يمه كسرت كلبي هليله
علي محدب ابوي عليج مو ذاكه علي حيله
متكدر ودمعه يسيل حيره شلون اتجيله
...................................

بده الهم. بعدج يم حسن بيه بده الهم
نزل دم من ضلوعج وشفته نزل دم

ياكلب ليهيد وياجرح يشفه
ليشوف امه بضلعه تنوجد خسفه
يضل مكسور كلبه وماكطع نزفه
يموت احسله لو ماتت تره العفه

وحشه الدنيه كلهه عليج جيلنج صدك رحمه
يم الحسن من اليوم ما اريد الهوه اشتمه
اضلم كل درب بجفاج بعيوني وصبح زحمه

...............................

طبك كون عليه الباب ياروحي طبك كون
ول عيون تغمض قبل لاشوفج ول عيون

يايمه الحنينه مو وكت موتج
بعد يلزهره ماسمع صدك صوتج
مثل عيوني انتي شلون اعوفج
روحي تروح بس المهم روحج

ما نكدر نعيش نموت موهينه تره العشره
اول مره اشوف حسين كض اصفاحه يلزهره
واكف والحسن محتار جمره بكلبه مو حسره

.......................................

علي طاح من ودعتي يلزهره. علي طاح
صفه نياح. بيتج يم حسن كله. صفه نياح

ما يحجي علي يمكن وكف كلبه
شاف لمحسن بدمه صدك صعبه
بفراكج علي تيهه تره دربه
اول مره يبجي والدمع صبه

رافكنه الهضم والنوح من شفنه لجفن غمض
مايكدر ابوي يكوم راح الحيل ما ينهض
مكسور الكلب والشيب بيين بلرمش ابيض
........................
وداد البخاتري

على لحن قحطان البديري

حب مجالسنه


.

عهدي لله ... ابغض اعداه .. والي وآلاه ... آنه وآليله
ــــــــــــ
كاتب عهد من الازل والباري وحده الشاهد
غير الوصي المرتضى ما ارضى واحد قائد
ابقى العن اليبغض علي وكلمن حسود وحاقد
دربين ماعندي ابد واسلك طريقي الواحد
عمري منذور ...المصدر النور .. ودنيتي اتنور ... لمّن ادعيله
ـــــــــــــ
اقره الزياره بكل فخر ما منهه اعبر كلمه
الاول وثاني اعرف المقصود ياهو وشسمه
العنهم شما مر نفس حبا بأصل العصمه
ربي اليحب المرتضى انزل عليه الرحمه
الهم انكون ... عابس وجون ... حامي ذا النون ... انضل نناديله
ــــــــــــــــــ
اصل العقيده الطاهره مو بس توالي الحيدر
لازم براءه من السقيفه الحد كَطيع المنحر
الكَلب ما يرهم ابد معروف بيه ومنكر
وهذا الدرب واضح الك كونك تريد اتخيّر
بس علي يفيد ... للذي يريد ..يرفع الايد ... للحمه ادخيله
ـــــــــــــــ
احسن عواقبنه فقط ياربنه بس بهايه
انحب علي وعتره علي مو بس تضل احجايه
نحييه من نبغض الزمره العذّبتنه هوايه
كسرة ضلع ام الحسن كَطعت نحر جم آيه
الهه تفسير .. العاقبه اتصير .. وباجر ايحير .. اليرضه بالميله
ــــــــــــــــــ
المايرضى يتبرا اضن راضي علدفعة بابهه
والما لعن اهل السقيفه يوصف امن احبابهه
جم شمس بالطف داميه ومتوسده عله اترابهه
ويلي بنات المصطفى دخان مالي اثيابهه
تنسبي شلون .. ويلي ام عون ... الماهو مدفون ... محد يشيله
ــــــــــــــــــ
الشاعر محمد حسن ضيغم

.

يمه محسن آنه امك دمعي احمر يجري لجلك
يبني سامحني يغالي ماكدرت بحظني احملك
امن اندفع بابي عليه .... چانت الدفعه قويه
بگلبي ضميتك ييمه وبابي بسماره وصلك

يا ضنوتي ويا لب الافاد
دون الاولاد ... مهدك ارماد

بس انه يمه بحملي احتار
ايسگطه بسمار ... بعتبت الدار

والقدر ماشاء اليه يالولد برباك اساهر
___
من طحت هميت اشيلك بابي بس طاحت عليه
عالارض مابيه اعوفك ولا اشيلك منها بيه
يبني حيلي اتبده يمك.... ودمي سال يناغي دمك
هيج صاير بيه وانه يبني بت سيد البريه

يوليدي چا ما حاسبه احساب
ايذبحك الباب... يغله الاحباب

من طحت مني الگلب طاح
وصوتت راح... محسني راح

طاح مني وليدي وآنه گلبي يم وليدي حاير
_
اتمنه جنت الـيُمه منك مره اسمعها بحياتي
امنياتي اشكد بسيطه ودهري موت امنياتي
صورة ايدك بيد اخوتك ....اعليها شو لاحگني موتك
ام أنه واهون عليه من ممات ابني مماتي

مو هينه ميلادك يمبخوت
ينگلب موت... وابجي بسكوت

ذابت مهجتي والگلب لاع
وهذا الوداع.... هدني عالگاع

ياهو مثلك يبني محسن موته وي ميلاده صاير
____
يالچنت منتظره جيتك اوگبلك بنيران اجولي
لحگت بس ابچي وانحب والك ما لحگت الولي
آنه وأخوانك يغالي .... چنه نحسبلك ليالي
تالي شفتك يبني ذابل وبين بوجهي ذبولي

وصارت دللولك يولاه
والمناغاه... تنگلب آه

لاشفته طولك تارس البيت
ولاني لوليت... ولاني ربيت

اتاملت باچر اللولي الموت ماتانه لباچر
___
چنت اگولن هسه يكبر وي حسن واحسين اخيه
تأخرت تالي امنياتي استعجلت ليك المنيه
يبني روح بهم دليلك.... وانه اوعدك راح اجيلك
ولو سوه ماعشنه يبني عالاقل متنه سويه

ما بادي عمرك وانتهى بيوم
هجمة الگوم ... آه يمضلوم

اعذرني يبني وللگبر روح
انسه الجروح... وخلني للنوح

خلني انوح عليك يبني قبل لا يمك اسافر


الشاعر منتظر الجنابي

يايمه شبساع... صار اخر اوداع
وسلمتي للآه

من عصرة الباب .... چا يمه ماطاب
ضلعچ يزهرا

من سألنه اعله كسرچ يالحنينه
شگد فرحنه الچ من گلتي زينه
آه ييمه .... آه ييمه
______
فتحي عينچ احنه ولدچ والگلب ذاب
يالغُمضتي عيونچ اتلوع گلبنه

يمه چا مو گلتي زينه والضلع طاب
بيها صلينه شُكر واحمدنه ربنه

ما گلتي ياذيچ وسولفتي وضعچ
خاطر نداريج ونشافي ضلعچ
كابرتي عالبيچ واخفيتي دمعچ
يايمه

يا ويلي والبين.... يتم امامين
ويتم عقيله

ومن حيرتچ صار ... والدنه محتار
مو ذاكه حيله

وابجرحنه تجمعنه وبچينه
شگد فرحنه الچ من گلتي زينه
آه ييمه.... آه ييمه
_______
هاي زينب يالزجيه يمج تنوح
وهاي كلثوم بدمعها تعيش هضمه

والحسن يم راسچ إيون صوته مبحوح
والحسين برجلچ ايقبل ييمه

يانار الالام حرگت عمرنه
لو عينچ تنام يبدي سهرنه
تخلينه ايتام بلوعة كسرنه
يايمه

عمرچ بعد فات .... وحلم العمر مات
ونبقه ليتمنه

وچا لو هجرتيه.... ما ينگعد بيه
بيت اليلمنه

چنه يمچ واديچ ملزمه أدينه
شگد فرحنه الچ من گلتي زينه
آه ييمه.... آه ييمه
______
بعد يا ليل الننامه من تنامين
ويا نهار ايهوون اعلينه الرزيه

كون كلنه نموت يمه من تموتين
وبگبر واحد يدفنونه سويه

مامر على البال يايمه فگدج
تعوفيهم اطفال معقوله ولدچ
ولو نعشچ انشال النه شيردچ
يايمه

ونعيش المصاب... كلما نصد باب
ونذكر عذابه

بيت الصبح غار... لطه النبي بنار
حرگوها بابه

شو نستنه منو أهل المدينه
شگد فرحنه الچ من گلتي زينه
آه ييمه.... آه ييمه
________
ليش ياليل الترافه نشيعچ بليل
وانتي كون بأكمله العالم يشيعچ

حيل ماكو وفرگتج تحتاج الف حيل
وياگلب ينطينه يايمه ونودعچ

ياگلب اليعوف شمة ترابچ
وبمهجتج خوف اعلينه بمصابج
كل خوفج نشوف شمسوي بابج
يايمه

عالمغتسل خاف... كسراته تنشاف
ضلعچ يزهره

ويايمه تدرين.... ساعتها ابو حسين
كسرچ يكسره

يباوع النه ودموعه بطرف عينه
شگد فرحنه الچ من گلتي زينه
آه ييمه.... آه ييمه
______
نطلع بنعشچ مثل ما تطلع الروح
خطوه خطوه اننازع بتشييع نعشچ

وانتي ميته وحظنچ تفتحينه ونروح
لحظنچ وبأترف محنه يرف رمشچ

نتوادع شلون يالزهره هضمه
واعلينه ميهون هالفرگه يمه
بالمكبره الكون ضيه شيضمه
يايمه

ها ياضوه الكون.... خل تعمه العيون
الما بيها رسمچ

صوتچ بعد راح .... ونبض الگلب صاح
چم مره بأسمچ

شكثر صحنه شعجب متجاوبينه
شگد فرحنه الچ من گلتي زينه
آه ييمه .... آه ييمه

منتظر الجنابي
اللهم عجل لوليك الفرج

يا سر دفنته وجاي؟ .... بهالكسره يا مولاي
علي ... علي ... علي

البير آنه وأسأل وين ؟ .... حيلك يبو الحسنين
علي ... علي ... علي
_______
جاي وخطوتك غريبه
امبينه بوجهك المصيبه
گلبك ينسمع نحيبه
وحزنك جبير

جيت بكل هظم عذابك
تراب المگبره بثيابك
شدافن ياعلي بترابك؟
وراجع كسير

للبير يابير الحزن شنهو اليجبرك؟
تعوف المدينه وتعتني و تحچيلي كسرك
ومن دون الاسرار بنعش مشيول سرك

يمبچي نجم اسهيل..... دافنمن بهالليل ؟
علي ... علي

چنك فگدت اسنين .... حيلك يبو الحسنين
علي علي علي
_______
جرحك تارس الملامح
وكل هم الخفيته واضح
تكابر بس ذكرها جارح
ام الحُسين

ياهو يخلي دمعك احمر؟
غير ام الحسن يحيدر
تكابر بس جرحها اكبر
من السنين

شخلاك تستسلم بچي لغربة مصابك
بلا ما تجاوب ياعلي واضح جوابك
امن ام بيتك ضلوع وگلب كاسرله بابك

اعليها شكثر مجروح .... حته بسكوتك نوح
علي علي علي

وراح إويه أُم احسين... حيلك يبو الحسنين
علي علي علي
_______
واسنين القبل عشتها
من الزهره شيعتها
لديرة ياحزن خذتها؟
عگب الامان

هدمت صبرك المواجع
وهجر الزهره تالي واقع
إبچي شما بقت مدامع
لأم الحنان

باقي وشنو اخلاف ام حسن ينفع بقائك
لا ارضك تلمك عگبها إولا سمائك
تناديها لكن ماترد فاطم ندائك

تريد بگبرها تنام... لكن وراك ايتام
علي علي علي

ايتام محتاجين..... حيلك يبو الحسنين
علي علي علي
_____
صوت العبره اخفه صوتك
وياهو اليفتهم سكوتك
موت الزهره يعني موتك
وعايش عجيب؟!

متغرب عگب غرامك
وانت الغربه مو مقامك
ما واحد يرد سلامك
آه يا غريب

شيصبرك إو شيعوّضك عگب ام ابيها
بالبيت تبقى اتذكرك حياطنه بيها
ومن تطلع تشوف الورد يسأل عليها

وعگب الحنان الراح.... بس بالاجل ترتاح
علي علي علي

ذابل يضل للبين.... حيلك يبو الحسنين
علي علي علي
_____
يامن غيرك جفاها
زين وما متت وراها
منك والزمن خذاها
بالانكسار

دمعك يشرح انكسارك
وحاير شفتك بقرارك
ترد لو ماترد لَ_دارك
ضاع القرار

ابيتك بعد شلك يمن بيتك تهدم
وجروح بابك ياعلي ما الها بلسم
بآلام كسرات الضلع گلبك تألم

تاليها يابو اتراب..... يخنگ هواك الباب
علي علي علي

وطاح ويه دمع العين.... حيلك يبو الحسنين
علي علي علي

منتظر الجنابي
اللهم عجل لوليك الفرج

اباب الساعه وكفت ساعة الباب
نكسر خاطرهه كالت ذوله الاحباب
مت عيني الخدر متعوب
الجان الناس عنده اتوب
اجوني الرمل واصل راس الاطياب
_____________________
باب الساعه وباب الزهره
يحجن قصة نار وسطره
بزينبكم هم نار اموجره - عد رجليهه

باب الساعه يسولف گوه
تتراواله اعيون الخوه
اهل النخوه بعازة نخوه - من اليحديهه
-
عد راس حسين يدگون
اطفال ونسوان يونون
بكل ضربة سوط يصيحون - ياحسين

__________________
باب الزهره يوصف الحاله
طاح اعليهه ومحد شاله
المحسن ماتت كل آماله - بعصرة بابي

طاحت كل اعثوگي اعليهه
وعثوكي اثكيلـه وتاذيهه
بسمار بصدري ويچويهه - هاي اسبابي
-

كالت كاتلي اوليدي
بزر الگعده ويوحيدي
محسن رايح من ايدي - اه يباب
_______________________
جا هم تدري حسين گبالي
وكل مايوگع راسه العالـي
زينب تركض هذا الغالـي -ياهو الچاسه

تلث ساعات اعيوني تباوع
راس حسين برمحه ينازع
ماصـح الهـم ناصـر فازع - يعدل راسه
-

انته اهون مني بهايه
محد حاچاك احچايه
زينب حاچتني اهوايه- وسفه هاي
________________________
انه ادري بزينب متعوبه
يخنكهه الليل وي غروبه
من ساعتهه واطلب توبه - يمهم ابجي

جا هم تدري معاتب ساده
حـيدر عاتـبني وي اولاده
انه الباب وبگت امراده - شنهي الاحجي
-

الگاطع بزرية الزهره
انه وناري الي موجره
ياهو المحروگ يفسره -حجيه ماي
_________________________
رمل حسين امغطي اعيونه
راسـه لـ جمّـال يقدمـونـه
راس وميت لتضـربونـه - زينب صاحت

زينب كالت شفت بعيني
يضربون براسك يحسيني
تكله امروتك بس حاجيني - گعده وطاحت
-

اسكت وانهيلي القصه
ورجع للزهره بفرصه
هنياله الصاد بشصه - من الحسين
________________________
#تمت
#عباس_القلعاوي
#اللحن👇🏻

قصيدة وعظ. (ميمر)

أحذر لسانك يفلان. لوردت. تنطق چلمه
★★★★★
ينصان قدرك من تصون لسانك
وميزان هوه اتحَكَّم ابميزانك
الچلمه الجميله دوم ترفع شانك
ناتج لسانك حالين. لونقمة الك لورحمه
★★★★★
لاتذنب وبعدين تطلب شافع
لسانك الخافظ بالحياة ورافع
متبوع الك لتصير انته التابع
للخير كون ايوديك. موللزلل والظلمه
★★★★★
احفظ لسانك لوتريد الهيبه
عامل الوادم بالعدل والطيبه
وابتعد يبن الناس عن الغيبه
هيه التزيل المعروف. وهيه التزيل النعمه
★★★★★
نهج الغلط للدوم شر وبلوه
ماي البحر من مايه ياهو اليروه
تدريها دنيا رايحه وماتسوه
تروح بخجل للرحمن. اعلم يصاحب زحمه
★★★★★
جرح اللسان يطيب لو يتجَرَّح
بس لوجرح جرحه غميچ ويذبح
شمحله كلام الخير من بيه تنصح
ولمن تسامحها الناس. وتبريها كون الذمه

الشاعر حسن لعيبي الحريشاوي

( بين محسن والكمر ) الشاعر ذوالفقار جلعاوي

من طاح محسن بالباب يحترك طوله بنار
و عطشان باجر عالماي يوكع الراس الحار
وانه مكسورت ظهر بين محسن و الكمر زينب آنه
..............
حلات العدها خوان تصيح منين ما جان
مطر بال (ها) يطيحون عليها من أربع أركان

جا هيه الاخت بالدنيه هيبتها
من تمشي بدرب راسمته أخوتها
كون وعدها محسن ويه عباس
ما مر الهوه بطارف عبايتها

لتصيح ماعدها أخوان بس صده يرد الصوت
وتميل عالوجه أطيح بحسره عالخوه تموت
وميته بليالي السهر بين محسن و الكمر زينب آنه
..............
عله أمي حركو الدار تجوت كل كتر نار
البقت تحترك وتموت الطلعت شمرو أحجار

بدخان العماها اليجوي مختنكه
أمتيها اعله الجمر من تركض تسحكه
أديها ويه الوجه حركتهن الباب
تطفي منين كل الزهره محتركه

وعالناس واحد يصيح رايد الزهره تراب
النبي لو خلفه يلوذ و أن حركوها الباب
منها ومضيعه الاثر بين محسن و الكمر زينب آنه
..............
باب وثكله بجذوع بصدر الزهره مدفوع
وظهرها بحايط حجار من العصره مطبوع

بسمار بصدرها أنعوج بضلعه
ويعت بالضلع لو رادت اطلعه
واليرفسها بابي بالجدم حيل
ضلعها يشلعه مدري المحسن يشلعه

والجان يرفس الباب بمتنه حيل و جدمين
و بسمار للمحسن فات ذبح نحره بضلعين
وكلبي بخواني انعصر بين محسن و الكمر زينب آنه
..............
صدرها أباب محصور انشلع فوكاها مشمور
وجهها تصفعه جفين وقرط الزهره منثور

باب من الجذع ويطيح عالزهره
وفوكاها اليطيحه يصعد إيعبره
وخصرها بغمد سيفه يطعنه محفور
ومحسن قطعه قطعه وكع عالجمره

ويطيح فوك الجمرات قطع جسمه محروك
ويموت محسن والباب بيها صدره مسحوك
باب يهضمني ونهر بين محسن و الكمر زينب آنه
..............
بالطف عازته هواي كون المحسن وياي
يلزم ضهر الحسين من ينكسر عالماي

ويه حسين يركض عالوجه يعثر
ويلم لأبو فاضل صدره المطشر
ولصدره يرجعه كلب عباس
فوك ضلوعه صار من السحك والجر

ويشوف اكباله حسين يعثر ابين الناس
ويصيح عالعلويات مات أخوي العباس
كابي بالخوه أنكسر بين محسن و الكمر زينب آنه
..............
..............

( مو متفقين ) الشاعر ذوالفقار جلعاوي

مو متفقين سوه نتكاسمها الشهكه
مو متفقين ما نحجي بطاري الفركه
................
مو دار احسن جن كبر من كل ركن ضك بيه
وحيطانه تصرخ بالوجه راحت علي العلويه
لا مو علي شاب الكبل خلص أشويه أشويه
بالحايط اوكف منتجي ويتراجفن رجليه

مو متفقين خبر فراكج ما صدكه
مو متفقين ما نحجي بطاري الفركه
................
آنه ادري بالجدم إيعثر جا والنظر هم يعثر
ما يمشي للباب الجدم وعيني تصد ما تكدر
أجبير وثكيل او من جذع ويصبغه طولج أحمر
لو شفته كون اوكف عدل وجيبيلي حيل أتخوصر

مو متفقين دم من طولج ليش الكه
مو متفقين ما نحجي بطاري الفركه
................
عالباب اثر رفست جدم صدرج ذكرت تعصره
وبحايط حجار الظهر بابي يزهره تحصره
وبسماره يدفع للمتن ضلعج ويرجع جره
ومن ينعوج جوه الضلع تعتعت يطلعه يكسره

مو متفقين ابابي ضلوعج متعلكه
مو متفقين ما نحجي بطاري الفركه
................
من طحتي واحد عالصدر يرفسج هواج إيكطعه
وبسوطه يسطر وجنتج الخد لو قرط ليشلعه
والخصرج إيطعنه بكعب سيفه وينبته إيطلعه
محسن وكع بس أشوكع يالزهره قطعه وقطعه

مو متفقين شو رفسه توكعه بحركه
مو متفقين ما نحجي بطاري الفركه
................
أكبالج يجروني بحبل بعمامه وجهي ألثمته
تلحكيني طحتي اعله الوجه وقنفذ رجعلج شفته
سوطه اعله متنج كطعه وبجفوفج أمشاكفته
وجاري صرخ وينه علي من الضرب ماتت مرته

مو متفقين علي ميت كبلج خلكه
         مو متفقين         ما نحجي بطاري الفركه
................
جان اليدك جوه الضلع الما أدري شيسمونه
اكبالي الشماته من الضحك وذاك الحجي يسكتونه
كسرو ضلع مرته وسكت هذا علي تشوفونه
بعمامته أملثم علي دافن علي تعرفونه

مو متفقين الشامت بالسكته نخنكه
         مو متفقين         ما نحجي بطاري الفركه
................
................

نزلة عزاء

للطم حزمينا. يافاطمه
بالعزه بچينا. يافاطمة
==========
يم الحسن هاي المجالس نعمه
خلصنه من خدمه وبدينه بخدمه
منج نريد المدد ها والهمه
واليثبت بمجلس عزائج زلمه

بهالدرب ثبتينا. يافاطمة
بالعزه بچينا. يافاطمة
==========
توفقينه يالزهره بحياته الخادم
ممنون الج يتشكرج يافاطم
رادود يقره ويبجي ظل اللاطم
كسر الظلع گلب الخدم ظل لاجم

نبچي الج تدرينا. يافاطمه
بالعزه بچينا. يافاطمه
==========
ماينشبع يالزهره من هاي المجالس
ربتنا احسن تربيه وننافس
هاي المآتم يم حسن مدارس
وتخرجت من عدها آلاف العوابس

باجر اتجازينا. يافاطمه
بالعزه بچينا. يافاطمه
==========
تحسدنا املاك السمه بخدمتج
يارحمة الله الواسعة رحمتج
كسرتنا يافاطم تره كسرتج
نجري الدمع صبح ومسه لدمعتج

بكل عزه تلكينا. يافاطمه
بالعزه بچينا. يافاطمه
==========
هالدنيا من نورج خذت ضواها
لوماوجودج يختنك هواها
بارينا لجلج هالسمه براها
لجلج تره هاي الأرض دحاها

بها درب خلينا. يافاطمه
بالعزه بچينا. يافاطمه
=========
بيوم القيامه نفتخر بالبشره
سيدنا حيدر سيدتنا الزهره
للجنه نمشي ونلتقي بالعتره
ومجلس نقيملهم عزاء ونقره

بالحشر جمعينا. يافاطمه
بالعزه بچينا. يافاطمه
==========
تمت ولله الحمد المقصر مع الحسين
✍ علي النائلي

#ادخل_خدامه

~~~~~~~~
1

ماطبيتي بصيـغت ام گلتي ادخــل خـدامه
بلكت ترتاح الــزهراء منخـدم علي ويـتامه
كلبج مايــل لحسين وتـبجين لـمن يــطلع
دومج تشربينه الماي وما شــاربه جـدامـه

تـصديله ليش وتبجين
لو صاحلج يمه حسين
عينج يم نــحره اطـيح
والمدمع جلمات العين

~~

2

كلشي العندچ صار حسين وماقصرتي ويخوانه
خــليتهم كـحله بــــعين دوم عـيونـچ حزنانه
تمنيتي سمه تـــجرعين والـحسن عايش يبقى
عيونه الحسن ليچ تگول يوم العطش مـبچانه

هـــل يمكم انه ومـسوم
مـــاله شــبه ذاك الـيوم
من يبـــقى حاير لحسين
ضامي ومحتـار ومهضوم
عين

~~
3

سديتي الباب الكاسرهم ما ناسيـنه بـس اهون
كامو يرتاحون بشوفج صـرتي الكسرتهم مئمن
بين ليل وزينب صرتي تـهودين دمــوع الـفرگه
علمها من تسولفلچ جانت دموعج غيره يصبن

من الباب وذيج الـحاله
زنيب باچــر ويا عــياله
تطلع مسبيه بلا محمل
مهضومه ترافـٰـك جتاله
العين


~~


4

مرت اعــوام تـخدميهم ماقـصرتي رمش عين
واربــع اولادچ علمتي مدنگين بمحضر لحسين
طلعو من الـبيت برحله رشيتي عـــيونج علباب
تمشي النوك وتطلع روحج وبدمعاتـچ تتعثرين

كل طيور الـــــدنيا تعرفچ
يمج تگــعد تــسمع ونـچ
وضلت يمچ طفله صغيره
يرجع يمـــتى حسين تگلچ


~~

5

تتنطرين وگلبج خايف وحذلم ابنه يصيح بصوت
التنضريهم عينچ ردو وماعايفــــلچ زلمه الموت
والعطشانه عيونج شوفه ميت عطشان ومسلوب
چنه دموعج شابع غربه وبالــغربه يشـح التابوت

مــيت مــذبوح وعطشان
يهونن بس تصعب عريان
مرمي تسحگه الخيل ردود
وضل بالحـــومه بلا دفان

~~

6

عاشت بيج الچمه مبينه طير وبايگ عشه الخوف
ما تنهاله النومـه بجنه لو ما خله بعينه يشـــوف
عاشت بيج امنيه وماتت بگـبرچ لينزلــچ لـحسين
متي وعينچ رطبت مدمع ومنيتــچ ذبـحتها سيوف


علـــمتي الناس عله الحب
الـــراد حسين بسمچ طب
يل صـرتي حـزام الــخدام
وكل دمعه عله غربه تصب

~

دخيل مولاتي ام البنين ﷺ
تمت بفضل اباالفضل وامهُ ﷺ
عبد فاطمه
مرتضى الفرطوسي

موشح (ندبة للامام الحجة عليه السلام)

كوم يا بن فاطمة ورد ثارها
واصلب المتعدي عتبة دارها
العصر فاطم والهضم كرارها
الزوم يجازى ويرد حق فاطم
.
الزوم عالشجره تصلبه ايمينك
وتسعد الزهراء وتگر عينك
ومن جديد تكوم تحييه دينك
وعالشريعة تصير وحدك قائم
.
الماهوْ صديق اولا يملك يقين
الاول الما عنده غيره ولا له دين
الامر يجتف امير المؤمنين
جَتفه عالشجره اويه ذاك الظالم
.
كوم دين اهلك يريدك يا شهم
يبن المركض الرجال ابلا هدم
اشتهى ذو الفقار جف بيه ينلزم
وما لكه غيرك يهيبة هاشم
.
يبن المخلي بگلبهم خوفة
يا شبيهه الورث حيل اجفوفه
انهض ورد الحكم بالكوفة
ما يصح غيرك عليها حاكم
.
وبعد عندك ثار تانيته شكثر
الثار هذا مخلي دمعاتك حمر
حسين ضلته لوحده بذاك الضهر
ودايره جيش العدى متزاحم
.
جم ضَهر لازم بجفك ينكسر
وجم نحر لازم بسيفك ينحر
هذا جرحك ما يطيب وينجبر
الا لون الدم يلون الصارم
.
وبعد عندك ثار ياكل بالگلب
ثار المغربات بديار الغرب
الهاشميات الغفن فوك الترب
مشن وي المن اخوهن غانم
.
كوم رد صولات قتال العرب
وخلي دم الشام يوصل للركب
للخرابة ضعن ابو السجاد طب
وطبته وي هيبته ما متوالم

اللهم عجل لوليك الفرج

الشاعر عبد الله الفريجي

نزال......... فاطمي
_____________

فاطميه هالمجالس فاطميه

●●●●●●●●●●●●●●●●●●●●
خل يلوموني بعشك هاي الشعيره
اني عندي حيدره وماعندي  غيره
واليحب حيدر علي طاهر سريره
فاطمه اتوفقه وعلي حدد مصيره

رافضيه جعفريه رافضيه
●●●●●●●●●●●●●●●●●●●●●●
انه من عشك المجالس ماخذ اعفاء
ميه  ماخذ بالطم بس شوف الانباء
حتى عرش الله بلطمنه  ناده زهراء
عدنه كل ديرة حزن عمت بالارجاء

واقعيه وبعهدنه واقعيه
●●●●●●●●●●●●●●●●●●●●●●
فاطمه  امنه اصبحت  تحيي الضماير
بالطم   صرخه   وعلت  تدوي المنابر
اتلث  روايات  الظلع  تحجي الشعاير
شماخمد صوت الحزن تعلى الحناجر

وضحتهه صرختي يالناصبيه
●●●●●●●●●●●●●●●●●●●●●●
روحي  مشغوله  وتحب لطم المجالس
اعفاء بالخدمه اصبحت خلاني عابس
اتعطرت  انفاسي   وحدي  بلا منافس
اتخرجت   بالخدمه  وبشوك النوارس

جاذبيه بالمجالس جاذبيه
●●●●●●●●●●●●●●●●●●●●●●
تمت بعون الله تعالى
خادمكم..... يوسف الفتلاوي

نزلة عزاء

للطم حزمينا. يافاطمه
بالعزه بچينا. يافاطمة
==========
يم الحسن هاي المجالس نعمه
خلصنه من خدمه وبدينه بخدمه
منج نريد المدد ها والهمه
واليثبت بمجلس عزائج زلمه

بهالدرب ثبتينا. يافاطمة
بالعزه بچينا. يافاطمة
==========
توفقينه يالزهره بحياته الخادم
ممنون الج يتشكرج يافاطم
رادود يقره ويبجي ظل اللاطم
كسر الظلع گلب الخدم ظل لاجم

نبچي الج تدرينا. يافاطمه
بالعزه بچينا. يافاطمه
==========
ماينشبع يالزهره من هاي المجالس
ربتنا احسن تربيه وننافس
هاي المآتم يم حسن مدارس
وتخرجت من عدها آلاف العوابس

باجر اتجازينا. يافاطمه
بالعزه بچينا. يافاطمه
==========
تحسدنا املاك السمه بخدمتج
يارحمة الله الواسعة رحمتج
كسرتنا يافاطم تره كسرتج
نجري الدمع صبح ومسه لدمعتج

بكل عزه تلكينا. يافاطمه
بالعزه بچينا. يافاطمه
==========
هالدنيا من نورج خذت ضواها
لوماوجودج يختنك هواها
بارينا لجلج هالسمه براها
لجلج تره هاي الأرض دحاها

بها درب خلينا. يافاطمه
بالعزه بچينا. يافاطمه
=========
بيوم القيامه نفتخر بالبشره
سيدنا حيدر سيدتنا الزهره
للجنه نمشي ونلتقي بالعتره
ومجلس نقيملهم عزاء ونقره

بالحشر جمعينا. يافاطمه
بالعزه بچينا. يافاطمه
==========
تمت ولله الحمد المقصر مع الحسين
✍ علي النائلي

والله صعبه عليه صدكَ هاي المصيبه
الحبيب الّي يصد ميّت حبيبه
من عكَبها فاطمه الدنيه غريبه
ــــــــــــــ
يا زماني .. العذّباني ...كَلبي مكسور وجرح دام بحياتي
انه حيدر .. شلون اكَدر .. ابقى اعيش وفاركَتني امنياتي
ظلمه دنياي وصفت عكَب الزجيه
اذكر الزهره واضل افرك بديه
رحتي عني ومابعد يالزهره جيه
شلون اهيد وخالي داري بلايه نورج
شلون ما كل ليله اجي الكَبرج وازورج
تعوّدت يم الكَبر اقره مصيبه
من عكَبها فاطمه الدنيه غريبه
ــــــــــــــ
فاركَتني  ... وعذّبتني .. العاشت وياي العمر طيبه وحنينه
شلون اهجع ... وآنه اسمع .. لسه صوت امن الالم تبجي وحزينه
دوم تتراوالي صوره بعتبه الباب
طايحه الزهره وتنادي ضلعي انعاب
ويّه غيبتهه احسّن هالعمر غاب
يامصاب الزهره والله ما نسيته
الفاكَد بياحله يدخل هذا بيته
محنة الزهره صفت صعبه ورهيبه
من عكَبها فاطمه الدنيه غريبه
ــــــــــــــ
ها يروحي ... وكل جروحي .. تنزف شما مر علي واسمع اسمهه
ذكرياتي .. وامنياتي ... شلون انساهه و وسط عيني رسمهه
الماعرفت ال لا منهه بعمري كلّه
فراكَهه والله صعب وشلون احمله
قبله اليّه صارت وصرتلهه قبله
هي بس هي الشفتهه عيون اليّه
وهي بس هي الهوه اليدخل الريّه
جرحي لو ينزف فقط هي طبيبه
من عكَبها فاطمه الدنيه غريبه
ــــــــــــــ
رحمة الله ... ونعمة الله ... شلون ماتت والدمع يجري علخدهه
اكَبالي تبجي ... والي تشجي ... ونار من هل فاجعه تدي ابوجدهه
فاركَتني الجانت السلوه بحياتي
وياهه جانت امنيه يحصل مماتي
ويلي على جانت تسمّيني اغاتي
ربي ما خالق مثلهه ولا شبهه
ولا اكو بالدنيه كَلب بكد كَلبهه
حيدر عليهه يحكَ زايد نحيبه
من عكَبها فاطمه الدنيه غريبه
ــــــــــــــ
شلون راحت ... شلون صاحت ... اه من ضلعي الذي يلجم دليلي
عين حمره ... واثر سطره .. ومن ونين الزهره لا ما نمت ليلي
خدهه اسود والاصابع بانت عليه
وسكَط محسن منهه وبحسره تناديه
جفهه فوكَ ضلوعهه التنزف تخليه
النفس جان يعذب الزهره ويسلهه
تبجي مرّه امن الضلع مرّه الطفلهه
موتتي صرت آنه احس صارت قريبه
من عكَبها فاطمه الدنيه غريبه
ــــــــــــــ
الشاعر محمد حسن ضيغم

خيط الفجر

خيط الفجر .. لمن يطر
ماشوفن اعيونچ

بس الدمع .. فوگ الدمع
يالزهرة من دونچ
ــــــــــــــــــــــــــــ

وجه الفجر من يجبل شلون بهاي
مثل النـهـر لـمـن يظـل ابـلا مـاي
بهذا الوكت ياهو اللي يگعد وياي
بس الدمع واسني من هاي وهاي


ذكرة والـم .. چنهن سـهـم
يالزهرة بغيابچ

الزينب شفت .. بسمچ صحت
من لبست احچابچ
ــــــــــــــــــــــــــــــ

ياقطعة من گلب الرسول الاعظم
امسـويلـچ بروحـي عـزاء ومـأتم
اجروح المصاب اعليه بعدچ تلتم
والـمـوت يالـزهرة بغيـابـچ ارحم

وجه الصبح .. لوعة وجرح
راح اليداويني

وين الصـبر .. نار وجـمـر
والفرگه تچويني
ــــــــــــــــــــــــــ

يارحمة الله وبالگبر تندفنين
رحتي وبعد هيهات لا مترجعين
باللـيـل يالـزهرة اذا فـز حـسين
گولي اشجاوب لو سئل عنچ وين

امـك وسـف .. دمـهـا نـزف
وبالضلع مصيوبة

عافت علي .. يجاوب علي
والدمعة مكتوبة
ـــــــــــــــــــــــــ

العصروها بين الحايط وبين الباب
ترسو البيت اهموم ترسوه اغياب
بت الرسول شلون ضلعچ ينصاب
اعتب عليـمـن بـعـد ميفيد اعتاب

خان الزمن .. بــ أم الحسن
وبالغربة خلاني

صاح الگلب .. وين المحب
ماادري شمتاني
ـــــــــــــــــــــــــ

ليل اليمر يالزهرة مو بالحسبان
واخلاف عينچ عمري كان وماكان
صوتچ بعـد ماسمـعـة يقره القرأن
بالـبـاب والبسـمار اصـد للأحــزان

بيت الحزن .. يبچي ويـون
لا لا تعوفينة
ليش الجفه .. وانتي الوفه
يلي هجرتينه
ـــــــــــــــــــــــ

والبيت يالزهرة بعد ماينراد
ليش النحبهم صارو اعلينه ابعاد ؟
راح الزمان وللاسـف ماينـعاد
ويم الگبر صار الوعد والميعاد

وسط اللحد .. لامايــرد
ومانعرف اخباره

طال السفر .. لينه اعتذر
مايرجع الداره
ـــــــــــــــــــــــ

وكت الصلاه يالزهرة محرابچ صاح
وين الزچـيـة اللـيـله شـو مـامـرتاح
جاوبني ياحـيـدر علي سـورك طاح
شيسوه العمر وايامه لو خلك راح

ماظل امل .. غالي ورحل
ياوحشة ايامي

مثل الفجر .. ابقى انتظر
والگاه جدامي


الشاعر فاروق الغنامي

تشيع الزهراء ع

اويلاه يفاطمة
اويلاه يفاطمة
ــــــــــــــــــــــ

ناده علي ودمعة يصب .. اويلاه يفاطمة
سافرتـي وبعـيد الدرب.. اويلاه يفاطمة
مجروح يالزهرة الگلب..  اويلاه يفاطمة

وعيوني صاباها العمه .. اويلاه يفاطمة
ــــــــــــــــــــــــــــــــــــــــــــــــــــــــــ

شيعها بالليل ويون .. اويلاه يفاطمة
مصعبها ساعات الدفن .. اويلاه يفاطمة
يادنيا صرتيلي سجن .. اويلاه يفاطمة

وبعد الزچية مظلمة.. اويلاه يفاطمة
ـــــــــــــــــــــــــــــــــــــــــــــــــــــــــ

روحك عفتها ياعلي .. اويلاه يفاطمة
ورديت وحدك منثني .. اويلاه يفاطمة
بهذا العزاء الفاطمي .. اويلاه يفاطمة

يانار بيه ضارمة .. اويلاه يفاطمة
ــــــــــــــــــــــــــــــــــــــــــــــــــ

يالزهرة ماريد العمر .. اويلاه يفاطمة
وماريد اصبح عالهجر .. اويلاه يفاطمة
بضلوعي ياريت الكسر .. اويلاه يفاطمة

وانتي التمسحين الدمه ..اويلاه يفاطمة
ـــــــــــــــــــــــــــــــــــــــــــــــــــــــــــ

يابيت موحش ياوسف .. اويلاه يفاطمة
عالباب حزنك هل وگف .. اويلاه يفاطمة
وياي دهري مانصف .. اويلاه يفاطمة

وروحي اعلى همها معلمه ..اويلاه يفاطمة
ــــــــــــــــــــــــــــــــــــــــــــــــــــــــــ

كل يوم من بعدچ سنة .. اويلاه يفاطمة
من صابچ الطاغي شجنى ..اويلاه يفاطمة
صاباني من صاب الظنة .. اويلاه يفاطمة

والمحسن بسهم نرمه .. اويلاه يفاطمة
ـــــــــــــــــــــــــــــــــــــــــــــــــــــــــــ

والشيعة بسمچ تنتفض .. اويلاه يفاطمة
لاسمة تلمها لا ارض .. اويلاه يفاطمة
بت النبي وحبچ فرض .. اويلاه يفاطمة

وانتي الفخر والمرحمة .. اويلاه يفاطمة


الشاعر فاروق الغنامي

يمه يايمه

يـمـه يايـمـه .. احـبيبـة يايـمـه
فدوة لاتمشين .. ياأم حسن وحسين
الزهرة يايمه .. الزهرة يايمه
ــــــــــــــــــــــــــــــــــــــــــ

عفـتي زينب ياوسف
ودمعي موج ومانشف
ضلعي وي ضلعچ نزف .. ومفارگه الروح

يازمانـي استعجلت
وانا من عدها اشفت
يـمـه يايـمـه صحت .. وتنادي الجروح

وين راحت ام ابوها الچانت العيني ضوه
ريتي بس احزان بيها ومختنگ بيها الهوه
يمه الله اوياچ اصيح وبــعد مانگعــد سوه
وهذا اخوي حسين يبچي ودمعة لخدوده چوه

بوحشه عفتينة .. واحنه تدرينه
بيچ متعلقين .. ياام حسن وحسين
الزهرة يايمه .. الزهرة يايمه
ــــــــــــــــــــــــــــــــــــــــــ

على هونك يانعش
طيـبة مابيها دغش
طولي سجادة انفرش .. يم الزچية

صارت الفرگة صدگ
وبالـعـظـم بعدچ تدگ
زينـب  وابقى احـترگ .. والبية بية



يـمـه ميـتات السـوالف كلها بعدچ رايحة
ادموعي من تنزل تعاتب بالعيون الشابحة
بطوري اقـرالچ قصـيده واختتم بالفاتحة
ياهو الي بعدچ ييمه وانتي خيمه وطايحة

فدوة حاچيني .. ياضوه سنيني
عني تبتعدين .. ياام حسن وحسين
الزهرة يايمه .. الزهرة يايمه
ــــــــــــــــــــــــــــــــــــــــــ

صاحت بصوت الحزن
وچن حچت گبل الدفن
بـعـدي زيـنـب تمــتحـن .. وتشوف الاهات

نفسه لضلوعي الكسر
يصيب متنچ والظهر
بعـيـد مو يمـهـا الگمر .. بس اليتيمات

تركض وحتى بركضها يفيض من عدها الخجل
زينب ابوادي الطـفوف ابلايا والي ولا اهل
ساعه صوب حسين تگصد ساعه تگصد للبطل
وانا مامـوجوده يمـها وينگطـع بيها الامل

وتنظلم بعدي .. والهجر يبدي
والعدا صوبين .. ياام حسن وحسين
الزهرة يايمه .. الزهرة يايمه
ـــــــــــــــــــــــــــــــــــــــــ

وحشه يابيت الوحي
يمه عگبچ ياهو الي
عـيـني بالدم تنـملـي .. وسهام الدموع

لاهو يوم ولاشهر
هاي فرگه للدهر
صدري وياچ انعصر .. ماظلت اضلوع

الوسعة هل ضاگت عليه وضاگت اعليه السمة
ياهو بالدنيا يشبهچ حره واسمچ فاطمة
استعجل اعليه محرم شفت بالباب الدمه
صوره والواقع سبقها وذكره ظلت مؤلمة

يابعد عمري .. مانفع صبري
شيعت روحين .. ياام حسن وحسين
الزهرة يايمه .. الزهرة يايمه
ـــــــــــــــــــــــــــــــــــــــــ

اه  ياام الحـسن
الغربه مو مثل الوطن
بالــحـنان اتــوادعـــن .. ام اويه بتها

واليسافر مايرد
يموت بأحساسه الورد
طـفــلة وامـهـا تـبتـعـد .. ما حسبتها

يمه بعيون الغريبة نار من كثر الدمع
تنوح عالمحسن اخوها لو تنوح اعلى الضلع
يصير هيچي يازماني بت محمد وانفجع
گلب البنية اعلى امها ويختلف بيها الطبع

والمشت عني .. هالعزيزة امي
ادري متردين .. ياام حسن وحسين
الزهرة يايمه .. الزهرة يايمه
ـــــــــــــــــــــــــــــــــــــــــ

غايب اعليه الفرح
وكلشي يايمه اتضح
گلبـي عن صدره نـزح .. واذاني وني

اتيتمت من الزغر
اه مــنــك ياگـبر
تدفن الام الصبر .. تبعدها عني

امكدره اخلافچ حياتي وبالعبايه اشبگ وشم
مااشوفچ يمه ادري ومات  بعيوني الحلم
طفله زينب يالزچيه وياهو لجروحي يلم
لاذت الروح بحجابچ يمه هم عندچ علم

يكتل اغيابچ .. ويجرح امصابچ
صعبة من تجفين .. ياام حسن وحسين
الزهرة يايمه .. الزهرة يايمه


الشاعر فاروق الغنامي