Dar agajy
Köňlüm garaňkydyr, töwerek tütün,
Ýalňyz başym üzre şuwlaýar şemal.
Gözlerimi gemrer haýsydyr bir tün,
Sen kimsiň, näme sen, sen kimiň pajy?
Aklymy myjaýar ýalaňaç sowal,
Essalawmaleýkim, eý dar agajy.
Türkiler, aýdyň siz, bizde näme bar?
Bizde bar tabynlyk, gulluk, azarlar.
Bizde bar ellerden giden ygtyýar,
Ýigrenji kimseleň talaň-tarajy.
Haýkyryşyp ýatyr beýik mazarlar –
Essalawmaleýkim, eý dar agajy.
Türkiler, aýdyň siz, bizde näme ýok?
Bizde ýok bitewlik, bizde ýok birlik,
Aýak astyndadyr ynsany hukuk,
Bu türki alemiň şanly magrajy.
Aýak astyndadyr emin-erkinlik,
Essalawmaleýkim, eý dar agajy.
Ýowuzlar güýçlerin toplap şaýlanar,
Içi doly gazap, gollarynda tyg,
Zamanlar aýlanar, asman aýlanar,
Ene Türkistandyr türkleriň täji,
Aýdyň siz, biz niçik ýaşaly artyk,
Essalawmaleýkim, eý dar agajy.
Nan sorap gelene janyňy berdiň,
Sende çydamlylyk, takat hem sende,
Gan sorap gelene şanyňy berdiň,
Ýurduňy berdiň sen sen ganhor hyrajy,
Öldürseň, özüňi öldürdiň diňe,
Essalawmaleýkim, eý dar agajy.
Isle ahyň bilen älemi doldur,
Diňlemez Allahyň nalalaryňy.
Ah ur, ataňy at, eneňi öldür,
Eý gara dünýäniň gara mätäji,
Bogazla täleýsiz balalaryňy,
Essalawmaleýkim, eý dar agajy.
***
Şemal, saçymy darama,
Agarsa agarsyn azapdan.
Kysmat, haýran bolup garama,
Aýyrmadyň ahyr gahar-gazapdan.
Gitmeli men indi. Daň atar,
Elwida, eý Turan diýary.
Gitmeli men ahyr, byradar,
Dünýe galar, dünýe gubary...
Geljekde görner baharlar,
Bu – Türki Dünýäniň Bahary,
Pyçaklar bogazma ýetende.
Galdyrap dökmerin ýaşymy,
Hiç närse ýok meniň egnimde,
Men saňa bagş etdim başymy.
Rauf Parfi
Terjime: O. Myradow