ЎзМУ яна бир дунё рейтингидан ўрин эгаллади
Times Higher Education (THE) халқаро олий таълим таҳлилий агентлиги бугун, 2025 йил учун дунёнинг энг яхши университетлари рейтинги – THE World University Rankings-2025 натижаларини эълон қилди.
Қувонарлиси, Ўзбекистон Миллий университети мазкур рейтингда 1001-1200 ўринларни қайд этиб, дунёнинг энг кучли университетлари қаторидан жой олди.
ЎзМУ “халқаро нигоҳ” (International Outlook) кўрсаткичи бўйича 58,20 балл (663-ўрин) билан дунёдаги ўртача кўрсаткичдан юқори баҳоланиб, Ўзбекистон олий ўқув юртлари орасида биринчи ўринни қайд этди.
Ушбу кўрсаткич университетдаги хорижий профессор-ўқитувчиларнинг улуши бўйича 98,5/100, хорижда таълим бўйича 79,7/100, халқаро ҳаммуаллифлик бўйича 47/100, хорижий талабалар улуши бўйича 29/100 балларда баҳоланди.
Times Higher Education томонидан 2004 йилдан буён эълон қилиб келинадиган ушбу рейтинг дунёнинг энг яхши университетларини сифатли таълим, илмий тадқиқотлар ва халқаро ҳамкорлик бўйича баҳолайди. Бугунга қадар ЎзМУ ушбу рейтинг агентлигининг THE Impact рейтингида 16 та барқарор ривожланиш мақсадлари бўйича 2024 йилда 601-ўринни қайд этган.
Шунингдек, ЎзМУ QS World University Rankings-2025 дунёнинг энг нуфузли университетлари рейтингида 781-790-ўринларни эгаллаб, жаҳонда ТОП-1000 университетлар сафидан жой олди.
Бу ютуқ университетнинг глобал миқёсда илмий ва академик изланишлар орқали нуфузини оширганидан далолат беради.
🕊Telegram | 📱Facebook | 📱Instagram