خواطر د/حازم عبدالتواب

الأب والأم هم اكتر ناس يتعبوا عشانك وفي هدوء ومن غير طلبات ومن غير مقابل ومن غير انتظار لأي رد غير نجاحك وتفوقك وراحتك.
بلاش تخبّي عليهم
بلاش تكذب عليهم
بلاش تتنمّر عليهم
بلاش تخذلهم
بلاش تنسى ان رضاهم عليك جزء من بركة حياتك كلها لو مكانش كل بركة حياتك
انت مديون ليهم أوي وكده كده مش هتعرف ترد الدين فبلاش تزوّده بالنكران
#خواطر_قد_تصل

لمّا تيجي تعمل خير اعمله وما تفكرش بعده في استحقاق اللي قدامك
دا مدخل للشيطان يضيع اجرك بالندم

#خواطر_قد_تصل

غلطان لو افتكرت ان ربنا ممكن يجيبلك حقك في الدنيا بالسرعة اللي انت بتتمنّاها
غلطان لأنك مش هتبقى فاهم معنى ميقات ربنا للأحكام والقضاء بين الناس.
موقفين في حياتي لاتنين من البشر
حد من زمايل دفعتي غلطت فيّ بشكل واضح وقوي وبيّن على رؤوس الأشهاد وانا سكتّ وقلتلها تمام وبطلت جدال.
وحد من جيراني عمل نفس الحركة بنفس الطريقة وسكتّ ومشيت.
بلاش اقول ان الكل شاهد اني حد كويس ومش مؤذي ومش بحب غير الخير للغير لكن هقول المعظم او البعض شاهد بكده وعارف.
وفي الموقفين محدّش ردّ عني .. اللي رد ّ رد عندي بيني وبينه عشان يطيب خاطري (شيء حلو بس مش كافي) لأنك لو ما قلتش للغلطان انه غلطان يبقى فين شهادة الحق.
عالم ربنا وانا بحكي بقول كده عشان تبقى فاهم الاتنين عايشين عادي ويمكن مش حاسين ان في غلط منهم بل الاسوأ ممكن يكون عندهم حجة اني أنا الغلطان.
وممكن دنيتنا دي تنتهي من غير ما الحق يبان.. لكن هل ممكن ما يبانش عند ربنا!
خوفي اكون عملت نفس الشيء مع حد تاني وظنيت انه غلط واني أنا اللي صح احسن يكون هو كمان مستنيني يوم القيامة عشان يقولي: أين حقي؟
#خواطر_قد_تصل

اوعى تصبر على علاقتك باللي بيقول سرّك
اوعى تصبر على علاقتك مع اللي بتخاف من غضبه
اوعى تصبر على علاقتك مع سابك وقت عوزك
اوعى تصبر على علاقتك مع اللوّام
اوعى تصبر على علاقتك مع الفاجر في الخصومة
اوعى تصبر على علاقتك مع اللي بيتقلّب في مشاعره
اوعى تصبر حتى لو بقيت وحدك
الوحدة افضل من الأشكال دي

#خواطر_قد_تصل

ممكن حلمك يتغير بسبب درجة وممكن طريقك يتغير بسبب غلطة.
الحلم والطريق اشياء بنعيش معاها وقت طويل من عمرنا وبتبقى جزء منّا لدرجة انه مش بسهولة نتنازل او نتقبل التغيير.
ومع ذلك من نعم ربنا علينا ان مش كل حلم عشناه كان خير بالعكس يمكن كان في كوابيس في حياتنا كنا فاكرين في بداياتها انها قمة سعادتنا وفي آخرها قمة نجاحنا ولما عشناها لقيناها أسوأ كابوس.
بإهمال وتقصير أو تعب وواسطة او بقهر و ظلم ممكن المصير يتغير لكن يبقى السؤال الحقيقي هل دا فعلًا كان الخير.
من غير ما تحتار: المستقبل المناسب ليك هو اللي انت هتعيش فيه بمشيئة الله مش اللي هتعيشه في أحلامك و بس.
#خواطر_قد_تصل

يا ريت نبطّل جملة : أنا لو كنت مكانك كنت عملت كذا وكذا
جملة فاشلة لأنك مكنتش مكاني

#خواطر_قد_تصل

ما تنصحنيش وانت ما تعرفش أنا فين
وما تنصحنيش وانت ما عدّتش باللي أنا فيه
وما تنصحنيش وتنظّر عليّا
وما تنصحنيش إلا وأنت بتقدّم الاستماع قبل الكلام
وما تنصحنيش إلا لو هتحتوي اخطائي وما تفضحنيش عليها
#خواطر_قد_تصل

مسموح لينا نغلط
ومسموح لينا نقع
ومسموح لينا نتأخر
احنا بشر

#خواطر_قد_تصل

اللي عنده أخلاق كويسة يحارب عشان ينقلها لشخص واحد عالأقل.
انقل خلق حميد او عادة كويسة او ابتسامة طيبة او سلام او شيء حلو قرّب يختفي.
سيدنا محمد وصّانا ان حتى لو يوم القيامة جه علينا وفي ايد واحد مننا غرسة زرع يزرعها فورًا ما يتأخرش ودا من باب الخير.
اعتبر كل خير بتعمله زرعة بتغرسها في الأرض عشان يفضل اخلاق كويسة لحد النهاية.
الوقت بقى صعب واللي بيعمل خلق حميد دلوقت بيعمل خير كبير اوي.
#خواطر_قد_تصل

أنت في سباقٍ مع نفسك فقط حتى تصل إلى الرضا فإذا وصلتَ فُزت

#خواطر_قد_تصل

الدنيا صعبة اوي يا جماعة
ولا يهوّنها شيء أد كلمة طيبة واستماع واهتمام
راعوا بعض
وما تكونوش حمل تقيل على الآخرين

#خواطر_قد_تصل

اوعى وانت صغير تتذلل عشان درجتك ولا لقمتك
واوعى وانت كبير تذل حد عشان درجته ولا لقمته
لا الدرجة في ايدك ولا اللقمة من جيبك
اللي خلقك وخلقه جعلكم أسباب بس لتنفيذ حكمته وقضاؤه

#خواطر_قد_تصل

عمرك جربت تدعي بأسماء الله الحسنى
طيب عمرك جربت تدعي بإسم الله (الواسع)
الله يا واسع ارزقني
الله يا واسع اهدني
الله يا واسع وفقني
الله يا واسع نجّني
الله يا واسع وسِّع عليَّ دنيا وآخرة
هو واسع السماوات والأرض، الله
#خواطر_قد_تصل

واعلم أن الله ما وضعك في مكانك إلا بتكليف واعلم انه ما كلّف إلّا وأعان.
بطّل شكوى وصياح بلا فائدة واشتغل على نفسك وافهم انك مسؤول وافهم انك لازم تحب اللي بتعمله عشان في يوم من الايام تعمل اللي بتحبّه.
وافهم انك لازم تستحمل عشان مفيش حصاد إلا لو تعبت وزرعت صح.
الله هو من يسّر والله هو من يعين.
#خواطر_قد_تصل

اللي داخل اولى يقرأ كلامي:
كلمة السر في سنة اولى تلات حاجات لازم تعملهم
الاولى: اوعاك تضيع وقتك لأن الوقت ضيق جدًا بالنسبة لكمية المناهج للأسف.
التانية: اوعاك تفتكر انك لازم تفهم كل حاجة ، دي معلومة غلط، لازم تفهم حاجات وتحفظ حاجات وتشوف ايه الأهم بتذاكره باهتمام اكبر والمتكرر في الامتحانات تذاكره جدًا ودا هتعرفه من زمايلك الاكبر.
التالتة بقى: اوعاك تفتكر نفسك اشطر الناس لانك هتلقى شكل جديد من المذاكرة ومرهِق على فكرة واحلى حاجة انك تقدّر من دلوقت ان الكلية مش راحة ولا حاجة يعني ادّي لكل حاجة مقامها بدل ما تلاقي نفسك زعلان اخر السنة.
واوعاك تنسى: أعطِ نفسك حقها دون عناد او تكبّر بحجة انك شاطر كده كده.
#خواطر_قد_تصل

ايه الحلو في طب رغم كل السوء اللي حوالينا:
١-هتعيش عمرك في بركة وخير مهما قرشك كان قليل.. اوعى تيأس.
٢-هتعيش قريب من احساس الوجع والالم وده هيخليك متواضع وعارف قيمتك ادام ارادة ربنا.. اوعى تتكبر.
٣-هتعيش بدعوة او نظرة سعادة او كلمة شكر من مريض هيفضل هوا وعيلته بيدعولك طول عمرك.. اوعى تنساهم.
٤-هتعيش رغم التعب مرتاح الضمير انك عملت كل اللي في ايديك عشان عيانك، متتخيلش ده هيحسسك اد ايه براحة الضمير..اوعى تبيع ضميرك.
٥-هتعيش حياتك فرحان انك فاهم يعني ايه جسد ربنا خلقه وائتمنك عليه..اوعى تضيع الأمانة.
٦-هتعيش فاهم ان العيان انسان بس حظه وقعه في ايدك لكن رحمة ربنا هتشملك وتشمله اذا اهتميت بيه.. انت ولا حاجة من غير توفيق الله.
٧-هتعيش حياتك عارف انك اذا راعيت ابن حد ربنا هيراعي ابنك واذا راعيت ابوه او امه او اخواته ربنا هيراعي أهلك عشان نيتك..الدنيا دوّارة.
٨-هتعيش تقول الحمد لله على كل نعمه وده لوحده ذكر وشكر وعبادة..الشكر يزيد النعم.
٩-هتعيش تعلم وتتعلم ويفضل مخك ينضف وقلبك يتطهر وروحك تعلي..وفوق كل ذي علمٍ عليم.
١٠- من غير كذب ورغم كل التعب ، أنا بحب طب وفخور بيه وفخور بكل حد لسه عالطريق.
#خواطر_قد_تصل

في بداية العام الدراسي الجديد حط الحاجات قصاد عينيك ونفذها:
١- انت مش هتعمل معجزات يعني متوقع جدًا البدايات الضعيفة وشوية شوية تشد.
٢- انت مش مُلزم تقول لأي حد انت ذاكرت ايه وما ذاكرتش ايه ولو حد سألك عادي ما تردش! عادي والله.
٣- لو قدرت تساعد زمايلك ساعد بس من غير ما تضيع وقتك ، ايوة التيسير عالاخرين حلو بس مش بيتضمن التعسير على نفسك.
٤- ابعد ابعد ابعد عن شلة السوء. انت عارفهم بس بتغفّل نفسك.
٥- الشللية حلوة بس الاختلاط وحش وقلنا مش حلال طالما مفيش ضرورة.
٦- وقتك مهم ومفيش يوم يعدّي من غير مذاكرة.
٧- انت وعلمك وعملك كلهم في سبيل الله، يا رب تفهم.
٨- مش كل حاجة تتذاكر أحيانًا في كلام مش مهم ومش بييجي في الامتحانات ، المقصود ذاكر بذكاء.
٩- عامل العمّال بنظافة قلب دول مش أقل منك عند الله.
١٠- اوعى تنسى: احتسب كل عملك لله.
#خواطر_قد_تصل

الانسان بيحب الشخص السوي
تسأله عن حاجة يديك نصيحة بدون مقابل
ما يحبش يلف ويدور
ناس بتسميه طيب وناس بتسميه أهبل
لكن رب الناس قال (هل جزاء الإحسان إلّا الإحسان)
وسيدنا محمد قال (من فرّج عن أخيه المؤمن كربة من كرب الدنيا فرج الله عنه كربة من كرب يوم القيامة)
الشخص السوي اللي بيدّي ويساعد من غير تفكير دا نعمة من نعم ربنا لو في طريقك حافظ عليه
#خواطر_قد_تصل

ماتنساش:
قُلْ إِنَّ الْفَضْلَ بِيَدِ اللَّهِ يُؤْتِيهِ مَن يَشَاءُ
وما تنساش:
وَلَقَدْ مَنَنَّا عَلَيْكَ مَرَّةً أُخْرَىٰ
وماتنساش:
وَرَحْمَتِي وَسِعَتْ كُلَّ شَيْءٍ
وماتنساش:
فَرِحِينَ بِمَا آتَاهُمُ اللَّهُ مِنْ فَضْلِهِ
وماتنساش أخيرًا:
وَلَٰكِنَّ أَكْثَرَ النَّاسِ لَا يَشْكُرُونَ

فأرجوك خليك من القلّة الشاكرة لنعم الله وما أكثر هذه النعم.
#خواطر_قد_تصل

الشغف عكس الانضباط تمامًا
الشغف يخليك تعمل اللي انت بتحبه بس
الانضباط يخليك تعمل اللي انت مش بتحبه بنفس القدر من المسؤولية زي ما تكون بتحبه
الشغف لا يصنع نجاحًا بل يصنع سعادة مؤقتة
الانضباط يصنع النجاح ويصنع بعده السعادة المستمرة
#خواطر_قد_تصل